Ca₂ꞌlón₂ jan₂ dsa₂ ꞌlianꞌ₂
3
Co₂ráun₂ dsióg₃ Pe₄ quiainꞌ₅₄ Juan₅₄ guáꞌ₅ templo* conꞌ₂ hora ŋí₁ ꞌnɨ₅ të₂le₃ ca₂ꞌláu₂,a ia₁ hora jaun₂ jme₁ŋɨꞌ₂ dsa₂ tián₂ chi₂léinꞌ₂ Diú₄.
2 Ca₂le₃jë́₃ jmɨg₄ jme₁dsɨ₂jŋia₃ dsa₂ jan₂ dsa₂ ꞌlianꞌ₂ i₂tsá₃ lé₂ ŋɨ₃, le₂jaun₂ jme₁ma₂lɨ́in₅ liaꞌ₂ conꞌ₂ jme₁ca₂rë₃cháin₃, jme₁dsɨ₃jiog₃ dsa₂ o₄ꞌné₄ i₁dsi₅ guáꞌ₅, ja₁të́ꞌ₂ dsa₂ O₄ꞌné₄ Jláꞌ₁. Ja₁jaun₂ jme₁qui₂mɨ₅ dsa₂ ꞌlianꞌ₂ ꞌéi₂ cu₄ quióꞌ₅ dsa₂ i₂dsɨ₂lén₂ guáꞌ₅.
3 Jme₁ca₂jág₃ dsa₂ dsoꞌ₅₄ ꞌéi₂ ca₂ŋó₃ Pe₄ quiainꞌ₅₄ Juan₅₄ a₂dsɨ₃toinꞌ₅₄ i₁dsi₅ guáꞌ₅, jaun₂ ca₂mɨ₃ cu₄ quióꞌ₅ dsa₂ on₃ ꞌéi₂.
4 Jaun₂ ca₂nau₂ Pe₄, Juan₅₄ në́₃, ca₂jɨ́in₂ dsa₂ ꞌéi₂. Jaun₂ ca₂juáꞌ₂ Pe₄:
―Dse₃ jag₄ jniaꞌ₅₄.
5 Jaun₂ guá₅ dsa₂ ꞌéi₂ qui₂jɨ́in₂ Pe₄ quianꞌ₅₄ Juan₅₄, ia₁ lɨ́in₂ cuë₃ dsa₂ ca₂la₂ cu₄.
6 La₁ jaun₂ ca₂juáꞌ₂ Pe₄:
―Tsá₃ cu₄tiog₂, on₃ guëꞌ₂ cu₄nióg₄ cha₂ quió₃ cuë₅₄. La₁ conꞌ₂ a₂cha₂ quió₃, cuë₅₄. Quianꞌ₅₄ ꞌéiꞌ₃ quióꞌ₅ Jesucristo chan₂ Nazaret, nau₂, ŋɨ₄.
7 Jaun₂ ca₂jŋaꞌ₃ Pe₄ mɨ₂gu₂ ne₁ dsa₂ ꞌéi₂, ca₂jme₃ꞌo₅₄ ca₂chóꞌ₂. Dsɨ₂juɨ₅ le₂jaun₂ ca₂rë₃bén₂ mɨ₂tag₄ dsa₂ ꞌéi₂.
8 Jaun₂ ca₂ráun₂ ca₂nau₂ jaun₂ ca₂jme₃lióg₃ ca₂ŋɨ₃. Jaun₂ ca₂ꞌí₃ i₁dsi₅ guáꞌ₅ quiainꞌ₅₄ dsa₂ on₃ ꞌéi₂, qui₂ca₂ŋɨ₃ qui₂ca₂ráun₂ qui₂ca₂cuë́ꞌ₃ ti₁ꞌmagꞌ₄ Diú₄.
9 Ca₂le₃jɨ́n₃ dsa₂ i₂tionꞌ₅₄ ja₁jaun₂, ca₂jɨ́in₂ dsa₂ ꞌéi₂ ŋɨ₂₃ cuë́ꞌ₅ ti₁ꞌmagꞌ₄ Diú₄.
10 Jaun₂ dsɨ₂góꞌ₃ dsɨ́₅ ꞌŋio₅ lɨn₃, ia₁ ma₂ŋɨ₂₃. Ma₂cuɨin₂₃ bá₄ dsa₂ ꞌéi₂ i₂gua₂ tián₂ o₄ꞌné₄ chei₂ Jláꞌ₁ qui₂mɨ₂₃ cu₄.
Jág₁ ca₂ton₃ Pe₄ corredor ja₁të́ꞌ₂ dsa₂ quióꞌ₅ Salomón
11 Caun₂ ꞌen₅₄ le₂jaun₂ bá₄ dsa₂ i₂jme₁ꞌlianꞌ₂ ꞌéi₂ quiainꞌ₅₄, tsá₃ téin₂ Pe₄, Juan₅₄ në́₃. Jaun₂ ca₂i₃lén₂ co₂chiꞌ₅₄ juɨn₅ dsa₂ dsɨ₂góꞌ₃ dsɨ́₅ ca₂ton₂ guáꞌ₅ ja₁chei₂ Corredor quióꞌ₅ Salomón, ja₁jme₁ꞌen₅₄ Pe₄ quiainꞌ₅₄ Juan₅₄ në́₃.
12 Jme₁ca₂jág₃ Pe₄ le₁ŋɨꞌ₂ dsa₂ juɨn₅, jaun₂ ca₂juáꞌ₂ ca₂tsɨ́ꞌ₃ dsa₂ ꞌéi₂:
―ꞌNiaꞌ₂ dsa₂ juɨg₂ chan₂ Israel*, ¿ꞌE₂ lë₃ ŋɨ́₄ dsɨ₂góꞌ₃ ꞌauꞌ₂ ꞌniaꞌ₂? ¿ꞌE₂ lë₃ jagꞌ₅₄ ꞌniaꞌ₂ jniaꞌ₅₄ le₂në₅? On₃juaꞌ₅₄ bí₂ a₂tag₂ jniaꞌ₅₄ guio₅₄ a₂ca₂ꞌlón₂ dsa₂ në₅ a₂ma₂lé₂ ŋɨ₃, juaꞌ₅₄ a₂lág₅ jniaꞌ₅₄ dsa₂ o₂dsan₂.
13 La₁ia₁ Diú₄ quián₅ tsɨ₁jon₂ jmei₂ jniog₄ Abraham, Isaac, Jacob në́₃, Diú₄ ꞌéi₂ ca₂jme₃juɨinꞌ₂ ꞌŋio₅ lɨn₃ Jesús ja₁ŋiꞌ₅₄, i₂ca₂jɨnꞌ₅₄ ꞌniaꞌ₂ ne₄ dsɨ₂tan₅₄. Jme₁ꞌnio₃ guë́₄ Dsi₄máꞌ₂ Pilato jme₁lió₂, la₁ tsá₃ ca₂gueꞌ₅₄ ꞌniaꞌ₂.
14 ꞌNióꞌ₄ jme₁lonꞌ₄ ꞌniaꞌ₂ dsa₂ jŋió₅ i₂tsá₃ ꞌe₂ dso₄ rɨn₂ ꞌéi₂, jë₂ bá₄ dsa₂ i₂ma₂jŋɨꞌ₃ dsa₂ ca₂mɨꞌ₅₄ ꞌniaꞌ₂ lión₂.
15 Jaun₂ le₂në₅ ca₂jŋɨ́ꞌ₃ ꞌniaꞌ₂ dsa₂ i₂cuë₅ jme₂dsí₂. La₁ Diú₄ ca₂jme₃jeinꞌ₅₄ táng₃ jɨn₄ ꞌlag₄, jaun₂ ca₂le₃jë́₃ a₂në₅ ca₂të́₂ ne₄ jniaꞌ₅₄.
16 Quianꞌ₅₄ bí₂ quióꞌ₅ ꞌŋiog₅ Jesús ꞌéi₂ ca₂ꞌlión₂ dsa₂ i₂cuɨnꞌ₂ ꞌniaꞌ₂ i₂jɨnꞌ₄ ꞌniaꞌ₂ në₅, ia₁ a₂ꞌéin₂ jniaꞌ₅₄ të₂le₃ quióꞌ₅ Jesús. ꞌÉi₂ bá₄ në₂cuë₃ bí₂ quióꞌ₅ dsa₂ në₅, jaun₂ ca₂ꞌlóin₂, co₂ŋeiꞌ₅₄, juɨ₁liaꞌ₂ jɨinꞌ₅₄ ꞌniaꞌ₂ në₅.
17 ꞌGuion₄ bá₄ jniá₂ dse₃, rɨnꞌ₅₄ jniog₄, a₂ca₂jmoꞌ₅₄ ꞌniaꞌ₂ caun₂ jág₁ quianꞌ₅₄ dsa₂ canꞌ₅₄ quiánꞌ₂ ꞌniaꞌ₂, a₂ca₂jŋɨ́ꞌ₃ ꞌniaꞌ₂ Jesús, ca₂jmoꞌ₅₄ ꞌniaꞌ₂ le₂jaun₂ ia₁ a₂tsá₃ ŋiꞌ₅₄ bá₄ ꞌniaꞌ₂ ꞌe₂ jmoꞌ₂.
18 La₁ ca₂rë₃ti₃ jág₁ a₂ma₂ꞌë́₂ Diú₄ le₂jŋiá₅ të₂le₃ quianꞌ₅₄ dsa₂ i₂jme₁ꞌë́₂ jág₁ quiáin₅, a₂tion₅₄ ŋág₃ uɨg₅ dsa₂ I₂rë₂ꞌɨ́n₁* quiáin₅.
19 Jaun₂ në́₃, jme₁tsɨ́n₄ ꞌniaꞌ₂ ꞌauꞌ₂, jenꞌ₅₄ ꞌniaꞌ₂ të₂le₃ quióꞌ₅ Diú₄, ia₁jaun₂ ꞌén₂ dsáuꞌ₂ ꞌniaꞌ₂. Jaun₂ bá₄ jiá₃ jmɨg₄ cuë₃ Te₁guiꞌ₅₄ a₂le₃güɨnꞌ₂ jme₂dsí₂ quiánꞌ₂ ꞌniaꞌ₂,
20 a₂chein₃ táng₃ Jesús i₂lɨ́n₅ I₂rë₂ꞌɨ́n₁ quián₅ Diú₄, i₂ma₂lë́₅ jág₁ le₂jŋiá₅ jiá₃ quiánꞌ₂ ꞌniaꞌ₂,
21 o₁jŋiaꞌ₅₄ la₂ rë₂në́₃ tion₅₄ ꞌnióꞌ₅ guá₃ Jesús gueiꞌ₅₄ i₂juɨ́g₃ ca₂liaꞌ₂ ca₂jmo₃ Diú₄ rë₂ ca₂le₃jë́₃ liaꞌ₂ conꞌ₂ lë́₅ jág₁ ma₂ꞌë́₂ dsa₂ jŋió₅ quiáin₅ ma₂lɨ́gꞌ₂.
22 Le₂la₂ ca₂juáꞌ₂ ꞌlag₄ Moisés ca₂tsɨ́ꞌ₃ dsa₂ quián₂ jniog₄ ma₂dsi₃jo₃: “A₂chen₃ Te₁guiꞌ₅₄ Diú₄ jan₂ dsa₂ i₂ꞌë́₂ jág₁ quiáin₅, i₂lɨ́n₅ dsa₂ goꞌ₄ ꞌniaꞌ₂ guiongꞌ₅₄, juɨ₁liaꞌ₂ ca₂chei₃ jniá₂. Jaun₂ tónꞌ₂ ꞌniaꞌ₂ juɨ₅ jme₁tiꞌ₄ ꞌniaꞌ₂ ca₂le₃jë́₃ conꞌ₂ ꞌéiꞌ₃ a₂jmo₃ ꞌéi₂.
23 Ia₁ ca₂le₃jɨ́n₃ i₂tsá₃ juɨ₅ tónꞌ₂ jág₁ quióꞌ₅ dsa₂ i₂chen₄ quiáin₅ ꞌéi₂, dsɨ₃ꞌéin₂, ꞌuɨ́in₃ juɨg₂ Israel.”b
24 Jaun₂ le₂në₅ ca₂ꞌë́₂ Samuel jág₁ le₂ꞌuɨg₅₄, ca₂le₃jɨ́n₃ guë́₄ dsa₂ i₂jme₁ꞌë́₂ jág₁ quián₅ Diú₄ i₂ca₂o₃lén₂ cang₂ guë́₄ jaun₂, qui₂ca₂juáꞌ₂ liaꞌ₂ lé₂ jmɨg₄ në₃.
25 Jág₁ a₂ca₂cuë₃ Diú₄ të₂le₃ quianꞌ₅₄ dsa₂ i₂jme₁ꞌë́₂ jág₁ quiáin₅, ca₂cuë́ꞌ₃ ꞌniaꞌ₂ bá₄. A₂dse₃ quiánꞌ₂ ꞌniaꞌ₂ bá₄ ca₂jmo₃ Diú₄ caun₂ jág₁ quianꞌ₅₄ dsa₂ canꞌ₅₄ quián₂ jniog₄ ma₂lɨ́gꞌ₂, juɨ₁liaꞌ₂ ca₂tsɨ́ꞌ₃ Abraham: “Ca₂le₃jɨ́n₃ chiꞌ₂-guein₂ dsa₂ mɨ₂güɨ́g₃ le₃chain₂ dse₃ të₂le₃ quianꞌ₅₄ chiꞌ₂ dsióꞌ₂.”c
26 Liaꞌ₂ conꞌ₂ jme₁ca₂chónꞌ₂d Diú₄ Ja₁ŋiꞌ₅₄, ca₂chein₃ le₂ꞌuɨg₅₄ jɨnꞌ₄ ꞌniaꞌ₂, ia₁jaun₂ jme₃guꞌ₅₄, ia₁jaun₂ tíꞌ₄ ꞌniaꞌ₂ le₂jangꞌ₂ le₂jangꞌ₂ ca₂le₃jë́₃ dso₄ qui₂ꞌnauꞌ₂ ꞌniaꞌ₂.