ꞌEn₅₄ Pablo ꞌuë₃ Malta a₂niog₅ jë₄ jmɨ₁ŋíꞌ₄
28
Jme₁ma₂ca₂ló₂ jniaꞌ₅₄ ca₂le₃jág₃, jaun₂ guë́₄ ca₂rë₃ne₄ jniaꞌ₅₄ a₂chei₂ Malta ꞌuë₃ jaun₂, a₂niog₅ jë₄ jmɨ₁ŋíꞌ₄.
2 Dsa₂ chan₂ ja₁jaun₂ ca₂jmo₃ bá₄ dse₃ dsɨ́₅ ja₁con₂ jniaꞌ₅₄. Ca₂dsia₃ dsa₂ si₂ pa₁ jaun₂ ca₂të₃ jniaꞌ₅₄ a₂jme₁dsionꞌ₂, ia₁ a₂ŋɨ́₄ lë₃ güɨ́g₂, dsó₅ jmɨ́₅ në́₃.
3 Pa₄ guëꞌ₂ në́₃ qui₂ca₂cágꞌ₃ nɨ₁ꞌma₂ quein₂. Liaꞌ₂ conꞌ₂ jme₁ꞌein₅₄ tóꞌ₅ dsi₂si₂, conꞌ₂ tsá₃ jáin₅ ca₂o₃ꞌɨ́n₃ jan₂ dsɨ₂mɨꞌ₂ a₂cuɨng₂₃ jme₁ca₂ꞌë́ꞌ₂ dséi₂ quióꞌ₅, ca₂chi₃dséin₂ mɨ₂gu₂ Pa₄.
4 Jme₁ca₂jág₃ dsa₂ chan₂ ja₁jaun₂ ꞌen₅₄ dsɨ₂mɨꞌ₂ chi₁dsein₅₄ mɨ₂gu₂ ꞌéi₂, qui₂ca₂dsia₃ jág₁ guioin₅₄ qui₂ca₂tsɨ́ꞌ₃ rɨinꞌ₅₄:
―I₂ma₂jŋɨꞌ₃ dsa₂ bá₄ dsa₂ në₅. O₁jŋiaꞌ₅₄ la₂ ca₂lóin₂ ne₄ jmɨ₁ŋíꞌ₄, la₁ tsá₃ ꞌi₄ ꞌéiꞌ₃ a₂le₃chain₂ guë́₄.
5 La₁ qui₂ca₂bí₂ Pa₄ mɨ₂gu₂ jaun₂ në́₃, ca₂tánꞌ₂ dsɨ₂mɨꞌ₂ dsi₂si₂. La₁ tsá₃ ꞌe₂ ca₂jénꞌ₃ Pa₄ ꞌi₁ca₂juɨg₄.
6 Ca₂le₃jɨ́n₃ dsa₂ jme₁le₁jŋia₂₃ guióng₃ dsɨ₂juɨ₅ quióꞌ₅ Pa₄, o₃ jme₁dsɨ₃ꞌɨin₅ ꞌe₂, jóin₂ dsɨ₂juɨ₅. La₁ jme₁co₂lág₂ jaun₂, ia₁ ca₂jág₃ tsá₃ ꞌe₂ i₁jénꞌ₄ guëꞌ₂ Pa₄, jaun₂ ca₂i₃jiog₅ dsɨ́₅ të₂le₃ siáꞌ₂, qui₂ca₂tsɨ́ꞌ₃ rɨinꞌ₅₄ a₂lɨ́n₅ Pa₄ jan₂ diú₄.
7 Cau₅ jaun₂ jme₁ron₅ ꞌuë₃ quióꞌ₅ dsa₂ dsen₅₄ quián₅ dsa₂ chan₂ ja₁jaun₂, dsa₂ i₂chen₂ Publio. Ca₂jmo₃ dse₃ dsɨ́₅ ca₂agꞌ₃ jniaꞌ₅₄, ꞌnɨ₅ jmɨg₄ ca₂tág₃ jniaꞌ₅₄ ja₁quióꞌ₄.
8 Jmei₂ Publio ꞌéi₂ jme₁ron₅ dsoꞌ₅₄ ꞌi₄ dséi₂, a₂tag₂₃ jmɨ₂ në́₃. Pa₄ në́₃ ca₂ŋei₅₄ ca₂i₁jɨin₁₂ dsa₂ dsoꞌ₅₄ ꞌéi₂. Jme₁ma₂në₂chi₃léinꞌ₂ Diú₄, jaun₂ guë́₄ ca₂quiog₂ gu₂ ne₄ quióꞌ₅ dsa₂ dsoꞌ₅₄, ca₂jme₃ꞌlió₂.
9 Jme₁ca₂lë₃ le₂jaun₂, caun₂ ca₂dsi₃lén₂ bá₄ dsa₂ dsoꞌ₅₄ siánꞌ₂ i₂chan₂ ꞌuë₃ jaun₂, caun₂ ca₂jme₃ꞌlió₂ bá₄ guëꞌ₂ Pa₄.
10 ꞌIoꞌ₂ ca₂jmo₃ dsa₂ quianꞌ₅₄ jniaꞌ₅₄. Jaun₂ ca₂cuë₃ dsa₂ ca₂le₃jë́₃ ꞌe₂ ꞌnióꞌ₅ quián₂ jniaꞌ₅₄ jë₁ma₂të́₂ rë₁tióꞌ₄ táng₃ jniaꞌ₅₄ juɨ₅.
Ca₂dsióg₃ Pa₄ jë₄ juɨg₂ Roma
11 Cang₂ jme₁ma₂ca₂ŋɨ́₂ ꞌnɨ₅ tsɨꞌ₂, jaun₂ ca₂tióꞌ₄ táng₃ jniaꞌ₅₄ caun₂ nɨ₁barco a₂jme₁chíꞌ₄ ja₁jaun₂ të₁liaꞌ₂ jein₂ güɨ́g₂. Nɨ₁barco jaun₂ ca₂já₃ juɨg₂ Alejandría. Gueiꞌ₅₄ nɨ₁barco jaun₂ jme₁tióng₂ nióꞌ₅ quióꞌ₅ diú₄ Cástor quianꞌ₅₄ diú₄ Pólux.a
12 Ca₂dsi₃náu₅ jniaꞌ₅₄ ꞌo₄ jmɨ₁ŋíꞌ₄ juɨg₂ chei₂ Siracusa. Ja₁jaun₂ ca₂jŋia₄ jniaꞌ₅₄ ꞌnɨ₅ jmɨg₄.
13 Ca₂ꞌuag₂ jniaꞌ₅₄ ja₁jaun₂, ca₂i₁ŋag₅₄ jniaꞌ₅₄ quián₅ cheiꞌ₅₄ ꞌuë₃ ca₂liaꞌ₂ ca₂dsi₃náu₅ të₂ ja₁chei₂ Regio. Jme₁jnia₃ jaun₂, ca₂ꞌág₂ dsí₂ a₂já₅ të₂le₃ sur. Jë₁ca₂të́₂ tɨn₃ jmɨg₄ guë́₄ ca₂dsi₃náu₅ jniaꞌ₅₄ ca₂të₂ juɨg₂ Puteoli.
14 Ja₁jaun₂ ca₂jenꞌ₂ jniaꞌ₅₄ i₂lɨn₅₄ dsa₂ rɨnꞌ₅₄ i₂ꞌén₂. I₂ꞌéi₂ ca₂të₃ jniaꞌ₅₄ ca₂i₁jŋia₁ jë₄ quióꞌ₅ caun₂ semana. Jaun₂ guë́₄ ca₂i₃náu₅ jniaꞌ₅₄ juɨ₅ Roma.
15 Ca₂le₃jɨ́n₃ dsa₂ rɨnꞌ₅₄ i₂tiánꞌ₅ Roma jme₁ma₂le₁ŋi₅ a₂dsi₁náu₅ jniaꞌ₅₄. Jaun₂ i₁lein₅₄ i₁jŋiog₁₂ le₂ꞌi₄ juɨ₅ ca₂të₂ ja₁chei₂ Foro de Apio quianꞌ₅₄ ja₁të́ꞌ₂ dsa₂ Las Tres Tabernas. Jme₁ca₂jág₃ Pa₄ ca₂jɨ́in₂ dsa₂ ꞌéi₂, jaun₂ ca₂cuë́ꞌ₃ ti₁ꞌmagꞌ₄ Diú₄ ca₂tɨ́in₂ táng₃ bí₂ ca₂lág₃ dsɨ́₅.
16 Jme₁ca₂dsi₃náu₅ jniaꞌ₅₄ Roma, [ja₁jaun₂ guë́₄ ca₂jángꞌ₂ juɨg₅₄ ꞌlióg₂ ca₂jɨ́inꞌ₂ ne₄ juɨg₅₄ ꞌlióg₂ i₂jmo₅ ꞌí₁ ja₁jaun₂ ca₂le₃jɨ́n₃ dsa₂ i₂jŋiai₂₃ i₂niog₅ gu₂. La₁]b Pa₄ në́₃ ca₂cuë₃ juɨg₅₄ ꞌlióg₂ jmɨg₄ a₂guá₃ ꞌéi₂ ja₁siáꞌ₂ conꞌ₂ ꞌŋiog₅ quianꞌ₅₄ jan₂ ꞌlióg₂ i₂jmo₃ ꞌí₁ quióꞌ₅.
Ca₂ꞌë́₂ Pa₄ jág₁ dse₃ juɨg₂ Roma
17 ꞌNɨ₅ jmɨg₄ cang₂ jme₁ca₂dsióg₃ Pa₄ juɨg₂ Roma, ca₂të́ꞌ₃ ca₂le₃jɨ́n₃ dsa₂ dsen₅₄ quián₅ dsa₂ judíos* juɨg₂ jaun₂. Jme₁ma₂le₁ŋɨꞌ₂ dsa₂, jaun₂ ca₂juáꞌ₂ Pa₄:
―Rɨnꞌ₅₄ jniog₄, o₁jŋiaꞌ₅₄ guë́₄ tsá₃ ꞌe₂ ma₂ca₂jmo₃ jniá₂ ja₁con₂ dsa₂ judíos, on₃ guëꞌ₂ juaꞌ₅₄ cha₂ a₂ma₂ca₂jmo₃ quianꞌ₅₄ tag₄ chíꞌ₅ quióꞌ₅ dsa₂ quián₂ jniog₄ ma₂lɨ́gꞌ₂, tion₅₄ bá₄ a₂lë₁ca₂jángꞌ₂ dsa₂ jniá₂ chi₁ꞌŋeg₂₃ o₄gú₃ dsa₂ romanos.
18 Jaun₂ jme₁ca₂ŋag₃ dsa₂, tsá₃ ꞌe₂ dsáu₅ jniá₂ ca₂dsóꞌ₂, juaꞌ₅₄ a₂ꞌi₄ ꞌéiꞌ₃ jóng₂. Jaun₂ jme₁ꞌnio₃ jme₁lió₂.
19 La₁ dsa₂ judíos tsá₃ cán₂ jág₁. Jaun₂ bá₄ lë₃ ca₂mɨ₃ jniá₂ a₂ꞌnio₃ jme₃rë́₃ guiꞌ₅₄ emperador*, on₃juaꞌ₅₄ ia₁ a₂cha₂ dso₄ jme₂cánꞌ₂ jniá₂ dsa₂ go₃.
20 ꞌUɨg₅₄ jaun₂ bá₄ në₂të́₃ jniá₂, ia₁ a₂ꞌnio₃ jɨng₅₄ ꞌniaꞌ₂, a₂ꞌnio₃ dsia₅₄ jág₁ quianꞌ₅₄ ꞌniaꞌ₂. Ia₁ ꞌuɨg₅₄ jág₁ quióꞌ₅ Diú₄ a₂ꞌéin₂ jniog₄ conꞌ₂ dsa₂ lág₅ israelitas*, ꞌuɨg₅₄ a₂ꞌɨ́n₂ dsɨ₅ jniog₄ a₂jme₃ti₃ Diú₄ jág₁ quióꞌ₅ a₂ma₂cuë₃, ꞌuɨg₅₄ jaun₂ bá₄ chi₁ꞌŋeꞌ₅₄ jniá₂ nɨ₁ŋí₁ cadena la₂.
21 Jaun₂ ca₂ŋag₃ dsa₂ ca₂tsɨ́ꞌ₃ Pa₄:
―Tsá₃ ꞌe₂ si₂ ma₂ca₂gúꞌ₃ ne₄ jniaꞌ₅₄, quióꞌ₅ dsa₂ chan₂ Judea, a₂ꞌɨin₂₃ ꞌne₂. On₃ guëꞌ₂ ꞌi₁jan₂ dsa₂ rɨnꞌ₅₄ jniog₄ dsa₂ judíos i₂ja₂lén₂ ja₁jaun₂ juaꞌ₅₄ a₂ma₂juáꞌ₂ ꞌɨin₂₃ ꞌne₂ ꞌlɨgꞌ₅₄.
22 ꞌNiog₂ jniaꞌ₅₄ néi₁ ꞌa₂ guëꞌ₂ liaꞌ₂ lë́₅ jág₁ quiánꞌ₂ ꞌne₂ chi₂juaꞌ₂ ꞌa₂ liaꞌ₂ lɨ́ngꞌ₂. Ia₁ ne₄ bá₄ jniaꞌ₅₄ jág₁, ta₁caun₂ mɨ₂güɨ́g₃ bá₄ dsia₅ dsa₂ tsá₃ të₅ dsɨ́₅ jág₁ ꞌmɨ́₂ në₅ a₂ꞌénꞌ₂ ꞌniaꞌ₂.
23 Jaun₂ në́₃, ca₂jmo₃ dsa₂ jág₁ ca₂tióng₃ caun₂ jmɨg₄. Jmɨg₄ jaun₂ në́₃ ca₂dsi₃lén₂ juɨn₅ dsa₂ ja₁ꞌen₅₄ Pa₄. Jaun₂ ca₂jme₂lióg₃ ca₂ꞌë́ꞌ₃ dsa₂ të₃ o₃ꞌiog₂ jág₁ juɨ₁liaꞌ₂ ja₁gon₂ Diú₄, qui₂ca₂dsia₃ ca₂liaꞌ₂ ca₂jen₃ ꞌiog₂ të₂le₃ ca₂ꞌláu₂. Të₂le₃ quianꞌ₅₄ ꞌÉiꞌ₃ Juáꞌ₅ quióꞌ₅ Moisés, quianꞌ₅₄ ca₂le₃jë́₃ guë́₄ Si₂ quióꞌ₅ dsa₂ i₂jme₁ꞌë́₂ jág₁ quián₅ Diú₄ në́₃, qui₂ca₂cuë́ꞌ₃ dsa₂ jág₁ dsau₅ ia₁jaun₂ le₃ꞌén₂ dsa₂ ꞌéi₂ të₂le₃ quióꞌ₅ Jesús.
24 I₂lɨn₅₄ dsa₂ ca₂gue₃ bá₄ jág₁ a₂ca₂juáꞌ₂ Pa₄ jaun₂, ca₂rë₃ꞌéin₂ bá₄. I₂lɨn₅₄ guëꞌ₂ tsá₃ ca₂rë₃ꞌén₂, tsá₃ ꞌnio₃.
25 Ia₁ tsá₃ caun₂ jág₁ ꞌei₅ quióꞌ₅, i₂lɨn₅₄ ca₂jme₃lióg₃ ca₂ꞌuɨin₂ bá₄ i₃lein₃. Jaun₂ ca₂juáꞌ₂ Pa₄ ca₂tsɨ́ꞌ₃ dsa₂ ꞌéi₂:
―Rë₂ bá₄ juɨ₁liaꞌ₂ ca₂juáꞌ₂ Jme₂dsí₂ Jŋió₅ ca₂tsɨ́ꞌ₃ dsa₂ quián₂ jniog₄ ma₂lɨ́gꞌ₂ të₂le₃ quianꞌ₅₄ Isaías, i₂jme₁ꞌë́₂ jág₁ o₄quióꞌ₄ Diú₄, jme₁ca₂juáꞌ₂:
26 Gua₂ o₂cheiꞌ₅₄ dsa₂ juɨg₂ në₅ le₂la₂:
“Dsónꞌ₂ qui₁nágꞌ₁ bá₄ ꞌniaꞌ₂,
la₁ tsá₃ le₃ŋɨ́ꞌ₂ ꞌniaꞌ₂.
Jagꞌ₅₄ bá₄ ꞌniaꞌ₂,
la₁ tsá₃ le₃lenꞌ₄ ꞌniaꞌ₂.”
27 Ia₁ a₂ma₂ꞌuaꞌ₂ dsɨ́₅ bá₄ dsa₂ la₂,
ja₂lag₃ bá₄ nag₂₃,
në₂jag₄ bá₄ i₂ma₂rë₂jnɨ₅ rë₂gua₄;
ján₃ bá₄ le₂në₅, në₂jag₄ bá₄ a₂tsá₃ jniá₂ mɨ₂ne₅₄,
ia₁jaun₂ tsá₃ jág₃ quianꞌ₅₄ mɨ₂ne₅₄,
on₃ guëꞌ₂ nag₃ quianꞌ₅₄ rë₂gua₅₄,
on₃ guë́₄ le₃ŋɨ́ꞌ₂ dsɨ́₅,
ia₁jaun₂ tsá₃ jéinꞌ₃ dsɨ́₅ ja₁con₂ jniá₂
ia₁jaun₂ jme₁ꞌlioin₁₂ jniá₂.c
28 ꞌDsá₂ ꞌauꞌ₂ ꞌniaꞌ₂ jmo₄ ―ca₂juáꞌ₂ Pa₄―, jág₁ dse₃ la₂ a₂lión₂ dsa₂, a₂jénꞌ₂ Diú₄ le₃ne₄ juɨ₅ quióꞌ₅ dsɨ₂nau₂. ꞌÉi₂ në́₃, tónꞌ₃ bá₄ juɨ₅.
29 Jme₁ca₂lë₃ juáꞌ₂ Pa₄ le₂në₅, ca₂i₃len₃ dsa₂ judíos tsɨin₂₃ ꞌŋio₅ lɨn₃ quiainꞌ₅₄ rɨinꞌ₅₄.d
30 Tɨn₃ ŋi₂ liaꞌ₂ tí₅ ca₂guá₂ Pa₄ ꞌné₅ ja₁quí₅ ꞌliaꞌ₅₄. Ja₁jaun₂ ca₂guein₃ ca₂le₃jɨ́n₃ dsa₂ i₂jme₁dsɨ₂lén₂ dsɨ₂jag₅₄.
31 Jaun₂ ca₂jme₃tɨin₂₃ dsa₂ qui₂ca₂ꞌë́₂ jág₁ ꞌa₂ liaꞌ₂ lë́₅ ja₁gon₂ Diú₄. Ca₂jme₃tɨin₂₃ bá₄ dsa₂ jág₁ quióꞌ₅ Te₁guiꞌ₅₄ Jesucristo. Ja₁jaun₂ ca₂ꞌí₃ tei₄, tsá₃ ꞌein₂ ca₂jné₃ juɨ₅ a₂ꞌë́₂ Pa₄ jág₁ dse₃.
Co₂në₅.