Juɨ₁liaꞌ₂ a₂ca₂jenꞌ₅₄ Cristo
15
Në₃ në́₃ rɨnꞌ₅₄ jniog₄, jmo₅ jniá₂ a₂dsiogꞌ₂ ꞌauꞌ₂ ꞌniaꞌ₂ ꞌa₂ liaꞌ₂ lë́₅ jág₁ dse₃ a₂ma₂ca₂ꞌë́₃ jniá₂ jɨnꞌ₄ ꞌniaꞌ₂, a₂ma₂ca₂gueꞌ₅₄ ꞌniaꞌ₂, a₂tiónꞌ₂ ꞌniaꞌ₂ tiá₂.
2 Të₂le₃ quianꞌ₅₄ jág₁ dse₃ la₂ bá₄ a₂liónꞌ₂ ꞌniaꞌ₂, chi₂juaꞌ₂ chanꞌ₅₄ ꞌniaꞌ₂ tiá₂ jág₁ a₂ma₂ca₂ꞌë́₃ jniá₂ ꞌniaꞌ₂. Chi₂juaꞌ₂ tsá₃ le₂jaun₂ në́₃, tsá₃ ta₁ tí₄ a₂ma₂ca₂rë₃ꞌénꞌ₂ ꞌniaꞌ₂.
3 Jë₁le₂ꞌuɨg₅₄ juáꞌ₅, ca₂jángꞌ₃ jniá₂ jág₁ a₂ma₂ca₂ŋɨ₂ jniá₂: a₂ca₂jon₃ I₂rë₂ꞌɨ́n₁* quián₅ Diú₄ ꞌuɨg₅₄ dsáu₁ jniog₄, liaꞌ₂ conꞌ₂ lë́₅ juáꞌ₂ ne₄ Si₂;
4 a₂ca₂ꞌó₂ dsa₂, a₂ca₂jeinꞌ₅₄ táng₃ ja₁ŋáuꞌ₄ ꞌnɨ₅ jmɨg₄, liaꞌ₂ conꞌ₂ lë́₅ juáꞌ₂ ne₄ Si₂ bá₄ ján₃;
5 a₂ca₂jme₃jniai₂₃ ne₄ Pe₄;a jaun₂ guë́₄ ca₂jme₃jniai₂₃ ne₄ chiꞌ₂ dsɨ₂guia₃-tɨ́n₂.
6 Cang₂ jaun₂, ca₂jág₂ co₂nio₄ lë́₅ guë́₄ ca₂jau₅₄ mei₅ dsa₂ rɨnꞌ₅₄ jniog₄; meiꞌ₂ tsá₃ ca₂le₃jɨ́n₃ bá₄ dsa₂ i₂ca₂jág₂ ꞌéi₂ chain₂ bá₄ guë́₄ jmɨg₄ në₃, o₁jŋiaꞌ₅₄ la₂ ma₂dsan₃ i₂lɨn₅₄.
7 Cang₂ jaun₂, ca₂jme₃jniai₂₃ ne₄ Jacobo, ŋó₅ jaun₂ ca₂jme₃jniai₂₃ ne₄ ca₂le₃jɨ́n₃ dsa₂ i₂chen₄ quiáin₅.
8 Jë₁ca₂tóꞌ₂ guë́₄ në́₃ ca₂jme₃jniai₂₃ ne₃ jniá₂, o₁jŋiaꞌ₅₄ jme₁lɨ́n₄ jniá₂ në₂jag₄ bá₄ jan₂ i₂tsá₃ dse₃ ca₂rë₃chán₃.
9 Ia₁ lɨ́n₅ jniá₂ i₂ꞌuɨn₃ guë́₄ juɨ₁liaꞌ₂ conꞌ₂ guë́₄ ca₂le₃jɨ́n₃ dsa₂ i₂chen₄ quiáin₅, ca₂liaꞌ₂ jŋiaꞌ₅₄ tsá₃ ca₂tɨ́ng₂ a₂quiong₃ dsa₂ a₂lɨ́ng₅ i₂chen₄ quiáin₅. Ia₁ qui₂ca₂co₃ꞌéng₃ dsa₂ ꞌén₂ le₂jŋiá₅.
10 La₁ ꞌuɨg₅₄ ia₁ a₂ꞌua₁ dsɨ́₅ bá₄ Diú₄, lɨ́n₅ jniá₂ ꞌe₂ lɨ́ng₅; jaun₂ juɨ₁liaꞌ₂ a₂ca₂dsia₃ Diú₄ dse₃ dsɨ́₅ ja₁cong₂, tsá₃ lë́₅ juaꞌ₅₄ a₂tsá₃ ta₁ tí₄. La₁ ꞌŋio₅ lɨn₃ guë́₄ ma₂jmo₃ jniá₂ ta₁ liaꞌ₂ conꞌ₂ guë́₄ ca₂le₃jɨ́n₃ i₂chen₄ quiáin₅; tonꞌ₂ on₃juaꞌ₅₄ ca₂jmo₃ jniá₂ ꞌŋió₃, a₂ma₂ca₂jme₃quiongꞌ₅₄ a₂ꞌua₁ dsɨ́₅ Diú₄ bá₄ ma₂guio₃.
11 La₁ tsá₃ a₂lë́₅ jaun₂ juaꞌ₅₄ jniá₂, o₃ ꞌéi₂ ꞌe₂ ma₂jmo₃, la₁ caun₂ jág₁ la₂ bá₄ ma₂ja₂náu₅ jniaꞌ₅₄ ꞌë́₅. Jág₁ në₅ bá₄ a₂ma₂ca₂neiꞌ₂ ca₂rë₃ꞌénꞌ₂ guëꞌ₂ ꞌniaꞌ₂.
Juɨ₁liaꞌ₂ a₂já₅ caun₂ jmɨg₄ a₂jenꞌ₅₄ ꞌlag₄
12 La₁ chi₂juaꞌ₂ ma₂qui₂rë₂ꞌë́₂ jág₁ a₂ca₂jenꞌ₅₄ bá₄ Cristo a₂jme₁rë₂ꞌlɨin₅₄, ¿ꞌa₂ bá₄ liaꞌ₂ lë́₅ a₂juáꞌ₂ ꞌniaꞌ₂ i₂lɨn₅₄ a₂tsá₃ jenꞌ₅₄ ꞌlag₄?
13 Në₃ në́₃, chi₂juaꞌ₂ tsá₃ jenꞌ₅₄ ꞌlag₄, jaun₂ ca₂liaꞌ₂ jŋiaꞌ₅₄ Cristo tsá₃ rë₂jenꞌ₅₄ chi₂juaꞌ₂ le₂jaun₂;
14 jaun₂ chi₂juaꞌ₂ tsá₃ ca₂jenꞌ₅₄ guëꞌ₂ Cristo, le₃juaꞌ₅₄ tsá₃ ma₃ꞌe₂ ta₁ tí₄ jág₁ a₂ꞌë́₅ jniaꞌ₅₄, jaun₂ tsá₃ ta₁ tí₄ a₂ꞌénꞌ₂ ꞌniaꞌ₂.
15 Chi₂juaꞌ₂ le₂në₅, jniaꞌ₅₄ në́₃ ma₂ja₂náu₅ jagꞌ₅₄ ꞌniaꞌ₂ a₂lág₅ dsa₂ të₂jɨ́n₁, tsá₃ tí₅ jág₁ quián₂ jniaꞌ₅₄ a₂ꞌɨ́n₅ jniaꞌ₅₄ Diú₄. Ia₁ ma₂ja₂náu₅ jniaꞌ₅₄ ꞌɨ́n₅ Diú₄, a₂ca₂jme₃jeinꞌ₅₄ Cristo i₂tsá₃ rë₂jenꞌ₅₄ chi₂juaꞌ₂ tsá₃ dsau₅ jág₁ në́₃ a₂jenꞌ₅₄ ꞌlag₄.
16 Chi₂juaꞌ₂ le₂jaun₂ tsá₃ jenꞌ₅₄ ꞌlag₄, le₂jaun₂ guëꞌ₂ ján₃, on₃ guëꞌ₂ Cristo ꞌŋiog₅ ca₂jeinꞌ₅₄ në́₃;
17 në₁tsá₃ guëꞌ₂ ca₂jenꞌ₅₄ ꞌéi₂, tsá₃ ꞌe₂ ta₁ jmo₃ a₂ꞌénꞌ₂ ꞌniaꞌ₂ le₃quióꞌ₅ në́₃, jaun₂ liaꞌ₂ ma₂le₁cánꞌ₄ jaun₂ bá₄ ꞌniaꞌ₂ dsáuꞌ₂ në́₃.
18 Ján₃ guëꞌ₂ le₂jaun₂, juɨ₁liaꞌ₂ dsa₂ i₂ma₂dsan₃ le₃quióꞌ₅ Cristo, i₂rë₂ꞌén₄ bá₄ ꞌéi₂, chi₂juaꞌ₂ le₂jaun₂.
19 Jaun₂ jniog₄ në́₃, chi₂juaꞌ₂ a₂jŋiaꞌ₅₄ ꞌɨ́n₂ dsɨ₅ jniog₄ le₃quióꞌ₅ Cristo juɨ₁liaꞌ₂ jmɨg₄ të₁liaꞌ₂ chong₂ la₂, ꞌe₂ guë́₄ juɨ́g₂ jniog₄ conꞌ₂ guë́₄ ca₂le₃jɨ́n₃ dsa₂.
20 La₁ a₂të₃dsónꞌ₂ bá₄ dsau₅ a₂ca₂jenꞌ₅₄ Cristo a₂jme₁rë₂ꞌlɨin₅₄; lɨ́in₅ co₂ꞌnióꞌ₄ mɨ́g₂ le₂ꞌuɨg₅₄ a₂ꞌag₅ a₂roꞌ₂ dsa₂, ia₁ lɨ́in₅ i₂le₂ꞌuɨg₅₄ i₂ca₂jenꞌ₅₄ jɨn₄ dsa₂ i₂ma₂dsan₃.
21 Le₂jaun₂ bá₄, juɨ₁liaꞌ₂ ꞌuɨg₅₄ quióꞌ₅ jan₂ dsa₂ ca₂ꞌí₃ ꞌmú₃ mɨ₂güɨ́g₃, ján₃ bá₄ ꞌuɨg₅₄ quióꞌ₅ jan₂ dsa₂ ca₂rë₃lióg₃ a₂jenꞌ₅₄ ꞌlag₄.
22 Ia₁ juɨ₁liaꞌ₂ lë́₅ a₂dsan₂ ca₂le₃jɨ́n₃ ia₁ a₂lɨ́in₅ tsɨ₁jon₂ Adán, ján₃ bá₄ le₂në₅ le₃chan₂ ca₂le₃jɨ́n₃ ia₁ a₂lɨ́in₅ i₂quián₅ Cristo,
23 la₁ia₁ le₂jan₂ le₂jan₂ bá₄ ꞌa₂ liaꞌ₂ lë́₅ niog₅ tɨin₃: Cristo le₂ꞌuɨg₅₄, co₂ꞌnióꞌ₄ jon₂ le₂ne₁ a₂ráu₃; jaun₂ guë́₄ ꞌéi₂, dsa₂ quián₅ Cristo, jë₁ma₂të́₂ rë₁guainꞌ₂, ja₃te₅₄ ꞌéi₂ të₂le₃ ja₁coin₂.
24 Jaun₂ guë́₄ në́₃, jiá₃ jmɨg₄ jë₁dsian₅ ca₂le₃jë́₃, jë₁ma₂të́₂ rë₁jángꞌ₃ ta₁ a₂lɨ́in₅ a₂goin₂, ne₄ Diú₄ Jmei₂, cang₂ jë₁ma₂ca₂ꞌéin₂ ca₂le₃jë́₃ ꞌéiꞌ₃, ca₂le₃jɨ́n₃ dsɨ₂tan₅₄, ca₂le₃jë́₃ juɨ₅bí₂.
25 Ia₁ tion₅₄ bá₄ ca₂tɨ́n₂ ꞌéi₂ goin₂, ca₂liaꞌ₂ ca₂të́₂ jmɨg₄ i₁guianꞌ₃ Diú₄ o₄tag₁₂ ca₂le₃jɨ́n₃ i₂ꞌiog₅₄.
26 Ia₁ i₂jë₁ca₂tóꞌ₂ i₂ꞌiog₅₄ i₂dsɨ₃ꞌén₂, ꞌmú₃ bá₄ jaun₂.
27 Ia₁ Diú₄ bá₄ “ma₂ca₂guiogꞌ₃ o₄tag₄ ꞌéi₂ ca₂le₃jë́₃ juɨ₅bí₂.”b Në₃ në́₃, juɨ₁liaꞌ₂ jme₁juáꞌ₂ Si₂ a₂ca₂guiogꞌ₃ ca₂le₃jë́₃, jaun₂ ŋágꞌ₂ rë₂jiá₃, tsá₃ quenꞌ₅₄ Diú₄ ŋiog₅ jɨn₄ dsa₂ i₂le₁ganꞌ₅₄ o₄tag₄ Cristo, ia₁ ꞌŋiog₅ bá₄ Diú₄ ca₂guiogꞌ₃.
28 Jë₁ma₂ca₂dsióg₃ jmɨg₄ jaun₂ a₂niog₅ ca₂le₃jë́₃ o₄gú₃ Ja₁ŋiꞌ₅₄, jaun₂ guë́₄ në́₃ ꞌŋiog₅ Ja₁ŋiꞌ₅₄ jɨ́inꞌ₂ táng₃ o₄gú₃ i₁ca₂guiogꞌ₃ ꞌéi₂, ia₁jaun₂ lén₂ Diú₄ juɨg₅₄ ca₂le₃jë́₃, ne₄ ca₂le₃jë́₃.
29 Në₃ në́₃, në₁juaꞌ₂ tsá₃ jenꞌ₅₄ ꞌlag₄, ¿ꞌe₂ guëꞌ₂ jmo₃ juɨ₁liaꞌ₂ dsa₂ i₂jŋó₂ jmɨg₂ o₄quióꞌ₄ ꞌéi₂? Chi₂juaꞌ₂ dsónꞌ₂ rëꞌ₂ dsau₅ a₂tsá₃ jenꞌ₅₄ ꞌlag₄, ¿ꞌe₂ guëꞌ₂ lë₃ jŋó₂ dsa₂ jmɨg₂ o₄quióꞌ₄?
30 Juɨ₁liaꞌ₂ jniaꞌ₅₄ në́₃, ¿ꞌe₂ bá₄ ta₁ jmo₃ i₁nio₄ jniaꞌ₅₄ ꞌei₅ gau₂ co₂tan₅₄?
31 Le₂o₃ jmɨg₄ bá₄ gue₅ jniá₂ ꞌmú₃. Dsónꞌ₂ bá₄ jaun₂, rɨnꞌ₅₄ jniog₄, juɨ₁liaꞌ₂ dsónꞌ₂ bá₄ jmo₅ jniá₂ tángꞌ₅ o₄quiánꞌ₂ ꞌniaꞌ₂ i₂ꞌén₂ le₃quióꞌ₅ Cristo Jesús, Te₁guiꞌ₅₄ quián₂ jniog₂.
32 Chi₂juaꞌ₂ ca₂quɨ́nꞌ₂ jniá₂ quianꞌ₅₄ dsa₂ tsau₂ dsɨ́₅ i₂chan₂ juɨg₂ Efeso, conꞌ₂ dsɨ₂jiog₅ dsɨ́₅ dsa₂ mɨ₂güɨ́g₃, ¿ꞌe₂ a₂dsɨ́₂ quió₃? Chi₂juaꞌ₂ dsau₅ jaun₂ a₂tsá₃ jenꞌ₅₄ ꞌlag₄,
juɨ₁que₅₄ juɨ₁ꞌenꞌ₅₄ jniog₄,
ia₁ conꞌ₂ tsá₃ ŋó₅ në₁juaꞌ₂
ca₂dsau₃ bá₄ juɨ₁la₂ ꞌióg₃.c
33 Jaun₂ juɨ́g₂ jniá₂ ꞌniaꞌ₂, tsá₃ lë₁jme₁gan₅ ꞌniaꞌ₂ ꞌauꞌ₂. Tsá₃ i₂jmo₂ ꞌniaꞌ₂ juɨ₁liaꞌ₂ juáꞌ₂ caun₂ jág₁ a₂cha₂: “Juɨ₁liaꞌ₂ dsa₂ i₂jme₂quianꞌ₅₄ dsa₂ i₂conꞌ₂ lë₁lɨ́n₄, dsɨ₃ꞌén₂ tag₄ a₂dse₃ a₂ꞌio₂₃.”
34 Jaun₂ juáꞌ₅ jniá₂, jme₁jnio₂ ꞌniaꞌ₂ neꞌ₅₄, jenꞌ₅₄ táng₃ ꞌniaꞌ₂ juɨ₅ co₂dsau₅, tsá₃ ma₃ꞌnau₂ ꞌniaꞌ₂ dso₄. Ia₁ i₂chan₂ bá₄ i₂lɨn₅₄ ꞌniaꞌ₂ i₂tsá₃ cuɨn₅ Diú₄. Juáꞌ₅ jniá₂ le₂në₅ ia₁jaun₂ cánꞌ₁ ꞌniaꞌ₂ ca₂la₂ o₂guíꞌ₃.
ꞌA₂ liaꞌ₂ lé₂ a₂jenꞌ₅₄ táng₃ ꞌlag₄
35 Chan₂ bá₄ i₂le₃ŋag₃: “¿ꞌA₂ bá₄ liaꞌ₂ lë́₅ jaun₂ a₂jenꞌ₅₄ ꞌlag₄? ¿ꞌA₂ liaꞌ₂ lɨ́in₅, ꞌa₂ liaꞌ₂ lë́₅ nɨ₁ŋɨ₁₂ jë₁ma₂ja₂lein₃?”
36 ¡Caun₂ jág₁ co₄ bá₄ në₅! Ia₁ juɨ₁liaꞌ₂ jme₁jne₅ dsa₂ ꞌe₂ jon₂ jne₂₃, tsá₃ ꞌia₂ juaꞌ₅₄ tsá₃ dsɨ₃ꞌén₂ jon₂ a₂dsɨ₂jnia₄.
37 Ia₁ juɨ₁liaꞌ₂ jme₁janꞌ₂ ꞌe₂ janꞌ₂, on₃juaꞌ₅₄ a₂janꞌ₂ tag₄ a₂lé₂ cang₂. Le₂jaun₂ lë́₅ juɨ₁liaꞌ₂ cuɨg₂,d juɨ₁ꞌe₂ guë́₃ jon₂ siáꞌ₂ ján₃.
38 Le₂jaun₂ bá₄ jmo₅ Diú₄: cuë₂₃ choꞌ₅₄ liaꞌ₂ conꞌ₂ lë́₅ ꞌŋio₂ dsɨ́₅; liaꞌ₂ ca₂ne₅₄ mɨ́g₂ ꞌio₂₃ choꞌ₅₄ conꞌ₂ a₂ca₂tɨ́in₂.
39 Le₂jaun₂ bá₄ lë́₅ quianꞌ₅₄ juɨ₁liaꞌ₂ nɨ₁ŋɨ́₅: tsá₃ le₃jë́₃ lë́₅ co₂rë₂. Jma₃quén₅ bá₄ lë́₅ nɨ₁ŋɨ₁ dsa₂ mɨ₂güɨ́g₃, quianꞌ₅₄ nɨ₁ŋɨ₁ jáꞌ₂ náu₂, juɨ₁liaꞌ₂ quióꞌ₅ i₁tan₅; juɨ₁liaꞌ₂ guëꞌ₂ quióꞌ₅ i₁ju₁ ján₃.
40 Le₂në₅ bá₄ lë́₅ juɨ₁liaꞌ₂ a₂cha₂ gueiꞌ₅₄ mɨ₂güɨ́g₃, quianꞌ₅₄ a₂cha₂ ne₄ guaꞌ₅₄ ꞌuë₃. Tsá₃ co₂rë₂ jláꞌ₁ tág₅ a₂cha₂ gueiꞌ₅₄ quianꞌ₅₄ a₂jláꞌ₁ a₂cha₂ ne₄ guaꞌ₅₄ ꞌuë₃.
41 Le₂në₅ bá₄ siáꞌ₂ tág₅ quióꞌ₅ ꞌiog₂, quianꞌ₅₄ tsɨꞌ₂, quianꞌ₅₄ guëꞌ₂ nei₅ táng₃. Jánꞌ₃ bá₄ siáꞌ₂ tág₅ nei₅ jë₄ rɨnꞌ₅₄.e
42 Le₂në₅ bá₄ guëꞌ₂ niog₅ lé₂ quianꞌ₅₄ dsa₂, jë₁ma₂ca₂jeinꞌ₅₄. Dsɨ₃ꞌo₃ caun₂ nɨ₁ŋɨ́₅ a₂niog₅ siáꞌ₃; jaun₂ jenꞌ₅₄ táng₃ caun₂ a₂tsá₃ ton₅ jmɨg₄ siáꞌ₃.
43 Dsɨ₃ꞌo₃ caun₂ nɨ₁ŋɨ́₅ co₂ꞌnióꞌ₄ a₂lë́₅ o₂guíꞌ₃; jaun₂ náu₃ caun₂ nɨ₁ŋɨ́₅ jláꞌ₁. Dsɨ₃ꞌo₃ caun₂ nɨ₁ŋɨ́₅ ꞌuan₅₄; la₁ jenꞌ₅₄ táng₃ caun₂ a₂bén₂.
44 Dsɨ₃ꞌo₃ caun₂ nɨ₁ŋɨ́₅ a₂lë́₅ a₂ca₂tɨ́n₂ guaꞌ₅₄ ꞌuë₃ la₂; jaun₂ guë́₄ jenꞌ₅₄ táng₃ caun₂ nɨ₁ŋɨ́₅ a₂gu₂dsí₂.
45 Jaun₂ bá₄ lë₃ chi₁ton₅ ne₄ Si₂: “Ca₂lɨn₃ Adán le₂ꞌuɨg₅₄ jan₂ dsa₂ i₂ꞌi₄ jme₂dsí₂.”f La₁ i₂lɨ́n₅ Adán i₂co₂ꞌnióꞌ₄ jë₁ca₂tóꞌ₂ guëꞌ₂ në́₃, ca₂lɨin₃ jan₂ jme₂dsí₂ i₂toꞌ₂ jme₂dsí₂ jniog₄.
46 La₁ on₃juaꞌ₅₄ jme₂dsí₂ ca₂gua₃ deꞌ₂ le₂ꞌuɨg₅₄. A₂ca₂tɨ́n₂ guaꞌ₅₄ ꞌuë₃ bá₄ ca₂lë₃ le₂ꞌuɨg₅₄; cang₂ jaun₂ ca₂gua₃ a₂gu₂dsí₂.
47 Dsa₂ i₂le₂ne₁ ꞌéi₂ jme₁lɨ́n₄ quianꞌ₅₄ ti₁guaꞌ₅₄ quióꞌ₅ ꞌuë₃ la₂; i₂jë₁ca₂të́₂ on₃ dsa₂ në́₃, i₂ca₂já₃ gueiꞌ₅₄ i₂juɨ́g₃ bá₄ ꞌéi₂.
48 Ca₂le₃jɨ́n₃ dsa₂ i₂chan₂ ne₄ guaꞌ₅₄ ꞌuë₃, lɨ́in₅ juɨ₁liaꞌ₂ jme₁lɨ́n₄ dsa₂ i₂ca₂lɨn₃ quianꞌ₅₄ ti₁guaꞌ₅₄ ꞌéi₂; ján₃ bá₄ le₂jaun₂ lɨ́n₅ dsa₂ i₂tɨn₅ gueiꞌ₅₄ i₂juɨ́g₃, juɨ₁liaꞌ₂ lɨ́n₅ i₂ca₂já₃ gueiꞌ₅₄ i₂juɨ́g₃.
49 Juɨ₁liaꞌ₂ quióng₂ jniog₄ quióꞌ₅ dsa₂ i₂ca₂lɨn₃ quianꞌ₅₄ ti₁guaꞌ₅₄ ꞌéi₂, ján₃ bá₄ le₂në₅ quiong₅₄g jniog₄ liaꞌ₂ jniá₂ i₂ca₂sión₃ gueiꞌ₅₄ i₂juɨ́g₃.
50 Juɨ́g₂ jniá₂ ꞌniaꞌ₂, rɨnꞌ₅₄ jniog₄, tsá₃ ca₂tɨ́n₂ dsa₂ i₂quian₅ mu₅-ŋɨ́₅ ja₁gon₂ Diú₄; on₃ guëꞌ₂ ca₂tɨ́n₂ juɨ₁liaꞌ₂ a₂siáꞌ₃, caun₂ ja₁tsá₃ ton₅ jmɨg₄ siáꞌ₃.
51 Nei₂ ꞌniaꞌ₂. La₂ ꞌë́₄ jniá₂ caun₂ jág₁ a₂jme₁rë₂ꞌma₄ le₂jŋiá₅: tsá₃ dsióg₃ ca₂le₃jág₃. La₁ ca₂le₃jág₃ bá₄ jniog₄ le₃tság₃,
52 conꞌ₂ tiá₂, në₂jag₄ bá₄ a₂ꞌméiꞌ₂ dsa₂ co₂ráun₂ jme₁ne₁₂, jë₁ma₂i₁ꞌein₅₄ ŋí₂ trompeta jë₁ca₂tóꞌ₂. Ia₁ dsɨ₃ꞌein₅₄ ŋí₁ trompeta, jaun₂ guë́₄ jenꞌ₅₄ ca₂le₃jɨ́n₃ dsa₂ i₂ma₂dsan₃, jaun₂ guë́₄ o₁lɨ́gꞌ₂ jmɨg₄ tsá₃ ma₃dsiáin₃. Jaun₂ jniog₄ ca₂le₃jág₃ në́₃, qui₂le₃tság₃.
53 Ia₁ ca₂tɨ́n₂ quɨ́ꞌ₃ a₂siáꞌ₃ quianꞌ₅₄ caun₂ a₂tsá₃ siáꞌ₃; a₂quɨ́ꞌ₃ a₂jón₂ quianꞌ₅₄ caun₂ a₂tsá₃ lɨ́gꞌ₂ jmɨg₄ jón₂.
54 Jë₁ma₂quiꞌ₂ nɨ₁ŋɨ́₅ a₂siáꞌ₃ la₂ quianꞌ₅₄ a₂tsá₃ siáꞌ₃, jë₁ma₂quiꞌ₂ nɨ₁ŋɨ́₅ a₂jón₂ la₂ quianꞌ₅₄ a₂tsá₃ lɨ́gꞌ₂ jón₂, jaun₂ guë́₄ le₃ti₃ jág₁ la₂ a₂tioꞌ₅₄ ne₄ Si₂:
Co₂dsia₅ ca₂lɨ́ꞌ₃ co₂ŋeiꞌ₅₄ Te₁guiꞌ₅₄ ne₄ ꞌmú₃.h
55 ¿A₂jáꞌ₄ bá₄ ŋó₅ a₂jme₁lénꞌ₂ ꞌne₂, ꞌmú₃?
¿ꞌE₂ bá₄ ca₂lë₃, ꞌne₂ ꞌmú₃,
quianꞌ₅₄ uɨg₅ a₂jme₁ꞌágꞌ₁ jniaꞌ₅₄?i
56 Në₃ në́₃, juɨ₁liaꞌ₂ uɨg₅ a₂jme₁ꞌágꞌ₁ ꞌmú₃ jniog₄, dsáu₁ bá₄ jniog₄ jaun₂; juɨ₁liaꞌ₂ bí₂ a₂ꞌio₅ dsáu₁ jniog₄, Si₂ ꞌÉiꞌ₃ bá₄ jaun₂.
57 ¡La₁ ti₁ꞌmagꞌ₄ Diú₄ i₂cuë₅ bí₂ a₂lág₂ jniog₄ të₂le₃ quianꞌ₅₄ Te₁guiꞌ₅₄ Jesucristo quián₂ jniog₄!
58 Jaun₂ lë₃, ꞌniaꞌ₂ rɨnꞌ₅₄ jniog₄, i₂ꞌnióg₃ guë́₄ lɨn₃, nau₂ bá₄ ꞌniaꞌ₂ tiá₂, tsá₃ cuɨ́n₅ ꞌniaꞌ₂ jmɨg₄ juaꞌ₅₄ ꞌein₂ guë́₃ jŋiógꞌ₂ ꞌniaꞌ₂ cau₅; juɨ₁dsi₂tsónꞌ₃ bá₄ ꞌniaꞌ₂ quianꞌ₅₄ ta₁ quióꞌ₅ Te₁guiꞌ₅₄. Ia₁ ma₂ŋiꞌ₅₄ bá₄ ꞌniaꞌ₂ tsá₃ lë́₅ juaꞌ₅₄ a₂lë₁jmoꞌ₂ canꞌ₂ ꞌniaꞌ₂ ta₁ le₃quióꞌ₅ Te₁guiꞌ₅₄.