2 Juɨ₁ꞌa₂ guë́₃ la₂ ma₂ja₂léin₂ quian₅ o₂i₁ dsɨ₅, tsá₃ caun₂ táu₂ dsɨ₂ŋɨ́i₂, la₁ dse₃ bá₄ chain₂ tei₄ bá₄ le₁ꞌág₄ dsɨ́₅. Juɨ₁ꞌe₂ guë́₃ la₂ te₂ŋéi₂ chain₂, la₁ tson₂ guë́₄ a₂ma₂cuë₃ conꞌ₂ ꞌŋio₂ dsɨ́₅ conꞌ₂ guë́₄ dsa₂ i₂cha₂ quióꞌ₅.

3 Jniá₂ jángꞌ₅ jág₁ dsau₅, a₂të₃dsónꞌ₂ bá₄ ma₂cuë₃ ꞌa₂ conꞌ₂ tióꞌ₅, të₂le₃ lë́₅ guë́₄ ma₂cuë₃ ꞌa₂ conꞌ₂ cha₂ quióꞌ₅, ia₁ a₂ꞌŋio₂ dsɨ́₅.

4 Ca₂tság₃ jniaꞌ₅₄ tion₅₄-jan₃, a₂cuë₅₄ jniaꞌ₅₄ jmɨg₄ a₂queinꞌ₅₄ quianꞌ₅₄ jniaꞌ₅₄ ta₁ dse₃ a₂jme₁ꞌon₁₂ dsa₂ quián₅ Diú₄.^a

5 Të₂le₃ lë́₅ guë́₄ ca₂cuë₃ bá₄ liaꞌ₂ conꞌ₂ guë́₄ jme₁lág₂ jniaꞌ₅₄. Jŋiá₅ deꞌ₂ o₄gú₃ Te₁guiꞌ₅₄ ca₂dsia₃, jaun₂ guë́₄ ca₂dsia₃ ne₄ jniaꞌ₅₄, liaꞌ₂ conꞌ₂ ꞌnio₃ Diú₄.

6 Jaun₂ ma₂chi₁ca₂lenꞌ₄ jniaꞌ₅₄ Tito jaun₂ jmo₃ dse₃ dsɨ́₅ a₂jme₃ꞌŋiai₂₃ ta₁ dse₃ në₅ jɨnꞌ₄ ꞌniaꞌ₂ ꞌuɨg₅₄ a₂ma₂ꞌei₅ le₂jŋiá₅ ꞌa₂ conꞌ₂ ca₂lë₃ ꞌauꞌ₂ ꞌniaꞌ₂ jme₁ꞌoꞌ₁.

7 Ia₁ juɨ₁liaꞌ₂ ma₂dsɨ₂jŋiáꞌ₄ ꞌniaꞌ₂ jë₄ le₂jë́₃: a₂ꞌénꞌ₂ ꞌniaꞌ₂, a₂ꞌŋiaꞌ₂ ꞌniaꞌ₂ jág₁ dse₃, a₂ŋɨ́ꞌ₂ ꞌauꞌ₂ ꞌniaꞌ₂, a₂dsen₅₄ ꞌauꞌ₂, a₂ꞌniógꞌ₃ jniaꞌ₅₄ në́₃; ján₃ bá₄ le₂në₅ ca₂tɨ́nꞌ₂ ꞌniaꞌ₂ dsɨ₃jŋiáꞌ₄ quianꞌ₅₄ a₂la₂, a₂jmóꞌ₂ ꞌua₁ ꞌauꞌ₂.

8 Tsá₃ o₁lenꞌ₂ ꞌniaꞌ₂ juaꞌ₅₄ a₂jmo₅ jniá₂ ꞌéiꞌ₃ ja₁conꞌ₂ ꞌniaꞌ₂. Jŋiaꞌ₅₄ liaꞌ₂ ꞌnio₃ jniá₂ cáun₄ ꞌí₁ të₂le₃ quianꞌ₅₄ a₂dsen₅₄ dsɨ́₅ i₂siánꞌ₂ chi₂juaꞌ₂ dsónꞌ₂ bá₄ ꞌniógꞌ₃ rɨ́ngꞌ₂ ján₃.

9 Ia₁ ma₂ŋiꞌ₅₄ bá₄ ꞌniaꞌ₂ ꞌa₂ liaꞌ₂ ꞌua₁ dsɨ́₅ Te₁guiꞌ₅₄ Jesucristo quián₂. O₄quióꞌ₄ a₂ꞌnioi₃ ꞌniaꞌ₂, ca₂ŋɨ₃ te₂ŋéi₂, o₁jŋiaꞌ₅₄ la₂ jme₁chain₂ dse₃, ia₁jaun₂ le₃chanꞌ₂ ꞌniaꞌ₂ dse₃ të₂le₃ quianꞌ₅₄ juɨ₅ te₂ŋé₂ a₂ca₂can₃ ꞌéi₂.

10 Cuë₅ jniá₂ jág₁ dse₃ a₂juɨ́g₂ ꞌniaꞌ₂, juɨ₁liaꞌ₂ jág₁ la₂, a₂dse₃ quiánꞌ₂ ꞌniaꞌ₂ guiongꞌ₅₄ bá₄, ia₁ ꞌniaꞌ₂ bá₄ i₂ca₂jme₁liógꞌ₄ ma₂ca₂ŋi₂, a₂ca₂jme₁ꞌoꞌ₁ ꞌniaꞌ₂, a₂ꞌŋio₂ ꞌauꞌ₂ ꞌniaꞌ₂ në́₃:

11 jaun₂ në₃ në́₃, jme₁ꞌŋia₅ ꞌniaꞌ₂ ta₁ jaun₂ a₂ca₂jme₁liógꞌ₂, ia₁jaun₂ le₃ti₃ a₂ꞌŋio₂ ꞌauꞌ₂ ꞌniaꞌ₂ jaun₂, liaꞌ₂ conꞌ₂ lë́₅ cha₂ quiánꞌ₂ ꞌniaꞌ₂.

12 Ia₁ juɨ₁liaꞌ₂ a₂cuë₅ dsa₂ a₂ꞌŋio₂ dsɨ́₅ të₃dsónꞌ₂ ꞌe₂ ꞌnio₃ cuë́ꞌ₃ Diú₄, a₂le₂jaun₂ bá₄ gue₅ Diú₄ ꞌŋio₂ dsɨ́₅, liaꞌ₂ conꞌ₂ lë́₅ a₂cha₂ quióꞌ₅ dsa₂, on₃juaꞌ₅₄ liaꞌ₂ conꞌ₂ lë́₅ a₂tsá₃ cha₂ quióꞌ₅.

13 On₃juaꞌ₅₄ a₂jaun₂ guëꞌ₂ juáꞌ₅ jniá₂ ia₁jaun₂ tónꞌ₃ dsa₂ ꞌéi₂ a₂rë₂tsón₂ ŋag₅₄ quióꞌ₅, tonꞌ₂ të₂le₃ ja₁conꞌ₂ ꞌniaꞌ₂ guiongꞌ₅₄ guëꞌ₂ në́₃ tsá₃ cha₂ lé₂.

14 Të₂le₃ ia₁jaun₂ dsióg₄ co₂rë₂ bá₄ lë́₅ chan₂ dsa₂, ꞌniaꞌ₂ cuëꞌ₂ ꞌe₂ niog₅ tsá₃ tɨ́nꞌ₂ quióꞌ₅ rɨ́ngꞌ₂ jmɨg₄ në₃; juɨ₁la₂ ꞌióg₃ guëꞌ₂, ꞌéi₂ guëꞌ₂ ma₂tión₂ jme₃ꞌo₅₄ cuë₃ ꞌe₂ niog₅ tsá₃ tɨ́nꞌ₂ quiánꞌ₂ ꞌniaꞌ₂ táng₃. Jaun₂ le₂në₅ bá₄ dsióg₄ co₂rë₂ bá₄ lë́₅ chan₂ dsa₂.

15 Jaun₂ le₂ti₃ juɨ₁liaꞌ₂ juáꞌ₂ ne₄ Si₂ quióꞌ₅ Diú₄: “I₂ca₂roꞌ₂ ꞌlióng₂ tsá₃ ꞌe₂ juaꞌ₅₄ a₂ca₂chóng₃ quióꞌ₅; le₂jaun₂ guëꞌ₂ le₃ja₁con₂ i₂ca₂roꞌ₂ meꞌ₂, tsá₃ ꞌe₂ ca₂lë₃ juaꞌ₅₄ a₂tsá₃ ca₂tɨ́nꞌ₂ quióꞌ₅.”^b

16 Ti₁ꞌmagꞌ₄ Diú₄ ca₂jmo₃ a₂ca₂lë₃ dsɨ́₅ Tito a₂ca₂ꞌɨ₃ dsɨ́₅ ꞌniaꞌ₂ ꞌŋio₅ lɨn₃, juɨ₁liaꞌ₂ ꞌɨ₅ dsɨ₃ jniá₂.

17 Ia₁ dsɨ₂juɨ₅ bá₄ ca₂gue₃ jme₁ca₂chéi₂ jniaꞌ₅₄ dsó₃, tonꞌ₂ ia₁ dsan₂ bá₄ dsɨ́₅ ꞌéi₂ ꞌŋiog₅ a₂dsó₃ dsɨ₃jɨin₅₄ ꞌniaꞌ₂ a₂ꞌŋio₂ dsɨ́₅.

18 Jan₂ rɨnꞌ₅₄ jniog₄ i₂ꞌei₅ jág₁ dse₃ quióꞌ₅ le₂con₂ guáꞌ₅ Macedonia la₂, ꞌéi₂ chen₅₄ jniaꞌ₅₄ dsó₃ co₂lë₅ quiainꞌ₅₄ Tito.

19 Rɨnꞌ₅₄ i₂ꞌɨ́n₅ jniaꞌ₅₄ në₅, ca₂quiónꞌ₂ guáꞌ₅ a₂jme₃quiongꞌ₅₄ jniaꞌ₅₄ a₂i₁nio₁ jmó₁ ta₁ dse₃ a₂jme₁ꞌon₁ jniaꞌ₅₄ rɨnꞌ₅₄ ia₁jaun₂ le₃juɨnꞌ₂ Te₁guiꞌ₅₄, tonꞌ₂ ia₁jaun₂ léi₄ a₂dsen₅₄ dsɨ₅ jniaꞌ₅₄ a₂jme₁ꞌon₁ rɨnꞌ₅₄.^c

20 Tsá₃ ꞌniog₂ jniaꞌ₅₄ juaꞌ₅₄ a₂chi₂ꞌag₃ dsa₂ o₄quióꞌ₄ cu₄ a₂rë₂tsón₂ jaun₂ a₂niog₅ o₄gu₂ jniaꞌ₅₄.

21 ꞌNiog₂ jniaꞌ₅₄ jmó₁ a₂le₁jë́₃ jme₂dsí₂ quián₂ të₃ne₄ dsa₂ liaꞌ₂ quianꞌ₅₄ të₃ne₄ Te₁guiꞌ₅₄ në́₃.

22 Ján₃ guëꞌ₂ chen₅₄ jniaꞌ₅₄ jan₂ rɨnꞌ₅₄ siánꞌ₂ i₂ma₂cuë₃ léi₄ a₂dsen₅₄ dsɨ́₅ ꞌŋio₅ lɨn₃. La₁ në₃ në́₃ ꞌŋio₅ lɨn₃ guë́₄ jmo₂₃ a₂dsen₅₄ dsɨ́₅ ia₁ a₂ŋɨ́₄ lë₃ caun₂ ꞌei₅ dsɨ́₅ o₄quiánꞌ₂ ꞌniaꞌ₂.

23 Tito në́₃, lɨ́in₅ jan₂ rɨ́ngꞌ₃ i₂jmo₅ ta₁ co₂lë₅ quianꞌ₅₄ jniá₂ a₂jme₂ti₃ ta₁ neꞌ₅₄ ꞌniaꞌ₂. Rɨnꞌ₅₄ jniog₄ i₂quiainꞌ₅₄ në́₃, i₂chen₄ quián₅ guáꞌ₅ i₂i₂nio₄ cuë₂₃ léi₄ a₂jlánꞌ₁ Cristo.

24 Jaun₂ në́₃, jme₁jnia₅ ne₄ dsa₂ në₅, liaꞌ₂ le₃ne₄ ca₂le₃jɨ́n₃ guáꞌ₅ në́₃, qui₁jangꞌ₅₄ ꞌniaꞌ₂ léi₄ a₂dsónꞌ₂ ꞌniógꞌ₃ ꞌniaꞌ₂ dsa₂ ꞌén₂ rɨ́ngꞌ₂, qui₁jangꞌ₅₄ léi₄ ján₃, ꞌe₂ ꞌuɨg₅₄ a₂ŋɨ́₄ lë₃ dsia₂ jniaꞌ₅₄ jág₁ táꞌ₅ ꞌɨ́n₅ ꞌniaꞌ₂.