Juɨ₁liaꞌ₂ a₂ma₂ca₂jme₃jnia₅ Te₁guiꞌ₅₄
12
Tion₅₄ caun₂ dsia₅₄ jniá₂ jág₁ táꞌ₅. Juɨ₁ꞌe₂ guë́₃ tsá₃ ta₁ jmo₃, caun₂ juáꞌ₄ jniá₂ juɨ₁liaꞌ₂ a₂ca₂jéin₃ jniá₂ a₂ma₂jág₃, juɨ₁liaꞌ₂ a₂ma₂ca₂jme₃jnia₅ Te₁guiꞌ₅₄ në́₃.
2 Cuɨ́ng₅ jan₂ dsa₂ i₂ꞌei₅ caun₂ jág₁ quiainꞌ₅₄ Cristo, ma₂guia₃-quén₂ ŋi₂ ca₂uɨ́g₂ juɨ₅ gueiꞌ₅₄ ca₂të₂ ja₁guá₄ Diú₄.a (A₂jaun₂ bá₄ tsá₃ guion₄ jniá₂ juaꞌ₅₄ a₂ŋe₄ liaꞌ₂ jma₃quianꞌ₅₄ nɨ₁ŋɨ₁₂, o₃ jmáꞌ₃ jme₂dsí₂ quióꞌ₅ ꞌe₂. La₁ jŋiaꞌ₅₄ liaꞌ₂ ꞌŋiog₅ bá₄ Diú₄ ŋi₅.)
3 La₁ guion₄ jniá₂, chan₂ jan₂, (jŋiaꞌ₅₄ liaꞌ₂ a₂jaun₂ bá₄ tsá₃ guion₄ jniá₂ chi₂juaꞌ₂ ca₂ŋei₅₄ chi₁dsáin₃, o₃ jmáꞌ₃ jme₂dsí₂ quióꞌ₅ ꞌe₂ ca₂dsiógꞌ₃ ja₁jaun₂. Jŋiaꞌ₅₄ liaꞌ₂ ꞌŋiog₅ bá₄ Diú₄ ŋi₅);
4 jan₂ i₂ca₂ronꞌ₂ ca₂të₂ Ja₁jláꞌ₁b ja₁ca₂nág₂ jág₁ a₂tsá₃ lé₂ le₃jmogꞌ₅₄ on₃ guë́₄ ꞌi₄ ꞌéiꞌ₃ dsia₃ dsa₂ mɨ₂güɨ́g₃.
5 O₄quióꞌ₄ jan₂ dsa₂ le₂ꞌéi₂ bá₄ lé₂ dsia₅₄ jniá₂ jág₁ táꞌ₅, on₃juaꞌ₅₄ o₄quió₃ ꞌŋió₃ jmo₂₃ tángꞌ₅, jŋiaꞌ₅₄ liaꞌ₂ o₄quióꞌ₄ a₂ꞌuan₅₄ bá₄ jniá₂.
6 O₁jŋiaꞌ₅₄ la₂ ꞌnio₃ jniá₂ dsia₅₄ jág₁ táꞌ₅, on₃juaꞌ₅₄ dsa₂ co₄ lɨ́n₅ jniá₂, ia₁ jág₁ tí₅ dsónꞌ₂ bá₄ a₂juáꞌ₅ jniá₂. La₁ cáun₄ bá₄ dsɨ₃ tsá₃ jmo₅₄ le₂jaun₂, ia₁jaun₂ tsá₃ le₃lɨ́n₂ dsa₂ juaꞌ₅₄ jniá₂ lɨ́ng₅ ŋag₅₄ guë́₄ liaꞌ₂ conꞌ₂ niog₅ a₂ma₂nág₂ a₂qui₂ma₂të́₂ ne₄ dsa₂ a₂jmo₅ jniá₂ ꞌe₂ jmo₂₃.
7 Jág₁ a₂ca₂rë₃jniá₂ jaun₂ lë́₅ caun₂ jág₁ jláꞌ₁ jmáꞌ₅ a₂lé₂ le₃jme₁jmo₅₄ jniá₂ róng₂ juaꞌ₅₄ meiꞌ₂ guë́₃ le₂jaun₂. La₁ ca₂jéin₃ uɨg₅ në₂jag₄ bá₄ a₂i₃ꞌiꞌ₅₄ nɨ₁taun₅ ca₂lë₃ nɨ₁ŋɨ₃, co₂ꞌnióꞌ₄ i₂chen₄ quián₅ i₂së₃dsen₃ bá₄ caun₂ qui₂bóg₂, ia₁jaun₂ tsá₃ jmo₅₄ jniá₂ róng₂ i₁juɨn₅₄ ŋag₅₄.
8 ꞌNɨ₅ ráun₂ ma₂ca₂chi₁lenꞌ₄ jniá₂ Te₁guiꞌ₅₄ a₂jme₃ꞌlió₂ jŋiáꞌ₄ jmɨ₁uɨg₅ a₂quian₅₄.
9 La₁ ca₂juáꞌ₂ Te₁guiꞌ₅₄ tság₅ jniá₂: “Tióꞌ₅ bá₄ a₂ꞌua₁ dsɨ₃ ja₁conꞌ₂ ꞌne₂, ia₁ rë₂ꞌŋia₅ juɨ₅bí₂ quió₃ juɨ₁liaꞌ₂ jme₁ꞌuan₅₄ dsa₂.” Jaun₂ ꞌioꞌ₂ jéin₅ bá₄ ia₁ a₂ꞌuang₅₄, ia₁jaun₂ le₂jniá₂ juɨ₅bí₂ quióꞌ₅ Cristo le₃ja₁con₂ jniá₂.
10 Jaun₂ të₅ bá₄ dsɨ₃ a₂ꞌuang₅₄ quianꞌ₅₄ ca₂le₃jë́₃ a₂dsɨ₂ŋɨ́g₂: a₂juáꞌ₂ dsa₂ uɨg₅, quianꞌ₅₄ guë́₄ ca₂le₃jë́₃ a₂chang₂, cha₂ a₂qui₂tsá₃ tɨ́nꞌ₂ quió₃. A₂chang₂ a₂co₂ꞌein₅ dsa₂, ca₂le₃jë́₃ guë́₄ o₂i₁ dsɨ₅ a₂dsɨ₂ŋɨ́g₂ o₄quióꞌ₄ Cristo. Ia₁ juɨ₁liaꞌ₂ jme₁ꞌuang₅₄, të₂le₃ ꞌuanꞌ₂ bá₄ jniá₂ le₃ja₁con₂ Diú₄.
ꞌŊio₅ lɨn₃ ꞌɨ₅ dsɨ́₅ Pa₄ o₄quióꞌ₄ guáꞌ₅ chan₂ juɨg₂ Corinto
11 Ma₂në₂dsia₃ liaꞌ₂ ja₁dsia₅ jan₂ dsa₂ co₄, ia₁ ma₂në₂ꞌɨ́ng₃ dse₃ ꞌŋió₃, la₁ guionꞌ₅₄ bá₄ ꞌniaꞌ₂ chi₂quiongꞌ₅₄ jmɨg₄. Ia₁ ꞌniaꞌ₂ bá₄ jme₁ca₂tɨ́ngꞌ₂ jme₁ꞌágꞌ₄ dse₃ jniá₂, ia₁ tsá₃ ꞌe₂ meꞌ₂ quen₅ jniá₂ liaꞌ₂ conꞌ₂ guë́₄ dsa₂ i₂chen₄ ꞌéi₂ i₂ŋɨ́₄ lë₃ jme₂canꞌ₅₄ guion₅, juɨ₁ꞌe₂ guë́₃ tsá₃ ꞌe₂ quen₅ jniá₂.
12 Dsónꞌ₂ bá₄ ma₂ca₂rë₃jniá₂ léi₄ a₂lɨ́ng₅ dsa₂ i₂chen₄ quián₅ Cristo jë₄ quiánꞌ₂ ꞌniaꞌ₂, jë₄ ca₂le₃jë́₃ a₂juɨnꞌ₂ dsɨ₃: léi₄ a₂dsi₂góꞌ₃ dsɨ₅, quianꞌ₅₄ juɨ₅bí₂ jláꞌ₁ në́₃.
13 Tsá₃ sion₅ ma₂jɨn₄ jniá₂ ꞌniaꞌ₂ liaꞌ₂ conꞌ₂ guë́₄ guáꞌ₅ siánꞌ₂, jŋiaꞌ₅₄ liaꞌ₂ jniá₂ ꞌŋió₃ tsá₃ ꞌe₂ guei₂ ma₂ca₂cuë́₃ jniá₂ ꞌniaꞌ₂. ¡ꞌÉn₃ ꞌniaꞌ₂ dso₄ quió₃ chi₂juaꞌ₂ tsá₃ dse₃ ca₂jmo₃ jniá₂ ja₁conꞌ₂ ꞌniaꞌ₂!
14 Ma₂chang₂ bá₄ co₂jŋiag₅₄ a₂dsióg₄ i₁jɨng₁₂ ꞌniaꞌ₂ jë₁ca₂të́₂ ꞌnagꞌ₂ ráun₂, jaun₂ tsá₃ lë́₅ juaꞌ₅₄ a₂i₁cuë́₃ ꞌniaꞌ₂ guei₂. Ia₁ tsá₃ ta₁ jaun₂ ŋɨ₅ jniá₂ juaꞌ₅₄ a₂ꞌɨ́n₅ dsɨ₃ a₂cha₂ quiánꞌ₂ ꞌniaꞌ₂; guionꞌ₅₄ bá₄ ꞌniaꞌ₂ ꞌnió₃ jniá₂. Ia₁ guion₅₄ bá₄ juɨ₁liaꞌ₂ chog₅₄-jmei₂ chiꞌ₂ ca₂tɨ́in₂ ꞌno₃ cu₄ a₂qui₂dsɨ₃ŋɨ́i₂ quiainꞌ₅₄ chiꞌ₂-guein₂ quiáin₅, jaun₂ on₃juaꞌ₅₄ rëꞌ₂ chiꞌ₂ ca₂tɨ́n₂ ꞌno₃ a₂dsɨ₃ŋɨ́i₂ quiainꞌ₅₄ chog₅₄-jmei₂.
15 Jaun₂ jniá₂ në́₃, ꞌŋio₂ bá₄ dsɨ₃ qui₁ꞌéng₄ a₂cha₂ quió₃, tonꞌ₂ ꞌŋio₂ bá₄ dsɨ₃ jme₁dsiang₅ dsɨ₃ o₄quióꞌ₄ jme₂dsí₂ quiánꞌ₂ ꞌniaꞌ₂. Chi₂juaꞌ₂ jaun₂, ia₁ të₂le₃ lë́₅ guë́₄ ꞌnió₃ jniá₂ ꞌniaꞌ₂, ¿a₁të₂le₃ meꞌ₂ bá₄ ꞌnióꞌ₃ ꞌniaꞌ₂ jniá₂ jaun₂ në́₃?
16 Juɨ₁ꞌe₂ guë́₃ dsau₅ a₂tsá₃ ꞌe₂ guei₂ ca₂cuë́₃ jniá₂ ꞌniaꞌ₂, la₁ ꞌŋio₄ bá₄ jniá₂, juáꞌ₂ ꞌniaꞌ₂, a₂ca₂jón₃ jniá₂ ꞌniaꞌ₂ quianꞌ₅₄ mai₅₄ quió₃.
17 ¿O₃ bá₄ lɨ́nꞌ₂ ꞌniaꞌ₂ a₂ꞌlɨgꞌ₅₄ ca₂lág₃ jniá₂ quianꞌ₅₄ dsa₂ i₂ca₂tsɨ́ng₂ neꞌ₅₄ ꞌniaꞌ₂?
18 Ca₂mɨ₃ bá₄ jniá₂ ne₄ Tito a₂jmo₃ dse₃ dsɨ́₅ a₂ca₂ŋei₅₄ ja₁conꞌ₂ ꞌniaꞌ₂, tonꞌ₂ ca₂tsɨ́n₂ jniá₂ ján₃ jan₂ rɨnꞌ₅₄ jniog₄ i₂quiainꞌ₅₄. Jaun₂, ¿o₃ bá₄ ca₂jme₃gau₅ ꞌéi₂? ¿O₃ bá₄ tsá₃ ꞌénꞌ₂ ꞌe₂ ꞌniaꞌ₂ a₂ma₂ja₂náu₅ jniaꞌ₅₄ co₂dsia₅ quiainꞌ₅₄, jmo₂ ta₁ co₂rë₂ quiainꞌ₅₄, tonꞌ₂ jan₂ bá₄ Jme₂dsí₂ i₂quiongꞌ₅₄ táng₃?
19 ꞌAn₁ meiꞌ₂ tsá₃ caun₂ lɨ́nꞌ₂ bá₄ guë́₄ ꞌniaꞌ₂ a₂jŋiaꞌ₅₄ conꞌ₂ ꞌniog₂ jniaꞌ₅₄ lion₄ guio₅₄ neꞌ₅₄ ꞌniaꞌ₂. La₁ jág₅ bá₄ Diú₄ tsá₃ le₂jaun₂ dsɨ₂jiog₅ dsɨ₅ jniaꞌ₅₄. Jág₁ tí₅ bá₄ chei₂ jniaꞌ₅₄ ꞌniaꞌ₂ ne₄ Cristo. La₁ jë₄ ca₂le₃jë́₃ a₂në₅ a₂dse₃ ia₁jaun₂ qui₃dsɨ₂cónꞌ₃ ꞌniaꞌ₂ të₂le₃ quióꞌ₅ jme₂dsí₂, ꞌniaꞌ₂ rɨnꞌ₅₄ jniog₄ i₂ꞌnióg₃ guë́₄ lɨn₃.
20 Ia₁ gó₅ jniá₂ conꞌ₂ tsá₃ ŋó₅ në₁juaꞌ₂ tsá₃ dse₃ tionꞌ₅₄ ꞌniaꞌ₂ liaꞌ₂ conꞌ₂ lë́₅ ꞌnio₃ jniá₂, jë₁ma₂ca₂dsióg₃, ján₃ bá₄ le₂jaun₂ në₁juaꞌ₂ tsá₃ ca₂jeinꞌ₂ ꞌniaꞌ₂ jniá₂ liaꞌ₂ conꞌ₂ ꞌniogꞌ₂ ꞌniaꞌ₂ guëꞌ₂ táng₃. Ia₁ gó₅ jniá₂ në₁juaꞌ₂ tionꞌ₅₄ ꞌniaꞌ₂ a₂tsá₃ jenꞌ₂ ꞌniaꞌ₂ quianꞌ₅₄ rɨ́ngꞌ₂; në₁juaꞌ₂ tionꞌ₅₄ ꞌniaꞌ₂ uɨg₅ ꞌauꞌ₂ jɨngꞌ₅₄ rɨ́ngꞌ₂; në₁juaꞌ₂ ca₂rë₃ꞌnéꞌ₂ ꞌniaꞌ₂ co₂tiá₂; në₁juaꞌ₂ ꞌuaꞌ₂ ꞌauꞌ₂ ꞌniaꞌ₂ tiongꞌ₅₄; në₁juaꞌ₂ qui₂tsɨ́nꞌ₂ ꞌniaꞌ₂ ꞌlɨgꞌ₅₄ rɨ́ngꞌ₂; në₁juaꞌ₂ qui₂chi₂ꞌɨ́nꞌ₅ ꞌniaꞌ₂ rɨ́ngꞌ₂; në₁juaꞌ₂ chan₂ i₂qui₂jmo₅ rón₂; në₁juaꞌ₂ tionꞌ₅₄ ꞌniaꞌ₂ mɨꞌ₅₄.
21 Ján₃ bá₄ gó₅ jniá₂ në₁juaꞌ₂ ca₂jmo₃ Diú₄ a₂të₂tsɨnꞌ₅₄ jniá₂ o₂guíꞌ₃ o₄quiánꞌ₂ ꞌniaꞌ₂ jë₁ma₂dsióg₃; goꞌ₂ le₃jiá₃ tiáꞌ₃ quɨꞌ₂ dsɨ₃ ꞌo₅₄ o₄quióꞌ₄ i₂ma₂qui₂ma₂náu₂ dso₄ le₂jŋiá₅, tonꞌ₂ tsá₃ ꞌe₂ ma₂ca₂dsi₃quénꞌ₅ dsɨ́₅ o₄quióꞌ₄ a₂ꞌlɨgꞌ₅₄ a₂jmo₅-dsáu₅; a₂nióiꞌ₅ jág₁ quiainꞌ₅₄ dsa₂ i₂tsá₃ lɨ́n₅ dsɨ₂i₂gu₂; ca₂le₃jë́₃ guë́₄ a₂ꞌlɨgꞌ₅₄ o₂guíꞌ₃ a₂qui₂ma₂jmo₃.