A₂cágꞌ₃ dsa₂ cu₄ a₂jme₃ꞌoin₅₄ rɨinꞌ₅₄ ja₁siáꞌ₂
9
Juɨ₁liaꞌ₂ cu₄ a₂jme₂ꞌonꞌ₅₄ ꞌniaꞌ₂ dsa₂ ꞌén₂ rɨnꞌ₅₄,a tsá₃ ma₃tion₅₄ juaꞌ₅₄ a₂qui₂juáꞌ₄ guë́₄ ne₄ si₂.
2 Ia₁ ma₂guion₅₄ bá₄ a₂le₁ꞌág₄ ꞌauꞌ₂ ꞌniaꞌ₂ a₂jme₁ꞌoꞌ₁; o₄quióꞌ₄ a₂në₅ jmo₅ jniá₂ tángꞌ₅ jɨn₄ dsa₂ chan₂ ꞌuë₃ Macedonia. Ia₁ ma₂ca₂ŋi₂ bá₄ jme₁ma₂chan₂ co₂jŋia₅₄ dsa₂ chan₂ ꞌuë₃ Acaya, tonꞌ₂ meiꞌ₂ tsá₃ ca₂le₃jɨ́n₃ bá₄ ca₂lë₃ dsɨ́₅ jme₃ꞌo₅₄ o₄quióꞌ₄ a₂dsen₅₄ ꞌauꞌ₂ ꞌniaꞌ₂ jaun₂.
3 Ia₁jaun₂ tsá₃ lë́₅ juaꞌ₅₄ a₂lë₁ca₂cuë₃ jág₁ táꞌ₅ quió₃, jaun₂ tsɨ́ng₂ rɨnꞌ₅₄ la₂ dsɨ₃jág₂ ia₁ jág₁ jaun₂ ma₂lë́₅, ma₂tiónꞌ₂ ꞌniaꞌ₂ co₂jŋia₅₄.
4 Ia₁ conꞌ₂ tsá₃ ŋó₅ në₁ca₂i₃lén₂ i₂lɨn₅₄ rɨnꞌ₅₄ i₂chan₂ Macedonia quianꞌ₅₄ jniá₂, jaun₂ tsá₃ lé₂ juaꞌ₅₄ caun₂ dé₄ o₂guíꞌ₃ tsá₃ co₂jŋiaꞌ₅₄ ꞌniaꞌ₂ changꞌ₂ jë₁ma₂ca₂dsi₃náu₅ jniaꞌ₅₄. Le₂jiog₅ jniá₂ chéngꞌ₅ ꞌlɨgꞌ₅₄ (le₂jaun₂ ꞌniaꞌ₂ táng₃) ia₁ ma₂juɨ́g₂ jniá₂ dsa₂ ꞌŋio₅ dsenꞌ₃ ꞌniaꞌ₂.
5 ꞌUɨg₅₄ në₅ ma₂mɨ₃ jniá₂ ja₁con₂ rɨnꞌ₅₄ jniog₂, ia₁ ꞌnióꞌ₅ bá₄ lɨ́ng₂, ia₁jaun₂ dsɨ₃léin₂ dsɨ₃jɨin₅₄ ꞌniaꞌ₂ ia₁jaun₂ jme₃ꞌo₅₄ guë́₄ rɨnꞌ₅₄ cu₄, jág₁ a₂ma₂cuëꞌ₅₄ ꞌniaꞌ₂ quiángꞌ₂ le₂jŋiá₅ a₂cuë́ꞌ₁, ia₁jaun₂ ma₂lë́₅ co₂jnia₅₄ ꞌa₂ conꞌ₂ lë́₅ ꞌŋio₂ ꞌauꞌ₂ ꞌniaꞌ₂, on₃juaꞌ₅₄ ia₁ a₂chi₁quiong₅₄ jniaꞌ₅₄ jmɨg₄.
6 Dsá₂ ꞌauꞌ₂ ꞌniaꞌ₂ jmo₄, jág₁ a₂juáꞌ₄ la₂: juɨ₁liaꞌ₂ dsa₂ i₂jne₅ meꞌ₂, meꞌ₂ bá₄ a₂ráu₃ quióꞌ₅; juɨ₁liaꞌ₂ dsa₂ i₂jne₅ ꞌlióng₂ guëꞌ₂ në́₃, ján₃ bá₄ ꞌlióng₂ ráu₃ quióꞌ₅.
7 Le₂jan₂ le₂jan₂ bá₄ ca₂tɨ́n₂ cuë₃ ꞌa₂ conꞌ₂ ma₂ca₂lë₃ dsɨ́₅ cuë₃, tsá₃ ca₂tɨ́n₂ dsa₂ cuë₃ juaꞌ₅₄ a₂ma₂dsɨ₂méꞌ₃ dsɨ́₅, on₃ guëꞌ₂ ca₂tɨ́n₂ dsa₂ cuë₃ ia₁ a₂ma₂në₂chi₃quióng₂ dsa₂ jmɨg₄ tion₅₄. Ia₁ Diú₄ ꞌnioi₃ dsa₂ i₂cuë₅ a₂ꞌioꞌ₂ jénꞌ₅.
8 Diú₄ bá₄ i₂quɨꞌ₅₄ jmɨg₄ jme₃guꞌ₅₄ ꞌniaꞌ₂ ꞌŋio₅ lɨn₃ ca₂liaꞌ₂ qui₂rë₂tsón₂ quiánꞌ₂ ꞌniaꞌ₂, ia₁jaun₂ le₃cha₂ ca₂le₃jë́₃ a₂ꞌnióꞌ₅ quiánꞌ₂ ꞌniaꞌ₂, ia₁jaun₂ rë₂tsón₂ lé₂ le₃jme₁ꞌonꞌ₁ ꞌniaꞌ₂ rɨ́ngꞌ₂ ca₂le₃jë́₃ jmɨg₄, quianꞌ₅₄ ca₂le₃jë́₃ ne₅₄ ta₁ dse₃.
9 Jaun₂ le₃ti₃ a₂juáꞌ₂ ne₄ Si₂:
Juɨ₁liaꞌ₂ dsa₂ i₂jmo₅ dsióg₁,
cuë₂₃, jme₁ꞌoin₅₄ dsa₂ i₂te₂ŋé₂,
liaꞌ₂ co₂tan₅₄ bá₄ dsiogꞌ₂ dsɨ́₅ dsa₂
ca₂le₃jë₃ ne₅₄ a₂dse₃ a₂ꞌua₁ dsɨ́₅ ca₂jmo₃.b
10 ꞌŊiog₅ bá₄ Diú₄ ca₂cuë₃ jon₂ a₂ca₂i₃jnia₄; ca₂jmo₃ ca₂rau₂ a₂quëꞌ₅₄ ꞌniaꞌ₂, tonꞌ₂ jmo₃ ján₃ le₃cha₂ ca₂le₃jë́₃ ne₅₄ a₂tsá₃ cha₂ quiánꞌ₂ ꞌniaꞌ₂; jaun₂ le₃dse₃ ca₂le₃jë́₃ ꞌe₂ a₂jánꞌ₄ ꞌniaꞌ₂ në́₃, jmo₃ qui₂dsɨ₃cón₃ dsɨ₃caꞌ₅₄, jmo₃ a₂caun₂ ráu₃ a₂ꞌua₁ ꞌauꞌ₂ ꞌniaꞌ₂ jmoꞌ₂.
11 Le₂në₅ bá₄ le₃chanꞌ₂ ꞌniaꞌ₂ dse₃ le₃cha₂ quiánꞌ₂ ꞌniaꞌ₂, ia₁jaun₂ le₃cha₂ a₂lé₂ le₃jme₁ꞌongꞌ₁ guë́₄ juɨn₅ dsa₂ te₂ŋé₂ jmóꞌ₂ ꞌua₁ ꞌauꞌ₂. Le₂jaun₂ bá₄ le₃jme₁ꞌongꞌ₁ ꞌniaꞌ₂ rɨnꞌ₅₄ jniog₄ të₂le₃ quianꞌ₅₄ jniaꞌ₅₄, jaun₂ juɨn₅ i₂lé₂ dsɨ́₅ cuë́ꞌ₃ ti₁ꞌmagꞌ₄ Diú₄.
12 Ta₁ a₂jme₂ti₄ jniog₄ ne₄ i₂siánꞌ₂ jaun₂, jmo₅ ta₁ on₃juaꞌ₅₄ jmáꞌ₃ a₂jme₂ꞌo₅₄ cuë₃ a₂ꞌnióꞌ₅ quióꞌ₅ rɨnꞌ₅₄ jniog₄; ján₃ bá₄ jmo₅ ta₁ ia₁jaun₂ juɨn₅ i₂rë₂tsón₂ i₂cuë́ꞌ₃ ti₁ꞌmagꞌ₄ Diú₄.
13 Të₂le₃ quianꞌ₅₄ ta₁ a₂jme₂ti₄ jniog₄ ne₄ rɨnꞌ₅₄ ja₁siáꞌ₂ në₅, cuë₂ jniog₄ léi₄ a₂të₃dsónꞌ₂ bá₄ jme₂tiꞌ₅₄ ꞌniaꞌ₂ jág₁ dse₃ quióꞌ₅ Cristo a₂ma₂gueꞌ₅₄ ꞌniaꞌ₂, ia₁ a₂ꞌua₁ ꞌauꞌ₂ ja₁con₂ rɨ́ngꞌ₂, quianꞌ₅₄ ja₁con₂ ca₂le₃jɨ́n₃. Le₂në₅ bá₄ juɨn₅ dsa₂ i₂jme₃juɨnꞌ₂ Diú₄.
14 Le₂në₅ bá₄ lé₂ dsɨ́₅ mɨ₃ ne₄ Diú₄ o₄quiánꞌ₂ ꞌniaꞌ₂, tonꞌ₂ ꞌɨ́n₅ dsɨ́₅ ꞌŋio₅ lɨn₃ o₄quiánꞌ₂ ꞌniaꞌ₂, ia₁ ma₂rë₂jniá₂ le₃ja₁conꞌ₂ ꞌniaꞌ₂ ꞌa₂ liaꞌ₂ ma₂jmo₃ Diú₄ a₂ꞌua₁ ꞌauꞌ₂ ꞌniaꞌ₂.
15 ¡ꞌE₁ guë́₄ ti₁ꞌmagꞌ₄ Diú₄ ia₁ ma₂cuag₃ jniog₄ i₂dsen₃ i₂quen₅ guë́₄ lɨn₃, ca₂liaꞌ₂ tsá₃ ne₄ ꞌa₂ liaꞌ₂ le₃juaꞌ₅₄!