Ca₂cágꞌ₃ cu₄ a₂jme₃ꞌoin₅₄ rɨinꞌ₅₄
16
Në₃ në́₃, të₂le₃ quióꞌ₅ guëꞌ₂ cu₄ a₂cagꞌ₄ ꞌniaꞌ₂ jme₁ꞌongꞌ₁ rɨnꞌ₅₄ i₂ꞌén₂,a le₂jaun₂ bá₄ jmo₄ ꞌniaꞌ₂ ján₃ conꞌ₂ lë́₅ jág₁ ma₂cuë́₃ jniá₂ guáꞌ₅ i₂chan₂ ꞌuë₃ Galacia.
2 Le₂caun₂ do₂mei₅₄,b ca₂tɨ́nꞌ₂ bá₄ ꞌniaꞌ₂ le₂jangꞌ₂ le₂jangꞌ₂ cáuꞌ₁ ca₂la₂ ꞌa₂ conꞌ₂ tí₅ ca₂lɨngꞌ₃. A₂jaun₂ conꞌ₂ quiog₂ ꞌma₄ ꞌniaꞌ₂, ma₂lë́₅ co₂jŋia₅₄ ia₁jaun₂ tsá₃ lë́₅ juaꞌ₅₄ jaun₂ guë́₄ cagꞌ₅₄ ꞌniaꞌ₂ jë₁ma₂dsióg₃ jniá₂.
3 Jaun₂ bá₄, jë₁ma₂të́₂ rë₁dsióg₄ jniá₂, jaun₂ le₃chen₄ dsa₂ rɨnꞌ₅₄ i₂ꞌɨ́nꞌ₄ ꞌniaꞌ₂ guiongꞌ₅₄, dsɨ₃lén₂ ꞌéi₂ juɨg₂ Jerusalén quian₅ caun₂ si₂ a₂lé₂. Jaun₂ ꞌéi₂ bá₄ cán₂ cu₄ quiánꞌ₂ ꞌniaꞌ₂ a₂cagꞌ₅₄ në₅ a₂jme₁ꞌongꞌ₁ rɨnꞌ₅₄ ja₁jaun₂.
4 Në₁juaꞌ₂ dsi₂ten₅₄ guëꞌ₂ nei₅₄ ꞌŋió₃ në́₃, jme₃quiongꞌ₅₄ ꞌéi₂.
Jmo₅ Pa₄ co₂jŋia₅₄ a₂ꞌí₂ juɨ₅
5 Jë₁ma₂të́₂ rë₁nei₅₄ i₁ŋɨg₁₂ le₂tan₅₄ ꞌuë₃ Macedonia, jaun₂ guë́₄ dsióg₄ ja₁conꞌ₂ ꞌniaꞌ₂.
6 Conꞌ₂ tsá₃ ŋó₅ në₁ca₂jan₄ ca₂la₂ uë́₂, o₃ në₁ca₂lë₃ ŋɨg₅ le₂tan₅₄ jein₂ güɨ́g₂ quianꞌ₅₄ ꞌniaꞌ₂, ia₁jaun₂ lé₂ tsagꞌ₅₄ ꞌniaꞌ₂ juɨ₅ chi₂juaꞌ₂ ja₁ca₂tɨ́n₂ jniá₂ nei₅₄.
7 Ia₁ tsá₃ ꞌnio₃ jniá₂ nei₅₄ të₂në₃, juaꞌ₅₄ conꞌ₂ ca₂ŋɨg₅ bá₄ ja₁tionꞌ₅₄ ꞌniaꞌ₂. Jaun₂ ꞌɨ́n₂ bá₄ dsɨ₃ jniá₂ i₁jŋia₁₂ ca₂la₂ uë́₂ quianꞌ₅₄ ꞌniaꞌ₂, në₁juaꞌ₂ ca₂cuë₃ Te₁guiꞌ₅₄ jmɨg₄.
8 La₁ i₁jŋia₁ jniá₂ juɨg₂ Efeso ca₂liaꞌ₂ ca₂të́₂ Jmɨg₄ Të₂láu₃-guiá₂*.
9 Ia₁ ꞌŋio₅ bá₄ cuɨn₅ jmɨg₄ rë₂na₄ juɨ₅ lé₂ le₃i₁jmo₃ ta₁ quióꞌ₅ Te₁guiꞌ₅₄, a₂léi₄ a₂të₃dsɨ₅₄ dsónꞌ₂; tonꞌ₂ le₂jaun₂ bá₄ juɨn₅ dsa₂ i₂náu₃ ꞌioꞌ₅₄ táng₃.
10 Në₁juaꞌ₂ ca₂dsióg₃ Timoteo rɨnꞌ₅₄ jniog₄, jag₄ ꞌniaꞌ₂ jaun₂, jaun₂ tsá₃ lë́₅ juaꞌ₅₄ a₂góꞌ₅ ꞌein₅₄ jë₄ quiánꞌ₂ ꞌniaꞌ₂, ia₁ ma₂já₅ ꞌéi₂ jmo₂₃ ta₁ quióꞌ₅ Te₁guiꞌ₅₄, juɨ₁liaꞌ₂ jniá₂ ján₃.
11 Jaun₂ tsá₃ jmóꞌ₂ ꞌniaꞌ₂ ꞌauꞌ₂ juaꞌ₅₄ tsá₃ ꞌe₂ quein₅. Të₂le₃ chéinꞌ₂ ꞌniaꞌ₂ juɨ₅ a₂ꞌag₃ tei₄ dsɨ́₅, ia₁jaun₂ jiá₃ ja₃jag₅₄ jniá₂. Ia₁ chi₁jain₁₂ jniá₂ quianꞌ₅₄ rɨnꞌ₅₄ jniog₄.
12 Në₃ në́₃, juɨ₁liaꞌ₂ Apolos rɨnꞌ₅₄ jniog₄, jme₁chi₂quiain₅₄ jniá₂ jmɨg₄ a₂dsó₃ quiainꞌ₅₄ rɨnꞌ₅₄ jniog₄ dsi₁jɨin₁₂ ꞌniaꞌ₂. Co₂dsia₅ tsá₃ ca₂lë₃ dsɨ́₅ dsó₃ rë₂në́₃, la₁ në₅ bá₄ dsióg₄ lɨ́gꞌ₂ ca₂cuɨn₃ jmɨg₄ dsó₃.
Jág₁ a₂ꞌágꞌ₃ jág₁ jë₁ca₂tóꞌ₂
13 Jmo₄ ꞌí₁, nau₂ ꞌniaꞌ₂ tiá₂ a₂ꞌénꞌ₂ ꞌniaꞌ₂. Jmo₄ ma₂changꞌ₂ a₂lë́₅ ꞌauꞌ₂ ma₂ca₂cangꞌ₅₄ ma₂ŋiꞌ₅₄, tiónꞌ₁ ꞌniaꞌ₂ a₂ꞌuangꞌ₂.
14 Ca₂le₃jë́₃ ꞌe₂ niog₅ jmoꞌ₂ ꞌniaꞌ₂ ja₁con₂ rɨ́ngꞌ₂, jmo₄ léi₄ a₂ꞌniógꞌ₃ të₃dsónꞌ₂ rɨ́ngꞌ₂.
15 Në₃ në́₃, juɨ₁liaꞌ₂ ma₂ŋiꞌ₅₄ ꞌniaꞌ₂, rɨnꞌ₅₄ jniog₄: Estéfanas, quiainꞌ₅₄ dsa₂ dsi₂néi₂ quióꞌ₅, ca₂lɨin₃ dsa₂ i₂le₂ꞌuɨg₅₄ i₂ca₂rë₃ꞌén₂ jág₁ dse₃ ꞌuë₃ Acaya. Dsa₂ rɨnꞌ₅₄ ꞌéi₂ në́₃ ma₂ja₂léin₂ ca₂ne₅₄ jme₁jme₂ti₃ ja₁con₂ rɨnꞌ₅₄ jniog₄ dsa₂ ꞌén₂ ja₁jaun₂. Chi₂quian₅₄ jniá₂ ꞌniaꞌ₂ jmɨg₄ jaun₂ në́₃,
16 jme₁ganꞌ₃ ꞌniaꞌ₂ juɨ₁liaꞌ₂ dsa₂ le₂ꞌéi₂, quianꞌ₅₄ guë́₄ ca₂le₃jɨ́n₃ rɨnꞌ₅₄ juɨ₁liaꞌ₂ i₂jme₂ꞌo₅₄ quianꞌ₅₄ ta₁ le₂jaun₂.
17 ꞌIoꞌ₂ jmo₅ jniá₂ në́₃, ia₁ ma₂guan₅ Estéfanas, Fortunato, quiainꞌ₅₄ Acaico; ma₂ca₂jme₃ꞌŋiai₂₃ juɨ₁liaꞌ₂ a₂jme₁ꞌnióꞌ₅ ja₁con₂ jniá₂ ꞌuɨg₅₄ ia₁ a₂tsá₃ ꞌniaꞌ₂ chanꞌ₂ ja₁lá₃.
18 ꞌÉi₂ bá₄ ma₂jmo₃ liánꞌ₂ dsɨ₃ të₂le₃ juɨ₅ jme₂dsí₂, le₂jaun₂ bá₄ ma₂qui₂ma₂jmo₃ liánꞌ₂ ꞌauꞌ₂ ꞌniaꞌ₂ ján₃. Jaun₂ ꞌnióꞌ₅ jme₁gan₃ jniog₄ dsa₂ le₂ꞌéi₂.
19 Ca₂le₃jɨ́n₃ guáꞌ₅ ja₁tén₄ le₂tan₅₄ ꞌuë₃ Asia, cuɨin₂₃ Diú₄ ꞌniaꞌ₂. Le₂jaun₂ bá₄ Aquila quianꞌ₅₄ Priscilac në́₃, quianꞌ₅₄ co₂nióꞌ₃ dsa₂ rɨnꞌ₅₄ i₂ŋɨꞌ₂ dsi₂néi₂ quióꞌ₅ në́₃, cuɨin₂₃ Diú₄ ꞌŋio₅ lɨn₃ ꞌniaꞌ₂, le₃quióꞌ₅ Te₁guiꞌ₅₄.
20 Ca₂le₃jɨ́n₃ rɨnꞌ₅₄ jniog₄ i₂tionꞌ₅₄ ja₁lá₃, cuɨin₂₃ Diú₄ ꞌniaꞌ₂. Qui₁cuɨn₅₄ ꞌniaꞌ₂ Diú₄ rɨ́ngꞌ₂ le₂jangꞌ₂ le₂jangꞌ₂ a₂qui₁chénꞌ₁d júꞌ₅ rɨ́ngꞌ₂, a₂lë́₅ léi₄ a₂ma₂ꞌei₅ caun₂ jág₁ a₂le₁jë́₃ ꞌauꞌ₂ quianꞌ₅₄ rɨ́ngꞌ₂.
21 Jniá₂ Pa₄, cuɨ́ng₅ Diú₄ ꞌniaꞌ₂ ne₄ si₂ la₂, quianꞌ₅₄ gu₃ ꞌnió₃.e
22 Chi₂juaꞌ₂ chan₂ jan₂ tsá₃ ꞌnioi₃ Te₁guiꞌ₅₄, co₂dsia₅ bá₄ juɨ₁dsi₂ꞌéin₂. ¡Ŋiáꞌ₅ ꞌne₂, Te₁guiꞌ₅₄!f
23 Juɨ₁jme₂guꞌ₅₄ bá₄ Te₁guiꞌ₅₄ Jesucristo i₂ꞌua₁ dsɨ́₅.
24 Ca₂le₃jɨ́nꞌ₃ bá₄ ꞌniaꞌ₂ ꞌnióg₃, le₃quióꞌ₅ Te₁guiꞌ₅₄ Cristo Jesús. A₂méi₃.g
Co₂në₅.