2 Chi₂lenꞌ₄ jniá₂ Evodia quianꞌ₅₄ Síntique ján₃, jmo₄ ꞌniaꞌ₂ caun₂ jág₁ jɨn₄ rɨ́ngꞌ₂ o₄quióꞌ₄ Te₁guiꞌ₅₄.

3 Quianꞌ₅₄ ꞌne₂, rɨnꞌ₅₄ jniog₄ i₂co₂dsia₅ jmo₂ ta₁, juɨ́g₂ jniá₂ ꞌne₂ a₂jme₁ꞌongꞌ₁ dsa₂ mɨ́₂ rɨnꞌ₅₄ jniog₄ në₅, ia₁ ꞌéi₂ ca₂quɨ́nꞌ₃ bí₂ i₂quianꞌ₄ jniá₂ jme₁ca₂ꞌë́₃ jág₁ dse₃ a₂lión₂ dsa₂, quianꞌ₅₄ Clemente në́₃ quianꞌ₅₄ guë́₄ rɨnꞌ₅₄ siánꞌ₂ ca₂jmo₃ ta₁ quianꞌ₅₄ jniá₂. Ma₂le₁ton₅ liaꞌ₂ chein₂ ne₄ si₂ a₂le₃chain₂ co₂tan₅₄.

4 ꞌIoꞌ₂ jmo₄ ꞌniaꞌ₂ co₂tan₅₄ le₃quióꞌ₅ Te₁guiꞌ₅₄. Cónꞌ₂ siáꞌ₂ juáꞌ₅ táng₃, ¡ꞌioꞌ₂ jmo₄ ꞌniaꞌ₂!

5 Juɨ₁le₂jniá₂ a₂ꞌua₁ ꞌauꞌ₂ ꞌniaꞌ₂ jë₄ quióꞌ₅ le₃jɨ́n₃ dsa₂, ia₁ ma₂ja₂quián₃ guanꞌ₂ Te₁guiꞌ₅₄.

6 Tsá₃ jmoꞌ₂ ꞌniaꞌ₂ ꞌɨ₅ ꞌauꞌ₂ ꞌi₁caun₂. La₁ chi₂juaꞌ₂ ꞌe₂ lë́₅, chi₂lenꞌ₄ ꞌniaꞌ₂ Diú₄; mɨ₄ ꞌniaꞌ₂ ne₄ ꞌéi₂ tonꞌ₂ ján₃ guëꞌ₂ cuëꞌ₅₄ ꞌniaꞌ₂ ti₁ꞌmagꞌ₄ ꞌéi₂.

7 Jaun₂ Diú₄ bá₄ jmo₃ ꞌí₁ jme₂dsí₂ quiánꞌ₂ ꞌniaꞌ₂ quianꞌ₅₄ a₂qui₂dsɨ₂jiog₅ ꞌauꞌ₂ ꞌniaꞌ₂ në́₃, të₂le₃ quianꞌ₅₄ Cristo Jesús. Diú₄ bá₄ jmo₃ a₂ꞌag₃ tei₄ ꞌauꞌ₂ ꞌniaꞌ₂ ŋag₅₄ guë́₄ lɨn₃ conꞌ₂ guë́₄ a₂lé₂ le₃ŋɨ́ꞌ₂ dsa₂.

8 Jaun₂ lë₃, rɨnꞌ₅₄ jniog₄, juɨ₁dsi₂jiog₅ ꞌauꞌ₂ ꞌniaꞌ₂ juɨ₁ꞌe₂ a₂tí₅ dsónꞌ₂, juɨ₁ꞌe₂ a₂ca₂tɨ́n₂ jme₃góꞌ₃ dsa₂, juɨ₁ꞌe₂ a₂dsi₂ten₅₄, juɨ₁ꞌe₂ a₂le₁jë́₃, juɨ₁ꞌe₂ a₂ꞌioꞌ₂, juɨ₁ꞌe₂ a₂quen₅ jág₁ dse₃; chi₂juaꞌ₂ cha₂ a₂jláꞌ₁ a₂ca₂tɨ́n₂ ꞌag₃ dse₃ jág₁, a₂jaun₂ bá₄ juɨ₁dsi₂jiog₅ ꞌauꞌ₂ ꞌniaꞌ₂.

9 Jme₁dsau₅ ꞌniaꞌ₂ caun₂ a₂ma₂gueꞌ₅₄ ꞌniaꞌ₂, a₂ma₂ca₂jme₁tag₅ a₂ma₂neiꞌ₂ ꞌniaꞌ₂ ma₂juáꞌ₃ quianꞌ₅₄ a₂qui₂ma₂të́₂ neꞌ₅₄ ma₂jagꞌ₅₄ ꞌa₂ liaꞌ₂ jmo₅ jniá₂: le₂jaun₂ jmo₄ ꞌniaꞌ₂. Jaun₂ Diú₄ në́₃ i₂jmo₅ ꞌag₅ tei₄ ꞌauꞌ₂ ꞌniaꞌ₂, ꞌein₅₄ ja₁conꞌ₂ ꞌniaꞌ₂.

10 ꞌE₂ guë́₄ të₅ dsɨ₃ ꞌioꞌ₂ jéin₅ guë́₄ lɨn₃ le₃quióꞌ₅ Te₁guiꞌ₅₄ ꞌa₂ liaꞌ₂ lë₃ a₂ca₂dsáuꞌ₃ táng₃ ꞌauꞌ₂ ꞌniaꞌ₂ jniá₂. Tsá₃ ꞌnio₃ jniá₂ juáꞌ₄ juaꞌ₅₄ a₂ma₂i₂ꞌén₂ ꞌauꞌ₂ ꞌniaꞌ₂ jniá₂, të₂le₃ ia₁ a₂tsá₃ ma₂cuɨn₃ jmɨg₄ jme₁ꞌoꞌ₁ bá₄.

11 On₃juaꞌ₅₄ rëꞌ₂ juáꞌ₅ jniá₂ ia₁ a₂ca₂rë₃ꞌnióꞌ₃ quió₃; ia₁ jniá₂ në́₃ ma₂ca₂rë₃tɨ́n₃ bá₄ jniá₂ a₂ꞌei₅ dse₃ dsɨ₃ chi₂juaꞌ₂ ꞌa₂ liaꞌ₂ lë́₅ a₂chang₂.

12 Ma₂guion₄ bá₄ jniá₂ ꞌa₂ liaꞌ₂ lë́₅ jme₁rë₂chang₂ te₂ŋég₂, ján₃ guëꞌ₂ guion₄ jniá₂ ꞌa₂ liaꞌ₂ lë́₅ a₂qui₂rë₂tsón₂ quió₃. Jaun₂ ma₂ca₂rë₃tɨ́ng₃ bá₄ a₂chéngꞌ₅ tiá₂ juɨ₁lë́₄ bá₄ ꞌa₂ liaꞌ₂ lë́₅ chang₂. Cha₂ jme₁lɨn₅₄ qui₂rë₂tang₅₄ dse₃ lɨn₃, o₃ ꞌong₅₄ ꞌe₂ jme₁lɨn₅₄. Cha₂ jme₁lɨn₅₄ qui₂rë₂tsón₂, o₃ a₂tsá₃ ꞌe₂ cha₂ meiꞌ₂ ꞌe₂.

13 Ca₂le₃jë́₃ bá₄ quɨꞌ₅₄ jniá₂ jmɨg₄ të₂le₃ quianꞌ₅₄ Cristo i₂cuë₅ bí₂.

14 La₁ia₁, dse₃ bá₄ jaun₂ ca₂quenꞌ₄ ꞌniaꞌ₂ o₂i₁ dsɨ₅ a₂quian₄ jniá₂.

15 Juɨ₁liaꞌ₂ ma₂ŋiꞌ₅₄ ꞌniaꞌ₂, rɨnꞌ₅₄ jniog₄ i₂chan₂ juɨg₂ Filipos, liaꞌ₂ conꞌ₂ jme₁ca₂jme₁lióg₄ jniá₂ ca₂ꞌë́₃ jág₁ dse₃ a₂lión₂ dsa₂, jme₁ca₂o₃ꞌɨ́n₃ jniá₂ ꞌuë₃ Macedonia, ꞌi₁caun₂ guáꞌ₅ tsá₃ ca₂jme₃quenꞌ₄ të₂le₃ quianꞌ₅₄ cu₄; jŋiaꞌ₅₄ liaꞌ₂ ꞌniaꞌ₂ bá₄.

16 Ia₁ liaꞌ₂ conꞌ₂ jme₁ꞌen₅₄ jniá₂ juɨg₂ Tesalónica, on₃juaꞌ₅₄ co₂ráun₂ ca₂jme₁ꞌoꞌ₁ ꞌniaꞌ₂ jniá₂, ca₂chenꞌ₂ ꞌniaꞌ₂ cu₄ ꞌuɨg₅₄ ia₁ a₂ca₂rë₃ꞌnióꞌ₃ quió₃.

17 On₃juaꞌ₅₄ rëꞌ₂ a₂dsɨ₂jiog₅ dsɨ₃ a₂jŋiaꞌ₅₄ caun₂ le₃cha₂ a₂ca₂tɨ́n₂ jniá₂ a₂qui₁gue₅₄; a₂jaun₂ bá₄ ꞌnio₃ jniá₂ a₂le₃cha₂ ꞌuɨg₅₄ a₂jme₃ꞌmagꞌ₂ Diú₄ quiánꞌ₂ ꞌniaꞌ₂.

18 La₁ ma₂gue₃ bá₄ jniá₂ le₃jë́₃, të₂le₃ lë́₅ guë́₄. Quianꞌ₅₄ a₂ca₂chenꞌ₂ ꞌniaꞌ₂ të₂le₃ quianꞌ₅₄ Epafrodito, ma₂rë₂tsón₂ bá₄ quió₃. A₂ca₂chenꞌ₂ ꞌniaꞌ₂ jaun₂ quió₃, lë́₅ juɨ₁liaꞌ₂ lë́₅ caun₂ a₂rë₂jenꞌ₅₄ ne₄ Diú₄ a₂ja₂ mɨ₂juɨg₂ a₂ꞌŋio₂ dsɨ́₅ Diú₄ guéiꞌ₅.

19 Diú₄ quiáng₃ në́₃, ꞌéi₂ bá₄ cuë₃ ca₂le₃jë́₃ a₂ꞌnióꞌ₅ quiánꞌ₂ ꞌniaꞌ₂ liaꞌ₂ conꞌ₂ lë́₅ a₂ŋɨ́₄ lë₃ jláꞌ₁ a₂rë₂tsón₂ quióꞌ₅, cuë́ꞌ₃ ꞌniaꞌ₂ të₂le₃ quianꞌ₅₄ Cristo Jesús.

20 ¡Juɨ₁jme₂juɨnꞌ₂ bá₄ dsa₂ Diú₄ Jmei₂ jniog₄ ca₂liaꞌ₂ co₂tan₅₄! A₂méi₃.

21 Cuɨn₅₄ ꞌniaꞌ₂ Diú₄ o₄quió₃, ca₂le₃jɨ́n₃ i₂tén₅a le₃quióꞌ₅ Cristo Jesús. Dsa₂ rɨnꞌ₅₄^a i₂quianꞌ₄ jniá₂ në́₃, cuɨin₂₃ Diú₄ ꞌniaꞌ₂.

22 Cuɨn₅ ꞌniaꞌ₂ Diú₄ ca₂le₃jɨ́n₃ dsa₂ jŋió₅, la₁ia₁ ja₂lɨn₃ guë́₄ dsen₅₄ cuag₅ Diú₄ dsa₂ i₂tiánꞌ₅ dsi₂néi₂ quióꞌ₅ guiꞌ₅₄ rag₅₄ emperador.

23 Juɨ₁jme₂guꞌ₅₄ bá₄ Te₁guiꞌ₅₄ Jesucristo jme₂dsí₂ quiánꞌ₂ ꞌniaꞌ₂. A₂méi₃.^b