Ca₂jángꞌ₃ Pablo jág₁ dsau₅ quióꞌ₅ ne₄ Rag₅₄ Agripa
26
Jaun₂ ca₂juáꞌ₂ Rag₅₄ Agripa ca₂tsɨ́ꞌ₃ Pa₄:
―Lé₂ bá₄ juaꞌ₅₄ jág₁ a₂jangꞌ₅₄ jág₁ dsau₅ o₄quiángꞌ₂ ꞌŋiagꞌ₂.
Jaun₂ ca₂chógꞌ₃ Pa₄ gu₂ ca₂jme₃lióg₃ ca₂juáꞌ₂ le₂la₂:
2 ―Jmo₅ jniá₂ dsɨ₃, ꞌe₂ bá₄ dsen₃ jniá₂, a₂ma₂chéngꞌ₅ neꞌ₅₄ ꞌne₂ Rag₅₄ Agripa, a₂long₅₄, juɨg₅₄ ꞌne₂ ꞌa₂ liaꞌ₂ lë́₅ ca₂le₃jë́₃ dso₄ a₂bógꞌ₂ dsa₂ judíos* jniá₂.
3 Ia₁ ma₂ŋiꞌ₅₄ bá₄ ꞌne₂ co₂rë₂ ꞌa₂ liaꞌ₂ lë́₅ tag₄ a₂chíꞌ₅ quián₂ jniaꞌ₅₄ dsa₂ judíos, quianꞌ₅₄ jág₁ a₂tság₂ jniaꞌ₅₄ jɨn₄ rɨnꞌ₅₄ në́₃. Jaun₂ lë₃ mɨ₅ jniá₂ neꞌ₅₄ a₂jmóꞌ₂ juɨnꞌ₂ ꞌauꞌ₂ a₂nágꞌ₁ jág₁ quió₃.
Ca₂dsia₃ Pablo, le₂la₂ bá₄ jme₁lɨ́in₄ néꞌ₃ a₂jéinꞌ₃ le₃quióꞌ₅ Te₁guiꞌ₅₄
4 ꞌCa₂le₃jɨ́n₃ bá₄ dsa₂ judíos le₁ŋi₅ ꞌa₂ liaꞌ₂ jme₁jmo₅ jniá₂ juɨg₂ go₃ quianꞌ₅₄ jë₄ juɨg₂ Jerusalén në́₃. Jaun₂ le₁ŋi₅ bá₄ dsa₂ ꞌa₂ liaꞌ₂ jme₁ŋɨ₅ jniá₂ liaꞌ₂ bɨngꞌ₅₄.
5 Le₁ŋi₅ ꞌéi₂ ján₃, jaun₂ lé₂ bá₄ jáng₃ jág₁ dsau₅ në₁juaꞌ₂ ꞌnio₃, liaꞌ₂ conꞌ₂ jme₁i₃juɨngꞌ₂ bá₄, ma₂lɨ́n₅ bá₄ jniá₂ dsa₂ fariseo*. Jaun₂ jniaꞌ₅₄ i₂jme₁lág₄ fariseos jme₁jme₂tí₁ guë́₄ ꞌŋio₅ lɨn₃ juáꞌ₅ quián₂.
6 Ia₁ a₂ꞌéng₂ a₂jme₃jenꞌ₅₄ Diú₄ ꞌlag₄, juɨ₁liaꞌ₂ lë́₅ jág₁ quióꞌ₅ ca₂cuë́ꞌ₃ guiꞌ₅₄ canꞌ₅₄ quián₂ jniaꞌ₅₄ ma₂lɨ́gꞌ₂, ꞌuɨg₅₄ jaun₂ bá₄ a₂chéngꞌ₅ ja₁lá₃, a₂con₂ dsa₂ jág₁ dsau₅ quió₃.
7 Ta₁guia₃-tɨ́n₂ bá₄ choꞌ₅₄ tsɨ₁jon₂ dsa₂ juɨg₂ jniaꞌ₅₄ jme₂juɨinꞌ₂ Diú₄, jaun₂ liaꞌ₂ ꞌuë₂-jmɨ₂ bá₄ jme₂ti₃ ta₁ ne₄ Diú₄ ia₁ le₁ꞌɨ́n₂ dsɨ́₅ a₂jme₂ti₃ Diú₄ jág₁ jaun₂ quióꞌ₅ ca₂cuë₃. ꞌUɨg₅₄ jaun₂ bá₄ në́₃, ꞌne₂ guiꞌ₅₄ Rag₅₄ Agripa, ꞌuɨg₅₄ ia₁ a₂ꞌɨ́n₂ dsɨ₃ jniá₂ le₂jaun₂ bá₄, a₂ꞌnag₅ dsa₂ judíos jniá₂.
8 ¿ꞌE₂ ꞌuɨg₅₄ jmoꞌ₂ ꞌniaꞌ₂ ꞌauꞌ₂ a₂tsá₃ quɨꞌ₅₄ Diú₄ jmɨg₄ jme₃jeinꞌ₅₄ ꞌlag₄?
Ca₂dsia₃ Pa₄ ꞌa₂ liaꞌ₂ qui₂ca₂co₃ꞌein₃ quióꞌ₅ dsa₂ quián₅ Jesús
9 ꞌJniá₂ ꞌŋió₃, jme₁dsɨ₂jiog₅ dsɨ₃ le₂jŋiá₅ jme₁jmo₅₄ ꞌlióng₂ ne₅₄ cosas a₂jme₁jmagꞌ₅₄ dsa₂ quián₅ Jesús chan₂ Nazaret.
10 Jaun₂ le₂në₅ ca₂jmo₃ jë₄ juɨg₂ Jerusalén. Quianꞌ₅₄ ꞌéiꞌ₃ ca₂cuë₃ juɨg₅₄ jme₂dsa₂, qui₂ca₂tongꞌ₂ ꞌné₅ ꞌmá₃ juɨn₅ lɨn₃ dsa₂ ꞌén₂.a Caun₂ bá₄ jág₁ jme₁lë́₄ quió₃ quianꞌ₅₄ dsa₂ i₂ca₂jme₃dsian₅ i₂lɨn₅₄ dsa₂ i₂ꞌén₂ ꞌéi₂.
11 ꞌLióng₂ ráun₂ qui₂ca₂ꞌë́₃ jniá₂ uɨg₅, ia₁jaun₂ jmo₃ tion₅₄ a₂tí₂ a₂ꞌéin₂. Le₂jaun₂ bá₄ qui₂ca₂jmo₃ jniá₂ le₂tan₅₄ guáꞌ₅ sinagogas*, ca₂liaꞌ₂ ca₂i₁ꞌéin₄ le₂tan₅₄ juɨg₂ go₄ dsa₂ siánꞌ₂ në́₃, ia₁ ꞌŋio₅ lɨn₃ jme₁ꞌŋiai₅₄ jniá₂.
Ca₂dsia₃ táng₃ Pa₄ ꞌa₂ liaꞌ₂ ca₂lë₃ a₂ca₂jéinꞌ₃
12 ꞌTa₁ jaun₂ jme₁ŋó₃ jniá₂ juɨ₅ Damasco ca₂chei₃ dsa₂ quianꞌ₅₄ bí₂ ꞌéiꞌ₃ ca₂cuë₃ juɨg₅₄ jme₂dsa₂ a₂jme₁i₂chángꞌ₃ dsa₂ ꞌén₂ i₂jme₁tionꞌ₅₄ ja₁jaun₂.
13 La₁ liaꞌ₂ conꞌ₂ jme₁ŋó₃ le₂ꞌi₄ juɨ₅, ꞌne₂ guiꞌ₅₄ rag₅₄, conꞌ₂ dsi₃ŋíꞌ₃ bá₄ jaun₂, ca₂jág₃ jniá₂ caun₂ si₂ a₂já₃ juɨ₅ gueiꞌ₅₄ i₂juɨ́g₃, ca₂tág₃ le₃lágꞌ₃ quió₃, quianꞌ₅₄ dsa₂ i₂jme₁quiangꞌ₅₄. ꞌŊio₅ lɨn₃ guë́₄ tág₅ conꞌ₂ guë́₄ ꞌiog₂.
14 Jaun₂ ca₂le₃jág₃ bá₄ jniaꞌ₅₄ i₂gauꞌ₅₄ ꞌuë₃ dsɨ₂juɨ₅ le₂jaun₂. Jaun₂ ca₂nag₃ caun₂ jág₁ ca₂juáꞌ₂ dsa₂ quianꞌ₅₄ jág₁ jmei₅ hebreo*:b “Saulo, Saulo, ¿ꞌe₂ lë₃ co₂ꞌéinꞌ₅ jniá₂? A₂jŋiaꞌ₅₄ jmagꞌ₅₄ uɨg₅ ꞌŋiagꞌ₂ bá₄, jmoꞌ₂ juɨ₁liaꞌ₂ jmo₅ ca₁juɨ₅ quiaꞌ₂ ꞌuë₃ a₂jnáu₅ neiꞌ₅₄ nɨ₁ꞌma₂ chenꞌ₂.”
15 Jaun₂ ca₂ŋag₄ jniá₂: “¿ꞌEin₂ bá₄ ꞌne₂, guiꞌ₅₄?” Jaun₂ ca₂ŋag₃ táng₃: “Jesús bá₄ jniá₂ i₂co₂ꞌénꞌ₅ ꞌne₂.
16 La₁ nau₂, chíꞌ₂ tagꞌ₅₄, ia₁ në₂jme₁jniag₅ neꞌ₅₄ ꞌne₂, ia₁ ꞌnio₃ jme₁tiꞌ₄ ta₁ ne₃, ia₁jaun₂ jangꞌ₅₄ jág₁ dsau₅ ꞌe₂ në₂jagꞌ₅₄ në₃, quianꞌ₅₄ a₂jagꞌ₅₄ guë́₄ cang₂ a₂jme₁jnia₅ jniá₂.
17 Tsɨn₅₄ jniá₂ ꞌne₂, jaun₂ gogꞌ₅₄ ja₁con₂ dsɨ₂nau₂, jaun₂ jmo₅₄ bá₄ jniá₂ ꞌí₁ ꞌne₂ ia₁jaun₂ tsá₃ jmógꞌ₂ dsa₂ juɨg₂, on₃ guëꞌ₂ dsɨ₂nau₂ në́₃.
18 Jaun₂ juɨ₅ ja₁con₂ dsa₂ ꞌéi₂ tsɨn₅₄ jniá₂ ꞌne₂, ia₁jaun₂ le₃jnio₂ ne₄ dsa₂, ia₁jaun₂ ꞌuɨ́in₃ jë₄ qui₁néꞌ₃, qui₃jéinꞌ₃ ne₅₄ ja₁tág₅ si₂; ia₁jaun₂ tsá₃ lë́₅ juaꞌ₅₄ tioinꞌ₅₄ guë́₄ ꞌéiꞌ₃ quióꞌ₅ Satanás, ia₁jaun₂ dsi₁lein₃ ja₁con₂ Diú₄, dsɨ₃ꞌén₂ bá₄ dsáu₁, ia₁jaun₂ gue₃ juɨ₁liaꞌ₂ a₂ca₂tɨ́n₂ dsa₂ i₂lë́₅ ꞌí₁ quián₅ Diú₄, ꞌuɨg₅₄ ia₁ a₂ꞌéin₂ le₃quió₃ jniá₂.”
Ca₂jme₃ti₃ Pa₄ a₂ca₂jág₃ jaun₂
19 ꞌJaun₂ le₂në₅ bá₄, ꞌne₂ guiꞌ₅₄ Rag₅₄ Agripa, tsá₃ juaꞌ₅₄ a₂tsá₃ ca₂jme₁ti₁₂ conꞌ₂ lë́₅ a₂ca₂jág₃ a₂já₃ gueiꞌ₅₄.
20 Jaun₂ lë₃, jë₄ juɨg₂ Damasco ca₂ꞌë́₃ le₂ꞌuɨg₅₄ jág₁ dse₃. Jaun₂ guë́₄ ca₂ŋeg₅₄ juɨ₅ Jerusalén, le₂tan₅₄ juɨg₂ ja₁tén₄ ꞌuë₃ Judea në́₃. Ján₃ bá₄ ca₂ŋeg₅₄ jɨn₄ dsɨ₂nau₂, ca₂i₁chei₁₂ a₂ꞌnióꞌ₅ dsɨ₃quénꞌ₅ dsɨ́₅, jéinꞌ₃ le₃quióꞌ₅ Diú₄, a₂jme₃li₅₄ a₂ma₂ca₂rë₃tsɨ́n₃ dsɨ́₅ të₂le₃ quianꞌ₅₄ ca₂le₃jë́₃ a₂jmo₂₃.
21 ꞌUɨg₅₄ jaun₂ bá₄ a₂ca₂jŋauꞌ₃ dsa₂ judíos jniá₂ i₁dsi₅ guáꞌ₅ templo* a₂jme₁ꞌnio₃ jme₁jŋagꞌ₃.
22 La₁ Diú₄ bá₄ jme₂ꞌo₅₄ cuë₂₃ bí₂ a₂chanꞌ₅₄ tiá₂ jág₁ quióꞌ₅ ca₂të₂ jmɨg₄ në₃, qui₂jángꞌ₅ jág₁ dsau₅ a₂juɨ́g₂ liaꞌ₂ dsa₂ dsen₅₄ liaꞌ₂ dsa₂ lë₁dsa₂ në́₃. ꞌI₁caun₂ jág₁ siáꞌ₂ tsá₃ juɨ́g₂ jniá₂ dsa₂, jŋiaꞌ₅₄ conꞌ₂ lë́₅ jág₁ ca₂juáꞌ₂ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂, quianꞌ₅₄ a₂ca₂juáꞌ₂ Moisés, jme₁ca₂juáꞌ₂ ca₂le₃jë́₃ ꞌe₂ niog₅ lé₂,
23 co₂ꞌnióꞌ₄ a₂tion₅₄ ꞌnióꞌ₅ ŋág₃ uɨg₅ I₂rë₂ꞌɨ́n₁* quián₅ Diú₄; jaun₂ ꞌéi₂ bá₄ lén₂ i₂le₂ꞌuɨg₅₄ i₂jenꞌ₅₄ jɨn₄ ꞌlag₄, ia₁jaun₂ dsɨ₃ꞌë́₃ jág₁ dse₃ a₂lión₂ dsa₂, juɨ₁liaꞌ₂ caun₂ si₂ a₂tág₅ liaꞌ₂ jɨn₄ dsa₂ juɨg₂ quián₂ jniaꞌ₅₄, liaꞌ₂ jɨn₄ dsɨ₂nau₂ në́₃.
Ca₂jmo₃ Pa₄ bí₂ a₂jme₁le₂ꞌén₂ Rag₅₄ Agripa të₂le₃ quióꞌ₅ Jesús
24 Jme₁ca₂juáꞌ₂ Pa₄ jág₁ jaun₂ a₂jme₁lióin₂ ꞌŋiog₅ ne₄ dsɨ₂tan₅₄, jaun₂ ca₂guióꞌ₃ Dsi₄máꞌ₂ Festo ca₂juáꞌ₂:
―¡A₂lë₁të₂ꞌɨꞌ₂ bá₄ ꞌne₂, Pa₄! Ia₁ a₂ŋɨ́₄ lë₃ ꞌɨꞌ₂ si₂, jaun₂ ma₂ca₂rë₃ŋágꞌ₅.
25 Jaun₂ ca₂ŋag₃ táng₃ Pa₄:
―Tsá₃ ŋá₅ jniá₂, ꞌne₂ guiꞌ₅₄ Dsi₄máꞌ₂ Festo. Jág₁ dsau₅ dsónꞌ₂ bá₄ a₂juáꞌ₅ jniá₂ la₂.
26 La₂ bá₄ guá₅ guiꞌ₅₄ Rag₅₄ Agripa i₂cuɨ́ꞌ₅ dse₃ ꞌa₂ liaꞌ₂ lë́₅ jág₁ në₅. A₂jaun₂ bá₄ lë₃ tiá₂ dsɨ₃ a₂juáꞌ₅ ne₅₄, ia₁ dsónꞌ₂ ŋi₅ ca₂le₃jë́₃ jág₁ në₅, ia₁ on₃juaꞌ₅₄ a₂ca₂lë₃ caun₂ ja₁quióng₄ conꞌ₂ të₃coꞌ₅₄.
27 ¿ꞌÉnꞌ₂ ꞌne₂ guiꞌ₅₄ Rag₅₄ Agripa jág₁ a₂ca₂juáꞌ₂ dsa₂ i₂jme₁ꞌë́₂ jág₁ quián₅ Diú₄? Guion₄ bá₄ jniá₂ a₂ꞌénꞌ₂ ꞌne₂.
28 Jaun₂ ca₂ŋag₃ Rag₅₄ Agripa:
―Ca₂juɨg₄ meiꞌ₂ tsá₃ jme₂ꞌuangꞌ₅₄ dsɨ₃ a₂léng₂ jan₂ dsa₂ cristiano.
29 Jaun₂ ca₂juáꞌ₂ táng₃ Pa₄:
―Chi₂juaꞌ₂ ca₂juɨg₄ o₃ tsá₃ ca₂juɨg₄ ꞌe₂, ꞌe₂ guë́₄ dse₃ në₁juaꞌ₂ jmo₃ Diú₄ on₃juaꞌ₅₄ jmáꞌ₃ ꞌne₂, ján₃ bá₄ le₂jaun₂ ca₂le₃jɨ́n₃ dsa₂ i₂nag₅ jág₁ quió₃ në₃, a₂léin₂ juɨ₁liaꞌ₂ lɨ́n₅ jniá₂, o₁jŋiaꞌ₅₄ guë́₄ on₃juaꞌ₅₄ quianꞌ₅₄ nɨ₁ŋí₁ cadena juɨ₁liaꞌ₂ chénꞌ₅ jniá₂ la₂.
30 Jme₁ma₂ca₂lë₃ juáꞌ₂ Pa₄ le₂jaun₂, ca₂nau₂ Rag₅₄ Agripa quianꞌ₅₄ Dsi₄máꞌ₂ Festo, ꞌio₅₄ Berenice në́₃, ca₂ꞌuɨin₂ co₂lë₅ quiainꞌ₅₄ ca₂le₃jɨ́n₃ guë́₄ dsa₂ i₂jme₁tionꞌ₅₄.
31 Conꞌ₂ ca₂i₃léin₂ cau₅, ca₂i₁dsia₂ ꞌa₂ liaꞌ₂ jmo₃ jág₁ jaun₂ quióꞌ₅ Pa₄, jaun₂ ca₂juáꞌ₂ ca₂tsɨ́ꞌ₃ rɨinꞌ₅₄:
―ꞌI₁ca₂juɨg₄ tsá₃ ꞌe₂ ma₂jmo₃ dsa₂ në₅, juaꞌ₅₄ a₂ca₂tɨ́in₂ ꞌi₄ ꞌéiꞌ₃ jóin₂, on₃ guëꞌ₂ juaꞌ₅₄ a₂dsi₂ten₅₄ ꞌein₅₄ néꞌ₃ ꞌmá₃ në́₃.
32 Jaun₂ ca₂juáꞌ₂ Rag₅₄ Agripa ca₂tsɨ́ꞌ₃ Dsi₄máꞌ₂ Festo:
―Jme₁lé₂ bá₄ jme₁lión₂ dsa₂ në₅, juaꞌ₅₄ meiꞌ₂ guë́₃ tsá₃ ca₂mɨ₃ ꞌŋiog₅ a₂jme₃rë́₃ guiꞌ₅₄ emperador* jág₁ quióꞌ₅.