Pe₄ quiainꞌ₅₄ Juan₅₄ tióin₂ ne₄ dsɨ₂tan₅₄
4
Pe₄ quianꞌ₅₄ Juan₅₄ tsá₃ ma₂dsan₃ bá₄ guë́₄ tsɨ́ꞌ₅ dsa₂ jág₁, jme₁ca₂dsi₃lén₂ jme₂dsa₂ quiainꞌ₅₄ juɨg₅₄ chiꞌ₂ ꞌɨꞌ₅₄ quián₅ guáꞌ₅, dsa₂ saduceos* në́₃.
2 Le₁ꞌnéi₃ ꞌŋio₅ lɨn₃, ia₁ jme₂tɨn₅ ꞌéi₂ dsa₂ a₂jenꞌ₅₄ dsa₂ jɨn₄ ꞌlag₄ juɨ₁liaꞌ₂ ca₂lë₃ léi₄ ca₂jenꞌ₅₄ Jesús.
3 Jaun₂ ca₂jŋauꞌ₃ chiꞌ₂ ꞌɨꞌ₅₄ ca₂tág₃ ca₂i₁tioꞌ₂ néꞌ₃ ꞌmá₃ ca₂të₂ jme₁jnia₃, ia₁ ca₂ꞌláu₂ bá₄ jmɨg₄ jaun₂.
4 La₁ juɨn₅ bá₄ dsa₂ i₂ca₂nág₂ ca₂rë₃ꞌéin₂ jág₁. Conꞌ₂ ꞌŋiá₂ mei₅ dsa₂ i₂ca₂rë₃ꞌén₂ ꞌéi₂, jme₁ca₂cáun₂ dsa₂ ꞌí₁ jmáꞌ₃ dsa₂ ŋeꞌ₂.
5 Jme₁jnia₃ jaun₂, ca₂ŋɨꞌ₂ ca₂le₃jɨ́n₃ dsa₂ dsen₅₄ i₂jmo₅ ꞌéiꞌ₃ quián₅ dsa₂ judíos, dsɨ₂guiꞌ₅₄ canꞌ₅₄, të₅juáꞌ₅ në́₃.
6 Ján₃ bá₄ jaun₂ jme₁ꞌen₅₄ Anás i₂lɨ́n₅ jme₂dsa₂ dsen₅₄, Caifás, Juan₅₄, Alejandro në́₃, ca₂le₃jɨ́n₃ guë́₄ i₂lɨ́n₅ o₁rɨnꞌ₅₄ jme₂dsa₂ dsen₅₄.
7 Jme₁ma₂le₁ŋɨiꞌ₂ jɨin₂, jaun₂ guë́₄ ca₂i₁dsein₂₃ Pe₄ quianꞌ₅₄ Juan₅₄, jaun₂ ca₂cheiꞌ₃ dsi₂jo₂ ja₁le₁ŋɨiꞌ₂ jaun₂. Jaun₂ ca₂ŋag₃:
―¿ꞌEin₂ ca₂cuë₃ ꞌéiꞌ₃, o₃ ꞌein₂ ca₂cuë₃ jág₁ a₂i₂nioꞌ₄ ꞌniaꞌ₂ jme₂tɨ́ngꞌ₁ dsa₂, a₂jmoꞌ₂ ꞌniaꞌ₂ ꞌe₂ jmoꞌ₂ i₂niogꞌ₅₄?
8 Jaun₂ ca₂juáꞌ₂ Pe₄, rë₂rɨn₅ Jme₂dsí₂ Jŋió₅ të₂dsɨ́₅, ca₂tsɨ́ꞌ₃ dsa₂ i₂le₁ŋɨꞌ₂ ꞌéi₂:
―ꞌNiaꞌ₂ dsa₂ dsen₅₄ quián₅ juɨg₂, ꞌniaꞌ₂ dsa₂ canꞌ₅₄ quián₅ juɨg₂ Israel* në́₃:
9 Chi₂juaꞌ₂ a₂jaun₂ ŋagꞌ₅₄ ꞌniaꞌ₂ ia₁ ca₂jmó₁ jniaꞌ₅₄ caun₂ a₂dse₃ quióꞌ₅ jan₂ dsa₂ dsoꞌ₅₄ i₂tsá₃ lé₂ jme₁ŋɨ₃, chi₂juaꞌ₂ ꞌniogꞌ₂ ꞌniaꞌ₂ le₃ŋiꞌ₅₄ ꞌa₂ liaꞌ₂ ca₂lë₃ a₂ca₂ꞌlóin₂,
10 juɨ₁le₃ŋiꞌ₅₄ bá₄ ꞌniaꞌ₂, juɨ₁le₃ŋi₅ bá₄ ca₂le₃jɨ́n₃ dsa₂ juɨg₂ Israel në́₃, a₂chénꞌ₅ dsa₂ në₅ jɨnꞌ₄ ꞌniaꞌ₂ ca₂ꞌlóin₂ quianꞌ₅₄ bí₂ quióꞌ₅ Jesucristo chan₂ Nazaret i₂ca₂tiónꞌ₃ ꞌniaꞌ₂ cróg₄, i₂ca₂jme₁jenꞌ₅₄ táng₃ Diú₄ jɨn₄ ꞌlag₄.
11 Jesús ꞌéi₂:
lɨ́n₅ nɨ₁cang₁ a₂tsá₃ jenꞌ₅₄ ꞌniaꞌ₂,
i₂lɨ́ngꞌ₅ të₅ i₂chiꞌ₅ tsɨ₁ꞌné₅,
la₁ ca₂dsióg₃ ca₂lë₃ nɨ₁cang₁ a₂dsen₅₄ guë́₄.a
12 Ia₁ ꞌi₁jan₂ i₂siánꞌ₂ tsá₃ chan₂ i₂le₃lión₂ dsa₂. Ia₁ ꞌi₁jan₂ i₂siánꞌ₂ tsá₃ ca₂cuɨn₃ Diú₄ ne₄ guaꞌ₅₄ ꞌuë₃ la₂, a₂lé₂ ꞌɨ́in₄ jniog₄ a₂mɨ́₁ ne₄ Diú₄ ia₁jaun₂ tágꞌ₄ gueiꞌ₅₄ i₂juɨ́g₃, jŋiaꞌ₅₄ liaꞌ₂ jan₂ Jesús bá₄.
13 Jme₁ca₂jág₃ dsa₂ canꞌ₅₄ dsɨ₂góꞌ₃ dsɨ́₅ ca₂jɨ́in₂ Pe₄ quianꞌ₅₄ Juan₅₄ ꞌa₂ liaꞌ₂ tiá₂ dsɨ́₅ ꞌéi₂ ŋag₂₃ ne₅₄ le₂jaun₂, jaun₂ ca₂rë₃líꞌ₄ a₂lɨ́n₅ ꞌéi₂ dsa₂ tsá₃ lɨn₄ quen₅, i₂tsá₃ lɨn₄ si₂ cuɨ́ꞌ₅ në́₃, jaun₂ guë́₄ ca₂rë₃cuɨin₂₃ a₂lɨ́n₅ ꞌéi₂ dsa₂ i₂jme₁i₂nio₄ quianꞌ₅₄ Jesús.
14 Ia₁ jaun₂ bá₄ jme₁chénꞌ₄ dsa₂ i₂ca₂ꞌlón₂ ꞌéi₂ jë₄ jaun₂, jaun₂ lë₃ tsá₃ cuɨn₅ jmɨg₄ juaꞌ₅₄ a₂juáꞌ₂ dsa₂ canꞌ₅₄ a₂tsá₃ dsau₅.
15 Jaun₂ ca₂ꞌuɨ́inꞌ₂ bá₄ Pe₄ quianꞌ₅₄ Juan₅₄ jë₄ jaun₂, jaun₂ ca₂jmo₃ jág₁ guioin₅₄ ꞌa₂ liaꞌ₂ jmo₃.
16 Ca₂dsia₃ jág₁, juáꞌ₂:
―¿ꞌA₂ liaꞌ₂ jmó₁ quianꞌ₅₄ dsa₂ në₅ jaun₂? Ia₁ ca₂le₃jɨ́n₃ bá₄ dsa₂ juɨg₂ Jerusalén ma₂le₁ŋi₅ a₂jmo₅ i₂në₅ léi₄ juëꞌ₂, jaun₂ tsá₃ lé₂ juaꞌ₅₄ a₂juaꞌ₅₄ jniog₄ a₂tsá₃ dsau₅.
17 La₁ ia₁jaun₂ tsá₃ ma₃caun₂ qui₃dsɨ₃ꞌag₅ jág₁ jɨn₄ dsa₂ juɨg₂, ꞌnióꞌ₅ quiain₅₄ jniog₄ juë́ꞌ₅ ia₁jaun₂ tsá₃ ma₃i₃nioi₅₄ qui₃ꞌɨin₃ guë́₄ Jesús a₂tsɨ́ꞌ₃ dsa₂ le₃ne₄ juɨ₅ ja₁dsau₅₄ në₅.
18 Jaun₂ ca₂të₃ dsa₂ i₂le₁ŋɨꞌ₂ ꞌéi₂ ca₂të́ꞌ₃ táng₃ Pe₄ quianꞌ₅₄ Juan₅₄, jaun₂ ca₂jmo₃ ꞌéiꞌ₃ ca₂tsɨ́ꞌ₃ dsa₂ on₃ ꞌéi₂, a₂tsá₃ ma₃dsia₃ co₂ŋeiꞌ₅₄ on₃ guëꞌ₂ jme₃tɨin₂₃ dsa₂ a₂ꞌɨin₂₃ Jesús.
19 La₁ jaun₂ ca₂ŋag₃ Pe₄ quianꞌ₅₄ Juan₅₄ ca₂juáꞌ₂:
―ꞌNioꞌ₄ ꞌniaꞌ₂ ꞌauꞌ₂ chi₂juaꞌ₂ ꞌŋio₅ guë́₄ dse₃ jniá₂ ne₄ Diú₄, a₂néi₁ jniaꞌ₅₄ gau₂ jág₁ quiánꞌ₂ ꞌniaꞌ₂, ꞌnióꞌ₄ a₂jme₁néi₁ jniaꞌ₅₄ gau₂ jág₁ quióꞌ₅ Diú₄.
20 La₁ jniaꞌ₅₄ në́₃ tsá₃ lé₂ tí₄ a₂dsiá₁ ca₂le₃jë́₃ a₂ma₂jag₅₄, a₂ma₂néi₁ në́₃.
21 Jaun₂ ca₂quiong₃ dsɨ₂tan₅₄ juë́ꞌ₅, la₁ ca₂lió₂ bá₄ jaun₂ në́₃. Ia₁ tsá₃ ca₂dsóꞌ₂ ꞌa₂ liaꞌ₂ ꞌë́₂ uɨg₅, ia₁ ca₂le₃jɨ́n₃ bá₄ dsa₂ ma₂qui₂cuë́ꞌ₃ ti₁ꞌmagꞌ₄ Diú₄ a₂ca₂të́₂ ne₅₄ a₂ca₂lë₃ jaun₂.
22 Jaun₂ dsa₂ ŋeꞌ₂ i₂ca₂ꞌlón₂ ꞌéi₂ quianꞌ₅₄ léi₄ a₂dsɨ₂góꞌ₃ dsɨ₅, jme₁ꞌein₅₄ lë́₅ guë́₄ të₂láu₃ ŋi₂.
Ca₂mɨ₃ dsa₂ ꞌén₂ a₂cuë₃ guë́₄ Diú₄ bí₂ quióꞌ₅
23 Jme₁ma₂lón₂ Pe₄ quianꞌ₅₄ Juan₅₄, ca₂i₃léin₂ ja₁tionꞌ₅₄ rɨinꞌ₅₄, jaun₂ ca₂dsia₃ ca₂le₃jë́₃ ꞌe₂ ca₂juáꞌ₂ juɨg₅₄ jme₂dsa₂ quianꞌ₅₄ dsɨ₂guiꞌ₅₄ canꞌ₅₄ a₂ca₂tsɨ́ꞌ₃ ꞌéi₂.
24 Jme₁ca₂nág₂ jág₁ jaun₂, ca₂le₃jɨ́in₃ ca₂mɨ₃ co₂lë₅ ca₂tsɨ́ꞌ₃ Diú₄ ca₂juáꞌ₂:
―Te₁guiꞌ₅₄ quián₂ jniog₄, ꞌne₂ bá₄ lɨ́ngꞌ₅ Diú₄ i₂ca₂jmoꞌ₅₄ gueiꞌ₅₄ i₂juɨ́g₃, quianꞌ₅₄ guaꞌ₅₄ ꞌuë₃, jmɨ₁ŋíꞌ₄ në́₃, ca₂le₃jë́₃ guë́₄ ꞌe₂ a₂cha₂.
25 ꞌNe₂ bá₄ ca₂juaꞌ₅₄ quianꞌ₅₄ Jme₂dsí₂ Jŋió₅ quiángꞌ₂, jme₁ca₂juáꞌ₂ ꞌlag₄ David dsa₂ quiángꞌ₂:
¿ꞌE₂ lë₃ tionꞌ₅₄ dsɨ₂nau₂ co₂mɨꞌ₅₄?
¿ꞌE₂ lë₃ dsɨ₂jiog₅ dsɨ́₅ dsa₂ chan₂ mɨ₂güɨ́g₃
ca₂le₃jë́₃ ne₅₄ a₂ꞌlɨgꞌ₅₄ a₂tsá₃ ta₁ tí₄?
26 Ca₂le₃jɨ́n₃ rag₅₄ ne₄ guaꞌ₅₄ ꞌuë₃
qui₂ca₂quɨinꞌ₂ jág₁;
Ca₂le₃jɨ́n₃ dsɨ₂tan₅₄ quián₅ juɨg₂
qui₂ca₂nau₂ ꞌnei₂ ja₁con₂ Te₁guiꞌ₅₄,
ja₁con₂ I₂rë₂ꞌɨ́n₁* quiáin₅ në́₃.b
27 ꞌDsau₅ dsónꞌ₂ bá₄ ca₂jmo₃ caun₂ jág₁ Rag₅₄ Herodes quianꞌ₅₄ Dsi₄máꞌ₂ Poncio Pilato juɨg₂ la₂ quianꞌ₅₄ dsɨ₂nau₂, dsa₂ israelitas në́₃. Ca₂quɨinꞌ₃ jág₁ ca₂jme₃ꞌŋiai₅₄ Jesús Ja₂ŋíꞌ₂ jŋió₅ i₂rë₂ꞌɨ́n₁ quiángꞌ₂.
28 Quianꞌ₅₄ a₂në₅, ca₂jme₃ti₃ dsa₂ canꞌ₅₄ ꞌéi₂ ca₂le₃jë́₃ a₂ꞌi₄ ꞌéiꞌ₃ niog₅ lé₂.
29 Jaun₂ në́₃ Te₁guiꞌ₅₄, jag₄ a₂quiong₅ dsa₂ juë́ꞌ₅ jniaꞌ₅₄. Cuë₄ bí₂ jniaꞌ₅₄ dsa₂ quiángꞌ₂ ia₁jaun₂ tián₂ qui₂jme₁tɨn₅ guë́₄ jniaꞌ₅₄ dsa₂ jág₁ quiángꞌ₂, tsá₃ juɨ₁le₂go₃.
30 Cuë₄ bí₂ quiángꞌ₂ a₂lé₂ jme₁ꞌlion₅₄ jniaꞌ₅₄ dsa₂ dsoꞌ₅₄, a₂lé₂ jmó₁ léi₄ dsɨ₂góꞌ₃ dsɨ₅ quianꞌ₅₄ bí₂ ꞌéiꞌ₃ quióꞌ₅ Jesús, dsa₂ jŋió₅ i₂jme₂ti₃ quiángꞌ₂.
31 Jme₁ca₂dsan₃ chi₂léinꞌ₂ Diú₄ le₂në₅, ca₂i₁bi₅₄ ja₁tioinꞌ₅₄, jaun₂ ca₂le₃jɨ́n₃ qui₂ca₂cainꞌ₂ Jme₂dsí₂ Jŋió₅. Jaun₂ tsá₃ ma₃juë́ꞌ₅ ꞌi₄ dsɨ́₅ qui₂ca₂ꞌë́₂ jág₁ dse₃ quióꞌ₅ Diú₄.
Ca₂le₃jë́₃ ꞌe₂ cha₂ jme₁lë́₄ quióꞌ₅ ca₂le₃jɨ́in₃
32 Ca₂le₃jɨ́n₃ dsa₂ i₂ma₂ꞌén₂, caun₂ bá₄ a₂dsɨ₂jiog₅ dsɨ́₅, caun₂ bá₄ ꞌei₅ jme₂dsí₂ quióꞌ₅ ca₂le₃jɨ́in₃. ꞌI₁jan₂ tsá₃ juaꞌ₅₄ a₂jmo₂₃ quióꞌ₅ ꞌŋiog₅ ꞌe₂ caun₂ a₂cha₂ quióꞌ₅. Jmo₂₃ bá₄ dsɨ́₅ a₂quióꞌ₅ co₂dsia₅ quiainꞌ₅₄ rɨinꞌ₅₄ ca₂le₃jë́₃ ꞌe₂ a₂cha₂ quióꞌ₅.
33 Caun₂ ca₂ꞌág₂ tiá₂ dsɨ́₅ qui₂ca₂cuë₃ jág₁ dsau₅ dsɨ₂guia₃-tɨ́n₂ i₂chen₄*c quián₅ Diú₄ ꞌéi₂, ꞌa₂ liaꞌ₂ ca₂jenꞌ₅₄ Te₁guiꞌ₅₄ Jesús. Jaun₂ caun₂ qui₂ca₂cuë₃ Diú₄ bí₂ ꞌŋio₅ lɨn₃ quióꞌ₅ ca₂le₃jɨ́n₃ dsa₂ i₂ꞌén₂.
34 ꞌI₁jan₂ tsá₃ ꞌein₂ juaꞌ₅₄ cha₂ qui₂ca₂rë₃ꞌnióꞌ₅ quióꞌ₅, ia₁ dsa₂ i₂cha₂ ꞌuë₃, o₃ i₂tióng₂ ꞌné₅ quióꞌ₅ në́₃, qui₂ca₂ꞌnag₃.
35 Jaun₂ ca₂o₃can₅ cu₄ jaun₂, ca₂jɨ́inꞌ₃ dsa₂ guia₃-tɨ́n₂ i₂chen₄ quián₅ Jesús ꞌéi₂, jaun₂ ca₂dsióꞌ₃ ca₂cuë́ꞌ₃ le₂jan₂ le₂jan₂ ꞌa₂ conꞌ₂ ꞌnióꞌ₅ quióꞌ₅.
36 Jme₁chan₂ jɨn₄ dsa₂ ꞌéi₂ jan₂ dsa₂ levita* i₂jme₁chen₂ José i₂chan₂ Chipre. Dsa₂ i₂chen₄ në́₃ ca₂quiain₃ Së́₄ ꞌéi₂ Bernabé, co₂ꞌnióꞌ₄ a₂juáꞌ₂ dsa₂ i₂jmo₅ liánꞌ₂, i₂jme₂ꞌo₅₄.d
37 Bernabé ꞌéi₂ ca₂ꞌnag₃ caun₂ ꞌuë₃ quióꞌ₅ a₂jme₁cha₂. Ca₂le₃jë́₃ cu₄ jaun₂ ca₂o₃can₅ ca₂cuë́ꞌ₃ dsa₂ guia₃-tɨ́n₂.