Juɨ₁liaꞌ₂ a₂dsia₅ dsa₂ jág₁ jmei₅ siáꞌ₂
14
Quenꞌ₂ ꞌniaꞌ₂ bí₂ a₂dsan₂ ꞌauꞌ₂ jme₁ꞌnió₄ ꞌniaꞌ₂ rɨ́ngꞌ₂, jaun₂ jmo₄ ꞌniaꞌ₂ a₂ꞌɨ́n₅ ꞌauꞌ₂ cuë₃ Diú₄ juɨ₅bí₂ a₂gu₂dsí₂, la₁ ja₂lɨn₃ guë́₄ dsen₅₄ a₂lé₂ le₃ꞌë́ꞌ₄ ꞌniaꞌ₂ jág₁ a₂jme₂jnia₅ Diú₄.
2 Ia₁ juɨ₁liaꞌ₂ dsa₂ i₂dsia₅ jág₁ jmei₅ siáꞌ₂, tsɨ́ꞌ₅ Diú₄ bá₄, on₃juaꞌ₅₄ dsa₂ mɨ₂güɨ́g₃, ia₁ tsá₃ ŋágꞌ₂. Jág₁ rë₂ꞌma₄ bá₄ dsia₂₃, të₂le₃ quióꞌ₅ Jme₂dsí₂.
3 La₁ juɨ₁liaꞌ₂ dsa₂ i₂ꞌë́₂ jág₁ tsɨ́ꞌ₅ dsa₂ mɨ₂güɨ́g₃, dsia₂₃ jág₁ a₂jme₃ꞌo₅₄ a₂dsɨ₃cón₃ dsa₂ të₂le₃ quióꞌ₅ jme₂dsí₂, cuë́ꞌ₅ bí₂ rɨinꞌ₅₄, cuë₂₃ liánꞌ₂ dsɨ́₅ në́₃.
4 Juɨ₁liaꞌ₂ dsa₂ i₂dsia₅ jág₁ jmei₅ siáꞌ₂ në́₃, jŋiaꞌ₅₄ jme₂ꞌoin₅₄ ꞌŋiog₅ bá₄ a₂dsɨ₃cóin₃, la₁ juɨ₁liaꞌ₂ dsa₂ i₂ꞌë́₂ jág₁ në́₃, jme₂ꞌo₅₄ a₂qui₂dsɨ₃cón₃ guáꞌ₅.
5 ꞌNio₃ jniá₂ juaꞌ₅₄ ta₁jɨnꞌ₂ bá₄ ꞌniaꞌ₂ tɨngꞌ₅₄ a₂lé₂ le₃dsiáꞌ₁ ꞌniaꞌ₂ jág₁ jmei₅ siáꞌ₂. La₁ ja₂lɨn₃ guë́₄ dsen₅₄ juaꞌ₅₄ ꞌë́ꞌ₄ ꞌniaꞌ₂ jág₁ a₂cuë₅ Diú₄. Ia₁ juɨ₁liaꞌ₂ dsa₂ i₂ꞌë́₂ jág₁, dsen₅₄ guë́₄ liaꞌ₂ conꞌ₂ guë́₄ dsa₂ i₂dsia₅ jág₁ jmei₅ siáꞌ₂, në₁juaꞌ₂ tsá₃ juáꞌ₂ ꞌe₂ jein₅ jág₁, ia₁jaun₂ jme₃ꞌo₅₄ a₂dsɨ₃cón₃ guáꞌ₅.
6 Në₃ në́₃, ꞌniaꞌ₂ rɨnꞌ₅₄ jniog₄, juɨ₁la₂ ca₂dsióg₃ jniá₂ ja₁conꞌ₂ ꞌniaꞌ₂, a₂jŋiaꞌ₅₄ conꞌ₂ i₁dsia₃ jniá₂ jág₁ jmei₅ siáꞌ₂, ¿ꞌe₂ bá₄ ta₁ tí₄ jág₁ jaun₂, ja₁conꞌ₂ ꞌniaꞌ₂, në₁juaꞌ₂ tsá₃ i₂quian₅₄ caun₂ jág₁ a₂jme₂jnia₅ Diú₄, o₃ jág₁ a₂guion₅₄ jniá₂, o₃ a₂ꞌë́₄ jniá₂, o₃ a₂jme₂tág₂ ꞌe₂?
7 Juɨ₁liaꞌ₂ nɨ₁ŋí₁ a₂tsá₃ jme₂dsí₂ ꞌi₄, juɨ₁liaꞌ₂ te₁fi₁, o₃ caun₂ tsɨ₁ton₅a ꞌe₂, ¿ꞌa₂ bá₄ liaꞌ₂ lé₂ le₃ŋi₅ dsa₂ chi₂juaꞌ₂ ꞌe₂ son₅₄ jéi₂ dsa₂, o₃ tsá₅ ꞌe₂, chi₂juaꞌ₂ tsá₃ jma₃quén₅ i₂ꞌein₅₄, cuë₅ léi₄ ꞌa₂ liaꞌ₂ dsó₅?
8 Le₂jaun₂ bá₄ ján₃ juɨ₁liaꞌ₂ ne₄ ꞌnei₂. Në₁juaꞌ₂ tsá₃ ca₂néꞌ₂ rë₂ i₂ꞌein₅₄ jéi₂ dsa₂ ŋí₁ trompeta, ¿ꞌein₂ bá₄ jmo₃ co₂jŋia₅₄ quióꞌ₅ a₂quɨ́inꞌ₂ ne₄ ꞌnei₂?
9 Le₂në₅ bá₄ lë́₅ juɨ₁liaꞌ₂ quianꞌ₅₄ ꞌniaꞌ₂ táng₃. Në₁juaꞌ₂ tsá₃ ca₂ŋágꞌ₂ jág₁ a₂ꞌuë₂ mɨ₂ꞌoꞌ₅₄ ꞌniaꞌ₂, ¿ꞌa₂ bá₄ liaꞌ₂ lé₂ le₃ŋi₅ dsa₂ ꞌe₂ juáꞌ₂ ꞌniaꞌ₂? ¡A₂lë₁qui₂dsɨ₃dsí₂ dsɨ₃ꞌén₂ jág₁ jaun₂ quiángꞌ₂!
10 Meiꞌ₂ tsá₃ ꞌlióng₂ bá₄ jág₁ jmei₅ cha₂ mɨ₂güɨ́g₃; la₁ tsá₃ cha₂ caun₂ juaꞌ₅₄ tsá₃ jág₁ jein₅.
11 Ia₁ juaꞌ₅₄ meiꞌ₂ guë́₃ jan₂ dsa₂ tság₃ jniá₂ quianꞌ₅₄ jág₁ jmei₅ quióꞌ₅ a₂tsá₃ ŋɨ́gꞌ₂, co₂ꞌnióꞌ₄ dsɨ₂nau₂ bá₄ ꞌéi₂ le₃ja₁con₂ jniá₂; le₂jaun₂ bá₄ jniá₂ táng₃, lɨ́ng₅ co₂ꞌnióꞌ₄ dsɨ₂nau₂ le₃ja₁con₂ ꞌéi₂.
12 Le₂në₅ bá₄ lë́₅ juɨ₁liaꞌ₂ quianꞌ₅₄ ꞌniaꞌ₂ táng₃. Ia₁ a₂ŋɨ́₄ lë₃ ꞌɨ́n₅ ꞌauꞌ₂ ꞌniaꞌ₂ guéiꞌ₁ a₂tɨngꞌ₅₄ juɨ₅bí₂ a₂gu₂dsí₂, quenꞌ₂ ꞌniaꞌ₂ bí₂ a₂dsɨ₃tsónꞌ₃ ꞌniaꞌ₂ quianꞌ₅₄ juɨ₅bí₂ a₂jme₂ꞌo₅₄ a₂dsɨ₃cón₃ guáꞌ₅.
13 ꞌUɨg₅₄ jaun₂, juɨ₁liaꞌ₂ i₂dsia₅ jág₁ jmei₅ siáꞌ₂, juɨ₁mɨ₁₂ ne₄ Diú₄ a₂lé₂ le₃juáꞌ₂ ꞌe₂ jein₅ jág₁ jaun₂.
14 Juaꞌ₅₄ meiꞌ₂ guë́₃ mɨ₅ jniá₂ ne₄ Diú₄ quianꞌ₅₄ jág₁ jmei₅ siáꞌ₂, jme₂dsí₂ quió₃ bá₄ chi₂lénꞌ₂ Diú₄; la₁ a₂ŋɨ́ꞌ₂ dsi₃, tsá₃ ꞌe₂ ta₁ jmo₅.
15 ¿ꞌA₂ bá₄ liaꞌ₂ jmo₅₄ jniá₂ jaun₂ në́₃? Ca₂tɨ́ng₂ bá₄ chi₁lengꞌ₄ Diú₄ juɨ₅ jme₂dsí₂ quió₃, la₁ ján₃ bá₄ ca₂tɨ́ng₂ chi₁lengꞌ₄ Diú₄ a₂ŋɨ́ꞌ₂ dsɨ₃ në́₃. Le₂në₅ bá₄ ján₃, ca₂tɨ́ng₂ ꞌë₅₄ të₂le₃ juɨ₅ jme₂dsí₂ quió₃, la₁ ján₃ bá₄ ca₂tɨ́ng₂ ꞌë₅₄ a₂ŋɨ́ꞌ₂ dsɨ₃ në́₃.
16 Ia₁ chi₂juaꞌ₂ jme₂juɨ́nꞌ₂ ꞌne₂ Diú₄ jmáꞌ₃ të₂le₃ juɨ₅ jme₂dsí₂ quiángꞌ₂, ¿ꞌa₂ bá₄ liaꞌ₂ lé₂, le₃quióꞌ₅ juɨ₁liaꞌ₂ jan₂ dsa₂ lë₁dsa₂ i₂ꞌen₅₄, i₂tsá₃ ŋɨ́ꞌ₂? ¿ꞌA₂ liaꞌ₂ lé₂ le₃juáꞌ₂ a₂méi₃* jme₁cuëꞌ₂ ꞌne₂ ti₁ꞌmagꞌ₄, chi₂juaꞌ₂ ján₃ guëꞌ₂ tsá₃ ŋi₅ ꞌe₂ juáꞌ₂ ꞌne₂?
17 Dsónꞌ₂ bá₄ jaun₂ jláꞌ₁ a₂cuëꞌ₂ ꞌne₂ ti₁ꞌmagꞌ₄, la₁ia₁ tsá₃ jme₂ꞌo₅₄ a₂jaun₂ a₂dsɨ₃cón₃ i₂siánꞌ₂.
18 Cuë́₅ jniá₂ ti₁ꞌmagꞌ₄ Diú₄ ia₁ a₂quɨꞌ₅₄ jniá₂ jmɨg₄ le₃dsia₅₄ guë́₄ jág₁ jmei₅ siáꞌ₂, liaꞌ₂ conꞌ₂ guë́₄ ca₂le₃jɨ́nꞌ₃ ꞌniaꞌ₂.
19 La₁ juɨ₁liaꞌ₂ jme₁le₁ŋɨꞌ₂ dsa₂, ja₂lɨn₃ guë́₄ ꞌnio₃ juɨg₅₄ dsa₂ ꞌŋiá₂ jon₄ jág₁ a₂ŋɨ́gꞌ₂, ia₁jaun₂ lé₂ jme₁tɨn₅ i₂siánꞌ₂, liaꞌ₂ conꞌ₂ guë́₄ a₂jme₁juɨg₅₄ dsa₂ guia₃ mei₅ jág₁ a₂tsá₃ ꞌein₂ ŋɨ́ꞌ₂.
20 ꞌNiaꞌ₂ rɨnꞌ₅₄ jniog₄, tsá₃ ma₃juɨ₁dsi₂jiog₅ ꞌauꞌ₂ ꞌniaꞌ₂ juɨ₁liaꞌ₂ dsɨ₂jiog₅ dsɨ́₅ i₂bëꞌ₅₄. Jmo₄ bá₄ a₂lɨ́ngꞌ₅ i₂bëꞌ₅₄ të₂le₃ ja₁con₂ a₂ꞌlɨgꞌ₅₄. La₁ juɨ₁qui₂le₂ŋɨ́ꞌ₂ ꞌauꞌ₂ ꞌniaꞌ₂ co₂ꞌnióꞌ₄ dsa₂ canꞌ₅₄.
21 Juáꞌ₂ bá₄ ne₄ Si₂:
Juɨg₅₄ jniá₂ dsa₂ juɨg₂ nación la₂
të₂le₃ quianꞌ₅₄ dsa₂ i₂dsia₅ jág₁ jmei₅ siáꞌ₂,
le₃juɨ₅ mɨ₂ꞌo₄ dsɨ₂nau₂ në́₃;
la₁ on₃ bá₄ guëꞌ₂ le₂jaun₂ juaꞌ₅₄ a₂qui₃tónꞌ₂ dsa₂ juɨ₅ jág₁ quió₃,
juáꞌ₂ Te₁guiꞌ₅₄.b
22 Jaun₂ le₂në₅ bá₄ lë́₅ a₂dsia₅ dsa₂ jág₁ jmei₅ siáꞌ₂. Quianꞌ₅₄ jág₁ jmei₅ jaun₂ jángꞌ₅ caun₂ léi₄ të₂le₃ ja₁con₂ dsa₂ i₂tsá₃ ꞌén₂, on₃juaꞌ₅₄ rëꞌ₂ le₃quióꞌ₅ dsa₂ i₂ꞌén₂. La₁ juɨ₁liaꞌ₂ jme₁ꞌë́₂ dsa₂ jág₁ a₂jme₂jnia₅ Diú₄, jág₁ le₂jaun₂ në́₃ jángꞌ₅ táng₃ caun₂ léi₄ le₃ja₁con₂ dsa₂ ꞌén₂ bá₄, on₃juaꞌ₅₄ le₃ja₁con₂ dsa₂ i₂tsá₃ ꞌén₂.
23 Jaun₂ le₂në₅ bá₄, jme₁le₁ŋɨꞌ₂ guáꞌ₅, juaꞌ₅₄ meiꞌ₂ guë́₃ ca₂le₃jɨ́n₃ dsia₂₃ jág₁ jmei₅ siáꞌ₂, në₁juaꞌ₂ të₃jë₄ jaun₂ ca₂dsi₃lén₂ juɨ₁liaꞌ₂ dsa₂ i₂tsá₃ lɨn₄ ŋi₅, o₃ i₂tsá₃ ꞌén₂ në́₃, ¿tsa₁ lé₂ le₃juáꞌ₂ ꞌéi₂: “Dsa₂ ŋá₅ bá₄ në₅ tionꞌ₅₄”, ꞌɨin₃ ꞌniaꞌ₂?
24 La₁ në₁juaꞌ₂ ca₂dsióg₃ jan₂ dsa₂ i₂tsá₃ ma₂ꞌén₂, o₃ i₂tsá₃ lɨn₄ ŋi₅ ꞌe₂, të₁liaꞌ₂ tionꞌ₅₄ ca₂le₃jɨ́n₃ ꞌë́₂ jág₁ a₂ma₂cuë₃ Diú₄, jaun₂ guë́₄ le₃líꞌ₄ dsɨ́₅ ꞌŋiog₅ ꞌa₂ liaꞌ₂ chain₂ le₃jniá₂ dsáu₁, co₂ꞌnióꞌ₄ a₂con₂ ꞌí₁ jág₁ a₂nag₂₃ a₂ꞌë́₂ dsa₂ tioinꞌ₅₄.
25 Jaun₂ guë́₄ le₃jniá₂ a₂rë₂ꞌma₄ jlë₅ a₂niog₅ dsɨ́₅. Jaun₂ bá₄ chi₃jné₃ jme₃juɨinꞌ₂ Diú₄, tonꞌ₂ juáꞌ₂: “Të₃dsónꞌ₂ bá₄ ꞌen₅₄ Diú₄ jɨnꞌ₄ ꞌniaꞌ₂”.
Jmo₄ bá₄ ꞌniaꞌ₂ ca₂le₃jë́₃ conꞌ₂ dsi₂ten₅₄, dse₃ jniá₂
26 ¿ꞌE₂ bá₄ jaun₂ në́₃, rɨnꞌ₅₄ jniog₄? Jë₁ma₂të́₂ rë₁tónꞌ₄ ꞌniaꞌ₂ longꞌ₂, le₂janꞌ₂ le₂janꞌ₂ ꞌniaꞌ₂ quianꞌ₅₄ caun₂ salmo, o₃ caun₂ jág₁ a₂jme₂tágꞌ₂ ꞌniaꞌ₂, o₃ caun₂ jág₁ a₂jme₂jnia₅ Diú₄, o₃ caun₂ jág₁ a₂juáꞌ₂ quianꞌ₅₄ jág₁ jmei₅ siáꞌ₂, o₃ caun₂ jág₁ dsau₅ juɨ₁liaꞌ₂ ꞌe₂ jein₅ jág₁ jaun₂; la₁ juɨ₁le₅₄ ca₂le₃jë́₃ a₂në₅ o₄quióꞌ₄ a₂dsɨ₃cón₃ dsa₂ të₂le₃ quióꞌ₅ jme₂dsí₂.
27 Jë₁ma₂të́₂ rë₁dsia₃ ꞌein₂ dsia₃ jág₁ jmei₅ siáꞌ₂, juɨ₁dsia₁₂ on₃, chi₂juaꞌ₂ ŋɨ́₄ lë₃ ca₂juë́ꞌ₃, ún₂ jŋiáꞌ₄, të₃ qui₂jáin₃, jaun₂ ꞌnióꞌ₅ le₃chan₂ jan₂ i₂juáꞌ₂ ꞌe₂ jein₅ jág₁ jaun₂.
28 La₁ në₁juaꞌ₂ tsá₃ ꞌein₂ chan₂ i₂lé₂ le₃juáꞌ₂ ꞌe₂ jein₅ jág₁ jaun₂, co₂dsia₅ juɨ₁jmo₁₂ tei₄ dsi₂néi₂ guáꞌ₅, juɨ₁dsia₁₂ të₂dsɨ́₅ ꞌŋiog₅, juɨ₁chi₂léinꞌ₄ Diú₄.
29 Le₂në₅ bá₄ ján₃ juɨ₁liaꞌ₂ i₂ꞌë́₂ jág₁ a₂jme₂jnia₅ Diú₄: juɨ₁juaꞌ₅₄ on₃-ún₂, la₁ ma₂tionꞌ₅₄ i₂siánꞌ₂ i₂con₂ ꞌí₁.
30 La₁ në₁juaꞌ₂ ca₂jme₃jnia₅ Diú₄ caun₂ jág₁ ne₄ jan₂ i₂guá₅ jë₄ le₁ŋɨꞌ₂ dsa₂ jaun₂, juɨ₁jmo₅₄ i₂le₂ꞌuɨg₅₄ ꞌéi₂ tei₄.
31 Ia₁ lé₂ le₃ꞌë́ꞌ₄ ca₂le₃jɨ́nꞌ₃ ꞌniaꞌ₂ jág₁ të₃ qui₂jángꞌ₃, ia₁jaun₂ ca₂le₃jɨ́n₃ qui₃le₃tɨin₂, gue₃ liánꞌ₂ dsɨ́₅ ján₃.
32 Ca₂tɨ́n₂ dsa₂ i₂ꞌë́₂ jág₁ a₂cuë₅ Diú₄ a₂quɨꞌ₅₄ jmɨg₄ jme₃ꞌuáin₂ jme₂dsí₂ quióꞌ₅.
33 Ia₁ jmo₅ Diú₄ a₂ꞌei₅ tei₄, on₃juaꞌ₅₄ rëꞌ₂ a₂gó₂.
Juɨ₁liaꞌ₂ lë́₅ ca₂le₃jë́₃ ja₁ŋɨꞌ₂ dsa₂ rɨnꞌ₅₄ jniog₄,c
34 ca₂tɨ́n₂ bá₄ dsa₂ mɨ́₂ jmo₃ tei₄ dsi₂néi₂ guáꞌ₅. Tsá₃ ꞌi₄ ꞌéiꞌ₃ táun₂ jág₁, të₂le₃ ca₂tɨ́in₂ nag₃ gau₂ bá₄, juɨ₁liaꞌ₂ juáꞌ₂ Si₂ ꞌÉiꞌ₃.
35 Chi₂juaꞌ₂ ꞌe₂ ꞌnio₃ le₃ŋi₅, ca₂tɨ́in₂ ŋɨ́iꞌ₃ dsɨ₂i₂gu₂ guioin₅₄, dsi₂néi₂ quióꞌ₅. Ia₁ caun₂ o₂guíꞌ₃ jaun₂, juaꞌ₅₄ meiꞌ₂ guë́₃ dsa₂ mɨ́₂ táun₂ jág₁ dsi₂néi₂ guáꞌ₅.
36 ¿O₃ bá₄ ca₂rë₃lióg₃ jág₁ quióꞌ₅ Diú₄ ja₁conꞌ₂ ꞌniaꞌ₂? ¿O₃ bá₄ jmáꞌ₃ liaꞌ₂ ja₁conꞌ₂ ꞌniaꞌ₂ ca₂dsióg₃ jág₁ dse₃?
37 Chi₂juaꞌ₂ chan₂ jan₂ i₂lɨ́n₂ lɨ́in₅ jan₂ i₂ꞌë́₂ jág₁ a₂cuë₅ Diú₄, o₃ i₂ꞌio₅ a₂tɨin₂ caun₂ juɨ₅bí₂ a₂gu₂dsí₂, juɨ₁le₂ŋi₅ bá₄ rë₂jiá₃ jág₁ a₂tóꞌ₅ jniá₂ ne₄ si₂ la₂ a₂juɨ́g₂ jniá₂ ꞌniaꞌ₂, co₂në₅ lë́₅ ꞌéiꞌ₃ quióꞌ₅ Te₁guiꞌ₅₄ bá₄.
38 Chi₂juaꞌ₂ chan₂ guëꞌ₂ i₂tsá₃ tónꞌ₂ juɨ₅ jág₁ në₅, tsá₃ tonꞌ₅₄ ꞌniaꞌ₂ juɨ₅ dsa₂ ꞌéi₂.d
39 Le₂në₅ bá₄ jaun₂ ꞌniaꞌ₂ rɨnꞌ₅₄ jniog₄, quenꞌ₂ ꞌniaꞌ₂ bí₂ a₂lé₂ le₃ꞌë́ꞌ₄ ꞌniaꞌ₂ jág₁ dse₃ a₂já₅ le₃ja₁con₂ Diú₄. Tsá₃ jmo₂ ꞌniaꞌ₂ juaꞌ₅₄ a₂tsá₃ cuë́ꞌ₁ ꞌniaꞌ₂ jmɨg₄ a₂dsia₃ dsa₂ jág₁ jmei₅ siáꞌ₂.
40 La₁ia₁ jmo₄ ꞌniaꞌ₂ ca₂le₃jë́₃ liaꞌ₂ conꞌ₂ dsi₂ten₅₄, liaꞌ₂ conꞌ₂ lë́₅ ca₂tɨ́in₂ jmo₃ le₂jain₂ le₂jain₂.