Jág₁ ca₂ton₃ Esteban
7
Jaun₂ ca₂ŋag₃ jme₂dsa₂ dsen₅₄ ca₂ŋɨ́iꞌ₃ Té₂:
―¿Dsónꞌ₂ dsau₅ ca₂le₃jë́₃ a₂juáꞌ₂ dsa₂ në₅?
2 Jaun₂ ca₂ŋag₃ ꞌéi₂:
―Rɨnꞌ₅₄ jniog₄, ꞌniaꞌ₂ dsa₂ canꞌ₅₄ quián₂ në́₃, nei₂ ꞌniaꞌ₂ a₂juáꞌ₄ jniá₂ la₂. Diú₄ ꞌuanꞌ₂ quián₂ jniog₄ ca₂jme₃jniai₂₃ ne₄ jmei₂ jniog₄ Abraham liaꞌ₂ conꞌ₂ jme₁ꞌein₅₄ ꞌuë₃ Mesopotamia néꞌ₃ a₂dsɨ₃guá₃ juɨg₂ Harán.
3 Jaun₂ ca₂juáꞌ₂ Diú₄: “Tí₃ ꞌuë₃ quiángꞌ₂, tén₃ ca₂le₃jɨ́n₃ o₁rɨ́ngꞌ₂, gua₂ juɨ₅ ꞌuë₃ ja₁i₁ꞌë₃ jniá₂.”a
4 ꞌJaun₂ ca₂ŋó₃ Abraham ca₂o₃ꞌɨ́in₃ ꞌuë₃ Caldea jaun₂, ca₂i₁gua₂ juɨg₂ Harán. Cang₂ jaun₂ ca₂jon₃ bá₄ jmei₂. Jaun₂ Diú₄ bá₄ ca₂o₃jŋia₃ Abraham ꞌuë₃ la₂ ja₁tiánꞌ₄ ꞌniaꞌ₂ rë₂në́₃.
5 La₁ tsá₃ juaꞌ₅₄ ꞌe₂ ca₂cuë₃ Diú₄ ꞌuë₃ la₂, on₃ guëꞌ₂ ja₁chiꞌ₃ caun₂ tag₅₄ juaꞌ₅₄ ca₂cuë₃. La₁ ca₂cuë₃ bá₄ Diú₄ jág₁ quióꞌ₅ a₂cuë₃ ꞌuë₃ la₂, a₂jmo₃ le₃cha₂ quióꞌ₅ chiꞌ₂ quián₅ bá₄ Abraham jë₁ma₂join₂₃, o₁jŋiaꞌ₅₄ guëꞌ₂ jmɨg₄ jaun₂ tsá₃ chiꞌ₂ quián₅ Abraham jme₁chan₂ ꞌi₁jan₂.
6 Jaun₂ ca₂juáꞌ₂ Diú₄ ján₃, ca₂le₃jɨ́n₃ chiꞌ₂ dsio₄ Abraham tiainꞌ₃ juɨ₁liaꞌ₂ ja₁tiánꞌ₄ dsɨ₂nau₂ caun₂ ꞌuë₃ a₂tsá₃ cuɨ́ꞌ₅, qui₃ŋág₃ uɨg₅ conꞌ₂ quén₂ ꞌŋiá₂-láu₂ ŋi₂ a₂lë₁jmo₃ ta₁ jme₂ti₃ ta₁ ne₄ dsa₂.
7 La₁ ján₃ bá₄ ca₂juáꞌ₂ Diú₄ ca₂tsɨ́ꞌ₃ Abraham: “Jniá₂ bá₄ ꞌë́₄ uɨg₅ ne₄ juɨg₂ i₂jmáꞌ₂ dsa₂ quiáng₃ i₂tionꞌ₅₄ i₂lë₁jme₂ti₃ ta₁ ne₅₄. Cang₂ jaun₂ guion₅₄ dsa₂ juɨg₂ quiáng₃ ꞌuɨ́in₃ juɨg₂ jaun₂, jaun₂ ja₃léin₂ jme₃ti₃ ta₁ ne₃ ja₁lá₃.”b
8 Ján₃ bá₄ ca₂jmo₃ Diú₄ caun₂ jág₁ quianꞌ₅₄ Abraham, a₂ti₃ nɨ₁lo₁* ta₁jɨn₂ chiꞌ₂ dsa₂ ŋeꞌ₂ tsɨ₁jon₂ quiáin₅, a₂lɨꞌ₅₄ jág₁ a₂të₃ron₅₄. ꞌUɨg₅₄ jaun₂, jme₁ca₂rë₃chán₃ ja₁ŋiꞌ₅₄ i₂ca₂rë₃chén₃ Isaac, ca₂ti₃ Abraham nɨ₁lo₁ Isaac jme₁ma₂ꞌein₅₄ jŋia₃ jmɨg₄. Ján₃ bá₄ le₂jaun₂ ca₂jmo₃ Isaac quianꞌ₅₄ Jacob ja₁ŋiꞌ₅₄. Ján₃ bá₄ le₂jaun₂ ca₂jmo₃ Jacob quianꞌ₅₄ ta₁guia₃-tɨ́n₂ ja₁ŋiꞌ₅₄ i₂ca₂lɨn₃ jmei₂ ta₁guia₃-tɨ́n₂ juɨg₂ ja₁tén₄ Israel.
9 ꞌCa₂le₃jɨ́n₃ chiꞌ₂ ja₁ŋiꞌ₅₄ Jacob i₂jme₁lɨ́n₄ jmei₂ jniog₄ ma₂lɨ́gꞌ₂ ꞌéi₂, ca₂i₃uɨg₅₄ dsɨ́₅ jɨ́in₂ Së́₄ rɨinꞌ₅₄. Jaun₂ ca₂ꞌnɨi₃ ꞌéi₂ jaun₂ ca₂tág₃ dsa₂ ca₂të₂ ꞌuë₃ Egipto. La₁ Diú₄ bá₄ ca₂jmo₃ ꞌí₁ quióꞌ₅ Së́₄,
10 qui₂ca₂lió₂ ca₂le₃jë́₃ ꞌe₂ ca₂i₃ŋɨ́i₂ ca₂jmo₃ ca₂rë₃ŋɨ́ꞌ₂ dsɨ́₅ ꞌŋio₅ lɨn₃. Ján₃ bá₄ ca₂jmo₃ Diú₄ a₂chéinꞌ₅ dse₃ quiainꞌ₅₄ i₂të́ꞌ₂ dsa₂ Faraón, i₂lɨ́n₅ rag₅₄ quián₅ ꞌuë₃ Egipto. Rag₅₄ ꞌéi₂ ca₂ꞌɨin₃ Së́₄ a₂léin₂ dsi₄máꞌ₂ ꞌuë₃ Egipto. Ján₃ bá₄ ca₂jmo₃ a₂nio₃ ne₄ ꞌéi₂ dsi₂néi₂ quióꞌ₅.
11 ꞌCang₂ jaun₂ ca₂gua₃ ŋi₂ a₂ca₂ŋág₃ uɨg₅ ꞌŋio₅ lɨn₃ a₂ca₂rë₃ꞌɨ́n₃ a₂guë́ꞌ₃ dsa₂ ta₁caun₂ ꞌuë₃ Egipto quianꞌ₅₄ ꞌuë₃ Canaꞌán. Jaun₂ ca₂le₃jɨ́n₃ jmei₂ jniog₄ ma₂lɨ́gꞌ₂ tsá₃ ma₃ꞌe₂ jnioꞌ₂ a₂guë́ꞌ₃.
12 Jme₁ca₂rë₃ŋi₅ Jacob a₂cha₂ trigo ꞌuë₃ Egipto, jaun₂ ca₂chein₃ chiꞌ₂ ja₁ŋiꞌ₅₄ ja₁jaun₂, i₂ca₂lɨn₃ jmei₂ jniog₄ ma₂lɨ́gꞌ₂. A₂jaun₂ guë́₄ le₂ꞌuɨg₅₄ ca₂i₁lein₅₄.
13 Jme₁ca₂të́₂ tɨn₃ ráun₂ i₁len₅₄ rɨnꞌ₅₄ Së́₄ ꞌuë₃ Egipto, jaun₂ ca₂jmo₃ Së́₄ a₂ca₂rë₃ŋi₅ a₂lë́₅ rɨinꞌ₅₄ dsa₂ ꞌéi₂. Jaun₂ guë́₄ ca₂rë₃ŋi₅ rag₅₄ quián₅ Egipto ꞌe₂ tsɨ₁jon₂ lɨ́n₅ Së́₄.
14 Jaun₂ guë́₄ ca₂tsɨ́ꞌ₃ Së́₄ dsó₂ rɨinꞌ₅₄ a₂dsɨ₃quiáin₂ guiꞌ₅₄ Jacob jmei₂, quianꞌ₅₄ ca₂le₃jɨ́n₃ o₁rɨinꞌ₅₄ i₂jme₁lë́₂ ꞌnagꞌ₂ ne₂guióg₂ rë₂dsɨ́₂ guia₃-ꞌŋiá₂ (75) dsa₂.
15 Le₂jaun₂ ca₂lë₃ a₂ca₂ŋó₃ Jacob ca₂i₁gua₂ ꞌuë₃ Egipto. Ja₁jaun₂ ca₂join₃ cang₂ jaun₂. Jaun₂ ja₁jaun₂ bá₄ qui₂ca₂dsan₃ chiꞌ₂ quiáin₅ i₂ꞌnióꞌ₄ jmei₂ jniog₄ ma₂lɨ́gꞌ₂.
16 Nɨ₁mu₁₂ ca₂o₃con₃ dsa₂ cang₂ jaun₂ ja₁chei₂ Siquem. Ca₂o₃ꞌó₃ tau₂ ꞌŋio₅ a₂ca₂lá₃ Abraham quióꞌ₅ tsɨ₁jon₂ chiꞌ₂ quián₅ Hamor ja₁chei₂ Siquem jaun₂, quianꞌ₅₄ caun₂ ꞌmaꞌ₅₄ a₂ca₂lɨ́ꞌ₃.
17 ꞌJme₁ja₂quián₃ jmɨg₄ le₃ti₃ jág₁ ca₂cuë₃ Diú₄ ꞌɨin₂₃ ꞌŋiog₅ ca₂cuë́ꞌ₃ Abraham, ca₂i₃juɨ́n₂ ꞌŋio₅ lɨn₃ dsa₂ israelitas ꞌuë₃ Egipto.
18 Jaun₂ ca₂guá₂ jan₂ rag₅₄ i₂tsá₃ cuɨn₅ Së́₄, ca₂jme₃lióg₃ jmo₂₃ ꞌéiꞌ₃ ꞌuë₃ Egipto.
19 Rag₅₄ ꞌéi₂ ca₂jme₃gain₂₃ dsa₂ go₄ jniog₄, ca₂jmáiꞌ₂ dsa₂ canꞌ₅₄ quián₂ jniog₄ ca₂jmo₃ ꞌéi₂ tion₅₄ a₂téin₂ guein₂ dsa₂ ŋeꞌ₂ i₂të₂ca₂rë₃chán₃, ia₁jaun₂ dsiáin₃.
20 ꞌJmɨg₄ jaun₂ ca₂rë₃chán₃ Moisés. Guein₂ ꞌéi₂ ca₂të́₂ dsɨ́₅ Diú₄, jaun₂ ca₂jme₃juagꞌ₂ chog₅₄-jmei₂ ꞌnɨ₅ tsɨꞌ₂ dsi₂néi₂ quióꞌ₅.
21 Jme₁ca₂të́₂ jmɨg₄ a₂tóin₂ guein₂ ꞌéi₂, jaun₂ ja₁mɨ́g₄ ꞌŋiog₅ rag₅₄ quián₅ Egipto ca₂tág₃ ca₂jme₃juagꞌ₂ co₂ꞌnióꞌ₄ ja₁ŋiꞌ₅₄ ꞌŋiog₅.
22 ꞌUɨg₅₄ jaun₂, ca₂rë₃tɨ́n₃ Moisés ca₂le₃jë́₃ a₂ŋi₅ dsa₂ chan₂ Egipto, jaun₂ ca₂rë₃ꞌuáinꞌ₃, ꞌŋio₅ lɨn₃ ŋi₅ ꞌe₂ jág₁ dsia₃, ŋi₅ a₂ca₂jmo₃ në́₃.
23 ꞌJme₁ma₂ꞌein₅₄ të₂láu₃ ŋi₂, jaun₂ ca₂ŋe₄ Moisés ca₂i₁jɨin₁₂ dsa₂ go₅₄ dsa₂ israelitas*.
24 Ja₁jaun₂ ca₂jɨ́in₂ jan₂ dsa₂ chan₂ Egipto jmáiꞌ₂ uɨg₅ cuë́ꞌ₅ jan₂ dsa₂ go₅₄. Jaun₂ ca₂nau₂ Moisés ꞌnei₂ quiainꞌ₅₄ i₂cuë́ꞌ₅ rɨinꞌ₅₄, ca₂jŋɨiꞌ₃ dsa₂ ꞌéi₂, ca₂lióin₂ dsa₂ go₅₄.
25 Ia₁ ca₂i₃jiog₅ dsɨ́₅ jaun₂ le₃líꞌ₄ dsa₂ israelitas rɨinꞌ₅₄, a₂jmo₃ Diú₄ lió₂ të₂le₃ quianꞌ₅₄ ꞌéi₂. La₁ tsá₃ ca₂rë₃líꞌ₄ guëꞌ₂ dsa₂.
26 Jme₁jnia₃ jaun₂, ca₂jenꞌ₂ Moisés on₃ dsa₂ israelitas i₁tionꞌ₅₄ quɨ́nꞌ₂. Jaun₂ jme₁ꞌnio₃ Moisés dsioin₃ mɨꞌ₅₄. Jaun₂ ca₂juáꞌ₂: “Rɨ́nꞌ₂ bá₄ ꞌniaꞌ₂. ¿ꞌE₂ lë₃ qui₂jmaꞌ₅₄ ꞌniaꞌ₂ uɨg₅ le₂jangꞌ₂ le₂jangꞌ₂?”
27 ꞌJaun₂ i₂jme₁ꞌen₅₄ cuë́ꞌ₅ rɨnꞌ₅₄ ca₂ꞌliainꞌ₃ Moisés cau₅, jaun₂ ca₂juáꞌ₂: “¿ꞌEin₂ ca₂cuë́ꞌ₃ ꞌne₂ ta₁ lɨ́ngꞌ₅ dsɨ₂tan₅₄ i₂qui₂dsɨ₅ ꞌéiꞌ₃ ja₁con₂ jniaꞌ₅₄?
28 ¿ꞌNiogꞌ₂ jŋágꞌ₄ jniá₂ ján₃ juɨ₁liaꞌ₂ ca₂jŋɨ́gꞌ₃ dsióg₂ dsa₂ chan₂ Egipto ꞌéi₂?”c
29 Jme₁ca₂nág₂ Moisés le₂në₅, co₂tan₅₄ ca₂cuɨng₃ ca₂ŋó₃ juɨ₅ ꞌuë₃ ja₁chei₂ Madián. Ja₁jaun₂ ca₂i₁gua₂ co₂ꞌnióꞌ₄ a₂lɨ́in₅ dsɨ₂nau₂. Ja₁jaun₂ ca₂rë₃chán₃ on₃ chiꞌ₂ quiáin₅.
30 ꞌTë₂láu₃ ŋi₂ cang₂ jaun₂, caun₂ ja₁lë́₄ ꞌuë₃ quein₂ quián₅ máꞌ₂ ja₁chei₂ Sinaí, ja₁jaun₂ ca₂jme₃jnia₅ jan₂ ángel jë₄ si₂ chi₁guíꞌ₂ caun₂ nɨ₁ꞌma₂ taun₅ a₂cau₂.
31 Jaun₂ ca₂i₃góꞌ₃ dsɨ́₅ Moisés jme₁ca₂jág₃ a₂në₅, jaun₂ jme₁ca₂jme₃quiáin₃ guë́₄ ia₁ ꞌnio₃ jme₁jág₃ guë́₄ dse₃. Të₃jë₄ ŋó₃ jaun₂ jme₁ca₂nág₂ jág₁ quióꞌ₅ Te₁guiꞌ₅₄ a₂ca₂juáꞌ₂:
32 “Jniá₂ bá₄ lɨ́ng₅ Diú₄ quián₅ dsa₂ quiángꞌ₂ ma₂lɨ́gꞌ₂, Diú₄ quián₅ Abraham, quián₅ Isaac, quián₅ Jacob në́₃.”d Jaun₂ ca₂jme₃lióg₃ ca₂jlen₃ Moisés ca₂rë₃góꞌ₅ ꞌŋio₅ lɨn₃, tsá₃ ma₃tiá₂ dsɨ́₅ jág₃.
33 ꞌJaun₂ ca₂juáꞌ₂ táng₃ Te₁guiꞌ₅₄: “Jŋiáꞌ₃ lau₂ ton₅ tagꞌ₅₄, ia₁ ꞌuë₃ jŋió₅ bá₄ ja₁chéngꞌ₄ në₅.
34 Jág₅ bá₄ jniá₂ a₂chan₂ uɨg₅ dsa₂ quiáng₃ ꞌuë₃ Egipto, qui₂nag₅ bá₄ jniá₂ a₂quɨꞌ₂-ꞌo₂₃. Jaun₂ lë₃ ca₂sióng₃ ia₁ a₂loin₅₄. Ŋia₅, ia₁jaun₂ tsag₅₄ jniá₂ guangꞌ₅₄ juɨ₅ Egipto”.e
35 ꞌO₁jŋiaꞌ₅₄ la₂ tsá₃ jme₁ꞌnio₃ dsa₂ go₄ Moisés le₂jŋiá₅, ia₁ ca₂juáꞌ₂: “¿ꞌEin₂ ca₂ꞌɨn₃ ꞌne₂ a₂lɨ́ngꞌ₅ dsɨ₂tan₅₄ i₂qui₂dsɨ₅ ꞌéiꞌ₃ ja₁con₂ jniaꞌ₅₄?” la₁ Diú₄ në́₃ ca₂chein₃ Moisés a₂lɨ́in₅ co₂ꞌnióꞌ₄ dsɨ₂tan₅₄ i₂lió₂, të₂le₃ quianꞌ₅₄ ángel i₂ca₂jme₃jnia₅ jë₄ nɨ₁ꞌma₂ taun₅ jaun₂.
36 Moisés bá₄ dsa₂ i₂ca₂ꞌuɨ́nꞌ₂ dsa₂ canꞌ₅₄ quián₂ jniog₄ ma₂lɨ́gꞌ₂ ꞌuë₃ Egipto i₂qui₂ca₂jmo₃ ján₃ ꞌlióng₂ léi₄ juëꞌ₂ a₂dsɨ₂góꞌ₃ dsɨ₅ në́₃. Léi₄ jaun₂ ca₂jmo₃ Moisés ꞌuë₃ jaun₂, quianꞌ₅₄ ne₄ Jmɨ₁ŋíꞌ₄ Guéin₂,f quianꞌ₅₄ ꞌuë₃ quein₂ co₂ꞌŋiog₅ ja₁ca₂i₁nioi₁₂ të₂láu₃ ŋi₂.
37 Jaun₂ ꞌŋiog₅ Moisés ꞌéi₂ bá₄ ca₂tsɨ́ꞌ₃ dsa₂ israelitas: “A₂chen₃ Diú₄ jan₂ dsa₂ i₂ꞌë́₂ jág₁ quiáin₅, i₂lɨ́n₅ dsa₂ goꞌ₄ ꞌniaꞌ₂ guiongꞌ₅₄, juɨ₁liaꞌ₂ ca₂chei₃ jniá₂. Jaun₂ tónꞌ₂ ꞌniaꞌ₂ juɨ₅ jág₁ quióꞌ₅ ꞌéi₂.”g
38 Ján₃ bá₄ Moisés ꞌéi₂ jme₁ꞌen₅₄ quianꞌ₅₄ dsa₂ juɨg₂ ꞌuë₃ quein₂ co₂ꞌŋiog₅ jaun₂. Jme₁ꞌein₅₄ quianꞌ₅₄ ángel i₂ca₂juáꞌ₂ jág₁ máꞌ₂ Sinaí. Ján₃ bá₄ jme₁ꞌein₅₄ quianꞌ₅₄ ꞌlag₄ tsɨ₁jon₂ jmei₂ jniog₄. Moisés ꞌéi₂ bá₄ ján₃ i₂ca₂gue₃ jág₁ caꞌ₅₄, jaun₂ guë́₄ ca₂ŋág₃ të₂le₃ quián₂ jniog₄ táng₃.
39 ꞌLa₁ dsa₂ quián₂ jniog₄ ma₂lɨ́gꞌ₂ në́₃, tsá₃ ma₃ca₂jme₃ti₃, tsá₃ ma₃ca₂nág₂ gau₂ jág₁ quióꞌ₅ Moisés. Ca₂cheiꞌ₃ cau₅, jme₁ꞌnio₃ jme₁dsɨ₃lein₃ táng₃ juɨ₅ ꞌuë₃ Egipto.
40 Jaun₂ në́₃ ca₂tsɨ́ꞌ₃ Aarónh ca₂juáꞌ₂: “ꞌNiog₂ jniaꞌ₅₄ jmogꞌ₅₄ diú₄ dsa₂ lag₄ i₂dsɨ₃lén₂ ne₄ juɨ₅ quián₂ jniog₄. Ia₁ tsá₃ ne₄ ꞌe₂ ca₂jénꞌ₃ Moisés ꞌéi₂ i₂ca₂ꞌuágꞌ₂ jniog₄ ꞌuë₃ Egipto.”i
41 Jaun₂ ca₂jmóiꞌ₂ jan₂ guein₂ ca₁juɨ₅ co₂ꞌnióꞌ₄ i₂lɨ́n₅ diú₄, qui₂ca₂jme₃dsiain₂₃ jáꞌ₂ quiáin₅ qui₂ca₂cuɨin₃ diú₄ lag₄ ꞌéi₂. Jaun₂ ca₂jmo₃ ꞌioꞌ₂ quianꞌ₅₄ a₂ca₂jmo₃ quianꞌ₅₄ gu₂ guioin₅₄.
42 Jaun₂ co₂ŋeiꞌ₅₄ ca₂jmo₃ Diú₄ cau₅, tsá₃ ma₃ca₂jme₃quiainꞌ₅₄ dsa₂ ꞌéi₂, juɨ₁jmo₁₂ bá₄ conꞌ₂ tɨin₂ guioin₅₄. Jaun₂ ca₂jme₃lióg₃ dsa₂ ꞌéi₂ ca₂chi₂ca₂léinꞌ₂ nei₅ a₂le₁ꞌág₄j gueiꞌ₅₄. Ia₁ le₂në₅ rë₂ton₅ ne₄ Si₂ a₂ca₂jmo₃ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂:
ꞌNiaꞌ₂ dsa₂ chan₂ Israel, ¿ꞌe₂ lɨ́nꞌ₂ ꞌniaꞌ₂?
¿Ca₂jme₁dsianꞌ₅ ꞌniaꞌ₂ jáꞌ₂
ca₂dsiaꞌ₅₄ ca₂jenꞌ₅₄ ꞌniaꞌ₂ ne₃ jniá₂
liaꞌ₂ conꞌ₂ jme₁quianꞌ₅₄ jniá₂ ꞌniaꞌ₂
të₂láu₃ ŋi₂ ꞌuë₃ quein₂ co₂ꞌŋiog₅ jaun₂?
43 On₃juaꞌ₅₄ le₂jaun₂.
Ia₁ guáꞌ₅ chéi₂ quióꞌ₅ diú₄ Moloc bá₄ ca₂quianꞌ₂ ꞌniaꞌ₂
quianꞌ₅₄ nei₅ diú₄ Renfán,k
nióꞌ₄ a₂qui₂ca₂jmoꞌ₅₄ ꞌniaꞌ₂ guiongꞌ₅₄,
a₂jaun₂ bá₄ ca₂chi₂ca₂lenꞌ₄ ꞌniaꞌ₂.
ꞌUɨg₅₄ jaun₂, ꞌuɨ́nꞌ₄ jniá₂ ꞌniaꞌ₂ ꞌuë₃ quiángꞌ₂,
tsag₅₄ jniá₂ të₂le₃ ó₃ guë́₄ ja₁niog₅ ꞌuë₃ Babilonia.l
44 ꞌꞌUë₃ quein₂ jaun₂, dsa₂ canꞌ₅₄ quián₂ jniog₄ ma₂lɨ́gꞌ₂ jme₁quian₅ guáꞌ₅ tabernáculo* ja₁jme₁rë₂ꞌma₄ nɨ₁cang₁ a₂le₁ton₅ ta₁guia₃ ꞌÉiꞌ₃ Juáꞌ₅. Guáꞌ₅ tabernáculo jaun₂ ca₂lë₃ conꞌ₂ lë́₅ jág₁ ca₂cuë₃ Diú₄ ca₂cuë́ꞌ₃ Moisés, jme₁ca₂ꞌë₃ Diú₄ nióꞌ₄ le₂jŋiá₅ ꞌa₂ liaꞌ₂ lé₂.
45 Dsa₂ quián₂ jniog₄ ma₂lɨ́gꞌ₂ ca₂gue₃ guáꞌ₅ jaun₂ co₂ꞌnióꞌ₄ ca₂ŋág₃ dsa₂ canꞌ₅₄ quiáin₅. Jaun₂ dsa₂ i₂jme₁quianꞌ₅₄ Josué në́₃ ca₂cáun₃ liaꞌ₂ conꞌ₂ jme₁ca₂lɨ́ꞌ₃ ꞌuë₃ quióꞌ₅ dsa₂ juɨg₂ siáꞌ₂, i₂ca₂ꞌuɨ́nꞌ₂ Diú₄ ia₁jaun₂ cha₂ ja₁tianꞌ₃ ꞌéi₂. Le₂jaun₂ ca₂lë₃ ca₂liaꞌ₂ ca₂të́₂ jmɨg₄ a₂ca₂rë₃chán₃ David.
46 Ca₂jmo₃ Diú₄ dse₃ dsɨ́₅ ja₁con₂ Rag₅₄ David, jaun₂ ꞌéi₂ në́₃ jme₁ꞌnio₃ jmógꞌ₃ caun₂ ja₁guá₃ Diú₄ quián₅ Jacob.
47 La₁ Salomón bá₄ i₂ca₂chiꞌ₃ ꞌné₅ quióꞌ₅ Diú₄.
48 ꞌLa₁ Diú₄ i₂juɨnꞌ₂ guë́₄ lɨn₃ tsá₃ guá₅ dsi₂néi₂ guáꞌ₅ a₂jmógꞌ₅ dsa₂ mɨ₂güɨ́g₃. Juɨ₁liaꞌ₂ ca₂juáꞌ₂ Diú₄ të₂le₃ quianꞌ₅₄ dsa₂ i₂jme₁ꞌë́₂ jág₁ quiáin₅ ma₂lɨ́gꞌ₂:
49 Gueiꞌ₅₄ i₂juɨ́g₃ bá₄ ja₁gua₁₂
ja₁lë́₄ ne₄ta₁ quió₃,
guaꞌ₅₄ ꞌuë₃ në́₃ juɨ₁liaꞌ₂ ja₁tióng₂ tag₃.
¿ꞌE₂ bá₄ ꞌné₅ jmóꞌ₂ ꞌniaꞌ₂ quió₃? juáꞌ₂ Te₁guiꞌ₅₄,
¿O₃ jáꞌ₄ bá₄ lé₂ le₃jan₄ jniá₂?
50 ¿On₁ jniá₂ bá₄ ca₂jmo₃ quianꞌ₅₄ gu₃-tag₃
ca₂le₃jë́₃ ꞌe₂ a₂cha₂?m
51 (Jaun₂ caun₂ ca₂juáꞌ₂ bá₄ Té₂ tsɨ́ꞌ₅ dsa₂):
―ꞌNiaꞌ₂ në́₃, liaꞌ₂ ma₂ja₂nóꞌ₅ jaun₂ bá₄ ꞌniaꞌ₂ cang₄ dseiꞌ₂, jaun₂ lë́₅ rë₂guáꞌ₄ ꞌniaꞌ₂ quianꞌ₅₄ të₂ꞌauꞌ₂ juɨ₁liaꞌ₂ dsa₂ i₂tsá₃ cuɨn₅ Diú₄.n Caun₂ ꞌŋiaꞌ₅₄ co₂tan₅₄ bá₄ ꞌniaꞌ₂ Jme₂dsí₂ Jŋió₅. I₂co₂rɨnꞌ₂ bá₄ ꞌniaꞌ₂ quiangꞌ₅₄ dsa₂ canꞌ₅₄ quiángꞌ₂ ma₂lɨ́gꞌ₂.
52 ¿ꞌEin₂ dsa₂ i₂jme₁ꞌë́₂ jág₁ quián₅ Diú₄ juaꞌ₅₄ i₂tsá₃ ca₂jmáꞌ₂ dsa₂ canꞌ₅₄ quiánꞌ₂ ꞌniaꞌ₂ ma₂lɨ́gꞌ₂? Qui₂ca₂jme₃dsiain₂₃ bá₄ dsa₂ i₂qui₂ca₂ꞌë́₂ jág₁ le₂jŋiá₅ ca₂ꞌɨin₃ jan₂ i₂dsen₃ lɨn₃, i₂jiá₃. La₁ jme₁guan₃ i₂ꞌéi₂ në́₃, ca₂jɨinꞌ₅₄ ꞌniaꞌ₂ jaun₂ ca₂jŋɨ́iꞌ₃.
53 ꞌNiaꞌ₂ guëꞌ₂ i₂ca₂gueꞌ₅₄ ꞌÉiꞌ₃ Juáꞌ₅ të₂le₃ quianꞌ₅₄ ángeles, tsá₃ jme₂tíꞌ₁ guëꞌ₂ ꞌniaꞌ₂ ꞌÉiꞌ₃ jaun₂.
Ca₂jon₃ Té₂
54 Jme₁ca₂nág₂ jág₁ a₂ca₂juáꞌ₂ Té₂ jaun₂, ca₂rë₃ꞌnéi₃ ꞌŋio₅ lɨn₃ ca₂liaꞌ₂ qui₂ca₂quɨgꞌ₂ mɨ₂jan₅₄ a₂ꞌŋiai₅₄ Té₂.
55 La₁ Té₂ në́₃, rë₂rɨn₅ Jme₂dsí₂ Jŋió₅ të₂dsɨ́₅, ca₂chógꞌ₃ ne₅₄ gueiꞌ₅₄ i₂juɨ́g₃ jaun₂ ca₂jág₃ a₂co₂tág₅ co₂ꞌnéꞌ₅ quióꞌ₅ Diú₄, jaun₂ ca₂jɨ́in₂ Jesús chéinꞌ₅ të₂le₃ gu₂ ne₁ quióꞌ₅ Diú₄ Jmei₂.
56 Jaun₂ ca₂juáꞌ₂ táng₃ Té₂:
―¡Jag₄! ―juáꞌ₂―. Jág₅ jniá₂ rë₂na₄ gueiꞌ₅₄ i₂juɨ́g₃. Jɨn₄ jniá₂ Jaun₅* dsa₂ mɨ₂güɨ́g₃ ꞌein₅₄ të₂le₃ gu₂ ne₁ quióꞌ₅ Diú₄.
57 La₁ dsa₂ ꞌéi₂ qui₂ca₂jne₃ rë₂gua₅₄, tsá₃ ꞌnio₃ nag₃, qui₂ca₂tóinꞌ₂ co₂mɨꞌ₅₄ ca₂guióꞌ₃ jmáiꞌ₂ Té₂.
58 Jaun₂ ca₂dsei₂₃ ꞌnɨꞌ₂ juɨg₂. Jaun₂ ja₁jaun₂ ca₂jŋagꞌ₃ quianꞌ₅₄ cang₄. Jaun₂ dsa₂ i₂qui₂ca₂jnáuꞌ₂ cang₄ në́₃ ca₂dsia₃ nɨ₁tsɨnꞌ₅₄ o₄gú₃ jan₂ dsó₂ chiꞌ₂ i₂jme₁chen₂ Saulo.
59 Të₁liaꞌ₂ tioinꞌ₅₄ qui₂cuë́ꞌ₅ Té₂ cang₄, jaun₂ ca₂mɨ₃ Té₂ ca₂tsɨ́ꞌ₃ Diú₄ ca₂juáꞌ₂:
―Te₁guiꞌ₅₄ Jesús, guenꞌ₅₄ jme₂dsí₂ quió₃.
60 Jaun₂ guë́₄ ca₂chi₃jné₃, jaun₂ ca₂guióꞌ₃ tiá₂ ca₂juáꞌ₂:
―Te₁guiꞌ₅₄, tsá₃ jme₁cainꞌ₅₄ dso₄ la₂.
Jme₁ca₂lë₃ juáꞌ₂ le₂në₅, ca₂join₃ jaun₂ në́₃.