7
Le₂në₅ bá₄, rɨnꞌ₅₄ jniog₄, ꞌuɨg₅₄ ia₁ a₂ron₅ jág₁ a₂cuë́₁ quióꞌ₅ Diú₄ ja₁con₂ jniog₄, jaun₂ ca₂tág₂ jniog₄ chi₅₄ quián₂ ca₂le₃jë́₃ a₂ꞌlɨgꞌ₅₄ a₂lé₂ le₃ꞌiog₅ jme₂dsí₂ quián₂, le₂jaun₂ nɨ₁ŋɨ₁ në́₃. Juɨ₁le₂chong₂ bá₄ co₂ŋeiꞌ₅₄ dsa₂ i₂lë́₅ ꞌí₁ i₂jme₂gan₃ Diú₄.
ꞌA₂ liaꞌ₂ ca₂rë₃tsɨ́n₃ dsɨ́₅ dsa₂ Corintios, ca₂can₃ táng₃ juɨ₅ dse₃
2 Jmo₄ ꞌniaꞌ₂ ꞌauꞌ₂ a₂jagꞌ₅₄ dse₃ jniaꞌ₅₄. Ia₁ tsá₃ ꞌe₂ ꞌlɨgꞌ₅₄ ma₂jmaꞌ₅₄ ꞌi₁janꞌ₂ ꞌniaꞌ₂, on₃ guëꞌ₂ ꞌe₂ jág₁ ga₂ ma₂chéi₂ jniaꞌ₅₄ ꞌi₁jan₂, on₃ guëꞌ₂ juaꞌ₅₄ ma₂ca₂jme₁gan₅ jniaꞌ₅₄ ꞌi₁janꞌ₂ ꞌniaꞌ₂ në́₃.
3 On₃juaꞌ₅₄ a₂juáꞌ₅ jniá₂ ia₁ a₂bongꞌ₅₄ ꞌniaꞌ₂ dso₄. Liaꞌ₂ ma₂juáꞌ₅ jaun₂ bá₄ jniá₂, jɨng₅₄ ꞌniaꞌ₂ ca₂le₃jë́₃ dsɨ₃, a₂ꞌnió₃ jniá₂ ꞌniaꞌ₂. Caun₂ bá₄ ꞌei₅ dsɨ₃ chang₂ co₂lë₅ quiangꞌ₅₄ ꞌniaꞌ₂, o₃ dsióg₃ co₂lë₅ ꞌe₂.
4 Caun₂ bá₄ ꞌei₅ dsɨ₃ jɨng₅₄ ꞌniaꞌ₂, ꞌŋio₅ jmo₅ jniá₂ tángꞌ₅ o₄quiánꞌ₂ ꞌniaꞌ₂. Rë₂ꞌŋia₅ a₂liánꞌ₂ dsɨ₃, liaꞌ₂ rë₂tsón₂ a₂ꞌioꞌ₂ jéin₂ jniá₂, jë₄ ca₂le₃jë́₃ o₂i₁ dsɨ₅ a₂chong₂ jniaꞌ₅₄.
5 Ia₁ liaꞌ₂ conꞌ₂ jme₁o₃náu₅ jniaꞌ₅₄ ꞌuë₃ Macedonia la₂, tsá₃ ma₂ca₂rë₃jag₅₄ ꞌi₁ca₂juɨg₄, ia₁ o₂meꞌ₅₄ dsɨ₅ bá₄ ma₂ca₂rë₃chá₃ le₂con₂ të₂le₃ la₂: mɨꞌ₅₄ bá₄ ca₂já₃ le₃lágꞌ₃ ja₁tioꞌ₅₄ jniaꞌ₅₄, ca₂le₃jë́₃ ca₂ꞌí₃ góꞌ₅ dsɨ₅ jniaꞌ₅₄.
6 La₁ Diú₄ i₂jmógꞌ₅ táng₃ dsɨ́₅ dsa₂ i₂ꞌliaꞌ₂ dsɨ́₅, ca₂jmógꞌ₃ bá₄ táng₃ dsɨ₅ jniaꞌ₅₄ jme₁ca₂guan₃ Tito,
7 tonꞌ₂ ꞌéi₂ ꞌŋiog₅ guëꞌ₂ në́₃, ꞌŋio₅ lɨn₃ ꞌei₅ dsɨ́₅ o₄quiánꞌ₂ ꞌniaꞌ₂. ꞌÉi₂ bá₄ dsia₅ në́₃ tság₅ jniaꞌ₅₄, ꞌŋio₅ ꞌɨ́n₅ ꞌauꞌ₂ jagꞌ₅₄ jniá₂. Dsia₂₃ a₂quɨꞌ₂ ꞌauꞌ₂. Dsia₂₃ ján₃ a₂tionꞌ₅₄ ꞌniaꞌ₂ dsen₅₄ ꞌauꞌ₂ o₄quió₃ jniá₂. Jaun₂ bá₄ të₂le₃ lë́₅ guë́₄ ꞌioꞌ₂ jéin₅ jme₁ca₂rë₃guion₅₄.
8 Tsá₃ a₂nag₅₄ ca₂tiónꞌ₂ ꞌniaꞌ₂ co₂ꞌna₂ quɨꞌ₂ ꞌauꞌ₂ quianꞌ₅₄ si₂ carta a₂ca₂tsɨ́ng₂; la₁ tsá₃ dsɨ₂quénꞌ₅ dsɨ₃ rë₂në́₃. Dsónꞌ₂ bá₄ ca₂dsi₃quénꞌ₅ dsɨ₃ co₂ꞌna₂ le₂jŋiá₅ ján₃ jme₁ca₂rë₃guion₅₄ o₄quióꞌ₄ si₂ jaun₂, ca₂tiónꞌ₂ ꞌniaꞌ₂ quɨꞌ₂ ꞌauꞌ₂ co₂ꞌna₂.
9 Jaun₂ në́₃ ꞌioꞌ₂ jéin₅ bá₄ rë₂në́₃, on₃juaꞌ₅₄ ia₁ a₂ca₂tiónꞌ₂ ꞌniaꞌ₂ quɨꞌ₂ ꞌauꞌ₂ jaun₂; a₂jaun₂ bá₄ ia₁ a₂ca₂rë₃tsɨ́n₃ bá₄ ꞌauꞌ₂ ꞌniaꞌ₂ ia₁ a₂ca₂tiónꞌ₂ ꞌniaꞌ₂ quɨꞌ₂ ꞌauꞌ₂. Ca₂quianꞌ₂ ꞌniaꞌ₂ o₂i₁ dsɨ₅ liaꞌ₂ të₅ dsɨ́₅ Diú₄. Jaun₂ tsá₃ le₃juaꞌ₅₄ a₂ca₂jmaꞌ₅₄ jniaꞌ₅₄ dain₅₄ ꞌniaꞌ₂.
10 Ia₁ juɨ₁liaꞌ₂ a₂quɨꞌ₂ dsɨ́₅ dsa₂ ꞌa₂ conꞌ₂ ꞌnio₃ Diú₄, a₂jaun₂ bá₄ jmo₅ a₂rë₂tsɨ́n₃ dsɨ́₅ dsa₂, a₂jiog₅ juɨ₅ a₂lión₂ dsa₂. Jaun₂ tsá₃ cha₂ ꞌe₂ lë₃ juaꞌ₅₄ dsi₁quénꞌ₅ dsɨ́₅ dsa₂. La₁ia₁ juɨ₁liaꞌ₂ a₂quɨꞌ₂ dsɨ́₅ dsa₂ liaꞌ₂ conꞌ₂ lë́₅ a₂quɨꞌ₂ dsɨ́₅ dsa₂ mɨ₂güɨ́g₃ në́₃, a₂jaun₂ bá₄ jiog₅ juɨ₅ ꞌmú₃.
11 Jag₄ ꞌniaꞌ₂ jaun₂, a₂la₂ bá₄ a₂të₁dsɨ₅₄ quiánꞌ₂ ꞌniaꞌ₂, ia₁ ca₂tiónꞌ₂ ꞌniaꞌ₂ quɨꞌ₂ ꞌauꞌ₂ jaun₂ liaꞌ₂ conꞌ₂ ꞌŋio₂ dsɨ́₅ Diú₄: ꞌe₁ bá₄ chi₂quianꞌ₁ ꞌniaꞌ₂ jmɨg₄; ꞌe₁ bá₄ dsan₂ ꞌauꞌ₂ jme₁rëꞌ₂ a₂jaun₂ jë₄ quiánꞌ₂ ꞌniaꞌ₂; ꞌe₁ bá₄ ca₂i₃méꞌ₂ ꞌauꞌ₂ ne₄ dso₄ jaun₂; ꞌe₁ bá₄ ca₂já₃ góꞌ₅ ꞌauꞌ₂ ꞌniaꞌ₂; ꞌe₁ bá₄ ꞌɨ́n₅ ꞌauꞌ₂ ꞌniaꞌ₂ guë́₄ lɨn₃; ꞌe₁ bá₄ dsen₅₄ ꞌauꞌ₂ ꞌniaꞌ₂ a₂jme₁ꞌë́ꞌ₄ ꞌniaꞌ₂ uɨg₅ në́₃. Jë₄ ca₂le₃jë́₃ a₂në₅ ma₂cuëꞌ₅₄ bá₄ ꞌniaꞌ₂ léi₄ a₂tsá₃ dso₄ rɨnꞌ₂ ꞌniaꞌ₂ a₂ca₂lë₃ le₂jaun₂.
12 Liaꞌ₂ conꞌ₂ ca₂tsɨ́ng₂ si₂ carta jaun₂, on₃juaꞌ₅₄ jaun₂ ca₂tsɨ́ng₂ o₄quióꞌ₄ i₂ca₂jmo₃ ꞌlɨgꞌ₅₄, on₃ guëꞌ₂ o₄quióꞌ₄ i₂ca₂i₃ŋɨ́₂ në́₃. A₂jaun₂ bá₄ ca₂tsɨ́ng₂ ia₁jaun₂ le₂lenꞌ₄ ꞌniaꞌ₂ të₂le₃ ne₄ Diú₄ a₂dsan₂ ꞌauꞌ₂ o₄quián₂ jniaꞌ₅₄.
13 ꞌUɨg₅₄ jaun₂, ꞌioꞌ₂ jein₂ bá₄ jniaꞌ₅₄ në́₃, cha₂ liánꞌ₂ dsɨ₅.
La₁ ꞌŋio₅ lɨn₃ guë́₄ ꞌioꞌ₂ jmo₂ jniaꞌ₅₄ jme₁guan₃ Tito, ꞌei₅ dse₃ dsɨ́₅ quion₂ jág₁ ia₁ ca₂le₃jɨ́nꞌ₃ bá₄ ꞌniaꞌ₂ ca₂jme₁ꞌoinꞌ₁, ca₂jmogꞌ₅₄ dsɨ́₅ të₁liaꞌ₂ ca₂i₁ꞌi₅ quianꞌ₅₄ ꞌniaꞌ₂.
14 Jaun₂ tsá₃ juaꞌ₅₄ a₂lë₁ca₂juɨ́g₂ jág₁ táꞌ₅ jme₁ca₂juɨ́g₂ ꞌioꞌ₂ jéin₅ o₄quiánꞌ₂ ꞌniaꞌ₂. Tsá₃ o₂guíꞌ₃ chénꞌ₅ jniá₂. Ia₁ le₂në₅ bá₄ juɨ₁liaꞌ₂ dsau₅ ca₂le₃jë́₃ jág₁ a₂ma₂ca₂chéi₂ jniaꞌ₅₄ ꞌniaꞌ₂, ján₃ bá₄ le₂jaun₂ ca₂le₃jë́₃ jág₁ a₂ca₂chei₅₄ jniaꞌ₅₄ Tito ꞌa₂ liaꞌ₂ lë́₅ tionꞌ₅₄ ꞌniaꞌ₂, ca₂rë₃ti₃ bá₄ liaꞌ₂ lë́₅ jaun₂.
15 Jaun₂ në́₃, të₂le₃ ꞌŋio₅ lɨn₃ guë́₄ ꞌnioi₃ ꞌniaꞌ₂ ia₁ juáꞌ₂ ca₂jmoꞌ₅₄ bá₄ ꞌniaꞌ₂ ca₂le₃jë́₃ ꞌe₂ ca₂mɨ₃, ca₂jmoꞌ₅₄ bá₄ ꞌniaꞌ₂ ꞌua₁ ꞌauꞌ₂ ca₂gueinꞌ₅₄ bá₄ ꞌniaꞌ₂ caun₂ dse₃ a₂gainꞌ₃.
16 Jaun₂ të₅ bá₄ dsɨ₃; caun₂ bá₄ ꞌei₅ dsɨ₃ quianꞌ₅₄ ꞌniaꞌ₂.