Jme₁guan₃ Jme₂dsí₂ quián₅ Diú₄
2
Jme₁ca₂të́₂ Jmɨg₄ Të₂láu₃-guiá₂*, caun₂ bá₄ ja₁jme₁tionꞌ₅₄ le₁ŋɨꞌ₂ ca₂le₃jɨ́n₃ dsa₂ i₂ꞌén₂.
2 Conꞌ₂ tsá₃ jáin₅ jme₁ca₂nág₂, ca₂lë₃ gau₂ ca₂jan₃ gueiꞌ₅₄ liaꞌ₂ lë́₅ jë₁ꞌei₅ dsí₂ tiá₂ lɨn₃ ca₂lë₃, ca₂néꞌ₂ ta₁caun₂ dsi₂néi₂ ja₁jme₁tionꞌ₅₄ dsa₂.
3 Jaun₂ co₂tan₅₄ dsɨ₂juɨ₅ le₂jaun₂ qui₂ca₂séiꞌ₂ tsɨꞌ₄ si₂ qui₂të₁tsɨꞌ₅₄ ne₄ quióꞌ₅ dsa₂ ꞌéi₂, le₂jain₂ le₂jain₂.
4 Jaun₂ ca₂le₃jɨ́in₃ qui₂ca₂cainꞌ₂ quianꞌ₅₄ Jme₂dsí₂ Jŋió₅. Jaun₂ ca₂jme₃lióg₃ dsa₂ qui₂ca₂dsia₃ jág₁ jmei₅ siáꞌ₂, liaꞌ₂ conꞌ₂ lë́₅ ca₂cuë₃ Jme₂dsí₂ a₂juáꞌ₂ dsa₂.
5 Jmɨg₄ jaun₂ jme₁tionꞌ₅₄ dsa₂ judíos* juɨg₂ Jerusalén, i₂ja₂lén₂ ta₁caun₂ mɨ₂güɨ́g₃, a₂jme₂ti₃ conꞌ₂ tag₄ chíꞌ₅ quióꞌ₅.
6 Jme₁ca₂nág₂ mɨꞌ₅₄ a₂ca₂lë₃ jaun₂, qui₂ca₂ŋɨꞌ₂ dsa₂, tsá₃ caun₂ ca₂i₃jiog₅ dsɨ́₅, ia₁ ca₂le₃jɨ́n₃ bá₄ dsa₂ ꞌéi₂ jma₃quén₅ qui₂ca₂nág₂ jág₁ jmei₅ quióꞌ₅ a₂qui₂ca₂dsia₃ dsa₂ i₂tionꞌ₅₄ ꞌéi₂.
7 Jaun₂ dsɨ₃góꞌ₃ dsɨ́₅ ꞌŋio₅ lɨn₃, qui₂ca₂dsia₃ jág₁ guioin₅₄ quiainꞌ₅₄ rɨinꞌ₅₄, ca₂juáꞌ₂:
―¿On₁juaꞌ₅₄ dsa₂ chan₂ Galilea ca₂le₃jɨ́n₃ dsa₂ i₂dsia₅ jág₁ në₅?
8 ¿ꞌA₂ bá₄ liaꞌ₂ néꞌ₂ dsia₂₃ jág₁ jmei₅ quióꞌ₅ juɨg₂ go₄ jniog₄ le₂jau₂ le₂jau₂?
9 Dsa₂ i₂tionꞌ₅₄ ja₁lá₃ i₂chan₂ juɨg₂ Partia, dsa₂ chan₂ Media, dsa₂ chan₂ Elam, dsa₂ chan₂ Mesopotamia, i₂chan₂ Judea, i₂chan₂ Capadocia, dsa₂ chan₂ Ponto, dsa₂ chan₂ ꞌuë₃ Asia,
10 dsa₂ chan₂ Frigia quianꞌ₅₄ Panfilia, dsa₂ ja₂lén₂ ꞌuë₃ Egipto quianꞌ₅₄ juɨg₂ ꞌuë₃ Africaa a₂niog₅ uɨ́ng₂ conꞌ₂ guë́₄ Cirene. Ján₃ bá₄ tionꞌ₅₄ dsa₂ chan₂ Roma i₂ma₂tiánꞌ₅ ja₁lá₃. I₂lɨn₅₄ ꞌéi₂ jme₁ma₂lɨ́n₅ judíos; i₂lɨn₅₄ guëꞌ₂ ma₂gue₃ juáꞌ₅ quióꞌ₅ dsa₂ judíos.
11 Ján₃ bá₄ tionꞌ₅₄ dsa₂ chan₂ ꞌuë₃ Creta, dsa₂ chan₂ Arabia në́₃. La₁ ca₂le₃jág₃ bá₄ jniog₄ néi₁ quianꞌ₅₄ jág₁ jmei₅ quián₂ a₂dsia₅ dsa₂ në₅ ca₂le₃jë́₃ a₂jláꞌ₁ a₂ꞌioꞌ₂ a₂jmo₅ Diú₄.
12 Jaun₂ ꞌŋio₅ dsɨ₂góꞌ₃ dsɨ́₅ dsa₂, tsá₃ caun₂ qui₂ca₂ꞌág₂ dsɨ́₅. Jŋiaꞌ₅₄ qui₂ŋɨ́iꞌ₅ rɨinꞌ₅₄:
―¿ꞌE₂ ꞌnióꞌ₄ juáꞌ₂ ca₂le₃jë́₃ a₂në₅?
13 I₂lɨn₅₄ guëꞌ₂ tsá₃ ꞌéin₂, jŋiaꞌ₅₄ qui₂jmógꞌ₂ burlas, jaun₂ ca₂juáꞌ₂:
―I₂le₁ꞌen₅ bá₄ i₂në₅.
Jág₁ a₂ca₂juáꞌ₂ Pe₄ ca₂tsɨ́ꞌ₃ dsa₂
14 Jaun₂ ca₂nau₂ Pe₄ jë₄ jme₁guá₄ quiainꞌ₅₄ guë́₄ guia₃-ján₃ chiꞌ₂ dsɨ₂guia₃-tɨ́n₂ rɨinꞌ₅₄. Jaun₂ ca₂juáꞌ₂ tiá₂ ca₂tsɨ́ꞌ₃ dsa₂:
―ꞌNiaꞌ₂ dsa₂ chan₂ Judea quianꞌ₅₄ ca₂le₃jɨ́ngꞌ₃ i₂tiánꞌ₅ Jerusalén në́₃, juɨ₁le₂ŋiꞌ₅₄ ꞌniaꞌ₂ jág₁ la₂. Nei₂ ꞌniaꞌ₂ dse₃ a₂juáꞌ₄ jniá₂ la₂.
15 Tsá₃ le₁ꞌen₅ dsa₂ la₂ juɨ₁liaꞌ₂ lɨ́nꞌ₂ ꞌniaꞌ₂, ia₁ conꞌ₂ hora ŋí₁ ŋi₃ të₂ o₃ꞌiog₂b bá₄ guë́₄ la₂.
16 Të₂le₃ a₂rë₂ti₃ conꞌ₂ lë́₅ jág₁ a₂ca₂ꞌë́₂ Joel ma₂lɨ́gꞌ₂, liaꞌ₂ conꞌ₂ jme₁ca₂juáꞌ₂:
17 Jë₁ca₂tóꞌ₂ jmɨg₄, juáꞌ₂ Diú₄,
tsɨng₅₄ Jme₂dsí₂ quiáng₃ jaun₂ sióin₃
ne₄ quióꞌ₅ ca₂le₃jɨ́n₃ dsa₂ mɨ₂güɨ́g₃.
Ja₂ŋíꞌ₂ ꞌniaꞌ₂, ja₁mɨ́gꞌ₄ në́₃
qui₃dsia₃ o₄quió₃ jniá₂.
Dsó₂ chiꞌ₂ quiánꞌ₂ ꞌniaꞌ₂ në́₃
a₂lë₁qui₃jág₃ ꞌe₂ qui₃jág₃,
dsɨ₂guiꞌ₅₄ canꞌ₅₄ guëꞌ₂ qui₃quɨ₃.
18 Jmɨg₄ jaun₂, qui₁ꞌɨ́ng₄ Jme₂dsí₂ quiáng₃
ne₄ quióꞌ₅ dsa₂ ŋeꞌ₂, dsa₂ mɨ́₂ në́₃
i₂jme₂ti₃ ta₁ ne₃,
jaun₂ guë́₄ qui₃dsia₃ o₄quió₃ jniá₂.
19 Dsɨ₁ gueiꞌ₅₄ guëꞌ₂ qui₁ꞌë́₄ jniá₂ dsa₂
cosas a₂dsɨ₃góꞌ₃ dsɨ́₅.
Ne₄ guaꞌ₅₄ ꞌuë₃ guëꞌ₂
jmo₅₄ jniá₂ lé₂ léi₄,
juɨ₁liaꞌ₂ jmɨ₂, si₂, jnei₅ lë́₅ jme₁ŋi₁ në́₃.
20 ꞌIog₂ guëꞌ₂ co₂dsia₅ le₃liaꞌ₂.
Tsɨꞌ₂ guëꞌ₂ lé₂ guéin₂ liaꞌ₂ lë́₅ jmɨ₂.
Ca₂le₃jë́₃ a₂në₅ lé₂ néꞌ₃ guë́₄
a₂guá₂ jmɨg₄ quióꞌ₅ Te₁guiꞌ₅₄.
Jmɨg₄ jaun₂ lé₂ caun₂ jmɨg₄ juëꞌ₂ a₂gau₂.
21 Jaun₂ ca₂le₃jɨ́n₃ dsa₂ i₂mɨ₅ chi₂lénꞌ₂ Te₁guiꞌ₅₄,
lióin₂ bá₄.c
22 ꞌꞌNiaꞌ₂ dsa₂ chan₂ Israel*, nei₂ ꞌniaꞌ₂ ca₂le₃jë́₃ a₂juáꞌ₄ jniá₂ la₂. Jesús chan₂ Nazaret dsa₂ dsen₃ quián₅ Diú₄, i₂ca₂cuë́ꞌ₃ ꞌéiꞌ₃ ca₂chein₃ jɨnꞌ₄ ꞌniaꞌ₂. Ca₂jmo₃ Diú₄ ca₂le₃jë́₃ léi₄ juëꞌ₂, ca₂le₃jë́₃ ꞌe₂ dsɨ₂góꞌ₃ dsɨ́₅ dsa₂, qui₂ca₂jmo₃ të₂le₃ quianꞌ₅₄ Jesús jɨnꞌ₄ ꞌniaꞌ₂. A₂ŋiꞌ₅₄ rë₂ bá₄ ꞌniaꞌ₂ jaun₂.
23 La₁ jme₁ca₂jángꞌ₂ dsa₂ o₄gogꞌ₂ ꞌniaꞌ₂ conꞌ₂ jme₁ma₂lë́₅ jág₁ quióꞌ₅ Diú₄ a₂ma₂ŋi₅ le₂jŋiá₅, ꞌniaꞌ₂ në́₃ ca₂changꞌ₂ i₂ꞌéi₂, ca₂teꞌ₅₄ chi₁ꞌŋei₂₃, ca₂i₁jɨinꞌ₅₄ ꞌniaꞌ₂ o₄gú₃ dsa₂ ꞌlɨnꞌ₅₄ i₂tsá₃ ŋéi₂ dsɨ́₅. Jaun₂ ca₂jŋagꞌ₃ ca₂tion₃ cróg₄.
24 La₁ Diú₄ ca₂jme₃jeinꞌ₅₄ táng₃, ca₂lió₂ ne₄ ꞌmú₃. Ia₁ tsá₃ lé₂ juaꞌ₅₄ a₂të₃roin₅₄ a₂rë₃join₅ co₂tan₅₄ jɨn₄ ꞌlag₄.
25 Ia₁ ca₂juáꞌ₂ ꞌlag₄ Rag₅₄ David a₂ꞌɨin₂₃ Jesús, ca₂juáꞌ₂:
Ia₁ jɨn₄ bá₄ jniá₂ tián₂ Te₁guiꞌ₅₄
cau₅ quió₃.
ꞌÉi₂ bá₄ guá₅ të₂le₃ gu₃ ne₁,
ia₁jaun₂ ꞌi₁jan₂ tsá₃ ꞌein₂ lé₂ jmógꞌ₂ jleng₃,
ꞌɨ₅ dsɨ₃.
26 Jaun₂ lë₃, ꞌŋio₅ lɨn₃ ca₂jmo₃ jniá₂ ꞌioꞌ₂,
jaun₂ ca₂juáꞌ₃ quianꞌ₅₄ le₁tsɨꞌ₃
jág₁ a₂jéin₅ liánꞌ₂.
Jaun₂ lë₃ tsá₃ ꞌɨ₅ dsɨ₃ jë₁ma₂ca₂jon₃ nɨ₁ŋɨ₃.
27 Ia₁ tsá₃ cuë́ꞌ₁ jmɨg₄ a₂jŋia₃ jme₂dsí₂ quiáng₃
ja₁tionꞌ₅₄ ꞌlag₄,b
on₃ guëꞌ₂ cuë́ꞌ₁ jmɨg₄ a₂siáꞌ₃ nɨ₁ŋɨ₃ jniá₂,
dsa₂ jŋió₅ quiángꞌ₂ i₂ꞌniógꞌ₃.
28 Ca₂ꞌëꞌ₅₄ ca₂jme₁tagꞌ₂ juɨ₅ ja₁tɨ́nꞌ₄ jme₂dsí₂ quiáng₃.
Jaun₂ jmóꞌ₂ jéin₄ liánꞌ₂ jë₁ma₂ꞌeng₅₄ ja₁congꞌ₂.d
29 ꞌRɨnꞌ₅₄ jniog₄, léi₄ dsónꞌ₂ bá₄ ca₂jon₃ tsɨ₁jon₂ jmei₂ jniog₄ David, jaun₂ ca₂ꞌoin₃. Në₅ bá₄ chíꞌ₅ guëꞌ₂ tau₂ ꞌŋio₅ quióꞌ₅ quianꞌ₅₄ jniog₄ rë₂në́₃.
30 La₁ David ꞌéi₂ jme₁lɨ́n₄ jan₂ i₂jme₁ꞌë́₂ jág₁ quián₅ Diú₄, jaun₂ jme₁ŋi₅ rë₂ a₂ca₂cuë₃ Diú₄ jág₁ ꞌɨin₂₃ ꞌŋiog₅, a₂le₃chan₂ jë₄ quióꞌ₅ ja₁ŋiꞌ₅₄ chiꞌ₂ dsio₅₄, jan₂ i₂lɨ́n₅ I₂rë₂ꞌɨ́n₁* quián₅ Diú₄. Jaun₂ i₂ꞌéi₂ guá₃ goin₃ ne₄ ne₄ta₁ ja₁jme₁guá₄ ꞌŋiog₅ David.
31 Co₂ꞌnióꞌ₄ a₂ma₂jág₂ bá₄ David le₂jŋiá₅, ca₂juáꞌ₂ a₂jenꞌ₅₄ I₂rë₂ꞌɨ́n₁ quián₅ Diú₄. Jaun₂ ca₂juáꞌ₂ ján₃ a₂tsá₃ jŋia₃ jme₂dsí₂ quióꞌ₅ jɨn₄ ꞌlag₄,e on₃ guëꞌ₂ dsɨ₃ꞌén₂ nɨ₁ŋɨ₁₂ juaꞌ₅₄ a₂siáꞌ₃.
32 Ia₁ Diú₄ bá₄ ca₂jmo₃ ca₂jenꞌ₅₄ táng₃ ꞌŋiog₅ Jesús ꞌéi₂. Ca₂le₃jág₃ bá₄ jniaꞌ₅₄ ca₂të́₂ ne₄, jaun₂ lë₃ cuë₂ jág₁ dsau₅.
33 Jaun₂ ca₂chóꞌ₂ Diú₄ quianꞌ₅₄ gu₂ ne₁, ca₂jme₃juagꞌ₂. Jaun₂ Diú₄ Jmei₂ ca₂cuɨn₃ Jme₂dsí₂ quiáin₅ ca₂cuɨin₃ Jesús, liaꞌ₂ conꞌ₂ lë́₅ jág₁ quióꞌ₅ ma₂cuë₃. Jaun₂ ca₂le₃jë́₃ a₂në₅ a₂ma₂jagꞌ₅₄ a₂ma₂neiꞌ₂ ꞌniaꞌ₂, já₅ ne₄ ꞌéi₂ bá₄.
34 Ia₁ on₃juaꞌ₅₄ David ca₂uɨ́g₂ gueiꞌ₅₄ i₂juɨ́g₃, ia₁ ꞌŋiog₅ David ca₂juáꞌ₃:
Ca₂juáꞌ₂ Diú₄ ca₂tsɨ́ꞌ₃ Te₁guiꞌ₅₄ quiáng₃:
“Né₂ con₂ jniá₂ të₂le₃ gu₃ ne₁,
35
ca₂liaꞌ₂ ca₂të́₂ jmɨg₄
a₂tónꞌ₁ jniá₂ dsa₂ i₂ꞌiog₅₄ o₄tagꞌ₄”.f
36 Juɨ₁le₂ŋi₅ rë₂ ca₂le₃jɨ́n₃ dsa₂ chan₂ juɨg₂ Israel, jaun₂ tsá₃ juɨ₁ꞌei₅₄ caun₂-tɨn₃ dsɨ₅, ia₁ ꞌŋiog₅ Jesús ꞌéi₂ bá₄, i₂ca₂tiónꞌ₃ ꞌniaꞌ₂ cróg₄, Diú₄ në́₃ ma₂jmo₃ ma₂lɨ́in₅ liaꞌ₂ Te₁guiꞌ₅₄ liaꞌ₂ rëꞌ₂ I₂rë₂ꞌɨ́n₁ quiáin₅.
37 Jme₁ca₂nág₂ dsa₂ le₂në₅ tioinꞌ₅₄, qui₂ca₂táꞌ₂ ꞌliaꞌ₂ dsɨ́₅ ꞌŋio₅ lɨn₃. Jaun₂ ca₂ŋɨ́iꞌ₃ Pe₄ quiainꞌ₅₄ chiꞌ₂ dsɨ₂guia₃-tɨ́n₂ rɨinꞌ₅₄ ca₂juáꞌ₂:
―Rɨnꞌ₅₄ jniog₄, ¿ꞌe₂ ꞌnióꞌ₅ jmó₁ jniaꞌ₅₄?
38 Jaun₂ ca₂ŋag₃ Pe₄:
―Jme₁tsɨ́n₄ ꞌniaꞌ₂ ꞌauꞌ₂, jenꞌ₄ ꞌniaꞌ₂ të₂le₃ quióꞌ₅ Diú₄, chon₅₄ ꞌniaꞌ₂ jmɨg₂ le₂jangꞌ₂ le₂jangꞌ₂ liaꞌ₂ conꞌ₂ lë́₅ ꞌéiꞌ₃ quióꞌ₅ Jesús, cuëꞌ₅₄ léi₄ a₂qui₂ma₂ꞌén₂ dsáuꞌ₂ ꞌniaꞌ₂. Jaun₂ guë́₄ cuɨn₃ Diú₄ Jme₂dsí₂ Jŋió₅ quiáin₅.
39 Jág₁ në₅ ca₂cuë₃ Diú₄ quiánꞌ₂ ꞌniaꞌ₂ ca₂le₃jɨ́ngꞌ₃, ca₂le₃jɨ́n₃ chiꞌ₂-guein₂ quiánꞌ₂ ꞌniaꞌ₂ në́₃, quianꞌ₅₄ ca₂le₃jɨ́n₃ guë́₄ dsa₂ i₂chan₂ uɨ́ng₂. Jág₁ në₅ quióꞌ₅ ca₂le₃jɨ́n₃ dsa₂ i₂ꞌnio₃ Te₁guiꞌ₅₄ Diú₄ quián₂ jniog₄ të₂.
40 Quianꞌ₅₄ jág₁ la₂, quianꞌ₅₄ ꞌlióng₂ guë́₄ jág₁ siáꞌ₂, ca₂juáꞌ₂ Pe₄ tion₅₄ ca₂tsɨ́ꞌ₃ dsa₂:
―Lion₄ ꞌniaꞌ₂ jɨn₄ dsa₂ i₂ma₂i₂cónꞌ₅ rë₂në́₃.
41 Jaun₂ ca₂le₃jɨ́n₃ i₂ca₂tónꞌ₃ juɨ₅ ca₂nág₂ jág₁ dse₃ ca₂juáꞌ₂ Pe₄, qui₂ca₂jŋói₂ jmɨg₂. Jmɨg₄ jaun₂ conꞌ₂ ꞌnɨ₅ mei₅ dsa₂ i₃tonꞌ₅₄ të₂le₃ jɨn₄ dsa₂ i₂ma₂ꞌén₂ të₂le₃ quióꞌ₅ Jesucristo.
42 Ca₂le₃jɨ́n₃ dsa₂ ca₂jŋaꞌ₃ tiá₂ ca₂le₃jë́₃ jág₁ a₂jme₂tag₅ chiꞌ₂ dsɨ₂guia₃-tɨ́n₂. Caun₂ bá₄ jág₁ quióꞌ₅ ca₂jmo₃ ca₂le₃jɨ́in₃, chi₂léinꞌ₂ Diú₄, qui₂tóinꞌ₅ co₂lë₅, jmo₂₃ dsóg₁ i₁ŋíꞌ₄.
ꞌA₂ liaꞌ₂ jme₁chan₂ dsa₂ le₂ꞌuɨg₅₄ i₂ꞌén₂ jág₁ dse₃
43 ꞌŊio₅ i₂góꞌ₃ dsɨ́₅ dsa₂ ca₂le₃jë́₃ léi₄ a₂qui₂ca₂jmo₃ Diú₄ të₂le₃ quianꞌ₅₄ dsɨ₂guia₃-tɨ́n₂ i₂chen₄*g quiáin₅.
44 Ca₂le₃jɨ́n₃ dsa₂ i₂ma₂ꞌén₂, caun₂ bá₄ jág₁ ꞌei₅ quióꞌ₅, jaun₂ ca₂le₃jë́₃ a₂jme₁cha₂ quióꞌ₅, jme₁lë́₄ quióꞌ₅ ca₂le₃jɨ́n₃ rɨinꞌ₅₄.
45 Ca₂le₃jë́₃ ꞌe₂ cosa cha₂ quióꞌ₅, qui₂ca₂ꞌnag₃, jaun₂ jme₁qui₂dsióꞌ₅ cu₄ jaun₂ ꞌein₂ rɨinꞌ₅₄ ꞌnióꞌ₅ quióꞌ₅.
46 Ca₂le₃jë́₃ jmɨg₄ jme₁ŋɨiꞌ₂ i₁dsi₅ guáꞌ₅ templo*. Dsi₂néi₂ quióꞌ₅ në́₃, jme₁dsióꞌ₅ i₁ŋíꞌ₄ jme₁guë́ꞌ₅ co₂dsia₅, ca₂le₃jɨ́in₃ jmo₂₃ ꞌioꞌ₂, caun₂ bá₄ ꞌei₅ dsɨ́₅.
47 Ca₂le₃jɨ́in₃ jme₁cuë́ꞌ₅ ti₁ꞌmagꞌ₄ Diú₄, jaun₂ ca₂le₃jɨ́n₃ dsa₂ siánꞌ₂ jme₁ꞌnioi₃ dsa₂ ꞌéi₂. Jaun₂ ca₂le₃jë́₃ jmɨg₄ bá₄ jmo₅ Te₁guiꞌ₅₄ caun₂ dsɨ₂juɨ́n₂ dsa₂ i₂lón₂.