Ca₂ꞌnaiꞌ₂ guion₃ dsa₂ i₂jme₃ꞌo₅₄a
6
Jmɨg₄ jaun₂ caun₂ dsɨ₂juɨ́n₂ bá₄ dsa₂ i₂ꞌén₂. Jaun₂ dsa₂ i₂dsia₅ jág₁ jmei₅ griego* ca₂jí₂ ca₂tsɨ́ꞌ₃ dsa₂ i₂dsia₅ jág₁ jmei₅ arameo*. Ca₂juáꞌ₂ ꞌɨin₂₃ ꞌio₅₄ ꞌnág₂ chan₂ quiáin₅ tsá₃ lɨn₄ dse₃ jme₁cuë́ꞌ₅ dsa₂ juɨ₁liaꞌ₂ ꞌe₂ má₃ dsióꞌ₅ ca₂le₃jë́₃ jmɨg₄.
2 Jaun₂ ta₁guia₃-tɨ́n₂ dsa₂ i₂chen₄*b quián₅ Jesús ca₂ŋɨ́iꞌ₂ ca₂le₃jɨ́n₃ dsa₂ i₂ꞌén₂, jaun₂ ca₂juáꞌ₂:
―Tsá₃ dse₃ juaꞌ₅₄ a₂tí₅ jniaꞌ₅₄ a₂ꞌë́₄ jniaꞌ₅₄ jág₁ quióꞌ₅ Diú₄ a₂jme₁ti₁ jniaꞌ₅₄ ne₄ mesas a₂dsioꞌ₅₄ jniaꞌ₅₄ má₃.
3 Jaun₂ lë₃ rɨnꞌ₅₄ jniog₄, ꞌɨn₅₄ ꞌniaꞌ₂ guion₃ dsa₂ të₃jɨnꞌ₄ ꞌniaꞌ₂, i₂ꞌei₅ jág₁ a₂ꞌen₅₄ dsɨ́₅, a₂rë₂rɨn₅ Jme₂dsí₂ Jŋió₅ të₂dsɨ́₅, jaun₂ cuëꞌ₅₄ ꞌniaꞌ₂ ta₁ në₅.
4 Jniaꞌ₅₄ guëꞌ₂ caun₂ qui₁chei₅₄ Diú₄, caun₂ qui₂jme₁tɨn₅ jniaꞌ₅₄ dsa₂ jág₁ quióꞌ₅ Diú₄.
5 Jaun₂ ca₂le₃jɨ́n₃ dsa₂ ca₂të́₂ dsɨ́₅ a₂në₅, jaun₂ ca₂quióinꞌ₂ dsa₂ i₂chen₂ Esteban i₂ꞌén₂ ꞌŋio₅ lɨn₃, i₂rë₂rɨn₅ Jme₂dsí₂ Jŋió₅ të₂dsɨ́₅; Fe₂li₄ në́₃, Prócoro, Nicanor, Timón, Parmenas, Nicolás në́₃ i₂lɨ́n₅ jan₂ dsa₂ chan₂ Antioquía i₂jme₁ma₂gue₃ le₂jŋiá₅ ꞌÉiꞌ₃ Juáꞌ₅ quióꞌ₅ dsa₂ judíos.
6 Jaun₂ ca₂o₃jŋia₃ dsa₂ dsa₂ guion₃ i₂ca₂ꞌɨin₃ ꞌéi₂ ja₁tión₂ dsa₂ guia₃-tɨ́n₂, jaun₂ qui₂ca₂quiog₂ gu₂ ne₄ quióꞌ₅ dsa₂ guion₃ ꞌéi₂, ca₂chi₃léinꞌ₂ Diú₄.
7 Jaun₂ caun₂ ca₂i₃ꞌág₃ jág₁ quióꞌ₅ Te₁guiꞌ₅₄ jë₄ juɨg₂ Jerusalén, jaun₂ caun₂ ca₂i₃juɨ́n₂ bá₄ dsa₂ i₂ca₂rë₃ꞌén₂, ca₂të₂ i₂jme₁lɨ́n₄ jme₂dsa₂ quián₅ dsa₂ judíos* ca₂guein₃ jág₁, ca₂rë₃ꞌén₂ juɨn₅.
Ca₂jŋaꞌ₃ dsa₂ Esteban
8 Esteban, dsa₂ i₂ꞌŋio₅ lɨn₃ ma₂cuë₃ Diú₄ juɨ₅bí₂, ma₂jme₂ꞌo₅₄ në́₃, i₂ꞌéi₂ jme₁jmo₂₃ ꞌlióng₂ léi₄ dsɨ₂góꞌ₃ dsɨ₅ jɨn₄ dsa₂ juɨg₂.
9 Jaun₂ i₂lɨn₅₄ dsa₂ quián₅ guáꞌ₅ sinagoga* i₂jme₁të́ꞌ₂ dsa₂ Libertinos*, quiainꞌ₅₄ i₂lɨn₅₄ dsa₂ chan₂ Cirene, i₂lɨn₅₄ i₂chan₂ Alejandría, i₂chan₂ Cilicia, i₂chan₂ juɨg₂ ja₁tén₄ ꞌuë₃ Asia në́₃, ca₂jme₃lióg₃ ca₂tsɨ́in₂ quianꞌ₅₄ Té₂.
10 La₁ tsá₃ ca₂tio₃, ia₁ a₂niog₅ dsi₄ ꞌéi₂, tɨin₂ ꞌa₂ liaꞌ₂ ŋag₃, ia₁ Jme₂dsí₂ Jŋió₅ bá₄ cuë₅ bí₂.
11 Jaun₂ ca₂láin₂ dsa₂ i₂jángꞌ₃ jág₁ të₂jág₁, a₂juáꞌ₂ a₂ma₂nág₂ juáꞌ₂ Té₂ ꞌɨin₂₃ ꞌlɨgꞌ₅₄ Moisés, ꞌɨin₂₃ ꞌlɨgꞌ₅₄ Diú₄ në́₃.
12 Jaun₂ le₂jaun₂ ca₂tóinꞌ₂ co₂mɨꞌ₅₄ jɨn₄ dsa₂ juɨg₂ quianꞌ₅₄ dsɨ₂guiꞌ₅₄ canꞌ₅₄, të₅juáꞌ₅ në́₃, ca₂jmáiꞌ₂ mɨꞌ₅₄ Té₂, ca₂jŋauꞌ₃, ca₂i₁jo₅₄ ne₄ dsɨ₂tan₅₄ quián₅ guáꞌ₅.
13 Jaun₂ ca₂ꞌnaiꞌ₂ ján₃ dsa₂ i₂jmo₃ jág₁ të₂jág₁ a₂ꞌnɨi₃ Té₂. Jaun₂ ca₂juáꞌ₂:
―Dsa₂ në₅ caun₂ qui₂juáꞌ₂ ꞌlɨgꞌ₅₄ ꞌë₂₃ guáꞌ₅ jŋió₅, ꞌë₂₃ ꞌÉiꞌ₃ Juáꞌ₅ në́₃.
14 Ján₃ bá₄ ma₂ca₂néi₁ jniaꞌ₅₄ juáꞌ₂ i₂në₅ a₂ꞌén₂ Jesús chan₂ Nazaret guáꞌ₅ a₂jme₃tsɨ́in₃ tag₄ chíꞌ₅ ca₂quiog₂ Moisés.
15 Jaun₂ dsɨ₂tan₅₄ quiainꞌ₅₄ ca₂le₃jɨ́n₃ guë́₄ dsa₂ i₂jme₁tionꞌ₅₄ le₁ŋɨꞌ₂ ja₁jaun₂, ca₂jɨ́in₂ Té₂, a₂ma₂jniá₂ dsɨ₂ne₄ ꞌéi₂ liaꞌ₂ jniá₂ jan₂ ángel.