Ca₂jon₃ Jacobo, Pe₄ guëꞌ₂ ca₂jné₂ dsa₂ ꞌné₅ ꞌmá₃
12
Jmɨg₄ jaun₂ ca₂jme₃lióg₃ Rag₅₄ Herodes qui₂ca₂jmáiꞌ₂ dsa₂ i₂ꞌén₂.
2 Ca₂jmo₃ ꞌéiꞌ₃ ca₂jŋɨꞌ₃ dsa₂ Jacobo rɨnꞌ₅₄ Juan₅₄, quianꞌ₅₄ ŋi₁tág₂.
3 Jme₁ca₂jág₃ Herodes a₂ca₂të́₂ dsɨ́₅ dsa₂ judíos, jaun₂ ca₂jmo₃ táng₃ ꞌéiꞌ₃ ca₂jŋaꞌ₃ dsa₂ Pe₄ ján₃. Ca₂le₃jë́₃ a₂në₅ ca₂lë₃ liaꞌ₂ conꞌ₂ jmo₅ dsa₂ jmɨg₄ a₂guë́ꞌ₅ dsa₂ i₁ŋíꞌ₄ ꞌuaꞌ₂ a₂tsá₃ levadura* quianꞌ₅₄.
4 Jme₁ma₂në₂chánꞌ₂ dsa₂ Pe₄, jaun₂ ca₂jmo₃ Herodes ꞌéiꞌ₃ ca₂toꞌ₂ ꞌné₅ ꞌmá₃, jaun₂ ca₂tónꞌ₂ quén₂ nióꞌ₃ ꞌlióg₂ i₂lë́₂ jma₃quén₂ le₂caun₂ nióꞌ₃, qui₂ca₂jmo₃ ꞌí₁ Pe₄. Jme₁dsɨ₂jiog₅ dsɨ́₅ Herodes jme₁dsei₂₃ të₃jɨn₄ dsa₂ juɨg₂ jë₁ma₂ca₂ŋɨ́₂ Jmɨg₄ Të₂ꞌɨn₅₄*.
5 Jaun₂ le₂në₅ ꞌen₅₄ Pe₄ néꞌ₃ ꞌmá₃, lë́₅ ꞌí₁ dse₃ lɨn₃. La₁ dsa₂ rɨinꞌ₅₄ në́₃ caun₂ chi₂léinꞌ₂ Diú₄ bá₄ tioinꞌ₅₄ mɨ₂₃ ꞌŋio₅ lɨn₃ o₄quióꞌ₄ ꞌéi₂.
Ca₂lión₂ Diú₄ Pe₄ ꞌné₅ ꞌmá₃
6 Caun₂ ꞌuë₂, juɨ₁liaꞌ₂ ꞌióg₃ jme₁ma₂lë́₅ jág₁ jme₁dsei₅ Herodes jɨn₄ dsa₂ juɨg₂, a₂ꞌuë₂ jaun₂ jme₁rë₂quian₅ Pe₄ rë₂güɨ́in₃ rë₂ꞌŋei₂₃ dse₃ lɨn₃ quianꞌ₅₄ tɨn₃ cadenas jë₄ quióꞌ₅ on₃ ꞌlióg₂. ꞌLióg₂ siánꞌ₂ guëꞌ₂ jme₁tionꞌ₅₄ o₄ꞌné₄ jmo₂₃ ꞌí₁ ꞌné₅ ꞌmá₃.
7 Të₃jë₄ jaun₂, ca₂jme₃jnia₅ jan₂ ángel quián₅ Te₁guiꞌ₅₄, jaun₂ ca₂tág₃ si₂ ta₁caun₂ dsi₂néi₂ ꞌné₅ ꞌmá₃. Jaun₂ ca₂quénꞌ₃ ángel dsɨ₂con₂ Pe₄ a₂ca₂ŋei₃. Jaun₂ ca₂juáꞌ₂:
―Nau₂ të₂në₃ cónꞌ₅.
―Dse₃ ꞌŋéi₂ togꞌ₂, tioꞌ₂ lau₂ tagꞌ₅₄.
Jme₁ca₂lë₃ jmo₅ Pe₄ a₂jaun₂, jaun₂ ca₂juáꞌ₂ táng₃ ángel:
―Quiꞌ₂ ꞌmɨꞌ₂ dsiog₂ quiángꞌ₂, ꞌéin₃ jniá₂.
9 Jaun₂ ca₂o₃ꞌɨ́n₃ Pe₄ chi₁coꞌ₅₄ quióꞌ₅ ángel. Tsá₃ jaun₂ ŋi₅ chi₂juaꞌ₂ dsónꞌ₂ dsɨ₂jóꞌ₃ a₂ca₂jmo₃ ángel le₂jaun₂, ia₁ a₂lë₁ca₂jág₃ bá₄ lɨ́in₂.
10 Jaun₂ ca₂ŋɨi₅ ja₁le₂ꞌuɨg₅₄ tionꞌ₅₄ ꞌlióg₂, ja₁ca₂të́₂ táng₃ në́₃. Jme₁ca₂dsi₃léin₂ o₄ꞌné₄ a₂lë́₅ quianꞌ₅₄ nɨ₁ŋí₁, ja₁ꞌuɨn₂ dsa₂ jë₄ calle, a₂lë₁ca₂niá₃ ꞌŋiog₅ bá₄ o₄ꞌné₄. Ca₂ꞌuɨin₂ bá₄ jaun₂ në́₃. Jme₁ma₂i₂nioi₅₄ caun₂ calle, jaun₂ ca₂ŋáꞌ₃ ángel ꞌéi₂, ca₂téin₂ Pe₄.
11 Jaun₂ guë́₄ ca₂rë₃líꞌ₄ Pe₄, ca₂juáꞌ₂:
―Në₃ guë́₄ dsónꞌ₂ guion₄ jniá₂ a₂në₂chen₃ Te₁guiꞌ₅₄ ángel quiáin₅ a₂në₂lió₂ ja₁con₂ Herodes, ca₂le₃jë́₃ guë́₄ ꞌe₂ jme₁ꞌnio₃ dsa₂ judíos jmógꞌ₂.
12 Të₃ dsɨ₂jiog₅ dsɨ́₅ le₂jaun₂ Pe₄, ca₂ŋó₃ juɨ₅ ja₁quióꞌ₄ María chog₅₄ Juan₅₄ i₂chen₂ Marcos ján₃. Ja₁jaun₂ jme₁tionꞌ₅₄ dsa₂ le₁ŋɨiꞌ₂ chi₂léinꞌ₂ Diú₄.
13 Jme₁ca₂quein₃ Pe₄ o₄ꞌné₄ i₁dsi₅, jaun₂ ca₂o₃ꞌɨ́n₃ jan₂ ꞌio₅₄ bëꞌ₅₄ i₂chen₂ Rode i₃jág₂ ꞌein₂ të́₂.
14 La₁ jme₁ca₂nág₂, ca₂rë₃cuɨ́ꞌ₅ jág₁ quióꞌ₅ Pe₄ në́₃, jaun₂ tsá₃ ca₂niá₃ dsɨ₂juɨ₅, ia₁ ŋɨ́₄ lë₃ ca₂jmo₃ ꞌioꞌ₂. Jaun₂ ca₂ŋáiꞌ₃ bá₄ táng₃ dsi₂néi₂ i₁con₂ jág₁, Pe₄ bá₄ ꞌéi₂ ca₂dsióg₃.
15 Jaun₂ ca₂juáꞌ₂ dsa₂ ca₂tsɨ́ꞌ₃ ꞌio₅₄ bëꞌ₅₄ ꞌéi₂:
―¡A₂lë₁të₂ꞌɨꞌ₂ bá₄ ꞌne₂!
La₁ caun₂ ca₂juáꞌ₂ bá₄ ꞌio₅₄, a₂dsónꞌ₂ bá₄ ꞌéi₂. Jaun₂ ca₂ŋag₃ táng₃ dsa₂, ca₂juáꞌ₂:
―¿ꞌA₂ bá₄ liaꞌ₂ jaun₂? On₃juaꞌ₅₄ ꞌéi₂ në₅. ꞌƗn₁ ángel quiáin₅ bá₄ në₅.
16 Të₁liaꞌ₂ jaun₂, caun₂ i₁të₅₄ bá₄ Pe₄ o₄ꞌné₄ i₁chéinꞌ₄. Jme₁ca₂niá₃, ca₂jɨ́in₂ Pe₄, jaun₂ ca₂i₃góꞌ₃ dsɨ́₅.
17 La₁ jaun₂ ca₂jmo₃ ꞌéi₂ léi₄ quianꞌ₅₄ mɨ₂gu₂ a₂ca₂juáꞌ₂ a₂jmo₃ dsa₂ tei₄. Jaun₂ ca₂dsia₃ ꞌa₂ liaꞌ₂ ca₂lë₃ ca₂jmo₃ Te₁guiꞌ₅₄ a₂ca₂i₁dsei₂₃ ꞌné₅ ꞌmá₃. Jaun₂ ca₂juáꞌ₂:
―O₂dsia₄ ꞌniaꞌ₂ o₂cheiꞌ₅₄ Jacobo,a ca₂le₃jɨ́n₃ guë́₄ rɨnꞌ₅₄ jniog₄.
Jaun₂ ca₂o₃ꞌɨ́in₃ táng₃, ca₂ŋó₃ ja₁siáꞌ₂.
18 Jme₁jnia₃ jaun₂, ca₂tónꞌ₂ ꞌlióg₂ go₂ꞌi₃, ia₁ tsá₃ ŋi₅ ꞌe₂ ca₂lë₃ quianꞌ₅₄ Pe₄.
19 Jaun₂ Herodes ca₂chein₃ dsa₂ dsɨ₃ꞌniogꞌ₂. La₁ia₁ tsá₃ ma₃ca₂dsáuꞌ₂. Jaun₂ jme₁ca₂cáun₂ jág₁ dsau₅ quióꞌ₅ ꞌlióg₂ i₂jme₁jmo₅ ꞌí₁ ꞌéi₂, ca₂jmo₃ ꞌéiꞌ₃ ca₂jme₃dsiog₅ dsa₂. Cang₂ jaun₂, ca₂o₃ꞌɨ́n₃ Herodes ꞌuë₃ Judea, jaun₂ ca₂ŋó₃ ca₂i₁gua₂ Cesarea.
Ca₂jon₃ Herodes
20 Jme₁ꞌne₂ Herodes quianꞌ₅₄ dsa₂ i₂jme₁tiánꞌ₄ Tiro quianꞌ₅₄ Sidón. La₁ dsa₂ ꞌéi₂ në́₃ ca₂jmo₃ caun₂ jág₁ ca₂i₁lein₅₄ ca₂jme₁jniai₂₃ ne₅₄. Ca₂jme₃ꞌuáin₂ dsɨ́₅ jan₂ i₂chen₂ Blasto a₂jmo₃ dse₃ dsɨ́₅. Jme₁lɨ́n₄ Blasto jan₂ dsɨ₂tan₅₄ juɨnꞌ₂ quián₅ Rag₅₄ Herodes. Ca₂nau₂ ne₄ jág₁, ca₂mɨ₃ dsian₅ mɨꞌ₅₄. Ia₁ juɨg₂ go₄ rag₅₄ bá₄ jme₁rau₂ a₂guë́ꞌ₅ dsa₂ chan₂ Tiro quianꞌ₅₄ Sidón.
21 Herodes në́₃ ca₂të₃, ca₂tióng₃ caun₂ jmɨg₄ a₂chi₁jŋiog₂₃ dsi₁lén₂ dsa₂. Jme₁ca₂të́₂ jmɨg₄ jaun₂, ca₂quɨ́ꞌ₂ Herodes tsɨnꞌ₅₄ a₂rë₂lɨin₅₄ a₂lɨ́in₅ rag₅₄, jaun₂ ca₂i₁gua₂ ne₄ ne₄ta₁ quióꞌ₅, jaun₂ ca₂ton₃ jág₁.
22 Jaun₂ ca₂jme₃lióg₃ dsa₂ juɨg₂ qui₂ca₂guióꞌ₃ ca₂juáꞌ₂:
―¡I₂juáꞌ₂ në₅, on₃juaꞌ₅₄ dsa₂ mɨ₂güɨ́g₃! Jan₂ diú₄ bá₄ në₅.
23 Co₂tan₅₄ dsɨ₂juɨ₅ le₂jaun₂ ca₂jmo₃ ángel i₂chen₄ quián₅ Te₁guiꞌ₅₄ a₂ca₂rë₃dsoꞌ₅₄ Herodes, ia₁ ca₂cuë₃ jmɨg₄ a₂jme₃juagꞌ₂ dsa₂ ꞌŋiog₅, ꞌnióꞌ₄ a₂jme₁jme₃juɨinꞌ₂ Diú₄. Ca₂join₃ bá₄ jaun₂ në́₃, ca₂dsóꞌ₃ i₁jaꞌ₅₄ quióꞌ₅.
24 La₁ jág₁ dse₃ quióꞌ₅ Te₁guiꞌ₅₄ në́₃ caun₂ ca₂i₃ꞌág₃ bá₄, qui₂ca₂ꞌë́₂ dsa₂ ꞌlióng₂ juɨg₂.
25 Jme₁ca₂lë₃ ta₁ jaun₂ quióꞌ₅ Bernabé quianꞌ₅₄ Saulo, jaun₂ ca₂ꞌuɨin₂ Jerusalén ca₂i₃lein₃b jŋiai₂₃ i₂jme₁chen₂ Juan₅₄ i₂jme₁të́ꞌ₂ dsa₂ Marcos ján₃.