4 Jaun₂ ca₂juáꞌ₂ Pe₄ ca₂tsɨ́ꞌ₃ dsa₂ ca₂le₃jë́₃ ꞌa₂ liaꞌ₂ ca₂lë₃, ca₂juáꞌ₂:

5 ―Juɨg₂ Jope bá₄ jme₁ꞌeng₅₄, chi₁lengꞌ₄ Diú₄. Të₃jë₄ jaun₂, ca₂jéin₃ ca₂jág₃ juɨ₁liaꞌ₂ caun₂ tsɨ₁ꞌmɨꞌ₂ tióg₃ pa₁ a₂rë₂quein₅ le₃quén₂ quiꞌ₅₄, ca₂sió₃ juɨ₅ gueiꞌ₅₄, ca₂të₂ cau₅ quió₃.

6 Jme₁ca₂jág₃ jniá₂ dse₃ ꞌe₂ tioꞌ₅₄ ꞌŋióꞌ₃, juaꞌ₂ ca₂le₃jɨ́n₃ ne₄ jáꞌ₂ bá₄ tionꞌ₅₄: jáꞌ₂ cha₂ quén₂ mɨ₂tag₄, jáꞌ₂ tsáu₂ dsɨ́₅, jáꞌ₂ i₂tsë́ꞌ₅ quióꞌ₅, jáꞌ₂ i₂ꞌɨn₅ gueiꞌ₅₄ në́₃.

7 Jaun₂ ca₂nag₃ jág₁ a₂ca₂juáꞌ₂ ca₂tság₃ jniá₂: “Nau₂ Pe₄, jme₁dsian₅ jáꞌ₂, quɨ́ngꞌ₄.”

8 Jaun₂ ca₂ŋag₄ jniá₂: “Jan₂ꞌón₄, Te₁guiꞌ₅₄. Ia₁ ꞌi₁co₂ráun₂ tsá₃ ma₂ꞌí₅ ꞌo₃ ꞌi₁caun₂ a₂ꞌlɨgꞌ₅₄ a₂jmo₅ a₂rë₂ꞌŋio₅ dsa₂.”

9 Jaun₂ ca₂ŋag₃ táng₃ jág₁ a₂já₅ gueiꞌ₅₄, ca₂juáꞌ₂: “Juɨ₁liaꞌ₂ a₂ma₂jmo₃ Diú₄ le₁jë́₃, tsá₃ lë₁juáꞌ₂ ꞌne₂ ꞌlɨgꞌ₅₄.”

10 ꞌNɨ₅ ráun₂ ca₂lë₃ le₂jaun₂, jaun₂ guë́₄ ca₂ŋáuꞌ₃ táng₃ ca₂le₃jë́₃ juɨ₅ gueiꞌ₅₄.

11 Të₃jë₄ jaun₂ ca₂dsi₃lén₂ ún₂ dsa₂ ꞌné₅ ja₁jme₁ꞌeng₅₄, i₂chen₄ quián₅ dsa₂ chan₂ Cesarea a₂ꞌnauꞌ₂ jniá₂.

12 Jaun₂ Jme₂dsí₂ quián₅ bá₄ Diú₄ ca₂chei₃ ca₂ŋó₃ quiangꞌ₅₄ dsa₂ ꞌéi₂, caun₂ bá₄ ꞌei₅ dsɨ₃ ŋó₃. Ján₃ bá₄ i₁len₅₄ jŋé₂ rɨnꞌ₅₄ jniog₄ la₂ quiongꞌ₅₄ jniá₂. Jaun₂ ca₂tióꞌ₄ jniaꞌ₅₄ ca₂le₃jág₃ dsi₂néi₂ quióꞌ₅ dsa₂ chan₂ Cesarea ꞌéi₂.

13 Dsa₂ ꞌéi₂ ca₂dsia₃ ca₂tság₃ jniaꞌ₅₄ ꞌa₂ liaꞌ₂ ca₂jɨ́in₂ jan₂ ángel jme₁chénꞌ₄ dsi₂néi₂ quióꞌ₅ i₂ca₂juáꞌ₂: “Chen₅ dsa₂ juɨg₂ Jope a₂dsɨ₃quiáin₂ Si₂mu₅₄ i₂të́ꞌ₂ dsa₂ Pe₄ ján₃.

14 Dsa₂ ꞌéi₂ juáꞌ₂ ꞌa₂ liaꞌ₂ jmóꞌ₂, ia₁jaun₂ lióngꞌ₂, quiangꞌ₅₄ dsa₂ dsi₂néi₂ quiángꞌ₂.

15 Jme₁ca₂jme₁lióg₄ jniá₂ juɨ́g₂ jág₁, jaun₂ ca₂sión₃ Jme₂dsí₂ Jŋió₅ ne₄ quióꞌ₅ dsa₂ ꞌéi₂, juɨ₁liaꞌ₂ ca₂guain₃ ne₄ quián₂ jniog₄ le₂ꞌuɨg₅₄.

16 Jaun₂ guë́₄ ca₂dsáuꞌ₃ dsɨ₃ a₂ma₂ca₂juáꞌ₂ Te₁guiꞌ₅₄ le₂jŋiá₅: “Dsau₅ bá₄ ca₂tióg₃ Juan₅₄ ca₂tiáin₂ jmɨg₂ dsa₂, la₁ ꞌniaꞌ₂ guëꞌ₂ në́₃ tióg₂ Diú₄ Jme₂dsí₂ Jŋió₅.”^b

17 Jaun₂ chi₂juaꞌ₂ co₂rë₂ bá₄ ca₂cuë₃ Diú₄ ca₂cuë́ꞌ₃ dsa₂ ꞌéi₂ juɨ₁liaꞌ₂ a₂ma₂cuë₃ jniog₄ i₂ma₂ꞌén₂ të₂le₃ quióꞌ₅ Te₁guiꞌ₅₄ Jesucristo, ¿i₂ꞌein₂ bá₄ jniá₂ juaꞌ₅₄ jniá₂ jnɨg₅₄ ꞌéiꞌ₃ quióꞌ₅ Diú₄?

18 Jme₁ca₂nág₂ dsa₂ jág₁ në₅, tei₄ bá₄ ca₂jmo₃. Jaun₂ ca₂jme₃juɨinꞌ₂ Diú₄, ca₂tsɨ́ꞌ₃ rɨinꞌ₅₄:

19 Liaꞌ₂ conꞌ₂ jme₁ca₂jŋɨꞌ₃ dsa₂ Esteban, caun₂ qui₂ca₂co₃ꞌein₃ bá₄ dsa₂ quióꞌ₅ ca₂le₃jɨ́n₃ dsa₂ i₂ꞌén₂. Jaun₂ tion₅₄ bá₄ ca₂cuɨng₃ ca₂i₃léin₂ ca₂të₂ Fenicia, Chipre, Antioquía në́₃. La₁ jmáꞌ₃ dsa₂ judíos bá₄ ca₂cuë́ꞌ₃ jág₁ dse₃.

20 La₁ i₂lɨn₅₄ dsa₂ ꞌén₂ i₂chan₂ Chipre quianꞌ₅₄ Cirene ca₂dsi₃léin₂ juɨg₂ Antioquía ca₂dsia₃ jág₁ quianꞌ₅₄ dsa₂ chan₂ Grecia, ca₂ꞌë́₂ jág₁ dse₃ ca₂ꞌɨin₃ Te₁guiꞌ₅₄ Jesús.

21 Ca₂jme₃ꞌon₅₄ Te₁guiꞌ₅₄ dsa₂ ꞌéi₂ ja₁jaun₂ quianꞌ₅₄ bí₂ quióꞌ₅, jaun₂ lë₃ juɨn₅ lɨn₃ dsa₂ ca₂jéinꞌ₃ le₃quióꞌ₅ Te₁guiꞌ₅₄.

22 Jme₁ca₂rë₃ŋi₅ dsa₂ ꞌén₂ i₂tionꞌ₅₄ Jerusalén, jaun₂ ca₂chein₃ Bernabé ca₂të₂ Antioquía.

23 Jme₁ca₂dsióg₃ Bernabé ja₁jaun₂, jaun₂ ca₂jág₃ a₂dse₃ dsɨ́₅ Diú₄ a₂ca₂jmo₃ ja₁con₂ dsa₂ ꞌéi₂, jaun₂ lë₃ ca₂jmo₃ ꞌioꞌ₂. Jaun₂ ca₂toinꞌ₂ dsa₂ jág₁ dsia₃ tiá₂ dsɨ́₅, tsánꞌ₂ tiá₂ jág₁ ꞌein₃ Te₁guiꞌ₅₄.

24 Ia₁ dsa₂ dsen₃ bá₄ jme₁lɨ́n₄ Bernabé, jme₁rë₂rɨn₅ Jme₂dsí₂ Jŋió₅ të₂dsɨ́₅, jme₁ꞌéin₂ ꞌŋio₅ lɨn₃. Jaun₂ le₂në₅ juɨn₅ dsa₂ ca₂jénꞌ₃ të₂le₃ ja₁con₂ Te₁guiꞌ₅₄.

25 Cang₂ jaun₂ ca₂ŋó₃ Bernabé juɨg₂ Tarso a₂ca₂i₁ꞌniaiꞌ₂ Saulo. Jme₁ca₂dsáinꞌ₂ ꞌéi₂, jaun₂ ca₂tág₃ juɨg₂ Antioquía.

26 Ja₁jaun₂ ca₂tóinꞌ₂ caun₂ ŋi₂ quiainꞌ₅₄ dsa₂ i₂ꞌén₂ ja₁jaun₂, qui₂ca₂jme₃tɨin₂₃ juɨn₅ lɨn₃ dsa₂. Juɨg₂ Antioquía jaun₂ bá₄ ja₁le₂ꞌuɨg₅₄ ca₂quiong₃ dsa₂ ca₂quiain₃ dsa₂ i₂ꞌén₂ “cristianos”.

27 Jmɨg₄ jaun₂, i₂lɨn₅₄ dsa₂ i₂jme₁cuë₅ jág₁ dse₃ a₂ma₂gue₃ quióꞌ₅ Diú₄ ca₂ꞌuɨin₂ juɨg₂ Jerusalén ca₂i₁lein₅₄ Antioquía.

28 Jan₂ i₂chen₂ Agabo ca₂nau₂ jɨn₄ rɨinꞌ₅₄. Jaun₂ quianꞌ₅₄ bí₂ quióꞌ₅ Jme₂dsí₂ Jŋió₅, ca₂ꞌë́₂ jág₁ a₂le₃ꞌɨn₂ a₂guë́ꞌ₃ dsa₂ ta₁caun₂ mɨ₂güɨ́g₃. Jaun₂ le₂jaun₂ ca₂rë₃ti₃ në́₃ jmɨg₄ liaꞌ₂ conꞌ₂ jme₁guá₄ guiꞌ₅₄ emperador* Claudio.

29 Jaun₂ ca₂le₃jɨ́n₃ dsa₂ ꞌén₂ i₂chan₂ Antioquía ca₂jmo₃ caun₂ jág₁ ca₂jme₃ꞌoin₅₄ rɨinꞌ₅₄ i₂jme₁tiánꞌ₄ Judea, ꞌa₂ conꞌ₂ jŋiaꞌ₅₄ quɨꞌ₅₄ jmɨg₄ cuë₃ le₂jain₂ le₂jain₂.

30 Jaun₂ le₂në₅ ca₂jmo₃. Ca₂chein₃ cu₄ ne₄ dsa₂ canꞌ₅₄^c quián₅ dsa₂ ꞌén₂, ca₂i₁can₅ Bernabé quianꞌ₅₄ Saulo.