6
ꞌNiaꞌ₂ i₂lɨ́ngꞌ₅ chiꞌ₂, ca₂tɨ́ngꞌ₂ le₃quióꞌ₅ Te₁guiꞌ₅₄ nágꞌ₁ gau₂ ꞌe₂ te₂néiꞌ₂ chogꞌ₂-ŋéiꞌ₅ ꞌniaꞌ₂, ia₁ le₂në₅ bá₄ dse₃.
2 Le₂la₂ juáꞌ₂ jë₁le₂ꞌuɨg₅₄ ꞌéiꞌ₃ quióꞌ₅ Diú₄ ja₁juáꞌ₂ cha₂ a₂cuë₃: “Jme₁gan₃ ꞌniaꞌ₂ chogꞌ₂-ŋéiꞌ₅,
3 ia₁jaun₂ bá₄ dse₃ le₃changꞌ₂ tonꞌ₂ uë́₂ le₃changꞌ₂ ne₄ guaꞌ₅₄ ꞌuë₃.”a
4 ꞌNiaꞌ₂ guëꞌ₂ jmei₂ chiꞌ₂, tsá₃ jmagꞌ₅₄ chiꞌ₂ quiángꞌ₂ juaꞌ₅₄ a₂lë₁jmaiꞌ₅₄, ia₁jaun₂ tsá₃ uë́₂ ꞌí₂ ꞌnei₂ dsɨ́₅, të₂le₃ ꞌnióꞌ₅ tsɨinꞌ₅₄ ꞌniaꞌ₂ caun₂ juɨ₅ rë₂, a₂jme₁tɨinꞌ₅ le₃quióꞌ₅ Te₁guiꞌ₅₄.
5 ꞌNiaꞌ₂ guëꞌ₂ dsa₂ i₂jme₂ti₃ ta₁ ne₄ dsa₂, jme₁ti₁ ꞌniaꞌ₂ ta₁ a₂te₂néiꞌ₂ juɨgꞌ₂ ꞌniaꞌ₂ ne₄ guaꞌ₅₄ ꞌuë₃ la₂, juɨ₁le₂tɨn₂ ꞌauꞌ₂ ꞌniaꞌ₂ ꞌei₅ gau₂ tonꞌ₂ tí₅ jág₁ quiánꞌ₂ ꞌniaꞌ₂, jmo₄ ꞌniaꞌ₂ në₂jag₄ bá₄ a₂jme₂tíꞌ₁ ta₁ ne₄ Cristo.
6 Jme₁ti₁ ꞌniaꞌ₂, on₃juaꞌ₅₄ jmáꞌ₃ liaꞌ₂ jme₁jág₅ juaꞌ₅₄ a₂ꞌnáuꞌ₂ ꞌniaꞌ₂ juɨ₅ a₂jŋiaꞌ₅₄ conꞌ₂ tióngꞌ₂ dse₃ quiainꞌ₅₄; jmo₄ ꞌniaꞌ₂ a₂lɨ́ngꞌ₅ i₂jme₂ti₃ ne₄ Cristo, jmo₄ ꞌniaꞌ₂ a₂ꞌnio₃ Diú₄ ca₂le₃jë́₃ ꞌauꞌ₂.
7 Jaun₂ ꞌŋio₂ ꞌauꞌ₂ ꞌniaꞌ₂ jme₁ti₁, co₂ꞌnióꞌ₄ bá₄ a₂jme₂tíꞌ₁ ta₁ ne₄ Te₁guiꞌ₅₄; on₃juaꞌ₅₄ rëꞌ₂ ne₄ dsa₂ mɨ₂güɨ́g₃.
8 Ia₁ ma₂ŋiꞌ₅₄ bá₄ ꞌniaꞌ₂, cuë₃ Te₁guiꞌ₅₄ ꞌlianꞌ₅₄ dsa₂ ca₂le₃jɨ́in₃ liaꞌ₂ conꞌ₂ lë́₅ a₂dse₃ a₂ma₂ca₂jmo₃, o₁jŋiaꞌ₅₄ dsa₂ i₂jme₂ti₃ ta₁ ne₄ juɨg₅₄, o₃ i₂tsá₃ ꞌein₂ ne₄ jme₂ti₃ ꞌe₂.
9 ꞌNiaꞌ₂ guëꞌ₂ i₂lɨ́n₅ juɨg₅₄, le₂në₅ bá₄ jmo₄ ꞌniaꞌ₂ ján₃ quianꞌ₅₄ dsa₂ i₂jme₂ti₃ ta₁ neꞌ₅₄. Tsá₃ ma₃quiainꞌ₅₄ ꞌniaꞌ₂ juë́ꞌ₅. Ia₁ ma₂ŋiꞌ₅₄ bá₄ ꞌniaꞌ₂, jan₂ Juɨgꞌ₂ ꞌniaꞌ₂ chan₂, i₂guá₅ gueiꞌ₅₄ i₂juɨ́g₃, i₂lɨ́n₅ Juɨg₅₄, liaꞌ₂ ne₄ ꞌniaꞌ₂, liaꞌ₂ ne₄ dsa₂ i₂jme₂ti₃ neꞌ₅₄ ꞌniaꞌ₂. ꞌÉi₂ bá₄ tsá₃ jma₃quén₅ jɨ́in₂ dsa₂.
ꞌE₂ quianꞌ₅₄ jmo₅ dsa₂ ꞌén₂ ꞌnei₂ a₂gu₂dsí₂
10 Në₃ në́₃, jë₁ca₂tóꞌ₂ juáꞌ₅ jniá₂ juɨ́g₂ ꞌniaꞌ₂, rɨnꞌ₅₄ jniog₄: Nau₂ ꞌniaꞌ₂ tiá₂ le₃quióꞌ₅ Te₁guiꞌ₅₄, quianꞌ₅₄ juɨ₅bí₂ bén₂ quióꞌ₅.
11 Quiꞌ₂ ꞌniaꞌ₂ ca₂le₃jë́₃ ꞌe₂ a₂cuë₅ Diú₄ le₁lɨnꞌ₄ ꞌniaꞌ₂ jmo₄, co₂ꞌnióꞌ₄ bá₄ jan₂ ꞌlióg₂, ia₁jaun₂ bá₄ tianꞌ₃ ꞌniaꞌ₂ náuꞌ₁ tiá₂ ne₄ mai₅₄ quióꞌ₅ i₂së₃dsen₃.
12 Ia₁ on₃juaꞌ₅₄ quianꞌ₅₄ dsa₂ mɨ₂güɨ́g₃ rɨnꞌ₅₄ jniog₄ cágꞌ₂; quianꞌ₅₄ i₂lɨ́n₅ co₂ꞌnióꞌ₄ dsɨ₂tan₅₄ gu₂dsí₂, quianꞌ₅₄ jme₂dsí₂ i₂ꞌio₅ juɨ₅bí₂, quianꞌ₅₄ jme₂dsí₂ i₂gon₂ jmo₅ ꞌéiꞌ₃ i₂jmo₅ qui₁néꞌ₃ mɨ₂güɨ́g₃ la₂, quianꞌ₅₄ guë́₄ ꞌlióg₂ ꞌlɨnꞌ₅₄ gu₂dsí₂ i₂i₂nio₄ gon₂ dsi₁güɨg₂ bá₄ cágꞌ₂ jniog₄.
13 Jaun₂ lë₃, quian₂ le₁lɨnꞌ₄ ꞌniaꞌ₂ jmo₄ quianꞌ₅₄ ca₂le₃jë́₃ a₂le₃lonꞌ₄ ꞌniaꞌ₂ a₂cuë₅ Diú₄, ia₁jaun₂ bá₄ tianꞌ₃ ꞌniaꞌ₂ tióngꞌ₂ tiá₂ jë₁ma₂të́₂ rë₁jmógꞌ₂ ꞌnei₂ i₂së₃dsen₃, ia₁jaun₂ cang₂ jë₁ma₂ca₂lɨnꞌ₃ ꞌniaꞌ₂ ꞌnei₂ në́₃, liaꞌ₂ ma₂tiónꞌ₂ jaun₂ bá₄ ꞌniaꞌ₂ tiá₂.
14 Nau₂ ꞌniaꞌ₂ tiá₂ jaun₂ në́₃, co₂ꞌnióꞌ₄ a₂qui₂rë₂ꞌŋeꞌ₅₄ togꞌ₂ quianꞌ₅₄ jág₁ tí₅, a₂lë́₅ co₂ꞌnióꞌ₄ lau₂ rë₂jénꞌ₅ togꞌ₂ ꞌniaꞌ₂, lë́₅ ꞌí₁; quian₂ ꞌniaꞌ₂ caun₂ juɨ₅ co₂dsau₅ a₂lë́₅ ꞌí₁ le₁ꞌauꞌ₂ co₂ꞌnióꞌ₄ bá₄ juɨ₁liaꞌ₂ jan₂ ꞌlióg₂ i₂rë₂lióg₃ ŋí₁ le₁dsɨ́₅.
15 Chanꞌ₂ ꞌniaꞌ₂ rë₂jángꞌ₁ a₂ꞌë́ꞌ₄ jág₁ dse₃ a₂ꞌag₃ tei₄ ja₁con₂ dsa₂, a₂lɨ́ngꞌ₅ në₂jag₄ bá₄ jan₂ ꞌlióg₂ chénꞌ₅ rë₂ján₁ rë₂lɨinꞌ₅₄ ton₅ lau₂ tag₅₄.
16 Ne₄ ca₂le₃jë́₃ a₂në₅, juɨ₁le₂cha₂ ꞌénꞌ₂ ꞌniaꞌ₂ ia₁jaun₂ lë́₅ në₂jag₄ co₂ꞌnióꞌ₄ caun₂ ŋí₁ lɨꞌ₂ a₂chanꞌ₄ ꞌniaꞌ₂ a₂rë₂quionꞌ₅₄ ꞌniaꞌ₂ a₂longꞌ₅₄, coꞌ₅₄ a₂jaun₂ qui₂éi₃ ꞌma₂ chenꞌ₂ le₁guíꞌ₂ si₂ a₂qui₂jnáuꞌ₂ i₂së₃dsen₃ jnáiꞌ₂ ꞌniaꞌ₂.
17 Juɨ₅ ma₂lónꞌ₂ ꞌniaꞌ₂ changꞌ₂ në₅, juɨ₁le₅₄ bá₄ juɨ₁liaꞌ₂ lë́₅ ŋí₁ ꞌi₄ dsi₄ ꞌlióg₂, lë́₅ ꞌí₁; tonꞌ₂ quian₂ ꞌniaꞌ₂ jág₁ quióꞌ₅ Diú₄ a₂lë́₅ ŋi₁tág₂ quióꞌ₅ Jme₂dsí₂, a₂cuë́ꞌ₅ ꞌniaꞌ₂.
18 Chi₁lenꞌ₄ ꞌniaꞌ₂ Diú₄ le₃quianꞌ₅₄ Jme₂dsí₂, ca₂le₃jë́₃ ꞌe₂ caun₂ a₂lë́₅, ca₂le₃jë́₃ ne₅₄ a₂mɨꞌ₂ ꞌniaꞌ₂ juɨgꞌ₂ Diú₄. ꞌUɨg₅₄ në₅ në́₃, chanꞌ₂ ꞌniaꞌ₂ rë₂jángꞌ₁ co₂tan₅₄ mɨ₄ ꞌniaꞌ₂ o₄quióꞌ₄ ca₂le₃jɨ́n₃ i₂ma₂tén₅ le₃quióꞌ₅ Diú₄.
19 Chi₁lenꞌ₄ ꞌniaꞌ₂ Diú₄ ján₃, o₄quió₃ jniá₂, ia₁jaun₂ bá₄ jmo₃ Diú₄ dsɨ₃ ꞌa₂ liaꞌ₂ juáꞌ₄ jág₁, jaun₂ nio₃ tiá₂ dsɨ₃ në́₃ a₂ꞌë́₄ jág₁ dse₃ a₂jme₁rë₂ꞌma₄ quióꞌ₅ Diú₄.
20 Diú₄ ma₂ca₂chei₃ jniá₂ a₂lɨ́ng₄ i₂chen₄ quiáin₅ quian₅₄ jág₁ dse₃; ꞌuɨg₅₄ në₅ bá₄ në́₃ dseng₅₄ cadena ꞌeng₅₄. Chi₁lenꞌ₄ ꞌniaꞌ₂ Diú₄ ia₁jaun₂ nio₃ tiá₂ dsɨ₃ ꞌë́₄ jág₁ dse₃ la₂, liaꞌ₂ conꞌ₂ dsi₂ten₅₄ ca₂tɨ́ng₂ jmo₅₄.
Cuag₂₃ Diú₄ jë₁ca₂tóꞌ₂
21 Tíquico, rɨnꞌ₅₄ jniog₄ i₂ꞌnióg₃ guë́₄ lɨn₃, i₂jme₂ti₃ i₂jme₂ꞌo₅₄ quianꞌ₅₄ ta₁ quióꞌ₅ Te₁guiꞌ₅₄, ꞌéi₂ bá₄ quian₅ ca₂le₃jë́₃ jág₁ tsɨ́ꞌ₃ ꞌniaꞌ₂ ia₁jaun₂ le₃ŋiꞌ₅₄ ꞌniaꞌ₂ ꞌa₂ liaꞌ₂ lë́₅ chang₂, quianꞌ₅₄ ꞌe₂ a₂jmo₂₃ në́₃.
22 Jaun₂ bá₄ lë₃ tsɨ́in₂ jniá₂ ja₁tionꞌ₅₄ ꞌniaꞌ₂, ia₁jaun₂ le₃ŋiꞌ₅₄ ꞌa₂ liaꞌ₂ lë́₅ chong₂ jniaꞌ₅₄ ia₁jaun₂ cuëꞌ₅₄ ꞌniaꞌ₂ liánꞌ₂ ꞌauꞌ₂.
23 Juɨ₁jmo₅₄ Diú₄ Tia₅₄ quián₂, quianꞌ₅₄ Te₁guiꞌ₅₄ Jesucristo në́₃, ꞌei₅ tei₄ tiongꞌ₅₄, ꞌnióꞌ₃ ꞌniaꞌ₂ rɨ́ngꞌ₂, ꞌénꞌ₂ ꞌniaꞌ₂ në́₃.
24 Juɨ₁jme₂guꞌ₅₄ bá₄ Diú₄ ca₂le₃jɨ́n₃ i₂tsá₃ lɨ́gꞌ₂ jmɨg₄ téi₂ i₂ꞌnio₃ Te₁guiꞌ₅₄ Jesucristo quián₂ jniog₄.
Co₂në₅.