Ca₂dsiánꞌ₂ dsa₂ Pa₄ juɨ₅ Roma
27
Jme₁ca₂jmo₃ dsa₂ jág₁ a₂chei₃ jniaꞌ₅₄ juɨ₅ ꞌuë₃ Italia, jaun₂ Pa₄ quianꞌ₅₄ guë́₄ dsa₂ i₂le₁ꞌŋeꞌ₅₄ rɨinꞌ₅₄ ca₂jángꞌ₂ dsa₂ o₄gú₃ jan₂ juɨg₅₄ ꞌlióg₂ i₂chen₂ Julio, i₂tén₅ të₂le₃ quióꞌ₅ co₂nióꞌ₃ ꞌlióg₂ i₂të́ꞌ₂ dsa₂ quián₅ Augusto.
2 Jaun₂ ca₂tióꞌ₄ jniaꞌ₅₄ caun₂ nɨ₁barco a₂já₃ juɨ₅ ꞌo₄ jmɨ₁ŋíꞌ₄ ja₁chei₂ Adramitio a₂jme₁ma₂chíꞌ₅ dsáuꞌ₃ juɨ₅ ꞌo₄ jmɨ₁ŋíꞌ₄ a₂niog₅ ꞌuë₃ Asia. Jme₁quianꞌ₅₄ jniaꞌ₅₄ Aristarco dsa₂ chan₂ Tesalónica, juɨg₂ tén₅ ꞌuë₃ Macedonia.
3 Jme₁jnia₃ táng₃ jaun₂, ca₂dsi₃náu₅ jniaꞌ₅₄ ꞌo₄ jmɨ₁ŋíꞌ₄ juɨg₂ Sidón. Ja₁jaun₂ ca₂dsia₃ ŋéi₂ dsɨ́₅ Julio ja₁con₂ Pa₄, ca₂cuë₃ bá₄ jmɨg₄ ca₂i₁jɨin₁₂ a₂mei₅₄ quiáin₅, ia₁jaun₂ jme₃ꞌo₅₄ ꞌéi₂ ꞌe₂ a₂ꞌnióꞌ₅ quióꞌ₅.
4 Jme₁ca₂ꞌuag₂ jniaꞌ₅₄ juɨg₂ Sidón, ca₂i₃náu₅ jniaꞌ₅₄ juɨ₅ ja₁jniá₂ Chipre të₂le₃ gu₂ jen₅, ia₁ të₂le₃ siáꞌ₂ bá₄ jme₁ꞌei₅ dsí₂.
5 Jaun₂ ca₂ŋag₅₄ jniaꞌ₅₄ jmɨ₁ŋíꞌ₄ cheiꞌ₅₄ ꞌuë₃ Cilicia quianꞌ₅₄ Panfilia. Jaun₂ dsi₃náu₅ jniaꞌ₅₄ ja₁chei₂ Mira, juɨg₂ tén₅ ꞌuë₃ Licia.
6 Ja₁jaun₂ ca₂dsóꞌ₂ juɨg₅₄ ꞌlióg₂ caun₂ nɨ₁barco já₃ juɨg₂ Alejandría, a₂ma₂ꞌi₄ juɨ₅ dsáuꞌ₅ juɨ₅ Italia. Jaun₂ ca₂jmo₃ ꞌéiꞌ₃ ca₂tióꞌ₄ jniaꞌ₅₄ nɨ₁barco, jaun₂ ca₂i₃náu₅ táng₃.
7 ꞌLióng₂ jmɨg₄ ca₂tióꞌ₄ jniaꞌ₅₄ nɨ₁barco, ia₁ a₂i₃náu₅ të₂ꞌua₁. Jaun₂ të₃ quian₅ ta₁ le₂jaun₂ bá₄ dsi₃náu₅ ja₁chei₂ Gnido. Ia₁ liaꞌ₂ ma₂ꞌei₅ jaun₂ bá₄ dsí₂ le₃siáꞌ₂, jaun₂ ca₂ŋag₅₄ jniaꞌ₅₄ cau₅ ja₁chei₂ Salmón, ca₂i₁jeinꞌ₅₄ le₃ja₁chei₂ Creta, ꞌuë₃ ꞌi₄ jë₄ jmɨ₁ŋíꞌ₄.
8 Jaun₂ të₃ quian₅ ta₁ le₂jaun₂ bá₄ ca₂dsi₃náu₅ jniaꞌ₅₄ ja₁të́ꞌ₂ dsa₂ ꞌO₄ Jmɨ₁ŋíꞌ₄ Dse₃, ja₁ma₂quián₅ juɨg₂ Lasea.
9 ꞌLióng₂ jmɨg₄ ca₂rë₃ꞌag₄ jniaꞌ₅₄. Ma₂të́₂ jein₂ a₂ma₂goꞌ₂ i₃nio₄ dsa₂ juɨ₅ ne₄ jmɨ₁ŋíꞌ₄, ia₁ a₂ma₂ja₂quián₃ jein₂ güɨ́g₂. Jaun₂ lë₃, jme₁ca₂juáꞌ₂ Pa₄ ca₂tsɨ́ꞌ₃ dsa₂:
10 ―ꞌNiaꞌ₂ dsa₂, jág₅ jniá₂ ꞌŋio₅ ma₂goꞌ₂ quián₂ jniog₄ të₂le₃ ja₁dsau₅₄ në₅, ia₁ dsɨ₃ꞌén₂ nɨ₁barco, lio₅₄ në́₃, ca₂të₂ guio₅₄ jniog₄ goꞌ₂ dsióg₃ në₁juaꞌ₂ ꞌe₂ ca₂lë₃.
11 La₁ juɨg₅₄ ꞌlióg₂ në́₃, tsá₃ juɨ₅ ca₂tónꞌ₃ jág₁ jaun₂ quióꞌ₅ Pa₄. Ca₂tónꞌ₃ bá₄ juɨ₅ jág₁ quióꞌ₅ dsa₂ juɨg₅₄ nɨ₁barco quianꞌ₅₄ dsa₂ i₂quian₄ nɨ₁barco në́₃.
12 Ia₁ tsá₃ dse₃ ꞌo₄ jmɨ₁ŋíꞌ₄ jaun₂ juaꞌ₅₄ a₂jŋia₃ dsa₂ jein₂ güɨ́g₂ ja₁jaun₂, jaun₂ meiꞌ₂ tsá₃ ca₂le₃jɨ́n₃ dsa₂ ca₂jmo₃ jág₁ a₂jme₁dsɨ₁náu₄ juɨ₅ ja₁tágꞌ₄ juɨg₂ Fenice, caun₂ ꞌo₄ jmɨ₁ŋíꞌ₄ quióꞌ₅ Creta ja₁jniá₂ të₂le₃ noroeste quianꞌ₅₄ të₂le₃ suroeste, ia₁jaun₂ dsɨ₁jŋia₁ jniaꞌ₅₄ ja₁jaun₂ të₁liaꞌ₂ ŋag₅ jein₂ güɨ́g₂.
Ca₂ꞌág₂ dsí₂ tiá₂ lɨn₃ ne₄ jmɨ₁ŋíꞌ₄
13 Jaun₂ ca₂jme₃lióg₃ ca₂ꞌág₂ dsí₂ ꞌua₁ a₂já₃ të₂le₃ sur. Jaun₂ caun₂ lé₂ dsɨ₃léin₂ bá₄ lɨ́in₂. Jaun₂ ca₂ꞌuɨin₂ jaun₂ në́₃, ca₂i₃léin₂ juɨ₅ ma₂quián₅ cheiꞌ₅₄ ꞌuë₃ Creta.
14 La₁ jme₁co₂lág₂ jaun₂, ca₂já₃ dsí₂ tiá₂ lɨn₃ a₂chei₂ Nordecte ca₂të́₂ nɨ₁barco.
15 Jaun₂ ca₂jiog₃ dsí₂ le₃siáꞌ₂ quióꞌ₅ nɨ₁barco, ia₁ tsá₃ ma₃lé₂ juaꞌ₅₄ dsau₅₄ jniaꞌ₅₄ co₂dsau₅, jaun₂ co₂ŋeiꞌ₅₄ ca₂cuë́₁ jniaꞌ₅₄ jmɨg₄ a₂jiog₃ dsí₂.
16 Jaun₂ ca₂ŋag₅₄ jniaꞌ₅₄ le₃coꞌ₅₄ caun₂ ꞌuë₃ píꞌ₁ ja₁chei₂ Caudaa a₂niog₅ jë₄ jmɨ₁ŋíꞌ₄. Ja₁jaun₂ tsá₃ lɨn₄ ma₃ꞌei₅ dsí₂ tiá₂, jaun₂ të₃ quian₅ ta₁ le₂jaun₂, ja₂lag₃ bá₄ ca₂tián₃ jniaꞌ₅₄ a₂ca₂quiong₅₄ táng₃ tsɨ₁mu₅ a₂jme₁le₁ꞌɨn₁ le₃chi₁coꞌ₅₄.
17 Jme₁ca₂lë₃ ca₂tóꞌ₂ dsa₂ tsɨ₁mu₅ gueiꞌ₅₄ ꞌŋióꞌ₃ nɨ₁barco, jaun₂ qui₂ca₂ꞌnéi₂ dsa₂ dse₃ nɨ₁barco quianꞌ₅₄ tsɨ₁ꞌnei₅₄ ia₁jaun₂ jmo₃ bén₂ guë́₄. Jaun₂ ia₁ jme₁góꞌ₅ dsa₂ a₂ꞌí₂ nɨ₁barco ne₄ ti₁tsag₁ ja₁të́ꞌ₂ dsa₂ Sirte, jaun₂ ca₂sió₂ tsɨ₁ꞌmɨꞌ₂ quióꞌ₅ nɨ₁barco, jaun₂ ca₂cuë₃ jmɨg₄ a₂jiog₃ dsí₂.
18 Jme₁jnia₃ jaun₂, ia₁ tiá₂ bá₄ guë́₄ ꞌei₅ dsí₂, jaun₂ ca₂jme₃lióg₃ qui₂ca₂tóꞌ₂ lio₅₄ ne₄ jmɨ₁ŋíꞌ₄.
19 Jme₁ca₂të́₂ ꞌnɨ₅ jmɨg₄, jaun₂ guio₅₄ jniaꞌ₅₄ quianꞌ₅₄ gu₂ qui₂ca₂tioꞌ₅₄ dsi₂jmɨg₂ le₂jiog₅ a₂jmóꞌ₂ ta₁ nɨ₁barco ꞌŋiog₅.
20 ꞌLióng₂ jmɨg₄ tsá₃ ma₃ca₂jnia₃ ꞌiog₂, on₃ guëꞌ₂ nei₅ në́₃. Tsá₃ ma₃lág₂ jniaꞌ₅₄ juaꞌ₅₄ a₂tágꞌ₄ guë́₄, ia₁ a₂ŋɨ́₄ lë₃ tiá₂ jme₁ꞌei₅ dsí₂.
21 Ia₁ ma₂ne₁ŋó₄ ꞌlióng₂ jmɨg₄ tsá₃ ma₃ꞌein₂ jniaꞌ₅₄ guë́ꞌ₅, jaun₂ ca₂nau₂ Pa₄ jë₄ quióꞌ₅ dsa₂ ꞌéi₂, jaun₂ ca₂juáꞌ₂:
―ꞌNiaꞌ₂ dsa₂, dse₃ juaꞌ₅₄ co₂ŋeiꞌ₅₄ ca₂tionꞌ₂ bá₄ ꞌniaꞌ₂ juɨ₅ jág₁ quió₃ a₂tsá₃ jme₁ꞌuág₃ Creta. Jŋiaꞌ₅₄ ca₂i₃ꞌén₂ bá₄ quián₂, tonꞌ₂ ca₂ŋag₅₄ rëꞌ₂ uɨg₅ në́₃.
22 La₁ në₃ në́₃, quenꞌ₂ ꞌniaꞌ₂ bí₂, ia₁ ꞌi₁janꞌ₂ ꞌniaꞌ₂ tsá₃ ꞌein₂ dsián₃, o₁jŋiaꞌ₅₄ dsɨ₃ꞌén₂ nɨ₁barco.
23 Ia₁ a₂ꞌuë₂ la₂ në₂jme₃jnia₅ jan₂ ángel ne₃, i₂chen₄ quián₅ Diú₄ i₂jme₂tí₁ jniá₂ ne₅₄.
24 Jaun₂ në₂juáꞌ₂ ángel në₂chéi₃ jniá₂: “Tsá₃ lë₁jmo₂ gangꞌ₃ Pa₄, ia₁ tion₅₄ niog₅ bá₄ gogꞌ₅₄ a₂jme₁jniagꞌ₂ ne₄ guiꞌ₅₄ emperador* romano. ꞌUɨg₅₄ quiánꞌ₂ ꞌne₂ bá₄ a₂lión₂ Diú₄ ca₂le₃jɨ́n₃ dsa₂ i₂quiangꞌ₅₄ ꞌŋióꞌ₃ barco, tsá₃ ma₃dsiáin₃.”
25 Jaun₂ lë₃, ꞌniaꞌ₂ rɨnꞌ₅₄ jniog₄, quenꞌ₂ ꞌniaꞌ₂ bí₂, tsá₃ jmo₂ ꞌniaꞌ₂ o₂i₁ dsɨ₅. Ia₁ dsónꞌ₂ bá₄ ꞌén₂ jniá₂ të₂le₃ quióꞌ₅ Diú₄ a₂tion₅₄ jmo₃ conꞌ₂ lë́₅ jág₁ a₂në₂juáꞌ₂ ángel në₂chéi₂ jniá₂.
26 La₁ tion₅₄ niog₅ dsɨ₁tióꞌ₄ bá₄ jniog₄ caun₂ ꞌuë₃ dsi₂jo₂ jmɨ₁ŋíꞌ₄.
27 Caun₂ ꞌuë₂ jme₁ma₂të́₂ tɨn₃ semanas a₂tioꞌ₅₄ jniaꞌ₅₄ juɨ₅, liaꞌ₂ ma₂jiog₅ jaun₂ bá₄ dsí₂ ne₄ Jmɨ₁ŋíꞌ₄ Adria,b jme₁ca₂rë₃líꞌ₄ dsa₂ i₂quian₅ nɨ₁barco conꞌ₂ dsi₃nei₅ jaun₂, a₂ja₂quián₃ dsi₁léin₂ ꞌuë₃.
28 Jaun₂ ca₂can₃ dsa₂ ꞌéiꞌ₃ ꞌa₂ conꞌ₂ jɨꞌ₂ guë́₄ jmɨg₂. Jme₁ca₂jág₃ dsa₂, conꞌ₂ guióg₂-guiá₂-jŋéi₂ (36) metros bá₄ jɨꞌ₂ guë́₄. Ca₂juɨg₄ guë́₄ le₃cau₅ jaun₂ ca₂can₃ táng₃ dsa₂ ꞌéiꞌ₃. Jme₁ca₂jág₃ táng₃, guióg₂-guio₃ (27) metros bá₄ tí₅ guë́₄ jɨꞌ₂.
29 Ia₁ a₂góꞌ₅ dsa₂ jnáꞌ₃ nɨ₁barco conꞌ₂ tiá₂ dsoꞌ₂ nɨ₁cang₁ ꞌlau₂, jaun₂ ca₂sió₂ le₃chi₁coꞌ₅₄ nɨ₁barco quén₂ nɨ₁ŋí₁ ꞌláꞌ₁ guei₂ quianꞌ₅₄ tsɨ₁ꞌnei₅₄ juɨ₅ néꞌ₃ jmɨ₁ŋíꞌ₄. Të₃ tionꞌ₅₄ dsa₂ góꞌ₅ le₂jaun₂, qui₂ca₂chi₃léinꞌ₂ Diú₄ a₂jnia₃.
30 Të₁liaꞌ₂ jaun₂, jme₁ma₂dsɨ₂jiog₅ dsɨ́₅ dsa₂ i₂quian₅ nɨ₁barco a₂jme₁cuɨng₃. Qui₂ca₂sió₂ tsɨ₁mu₅ ne₄ jmɨ₁ŋíꞌ₄, a₂jmo₂₃ juɨ₁liaꞌ₂ a₂tioinꞌ₅₄ tóꞌ₅ nɨ₁ŋí₁ guei₂ të₂le₃ ne₄ nɨ₁barco.
31 La₁ jaun₂ ca₂juáꞌ₂ Pa₄ ca₂tsɨ́ꞌ₃ juɨg₅₄ ꞌlióg₂ quianꞌ₅₄ ca₂le₃jɨ́n₃ guë́₄ ꞌlióg₂ në́₃, ca₂juáꞌ₂:
―Në₁juaꞌ₂ tsá₃ jŋia₅ i₂në₅ ꞌŋióꞌ₃ nɨ₁barco, tsá₃ jaun₂ liónꞌ₂ ꞌniaꞌ₂.
32 Jaun₂ qui₂ca₂ti₃ ꞌlióg₂ ꞌnei₅₄ a₂jme₁chi₁quian₅ tsɨ₁mu₅, ca₂táꞌ₂ jaun₂ në́₃ ne₄ jmɨg₂.
33 Të₂ o₃ꞌiog₂ lɨn₃, ca₂juáꞌ₂ Pa₄ ca₂tsɨ́ꞌ₃ ca₂le₃jɨ́n₃ dsa₂ a₂ꞌnióꞌ₅ guë́ꞌ₃. Jaun₂ ca₂juáꞌ₂:
―Ma₂të́₂ tɨn₃ semanas a₂tsá₃ ma₂güɨnꞌ₂ ꞌniaꞌ₂ on₃ guëꞌ₂ ma₂quëꞌ₂.
34 Jaun₂ lë₃ juáꞌ₅ jniá₂, quéꞌ₂ ꞌniaꞌ₂ ca₂la₂. Tion₅₄ ꞌnióꞌ₅ quëꞌ₅₄ ꞌniaꞌ₂ ia₁jaun₂ bá₄ liónꞌ₂ ꞌniaꞌ₂. ꞌI₁jan₂ jniog₄ tsá₃ ꞌein₂ dsɨ₂ꞌén₂ ja₁lá₃. Ca₂liaꞌ₂ jŋiaꞌ₅₄ ca₂mɨꞌ₂ jŋi₂ dsi₄ jniog₄ tsá₃ ꞌe₂ dsɨ₃ꞌén₂.
35 Dsɨ₂juɨ₅ jme₁ca₂juáꞌ₂ Pa₄ le₂në₅, ca₂can₃ i₁ŋíꞌ₄ jaun₂ ca₂cuë́ꞌ₃ ti₁ꞌmagꞌ₄ Diú₄ të₃ jág₅ dsa₂ ca₂le₃jɨ́in₃. Jaun₂ ca₂dsion₃ Pa₄ i₁ŋíꞌ₄ ca₂guë́ꞌ₃ jaun₂ në́₃.
36 Jaun₂ ca₂le₃jɨ́n₃ dsa₂ ca₂tɨ́inꞌ₃ táng₃ bí₂ jme₁ma₂në₂guë́ꞌ₃.
37 Ca₂le₃jág₃ jniaꞌ₅₄ conꞌ₂ jme₁tioꞌ₅₄ nɨ₁barco jme₁téi₄ tɨn₃ ꞌŋiá₂-lón₂ rë₂dsɨ́₂ ꞌnagꞌ₂ co₂ne₂guióg₂ rë₂dsɨ́₂ guia₃-jŋé₂ (276) dsa₂.
38 Jme₁ca₂lɨ́ꞌ₃ guë́ꞌ₅ dsa₂ conꞌ₂ jme₁ꞌnio₃, jaun₂ ca₂guiaꞌ₃ lio₅₄ trigo ne₄ jmɨ₁ŋíꞌ₄ ia₁jaun₂ siónꞌ₂ guë́₄ guei₂ nɨ₁barco.
Ca₂i₃guenꞌ₅₄ nɨ₁barco néꞌ₃ jmɨ₁ŋíꞌ₄
39 Jme₁jnia₃ jaun₂, dsa₂ i₂quian₅ nɨ₁barco tsá₃ ca₂rë₃cuɨ́ꞌ₅ ꞌuë₃ jaun₂. La₁ jaun₂ ca₂jág₃ caun₂ dsiog₅ jmɨ₁ŋíꞌ₄ a₂niog₅ jë₄ ꞌuë₃, ja₁ꞌei₅ tei₄ guë́₄ jmɨg₂. Cheiꞌ₅₄ jaun₂ tioꞌ₅₄ ꞌlióng₂ ti₁tsag₁ ja₁lë́₄ jo₂ guë́₄. Jaun₂ ca₂ꞌnáuꞌ₃ dsɨ́₅ chi₂juaꞌ₂ lé₂ jŋiógꞌ₃ nɨ₁barco ca₂të₂ jaun₂.
40 Jaun₂ ca₂ti₃ ꞌnei₅₄ a₂jme₁le₁quian₅ nɨ₁ŋí₁ ꞌláꞌ₁. Néꞌ₃ jmɨ₁ŋíꞌ₄ jaun₂ bá₄ ca₂tí₂ dsa₂ nɨ₁ŋí₁ jaun₂. Qui₂ca₂jiáꞌ₂ dsa₂ ꞌma₂ a₂jmo₅ dsó₃ nɨ₁barco ꞌa₂ juɨ₅ ꞌnio₃ dsa₂. Jaun₂ ca₂chógꞌ₃ tsɨ₁ꞌmɨꞌ₂ le₃ne₄ juɨ₅ quióꞌ₅ nɨ₁barco, ia₁jaun₂ të₃ dsí₂. Jaun₂ dsɨ₂juɨ₅ bá₄ ca₂jme₃lióg₃ ca₂ŋɨ₃ nɨ₁barco ca₂jme₃quián₃ le₃cheiꞌ₅₄ ꞌuë₃ ja₁lë́₄ ti₁tsag₁.
41 La₁ juɨ₅ ja₁ŋó₃ nɨ₁barco jaun₂ ca₂dsi₃quénꞌ₅ caun₂ ja₁lë́₄ tɨn₃ ne₅₄ laꞌ₅₄ ja₁ꞌei₅ tiá₂ jmɨg₂. Të₂le₃ ja₁lë́₄ le₃ne₄ juɨ₅ quióꞌ₅ nɨ₁barco ca₂i₃ꞌóꞌ₅ jë₄ ti₁tsag₁, ca₂quɨ́ꞌ₃ tiá₂ lɨn₃, ca₂liaꞌ₂ tsá₃ ma₃ca₂tióꞌ₃ dsa₂ dsí₃. Jaun₂ le₃ja₁lë́₄ le₃chi₁coꞌ₅₄, qui₂ca₂juɨn₃, ia₁ a₂ŋɨ́₄ lë₃ tiá₂ qui₂jnáꞌ₅ jmɨ₁ŋíꞌ₄.
42 Jme₁ꞌnio₃ ꞌlióg₂ jme₃dsiain₂₃ dsa₂ i₂niog₅ gu₂ ꞌéi₂ ia₁jaun₂ tsá₃ lióin₂ jë₁ma₂qui₂ca₂ꞌain₂ jmɨg₂.
43 La₁ tsá₃ ca₂cuë₃ jmɨg₄ juɨg₅₄, ia₁ ꞌnio₃ lióin₂ Pa₄. Jaun₂ ca₂jmo₃ ꞌéiꞌ₃ ca₂tsɨ́ꞌ₃ ca₂le₃jɨ́n₃ dsa₂ i₂tɨn₂ qui₃dsɨ₅ jmɨg₂, juɨ₁tioinꞌ₅₄ jmɨg₂ le₂ꞌuɨg₅₄ ia₁jaun₂ tɨ́inꞌ₄ ꞌuë₃;
44 dsa₂ siánꞌ₂ guë́₄ në́₃, juɨ₁ꞌain₅₄ jmɨg₂ le₁chanꞌ₂ jau₅₄ ꞌma₂, o₃ nɨ₁ꞌnau₅₄ quióꞌ₅ nɨ₁barco ꞌe₂. Le₂jaun₂ bá₄ ca₂lë₃ qui₂ca₂ló₂ jniaꞌ₅₄ a₂ca₂tágꞌ₃ táng₃ ꞌuë₃.