6
Jaun₂ le₂në₅, jniaꞌ₅₄ dsa₂ i₂jmo₂ ta₁ co₂lë₅ quianꞌ₅₄ Te₁guiꞌ₅₄, chi₂lenꞌ₄ jniaꞌ₅₄ ꞌniaꞌ₂ a₂tsá₃ i₂jmo₂ ꞌniaꞌ₂ juaꞌ₅₄ a₂tsá₃ ta₁ jmo₃ jág₁ a₂ꞌua₁ dsɨ́₅ Diú₄ a₂ma₂gueꞌ₅₄ ꞌniaꞌ₂.
2 Ia₁ le₂la₂ juáꞌ₂ Diú₄ ne₄ Si₂:
Ca₂rë₃chá₃ bá₄ jmɨg₄ a₂ca₂jmo₃ ꞌua₁ dsɨ₃,
ca₂nag₃ jág₁ quiánꞌ₂ ꞌniaꞌ₂;
jmɨg₄ a₂jme₁cuɨn₅ jmɨg₄ liónꞌ₂ ꞌniaꞌ₂
jme₁ca₂jme₁ꞌo₁ jniá₂.a
Jaun₂ rë₂në́₃ bá₄ ꞌë₂₃, cuɨn₅ jmɨg₄ a₂jmo₅ Diú₄ ꞌua₁ dsɨ́₅. Rë₂në́₃ bá₄ ján₃ cuɨn₅ jmɨg₄ a₂lión₂ dsa₂.
3 ꞌI₁caun₂ jnág₅ tsá₃ jmo₂ jniaꞌ₅₄ ja₁con₂ dsa₂, ia₁jaun₂ tsá₃ táun₂ dsa₂ ꞌlɨgꞌ₅₄ ta₁b quián₂ jniaꞌ₅₄.
4 Të₂le₃ ꞌniog₂ jniaꞌ₅₄ cuë₅₄ léi₄ jë₄ ca₂le₃jë́₃, a₂lág₅ të₃dsónꞌ₂ dsa₂ i₂jme₂ti₃ ta₁ ne₄ Diú₄: jë₄ a₂jmo₂ jniaꞌ₅₄ tióꞌ₅ dsɨ₅; jë₄ jmɨ₁uɨg₅ a₂ŋag₄ jniaꞌ₅₄ jë₄ jme₁dsɨ₂ŋág₂ jniaꞌ₅₄, a₂tsá₃ a₂ne₄ jniaꞌ₅₄ jmó₁; jë₄ o₂i₁ dsɨ₅;
5 jë₄ qui₂bóg₂ dsa₂; jë₄ qui₂toꞌ₂ dsa₂ néꞌ₃ ꞌmá₃; jë₄ mɨꞌ₅₄; jë₄ ta₁ ꞌuaꞌ₂; jë₄ tsá₃ guag₂ jniaꞌ₅₄; jë₄ jme₁ꞌɨn₂ a₂que₅₄ jniaꞌ₅₄;
6 jë₄ a₂le₁jë́₃ jme₂dsí₂ quián₂ jniaꞌ₅₄ në́₃; jë₄ jme₂juɨ́nꞌ₁ dsɨ₅ ja₁con₂ rɨnꞌ₅₄; jë₄ a₂ꞌua₁ dsɨ₅ jniaꞌ₅₄; jë₄ a₂quiongꞌ₅₄ Jme₂dsí₂ Jŋió₅; jë₄ a₂ꞌnio₃ jniaꞌ₅₄ rɨnꞌ₅₄ të₃dsónꞌ₂;
7 jë₄ quianꞌ₅₄ jág₁ dsau₅ të₃dsónꞌ₂; jë₄ quianꞌ₅₄ juɨ₅bí₂ quióꞌ₅ Diú₄; jë₄ quianꞌ₅₄ juɨ₅ co₂dsau₅ a₂tsá₃ ꞌe₂ rë₂cáuꞌ₄, quianꞌ₅₄ a₂në₅ lion₄ jniaꞌ₅₄ co₂ꞌnióꞌ₄ ŋí₁ a₂chanꞌ₂ jniaꞌ₅₄ quianꞌ₅₄ gu₂ ne₁ quianꞌ₅₄ gu₂jen₅ në́₃;
8 të₂le₃ quianꞌ₅₄ a₂jme₂juagꞌ₂ dsa₂; të₂le₃ quianꞌ₅₄ a₂cheiꞌ₂ dsa₂ ꞌlɨgꞌ₅₄; të₂le₃ quianꞌ₅₄ jág₁ ꞌlɨgꞌ₅₄ a₂qui₂ꞌag₅ dsa₂; të₂le₃ quianꞌ₅₄ jág₁ dse₃ a₂qui₂ꞌag₅ dsa₂ në́₃; a₂lág₅ jniaꞌ₅₄ dsa₂ i₂tí₅ jág₁ quióꞌ₅ juɨ₁ꞌa₂ guë́₃ la₂ quiong₅ dsa₂ jniaꞌ₅₄ i₂të₂jɨ́n₁;
9 në₂jag₄ bá₄ i₂tsá₃ ꞌein₂ cuɨg₅, la₁ chan₂ bá₄ i₂cuɨg₅ rë₂; në₂jag₄ bá₄ a₂ma₂i₁dsióg₃ jniaꞌ₅₄, la₁ ¡jag₄! liaꞌ₂ chong₂ jaun₂ bá₄ jniaꞌ₅₄; qui₂jmógꞌ₂ dsa₂ uɨg₅, la₁ tsá₃ ca₂jme₃dsiog₂₃; co₂ꞌnióꞌ₄ a₂quɨꞌ₂ dsɨ₅,
10 la₁ i₂gúꞌ₃ bá₄ chong₂ jniaꞌ₅₄ o₂ꞌŋió₃ dsɨ₅; co₂ꞌnióꞌ₄ i₂të₂ŋé₂, la₁ jmo₂ jniaꞌ₅₄ a₂le₃chan₂ dse₃ juɨn₅ i₂siánꞌ₂; co₂ꞌnióꞌ₄ a₂tsá₃ ꞌe₂ cha₂ quián₂ jniaꞌ₅₄, la₁ ꞌio₂ bá₄ jniaꞌ₅₄ ca₂le₃jë́₃.
11 ꞌNiaꞌ₂ rɨnꞌ₅₄ jniog₄ i₂chan₂ juɨg₂ Corinto, ma₂në₂juaꞌ₅₄ jniaꞌ₅₄ rë₂jiá₃ jág₁, në₂jag₄ bá₄ a₂ma₂rë₂nia₅₄ jniaꞌ₅₄ të₂dsɨ₅ ja₁conꞌ₂ ꞌniaꞌ₂.
12 ꞌI₁caun₂ tsá₃ ꞌe₂ jnág₅ ma₂jmó₁ jniaꞌ₅₄ ja₁conꞌ₂ ꞌniaꞌ₂; guionꞌ₅₄ bá₄ ꞌniaꞌ₂ jmoꞌ₂ qui₂nióg₅ të₂ꞌauꞌ₂, jagꞌ₅₄ jniaꞌ₅₄.
13 ꞌNiaꞌ₂ në́₃, jeinꞌ₅₄ ꞌauꞌ₂ të₂le₃ ja₁con₂ jniaꞌ₅₄: jaun₂ në́₃ chi₂lenꞌ₄ jniaꞌ₅₄ ꞌniaꞌ₂ në₂jag₄ bá₄ co₂ꞌnióꞌ₄ ŋéiꞌ₅ ꞌniaꞌ₂ a₂naꞌ₅₄ ꞌniaꞌ₂ të₂ꞌauꞌ₂ ja₁con₂ jniaꞌ₅₄.
Lág₅ jniog₄ guáꞌ₅ quián₅ Diú₄ i₂chan₂ të₃dsónꞌ₂
14 Tsá₃ i₁nioꞌ₄ ꞌniaꞌ₂ juaꞌ₅₄ a₂lɨngꞌ₅₄ jág₁ quianꞌ₅₄ dsa₂ i₂tsá₃ ꞌén₂. Ia₁ në₁juaꞌ₂ le₂jaun₂ në́₃, dsi₁nóꞌ₅ ꞌniaꞌ₂ léngꞌ₂ juɨ₁liaꞌ₂ on₃ dsɨ₂ca₁juɨ₅ i₂quiaꞌ₂ ꞌuë₃, i₂tsá₃ co₂rɨn₂.c Ia₁ tsá₃ a₁jaun₂ quɨn₃ dsɨ́₅ dsa₂ i₂quian₅ juɨ₅ dse₃ quianꞌ₅₄ dsa₂ i₂quian₅ juɨ₅ ꞌlɨgꞌ₅₄. Ján₃ guëꞌ₂ le₂jaun₂, o₁lɨ́gꞌ₂ jmɨg₄ tsá₃ lé₂ le₃jenꞌ₂ ja₁tág₅ quianꞌ₅₄ juɨ₁liaꞌ₂ ja₁qui₁néꞌ₃ táng₃.
15 ¿O₃ lɨ́nꞌ₂ ꞌniaꞌ₂, lé₂ le₃ꞌag₃ caun₂ jág₁ Cristo quianꞌ₅₄ i₂së₃dsen₃ táng₃? O₃, ¿ꞌe₂ bá₄ quenꞌ₅₄ juɨ₁liaꞌ₂ jan₂ dsa₂ ꞌén₂ quiainꞌ₅₄ jan₂ i₂tsá₃ ꞌén₂?
16 ¿O₃ bá₄ lé₂ le₃ꞌag₃ caun₂ jág₁ guáꞌ₅ quióꞌ₅ Diú₄ quianꞌ₅₄ diú₄ lag₄? Ia₁ guio₅₄ bá₄ jniog₄ lág₅ guáꞌ₅ quióꞌ₅ Diú₄ jénꞌ₃. Lë́₅ juɨ₁liaꞌ₂ ca₂juáꞌ₂ Diú₄ ꞌŋiog₅:
Gua₅₄ ŋɨ₅₄ quiangꞌ₅₄ dsa₂.
Jniá₂ bá₄ léng₂ Diú₄ quiáin₅.
Dsa₂ ꞌéi₂ guëꞌ₂ léin₂ dsa₂ juɨg₂ quiáng₃.d
17 Jaun₂ lë₃:
Co₂dsia₅ ꞌuɨnꞌ₂ ꞌniaꞌ₂ jë₄ quióꞌ₅ diú₄ lag₄ ꞌéi₂;
conꞌ₂ nau₂ ꞌniaꞌ₂, juáꞌ₂ Te₁guiꞌ₅₄;
Tsá₃ qui₂tíꞌ₅ ꞌniaꞌ₂ gogꞌ₂ a₂tsá₃ le₁jë́₃.
Jaun₂ bá₄ guenꞌ₄ jniá₂ ꞌniaꞌ₂,e
18 jaun₂ jan₂ jniá₂ bá₄ léng₂ ŋéiꞌ₅ ꞌniaꞌ₂,
jaun₂ ꞌniaꞌ₂ guëꞌ₂ léngꞌ₂ chiꞌ₂-guein₂ quiáng₃.
juáꞌ₂ Te₁guiꞌ₅₄ i₂ꞌuanꞌ₂ guë́₄ lɨn₃.f