2 Ma₂ŋiꞌ₅₄ bá₄ ꞌniaꞌ₂, rɨnꞌ₅₄ jniog₄, liaꞌ₂ conꞌ₂ tsá₃ dsa₂ ꞌén₂ jme₁ma₂lɨ́nꞌ₅ ꞌniaꞌ₂, jme₁të₁i₂nioꞌ₄ ꞌniaꞌ₂ chi₁coꞌ₅₄ quióꞌ₅ dsa₂ lag₄, on₃ i₂lé₂ le₃juáꞌ₂ jág₁.

3 Jaun₂ në́₃, juɨg₅₄ jniá₂ ꞌniaꞌ₂, ꞌi₁jan₂ dsa₂ i₂dsia₅ jág₁ liaꞌ₂ conꞌ₂ jiog₅ Jme₂dsí₂ quián₅ Diú₄, tsá₃ juáꞌ₂: “¡Juɨ₁dsi₂ꞌén₂ Jesús!.” Ján₃ guëꞌ₂ le₂jaun₂, ꞌi₁jan₂ tsá₃ lé₂ le₃juáꞌ₂: “¡Jesús bá₄ i₂lɨ́n₅ Te₁guiꞌ₅₄!” chi₂juaꞌ₂ tsá₃ Jme₂dsí₂ Jŋió₅ jiog₅ guëꞌ₂.

4 ꞌLióng₂ bá₄ juɨ₅bí₂ cha₂ a₂lé₂ le₃ŋe₂ dsa₂, la₁ia₁ jan₂ bá₄ Jme₂dsí₂ i₂cuë₅.

5 ꞌLióng₂ ne₅₄ bá₄ ta₁ a₂cha₂ a₂lé₂ jme₃ti₃ dsa₂, la₁ia₁ jan₂ tan₅₄ bá₄ Te₁guiꞌ₅₄ chan₂.

6 Cha₂ ꞌlióng₂ ne₅₄ bá₄ ta₁ a₂lé₂ le₃jmo₃ dsa₂; jŋiaꞌ₅₄ liaꞌ₂ jan₂ bá₄ Diú₄ i₂jmo₅ ca₂le₃jë́₃ ta₁ jaun₂ ja₁con₂ ca₂le₃jɨ́n₃ dsa₂.

7 Në₃ në́₃, a₂dse₃ quióꞌ₅ ca₂le₃jɨ́n₃ bá₄ a₂jme₂jnia₅ Diú₄ juɨ₅bí₂ quióꞌ₅ Jme₂dsí₂ ja₁con₂ le₂jan₂ le₂jan₂.

8 Të₂le₃ quianꞌ₅₄ Jme₂dsí₂ bá₄ cuë₅ Diú₄ juɨ₅bí₂ cuë́ꞌ₅ juɨ₁liaꞌ₂ jan₂ dsa₂ a₂lé₂ le₃cuë₃ jág₁ a₂ŋɨ́ꞌ₂ dsɨ́₅. I₂siánꞌ₂ guëꞌ₂ në́₃, ŋei₂ bí₂ a₂tɨin₂ ꞌa₂ liaꞌ₂ le₃ŋi₅ caun₂ jág₁, të₂le₃ quianꞌ₅₄ jan₂ Jme₂dsí₂ ꞌéi₂ bá₄.

9 Juɨ₁liaꞌ₂ i₂siánꞌ₂ guëꞌ₂ në́₃, rë₂ꞌéin₂ ꞌŋio₅ lɨn₃, a₂jmo₅ ꞌŋiog₅ Jme₂dsí₂ ꞌéi₂ bá₄ ján₃. I₂siánꞌ₂ guëꞌ₂ quɨꞌ₅₄ jmɨg₄ a₂lé₂ le₃jme₃ꞌlióin₂ juɨ₁liaꞌ₂ dsa₂ dsoꞌ₅₄ në́₃, të₂le₃ quianꞌ₅₄ jan₂ Jme₂dsí₂ ꞌéi₂.

10 I₂lɨn₅₄ guëꞌ₂ tɨn₅ juɨ₅bí₂ a₂jmo₃ léi₄ juëꞌ₂; i₂lɨn₅₄ guëꞌ₂ i₂lé₂ le₃ꞌë́₂ jág₁ a₂jme₂jnia₅ Diú₄ ne₅₄; i₂lɨn₅₄ guëꞌ₂ ŋei₂ bí₂ a₂tɨin₂ con₂ ꞌí₁ a₂rë₂líꞌ₄ dsɨ́₅ jɨn₄ jme₂dsí₂; i₂lɨn₅₄ guëꞌ₂ ŋei₂ bí₂ a₂lé₂ le₃dsia₃ jág₁ jmei₅ siáꞌ₂; i₂lɨn₅₄ guëꞌ₂ i₂quɨꞌ₅₄ jmɨg₄ a₂juáꞌ₂ ꞌe₂ jein₅ jág₁ jmei₅ jaun₂.

11 Ca₂le₃jë́₃ juɨ₅bí₂ në₅, jan₂ Jme₂dsí₂ quián₅ Diú₄ bá₄ cuë₅ a₂tɨn₂ dsa₂ le₂jain₂ le₂jain₂, liaꞌ₂ conꞌ₂ lë́₅ ꞌŋio₂ dsɨ́₅.

12 Ia₁, juɨ₁liaꞌ₂ lë́₅ caun₂ nɨ₁ŋɨ₁ dsa₂, ꞌlióng₂ a₂chei₂ le₂caun₂ le₂caun₂ a₂tén₅ quióꞌ₅, la₁ caun₂ bá₄ nɨ₁ŋɨ₁₂ lë́₅; ján₃ bá₄ le₂jaun₂ lë́₅ le₃quióꞌ₅ Cristo.

13 Ia₁ ca₂le₃jág₃ bá₄ jniog₄, liaꞌ₂ conꞌ₂ jme₁qui₂ca₂jŋó₂^a jmɨg₂, të₂le₃ quianꞌ₅₄ jan₂ Jme₂dsí₂ ꞌéi₂ bá₄ ca₂jŋó₂ jniog₄ jmɨg₂, ca₂lag₃ co₂ꞌnióꞌ₄ caun₂ nɨ₁ŋɨ́₅. Tsá₃ a₂lë́₅ jaun₂ juɨ₁la₂ a₂lág₅ jniog₄ dsa₂ judíos*, o₃ dsa₂ griegos* ꞌe₂; o₃ juɨ₁la₂ lág₅ jniog₄ juɨ₁liaꞌ₂ i₂jme₂ti₃ ta₁ ne₄ juɨg₅₄, o₃ dsa₂ i₂tsá₃ ꞌein₂ ne₄ juaꞌ₅₄ jme₂ti₃; ca₂le₃jág₃ bá₄ jniog₄ qui₂ca₂ŋag₂ jan₂ Jme₂dsí₂ ꞌéi₂ i₂queinꞌ₄ jniog₄, i₂ꞌneꞌ₅₄ në₂jag₄ bá₄ jmɨg₂.

14 Ia₁ tsá₃ lé₂ le₃jmó₁ jniog₄ dsɨ₅, juɨ₁liaꞌ₂ caun₂ nɨ₁ŋɨ₁ dsa₂ mɨ₂güɨ́g₃, juaꞌ₅₄ cha₂ ca₂ne₅₄ a₂tén₅ quióꞌ₅; ia₁ ꞌlióng₂ bá₄ a₂cha₂ chei₂ a₂tén₅ quióꞌ₅.

15 Ia₁ juaꞌ₅₄ meiꞌ₂ guë́₃ mɨ₂tag₄ dsa₂ lé₂ le₃juáꞌ₂: “ꞌUɨg₅₄ ia₁ tsá₃ mɨ₂gu₂ lɨ́ng₅, jaun₂ tsá₃ ca₂tɨ́ng₂ téng₃ nɨ₁ŋɨ́₅”, la₁ on₃juaꞌ₅₄ jaun₂ tsá₃ téin₅ nɨ₁ŋɨ́₅.

16 O₃ juaꞌ₅₄ meiꞌ₂ guë́₃ rë₂gua₄ dsa₂ lé₂ le₃juáꞌ₂: “Ia₁ a₂tsá₃ lɨ́ng₅ mɨ₂ne₄, jaun₂ tsá₃ téng₅ nɨ₁ŋɨ́₅”, la₁ on₃juaꞌ₅₄ jaun₂ tsá₃ téin₅ nɨ₁ŋɨ́₅.

17 Juaꞌ₅₄ meiꞌ₂ guë́₃ ta₁caun₂ nɨ₁ŋɨ₁ dsa₂ ca₂lë₃ jmáꞌ₃ mɨ₂ne₄ dsa₂, ¿ꞌa₂ bá₄ liaꞌ₂ lé₂ jme₁néi₁ jniog₄? O₃ juaꞌ₅₄ meiꞌ₂ guë́₃ ta₁caun₂ nɨ₁ŋɨ₁ dsa₂ ca₂lë₃ jmáꞌ₃ rë₂gua₄ dsa₂, ¿ꞌa₂ bá₄ liaꞌ₂ lé₂ jme₁jénꞌ₂ jniog₄?

18 La₁ ꞌŋiog₅ bá₄ Diú₄ në́₃, liaꞌ₂ conꞌ₂ lë́₅ ꞌŋio₂ dsɨ́₅, jma₃quén₅ qui₂ca₂jmo₃ ca₂tióng₃ liaꞌ₂ ca₂ne₅₄ a₂cha₂ chei₂ quióꞌ₅ dsa₂ conꞌ₂ ja₁ca₂tɨ́n₂ nɨ₁ŋɨ₁ dsa₂.

19 Juaꞌ₅₄ meiꞌ₂ guë́₃ ca₂ne₅₄ lë́₅ quióꞌ₅ dsa₂, ¿ꞌa₂ liaꞌ₂ lé₂ le₃juáꞌ₂ dsa₂ caun₂ nɨ₁ŋɨ₁₂?

20 La₁ lë́₅ në́₃, juɨ₁ꞌa₂ guë́₃ la₂ lë́₂ ꞌlióng₂ jma₃quén₅ a₂chei₂ quióꞌ₅ dsa₂, caun₂ bá₄ nɨ₁ŋɨ₁₂ lë́₅.

21 Tsá₃ lé₂ le₃juáꞌ₂ jme₁ne₁ dsa₂ tsɨ́ꞌ₃ mɨ₂gu₂: “Tsá₃ ꞌne₂ ꞌnióꞌ₅ quió₃.” Ján₃ bá₄ le₂në₅, tsá₃ lé₂ le₃juáꞌ₂ mɨ₂dsi₅₄ tsɨ́ꞌ₃ mɨ₂tag₅₄: “Tsá₃ ꞌniaꞌ₂ ꞌnióꞌ₅ quió₃.”

22 Të₂le₃ ꞌŋio₅ guë́₄ dsen₅₄ juɨ₁liaꞌ₂ ja₁lɨ́n₂ dsa₂ a₂ꞌuan₅₄ quióꞌ₅.

23 Juɨ₁liaꞌ₂ a₂tén₅ quián₂ jniog₄ ja₁tsá₃ lɨn₄ quen₅, lág₂ jniog₄, a₂jaun₂ bá₄ guëꞌ₂ ꞌŋio₅ guë́₄ dse₃ lio₂ jniog₄. Le₂jaun₂ bá₄ ján₃, juɨ₁liaꞌ₂ ja₁tsá₃ lɨn₄ dsi₂ten₅₄ rë₂jniá₂ quián₂ jniog₄, ja₁le₂jaun₂ bá₄ guëꞌ₂ jmo₂ jniog₄ ꞌí₁,

24 la₁ ja₁dsi₂ten₅₄ rë₂jniá₂ guëꞌ₂ në́₃, tsá₃ lɨn₄ ꞌnióꞌ₅ lë́₅ ꞌí₁. Le₂jaun₂ bá₄ ca₂jme₃ꞌŋia₅ Diú₄ nɨ₁ŋɨ́₅, a₂ca₂jme₃dsen₅₄ juɨ₁liaꞌ₂ ja₁tsá₃ lɨn₄ dsen₅₄

25 ia₁jaun₂ tsá₃ lé₂ le₁dsoꞌ₅₄ nɨ₁ŋɨ́₅, të₂le₃ juɨ₁dsian₂ bá₄ dsɨ́₅ o₄quióꞌ₄ rɨinꞌ₅₄ le₂jain₂ le₂jain₂.

26 Chi₂juaꞌ₂ cha₂ ja₁quɨꞌ₂ uɨg₅ quióꞌ₅ dsa₂, ca₂le₃jë́₃ guë́₄ ja₁siáꞌ₂ quióꞌ₅ dsa₂ chain₂ uɨg₅ ján₃; chi₂juaꞌ₂ cha₂ juɨ₁liaꞌ₂ ja₁rë₂dsen₅₄ quióꞌ₅ dsa₂, le₂në₅ bá₄ ján₃ lë́₂ ꞌioꞌ₂ ca₂le₂con₂ quióꞌ₅ dsa₂.

27 Le₂në₅ bá₄ juɨ₁liaꞌ₂ ꞌniaꞌ₂ në́₃: guionꞌ₅₄ bá₄ ꞌniaꞌ₂ caun₂ bá₄ ja₁téngꞌ₄ ŋɨ₄ Cristo; le₂janꞌ₂ le₂janꞌ₂ ꞌniaꞌ₂, lɨ́ngꞌ₅ liaꞌ₂ caun₂ ja₁tén₄ quióꞌ₅.

28 Le₂në₅ bá₄ ján₃, jma₃quén₅ lë́₅ bí₂ ma₂cuë₃ Diú₄ ma₂cuë́ꞌ₃ le₂jan₂ le₂jan₂ dsa₂ i₂tén₅ guáꞌ₅ quiáin₅. Jë₁le₂ꞌuɨg₅₄ ca₂ꞌɨin₃ dsa₂ i₂chen₄ quiáin₅; jë₁ca₂të́₂ tɨn₃, ca₂ꞌɨin₃ dsa₂ i₂ꞌë́₂ jág₁ quiáin₅; jë₁ca₂të́₂ ꞌnagꞌ₂, dsa₂ i₂jme₂tag₅ lɨ́n₅ të₅; ŋó₅ jaun₂, dsa₂ i₂ꞌio₅ bí₂ jmo₃ léi₄ juëꞌ₂; dsa₂ i₂quɨꞌ₅₄ jmɨg₄ jme₃ꞌlióin₂ dsa₂ dsoꞌ₅₄; dsa₂ i₂jme₂ꞌo₅₄ jme₂ꞌoin₅₄ rɨinꞌ₅₄; ŋó₅ jaun₂, juɨ₁liaꞌ₂ dsa₂ i₂cán₂ ne₄ juɨ₅; dsa₂ i₂dsia₅ ꞌlióng₂ ne₅₄ jág₁ jmei₅.

29 Jaun₂ në́₃, ¿O₃ bá₄ ca₂le₃jɨ́n₃ lɨ́n₅ dsa₂ i₂chen₄ quián₅ Te₁guiꞌ₅₄? ¿O₃ bá₄ ca₂le₃jɨ́n₃ ꞌë́₂ jág₁ a₂ŋɨi₂ cuë₅ Diú₄? ¿Lɨ́nꞌ₂ ꞌniaꞌ₂ ca₂le₃jɨ́n₃ lɨ́n₅ të₅ i₂jme₂tag₅? ¿O₃ bá₄ ca₂le₃jɨ́n₃ tɨn₂ jmo₃ léi₄ juëꞌ₂?

30 ¿Lé₂ le₃jme₃ꞌlió₂ ca₂le₃jɨ́n₃ jme₃ꞌlióin₂ dsa₂ dsoꞌ₅₄? ¿O₃ bá₄ quɨꞌ₅₄ jmɨg₄ ca₂le₃jɨ́n₃ dsia₃ jág₁ jmei₅ siáꞌ₂? ¿Ján₃ bá₄ lé₂ le₃juáꞌ₂ ca₂le₃jɨ́n₃ ꞌe₂ jein₅ jág₁ jmei₅ jaun₂? Ma₁ tsá₃ le₂jaun₂.

31 Jmo₄ ꞌniaꞌ₂ ꞌɨ́n₅ ꞌauꞌ₂ juɨ₅bí₂ a₂dsen₅₄ guë́₄.