Juáꞌ₂ Pa₄ ꞌɨin₂₃ dsa₂ i₂jme₂tag₅ jág₁ juɨ₁gain₂
11
Jme₁ꞌnio₃ jniá₂ juaꞌ₅₄ jmóꞌ₂ bá₄ ꞌniaꞌ₂ tióꞌ₃ ꞌauꞌ₂ quianꞌ₅₄ jág₁ quió₃ la₂, a₂në₃ guë́₄ juáꞌ₄, a₂lë́₅ liaꞌ₂ lë́₅ jág₁ quióꞌ₅ dsa₂ i₂tsá₃ ꞌen₅₄ dsɨ́₅. La₁ jmo₄ bá₄ ꞌniaꞌ₂ juɨnꞌ₂ ꞌauꞌ₂.
2 Ia₁ ꞌŋio₅ lɨn₃ dséi₅ jniá₂ quianꞌ₅₄ ꞌniaꞌ₂, a₂lë́₅ dsɨ₃ dséi₅ o₄quióꞌ₄ Diú₄. Ia₁ jniá₂ bá₄ ma₂ca₂jmo₃ jág₁ a₂jme₁jnia₅ jniá₂ ꞌniaꞌ₂ co₂ꞌnióꞌ₄ dsa₂ dsen₃, i₂le₁jë́₃ jme₂dsí₂ quióꞌ₅, ne₄ Cristo, juɨ₁liaꞌ₂ jan₂ jmei₂ chiꞌ₂ dsa₂ mɨ₄ jme₂jniai₂₃ ja₁mɨ́g₄ ne₄ i₂lë́₅ jág₁ i₂lé₂ dsɨ₂i₂gu₂.
3 La₁ gó₅ jniá₂ ia₁ conꞌ₂ tsá₃ ŋó₅ në₁ca₂rë₃gánꞌ₃ ꞌniaꞌ₂ jme₃gau₅ dsa₂ quianꞌ₅₄ mai₅₄ quióꞌ₅, juɨ₁liaꞌ₂ ca₂i₃ŋɨ́₂ Eva ca₂jme₃gau₅ dsɨ₂mɨꞌ₂, në₁ca₂i₃uɨ́n₂ cau₅ ꞌa₂ liaꞌ₂ dsɨ₂jiog₅ ꞌauꞌ₂ ꞌniaꞌ₂, a₂qui₂le₁jë́₃ ꞌauꞌ₂, a₂rë₂tengꞌ₅₄ le₃quióꞌ₅ Cristo.
4 Ia₁ ma₂ja₂nóꞌ₅ ꞌniaꞌ₂ qui₂guéngꞌ₅ rë₂ dsa₂ i₂të₁ja₂lén₂ jme₂tag₅, la₁ le₂siáꞌ₂ bá₄ ꞌɨin₂₃ Jesús, tsá₃ lë́₅ jág₁ quióꞌ₅ liaꞌ₂ conꞌ₂ lë́₅ jág₁ a₂ma₂gueꞌ₅₄ ꞌniaꞌ₂ le₂jŋiá₅ quióꞌ₅ Jesús. Jaun₂ le₂në₅ bá₄ ma₂guenꞌ₅₄ táng₃ ꞌniaꞌ₂ jme₂dsí₂ siánꞌ₂, on₃juaꞌ₅₄ i₂quián₅ Diú₄ i₂jme₁ma₂guenꞌ₅₄ ꞌniaꞌ₂. ¡Dse₃ bá₄ jmoꞌ₂ ꞌniaꞌ₂ tióꞌ₃ ꞌauꞌ₂ quianꞌ₅₄ jág₁ a₂rë₂tsɨ́n₄ guë́₄, a₂tsá₃ lë́₅ conꞌ₂ lë́₅ jág₁ dse₃ a₂lió₂ a₂jme₁ma₂neiꞌ₂ ꞌniaꞌ₂!
5 La₁ jniá₂ në́₃, tsá₃ lɨ́ng₂ juaꞌ₅₄ a₂meꞌ₂ guë́₄ quen₅ jniá₂, juaꞌ₅₄ ca₂juɨg₄ guë́₄, liaꞌ₂ conꞌ₂ guë́₄ dsa₂ ꞌéi₂ i₂ŋɨ́₄ lë₃ jme₂canꞌ₅₄ guion₅₄ a₂jmo₂₃ a₂lɨ́in₅ dsa₂ i₂chen₄ quián₅ Cristo.
6 O₁jŋiaꞌ₅₄ tsá₃ lɨn₄ dse₃ ꞌŋiag₂ jág₁, la₁ tsá₃ ꞌe₂ lë́₅; la₁ niog₅ bá₄ dsi₃. Ma₂ca₂jme₁jnia₅ bá₄ jniá₂ ca₂le₃jë́₃ ja₁conꞌ₂ ꞌniaꞌ₂.
7 ¿O₃ bá₄ lɨ́nꞌ₂ ꞌniaꞌ₂ a₂ca₂ꞌno₃ jniá₂ dso₄ ia₁ ca₂dsióg₃ ca₂jmo₃ megꞌ₂ a₂ca₂chonꞌ₄ jniá₂ ꞌniaꞌ₂ jme₁ca₂ꞌë́₃ jniá₂ jág₁ dse₃ a₂liónꞌ₂ ꞌniaꞌ₂, ia₁ tsá₃ ꞌliaꞌ₅₄ ca₂can₃ jniá₂?
8 Guáꞌ₅ ja₁siáꞌ₂ bá₄ i₂ca₂jme₃ꞌo₅₄, co₂ꞌnióꞌ₄ a₂ca₂can₃ jniá₂ cu₄ quióꞌ₅, ia₁jaun₂ le₃jmóꞌ₂ ta₁ a₂le₃ti₃ ta₁ ja₁conꞌ₂ ꞌniaꞌ₂.
9 Liaꞌ₂ conꞌ₂ jme₁ꞌeng₅₄ quianꞌ₅₄ ꞌniaꞌ₂, dsónꞌ₂ bá₄ ca₂rë₃ꞌnióꞌ₅ quió₃ le₂jaun₂, la₁ tsá₃ ꞌe₂ guei₂ ca₂cuë́₃ jniá₂ ꞌi₁janꞌ₂ ꞌniaꞌ₂. Ia₁ dsa₂ rɨnꞌ₅₄ jniog₄ i₂chan₂ Macedonia la₂ bá₄ ca₂i₁lein₅₄ juɨg₂ Corinto në₅, ca₂i₁can₅ a₂tsá₃ cha₂ quió₃ liaꞌ₂ conꞌ₂ jme₁chi₁quian₁₂ jniá₂ jmɨg₄. Qui₂ca₂jmo₃ bá₄ jniá₂ ꞌí₁ jaun₂ tsá₃ ꞌein₂ ꞌniaꞌ₂ cánꞌ₁ guei₂ o₄quió₃ jniá₂, jaun₂ caun₂ jmo₅₄ bá₄ jniá₂ ꞌí₁ jaun₂.
10 Jaun₂, o₄quióꞌ₄ jág₁ tí₅ dsónꞌ₂ quióꞌ₅ Cristo a₂ꞌi₄ dsɨ₃, juáꞌ₅ jniá₂, ꞌi₁jan₂ tsá₃ lé₂ jné₃ juaꞌ₅₄ a₂tsá₃ lé₂ juáꞌ₄ jniá₂ conꞌ₂ ꞌŋio₂ dsɨ₃ le₂tan₅₄ ꞌuë₃ Acaya.
11 ¿ꞌE₂ lë₃ juáꞌ₅ jniá₂ le₂në₅, lɨ́nꞌ₂ ꞌniaꞌ₂? ¿O₃ bá₄ ia₁ a₂tsá₃ ꞌnió₃ jniá₂ ꞌniaꞌ₂? Ŋi₅ bá₄ Diú₄, a₂ꞌnióg₃ bá₄ ꞌniaꞌ₂.
12 Jaun₂ caun₂ jmo₅₄ bá₄ jniá₂ a₂ma₂guio₃ jmo₂₃, ia₁jaun₂ jnɨ₃ juɨ₅ quióꞌ₅ juɨ₁liaꞌ₂ i₂i₂nio₄ në₅ a₂ꞌnio₃ dsia₃ jág₁ táꞌ₅ jmo₂₃ dsɨ́₅ a₂lë́₅ rë₂ ta₁ quióꞌ₅, juɨ₁liaꞌ₂ lë́₅ ta₁ quián₂ jniaꞌ₅₄.
13 Ia₁ dsa₂ i₂le₂ꞌéi₂ në́₃ lɨ́in₅ dsa₂ i₂chen₄ i₂juɨ₁gan₂. A₂jmo₂₃ ta₁ a₂jŋiaꞌ₅₄ jme₂gau₂₃, a₂qui₂jmóiꞌ₂ a₂jmo₂₃ lɨ́in₅ dsa₂ i₂chen₄ quián₅ Cristo.
14 On₃juaꞌ₅₄ a₂dsɨ₂góꞌ₃ dsɨ₅, ia₁ le₂jiog₅ ꞌŋiog₅ i₂së₃dsen₃ qui₂jmóiꞌ₂ a₂jmo₂₃ lɨ́in₅ jan₂ ángel i₂jniá₂ tág₅.
15 ꞌUɨg₅₄ jaun₂ në́₃, le₂jaun₂ bá₄ lë́₅ juɨ₁liaꞌ₂ quianꞌ₅₄ dsa₂ i₂jme₂ti₃ ta₁ ne₄ ꞌéi₂: qui₂jmóiꞌ₂ a₂jmo₂₃ lɨ́in₅ liaꞌ₂ lɨ́n₅ i₂jme₂ti₃ ta₁ ne₄ a₂dse₃, conꞌ₂ dsi₂ten₅₄. La₁ jë₁ca₂tóꞌ₂ bá₄ dsɨ₃guéi₃ conꞌ₂ lë́₅ ca₂tɨ́in₂ co₂niog₅ lë́₅ jmo₂₃.
ꞌA₂ liaꞌ₂ niog₅ lë́₅ uɨg₅ ca₂ŋág₃ Pa₄ ne₄ ia₁ a₂lɨ́in₅ dsa₂ i₂chen₄ quián₅ Cristo
16 Conꞌ₂ siáꞌ₂ juɨ́g₂ ꞌniaꞌ₂: tsá₃ o₁lenꞌ₂ ꞌniaꞌ₂ juaꞌ₅₄ të₃dsónꞌ₂ lɨ́ng₅ dsa₂ co₄. La₁ o₁jŋiaꞌ₅₄ ꞌein₂ guëꞌ₂ jmo₅ dsɨ́₅ a₂lɨ́ng₅ le₂në₅, la₁ guei₅₄ jniá₂ në₂jag₄ bá₄ a₂lɨ́ng₅ dsa₂ co₄, ia₁jaun₂ lé₂ dsia₅₄ ca₂la₂ jág₁ táꞌ₅.
17 Juɨ₁liaꞌ₂ juáꞌ₅ jniá₂, on₃juaꞌ₅₄ liaꞌ₂ conꞌ₂ lë́₅ ꞌnio₃ Te₁guiꞌ₅₄, liaꞌ₂ jë₁të₂ꞌɨ₅ jan₂ dsa₂ co₄ bá₄ juáꞌ₅ jniá₂, jmo₅₄ róng₂, co₂ꞌnióꞌ₄ caun₂ bá₄ ꞌei₅ dsɨ₃.
18 Juɨ₁liaꞌ₂ juɨn₅ lɨn₃ i₂chan₂ dsia₅ jág₁ táꞌ₅ quianꞌ₅₄ cosa a₂cha₂ mɨ₂güɨ́g₃ la₂, ján₃ bá₄ le₂jaun₂ guëꞌ₂, la₂ dsia₅₄ jniá₂ jág₁ táꞌ₅.
19 ꞌUɨg₅₄ ia₁ a₂ŋag₅₄ ŋiꞌ₅₄ bá₄ ꞌniaꞌ₂, jaun₂ ꞌŋio₂ bá₄ ꞌauꞌ₂ ꞌniaꞌ₂ jmoꞌ₂ tióꞌ₃ ꞌauꞌ₂ quianꞌ₅₄ dsa₂ co₄.
20 Ia₁ jmoꞌ₂ bá₄ ꞌniaꞌ₂ tióꞌ₃ ꞌauꞌ₂ quianꞌ₅₄ dsa₂ i₂chi₂quióng₂ jmɨg₄ tion₅₄-jan₃, dsa₂ i₂guë́ꞌ₅ ta₁ ꞌuaꞌ₂ quiánꞌ₂ ꞌniaꞌ₂, dsa₂ i₂jo₅ quiánꞌ₂ ꞌniaꞌ₂, dsa₂ i₂jmo₅ canꞌ₅₄ ne₄ quiánꞌ₂ ꞌniaꞌ₂, dsa₂ i₂qui₂jnó₂ quiánꞌ₂ ꞌniaꞌ₂ në́₃.
21 ꞌAn₁ lɨ́nꞌ₂ ꞌniaꞌ₂ a₂lág₅ jniaꞌ₅₄ dsa₂ ꞌuan₅₄ ia₁ a₂tsá₃ ꞌein₂ jniaꞌ₅₄ tiá₂ dsɨ́₅ jmo₃ le₂në₅ ja₁conꞌ₂ ꞌniaꞌ₂. ꞌAn₁ le₃jéin₄ jniá₂ o₂guíꞌ₃ bá₄ ia₁ a₂juáꞌ₅ a₂lɨ́ng₅ dsa₂ ꞌuan₅₄.
La₁ chi₂juaꞌ₂ tiá₂ bá₄ guëꞌ₂ dsɨ́₅ i₂siánꞌ₂ dsia₃ jág₁ táꞌ₅, ján₃ bá₄ tiá₂ dsɨ₃ jniá₂ jmo₅₄ le₂jaun₂. (La₁ juáꞌ₅ jniá₂ liaꞌ₂ ja₁juáꞌ₂ jan₂ dsa₂ co₄.)
22 ¿ꞌE₂? ¿Jmáꞌ₃ dsa₂ ꞌéi₂ bá₄ i₂tɨn₂ dsia₃ jág₁ jmei₅ hebreo? Ján₃ bá₄ tɨn₂ jniá₂ táng₃. ¿Jmáꞌ₃ dsa₂ ꞌéi₂ bá₄ lɨ́n₅ dsa₂ israelitas*? Ján₃ bá₄ ꞌéi₂ guëꞌ₂ jniá₂ ján₃. ¿ꞌE₂? ¿Jmáꞌ₃ liaꞌ₂ dsa₂ ꞌéi₂ bá₄ lɨ́n₅ tsɨ₁jon₂ Abraham? Ján₃ bá₄ ꞌéi₂ guëꞌ₂ lɨ́n₅ jniá₂.
23 ¿Jmáꞌ₃ dsa₂ ꞌéi₂ lɨ́n₅ dsa₂ i₂jme₂ti₃ ja₁con₂ Cristo? Tson₂ bá₄ guë́₄ lɨ́n₅ jniá₂, ia₁ ꞌŋio₅ lɨn₃ guë́₄ ma₂guio₃ jme₂ti₅₄ ja₁con₂ Cristo liaꞌ₂ conꞌ₂ guë́₄ dsa₂ ꞌéi₂. (A₂lë₁juáꞌ₅ bá₄ jniá₂, liaꞌ₂ lë₁të₂ꞌɨ₅ dsa₂ ŋá₅.) Ia₁ tson₂ lɨn₃ guëꞌ₂ ma₂guio₃ jmo₂₃ ta₁ jme₂ti₅₄; ia₁ ꞌlióng₂ guë́₄ ꞌmɨ₅ ma₂qui₂ma₂can₃ jniá₂ liaꞌ₂ conꞌ₂ guë́₄ dsa₂ ꞌéi₂; ma₂qui₂ma₂ꞌú₃ ꞌlióng₂ lɨn₃ ráun₂ néꞌ₃ ꞌmá₃ në́₃; ꞌlióng₂ ráun₂ ma₂i₂ŋɨ́g₂ jŋiaꞌ₅₄ meiꞌ₂ tsá₃ ma₂jong₃.
24 Conꞌ₂ ꞌŋiá₂ ráun₂ ma₂ca₂bóg₂ dsa₂ judíos* jmáꞌ₃ guióg₂-guia₃-né₂ ráun₂ liaꞌ₂ co₂ráun₂.a
25 ꞌNagꞌ₂ ráun₂ guëꞌ₂ ma₂bóg₂ dsa₂ quianꞌ₅₄ nɨ₁ꞌma₂; co₂ráun₂ guëꞌ₂ ca₂cuë₃ cang₄ tioinꞌ₅₄. ꞌNagꞌ₂ ráun₂ guëꞌ₂ ne₄ jmɨ₁ŋíꞌ₄ ca₂i₃ŋɨ́g₂ ca₂ꞌen₃ nɨ₁barco a₂jme₁ꞌeng₅₄. Co₂ráun₂ guëꞌ₂ ca₂ŋɨg₅ co₂jmɨg₄ co₂nei₅ dsi₂jo₂ jmɨ₁ŋíꞌ₄ në́₃.
26 ꞌLióng₂ ráun₂ dsi₂juɨ₅ ja₁ma₂qui₂i₁ŋɨ₃, ma₂ca₂i₃ŋɨ́g₂ a₂goꞌ₂ ia₁ te₁ꞌi₁ cuá₃, a₂goꞌ₂ ia₁ a₂chan₂ dsa₂ ꞌang₂, a₂goꞌ₂ rëꞌ₂ a₂jo₅₄ dsa₂ go₃, a₂goꞌ₂ jo₅₄ dsɨ₂nau₂, a₂goꞌ₂ rëꞌ₂ ꞌeng₅₄ ciudad, a₂goꞌ₂ jë₁ma₂ŋɨg₅ máꞌ₂ ja₁co₂ꞌŋiog₅, a₂goꞌ₂ jë₁ma₂ŋɨg₅ ne₄ jmɨ₁ŋíꞌ₄, a₂goꞌ₂ rëꞌ₂ quianꞌ₅₄ dsa₂ i₂juɨ₁gan₂ i₂jmo₅ lɨ́n₅ rɨnꞌ₅₄ jniog₄,
27 jë₄ ta₁ ꞌuaꞌ₂ lɨn₃, jë₄ ma₂ca₂ꞌú₃ lɨn₃, jë₄ jme₁tsá₃ güɨng₂₃, jë₄ i₁cón₅ rë₂quein₂ dsɨ₃, jë₄ jme₁ꞌɨn₂ a₂tsá₃ cha₂ a₂guëꞌ₅₄, jë₄ jein₂ güɨ́g₂, jë₄ a₂tsá₃ ꞌe₂ cha₂ quɨ́ꞌ₄ në́₃.
28 Cha₂ guë́₄ caun₂ siáꞌ₂ táng₃ a₂chang₂ ca₂le₃jë́₃ jmɨg₄ a₂ꞌɨ₅ dsɨ₃ o₄quióꞌ₄ ca₂le₃jë́₃ guáꞌ₅.
29 ¿ꞌEin₂ ꞌéi₂ i₂ꞌuan₅₄, jniá₂ guëꞌ₂ tsá₃ ꞌuang₅₄? ¿ꞌEin₂ ꞌéi₂ i₂ca₂tánꞌ₂ dso₄ a₂ꞌuɨn₄ i₂siánꞌ₂, jniá₂ guëꞌ₂ tsá₃ ꞌe₂ i₂méꞌ₂ dsɨ₃?
30 Në₁juaꞌ₂ ca₂tɨ́ng₂ dsia₅₄ jág₁ táꞌ₅, jaun₂ dsia₅₄ jniá₂ jág₁ táꞌ₅ të₂le₃ ne₄ ca₂le₃jë́₃ a₂cuë₅ léi₄ a₂lɨ́ng₅ jan₂ dsa₂ ꞌuan₅₄.
31 Diú₄ Jmei₂ Jesucristo Te₁guiꞌ₅₄ quián₂ jniog₄ bá₄ i₂ca₂tɨ́n₂ jme₂juɨnꞌ₂ dsa₂ co₂tan₅₄, ꞌéi₂ bá₄ ŋi₅ a₂dsau₅ bá₄ jág₁ quió₃.
32 Liaꞌ₂ conꞌ₂ jme₁ꞌeng₅₄ juɨg₂ Damasco, i₂lɨ́n₅ dsi₄máꞌ₂ ja₁jaun₂ i₂jme₁jme₂ti₃ ne₄ Rag₅₄ Aretas, ca₂jmo₃ ꞌéiꞌ₃ a₂ca₂jmo₃ dsa₂ ꞌí₁ o₄juɨ₅ ia₁ jme₁tsáunꞌ₂ jme₁dsɨ₃tióg₃ néꞌ₃ ꞌmá₃.
33 La₁ juɨ₅ siáꞌ₂ bá₄ ca₂sió₂ rɨnꞌ₅₄ jniog₄, ꞌeng₅₄ ꞌŋióꞌ₃ tsɨ₁mɨꞌ₂ ca₂sió₂ të₂ꞌua₁ juɨ₅ dsoꞌ₂ nɨ₁ꞌiaꞌ₂ a₂rë₂juɨ́₄ le₃lágꞌ₃ juɨg₂; le₂në₅ bá₄ ca₂lóng₂ o₄gú₃ ꞌéi₂.b