ꞌÁgꞌ₅ Pa₄ jág₁ tonꞌ₂ ꞌë́₂ guë́₄ jág₁ të₃jŋiá₅
13
A₂dsióg₅ ꞌnagꞌ₂ ráun₂ a₂i₁jɨn₁₂ ꞌniaꞌ₂ la₂. “Ca₂le₃jë́₃ ꞌe₂ niog₅ lë́₂ jiógꞌ₂ ꞌí₁ të₂le₃ quianꞌ₅₄ on₃-ún₂ dsa₂ i₂jángꞌ₃ jág₁ dsau₅.”a
2 Ma₂ca₂ꞌë́₃ jniá₂ jág₁ të₃jŋiá₅ ne₄ dsa₂ i₂jme₁tiánꞌ₄ ꞌno₅ dso₄ le₂jŋiá₅, tonꞌ₂ ne₄ ca₂le₃jɨ́n₃ i₂siánꞌ₂ në́₃, ján₃ bá₄ ꞌë́₅ jniá₂ jág₁ a₂ꞌeng₅₄ uɨ́ng₂ ja₁conꞌ₂ ꞌniaꞌ₂, juɨ₁liaꞌ₂ ca₂jmo₃ jniá₂ liaꞌ₂ conꞌ₂ ŋeg₅₄ jë₁ca₂të́₂ tɨn₃ ráun₂ a₂i₁jɨng₁₂ ꞌniaꞌ₂: në₁juaꞌ₂ conꞌ₂ siáꞌ₂ ca₂dsióg₃ jniá₂ a₂i₁jɨng₁₂ ꞌniaꞌ₂, jaun₂ tsá₃ ma₃jmo₅₄ jniá₂ ŋéi₂ dsɨ₃ në₁juaꞌ₂ chan₂ guë́₄ i₂tsá₃ ma₂dsi₂quénꞌ₄ dsɨ́₅.
3 Le₂jaun₂ jmo₅₄ jniá₂ chi₂juaꞌ₂ a₂jaun₂ ꞌniogꞌ₂ ꞌniaꞌ₂ a₂jángꞌ₄ jniá₂ léi₄, a₂dsónꞌ₂ bá₄ juáꞌ₂ Cristo tsɨ́ꞌ₅ ꞌniaꞌ₂ quianꞌ₅₄ jág₁ a₂quian₄ jniá₂. Tsá₃ juaꞌ₅₄ a₂lɨ́in₅ ꞌuain₅₄ ja₁conꞌ₂ ꞌniaꞌ₂; ꞌnióꞌ₄ të₂le₃ jme₂jnia₅ bá₄ ꞌéi₂ a₂ꞌio₂₃ juɨ₅bí₂ jë₄ quiánꞌ₂ ꞌniaꞌ₂.
4 Dsónꞌ₂ bá₄ jaun₂ ca₂tion₃ cróg₄ dsa₂ në₂jag₄ bá₄ a₂lɨ́in₅ jan₂ dsa₂ ꞌuan₅₄, la₁ rë₂në́₃ në́₃ chain₂ të₂le₃ quianꞌ₅₄ juɨ₅bí₂ quióꞌ₅ Diú₄. Le₂në₅ bá₄ juɨ₁liaꞌ₂ jniaꞌ₅₄ táng₃, quian₄ juɨ₅ jaun₂ a₂jmo₂ jniaꞌ₅₄ ꞌuan₅₄ o₄quióꞌ₄ ꞌéi₂, le₂jaun₂ bá₄ le₃chong₂ guëꞌ₂ jniaꞌ₅₄ ja₁conꞌ₂ ꞌniaꞌ₂ quianꞌ₅₄ juɨ₅bí₂ quióꞌ₅ Diú₄.
5 Te₁li₁ ꞌniaꞌ₂ ja₁conꞌ₂ guiongꞌ₅₄ chi₂juaꞌ₂ dsónꞌ₂ tiónꞌ₂ ꞌniaꞌ₂ juɨ₅ quióꞌ₅ Te₁guiꞌ₅₄. Quion₂ deꞌ₂ ꞌniaꞌ₂ caun₂ ꞌí₁ le₃ja₁conꞌ₂ ꞌniaꞌ₂ guiongꞌ₅₄. ¿Tsa₁ lenꞌ₄ ꞌniaꞌ₂, a₂ꞌen₅₄ bá₄ Jesucristo ja₁conꞌ₂ ꞌniaꞌ₂, jaun₂ bá₄ në₁juaꞌ₂ tsá₃ të₁tsɨnꞌ₅₄ ꞌniaꞌ₂ ꞌlɨgꞌ₅₄ në₁ma₂ca₂quionꞌ₂ ꞌniaꞌ₂ ꞌí₁ jaun₂?
6 La₁ ꞌɨ́n₂ dsɨ₃ jniá₂ le₃lenꞌ₄ ꞌniaꞌ₂ a₂tsá₃ le₂jaun₂ lág₅ jniaꞌ₅₄ juaꞌ₅₄ a₂tsá₃ dse₃ të₃tsagꞌ₅₄ jniaꞌ₅₄ në₁ma₂ca₂quionꞌ₂ ꞌniaꞌ₂ ꞌí₁, juaꞌ₅₄ a₂tsá₃ dsau₅ a₂lág₅ jniaꞌ₅₄ dsa₂ i₂chen₄ quián₅ Te₁guiꞌ₅₄.
7 Qui₂mɨ₂ jniaꞌ₅₄ chi₂lenꞌ₄ Diú₄ o₄quiánꞌ₂ ꞌniaꞌ₂ ia₁jaun₂ tsá₃ ma₃jmo₄-dsáuꞌ₄ ꞌniaꞌ₂ a₂ꞌlɨgꞌ₅₄. On₃juaꞌ₅₄ ia₁jaun₂ të₃tsagꞌ₅₄ jniaꞌ₅₄ dse₃, të₂le₃ ia₁jaun₂ jmóꞌ₂ ꞌniaꞌ₂ a₂dse₃, juɨ₁ꞌe₂ guë́₃ chan₂ i₂lɨ́n₂ a₂tsá₃ dse₃ të₃tsagꞌ₅₄ jniaꞌ₅₄.
8 Ia₁ tsá₃ lé₂ náu₂ jniaꞌ₅₄ quein₅ ja₁con₂ jág₁ tí₅, të₂le₃ tióng₂ bá₄ jniaꞌ₅₄ quianꞌ₅₄ jág₁ tí₅.
9 Jaun₂ të₂le₃ ꞌioꞌ₂ bá₄ jmo₂ jniaꞌ₅₄ jme₁lág₄ jniaꞌ₅₄ dsa₂ ꞌuan₅₄, ꞌniaꞌ₂ guëꞌ₂ lɨ́nꞌ₅ dsa₂ ꞌuanꞌ₂. A₂jaun₂ caun₂ chi₂lenꞌ₄ bá₄ jniaꞌ₅₄ Diú₄ ia₁jaun₂ lenꞌ₂ ꞌniaꞌ₂ co₂ŋeiꞌ₅₄.
10 Jaun₂ lë₃, jmo₂₃ si₂ carta la₂ tsɨ́ng₂ neꞌ₅₄ ꞌniaꞌ₂ të₁liaꞌ₂ ꞌeng₅₄ uɨ́ng₂, ia₁jaun₂ tsá₃ ꞌnióꞌ₅ juaꞌ₅₄ a₂jmo₅₄ jniá₂ tsau₂ dsɨ₃ jë₁ma₂dsióg₃, liaꞌ₂ conꞌ₂ lë́₅ ta₁ a₂lɨ́ng₅ a₂ca₂cuë₃ Te₁guiꞌ₅₄, ia₁jaun₂ të₂le₃ lei₂ bá₄ jme₂dsí₂ quiánꞌ₂ ꞌniaꞌ₂, on₃juaꞌ₅₄ të₂le₃ qui₃jë́ꞌ₂.
11 Në₃ në́₃, rɨnꞌ₅₄ jniog₄, caun₂ juɨ₁le₂chanꞌ₂ bá₄ ꞌniaꞌ₂ dse₃ qui₂jmoꞌ₂ ꞌniaꞌ₂ ꞌioꞌ₂. Jmogꞌ₅₄ ꞌniaꞌ₂ ꞌauꞌ₂ o₄quióꞌ₄ jme₂dsí₂ quiánꞌ₂ ꞌniaꞌ₂ në́₃; juɨ₁chanꞌ₂ bá₄ ꞌniaꞌ₂ rë₂ a₂ꞌei₅ caun₂ jág₁ quianꞌ₅₄ rɨ́ngꞌ₂. Jaun₂ Diú₄ i₂jmo₅ ꞌei₅ tei₄ i₂ꞌnio₃ ꞌniaꞌ₂, ꞌéi₂ bá₄ jme₃quiongꞌ₅₄ ꞌniaꞌ₂ ca₂le₃jë́₃ jmɨg₄.
12 Cuɨn₅₄ ꞌniaꞌ₂ Diú₄ rɨ́ngꞌ₂ le₂jangꞌ₂ le₂jangꞌ₂ a₂qui₁chénꞌ₁b ꞌniaꞌ₂ quióꞌ₅ rɨ́ngꞌ₂ a₂lë́₅ léi₄ a₂ma₂ꞌei₅ caun₂ jág₁ a₂le₁jë́₃ ꞌauꞌ₂ quianꞌ₅₄ rɨ́ngꞌ₂.
13 Ca₂le₃jɨ́n₃ bá₄ rɨnꞌ₅₄ jniog₄c ja₁lá₃ dsiáinꞌ₂ jág₁ a₂cuɨin₂₃ Diú₄ ꞌniaꞌ₂.
14 Jaun₂ juɨ₁jme₂guꞌ₅₄ bá₄ Te₁guiꞌ₅₄ Jesucristo; juɨ₁le₂jniá₂ jë₄ quiánꞌ₂ ꞌniaꞌ₂ a₂ꞌnio₃ Diú₄ ꞌniaꞌ₂; juɨ₁ꞌei₅ caun₂ jág₁ jɨnꞌ₄ ꞌniaꞌ₂ quianꞌ₅₄ Jme₂dsí₂ Jŋió₅. A₂méi₃.
Co₂në₅.