Co₂ꞌen₅ Saulo dsa₂ i₂ma₂ꞌén₂
8
Jaun₂ caun₂ bá₄ ꞌei₅ jág₁ quióꞌ₅ Saulo a₂ca₂jŋɨꞌ₃ dsa₂ Té₂. Dsɨ₂juɨ₅ jmɨg₄ jaun₂ bá₄, ca₂jme₃lióg₃ dsa₂ qui₂co₂ꞌein₃ ꞌŋio₅ lɨn₃ ta₁caun₂ nióꞌ₃ dsa₂ i₂lɨ́n₅ guáꞌ₅ jë₄ juɨg₂ Jerusalén. Ca₂le₃jɨ́n₃ dsa₂ ꞌéi₂ ca₂i₃léin₂ tsɨ₁rë₂jain₅₄ le₂tan₅₄ ꞌuë₃ Judea quianꞌ₅₄ Samaria. Jŋiaꞌ₅₄ liaꞌ₂ dsa₂ guia₃-tɨ́n₂ i₂chen₄* quián₅ Jesús bá₄ ca₂jŋia₃ guë́₄ juɨg₂ Jerusalén.
2 I₂lɨn₅₄ dsa₂ dsen₃ i₂ꞌnio₃ Diú₄ ca₂ꞌóin₂ Té₂, qui₂ca₂ꞌo₃ ꞌŋio₅ lɨn₃ o₄quióꞌ₄ ꞌéi₂.
3 Të₁liaꞌ₂ jaun₂, i₂ŋɨ₅₄ Saulo quiainꞌ₅₄ rɨinꞌ₅₄ qui₂co₂ꞌein₂₃ dsa₂ i₂ꞌén₂, qui₂dsɨ₂toinꞌ₅₄ të₂ dsi₂néi₂ qui₂ꞌuɨ́inꞌ₂ dsa₂ tsɨ₁cuɨinꞌ₂, liaꞌ₂ dsa₂ ŋeꞌ₂ liaꞌ₂ dsa₂ mɨ́₂, qui₂të₂ a₂toꞌ₂ ꞌné₅ ꞌmá₃.
Ca₂ꞌë́₂ dsa₂ jág₁ dse₃ juɨg₂ Samaria
4 La₁ ca₂le₃jɨ́n₃ dsa₂ i₂ca₂ꞌuɨn₂ juɨg₂ Jerusalén, ca₂le₃jë́₃ ja₁ca₂i₁lein₅₄ qui₂ca₂ꞌë́₂ jág₁ dse₃.
5 Jan₂ ꞌéi₂, i₂chen₂ Fe₂li₄, ca₂ŋó₃ caun₂ juɨg₂ ja₁tén₄ ꞌuë₃ Samaria ca₂dsia₃ jág₁ tsɨ́ꞌ₅ dsa₂ ja₁jaun₂, ꞌɨin₂₃ Cristo.a
6 Jaun₂ jme₁ŋɨꞌ₂ dsa₂ jmo₂₃ tei₄ ca₂le₃jɨ́in₃, të₅ dsɨ́₅ nag₂₃ jág₁ a₂juáꞌ₂ Fe₂li₄, ia₁ ján₃ bá₄ ca₂jág₃ dsa₂ léi₄ dsɨ₂góꞌ₃ dsɨ₅ a₂jme₁jmo₅ ꞌéi₂.
7 Ia₁ juɨn₅ i₂tionꞌ₅₄ jme₂dsí₂ ꞌlɨnꞌ₅₄ të₂dsɨ́₅ qui₂ca₂ꞌlóin₂. Ca₂le₃jɨ́n₃ jme₂dsí₂ ꞌlɨnꞌ₅₄ ꞌéi₂ qui₂ca₂ꞌuɨin₂ qui₂guióꞌ₅. Ján₃ bá₄ juɨn₅ dsa₂ ꞌlianꞌ₂, dsa₂ guianꞌ₅₄ në́₃, qui₂ca₂ꞌlóin₂.
8 ꞌUɨg₅₄ jaun₂ ꞌŋio₅ ꞌioꞌ₂ ca₂jmo₃ dsa₂ juɨg₂ jaun₂.
9 Juɨg₂ jaun₂ jme₁chan₂ jan₂ dsa₂ i₂jme₁chen₂ Si₂mu₅₄, i₂jme₁jmo₅ ta₁ a₂chan₂ dsɨ́₅ le₂jŋiá₅, jme₁jme₂gain₂₃ dsa₂ juɨg₂ Samaria, a₂juáꞌ₂ a₂lɨ́in₅ dsa₂ dsen₅₄.
10 Ca₂le₃jɨ́n₃ dsa₂, liaꞌ₂ dsa₂ canꞌ₅₄ liaꞌ₂ chiꞌ₂ në́₃, jme₁nag₂₃ të₅ dsɨ́₅ jág₁ quióꞌ₅, qui₂dsia₂₃:
―Dsa₂ në₅ tɨin₂ quianꞌ₅₄ juɨ₅bí₂ quióꞌ₅ Diú₄.
11 Jme₁tónꞌ₂ dsa₂ juɨ₅ jág₁ quióꞌ₅ guiꞌ₅₄ ꞌéi₂, ia₁ ma₂lɨ́gꞌ₂ bá₄ ma₂já₅ qui₂jme₂gain₂₃ dsa₂ quianꞌ₅₄ bí₂ a₂chan₂ dsɨ́₅.
12 La₁ dsɨ₂juɨ₅ jme₁ca₂rë₃ꞌén₂ dsa₂ jág₁ dse₃ quióꞌ₅ Jesucristo a₂ca₂ꞌë́₂ Fe₂li₄ juɨ₁liaꞌ₂ ja₁gon₂ Diú₄, jaun₂ qui₂ca₂jŋó₂ dsa₂ jmɨg₂ liaꞌ₂ dsa₂ ŋeꞌ₂ liaꞌ₂ dsa₂ mɨ́₂.
13 Ján₃ bá₄ ca₂rë₃ꞌén₂ ꞌŋiog₅ Si₂mu₅₄ ꞌéi₂, ca₂jŋói₂ jmɨg₂ ján₃. Jaun₂ guë́₄ ca₂jme₃lióg₃ ca₂jme₃quiainꞌ₅₄ Fe₂li₄, qui₂jág₅ dsɨ₂góꞌ₃ dsɨ́₅ léi₄ juëꞌ₂ a₂jmo₅ ꞌéi₂.
14 Jme₁ca₂rë₃ŋi₅ dsa₂ i₂chen₄ quián₅ Jesús i₂tionꞌ₅₄ Jerusalén, a₂ma₂ꞌén₂ dsa₂ chan₂ ꞌuë₃ Samaria jág₁ quióꞌ₅ Diú₄, jaun₂ ca₂chein₃ ja₁jaun₂ Pe₄ quianꞌ₅₄ Juan₅₄.
15 Jme₁ca₂dsi₃lén₂ ꞌéi₂ ꞌuë₃ Samaria, jaun₂ ca₂mɨ₃ ca₂tsɨ́ꞌ₃ Diú₄ o₄quióꞌ₄ dsa₂ i₂ma₂ꞌén₂ ja₁jaun₂, ia₁jaun₂ guen₃ dsa₂ ꞌéi₂ Jme₂dsí₂ Jŋió₅ ján₃.
16 Ia₁ ꞌi₁jan₂ dsa₂ ꞌéi₂ tsá₃ Jme₂dsí₂ Jŋió₅ ma₂guan₅ guë́₄ ne₄ quióꞌ₅. Jŋiaꞌ₅₄ conꞌ₂ ma₂jŋói₂ jmɨg₂ bá₄ liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄ Jesús.
17 Jaun₂ në́₃ Pe₄ quiainꞌ₅₄ Juan₅₄ qui₂ca₂quiog₂ gu₂ ne₄ quióꞌ₅ dsa₂ ꞌéi₂, jaun₂ guë́₄ ca₂guein₃ Jme₂dsí₂ Jŋió₅.
18 Jme₁ca₂jág₃ Si₂mu₅₄ a₂ca₂sión₃ Jme₂dsí₂ Jŋió₅ jme₁ca₂quiog₂ dsa₂ i₂chen₄ ꞌéi₂ gu₂ ne₄ quióꞌ₅ dsa₂, jaun₂ ca₂jenꞌ₂ cu₄,
19 ca₂juáꞌ₂:
―Cuë₄ jniá₂ ján₃ juɨ₁liaꞌ₂ bí₂ a₂tɨnꞌ₂ ꞌniaꞌ₂ në₅, ia₁jaun₂ lé₂ le₃jmo₅₄ jniá₂ ján₃ a₂guen₃ dsa₂ Jme₂dsí₂ Jŋió₅ jë₁ma₂ca₂co₃ gu₃ ne₄ quióꞌ₅ chi₂juaꞌ₂ ꞌein₂.
20 Jaun₂ ca₂ŋag₃ Pe₄ ca₂tsɨ́ꞌ₃ dsa₂ ꞌéi₂:
―Juɨ₁dsi₂ꞌéngꞌ₂ co₂dsia₅ quianꞌ₅₄ cúꞌ₂ ia₁ ꞌe₂ lë₃ dsɨ₂jiog₅ ꞌauꞌ₂ le₂në₅, a₂lɨ́ngꞌ₂ a₂lé₂ lá₃ dsa₂ quianꞌ₅₄ cu₄ bí₂ a₂cuë₅ Diú₄.
21 Tsá₃ ca₂tɨ́nꞌ₂ ꞌne₂ a₂në₅, ia₁ tsá₃ dse₃ ꞌei₅ ꞌauꞌ₂ ne₄ Diú₄.
22 Co₂dsia₅ tí₃ ca₂le₃jë́₃ a₂ꞌlɨgꞌ₅₄ a₂dsɨ₂jiog₅ ꞌauꞌ₂ në₅. Mɨ₄ ne₄ Te₁guiꞌ₅₄ chi₂juaꞌ₂ ꞌéin₂ dsáuꞌ₂ ꞌe₂ lë₃ dsɨ₂jiog₅ ꞌauꞌ₂ le₂në₅.
23 Ia₁ léi₄ jniá₂ rë₂rɨn₅ cosa ꞌlɨgꞌ₅₄ të₂ꞌauꞌ₂; quianꞌ₅₄ dsáuꞌ₂ në₅ jmo₅ chi₁ꞌŋegꞌ₂.
24 Jaun₂ në́₃, ca₂ŋag₃ Si₂mu₅₄:
―Mɨ₄ ꞌniaꞌ₂ cheiꞌ₅₄ Te₁guiꞌ₅₄ o₄quió₃, ia₁jaun₂ tsá₃ juɨ₁dsi₂ŋɨ́g₂ a₂ma₂në₂juaꞌ₅₄ ꞌniaꞌ₂ në₅.
25 Jme₁ca₂dsan₃ jángꞌ₅ Pe₄ quianꞌ₅₄ Juan₅₄ jág₁ dsau₅ a₂dsia₂₃ jág₁ quióꞌ₅ Diú₄, jaun₂ guë́₄ ca₂i₃lein₃ juɨ₅ Jerusalén. Le₂ꞌi₄ juɨ₅ ja₁i₃lein₃ jaun₂, qui₂ca₂ꞌë́₂ guë́₄ jág₁ dse₃ a₂lión₂ dsa₂ le₂tan₅₄ juɨg₂ ja₁tén₄ ꞌuë₃ Samaria.
Fe₂li₄ quiainꞌ₅₄ dsa₂ chan₂ Etiopía
26 Cang₂ jaun₂, ca₂juáꞌ₂ jan₂ ángel quián₅ Te₁guiꞌ₅₄ ca₂tsɨ́ꞌ₃ Fe₂li₄:
―Nau₂, gua₂ juɨ₅ ja₁ꞌuɨn₂ dsa₂ Jerusalén a₂dsióg₄ ꞌuë₃ Gaza.
Juɨ₅ jaun₂ dsó₅ jë₄ ꞌuë₃ quein₂.
27 Jaun₂ ca₂nau₂ Fe₂li₄ ca₂ŋó₃. Le₂ꞌi₄ juɨ₅ ja₁ŋó₃ jaun₂, ca₂jeinꞌ₂ jan₂ dsa₂ chan₂ Etiopía, i₂jme₁lɨ́n₄ jan₂ dsa₂ eunuco*, dsa₂ dsen₅₄ i₂niog₅ gu₂ cu₄ quióꞌ₅ ꞌio₅₄ Candace i₂gon₂ ꞌuë₃ Etiopía. Dsa₂ ꞌéi₂ ŋei₅₄ i₁chi₂i₁leinꞌ₄ Diú₄ juɨg₂ Jerusalén.
28 Ma₂ꞌein₅₄ juɨ₅ ŋáiꞌ₄ juɨg₂ go₅₄ guá₅ ne₄ carroza quióꞌ₅, ꞌɨ₂₃ Si₂ quióꞌ₅ Isaías i₂jme₁ꞌë́₂ jág₁ quióꞌ₅ Diú₄ ma₂lɨ́gꞌ₂.
29 Jaun₂ ca₂juáꞌ₂ Jme₂dsí₂ quián₅ Diú₄ ca₂tsɨ́ꞌ₃ Fe₂li₄:
―Gua₂ le₃jénꞌ₃ cau₅ carro në₅.
30 Ca₂dsióg₃ Fe₂li₄ cau₅, jaun₂ ca₂nág₂ i₁ꞌɨ₅ dsa₂ ꞌéi₂ Si₂ quióꞌ₅ Isaías. Jaun₂ ca₂ŋag₃ Fe₂li₄:
―¿ꞌŊɨ́gꞌ₂ ꞌe₂ juáꞌ₂ si₂ a₂ꞌɨꞌ₂?
31 Jaun₂ ca₂ŋag₃ táng₃ dsa₂ ꞌéi₂:
―¿ꞌA₂ bá₄ liaꞌ₂ le₃ŋɨ́ꞌ₂ jniá₂? Tsá₃ guëꞌ₂ ꞌein₂ chan₂ i₂juáꞌ₂ ꞌe₂ jein₅ jág₁ a₂juáꞌ₂ si₂ la₂.
Jaun₂ ca₂tsɨ́ꞌ₃ Fe₂li₄ a₂uɨ́g₂ ꞌéi₂ gueiꞌ₅₄ a₂guá₃ co₂lë₅ quiongꞌ₅₄.
32 Jme₁ꞌɨ₅ dsa₂ ꞌéi₂ Si₂ quióꞌ₅ Diú₄ ja₁juáꞌ₂ le₂la₂:
Ca₂jiog₃ dsa₂ i₁jŋagꞌ₂ juɨ₁liaꞌ₂ jŋɨꞌ₅ dsa₂ jáꞌ₂ chaꞌ₂*.
Ján₃ guëꞌ₂ juɨ₁liaꞌ₂ tsá₃ guióꞌ₅ guein₂ jáꞌ₂ chaꞌ₂
të₁liaꞌ₂ chéi₅ dsa₂ jŋí₁,
ján₃ bá₄ le₂jaun₂ tsá₃ ꞌe₂ ca₂juáꞌ₂ i₂ꞌéi₂.
33 Ca₂cuë₃ dsa₂ o₂guíꞌ₃,
tsá₃ ꞌéiꞌ₃ rë₂ ca₂të₁dsɨ₅₄ quióꞌ₅;
chiꞌ₂ tsɨ₁jon₂ quiáin₅ guëꞌ₂ në́₃,
¿ꞌein₂ bá₄ lé₂ le₃dsia₃ ꞌɨin₃ chiꞌ₂ dsio₅₄?
tonꞌ₂ ca₂jŋiógꞌ₂ bá₄ guëꞌ₂ dsa₂
ne₄ guaꞌ₅₄ ꞌuë₃ la₂.b
34 Jaun₂ ca₂juáꞌ₂ dsa₂ dsen₅₄ ꞌéi₂ ca₂tsɨ́ꞌ₃ Fe₂li₄:
―Jmo₄ dse₃ ꞌauꞌ₂, juaꞌ₅₄ ꞌe₂ jein₅ jág₁ a₂juáꞌ₂ si₂ la₂. ¿ꞌEin₂ ꞌɨn₅ dsa₂ quián₅ Diú₄ i₂ca₂jmo₃ si₂ la₂? ¿A₂ꞌɨin₂₃ ꞌŋiog₅, o₃ a₂ꞌɨin₂₃ i₂siánꞌ₂ ꞌe₂?
35 Jaun₂ ca₂jme₃lióg₃ Fe₂li₄ ca₂juáꞌ₂ ꞌe₂ juáꞌ₂ ne₄ Si₂ ja₁jme₁ꞌɨ₅ dsa₂ dsen₅₄ ꞌéi₂, qui₂ca₂cuë₃ jág₁ dse₃ ꞌɨin₂₃ Jesús.
36 Jme₁ca₂dsi₃léin₂ caun₂ ja₁cha₂ jmɨg₂, jaun₂ ca₂juáꞌ₂ dsa₂ dsen₅₄ ꞌéi₂ ca₂tsɨ́ꞌ₃ Fe₂li₄:
―Cha₂ jmɨg₂ ja₁lá₃. ¿Cha₁ ꞌe₂ lë₃ juaꞌ₅₄ tsá₃ lé₂ tsón₄ jniá₂ jmɨg₂?
37 Jaun₂ ca₂juáꞌ₂ Fe₂li₄:
―Chi₂juaꞌ₂ ꞌéngꞌ₂ dsónꞌ₂ ca₂le₃jë́₃ ꞌauꞌ₂, lé₂ bá₄.
Jaun₂ ca₂ŋag₃ táng₃ dsa₂:
―ꞌÉn₂ bá₄ jniá₂ a₂lɨ́n₅ Jesucristo Ja₁ŋiꞌ₅₄ Diú₄.c
38 Jaun₂ ca₂jmo₃ ꞌéiꞌ₃ ca₂jŋia₃ carroza quióꞌ₅. Jaun₂ ca₂sióin₃ le₂oin₃ cheiꞌ₅₄ jmɨg₂, jaun₂ ca₂cho₃ Fe₂li₄ jmɨg₂d quióꞌ₅ dsa₂ ꞌéi₂.
39 Jme₁ca₂ꞌuɨin₂ jmɨg₂, jaun₂ Jme₂dsí₂ quián₅ Te₁guiꞌ₅₄ ca₂tág₃ Fe₂li₄, jaun₂ dsɨ₂tan₅₄ ꞌéi₂ tsá₃ ma₃ca₂jág₂ meiꞌ₂. La₁ ꞌioꞌ₂ bá₄ jmo₂₃ le₂ꞌi₄ juɨ₅ ja₁ŋáiꞌ₄.
40 Fe₂li₄ në́₃ ma₂ꞌein₅₄ caun₂ juɨg₂ ja₁chei₂ Azoto, jaun₂ le₂tan₅₄ guë́₄ juɨg₂ te₁ꞌi₁ ja₁jaun₂ ca₂ŋei₅₄ qui₂ca₂ꞌë́₂ jág₁ dse₃ a₂lión₂ dsa₂, ca₂liaꞌ₂ ca₂dsióg₃ ca₂të₂ juɨg₂ Cesarea.