Juɨ₁liaꞌ₂ a₂jme₂ꞌnio₃ dsa₂ rɨinꞌ₅₄
13
Juɨ₁ꞌa₂ guë́₃ la₂ tɨng₂ dsia₅₄ quianꞌ₅₄ jág₁ jmei₅ quióꞌ₅ dsa₂ mɨ₂güɨ́g₃ rɨ́ngꞌ₃, o₃ jág₁ jmei₅ quióꞌ₅ ángeles në́₃, la₁ në₁juaꞌ₂ tsá₃ jme₂ꞌnióg₄ guëꞌ₂ rɨ́ngꞌ₃ në́₃, tsá₃ ꞌe₂ ta₁ jmo₃ a₂jmo₅ jniá₂ a₂dseng₃. Lɨ́ng₅ në₂jag₄ bá₄ caun₂ ŋí₁ të₂bong₅ a₂lë₁i₂ꞌein₅₄, o₃ co₂ꞌnióꞌ₄ caun₂ nɨ₁ŋí₁ tóꞌ₅ mɨꞌ₅₄ bá₄.
2 Juɨ₁la₂ quɨꞌ₅₄ jniá₂ jmɨg₄ a₂ꞌë́₄ jág₁ a₂jme₂jnia₅ Diú₄, juɨ₁la₂ guion₄ jniá₂ jág₁ caꞌ₅₄ a₂jme₁rë₂ꞌma₄ le₂jŋiá₅, ján₃ bá₄ juɨ₁la₂ ŋɨ́ꞌ₂ dsɨ₃ jniá₂ ca₂le₃jë́₃, juɨ₁la₂ ꞌéng₂ ꞌŋio₅ lɨn₃, ca₂liaꞌ₂ quɨꞌ₅₄ jniá₂ jmɨg₄ le₃jŋiogꞌ₅₄ nɨ₁máꞌ₂ në́₃, la₁ në₁juaꞌ₂ tsá₃ jme₂ꞌnióg₄ guëꞌ₂ dsa₂ mɨ₂güɨ́g₃ rɨ́ngꞌ₃ në́₃, tsá₃ ꞌe₂ ta₁ jmo₃ co₂ŋɨ́₂ quió₃ a₂jmo₂₃ a₂tɨng₂.
3 Juɨ₁la₂ qui₂ca₂dsioꞌ₄ jniá₂ ꞌe₂ a₂cha₂ quió₃, quióꞌ₅ dsa₂ ti₂ŋé₂, o₁jŋiaꞌ₅₄ la₂ ca₂cuɨ́ng₃ nɨ₁ŋɨ₃ ꞌŋió₃ a₂dsɨꞌ₂, tsá₃ ꞌe₂ ta₁ ꞌi₄ co₂ŋɨ́₂ a₂jaun₂, në₁juaꞌ₂ tsá₃ jme₂ꞌnióg₄ guëꞌ₂ dsa₂ mɨ₂güɨ́g₃ rɨ́ngꞌ₃.
4 Juɨ₁liaꞌ₂ dsa₂ i₂të₃dsónꞌ₂ jme₂ꞌnio₃ rɨnꞌ₅₄, juɨnꞌ₂ dsɨ́₅ lɨ́in₅; tonꞌ₂ ꞌua₁ dsɨ́₅ në́₃; tsá₃ uɨg₅ dsɨ́₅ quiainꞌ₅₄ ꞌi₁jan₂, on₃ guëꞌ₂ jmo₂₃ táinꞌ₅ ja₁con₂ rɨinꞌ₅₄; on₃ guëꞌ₂ jmo₂₃ róin₂ në́₃.
5 Tsá₃ jmo₂₃ a₂tsá₃ dsi₂ten₅₄ jmo₃ ja₁con₂ rɨinꞌ₅₄; tsá₃ ꞌnoꞌ₂ jmáꞌ₃ liaꞌ₂ conꞌ₂ a₂dse₃ quióꞌ₅ ꞌŋiog₅; tsá₃ conꞌ₂ lë₁rë₂ꞌnei₂, on₃ guëꞌ₂ jmo₂₃ ꞌi₄ ꞌnei₂ dsɨ́₅ në́₃.
6 Juɨ₁liaꞌ₂ dsa₂ i₂jme₂ꞌnio₃ rɨnꞌ₅₄, tsá₃ jmo₂₃ të₅ dsɨ́₅ ꞌe₂ caun₂ ꞌlɨgꞌ₅₄ ca₂jmo₃ i₂siánꞌ₂, të₂le₃ jmo₂₃ ꞌioꞌ₂ ja₁con₂ jág₁ tí₅.
7 Ca₂le₃jë́₃ bá₄ jlë́₂; ca₂le₃jë́₃ bá₄ a₂ꞌéin₂ ja₁con₂ rɨinꞌ₅₄; ca₂le₃jë́₃ bá₄ ꞌɨ́n₂ dsɨ́₅ a₂dsi₃ŋɨ́₂ rɨinꞌ₅₄ caun₂ dse₃; ca₂le₃jë́₃ bá₄ jmo₂₃ tióꞌ₅ dsɨ́₅, nau₂ tiá₂.
8 Tsá₃ lɨ́gꞌ₂ jmɨg₄ dsian₅ a₂jme₂ꞌnio₃ dsa₂ rɨinꞌ₅₄. Dsónꞌ₂ bá₄ já₅ jmɨg₄ jë₁tsá₃ ma₃ꞌein₂ ꞌë́₂ jág₁ a₂ŋɨi₂ cuë₅ Diú₄, jë₁tsá₃ ma₃dsia₃ dsa₂ jág₁ jmei₅ siáꞌ₂, jë₁dsɨ₃ŋɨ́₂ le₃jë́₃ a₂ŋi₅ dsa₂ niog₅ dsi₅₄.
9 Ia₁ tsá₃ rë₂ꞌŋia₅ a₂ne₄ jniog₄, jaun₂ tsá₃ rë₂ꞌŋia₅ jág₁ a₂jme₂jnia₅ Diú₄ a₂qui₂ꞌë́₅ jniog₄.
10 La₁ jë₁ma₂të́₂ jmɨg₄ a₂le₃ꞌŋia₅ le₃jë́₃, jaun₂ guë́₄ dsɨ₃ꞌén₂ bá₄ juɨ₁liaꞌ₂ a₂tsá₃ rë₂ꞌŋia₅ jaun₂.
11 Liaꞌ₂ conꞌ₂ jme₁lɨ́n₄ jniá₂ jan₂ chiꞌ₂ bëꞌ₅₄, jme₁dsia₅ jniá₂ jág₁ liaꞌ₂ dsia₅ jan₂ chiꞌ₂ bëꞌ₅₄, jme₁dsɨ₂jiog₅ dsɨ₃ jniá₂, liaꞌ₂ dsɨ₂jiog₅ dsɨ́₅ jan₂ chiꞌ₂ bëꞌ₅₄, ján₃ guëꞌ₂ jme₁qui₂ŋɨ́ꞌ₂ dsɨ₃, liaꞌ₂ ŋɨ́ꞌ₂ dsɨ́₅ jan₂ chiꞌ₂ bëꞌ₅₄; la₁ jme₁ca₂lɨn₃ jniá₂ dsa₂ juɨnꞌ₂, ca₂dsia₃ jniá₂ cau₅ jë₂ a₂ca₂tɨ́n₂ quióꞌ₅ chiꞌ₂.
12 Le₂jaun₂ bá₄ lë́₅ juɨ₁liaꞌ₂ jmɨg₄ në₃: ne₂ jniog₄ në₂jag₄ bá₄ caun₂ nɨ₁ꞌɨ₂ a₂jniá₂ lian₂. La₁ já₅ bá₄ jmɨg₄ a₂ne₅₄ jniog₄ dsi₁ne₁ liaꞌ₂ lë́₅. Rë₂në́₃ në́₃, tsá₃ rë₂ꞌŋia₅ a₂cuɨ́g₅ jniá₂; la₁ já₅ bá₄ jmɨg₄ ja₁le₃cuɨ́g₅ liaꞌ₂ rë₂ꞌŋia₅, juɨ₁liaꞌ₂ cuɨg₅ ŋiog₅ Diú₄ jniá₂.
13 Jaun₂ në́₃, ꞌnɨ₅ a₂la₂ lë́₂ a₂jiog₅ guë́₄ uë́₂: a₂ꞌén₂ dsa₂; a₂ꞌɨ́n₂ dsɨ́₅ dsa₂; a₂jme₂ꞌnio₃ dsa₂ rɨinꞌ₅₄. La₁ ꞌŋio₅ lɨn₃ guë́₄ dsen₅₄ a₂jaun₂ a₂jme₂ꞌnio₃ dsa₂ rɨinꞌ₅₄.a