2
Ia₁ ꞌnio₃ jniá₂ juɨ₁le₃ŋiꞌ₅₄ ꞌniaꞌ₂ ꞌa₂ liaꞌ₂ ŋɨ́₄ lë₃ quian₅ ta₁ a₂quɨ́ngꞌ₅ bí₂ o₄quiánꞌ₂ ꞌniaꞌ₂, quianꞌ₅₄ o₄quióꞌ₄ i₂chan₂ juɨg₂ Laodicea, o₄quióꞌ₄ ca₂le₃jɨ́n₃ i₂tsá₃ cuɨg₅ i₂tsá₃ jág₂ dsi₁ne₁ në́₃.
2 Jmo₅ jniá₂ bí₂ le₂në₅ ia₁jaun₂ qui₂le₁ꞌág₄ liánꞌ₂ dsɨ́₅ ꞌéi₂, caun₂ ꞌei₅ jág₁ jme₂ꞌnioi₃ rɨinꞌ₅₄; ia₁jaun₂ bá₄ ꞌio₃ a₂quen₅ lɨn₃ a₂le₂jaun₂ a₂caun₂ le₁ꞌág₄ dsɨ́₅ ia₁ a₂qui₂ma₂ꞌan₂ dsɨ́₅; tonꞌ₂ ia₁jaun₂ le₃ŋɨ́iꞌ₂ jág₁ a₂rë₂ꞌma₄ quióꞌ₅ Diú₄. Jág₁ jaun₂ në́₃, Cristo ꞌŋiog₅ bá₄ ꞌéi₂.a
3 Ia₁ të₂le₃ ja₁con₂ ꞌéi₂ bá₄ qui₂rë₂ꞌma₄ jë₂ jág₁ a₂quen₅ lɨn₃ a₂lé₂ le₃ŋɨ́ꞌ₂ dsɨ́₅ dsa₂, a₂lé₂ le₃ŋi₅ dsa₂ në́₃.
4 A₂në₅ juɨ́g₂ ꞌniaꞌ₂ ia₁jaun₂ ꞌi₁jan₂ tsá₃ ꞌein₂ juɨ₁jme₂gau₅ ꞌniaꞌ₂ quianꞌ₅₄ jág₁ a₂ꞌioꞌ₂ quióꞌ₅.
5 Jaun₂ o₁jŋiaꞌ₅₄ la₂ tsá₃ quianꞌ₅₄ jniá₂ ꞌniaꞌ₂ dsi₁ne₁ ꞌŋió₃ dsónꞌ₂, la₁ ꞌeng₅₄ bá₄ quianꞌ₅₄ ꞌniaꞌ₂ të₂le₃ quianꞌ₅₄ jme₂dsí₂, jmo₂₃ ꞌioꞌ₂, jág₅ ꞌa₂ liaꞌ₂ tiongꞌ₅₄ rë₂ conꞌ₂ dsi₂ten₅₄, tonꞌ₂ tióngꞌ₂ bá₄ tiá₂ a₂ꞌéngꞌ₂ le₃quióꞌ₅ Cristo.
6 Jaun₂ lë₃, le₂në₅ juɨ₁liaꞌ₂ ca₂guenꞌ₅₄ ꞌniaꞌ₂ Cristo Jesúsb a₂lɨ́in₅ juɨgꞌ₂ ꞌniaꞌ₂, caun₂ juɨ₁i₂nioꞌ₄ bá₄ ꞌniaꞌ₂ le₃quióꞌ₅ ꞌéi₂;
7 juɨ₁të₂ton₅₄ bá₄ jmú₄ juɨ₅ jme₂dsí₂ quiánꞌ₂ ꞌniaꞌ₂ të₂le₃ quióꞌ₅ ꞌéi₂, juɨ₁qui₂dsɨ₂cónꞌ₃ bá₄ ꞌniaꞌ₂ le₃quióꞌ₅ ꞌéi₂ të₂le₃ ia₁ a₂ꞌéngꞌ₂, liaꞌ₂ conꞌ₂ lë́₅ a₂ca₂rë₂tɨ́nꞌ₃ ꞌniaꞌ₂, a₂rë₂tsón₂ të₂ꞌauꞌ₂ a₂cuëꞌ₅₄ ti₁ꞌmagꞌ₄ Diú₄.
A₂le₃chan₂ dsa₂ caun₂ juɨ₅ ꞌmɨ́₂ le₃quióꞌ₅ Cristo
8 ꞌÍ₁ jmo₄ ꞌniaꞌ₂, ia₁ conꞌ₂ tsá₃ ŋó₅ në₁ca₂tág₃ dsa₂c të₂le₃ quianꞌ₅₄ jág₁ a₂jŋiaꞌ₅₄ ŋɨ́ꞌ₂ dsɨ́₅ dsa₂ mɨ₂güɨ́g₃, a₂jme₂gau₅, a₂tsá₃ ta₁ tí₄, liaꞌ₂ conꞌ₂ lë́₅ tag₄ chíꞌ₅ quióꞌ₅ dsa₂, a₂cha₂ ꞌuɨg₅₄ ꞌa₂ conꞌ₂ jŋiaꞌ₅₄ lë́₂ a₂cha₂ mɨ₂güɨ́g₃ la₂, on₃juaꞌ₅₄ rëꞌ₂ liaꞌ₂ conꞌ₂ lë́₅ jág₁ quióꞌ₅ Cristo.
9 Ia₁ ja₁con₂ Cristo bá₄ të₁gua₁ chi₁dsáin₃ ca₂le₃jë́₃ liaꞌ₂ conꞌ₂ lë́₅ niog₅ lɨ́n₅ Diú₄.
10 Jaun₂ ꞌniaꞌ₂ në́₃, ma₂le₁ꞌŋiaꞌ₅ ꞌniaꞌ₂ le₃quióꞌ₅ ꞌéi₂, i₂lɨ́n₅ co₂ꞌnióꞌ₄ mɨ₂dsi₄ ne₄ quióꞌ₅ ca₂le₃jɨ́n₃ i₂gon₂, ca₂le₃jɨ́n₃ i₂jiog₅ ꞌéiꞌ₃ ján₃.
11 Le₂jaun₂ bá₄ ján₃, ia₁ a₂quianꞌ₅₄ ꞌniaꞌ₂ Cristo, co₂ꞌnióꞌ₄ bá₄ ma₂qui₂rë₂uɨng₄ quiánꞌ₂ ꞌniaꞌ₂, ma₂lë́₅ léi₄. La₁ on₃juaꞌ₅₄ rëꞌ₂ liaꞌ₂ lë́₅ jmo₅ dsa₂ mɨ₂güɨ́g₃, të₂le₃ a₂ma₂qui₂ma₂tíꞌ₃ ꞌniaꞌ₂ ꞌnauꞌ₄ dso₄ liaꞌ₂ ꞌɨ́n₅ dsɨ́₅ nɨ₁ŋɨꞌ₁; ma₂qui₂le₁lɨ́nꞌ₅ ꞌniaꞌ₂ léi₄ le₃quióꞌ₅ Cristo.
12 Ia₁ liaꞌ₂ conꞌ₂ jme₁ca₂qui₂ca₂jŋóꞌ₂ ꞌniaꞌ₂ jmɨg₂,d në₂jag₄ bá₄ ca₂i₃ꞌonꞌ₃ ꞌniaꞌ₂ co₂lë₅ quianꞌ₅₄ Cristo, ján₃ guëꞌ₂ le₂jaun₂ ca₂jenꞌ₅₄ ꞌniaꞌ₂ co₂lë₅ quianꞌ₅₄ ꞌéi₂, ia₁ ca₂rë₃ꞌénꞌ₂ ꞌniaꞌ₂ juɨ₅bí₂ quióꞌ₅ Diú₄ a₂ca₂jme₃jeinꞌ₅₄ ja₁jme₁rë₂ꞌlɨin₅₄.
13 Liaꞌ₂ conꞌ₂ jme₁rë₂ꞌlɨnꞌ₄ ꞌniaꞌ₂ le₃quióꞌ₅ jme₂dsí₂, jme₁qui₂le₁cánꞌ₂ jme₁qui₂le₁quianꞌ₄ ꞌniaꞌ₂ dsáuꞌ₂, në₂jag₄ bá₄ a₂tsá₃ jme₁rë₂uɨng₄ loꞌ₄* ꞌniaꞌ₂ jme₁changꞌ₂; la₁ Diú₄ në́₃ ma₂toꞌ₂ táng₃ jme₂dsí₂ ꞌniaꞌ₂ co₂lë₅ quianꞌ₅₄ Cristo, qui₂ca₂ꞌéin₂ bá₄ jë₂ dsáuꞌ₂ ꞌniaꞌ₂.
14 Co₂dsia₅ ca₂ꞌéin₂ bá₄ jág₁ a₂jme₁chi₁ton₅ ne₄ si₂ a₂jme₁ron₅ a₂jme₁juáꞌ₂ a₂jme₁rag₂ jniog₄, Si₂ ꞌÉiꞌ₃ jaun₂ a₂jme₁ꞌliogꞌ₅ jniog₄; ma₂ca₂jŋiáꞌ₂ cau₅ co₂ŋeiꞌ₅₄, në₂jag₄ bá₄ a₂ca₂i₃ba₅₄ mɨ₂ŋí₁ si₂ jaun₂ dsoꞌ₂ cróg₄.
15 Le₂në₅ co₂dsia₅ ca₂cheinꞌ₃ ꞌuɨn₃ jme₂dsí₂ i₂jme₁gon₂, i₂jme₁jiog₅ ꞌéiꞌ₃ në́₃, jaun₂ ca₂jiog₃ cha₂ juɨ́g₃ të₃ jág₅ ca₂le₃jɨ́n₃ dsa₂, jme₁ca₂tióꞌ₃ ca₂tiainꞌ₃ ꞌéi₂ jág₁, ne₄ cróg₄.e
ꞌNioꞌ₂ ꞌniaꞌ₂ a₂cha₂ le₃quióꞌ₅ gueiꞌ₅₄ i₂juɨ́g₃
16 Jaun₂ lë₃, ꞌi₁jan₂ tsá₃ ꞌein₂ qui₂o₁ꞌag₅₄ ꞌniaꞌ₂ o₄quióꞌ₄ ꞌe₂ má₃ quë́ꞌ₂, o₃ juɨ₁liaꞌ₂ ꞌe₂ qui₂ꞌágꞌ₂ ꞌniaꞌ₂, o₃ quianꞌ₅₄ juɨ₁liaꞌ₂ jmɨg₄ jme₁niog₅ jmɨg₄, o₃ juɨ₁liaꞌ₂ jmɨg₄ tsɨꞌ₂ ꞌioꞌ₅₄,f o₃ juɨ₁liaꞌ₂ jmɨg₄ sa₅₄ në́₃.
17 Ca₂le₃jë́₃ a₂në₅, lë́₅ co₂ꞌnióꞌ₄ caun₂ ꞌénꞌ₁ quióꞌ₅ a₂ꞌi₄ ꞌéiꞌ₃ jiá₃ bá₄ jaun₂, la₁ia₁ juɨ₁liaꞌ₂ a₂tí₅ të₃dsónꞌ₂, Cristo bá₄ ꞌéi₂.
18 Tsá₃ cuë₂ ꞌniaꞌ₂ jmɨg₄ juaꞌ₅₄ ꞌliogꞌ₃ dsa₂ cau₅ ꞌniaꞌ₂, juɨ₁liaꞌ₂ dsa₂ i₂jmo₅ a₂lɨ́in₅ meiꞌ₂, tonꞌ₂ jme₂juɨinꞌ₂ ángeles në́₃. Qui₂tiáin₂ ꞌŋio₅ lɨn₃ a₂cha₂ të₅ ne₅₄ a₂lë₁qui₂jág₅,g ꞌŋio₅ jme₂cainꞌ₅₄ jmo₂₃ róin₂ a₂qui₂ŋɨ́ꞌ₂ dsɨ́₅ guioin₅₄.
19 Dsa₂ i₂le₂ꞌéi₂ në́₃, tsá₃ chi₁chainꞌ₅ le₃quióꞌ₅ Cristo, i₂lɨ́n₅ mɨ₂dsi₄ i₂jme₂tau₅₄ ca₂le₃jë́₃ ja₁qui₂le₁tionꞌ₅₄ quióꞌ₅, jmo₂₃ qui₂dsɨ₂cón₃ ta₁caun₂ nɨ₁ŋɨ₁₂, liaꞌ₂ conꞌ₂ lë́₅ ꞌŋio₂ dsɨ́₅ Diú₄.
20 Chi₂juaꞌ₂ jaun₂ ma₂dsanꞌ₃ bá₄ ꞌniaꞌ₂ quianꞌ₅₄ Cristo, ja₁con₂ jág₁ le₂ꞌuɨg₅₄ liaꞌ₂ ŋɨ́ꞌ₂ dsɨ́₅ dsa₂ mɨ₂güɨ́g₃, ¿ꞌe₂ guëꞌ₂ ꞌuɨg₅₄ lë₃ në́₃, qui₂tiánꞌ₅ guë́₄ ꞌniaꞌ₂ ꞌéiꞌ₃ në₂jag₄ a₂lɨ́ngꞌ₅ bá₄ guë́₄ ꞌniaꞌ₂ dsa₂ mɨ₂güɨ́g₃?
21 Co₂ꞌnióꞌ₄ a₂juáꞌ₂ ꞌéiꞌ₃: “Tsá₃ i₂tí₅ gogꞌ₂, tsá₃ i₂quë́ꞌ₂ má₃ ó₃, tsá₃ i₂jmáꞌ₂ a₂ó₃ në́₃.”
22 Ta₁jë₂ bá₄ a₂në₅ dsiá₃ juɨ₁liaꞌ₂ jë₁jmóꞌ₂ ta₁. Të₂le₃ ia₁ conꞌ₂ lë́₅ ꞌéiꞌ₃ a₂jme₂tag₅ dsa₂ mɨ₂güɨ́g₃ bá₄ jaun₂.
23 Jág₁ a₂le₃ŋɨ́ꞌ₂ dsɨ́₅, jág₁ le₂në₅, lé₂ le₃lɨ́n₂ dsa₂, ia₁ qui₂chi₂quióng₂ jmɨg₄ ꞌŋio₅ lɨn₃ a₂jmo₃ dsa₂ a₂ŋɨ́₄ cuɨin₂₃ Diú₄, a₂qui₂jmo₂₃ meiꞌ₂, a₂qui₂cuë́ꞌ₅ uɨg₅ nɨ₁ŋɨ₁₂ në́₃; la₁ ꞌi₁ca₂juɨg₄ tsá₃ ꞌe₂ ta₁ jmo₃ juaꞌ₅₄ quianꞌ₅₄ a₂në₅ lé₂ le₃guiaꞌ₃ dsa₂ cau₅ a₂ꞌágꞌ₄ dsɨ́₅ a₂mɨ₅ nɨ₁ŋɨ₁₂.