5
Ia₁ ma₂ne₄ bá₄ jniog₄, jë₁ma₂ca₂dsau₃ ca₂ꞌen₃ nɨ₁ŋɨ₁ jniog₄ la₂, a₂lë́₅ co₂ꞌnióꞌ₄ caun₂ ꞌné₅ quián₂ të₁liaꞌ₂ chong₂ mɨ₂güɨ́g₃ la₂, la₁ Diú₄ në́₃ cuë₃ caun₂ ja₁ꞌio₁ gueiꞌ₅₄ i₂juɨ́g₃ ja₁lë́₄ co₂ꞌnióꞌ₄ caun₂ ꞌné₅ a₂tsá₃ ma₃ton₅ jmɨg₄ dsɨ₃ꞌén₂, on₃juaꞌ₅₄ a₂ca₂jmo₃ dsa₂ mɨ₂güɨ́g₃.
2 Dsónꞌ₂ bá₄ të₁liaꞌ₂ chong₂ jniog₄ juɨ₅ nɨ₁ŋɨ́₅ la₂, ca₂le₃jë́₃ chon₂ jniog₄ dsɨ₅, a₂ꞌɨ́n₅ dsɨ₅ dsɨ₁ꞌio₁ ꞌné₅ quián₂ gueiꞌ₅₄ i₂juɨ́g₃,
3 ia₁jaun₂ jlë́₂ quián₂ në₂jag₄ bá₄ caun₂ ꞌmɨꞌ₂ a₂queiꞌ₂ Te₁guiꞌ₅₄ ia₁jaun₂ tsá₃ dsi₁no₃ rë₂ŋág₅.
4 Të₁liaꞌ₂ chong₂ jniog₄ quianꞌ₅₄ nɨ₁ŋɨ₁ la₂, ca₂le₃jë́₃ chon₂ jniog₂ dsɨ₅ a₂le₁quian₁ o₂i₁ dsɨ₅. On₃juaꞌ₅₄ a₂ꞌniog₂ jniog₄ a₂tsá₃ ꞌe₂ quiꞌ₄ jniog₄; a₂jaun₂ bá₄ ꞌniog₂ jniog₄ a₂lió₃ co₂ŋeiꞌ₅₄ nɨ₁ŋɨ₁ a₂jón₂ la₂, quianꞌ₅₄ nɨ₁ŋɨ₁ ꞌmɨ́₂ a₂le₃chan₂ co₂tan₅₄.
5 Diú₄ bá₄ dsónꞌ₂ i₂ma₂jmo₃ co₂jŋia₅₄ jniog₄ i₂ma₂cuɨn₃ Jme₂dsí₂ quiáin₅, a₂lë́₅ léi₄ a₂jme₃ti₃ jág₁ quióꞌ₅.
6 Le₂në₅ jaun₂ le₁ꞌág₄ bá₄ caun₂ dsɨ₅ jniog₄ co₂tan₅₄, ia₁ ne₄ bá₄ jniog₄ jaun₂, të₁liaꞌ₂ chong₂ juɨ₅ nɨ₁ŋɨ₁ la₂, tsá₃ ꞌio₄ ꞌné₅ ja₁guá₄ Te₁guiꞌ₅₄.
7 La₁ i₂nio₄ jniog₄ ca₂le₃jág₃ a₂jŋiaꞌ₅₄ conꞌ₂ ꞌéin₂ bá₄, on₃juaꞌ₅₄ conꞌ₂ a₂të₅ ne₄ jniog₄.
8 La₁ caun₂ bá₄ le₁ꞌág₄ dsɨ₅, lág₂ jniog₄ ꞌe₂ guë́₄ dse₃ juaꞌ₅₄ në₃ bá₄ ꞌuág₃ dsi₂néi₂ tsɨ₁ꞌné₅ nɨ₁ŋɨ₁ la₂, a₂dsauꞌ₅₄ dsɨ₁ꞌio₁ quianꞌ₅₄ Te₁guiꞌ₅₄.
9 ꞌUɨg₅₄ jaun₂, co₂tan₅₄ quenꞌ₂ jniog₄ bí₂ jmo₂ a₂të₅ dsɨ́₅ Te₁guiꞌ₅₄, të₁liaꞌ₂ chong₂ juɨ₅ nɨ₁ŋɨ₁ la₂, o₃ në₁tsá₃ ma₂chong₂ ꞌe₂.
10 Ia₁ le₃jág₃ bá₄ jniog₄ dsi₁no₃ ne₄ta₁ quióꞌ₅ Cristo, ia₁jaun₂ gue₃ le₂jan₂ le₂jan₂ dsa₂ conꞌ₂ ca₂tɨ́in₂, liaꞌ₂ conꞌ₂ lë́₅ ca₂jmo₃ të₁liaꞌ₂ jme₁chain₂ juɨ₅ nɨ₁ŋɨ₁₂, a₂dse₃, o₃ a₂ꞌlɨgꞌ₅₄ ꞌe₂.
Jág₁ dse₃ quióꞌ₅ Diú₄ a₂ꞌag₃ tei₄ dsɨ́₅ dsa₂
11 ꞌUɨg₅₄ në₅, ia₁ a₂ne₄ jniaꞌ₅₄ a₂ŋɨ́₄ lë₃ gau₂ lé₂ jë₁ma₂tión₂ dsa₂ ne₄ Te₁guiꞌ₅₄, a₂quenꞌ₂ jniaꞌ₅₄ bí₂ chei₂ jniaꞌ₅₄ dsa₂ jág₁ dsau₅ o₁ne₄ tsa₁ jiáꞌ₂ dsɨ́₅, gue₃ jág₁ dse₃. Jaun₂ ma₂ŋi₅ bá₄ Diú₄ ꞌa₂ liaꞌ₂ lë́₅ chong₂ jniaꞌ₅₄; jaun₂ ꞌɨ́n₂ dsɨ₃ jniá₂ a₂ŋiꞌ₅₄ bá₄ ꞌniaꞌ₂ të₂ꞌauꞌ₂ ján₃.
12 Tsá₃ o₁lenꞌ₂ ꞌniaꞌ₂ juaꞌ₅₄ ꞌniog₂ jniaꞌ₅₄ ꞌɨ́n₄ rë₂ guio₅₄. Jŋiaꞌ₅₄ liaꞌ₂ cuë₂ jniaꞌ₅₄ jmɨg₄ a₂dsiáꞌ₂ ꞌniaꞌ₂ jág₁ táꞌ₅ o₄quián₂ jniaꞌ₅₄, tonꞌ₂ ia₁jaun₂ ŋiꞌ₅₄ ꞌniaꞌ₂ ꞌa₂ liaꞌ₂ ŋagꞌ₅₄ ne₄ juɨ₁liaꞌ₂ dsa₂ i₂ꞌnio₃ dsia₃ jág₁ táꞌ₅, i₂jŋiaꞌ₅₄ dse₃ le₁ꞌág₄ o₁ne₁, on₃juaꞌ₅₄ rëꞌ₂ a₂dsɨ₂jóꞌ₃ le₁jë́₃ jme₂dsí₂ quióꞌ₅.
13 Ia₁ chi₂juaꞌ₂ quiong₅ dsa₂ a₂lág₅ jniaꞌ₅₄ dsa₂ ŋá₅, lë₁ o₄quióꞌ₄ Diú₄ bá₄. La₁ chi₂juaꞌ₂ tsá₃ lág₅ jniaꞌ₅₄ dsa₂ ŋá₅ në́₃, a₂dse₃ quiánꞌ₂ ꞌniaꞌ₂ bá₄ jaun₂.
14 Ia₁ a₂ŋɨ́₄ lë₃ ꞌnio₃ Cristo jniaꞌ₅₄, a₂jaun₂ tion₅₄ bá₄ ca₂tág₂ jniaꞌ₅₄ jme₁ꞌnió₄ dsa₂ mɨ₂güɨ́g₃ rɨnꞌ₅₄ juɨ₁liaꞌ₂ ca₂rë₃ꞌnio₃ ꞌéi₂. Ia₁ caun₂ bá₄ ꞌéin₂ jniaꞌ₅₄, jan₂ bá₄ i₂ca₂jon₃ o₄quióꞌ₄ ca₂le₃jɨ́n₃; ꞌuɨg₅₄ jaun₂, në₂jag₄ bá₄ a₂ma₂dsau₃ le₂jág₃.
15 Jan₂ Cristo bá₄ i₂ca₂jon₃ ne₄ o₄quióꞌ₄ ca₂le₃jɨ́n₃, ia₁jaun₂ tsá₃ ma₃ꞌnióꞌ₅ le₃chain₂ jmáꞌ₃ o₄quióꞌ₄ guioin₅₄; juɨ₁le₂chain₂ bá₄ le₃quióꞌ₅ i₂ca₂jon₃ o₄quióꞌ₄, le₃quióꞌ₅ i₂ca₂jenꞌ₅₄ táng₃.
16 Jaun₂ tsá₃ ma₃ꞌein₂ jɨn₄ jniaꞌ₅₄ në₃ të₂le₃ ne₄ juɨ₅ liaꞌ₂ conꞌ₂ lë́₅ jág₂ dsa₂ mɨ₂güɨ́g₃. Juɨ₁ꞌe₂ guë́₃ le₂jŋiá₅ jme₁jɨn₄ jniaꞌ₅₄ Cristo liaꞌ₂ conꞌ₂ lë́₅ jág₂ dsa₂ mɨ₂güɨ́g₃, tsá₃ ma₃le₂jaun₂ jɨn₄ jniaꞌ₅₄ ꞌéi₂.
17 Jaun₂ le₂në₅, juɨ₁liaꞌ₂ dsa₂ i₂ma₂chénꞌ₅ le₃quióꞌ₅ Cristo, jan₂ dsa₂ ꞌmɨ́₂ bá₄ ꞌéi₂. Ca₂le₃jë́₃ ꞌa₂ liaꞌ₂ jme₁lë́₄ le₂jŋiá₅, ca₂ŋɨ́₂ bá₄ jaun₂. ¡Ma₂ca₂rë₃ꞌmagꞌ₄ bá₄ ca₂le₃jë́₃!
18 Ca₂le₃jë́₃ a₂në₅, le₂në₅ ma₂jmo₃ Diú₄ ꞌŋiog₅. Ca₂ꞌág₂ táng₃ caun₂ jág₁ quianꞌ₅₄ jniog₄ të₂le₃ quianꞌ₅₄ Cristo. Jaun₂ ꞌéi₂ në́₃ ma₂cuë₃ ta₁ a₂jme₁tɨn₅ jniaꞌ₅₄ dsa₂ ꞌa₂ liaꞌ₂ ꞌnióꞌ₅ jmo₃ ꞌag₃ caun₂ jág₁ quiainꞌ₅₄ Diú₄.
19 Co₂ꞌnióꞌ₄ le₃juaꞌ₅₄, të₂le₃ quianꞌ₅₄ Cristo bá₄ jme₁ꞌag₅ Diú₄ caun₂ jág₁ quiainꞌ₅₄ dsa₂ mɨ₂güɨ́g₃. Të₂le₃ quianꞌ₅₄ Cristo bá₄, jɨ́n₂ Diú₄ dsa₂ co₂ꞌnióꞌ₄ a₂tsá₃ ma₃ꞌe₂ dso₄ rë₂cánꞌ₄ dsa₂. Jaun₂ të₂le₃ quianꞌ₅₄ Cristo bá₄ ma₂dsia₃ gu₂ jniaꞌ₅₄ në́₃ a₂qui₁ꞌë́₄ jniaꞌ₅₄ dsa₂ jág₁ dse₃ la₂, ia₁jaun₂ le₃ŋi₅ a₂tsá₃ ma₃mɨꞌ₅₄ cha₂ quianꞌ₅₄ Diú₄.
20 Jaun₂ le₂në₅ bá₄ lë́₅ ꞌa₂ liaꞌ₂ të₁i₂nio₄ jniaꞌ₅₄ i₂quian₄ jniaꞌ₅₄ jág₁ o₄quióꞌ₄ Cristo, ia₁ co₂ꞌnióꞌ₄ ꞌŋiog₅ bá₄ Diú₄ chi₂léinꞌ₂ dsa₂ të₂le₃ quianꞌ₅₄ jniaꞌ₅₄. Jaun₂ jniaꞌ₅₄ në́₃, chi₂lenꞌ₄ jniaꞌ₅₄ ꞌniaꞌ₂a quianꞌ₅₄ jág₁ ꞌéiꞌ₃ quióꞌ₅ Cristo: “ꞌÉi₂ ꞌniaꞌ₂ caun₂ jág₁ quianꞌ₅₄ Diú₄.”
21 ꞌI₁caun₂ dso₄ tsá₃ ꞌe₂ ca₂ꞌnáu₂ Cristo; la₁ ꞌuɨg₅₄ dsáu₁ jniog₄ bá₄ në́₃, ca₂ꞌë́ꞌ₃ Diú₄ uɨg₅ ꞌéi₂ në₂jag₄ bá₄ a₂rë₂cáinꞌ₄ dso₄, ia₁jaun₂ jniog₄ në́₃ jë₁ma₂ca₂rë₃quianꞌ₅₄ Cristo, ꞌë́₂ Diú₄ jág₁ a₂tsá₃ ꞌe₂ dso₄ rë₂cáuꞌ₄.