Pe₄ quianꞌ₅₄ Cornelio
10
Juɨg₂ Cesarea jme₁chan₂ jan₂ dsa₂ i₂jme₁chen₂ Cornelio, i₂jme₁lɨ́n₄ juɨg₅₄ co₂nióꞌ₃ ꞌlióg₂ i₂të́ꞌ₂ dsa₂ i₂chan₂ Italia.
2 Juɨg₅₄ ꞌlióg₂ ꞌéi₂ jme₁jme₂gain₃ Diú₄ co₂lë₅ quiainꞌ₅₄ dsa₂ dsi₂néi₂ quióꞌ₅. Ján₃ bá₄ jme₁dsióꞌ₅ cu₄ jme₁jme₂ꞌoin₅₄ dsa₂ judíos*. Ca₂le₃jë́₃ jmɨg₄ në́₃, jme₁chi₁léinꞌ₂ Diú₄.
3 Co₂ráun₂ conꞌ₂ hora ŋí₁ ꞌnɨ₅ le₃ca₂ꞌláu₂,a a₂lë₁ca₂jénꞌ₃ ca₂jág₃ ca₂jɨ́in₂ jan₂ ángel quián₅ Diú₄ ca₂ꞌí₃ dsi₂néi₂ ja₁ꞌein₅₄. Jaun₂ ca₂juáꞌ₂ ángel:
―¡Cornelio!
4 Jaun₂ ca₂jág₃ Cornelio góꞌ₅ ꞌŋio₅ lɨn₃ ca₂jɨ́in₂ ángel. Jaun₂ ca₂ŋag₃ ca₂juáꞌ₂:
―¿ꞌE₂ lë́₅, guiꞌ₅₄?
Jaun₂ guë́₄ ca₂juáꞌ₂ ángel:
―A₂nag₅ bá₄ Diú₄ a₂juɨgꞌ₂ a₂chi₂leinꞌ₅₄. Jág₅ bá₄ a₂jmoꞌ₂ dse₃ ꞌauꞌ₂ jme₂ꞌongꞌ₅₄ dsa₂ te₂ŋé₂.
5 Jaun₂ lë₃ chen₅ dsa₂ juɨg₂ Jope dsɨ₃quiáin₂ dsa₂ i₂chen₂ Si₂mu₅₄ i₂të́ꞌ₂ dsa₂ Pe₄ ján₃.
6 I₂ꞌen₅₄ ja₁quióꞌ₄ Si₂mu₅₄ siánꞌ₂ i₂jmo₅ dse₃ lo₄ jáꞌ₂, i₂chíꞌ₅ ꞌne₄ cheiꞌ₅₄ jmɨ₁ŋíꞌ₄.
7 Jme₁ma₂ŋáꞌ₅ ángel, jaun₂ ca₂të́ꞌ₃ Cornelio on₃ dsa₂ mozo quiáin₅, jan₂ guëꞌ₂ ꞌlióg₂, dsa₂ jme₂ti₃ i₂jme₂gan₃ Diú₄ ján₃.
8 Jaun₂ ca₂dsia₃ Cornelio ca₂tsɨ́ꞌ₃ dsa₂ a₂ca₂jénꞌ₃, jaun₂ ca₂chein₃ dsa₂ juɨ₅ juɨg₂ Jope.
9 Jme₁jnia₃ jaun₂, ca₂i₃lén₂ dsa₂ ꞌéi₂. Pe₄ në́₃ ca₂uɨ́g₂ le₃coꞌ₅₄ tsɨ₁ꞌné₅ conꞌ₂ dsi₃ŋíꞌ₃b a₂chi₃léinꞌ₂ Diú₄.
10 I₁cónꞌ₅ ꞌŋio₅ lɨn₃. Të₁liaꞌ₂ jmo₅ dsa₂ má₃ në́₃, jaun₂ a₂lë₁ca₂jénꞌ₃ ca₂jág₃ Pe₄
11 ca₂niá₃ gueiꞌ₅₄ i₂juɨ́g₃. Jaun₂ ca₂sió₃ juɨ₁liaꞌ₂ caun₂ tsɨ₁ꞌmɨꞌ₂ pa₁ a₂rë₂quein₅ ta₁quén₂ quiꞌ₅₄.
12 ꞌŊióꞌ₃ jaun₂, jme₁tionꞌ₅₄ ca₂le₃jɨ́n₃ ne₅₄ jáꞌ₂: jáꞌ₂ cha₂ quén₂ mɨ₂tag₄, jáꞌ₂ i₂tsë́ꞌ₅ quióꞌ₅, jáꞌ₂ i₂ꞌɨn₅ gueiꞌ₅₄ në́₃.
13 Jaun₂ ca₂nág₂ Pe₄ jág₁ ca₂juáꞌ₂:
―Nau₂ Pe₄, jme₁dsian₅ jáꞌ₂, quɨ́ngꞌ₄.
14 Jaun₂ ca₂ŋag₃ Pe₄:
―Jan₂ꞌón₄, Te₁guiꞌ₅₄. Ia₁ ꞌi₁co₂ráun₂ tsá₃ ma₂ca₂guë́ꞌ₃ jniá₂ nɨ₁ŋɨ₁ jáꞌ₂ a₂jmo₅ a₂rë₂ꞌŋio₅ dsa₂.
15 Jaun₂ ca₂ŋag₃ táng₃ jág₁ a₂juáꞌ₂:
―Tsá₃ lë₁juáꞌ₂ ꞌne₂ ꞌlɨgꞌ₅₄ cosa a₂ma₂jmo₃ Diú₄ le₁jë́₃.
16 ꞌNɨ₅ ráun₂ ca₂lë₃ le₂jaun₂, jaun₂ guë́₄ ca₂ŋáuꞌ₃ táng₃ tsɨ₁ꞌmɨꞌ₂ juɨ₅ gueiꞌ₅₄.
17 Të₁liaꞌ₂ guá₅ Pe₄ ꞌnoꞌ₂ dsɨ́₅ ꞌe₂ léi₄ jángꞌ₅ a₂ca₂jág₃ jaun₂, jme₁ca₂dsi₃lén₂ dsa₂ i₂chen₄ quián₅ Cornelio o₄ꞌné₄ quióꞌ₅ Si₂mu₅₄, a₂ŋag₂₃ a₂jáꞌ₄ chíꞌ₅ ꞌne₄ Si₂mu₅₄.
18 Jme₁ca₂dsi₃lén₂ dsa₂ ꞌéi₂, ca₂ŋag₃ juáꞌ₂ tiá₂ chi₂juaꞌ₂ ꞌen₅₄ ja₁jaun₂ jan₂ dsa₂ i₂chen₂ Si₂mu₅₄ i₂të́ꞌ₂ dsa₂ Pe₄ ján₃.
19 Të₁liaꞌ₂ jaun₂ caun₂ qui₂ꞌnoꞌ₂ dsɨ́₅ Pe₄ a₂ca₂jág₃, jaun₂ ca₂juáꞌ₂ Jme₂dsí₂ Jŋió₅:
―Jag₄; ún₂ dsa₂ o₂lén₂ ꞌnauꞌ₂.
20 Nau₂, sión₅, gua₂ quiainꞌ₅₄, tsá₃ lë₁jmo₂ ꞌɨ₅ ꞌauꞌ₂ juaꞌ₅₄ lɨ́ngꞌ₂ a₂tsá₃ tí₅ jág₁, ia₁ jniá₂ bá₄ në₂tsɨ́in₂.
21 Jaun₂ ca₂sión₃ Pe₄ ca₂i₁jɨin₁₂ dsa₂ i₂chen₄ quián₅ Cornelio, jaun₂ ca₂juáꞌ₂ Pe₄:
―Jniá₂ bá₄ ꞌéi₂ i₂ꞌnaꞌ₂ ꞌniaꞌ₂. ¿Cha₁ ta₁ ja₂nóꞌ₅ ꞌniaꞌ₂?
22 Jaun₂ ca₂ŋag₃ táng₃ dsa₂:
―Guiꞌ₅₄ juɨg₅₄ ꞌlióg₂ Cornelio bá₄ ca₂chei₃ jniaꞌ₅₄ ja₂náu₅. Dsa₂ dsen₃ bá₄ ꞌéi₂, i₂jme₂gan₃ Diú₄; ꞌnio₃ dsa₂ judíos ꞌŋio₅ lɨn₃, jme₂go₃ në́₃. Jan₂ ángel i₂chen₄ quián₅ Diú₄ ca₂juáꞌ₂ a₂të́ꞌ₂ ꞌne₂ ja₁quióꞌ₄ jaun₂ nag₃ ꞌe₂ jág₁ cuëꞌ₅₄.
23 Jaun₂ ca₂juáꞌ₂ Pe₄ tónꞌ₃ dsa₂ ꞌéi₂ dsi₂néi₂, jaun₂ ja₁jaun₂ ca₂jŋia₃ dsa₂ ꞌéi₂ quiainꞌ₅₄ Pe₄ a₂ꞌuë₂ jaun₂. Jme₁jnia₃ jaun₂ guë́₄ ca₂ŋó₃ Pe₄ quiainꞌ₅₄ dsa₂ ꞌéi₂. Ca₂jme₃quiongꞌ₅₄ guë́₄ i₂lɨn₅₄ dsa₂ rɨinꞌ₅₄ i₂jme₁ꞌén₂ i₂jme₁tiánꞌ₄ juɨg₂ Jope.
24 Jme₁jnia₃ jaun₂ guë́₄ táng₃, ca₂dsi₃léin₂ juɨg₂ Cesarea ja₁guá₄ Cornelio. ꞌÉi₂ guëꞌ₂ në́₃ jme₁ma₂chi₁jŋiog₂₃ quiainꞌ₅₄ co₂nióꞌ₃ o₁rɨinꞌ₅₄ a₂mei₅₄ quiáin₅ i₂jeinꞌ₂ ꞌŋio₅ lɨn₃ quiainꞌ₅₄ në́₃, i₂ca₂të́ꞌ₃.
25 Jme₁ca₂dsióg₃ Pe₄ o₄ꞌné₄, co₂tan₅₄ ca₂o₃ꞌɨ́n₃ Cornelio ca₂guei₃, ca₂chi₃jné₃ ne₄ ꞌéi₂, ca₂jme₃juagꞌ₂.
26 La₁ Pe₄ në́₃ ca₂chóꞌ₂, ca₂juáꞌ₂:
―Nau₂, ia₁ dsa₂ mɨ₂güɨ́g₃ bá₄ jniá₂, juɨ₁liaꞌ₂ ꞌne₂ ján₃.
27 Të₃ dsia₅ jág₁ Pe₄ quiongꞌ₅₄, ca₂ꞌí₃ dsi₂néi₂, jaun₂ ca₂jág₃ juɨn₅ bá₄ dsa₂ ma₂le₁ŋɨꞌ₂ dsi₂néi₂.
28 Jaun₂ ca₂juáꞌ₂ Pe₄ ca₂tsɨ́ꞌ₃ dsa₂:
―Ŋiꞌ₅₄ bá₄ ꞌniaꞌ₂ jaun₂ tsá₃ cuë₅ jmɨg₄ ꞌÉiꞌ₃ Juáꞌ₅ quióꞌ₅ dsa₂ judíos juaꞌ₅₄ a₂ŋɨiꞌ₂ quianꞌ₅₄ dsɨ₂nau₂, on₃ guëꞌ₂ lé₂ ŋɨ́i₃ dsi₂néi₂ quióꞌ₅. La₁ Diú₄ ma₂ꞌë₃ a₂tsá₃ të́₄ jniá₂ ꞌi₁jan₂ dsa₂ tsá₃ le₁jɨ́in₃.
29 Jaun₂ lë₃ dsɨ₂juɨ₅ bá₄ guio₃ jme₁ca₂dsi₃lén₂ dsa₂ quiángꞌ₂, të́₂. Tsá₃ në₂jan₅₄ uë́₂. Jaun₂ jme₁ꞌnio₃ le₃guion₅₄ ꞌe₂ lë₃, ꞌe₂ ta₁ në₂tëꞌ₂.
30 Jaun₂ ca₂ŋag₃ Cornelio:
―Ma₂quén₂ jmɨg₄, conꞌ₂ hora la₂ jme₁ꞌeng₅₄ dsi₂néi₂ la₂ quió₃, jme₁jme₂ꞌɨng₅₄, tsá₃ ca₂guë́ꞌ₃. Jme₁ꞌeng₅₄ chi₁lengꞌ₄ Diú₄ të₂le₃ ca₂ꞌláu₂. Jaun₂ a₂lë₁ca₂jéin₃ ca₂jɨng₅₄ jan₂ dsa₂ quiꞌ₂ ꞌmɨꞌ₂ tiog₂ jau₂.
31 Jaun₂ ca₂juáꞌ₂ ca₂tság₃ jniá₂: “Cornelio, a₂nág₅ bá₄ Diú₄ a₂juɨgꞌ₂. Jág₅ bá₄ a₂jmoꞌ₂ dse₃ ꞌauꞌ₂ jme₂ꞌongꞌ₅₄ dsa₂ te₂ŋé₂.
32 Jaun₂ lë₃, chen₅ dsa₂ juɨg₂ Jope dsɨ₃quiáin₂ dsa₂ i₂chen₂ Si₂mu₅₄ i₂të́ꞌ₂ dsa₂ Pe₄ ján₃. I₂ꞌen₅₄ ja₁quióꞌ₄ Si₂mu₅₄ siánꞌ₂ i₂jmo₅ dse₃ lo₄ jáꞌ₂, i₂chíꞌ₅ ꞌne₄ cheiꞌ₅₄ jmɨ₁ŋíꞌ₄. Jë₁ma₂guain₂₃, dsia₃ jág₁ quianꞌ₅₄ ꞌne₂.”
33 Jaun₂ bá₄ lë₃ ca₂tsɨ́ng₂ dsa₂ dsɨ₂juɨ₅ a₂i₁ꞌniaiꞌ₂ ꞌne₂ në́₃. Dse₃ bá₄ liaꞌ₂ në₂jmoꞌ₅₄ ŋeꞌ₃. Jaun₂ lë₃ tioꞌ₅₄ jniaꞌ₅₄ ca₂le₃jág₃ le₁ŋagꞌ₂ ne₄ Diú₄ ia₁ ꞌniog₂ jniaꞌ₅₄ néi₁ jág₁ a₂ma₂cuë₃ Te₁guiꞌ₅₄ a₂juɨgꞌ₅₄ jniaꞌ₅₄.
Jág₁ a₂ca₂ton₃ Pe₄ dsi₂néi₂ quióꞌ₅ Cornelio
34 Jaun₂ ca₂jme₃lióg₃ Pe₄ ca₂juáꞌ₂ ca₂tsɨ́ꞌ₃ dsa₂:
―Në₃ guë́₄ dsónꞌ₂ ma₂ŋɨ́ꞌ₂ jniá₂, tsá₃ jma₃quén₅ jɨ́n₂ Diú₄ dsa₂ mɨ₂güɨ́g₃.
35 Ia₁ ca₂le₃jë́₃ juɨg₂ ja₁jme₂gan₃ dsa₂ Diú₄, nag₅ dsa₂ gau₂ jág₁ quióꞌ₅, jmo₂₃ dse₃ në́₃, dsa₂ le₂ꞌéi₂ bá₄ guénꞌ₂ Diú₄.
36 Ca₂juáꞌ₂ Diú₄ ca₂tsɨ́ꞌ₃ tsɨ₁jon₂ quián₅ Israel*, ca₂ꞌë́₂ jág₁ a₂tianꞌ₃ dsa₂ tei₄ të₂le₃ quianꞌ₅₄ Jesucristo i₂lɨ́n₅ Te₁guiꞌ₅₄ quián₅ ca₂le₃jɨ́n₃.
37 Ŋiꞌ₅₄ rë₂ bá₄ ꞌniaꞌ₂ ꞌe₂ ca₂lë₃ ta₁caun₂ juɨg₂ go₄ dsa₂ judíos, a₂ca₂jme₃lióg₃ ꞌuë₃ Galilea, cang₂ jme₁ma₂ꞌë́₂ Juan₅₄ jág₁, ca₂choin₃ dsa₂ jmɨg₂ në́₃.
38 Ŋiꞌ₅₄ bá₄ ꞌniaꞌ₂ ꞌa₂ liaꞌ₂ ca₂cuë₃ Diú₄ ca₂cuë́ꞌ₃ Jesús chan₂ Nazaret juɨ₅bí₂ quióꞌ₅ Jme₂dsí₂ Jŋió₅; ꞌa₂ liaꞌ₂ ca₂ŋɨ₃ jmo₂₃ dse₃, jme₂ꞌlióin₂ ca₂le₃jɨ́n₃ dsa₂ i₂jme₁chan₂ jmɨ₁uɨg₅ jmógꞌ₂ i₂së₃dsen₃. Ca₂le₃jë́₃ a₂në₅ ca₂jmo₃ ia₁ jme₁quiainꞌ₅₄ Diú₄.
39 Ca₂të́₂ ne₄ jniaꞌ₅₄ ca₂le₃jë́₃ a₂në₅ a₂ca₂jmo₃ Jesús, liaꞌ₂ jë₄ juɨg₂ Jerusalén, liaꞌ₂ le₂tan₅₄ ja₁tiánꞌ₄ dsa₂ chan₂ Judea. Cang₂ jaun₂ ca₂jŋagꞌ₃ dsa₂ ca₂tion₃ cróg₄.
40 La₁ jë₁ca₂të́₂ ꞌnɨ₅ jmɨg₄, ca₂jme₃jeinꞌ₅₄ táng₃ Diú₄ Jmei₂, ca₂jmo₃ ca₂jme₃jnia₅ ꞌéi₂ jɨn₄ jniaꞌ₅₄.
41 Tsá₃ ca₂jme₃jniai₂₃ jɨn₄ ca₂le₃jɨ́n₃ dsa₂. Jmáꞌ₃ liaꞌ₂ jë₄ quián₂ jniaꞌ₅₄ bá₄ conꞌ₂ dsa₂ i₂ca₂quióinꞌ₂ le₂jŋiá₅ i₁të₃ ne₄. Ca₂que₅₄ guë́₄ jniaꞌ₅₄ co₂lë₅ quiainꞌ₅₄ jme₁ma₂jeinꞌ₅₄ táng₃ jɨn₄ ꞌlag₄.
42 Jaun₂ ca₂jmo₃ ꞌéiꞌ₃ a₂qui₂dsɨ₁ꞌë́₄ jniaꞌ₅₄ jág₁, a₂dsɨ₁jangꞌ₅₄ jág₁ dsau₅ jɨn₄ dsa₂: Diú₄ ma₂dsiain₃ Jesús a₂qui₃dsɨ₅ ꞌéiꞌ₃ quióꞌ₅ dsa₂ i₂chan₂, quióꞌ₅ i₂ma₂dsan₃ në́₃.
43 Ján₃ bá₄ le₂në₅ jángꞌ₅ jág₁ dsau₅ ca₂le₃jɨ́n₃ dsa₂ i₂jme₁ꞌë́₂ jág₁ quiáin₅, a₂qui₃ꞌén₂ Diú₄ dsáu₁ ca₂le₃jɨ́n₃ dsa₂ i₂ꞌén₂ jág₁ quióꞌ₅.
Ca₂guei₃ dsɨ₂nau₂ ca₂guein₃ Jme₂dsí₂ Jŋió₅
44 Të₃jë₄ ꞌë́₂ guë́₄ Pe₄ jág₁, jme₁ca₂sión₃ Jme₂dsí₂ Jŋió₅ ne₄ quióꞌ₅ ca₂le₃jɨ́n₃ dsa₂ i₂tionꞌ₅₄ nag₅ jág₁.
45 Dsa₂ judíosc i₂jme₁ꞌén₂ i₂ca₂o₃lén₂ quianꞌ₅₄ Pe₄, tióin₂ jág₅ dsɨ₂góꞌ₃ dsɨ́₅, ia₁ ján₃ guëꞌ₂ ca₂guen₃ dsɨ₂nau₂ Jme₂dsí₂ Jŋió₅.
46 Ia₁ nag₂₃ dsia₅ dsa₂ jág₁ jmei₅ siáꞌ₂, jme₂juɨinꞌ₂ Diú₄.
47 Jaun₂ ca₂juáꞌ₂ Pe₄:
―¿Lé₂ le₃juaꞌ₅₄ tsá₃ jmɨg₂ lé₂ tsón₃ dsa₂ në₅, tonꞌ₂ ma₂në₂guein₃ bá₄ guëꞌ₂ Jme₂dsí₂ Jŋió₅, co₂rë₂ bá₄ juɨ₁liaꞌ₂ jniog₄?
48 Jaun₂ ca₂jmo₃ ꞌéiꞌ₃ a₂tsón₃ dsa₂ ꞌéi₂ jmɨg₂, liaꞌ₂ conꞌ₂ lë́₅ ꞌéiꞌ₃ quióꞌ₅ Jesucristo. Jme₁co₂lág₂ jaun₂, ca₂mɨ₃ dsa₂ ca₂tsɨ́ꞌ₃ Pe₄ a₂jŋia₃ guë́₄ tɨn₃-ꞌnɨ₅ jmɨg₄ quiongꞌ₅₄.