Ca₂jme₃tsɨ́n₃ Saulo dsɨ́₅
9
Të₁liaꞌ₂ jaun₂, dsa₂ i₂chen₂ Saulo caun₂ qui₂quiain₂₃ juë́ꞌ₅ a₂ꞌnio₃ jme₃dsiáin₃ dsa₂ i₂ꞌén₂ jág₁ quióꞌ₅ Te₁guiꞌ₅₄. Jaun₂ lë₃, ca₂ŋei₅₄ i₁jɨin₂₃ jme₂dsa₂ dsen₅₄.
2 Ca₂mɨ₃ ne₄ ꞌéi₂ caun₂ si₂ a₂cuë₃ bí₂ a₂dsó₃ guáꞌ₅ sinagogas* quióꞌ₅ dsa₂ juɨg₂ Damasco a₂dsɨ₃ꞌniaiꞌ₂ dsa₂ i₂tionꞌ₅₄ të₂le₃ quióꞌ₅ Juɨ₅* quióꞌ₅ Te₁guiꞌ₅₄. Jme₁ꞌnio₃ Saulo dsɨ₃te₅₄ dsa₂ chi₁ꞌŋeiꞌ₂ ca₂të₂ Jerusalén, liaꞌ₂ dsa₂ ŋeꞌ₂ liaꞌ₂ dsa₂ mɨ́₂.
3 La₁ jme₁ja₂quián₃ dsióg₄ juɨg₂ Damasco, conꞌ₂ tsá₃ jáin₅ jme₁ca₂tág₃ caun₂ si₂ tág₅ jmáꞌ₅ ne₄ quióꞌ₅. Si₂ jaun₂ a₂já₃ juɨ₅ gueiꞌ₅₄ i₂juɨ́g₃.
4 Co₂tan₅₄ ca₂quɨnꞌ₃ Saulo, jaun₂ ca₂nág₂ juáꞌ₂ jág₁ jë₄ si₂ jaun₂:
―Saulo, Saulo, ¿ꞌe₂ lë₃ co₂ꞌéinꞌ₅ jniá₂?
5 Jaun₂ ca₂ŋag₃ Saulo:
―¿ꞌEin₂ ꞌne₂, guiꞌ₅₄?
Jaun₂ ca₂ŋag₃ táng₃ jág₁ néꞌ₂ jë₄ si₂:
―Jesús bá₄ jniá₂ i₂co₂ꞌénꞌ₅ ꞌne₂ ŋɨꞌ₂. Jŋiaꞌ₅₄ jmagꞌ₅₄ uɨg₅ ꞌŋiagꞌ₂ bá₄ jmoꞌ₂ juɨ₁liaꞌ₂ jmo₅ ca₁juɨ₅ jë₁ma₂jnáu₃ nɨ₁ꞌma₂ chenꞌ₂.
6 Jaun₂ ca₂jlen₃ Saulo, ca₂rë₃góꞌ₅, ca₂juáꞌ₂:
―Te₁guiꞌ₅₄, ¿ꞌe₂ ꞌniogꞌ₂ ꞌne₂ jmo₅₄ jniá₂?
Jaun₂ ca₂ŋag₃ táng₃ Te₁guiꞌ₅₄:
―Nau₂, ꞌú₅ juɨg₂ Damasco. Jë₁ma₂dsiógꞌ₃, ja₁jaun₂ bá₄ juáꞌ₂ dsa₂ ꞌe₂ jmóꞌ₂.
7 Dsa₂ i₂jme₁quianꞌ₅₄ Saulo në́₃, ꞌŋio₅ lɨn₃ ca₂rë₃góꞌ₅, ia₁ ca₂nág₂ jág₁ a₂juáꞌ₂ jë₄ si₂ jaun₂, tonꞌ₂ ꞌi₁jan₂ guëꞌ₂ tsá₃ ꞌein₂ ca₂jɨ́in₂.
8 Jaun₂ ca₂nau₂ Saulo, la₁ jme₁ca₂nau₂ jaun₂, tsá₃ ma₃lé₂ jág₃, tsá₃ ma₃jniá₂ mɨ₂ne₅₄. Dsa₂ i₂jme₁quiainꞌ₅₄ bá₄ ca₂tág₃ le₁chanꞌ₂ gu₂, ca₂jiog₃ të₂ juɨg₂ Damasco.
9 Ja₁jaun₂ ca₂ꞌí₃ tein₅₄ ꞌnɨ₅ jmɨg₄, tsá₃ ꞌe₂ ca₂guë́ꞌ₃, on₃ guëꞌ₂ ꞌe₂ ca₂ꞌɨnꞌ₃ ꞌi₁caun₂.
10 Juɨg₂ Damasco jaun₂, jme₁guá₄ jan₂ dsa₂ i₂ꞌén₂ i₂jme₁chen₂ Ananías. I₂ꞌéi₂ ca₂jénꞌ₃ ca₂jɨ́in₂ Te₁guiꞌ₅₄ i₂ca₂juáꞌ₂:
―¡Ananías!
Jaun₂ ca₂ŋag₃ ꞌéi₂:
―Ja₁lá₃ bá₄ ꞌeng₅₄, Te₁guiꞌ₅₄.
11 Jaun₂ ca₂juáꞌ₂ táng₃ Te₁guiꞌ₅₄:
―Nau₂, gua₂ calle chei₂ Co₂dsau₅ ja₁quióꞌ₄ dsa₂ chen₂ Judas. Ja₁jaun₂ o₂ꞌniaꞌ₂ jan₂ dsa₂ chan₂ Tarso i₂chen₂ Saulo, i₂ꞌen₅₄ chi₂lénꞌ₂ Diú₄ conꞌ₂ lë́₅ la₂.
12 Ia₁ ma₂quɨ₃ a₂ma₂jɨ́in₂ jan₂ dsa₂ i₂chen₂ Ananías ca₂ꞌí₃ ca₂quiog₂ gu₂ ne₄ quióꞌ₅ ia₁jaun₂ jnia₃ táng₃ mɨ₂ne₅₄.
13 Jme₁ca₂nág₂ Ananías le₂në₅, jaun₂ ca₂juáꞌ₂:
―Te₁guiꞌ₅₄, juɨn₅ dsa₂ ma₂tság₃ jniá₂ ca₂le₃jë́₃ ꞌe₂ ꞌlɨgꞌ₅₄ a₂jmo₅ dsa₂ ꞌéi₂ a₂jmáiꞌ₂ dsa₂ chan₂ Jerusalén i₂ꞌén₂ jág₁ quiángꞌ₂.
14 Ta₁ jaun₂ já₅ ꞌéi₂ ja₁lá₃ quianꞌ₅₄ ꞌéiꞌ₃ quióꞌ₅ juɨg₅₄ jme₂dsa₂ ia₁jaun₂ të₂ le₁ꞌŋe₅ ca₂le₃jɨ́n₃ dsa₂ quiángꞌ₂ i₂ꞌɨn₅ ꞌne₂.
15 La₁ jaun₂ ca₂juáꞌ₂ táng₃ Te₁guiꞌ₅₄:
―La₁ gua₂, ia₁ i₂ma₂quionꞌ₄ jniá₂ ꞌéi₂ ia₁ ꞌnio₃ jniá₂ dsó₃ qui₂dsɨ₃ꞌag₃ jniá₂ liaꞌ₂ jɨn₄ dsɨ₂nau₂ liaꞌ₂ ne₄ rag₅₄ quiáin₅, jɨn₄ dsa₂ israelitas* në́₃.
16 Ia₁ jniá₂ bá₄ ꞌë́₄ ꞌa₂ liaꞌ₂ tion₅₄ niog₅ ŋág₃ uɨg₅ ꞌŋio₅ lɨn₃ o₄quió₃ jniá₂.
17 Jaun₂ guë́₄ ŋó₃ Ananías ja₁chíꞌ₄ tsɨ₁ꞌné₅ ja₁jme₁ꞌen₅₄ Saulo. Ca₂ꞌí₃ dsi₂néi₂, ca₂quiog₂ gu₂ ne₄ quióꞌ₅ Saulo, jaun₂ ca₂juáꞌ₂:
―Saulo rɨnꞌ₅₄ jniog₄, Te₁guiꞌ₅₄ Jesús i₂ca₂jengꞌ₂ le₂ꞌi₄ juɨ₅ liaꞌ₂ conꞌ₂ ŋeꞌ₃, në₂chei₃ jniá₂ ia₁jaun₂ jnia₅₄ táng₃ mɨ₂neꞌ₅₄, jaun₂ guéngꞌ₄ Jme₂dsí₂ Jŋió₅ në́₃.
18 Co₂tan₅₄ dsɨ₂juɨ₅ jaun₂ qui₂ca₂séiꞌ₂ juɨ₁liaꞌ₂ tsɨ₁ mɨ₂ne₄ Saulo, co₂tan₅₄ ca₂jág₃ táng₃. Jaun₂ guë́₄ ca₂nau₂ Saulo, ca₂i₁choin₃ jmɨg₂.
19 Jaun₂ ca₂guë́ꞌ₃, ca₂tɨ́inꞌ₃ táng₃ bí₂. Jaun₂ ca₂ꞌí₃ bá₄ guë́₄ tɨn₃-ꞌnɨ₅ jmɨg₄ quiainꞌ₅₄ dsa₂ ꞌén₂ i₂jme₁tiánꞌ₄ juɨg₂ Damasco jaun₂.
Ca₂ꞌë́₂ Saulo jág₁ dse₃ juɨg₂ Damasco
20 Dsɨ₂juɨ₅ bá₄ ca₂jme₃lióg₃ Saulo ca₂ŋei₅₄ guáꞌ₅ sinagogas ca₂i₁jme₁tɨin₂₃ dsa₂ a₂juáꞌ₂ a₂lɨ́n₅ Jesús Ja₁ŋiꞌ₅₄ Diú₄.
21 Ca₂le₃jɨ́n₃ dsa₂ i₂ca₂nág₂ ca₂i₃góꞌ₃ dsɨ́₅, qui₂ca₂dsia₃:
―¿On₃juaꞌ₅₄ dsa₂ në₅ i₂ŋɨ́₄ lë₃ jme₁ŋɨ₅ juɨg₂ Jerusalén qui₂co₂ꞌein₂₃ dsa₂ i₂ꞌén₂ le₃quióꞌ₅ Jesús? ¿On₃juaꞌ₅₄ i₂në₅ ꞌŋiog₅ i₂ma₂guan₅ ja₁lá₃ a₂qui₂të₂ le₁ꞌŋe₅ dsa₂ jaun₂ qui₂dsɨ₂jangꞌ₅₄ o₄gú₃ juɨg₅₄ jme₂dsa₂?
22 La₁ të₂le₃ lë́₅ guë́₄ ca₂ꞌág₂ tiá₂ dsɨ́₅ Saulo, qui₂ca₂ꞌë́₂ jág₁ a₂lɨ́n₅ dsónꞌ₂ Jesús I₂rë₂ꞌɨ́n₁* quián₅ Diú₄. Ca₂liaꞌ₂ ca₂i₃cónꞌ₅ dsɨ́₅ dsa₂ judíos* i₂jme₁tiánꞌ₄ juɨg₂ Damasco ia₁ ca₂ꞌë́₂ Saulo jág₁ le₂jaun₂.
Ca₂lón₂ Saulo o₄gú₃ dsa₂ judíos
23 ꞌLióng₂ jmɨg₄ cang₂ jaun₂, ca₂jmo₃ dsa₂ judíos caun₂ jág₁ a₂jme₁jŋɨiꞌ₃ Saulo.
24 A₂jmɨ₂ a₂ꞌuë₂ qui₂ca₂jŋiai₃ Saulo o₄ꞌné₄ o₄juɨ₅ juɨg₂ jaun₂, ia₁jaun₂ jŋagꞌ₃. La₁ ca₂rë₃ŋi₅ bá₄ Saulo.
25 Jaun₂ dsa₂ ꞌén₂ rɨinꞌ₅₄ në́₃, ca₂toꞌ₂ ꞌŋióꞌ₃ caun₂ tsɨ₁mɨꞌ₂ pa₁, jaun₂ a₂ꞌuë₂ ca₂sióin₂ ꞌéi₂ juɨ₅ ne₄ nɨ₁ꞌiaꞌ₂ a₂jme₁lë́₄ le₃lágꞌ₃ juɨg₂. Jaun₂ le₂në₅ ca₂lóin₂.
Ma₂ꞌen₅₄ táng₃ Saulo juɨg₂ Jerusalén
26 Jme₁dsiánꞌ₃ Saulo Jerusalén, jme₁ꞌnio₃ jme₃quiainꞌ₅₄ dsɨ₂juɨ₅ dsa₂ ꞌén₂ ja₁jaun₂. La₁ ca₂le₃jɨ́n₃ dsa₂ ꞌéi₂ në́₃ ca₂rë₃gain₃ ꞌéi₂, ia₁ tsá₃ jaun₂ lɨ́in₂ a₂ma₂ꞌén₂ Saulo jág₁ dse₃.
27 La₁ia₁ dsa₂ i₂chen₂ Bernabé ca₂jiog₃ ne₄ dsa₂ guia₃-tɨ́n₂ i₂chen₄ ꞌéi₂. Jaun₂ ca₂dsia₃ ꞌa₂ liaꞌ₂ ca₂lë₃ a₂ca₂jme₃jeinꞌ₂ Te₁guiꞌ₅₄ le₂ꞌi₄ juɨ₅, ꞌe₂ jág₁ a₂ca₂juáꞌ₂ në́₃, ꞌa₂ liaꞌ₂ ca₂dsia₃ Saulo ján₃ tiá₂ dsɨ́₅ juɨg₂ Damasco ca₂ꞌë́₂ jág₁ ꞌɨin₂₃ Jesús.
28 Jaun₂ bá₄ ca₂ꞌí₃ Saulo juɨg₂ Jerusalén ca₂jme₃quiainꞌ₅₄ dsa₂ ꞌéi₂.
29 Caun₂ ca₂dsia₃ tiá₂ dsɨ́₅ bá₄ qui₂ca₂ꞌë́₂ jág₁ ꞌɨin₂₃ Te₁guiꞌ₅₄ qui₂ca₂dsia₃ jág₁ qui₂ca₂tsɨ́in₂ quianꞌ₅₄ dsa₂ judíos i₂dsia₅ jág₁ jmei₅ griego*. La₁ dsa₂ ꞌéi₂ në́₃ caun₂ ꞌnio₃ jme₁jŋɨiꞌ₃ bá₄ Saulo.
30 Jme₁ca₂rë₃líꞌ₄ rɨnꞌ₅₄ Saulo a₂jaun₂, jaun₂ ca₂jiog₃ juɨ₅ juɨg₂ Cesarea. A₂ꞌein₅₄ guë́₄ ja₁jaun₂ ca₂dsiógꞌ₂ rɨinꞌ₅₄ juɨg₂ go₅₄ ja₁chei₂ Tarso.
31 Jaun₂ ca₂le₃jɨ́n₃ guáꞌ₅, dsa₂ i₂ꞌén₂, le₂tan₅₄ ja₁tén₄ ꞌuë₃ Judea, Galilea, Samaria në́₃, tei₄ bá₄ ꞌei₅ tionꞌ₅₄ dsa₂, caun₂ ca₂rë₃béin₂ ján₃. Jme₁jme₂gain₃ bá₄ Te₁guiꞌ₅₄ tioinꞌ₅₄. Quianꞌ₅₄ bí₂ quióꞌ₅ Jme₂dsí₂ Jŋió₅, caun₂ qui₂ca₂juɨ́n₂ bá₄ dsa₂ i₂ꞌén₂.
Ca₂ꞌlón₂ dsa₂ chen₂ Eneas
32 Liaꞌ₂ conꞌ₂ ŋɨ₅ Pe₄ qui₂dsɨ₂jɨin₅₄ rɨinꞌ₅₄, ca₂i₁jɨin₁₂ ján₃ dsa₂ i₂ma₂ꞌén₂ jág₁ dse₃ i₂jme₁tiánꞌ₄ juɨg₂ ja₁chei₂ Lida.
33 Ja₁jaun₂ ca₂jɨ́in₂ jan₂ dsa₂ ꞌlianꞌ₂ i₂jme₁chen₂ Eneas i₂ma₂të́₂ jŋia₃ ŋi₂ ron₅, ia₁ tsá₃ lé₂ ŋɨ₃.
34 Jaun₂ ca₂juáꞌ₂ Pe₄ ca₂tsɨ́ꞌ₃ dsa₂ ꞌéi₂:
―Eneas, Jesucristo jme₂ꞌlió₂. Nau₂, jmo₄ dse₃ tsɨ₁cama quiángꞌ₂.
Jaun₂ dsɨ₂juɨ₅ le₂jaun₂ ca₂nau₂ Eneas.
35 Jaun₂ ca₂le₃jɨ́n₃ dsa₂ i₂tiánꞌ₅ Lida quianꞌ₅₄ juɨg₂ Sarón ca₂jág₃ a₂ca₂ꞌlón₂ ꞌéi₂, jaun₂ ca₂jéinꞌ₃ le₃quióꞌ₅ Te₁guiꞌ₅₄.
Ca₂jenꞌ₅₄ ꞌio₅₄ Dorcas
36 Jmɨg₄ jaun₂ jme₁chan₂ jan₂ ꞌio₅₄ i₂ꞌén₂ jë₄ juɨg₂ Jope i₂jme₁chen₂ Tabita. Quianꞌ₅₄ jág₁ jmei₅ griego jme₁të́ꞌ₂ dsa₂ Dorcas. ꞌIo₅₄ ꞌéi₂ liaꞌ₂ conꞌ₂ chain₂ jme₁jmo₂₃ dse₃ jme₂ꞌoin₅₄ dsa₂ te₂ŋé₂.
37 Të₃jë₄ jmɨg₄ jaun₂, ca₂rë₃dsoꞌ₅₄ Dorcas, ca₂join₃ bá₄ jaun₂ në́₃. Cang₂ jme₁ca₂lë₃ sei₅ dsa₂, jaun₂ ca₂i₁quio₂₃ caun₂ dsi₂néi₂ jë₁ca₂të́₂ tɨn₃ juɨ́n₃.
38 Juɨg₂ Jope ma₂quián₅ bá₄ ja₁niog₅ juɨg₂ Lida ja₁ꞌen₅₄ Pe₄. Jaun₂ jme₁ca₂rë₃ŋi₅ dsa₂ ꞌén₂ a₂ꞌen₅₄ Pe₄ ja₁jaun₂, jaun₂ ca₂chein₃ on₃ rɨinꞌ₅₄ ca₂i₁teꞌ₂ ꞌéi₂:
―Ŋia₅ të₂në₃ cónꞌ₅ juɨ₅ Jope.
39 Jaun₂ ŋó₃ Pe₄ co₂lë₅ quiainꞌ₅₄ dsa₂ ꞌéi₂. Jme₁ca₂dsióg₃, ca₂i₁jiog₃ dsa₂ ja₁rë₂quian₅ ꞌlag₄. Ja₁jaun₂ tionꞌ₅₄ le₁ŋɨꞌ₂ ca₂le₃jɨ́n₃ ꞌio₅₄ ꞌnág₂ quɨꞌ₂-ꞌo₂₃, qui₂ca₂ꞌë́ꞌ₃ Pe₄ ꞌmɨꞌ₂ tsɨnꞌ₅₄ dsa₂, ta₁ a₂jme₁jmo₅ Dorcas liaꞌ₂ conꞌ₂ chain₂.
40 Jaun₂ ca₂jmo₃ Pe₄ ꞌéiꞌ₃ ca₂ꞌuɨn₂ dsa₂ dsi₂néi₂ ja₁rë₂quian₅ ꞌlag₄. Jaun₂ ca₂chi₃jné₃ ca₂chi₃léinꞌ₂ Diú₄. Jaun₂ guë́₄ ca₂jɨ́in₂ ꞌlag₄, ca₂juáꞌ₂:
―Tabita, nau₂.
Dsɨ₂juɨ₅ jaun₂ ca₂ján₃ ꞌio₅₄ jme₁ne₁₂. Jme₁ca₂jɨ́in₂ Pe₄, ca₂guá₂ ꞌio₅₄ jaun₂ në́₃.
41 Jaun₂ ca₂jŋaꞌ₃ Pe₄ mɨ₂gu₂ ꞌio₅₄, ca₂chóꞌ₂. Jaun₂ ca₂të́ꞌ₃ táng₃ Pe₄ rɨinꞌ₅₄, ꞌio₅₄ ꞌnág₂ në́₃, jaun₂ ca₂jɨ́inꞌ₂ ꞌio₅₄ ꞌéi₂, la₁ ma₂jeinꞌ₅₄ bá₄.
42 Ta₁caun₂ juɨg₂ Jope ca₂i₃ꞌág₃ jág₁ a₂ca₂lë₃ le₂jaun₂. Jaun₂ juɨn₅ lɨn₃ dsa₂ ca₂rë₃ꞌén₂ jág₁ quióꞌ₅ Te₁guiꞌ₅₄.
43 Ca₂ꞌí₃ bá₄ guë́₄ Pe₄ ꞌlióng₂ jmɨg₄ jaun₂ ja₁quióꞌ₄ jan₂ dsa₂ i₂chen₂ Si₂mu₅₄ i₂jme₂dse₃ lo₄ jáꞌ₂.