5 Jaun₂ lë́₃, co₂dsia₅ jmo₄ ꞌniaꞌ₂ juɨ₁dsian₂ gogꞌ₂-tagꞌ₅₄ a₂jmo₅-dsáu₅ juɨ₁liaꞌ₂ a₂lë́₂ guaꞌ₅₄ ꞌuë₃ la₂: juɨ₁liaꞌ₂ a₂nióꞌ₅ dsa₂ jág₁ a₂tsá₃ dsi₂ten₅₄ nióꞌ₃; juɨ₁liaꞌ₂ a₂jmo₅ dsa₂ cosa lë₁ꞌiog₅, juɨ₁liaꞌ₂ a₂ꞌɨ́n₅ dsɨ́₅ cosa ꞌlɨgꞌ₅₄, juɨ₁liaꞌ₂ a₂ꞌɨ́n₅ dsɨ́₅ dsa₂ jme₃ꞌŋióiꞌ₃ a₂ca₂tɨ́n₂ i₂siánꞌ₂. Ia₁ a₂co₂jaun₂ bá₄ në₅ juɨ₁liaꞌ₂ a₂jme₂gan₃ dsa₂ diú₄ lag₄.

6 Ia₁ ꞌuɨg₅₄ quióꞌ₄ a₂le₂në₅ bá₄ já₅ uɨg₅ gau₂ a₂ꞌë́₂ Diú₄ ne₄ quióꞌ₅ jaun₅ dsa₂ i₂tsá₃ neꞌ₅₄.^a

7 Juɨ₅ le₂në₅ jme₁i₂nioꞌ₄ ꞌniaꞌ₂ liaꞌ₂ lë́₅ jme₁chanꞌ₂ ꞌniaꞌ₂ le₂jŋiá₅.

8 La₁ rë₂në́₃ në́₃, tí₃ ca₂le₃jë́₃ a₂le₂në₅: juɨ₁liaꞌ₂ a₂ꞌi₄ ꞌnei₂ ꞌauꞌ₂ ꞌniaꞌ₂, juɨ₁liaꞌ₂ a₂lë₁qui₂rë₂ꞌnegꞌ₂, juɨ₁liaꞌ₂ a₂ꞌlɨgꞌ₅₄ a₂qui₂dsɨ₂jŋia₅ ꞌauꞌ₂ ꞌniaꞌ₂, juɨ₁liaꞌ₂ a₂ꞌɨ́nꞌ₅ ꞌniaꞌ₂ uɨg₅ rɨ́ngꞌ₂, juɨ₁liaꞌ₂ jág₁ ga₂ a₂ꞌuë₂ mɨ₂ꞌoꞌ₅₄.

9 Tsá₃ ma₃dsia₂ ꞌniaꞌ₂ jág₁ të₂jág₁ quianꞌ₅₄ rɨ́nꞌ₂ ꞌniaꞌ₂ le₂jangꞌ₂ le₂jangꞌ₂, ia₁ ma₂dsianꞌ₅₄ ꞌniaꞌ₂ cau₅ dsa₂ ꞌón₅ ꞌa₂ liaꞌ₂ jme₁lɨ́nꞌ₄ ꞌniaꞌ₂ le₂jŋiá₅, quianꞌ₅₄ guë́₄ ca₂le₃jë́₃ a₂jme₁jmo₅-dsáu₅,

10 co₂ꞌnióꞌ₄ ma₂ca₂quiꞌ₂ táng₃ ꞌniaꞌ₂ caun₂ a₂ꞌmɨ́₂, co₂ꞌnióꞌ₄ a₂lɨ́ngꞌ₅ dsa₂ ꞌmɨ́₂; a₂caun₂ qui₂rë₂ꞌmagꞌ₂ ꞌniaꞌ₂, ia₁jaun₂ dsi₁nógꞌ₅ ja₁le₃cuɨnꞌ₂ ꞌniaꞌ₂ dse₃ lɨn₃ Diú₄, ja₁le₃lénꞌ₂ ꞌniaꞌ₂ liaꞌ₂ lɨ́n₅ ꞌéi₂ i₂ca₂jmóꞌ₂ ꞌniaꞌ₂.

11 Ja₁jaun₂ tsá₃ ꞌein₂ jmo₅ jma₃quén₅ juɨ₁liaꞌ₂ dsɨ₂nau₂ o₃ dsa₂ judíos ꞌe₂, juɨ₁liaꞌ₂ dsa₂ i₂rë₂uɨng₄ o₃ tsá₃ rë₂uɨng₄ quióꞌ₅ ꞌe₂, juɨ₁liaꞌ₂ dsa₂ i₂chan₂ uɨ́ng₂, o₃ i₂chan₂ máꞌ₂ ꞌe₂, juɨ₁liaꞌ₂ dsa₂ i₂jme₂ti₃ ta₁ ne₄ juɨg₅₄, o₃ i₂tsá₃ ꞌein₂ ne₄ jme₂ti₃; la₁ Cristo bá₄ quen₅ ne₄ ca₂le₃jë́₃, tonꞌ₂ ꞌein₅₄ ja₁con₂ ca₂le₃jɨ́n₃.

12 Jaun₂ lë₃, rɨnꞌ₅₄ jniog₄, juɨ₁liaꞌ₂ ca₂tɨ́n₂ jmo₃ dsa₂ i₂ma₂quiónꞌ₂ Diú₄, i₂ma₂lë́₅ ꞌí₁ quiáin₅, i₂ŋɨ́₄ lë₃ ꞌnioi₃ ꞌéi₂: quiꞌ₂ ꞌniaꞌ₂ a₂rë₂lɨngꞌ₅₄ a₂ŋéi₂ ꞌauꞌ₂, a₂ꞌua₁ ꞌauꞌ₂, a₂jmóꞌ₂ megꞌ₂, a₂jme₁ganꞌ₃ ꞌniaꞌ₂ rɨ́ngꞌ₂, a₂juɨnꞌ₂ ꞌauꞌ₂ ꞌniaꞌ₂ në́₃.

13 Jmo₄ ꞌniaꞌ₂ tióꞌ₃ ꞌauꞌ₂ quianꞌ₅₄ rɨ́ngꞌ₂ le₂jangꞌ₂ le₂jangꞌ₂, tonꞌ₂ ꞌén₃ ꞌniaꞌ₂ dsáu₁ rɨ́ngꞌ₂, në₁juaꞌ₂ chan₂ i₂dsia₅ dsáu₁ rɨnꞌ₅₄. Juɨ₁liaꞌ₂ ca₂ꞌén₂ Te₁guiꞌ₅₄ dsáuꞌ₂ ꞌniaꞌ₂ guiongꞌ₅₄, le₂jaun₂ jmo₄ ꞌniaꞌ₂ ján₃.

14 A₂dsen₅₄ guë́₄ jë₄ ca₂le₃jë́₃, quiꞌ₂ ꞌniaꞌ₂ quianꞌ₅₄ a₂jme₁ꞌnióꞌ₄ ꞌniaꞌ₂ rɨ́ngꞌ₂,^b a₂në₅ bá₄ jmo₃ ꞌag₃ co₂dsia₅ caun₂ jág₁ ꞌniaꞌ₂.

15 Juɨ₁le₂gon₂ të₂ꞌauꞌ₂ ꞌniaꞌ₂ a₂ꞌei₅ tei₄ quióꞌ₅ Cristo,^c ia₁ ta₁ jaun₂ ma₂qui₂rë₂té₄ ꞌniaꞌ₂ a₂lénꞌ₂ caun₂ bá₄ ŋɨ́₅. Jaun₂ jmo₄ ꞌniaꞌ₂ ꞌauꞌ₂ cuëꞌ₅₄ ti₁ꞌmagꞌ₄.

16 Juɨ₁të₂gua₄ të₂ꞌauꞌ₂ ꞌniaꞌ₂ liaꞌ₂ rë₂tsón₂ jág₁ dse₃ quióꞌ₅ Cristo; quianꞌ₅₄ ca₂le₃jë́₃ a₂ŋɨ́ꞌ₂ dsɨ́₅ Diú₄, jë₁jme₂tɨ́nꞌ₂ ꞌniaꞌ₂ rɨ́ngꞌ₂, jë₁qui₂tonꞌ₂ ꞌniaꞌ₂ jág₁ rɨ́ngꞌ₂ të₂le₃ quianꞌ₅₄ salmos, himnos, son₅₄ a₂gu₂dsí₂ në́₃, a₂qui₁ꞌë́ꞌ₂ ꞌniaꞌ₂ a₂cuëꞌ₅₄ ti₁ꞌmagꞌ₄ Diú₄ juɨ₅ të₂ꞌauꞌ₂ ꞌniaꞌ₂.

17 Juɨ₁ꞌe₂ guë́₃ a₂jmóꞌ₂, o₃ ꞌe₂ jág₁ dsiáꞌ₁ ꞌniaꞌ₂, jmo₄ ꞌniaꞌ₂ ca₂le₃jë́₃ o₄quióꞌ₄ Te₁guiꞌ₅₄ Jesús, qui₁cuëꞌ₅₄ ꞌniaꞌ₂ ti₁ꞌmagꞌ₄ Diú₄ Jmei₂ jniog₄ le₃quióꞌ₅ ꞌéi₂.

18 ꞌNiaꞌ₂ dsa₂ mɨ́₂ i₂chan₂ dsɨ₂i₂gu₂, tiónꞌ₂ ꞌniaꞌ₂ ꞌéiꞌ₃ quióꞌ₅ dsa₂ ŋeꞌ₂ quiángꞌ₂, juɨ₁liaꞌ₂ dsi₂ten₅₄ ia₁ lɨ́ngꞌ₅ dsa₂ ꞌén₂ le₃quióꞌ₅ Te₁guiꞌ₅₄.

19 ꞌNiaꞌ₂ guëꞌ₂ dsa₂ ŋeꞌ₂ i₂chan₂ dsa₂ mɨ́₂ quián₅, jme₁ꞌnió₄ ꞌniaꞌ₂ dsa₂ mɨ́₂ quiángꞌ₂, tsá₃ jmoꞌ₂ ꞌniaꞌ₂ ꞌuaꞌ₂ ꞌauꞌ₂ ja₁coin₂.

20 ꞌNiaꞌ₂ chiꞌ₂-guein₂, nei₂ ꞌniaꞌ₂ gau₂ jág₁ quióꞌ₅ chogꞌ₂-ŋéiꞌ₅ jë₄ le₃jë́₃, ia₁ a₂në₅ bá₄ të₅ dsɨ́₅ Te₁guiꞌ₅₄.

21 ꞌNiaꞌ₂ guëꞌ₂ në́₃, jmei₂ chiꞌ₂, tsá₃ tóꞌ₂ ꞌniaꞌ₂ ꞌnei₂ dsɨ́₅ chiꞌ₂-guein₂ quiánꞌ₂ ꞌniaꞌ₂, ia₁jaun₂ tsá₃ jén₂ dsɨ́₅.

22 ꞌNiaꞌ₂ dsa₂ i₂jme₂ti₃ ne₄ dsa₂, jme₁ti₁ ꞌniaꞌ₂ ca₂le₃jë́₃ ꞌe₂ ta₁ ti₂néiꞌ₂ juɨgꞌ₂ i₂lɨ́n₅ juɨgꞌ₂ të₂le₃ ne₄ guaꞌ₅₄ ꞌuë₃ la₂, on₃juaꞌ₅₄ jmáꞌ₃ jme₁jág₅ ia₁jaun₂ të₃tsɨnꞌ₅₄ ꞌniaꞌ₂ dse₃ quiainꞌ₅₄, la₁ jmo₄ bá₄ juɨ₅ të₂ꞌauꞌ₂ a₂tí₅ të₃dsónꞌ₂, ia₁ të₂le₃ a₂gangꞌ₃ Te₁guiꞌ₅₄.

23 Juɨ₁ꞌe₂ guë́₃ caun₂ a₂jmóꞌ₂ ꞌniaꞌ₂, jmo₄ ꞌniaꞌ₂ a₂ꞌŋio₂ ꞌauꞌ₂ co₂ꞌnióꞌ₄ a₂jmoꞌ₂ ta₁ le₃quióꞌ₅ Te₁guiꞌ₅₄, on₃juaꞌ₅₄ le₃quióꞌ₅ dsa₂.

24 Ia₁ ma₂ŋiꞌ₅₄ bá₄ ꞌniaꞌ₂, Te₁guiꞌ₅₄ bá₄ cuë₃ ꞌliangꞌ₅₄ a₂ma₂lë́₅ jág₁ ca₂tɨ́ngꞌ₂. Ia₁ ne₄ Te₁guiꞌ₅₄ Cristo jme₂tíꞌ₁ ꞌniaꞌ₂ ta₁.

25 La₁ juɨ₁liaꞌ₂ i₂jmo₅-dsáu₅ a₂ꞌlɨgꞌ₅₄, gue₃ bá₄ ꞌliainꞌ₅₄ liaꞌ₂ conꞌ₂ lë́₅ ꞌlɨgꞌ₅₄ a₂jmo₂₃. Ia₁ tsá₃ jma₃quén₅ jɨ́n₂ Diú₄ le₂jan₂ le₂jan₂ dsa₂.