Dso₄ a₂ca₂ꞌnáu₂ Ananías quiainꞌ₅₄ Safira
5
La₁ jan₂ dsa₂ siánꞌ₂ i₂jme₁chen₂ Ananías quiainꞌ₅₄ Safira ꞌio₅₄ quiáin₅, ca₂ꞌnag₃ caun₂ ꞌuë₃ quióꞌ₅.
2 Dsa₂ ŋeꞌ₂ ꞌéi₂ ca₂ꞌma₃ ca₂dsio₄ cu₄ jaun₂ ꞌŋiog₅, jaun₂ ca₂dsio₄ bá₄ ca₂i₁cuëꞌ₂ dsa₂ guia₃-tɨ́n₂ i₂chen₄*a quián₅ Jesús, liaꞌ₂ jag₄ bá₄ a₂i₁can₅ ta₁jë₂. Ján₃ bá₄ ŋi₅ ꞌio₅₄ quiáin₅.
3 Jaun₂ ca₂juáꞌ₂ Pe₄ ca₂tsɨ́ꞌ₃ Ananías:
―¿ꞌE₂ lë₃ ca₂ꞌí₃ Satanás të₂ꞌauꞌ₂ jaun₂ jmoꞌ₂ jág₁ të₂jág₁ ne₄ Jme₂dsí₂ Jŋió₅, a₂ca₂ꞌmaꞌ₅₄ ca₂dsio₄ cu₄ a₂ca₂quí₃ dsa₂ ꞌliaꞌ₅₄ ꞌuë₃ quiángꞌ₂?
4 ¿On₁juaꞌ₅₄ quiángꞌ₂ ꞌuë₃ a₂në₂ꞌnagꞌ₅₄? ¿On₁juaꞌ₅₄ quiángꞌ₂ cu₄ jaun₂ në́₃? ¿ꞌE₂ lë₃ ca₂i₃jiog₅ ꞌauꞌ₂ jmóꞌ₂ le₂në₅? Diú₄ bá₄ në₂cheiꞌ₅₄ ꞌne₂ jág₁ të₂jág₁, on₃juaꞌ₅₄ dsa₂ mɨ₂güɨ́g₃.
5 Dsɨ₂juɨ₅ jme₁në₂néi₂ Ananías le₂në₅, ca₂quɨinꞌ₃ ca₂join₃. Jaun₂ ca₂le₃jɨ́n₃ dsa₂ i₂ca₂rë₃ŋi₅ a₂ca₂lë₃ le₂jaun₂ ca₂rë₃góꞌ₅ ꞌŋio₅ lɨn₃.
6 Jaun₂ ca₂o₃lén₂ on₃-ún₂ chiꞌ₂ dsa₂ ŋeꞌ₂, ca₂lio₃ ꞌmɨꞌ₂ nɨ₁ŋɨ₁₂, jaun₂ ca₂i₁ꞌó₄.
7 Tsá₃ jaun₂ ŋi₅ ꞌio₅₄ quián₅ Ananías a₂ca₂lë₃ le₂jaun₂, jaun₂ ca₂dsióg₃ conꞌ₂ ꞌnɨ₅ hora cang₂ jaun₂.
8 Jaun₂ ca₂ŋag₃ Pe₄ ca₂ŋɨ́iꞌ₃ ꞌio₅₄:
―Juaꞌ₅₄ dsónꞌ₂. ¿ꞌMaꞌ₅₄ jaun₂ në₂ꞌnagꞌ₅₄ ꞌniaꞌ₂ ꞌuë₃ conꞌ₂ lë́₅ jág₁ juáꞌ₂ ꞌniaꞌ₂?
Jaun₂ ca₂ŋag₃ ꞌio₅₄:
―Ján₅. ꞌMaꞌ₅₄ jaun₂ dsónꞌ₂ bá₄ i₂ꞌnag₄.
9 Jaun₂ ca₂juáꞌ₂ táng₃ Pe₄:
―¿ꞌE₂ lë₃ në₂jmoꞌ₅₄ ꞌniaꞌ₂ caun₂ jág₁ a₂cángꞌ₄ táu₂ Jme₂dsí₂ quián₅ Te₁guiꞌ₅₄? Ca₁ꞌné₄ në₅ ma₂ja₂len₃ táng₃ dsa₂ i₂ma₃i₁ꞌón₄ dsɨ₂i₂gogꞌ₂. Në₃ guë́₄ të₂ táng₃ ꞌne₂.
10 Dsɨ₂juɨ₅ le₂jaun₂ ca₂quɨnꞌ₃ ꞌio₅₄ ca₂join₃ ja₁chénꞌ₄ Pe₄ jaun₂. Jme₁ca₂i₃tonꞌ₅₄ chiꞌ₂ dsa₂ ŋeꞌ₂ ꞌéi₂, ma₂jon₅ bá₄ ꞌio₅₄, jaun₂ ca₂tág₃ táng₃ jaun₂ ca₂i₁ꞌó₄ cau₅ ja₁rë₂ꞌon₅ dsɨ₂i₂gu₂.
11 Jaun₂ ca₂rë₃góꞌ₅ ꞌŋio₅ lɨn₃ ca₂le₃jɨ́n₃ dsa₂ ꞌén₂ i₂lɨ́n₅ guáꞌ₅, ca₂le₃jɨ́n₃ guë́₄ dsa₂ siánꞌ₂ i₂ca₂rë₃ŋi₅ a₂ca₂lë₃ jaun₂.
ꞌLióng₂ léi₄ juëꞌ₂ a₂dsɨ₂góꞌ₃ dsɨ₅ në́₃, ca₂lë₃
12 Quianꞌ₅₄ bí₂ quióꞌ₅ Diú₄ ca₂jmo₃ dsa₂ i₂chen₄ quián₅ Jesús ꞌlióng₂ léi₄ juëꞌ₂ a₂dsɨ₂góꞌ₃ dsɨ₅ jɨn₄ dsa₂. Jaun₂ jme₁ŋɨꞌ₂ dsa₂ i₁dsi₅ guáꞌ₅ templo ja₁lë́₄ corredor ja₁të́ꞌ₂ dsa₂ quióꞌ₅ Salomón.
13 ꞌI₁jan₂ tsá₃ ca₂tiá₂ dsɨ́₅ jme₃quiainꞌ₅₄ dsa₂ i₂ꞌén₂ ꞌéi₂, la₁ jme₁jme₂go₃ bá₄.
14 La₁ juɨn₅ bá₄ dsa₂ ŋeꞌ₂, liaꞌ₂ dsa₂ mɨ́₂ në́₃, ca₂rë₃ꞌén₂ të₂le₃ quióꞌ₅ Te₁guiꞌ₅₄.
15 Ca₂liaꞌ₂ jme₁dsɨ₂jŋiai₃ jë₄ calle dsa₂ dsoꞌ₅₄ tiánꞌ₅ ne₄ cama, ne₄ tsɨ₁jein₁ në₃, ia₁jaun₂ tsá₃ a₂nag₅₄ jŋiaꞌ₅₄ ꞌénꞌ₁ quióꞌ₅ bá₄ Pe₄ të₅₄ quióꞌ₅ i₂lɨn₅₄ dsa₂ dsoꞌ₅₄ ꞌéi₂.
16 Ján₃ bá₄ ca₂o₃lén₂ juɨn₅ dsa₂ chan₂ juɨg₂ ma₂quián₅ Jerusalén, le₁jŋiai₂₃ dsa₂ le₁dsoꞌ₅₄, dsa₂ i₂tionꞌ₅₄ jme₂dsí₂ ꞌlɨnꞌ₅₄ të₂dsɨ́₅ në́₃, ca₂o₃lén₂. Jaun₂ ca₂le₃jɨ́n₃ dsa₂ ꞌéi₂ qui₂ca₂ꞌlóin₂.
Ca₂co₃ꞌein₃ dsa₂ quióꞌ₅ Pe₄ quianꞌ₅₄ Juan₅₄
17 Jaun₂ ca₂rë₃ꞌiog₅₄ ꞌŋio₅ lɨn₃ jme₂dsa₂ dsen₅₄, quiainꞌ₅₄ rɨinꞌ₅₄ i₂jme₁lɨ́n₄ saduceos*.
18 Jaun₂ ca₂jŋaiꞌ₃ dsa₂ i₂chen₄ quián₅ Jesús, ca₂i₁tioꞌ₂ ꞌné₅ ꞌmá₃.
19 La₁ a₂ꞌuë₂ jaun₂, ca₂ŋe₄ jan₂ ángel* quián₅ Te₁guiꞌ₅₄ ca₂niá₃ ꞌné₅ ꞌmá₃, ca₂ꞌuɨ́inꞌ₂ dsa₂ i₂chen₄ ꞌéi₂, ca₂juáꞌ₂:
20 ―O₂nóꞌ₅ ꞌniaꞌ₂ i₁dsi₅ guáꞌ₅ templo, o₂nau₂ o₂cheiꞌ₅₄ ꞌniaꞌ₂ dsa₂ jág₁ dse₃ quióꞌ₅ Juɨ₅* ꞌmɨ́₂ la₂.
21 Jme₁ca₂nág₂ jág₁ në₅, të₃ o₃ꞌiog₂ jme₁jnia₃ jaun₂ ca₂i₁lein₅₄ guáꞌ₅ ca₂i₁jme₁tɨin₂₃ dsa₂.
Jmɨg₄ jaun₂ ca₂të₃ jme₂dsa₂ dsen₅₄ ca₂ŋɨ́iꞌ₂ dsɨ₂tan₅₄ quián₅ guáꞌ₅, jaun₂ ca₂jmo₃ ꞌéiꞌ₃ i₁të₂ dsa₂ i₂chen₄ quián₅ Jesús i₂tionꞌ₅₄ ꞌné₅ ꞌmá₃ ꞌéi₂.
22 La₁ jme₁ca₂dsi₃lén₂ ꞌlióg₂b ꞌné₅ ꞌmá₃, tsá₃ ma₃dsa₂ i₂jme₁tionꞌ₅₄ chan₂. Jaun₂ ca₂i₃lein₃ táng₃ i₁con₂ jág₁,
23 juáꞌ₂:
―Jme₁chi₁jnág₅ dse₃ bá₄ o₄ꞌné₄ ꞌné₅ ꞌmá₃, jme₁tión₂ bá₄ guëꞌ₂ ꞌlióg₂ jmo₂₃ ꞌí₁ cau₅ o₄ꞌné₄ në́₃. La₁ jme₁në₂tióꞌ₄ jniaꞌ₅₄ dsi₂néi₂, tsá₃ ma₃dsa₂ i₂jme₁tionꞌ₅₄ chan₂ ꞌi₁jan₂.
24 Jme₁ca₂nág₂ juɨg₅₄ jme₂dsa₂, juɨg₅₄ chiꞌ₂ ꞌɨꞌ₅₄ quián₅ guáꞌ₅ në́₃, jaun₂ dsɨ₂góꞌ₃ dsɨ́₅ qui₂ca₂ŋɨ́iꞌ₃ rɨinꞌ₅₄ ꞌa₂ dsi₁quénꞌ₅ ca₂le₃jë́₃ a₂në₅.
25 Jaun₂ ca₂dsióg₃ jan₂ dsa₂ quian₅ jág₁, jaun₂ ca₂juáꞌ₂:
―Dsa₂ i₂ca₂jneꞌ₅₄ ꞌniaꞌ₂ ꞌné₅ ꞌmá₃, ó₃ bá₄ ma₂tióin₂ i₁dsi₅ guáꞌ₅ jme₂tɨin₂₃ dsa₂.
26 Jaun₂ në́₃ ca₂i₃lén₂ chiꞌ₂ ꞌɨꞌ₅₄ quiainꞌ₅₄ juɨg₅₄ quiáin₅, jaun₂ ca₂i₁chongꞌ₅₄ táng₃ liaꞌ₂ ꞌi₄ rë₂ jág₁. Tsá₃ uɨg₅ ca₂jmógꞌ₂, ia₁ góꞌ₅ qui₃jnáuꞌ₂ cang₄ dsa₂ i₂le₁ŋɨꞌ₂ ja₁jaun₂.
27 Jme₁ca₂dsi₃lein₃ le₁te₂ dsa₂ ꞌéi₂, jaun₂ ca₂cheiꞌ₃ dsi₂jo₂ ja₁le₁ŋɨꞌ₂ dsɨ₂tan₅₄ quián₅ guáꞌ₅. Jaun₂ ca₂juáꞌ₂ jme₂dsa₂ dsen₅₄ ca₂tsɨ́ꞌ₃ dsa₂ ꞌéi₂:
28 ―Ca₂jne₅₄ jniaꞌ₅₄ co₂ŋeiꞌ₅₄ a₂tsá₃ ma₃jme₁tɨnꞌ₅ ꞌniaꞌ₂ dsa₂, juaꞌ₅₄ a₂ꞌɨ́nꞌ₄ guë́₄ ꞌniaꞌ₂ Jesús ꞌéi₂. ¿ꞌE₂ ma₂jmoꞌ₅₄ guëꞌ₂ ꞌniaꞌ₂? Caun₂ qui₂jme₂tɨ́nꞌ₁ ꞌniaꞌ₂ dsa₂, tsá₃ jág₁ cánꞌ₁, ca₂liaꞌ₂ ta₁caun₂ juɨg₂ Jerusalén ma₂rë₂rɨn₅ quianꞌ₅₄ jág₁ a₂jme₂tɨ́inꞌ₁ ꞌniaꞌ₂. A₂ꞌniogꞌ₂ ꞌniaꞌ₂ bogꞌ₅₄ jniaꞌ₅₄ dso₄ a₂ca₂jon₃ dsa₂ ꞌéi₂.
29 Jaun₂ ca₂ŋag₃ Pe₄ quiainꞌ₅₄ dsa₂ i₂chen₄ rɨinꞌ₅₄:
―ꞌŊio₅ guë́₄ dsen₅₄ ta₁ jme₁ti₁ jniaꞌ₅₄ ꞌéiꞌ₃ quióꞌ₅ Diú₄, conꞌ₂ guë́₄ ꞌéiꞌ₃ quióꞌ₅ dsa₂ mɨ₂güɨ́g₃.
30 Diú₄ quián₅ dsa₂ canꞌ₅₄ quián₂ jniog₄ ma₂lɨ́gꞌ₂, Diú₄ ꞌéi₂ bá₄ ca₂jme₃jenꞌ₅₄ Jesús i₂ca₂jŋɨ́ꞌ₃ ꞌniaꞌ₂ ca₂tióinꞌ₃ cróg₄.
31 Diú₄ në́₃ ma₂ca₂chóꞌ₂ gueiꞌ₅₄, jaun₂ ma₂guá₅ cau₅ quióꞌ₅ të₂le₃ gu₂ ne₁, jaun₂ ma₂dsiog₃ a₂léin₂ juɨg₅₄ jniog₄ i₂lió₂, ia₁jaun₂ cuɨn₃ jmɨg₄ jme₃tsɨ́n₃ dsɨ́₅ dsa₂ juɨg₂ Israel ia₁jaun₂ ꞌén₂ dsáu₁.
32 Ca₂le₃jág₃ bá₄ jniaꞌ₅₄ ca₂të́₂ ne₄ a₂në₅, ján₃ bá₄ jángꞌ₅ jág₁ dsau₅ Jme₂dsí₂ Jŋió₅ i₂ma₂cuɨn₃ Diú₄ quióꞌ₅ dsa₂ i₂nag₅ gau₂ jme₂ti₃ jág₁ quióꞌ₅.
33 Ca₂rë₃ꞌné₃ ꞌŋio₅ lɨn₃ dsa₂ canꞌ₅₄ jme₁ca₂nág₂ le₂në₅, a₂ꞌnio₃ jme₁jme₃dsiain₂₃ dsa₂ i₂chen₄ quián₅ Jesús ꞌéi₂.
34 La₁ jë₄ quióꞌ₅ dsɨ₂tan₅₄ jaun₂, jme₁ꞌen₅₄ jan₂ dsa₂ fariseo* i₂jme₁chen₂ Gamaliel, dsa₂ i₂lɨ́n₅ të₅juáꞌ₅, jaun₂ jme₁jme₂go₃ dsa₂ ꞌŋio₅ lɨn₃. Jaun₂ ca₂nau₂ dsa₂ ꞌéi₂ jë₄ quióꞌ₅ dsɨ₂tan₅₄, ca₂mɨ₃ a₂ꞌuɨ́inꞌ₂ ca₂tiá₂ dsa₂ i₂chen₄ ꞌéi₂.
35 Jme₁ca₂ꞌuɨn₂ ꞌéi₂, jaun₂ ca₂juáꞌ₂ Gamaliel ca₂tsɨ́ꞌ₃ dsɨ₂tan₅₄:
―ꞌNiaꞌ₂ dsa₂ chan₂ juɨg₂ Israel, jmo₄ ꞌniaꞌ₂ ꞌí₁ a₂jmaꞌ₅₄ ꞌniaꞌ₂ dsa₂ në₅.
36 Dsá₂ ꞌauꞌ₂ ꞌniaꞌ₂ jmo₄ a₂ca₂lë₃, ma₂ŋó₃ ca₂la₂ ꞌlióng₂ ŋi₂, ca₂nau₂ Teudas a₂juáꞌ₂ a₂lɨ́in₅ dsa₂ ꞌuanꞌ₂ dsa₂ dsen₅₄. Jaun₂ ca₂jme₃quiongꞌ₅₄ conꞌ₂ quén₂ ꞌŋiá₂-lón₂ dsa₂ ŋeꞌ₂. La₁ jme₁ca₂jŋagꞌ₃ dsa₂, ca₂le₃jɨ́n₃ dsa₂ i₂jme₁quiainꞌ₅₄ në́₃ ca₂i₃léin₂ jma₃quén₅.
37 Cang₂ jaun₂, jmɨg₄ jme₁ca₂tion₃ dsa₂ si₂, ca₂nau₂ Judas i₂chan₂ Galilea. Ján₃ bá₄ le₂jaun₂ juɨn₅ dsa₂ ca₂jme₃quiongꞌ₅₄ quióꞌ₅. La₁ ján₃ bá₄ ca₂jŋagꞌ₃ dsa₂. Ca₂le₃jɨ́n₃ bá₄ dsa₂ i₂jme₁quiainꞌ₅₄ në́₃ ca₂i₃léin₂ tsɨ₁rë₂jain₅₄ táng₃ jme₁ma₂jon₅ ꞌéi₂.
38 Jaun₂ lë₃, tsá₃ ꞌe₂ jmagꞌ₅₄ dsa₂ në₅, tsá₃ lë₁tónꞌ₂ ꞌniaꞌ₂ mɨꞌ₅₄ quiainꞌ₅₄. Ia₁ në₁juaꞌ₂ jág₁ në₅ lë́₅ cosa quióꞌ₅ dsa₂ mɨ₂güɨ́g₃, a₂lë₁dsɨ₃ꞌén₂ bá₄ në₅.
39 La₁ia₁ në₁juaꞌ₂ lë́₅ cosa quióꞌ₅ Diú₄, tsá₃ a₁jaun₂ le₃quɨꞌ₅₄ ꞌniaꞌ₂ jmɨg₄ a₂ꞌéngꞌ₄. Jaun₂ ꞌí₁ jmo₄ ia₁ conꞌ₂ tsá₃ ŋó₅ në₁juaꞌ₂ quianꞌ₅₄ Diú₄ quɨ́nꞌ₂ ꞌniaꞌ₂.
40 Jaun₂ ca₂nág₂ jág₁ jaun₂ ca₂le₃jɨ́in₃. Jaun₂ ca₂të́ꞌ₃ táng₃ dsa₂ i₂chen₄ quián₅ Jesús ꞌéi₂. Jaun₂ ca₂jmo₃ dsɨ₂tan₅₄ ꞌéiꞌ₃ a₂bóg₂ dsa₂. Jaun₂ ca₂jné₃ táng₃ tsá₃ cuë₂₃ jmɨg₄ juaꞌ₅₄ a₂ꞌë́₂ guë́₄ dsa₂ ꞌéi₂ jág₁ a₂ꞌɨin₂₃ Jesús. Jaun₂ ca₂lió₂ bá₄ jaun₂ në́₃.
41 Jme₁ca₂ꞌuɨn₂ dsa₂ i₂chen₄ quián₅ Jesús ꞌéi₂, jɨn₄ dsɨ₂tan₅₄, jmo₂₃ ꞌioꞌ₂, ia₁ ca₂cuë₃ Diú₄ jmɨg₄ ca₂i₃ŋɨ́i₂ o₂guíꞌ₃ o₄quióꞌ₄ Jesús.
42 Jaun₂ caun₂ ca₂i₁nioi₁₂ bá₄ jme₂tɨin₂₃ dsa₂ jág₁ dse₃ quióꞌ₅ Jesucristo ca₂le₃jë́₃ jmɨg₄, liaꞌ₂ i₁dsi₅ guáꞌ₅ templo, liaꞌ₂ dsi₂néi₂ quióꞌ₅ dsa₂ në́₃.