A₂quen₅ jág₁ quióꞌ₅ Pa₄ ia₁ a₂lɨ́in₅ i₂chen₄ quián₅ Cristo
10
Jniá₂ Pa₄, mɨ₂₃ juɨ́g₂ ꞌniaꞌ₂ quianꞌ₅₄ jág₁ ꞌua₁, ia₁ a₂ꞌua₁ dsɨ́₅ Cristo. Cha₂ jág₁ a₂lɨ́ng₅ jan₂ dsa₂ i₂quian₅ jág₁ ꞌua₁ jme₁ꞌeng₅₄ jë₄ quiánꞌ₂ ꞌniaꞌ₂, la₁ jë₁ma₂ꞌeng₅₄ ja₁siáꞌ₂ ꞌŋio₅ bá₄ ma₂bén₂ jág₁ quió₃.
2 Jaun₂ mɨ₅ jniá₂ neꞌ₅₄ ꞌniaꞌ₂, tsá₃ jmo₂ juaꞌ₅₄ a₂tion₅₄ ꞌnióꞌ₅ jmo₅₄ tiá₂ dsɨ₃ jë₁ma₂dsióg₃, quianꞌ₅₄ dsa₂ i₂bógꞌ₂ dso₄, a₂ꞌag₂₃ jniá₂ a₂jmo₂₃ liaꞌ₂ jmo₅ dsa₂ mɨ₂güɨ́g₃. Ia₁ caun₂ bá₄ ma₂ꞌei₅ dsɨ₃ a₂dsia₅₄ jág₁ quianꞌ₅₄ dsa₂ i₂le₂ꞌéi₂.
3 Dsónꞌ₂ bá₄ jaun₂ dsa₂ mɨ₂güɨ́g₃ bá₄ lág₅ jniaꞌ₅₄ të₁liaꞌ₂ chong₂ la₂. La₁ tsá₃ cágꞌ₂ jniaꞌ₅₄ juɨ₁liaꞌ₂ quɨ́nꞌ₂ dsa₂ mɨ₂güɨ́g₃.
4 Ia₁ on₃juaꞌ₅₄ quianꞌ₅₄ nɨ₁ŋí₁ cágꞌ₂ jniaꞌ₅₄, juɨ₁liaꞌ₂ nɨ₁ŋí₁ a₂qui₂jmóꞌ₂ ta₁ dsa₂ mɨ₂güɨ́g₃, juɨ₁liaꞌ₂ jë₁quɨ́inꞌ₂ jmo₂₃ ꞌnei₂; quianꞌ₅₄ bí₂ quióꞌ₅ Diú₄ bá₄ cágꞌ₂ jniaꞌ₅₄, a₂jaun₂ bá₄ ꞌnióꞌ₄ ŋí₁ quián₂ jniaꞌ₅₄ a₂ꞌio₅ bí₂ quióꞌ₅ Diú₄ a₂qui₂le₃juɨn₃ ca₂le₃jë́₃ a₂bén₂ a₂niog₅ tióng₂ quióꞌ₅ i₂së₃dsen₃.
5 Le₂në₅ bá₄ ma₂ja₂náu₅ jniaꞌ₅₄ ma₂tián₃ ma₂jne₅₄ jniaꞌ₅₄ ca₂le₃jë́₃ ꞌe₂ niog₅ ꞌag₅ dsa₂ ja₁con₂ Diú₄, juɨ₁liaꞌ₂ dsa₂ i₂jmo₅ rón₂, i₂tsá₃ ꞌnio₃ le₃cuɨn₅ Diú₄. Ján₃ bá₄ le₁te₁ jniaꞌ₅₄ le₁ꞌŋe₅ ca₂le₃jë́₃ a₂dsɨ₂jiog₅ dsɨ́₅ dsa₂, ia₁jaun₂ le₃néiꞌ₂ nag₃ gau₂ jág₁ quióꞌ₅ Cristo.
6 Liaꞌ₂ ma₂tióng₂ jaun₂ bá₄ jniaꞌ₅₄, le₃ꞌë₅₄ jniaꞌ₅₄ uɨg₅ ca₂le₃jɨ́n₃ i₂tsá₃ jág₁ cán₂ i₂tsá₃ neꞌ₅₄. Le₂jaun₂ bá₄ lé₂ jë₁ma₂rë₂ꞌŋia₅ a₂néꞌ₂ ꞌniaꞌ₂.
7 Caunꞌ₅₄ ꞌniaꞌ₂ ꞌí₁ a₂ma₂jniá₂ dsi₁ne₁, juɨ₁liaꞌ₂ jág₁ a₂juáꞌ₄ jniá₂ la₂: chi₂juaꞌ₂ caun₂ ꞌei₅ dsɨ́₅ i₂lɨn₅₄ a₂lɨ́in₅ të₃dsónꞌ₂ i₂quián₅ Cristo, ca₂tɨ́in₂ le₃ŋi₅, jniaꞌ₅₄ guëꞌ₂ në́₃ dsónꞌ₂ bá₄ lág₅ i₂quián₅ Cristo ján₃.
8 Meiꞌ₂ tsá₃ lɨ́nꞌ₂ ꞌniaꞌ₂ a₂juáꞌ₅ jniá₂ ŋag₅₄ juɨ₁liaꞌ₂ conꞌ₂ ta₁ a₂lág₅ jniaꞌ₅₄. La₁ on₃juaꞌ₅₄ a₂guiꞌ₅₄ jniá₂ jág₁ a₂juáꞌ₅, ia₁ a₂ca₂tɨ́n₂ bá₄ jniá₂ juáꞌ₄, ia₁ ꞌŋiog₅ bá₄ Te₁guiꞌ₅₄ ma₂cuë₃ ꞌéiꞌ₃ a₂qui₂jme₁ꞌan₂ ꞌauꞌ₂ ꞌniaꞌ₂ a₂dse₃ jmo₃ ta₁ a₂qui₂dsɨ₃cón₃ jme₂dsí₂ quiánꞌ₂ ꞌniaꞌ₂. On₃juaꞌ₅₄ rëꞌ₂ të₂le₃ a₂lé₂ tsɨ₁rë₂janꞌ₅₄ ꞌniaꞌ₂.
9 Tsá₃ o₁lenꞌ₂ ꞌniaꞌ₂ juaꞌ₅₄ ꞌnio₃ jniá₂ quiang₅₄ juë́ꞌ₅ ꞌniaꞌ₂ quianꞌ₅₄ si₂ a₂jmo₅ jniá₂.
10 Juáꞌ₂ bá₄ i₂lɨn₅₄ ꞌŋio₅ bén₂ jág₁ quió₃ tioꞌ₅₄ ne₄ si₂, la₁ jan₂ dsa₂ ꞌuan₅₄ bá₄ lɨ́ng₅ juɨ₁liaꞌ₂ jme₁ꞌeng₅₄ jë₄ quiánꞌ₂ ꞌniaꞌ₂, jaun₂ lɨ́in₂ a₂tsá₃ lɨn₄ ta₁ tí₄ jág₁ quió₃ a₂dsia₂₃ dsi₁ne₁.
11 Juɨ₁le₂ŋɨ́ꞌ₂ bá₄ dsa₂ i₂le₂ꞌéi₂, juɨ₁liaꞌ₂ lë́₅ jág₁ quián₂ jniaꞌ₅₄ a₂tioꞌ₅₄ ne₄ si₂, juɨ₁ꞌe₂ guë́₃ uɨ́ng₂ tioꞌ₅₄ jniaꞌ₅₄, le₂jaun₂ dsónꞌ₂ jmo₂ bá₄ jniaꞌ₅₄ jme₁tioꞌ₅₄ quianꞌ₅₄ ꞌniaꞌ₂ ján₃.
12 Ia₁ tsá₃ tiá₂ dsɨ₅ jniaꞌ₅₄ ꞌɨ́n₄ dse₃ guio₅₄, on₃ guëꞌ₂ a₂quɨn₅₄ jniaꞌ₅₄ quianꞌ₅₄ i₂lɨn₅₄ i₂jme₂juɨnꞌ₂ guioin₅₄ le₂jaun₂. La₁ ꞌéi₂ në́₃ jme₁con₂ ꞌí₁ chi₂juaꞌ₂ co₂rɨin₂, quɨin₂₃ guioin₅₄ quianꞌ₅₄ rɨinꞌ₅₄, tsá₃ ꞌan₂ dsɨ́₅ chain₂.
13 Jaun₂ tsá₃ dsiá₁ jniaꞌ₅₄ jág₁ táꞌ₅ ŋag₅₄ guë́₄ conꞌ₂ guë́₄ ja₁ca₂tág₂. Conꞌ₂ jaun₂ bá₄ jmo₂ jniaꞌ₅₄ conꞌ₂ lë́₅ ꞌéiꞌ₃ ca₂cuë₃ Diú₄ a₂jmó₁. Jaun₂ ꞌéi₂ bá₄ ca₂jmo₃ ꞌéiꞌ₃ a₂dsi₁náu₅ jniaꞌ₅₄ të₂goꞌ₅₄ ꞌniaꞌ₂.
14 Jaun₂ tsá₃ o₁lenꞌ₂ ꞌniaꞌ₂ juaꞌ₅₄ jniaꞌ₅₄ i₂nio₄ të₂ ja₁tsá₃ ma₃dsi₂ten₅₄ i₂nio₁. Le₂në₅ jme₁lé₂ juaꞌ₅₄ meiꞌ₂ guë́₃ tsá₃ ma₂ca₂dsi₃náu₅ jniaꞌ₅₄ ca₂të₂ ja₁tionꞌ₅₄ ꞌniaꞌ₂. Dsá₂ ꞌauꞌ₂ ꞌniaꞌ₂ jmo₄, jniaꞌ₅₄ bá₄ i₂le₂ꞌuɨg₅₄ i₂can₁ jág₁ dse₃ la₂ quióꞌ₅ Cristo jɨnꞌ₄ ꞌniaꞌ₂.
15 Tsá₃ dsiá₁ jniaꞌ₅₄ jág₁ táꞌ₅ ŋag₅₄ guë́₄ quianꞌ₅₄ ta₁ quióꞌ₅ i₂siánꞌ₂. Jŋiaꞌ₅₄ liaꞌ₂ a₂jaun₂ bá₄ ꞌɨ́n₂ dsɨ₅ jniaꞌ₅₄, jë₁ma₂ꞌénꞌ₂ guë́₄ ꞌniaꞌ₂, jaun₂ ꞌag₃ caun₂ jág₁ quianꞌ₅₄ ꞌniaꞌ₂, ia₁jaun₂ lé₂ dsɨ₃cón₃ guë́₄ ta₁ quián₂ jniaꞌ₅₄, o₄quióꞌ₄ Diú₄,
16 ia₁jaun₂ lé₂ le₃dsau₅₄ uɨ́ng₂ a₂ŋag₅₄ guë́₄ ja₁tionꞌ₅₄ ꞌniaꞌ₂ qui₂dsɨ₁ꞌë́₄ jág₁ dse₃. La₁ tsá₃ dsɨ₁jmó₁ jniaꞌ₅₄ rón₂ quianꞌ₅₄ ta₁ a₂ma₂niog₅ ma₂jmo₃ dsa₂ siánꞌ₂.