2 Jmo₄ ꞌniaꞌ₂ ꞌí₁ quianꞌ₅₄ dsa₂ i₂chan₂ jmo₅ lɨ́in₅ liaꞌ₂ lɨ́n₅ dsɨ₂jɨꞌ₅₄, i₂jmo₅ a₂ꞌlɨgꞌ₅₄, dsa₂ i₂qui₂ti₅ nɨ₁ŋɨ₁₂;

3 ia₁ jniog₄ bá₄ i₂të₃dsónꞌ₂ lág₅ dsa₂ co₂ꞌnióꞌ₄ i₂ma₂qui₂rë₂uɨng₄ lo₄*, jniog₄ conꞌ₂ i₂jme₂juɨ́nꞌ₁ Diú₄ a₂gu₂dsí₂. Jaun₂ o₂ꞌŋió₃ o₂jŋia₃ dsɨ₅ jniog₄ ia₁ lág₅ i₂quián₅ Cristo Jesús, tsá₃ jaun₂ ꞌɨ́n₂ dsɨ₅ jniog₄ juɨ₁liaꞌ₂ a₂jmo₅ dsa₂ coꞌ₅₄ nɨ₁ŋɨ́₅,

4 o₁jŋiaꞌ₅₄ jniá₂ rëꞌ₂ ján₃ jme₁ca₂tɨ́ng₂ jme₁jmo₁₂ ꞌɨ́n₂ dsɨ₃ a₂në₅.

5 jme₁ca₂dsɨn₃ jŋia₃ jmɨg₄ liaꞌ₂ conꞌ₂ jme₁ca₂rë₃cháng₃ bá₄ ca₂ti₃ dsa₂ lo₃; ia₁ lɨ́ng₅ dsa₂ tsɨ₁jon₂ israelitas, téng₅ le₃quióꞌ₅ co₂nióꞌ₃ dsa₂ quián₅ tsɨ₁jon₂ Benjamín; lɨ́ng₅ hebreo ia₁ ja₁jaun₂ chang₂ lɨ́ng₅ chiꞌ₂ quián₅ dsa₂ hebreos. Fariseo bá₄ jme₁lɨ́ng₄ liaꞌ₂ conꞌ₂ lë́₅ jme₁ŋɨ́ꞌ₂ dsɨ₃ Si₂ ꞌÉiꞌ₃;

6 juɨ₁liaꞌ₂ a₂dsen₅₄ dsɨ₃ guëꞌ₂, ca₂liaꞌ₂ qui₂ca₂co₃ꞌén₃ jniá₂ dsa₂ quián₅ guáꞌ₅; tonꞌ₂ liaꞌ₂ conꞌ₂ lë́₅ jme₁chang₂ quian₅₄ juɨ₅ dse₃ liaꞌ₂ conꞌ₂ lë́₅ ꞌÉiꞌ₃ Juáꞌ₅, ꞌi₁jan₂ tsá₃ ꞌein₂ lé₂ le₃jme₁bógꞌ₂ dso₄.

7 La₁ ca₂le₃jë́₃ a₂në₅ le₃juaꞌ₅₄ jág₁ a₂të₁dsɨ₅₄ le₃quió₃ jniá₂, a₂jaun₂ jmo₅ jniá₂ dsɨ₃ a₂ma₂i₃ꞌén₂ le₃quióꞌ₅ Cristo.

8 Dsónꞌ₂ bá₄ jaun₂, të₂le₃ lë́₅ guë́₄ jmo₅ jniá₂ dsɨ₃ në₂jag₄ bá₄ a₂ma₂i₂ꞌén₂ ca₂le₃jë́₃, ia₁ tsá₃ quɨn₅ ꞌa₂ conꞌ₂ quen₅ a₂ma₂ca₂rë₃cuɨ́ng₅ Cristo Jesús Te₁guiꞌ₅₄ quiáng₃. ꞌUɨg₅₄ quióꞌ₄ Cristo bá₄ ma₂i₂ꞌén₂ jë₂ a₂jaun₂ quió₃. Jmo₅ jniá₂ dsɨ₃ në₂jag₄ bá₄ jme₁qui₅ a₂jaun₂, ia₁ ꞌnio₃ jniá₂ léi₂ ja₁con₂ Cristo;

9 ꞌnio₃ jniá₂ dsióg₄ ja₁con₂ ꞌéi₂, on₃juaꞌ₅₄ a₂chang₂ quian₅₄ juɨ₅ co₂dsau₅ a₂tɨng₂ ꞌŋió₃ liaꞌ₂ conꞌ₂ lë́₅ ꞌÉiꞌ₃ Juáꞌ₅, të₂le₃ ia₁ a₂quian₄ jniá₂ juɨ₅ co₂dsau₅ a₂cuë₅ Diú₄ cuë́ꞌ₅ i₂ꞌén₂ le₃quióꞌ₅ Cristo. Co₂ꞌnióꞌ₄ le₃juaꞌ₅₄, a₂chan₂ dsa₂ quian₅ caun₂ juɨ₅ co₂dsau₅ a₂já₅ le₃quióꞌ₅ Diú₄ ꞌuɨg₅₄ choꞌ₅₄ të₂le₃ ia₁ a₂ꞌén₂ bá₄ dsa₂.

10 A₂ꞌnio₃ jniá₂ le₃cuɨ́ng₅ Cristo bá₄, ꞌnio₃ jniá₂ can₅₄ juɨ₅bí₂ a₂ca₂jeinꞌ₅₄; ján₃ guëꞌ₂ can₅₄ juɨ₅ jmɨ₁uɨg₅ a₂ca₂can₃ ꞌéi₂, ján₃ guëꞌ₂ a₂dsióg₄ jniá₂ léng₂ juɨ₁liaꞌ₂ jme₁lɨ́n₄ ꞌéi₂ liaꞌ₂ conꞌ₂ jme₁ca₂join₃,

11 ia₁jaun₂ caun₂ bá₄ ꞌei₅ dsɨ₃ dsióg₄ jniá₂, chi₂juaꞌ₂ lé₂, a₂jengꞌ₅₄ jɨn₄ ꞌlag₄.

12 On₃juaꞌ₅₄ guëꞌ₂ a₂ma₂ca₂dsióg₃ jniá₂, on₃ guëꞌ₂ ma₂ca₂rë₃ꞌŋia₅ quió₃. La₁ caun₂ nei₅₄ bá₄ ne₄ juɨ₅ jme₁ꞌŋióꞌ₄ a₂ꞌɨ́n₂ dsɨ₃, juɨ₁liaꞌ₂ ca₂jme₃ꞌŋióꞌ₃ Cristo jniá₂.

13 Rɨnꞌ₅₄ jniog₄, tsá₃ jmo₅ jniá₂ dsɨ₃ juaꞌ₅₄ a₂ma₂ca₂jme₁ꞌŋióꞌ₄ jniá₂ a₂jaun₂. La₁ia₁ caun₂ la₂ bá₄ jmo₅ jniá₂: a₂qui₂dsɨ₃ꞌén₂ dsɨ₃ a₂qui₂ma₂ŋɨ́₂, a₂quɨ́nꞌ₄ bí₂ a₂tió₄ nei₅₄ le₃ne₄ juɨ₅,

14 a₂dsióg₄ jniá₂ ja₁lë́₄ léi₄ ja₁ca₂tɨ́ng₂ dsióg₄, ja₁i₁gue₃ jniá₂ premio a₂të́₂ Diú₄ cuë₃ gueiꞌ₅₄ i₂juɨ́g₃ a₂cuë́ꞌ₃ dsa₂ i₂tionꞌ₅₄ le₃quióꞌ₅ Cristo Jesús.

15 Ca₂le₃jág₃ bá₄ jniog₄ i₂ma₂le₁ꞌŋia₅ quián₂, ca₂tág₂ dsɨ₃jŋia₅ dsɨ₅ le₂jaun₂. Në₁juaꞌ₂ cha₂ ja₁lɨn₅₄ a₂ŋɨ́ꞌ₂ ꞌauꞌ₂ ꞌniaꞌ₂ le₂siáꞌ₂, Diú₄ bá₄ jmo₃ jnio₂ neꞌ₅₄ ꞌniaꞌ₂ a₂jaun₂ ján₃.

16 Jŋiaꞌ₅₄ liaꞌ₂ ca₂tág₂ jniog₄ a₂i₁nio₁ liaꞌ₂ ma₂ja₂náu₅.

17 Rɨnꞌ₅₄ jniog₄, quian₂ ꞌniaꞌ₂ juɨ₅ co₂lë₅ conꞌ₂ lë́₅ juɨ₅ ma₂guio₃ jniá₂, jag₄ ꞌniaꞌ₂ rë₂ ján₃ ja₁con₂ ca₂le₃jɨ́n₃ i₂ma₂chan₂ liaꞌ₂ conꞌ₂ lë́₅ ma₂ca₂jme₁tɨn₅ jniaꞌ₅₄ ꞌniaꞌ₂.

18 Ia₁ juɨ₁liaꞌ₂ ma₂ca₂juɨ́g₂ jniá₂ ꞌniaꞌ₂ ꞌlióng₂ ráun₂, conꞌ₂ siáꞌ₂ juáꞌ₅ bá₄ guë́₄ cónꞌ₂ táng₃ ca₂le₃jë́₃ dsá₂ jmɨg₂ jme₁ne₃, ia₁ juɨn₅ i₂chan₂ co₂ꞌnióꞌ₄ i₂ꞌioꞌ₅₄ a₂ca₂jmo₃ Cristo ne₄ cróg₄.

19 Jë₁ca₂tóꞌ₂ dsi₁lein₃ ja₁dsɨ₃ꞌéin₂. Ia₁ i₂co₂ꞌnióꞌ₄ i₂lɨ́n₅ diú₄ quiáin₅ co₂ꞌnióꞌ₄ a₂lag₃ në₁rë₂canꞌ₂ túꞌ₅ bá₄, ꞌŋio₅ róin₂ jmo₂₃ a₂ꞌnióꞌ₄ jme₁cán₂ o₂guíꞌ₃. Jmáꞌ₃ liaꞌ₂ quióꞌ₅ a₂cha₂ ne₄ guaꞌ₅₄ ꞌuë₃ la₂ bá₄ dsɨ₂jiog₅ dsɨ́₅.

20 La₁ jniog₄ në́₃ lág₅ dsa₂ i₂tén₅ gueiꞌ₅₄ i₂juɨ́g₃, jŋiaꞌ₅₄ liaꞌ₂ a₂jaun₂ bá₄ le₁jŋia₁ jniog₄ dsen₅₄ dsɨ₅ a₂jŋióꞌ₂ ja₁jaun₂ jan₂ i₂lió₂, i₂lɨ́n₅ Te₁guiꞌ₅₄ Jesucristo.

21 ꞌÉi₂ bá₄ jme₃tsɨ́n₃ nɨ₁ŋɨ₁ jniog₄ a₂dsɨ₃ꞌén₂ la₂, ia₁jaun₂ lé₂ liaꞌ₂ jláꞌ₁ nɨ₁ŋɨ₁₂ ꞌŋiog₅. Jmo₃ bá₄ a₂jaun₂ të₂le₃ quianꞌ₅₄ bí₂ a₂ꞌio₂₃ a₂tɨin₂ dsia₃ o₄gú₃ ꞌŋiog₅ ca₂le₃jë́₃.