Ca₂jme₃lióg₃ Bernabé quianꞌ₅₄ Saulo ca₂jmo₃ ta₁ a₂ꞌë́₂ jág₁ dse₃
13
Co₂nióꞌ₃ dsa₂ i₂ꞌén₂ jág₁ quióꞌ₅ Jesús, i₂jme₁tiánꞌ₄ juɨg₂ Antioquía, jme₁chan₂ dsa₂ i₂jme₁ꞌë́₂ jág₁ quiáin₅, të₅ në́₃, juɨ₁liaꞌ₂ Bernabé quianꞌ₅₄ Si₂mu₅₄ (i₂të́ꞌ₂ dsa₂ dsa₂ liaꞌ₂); Lucio i₂chan₂ Cirene; Manaén në́₃ (i₂co₂lë₅ ca₂canꞌ₅₄ quianꞌ₅₄ Herodes i₂lɨ́n₅ dsi₄máꞌ₂ ꞌuë₃ Galilea);a quianꞌ₅₄ Saulo në́₃.
2 Co₂ráun₂ tioinꞌ₅₄ le₁ŋɨiꞌ₂ jme₂juɨinꞌ₂ Te₁guiꞌ₅₄, a₂jme₂ꞌɨin₅₄, jaun₂ ca₂juáꞌ₂ Jme₂dsí₂ Jŋió₅:
―Conꞌ₂ chénꞌ₂ ꞌniaꞌ₂ Bernabé quianꞌ₅₄ Saulo, ia₁jaun₂ dsɨ₃jmó₂ ta₁ a₂ma₂të́₃ jniá₂ jmo₃.
3 Jaun₂ jme₁ca₂lë₃ chi₂léinꞌ₂ Diú₄, a₂jme₂ꞌɨin₅₄ në́₃, qui₂ca₂quiog₂ gu₂ ne₄ quióꞌ₅ dsa₂ ꞌéi₂, jaun₂ guë́₄ qui₂ca₂ꞌágꞌ₃ jág₁ rɨinꞌ₅₄.
Dsa₂ i₂chen₄ quián₅ Jesús ꞌë́₂ jág₁ të₂ Chipre
4 Jaun₂ ca₂chei₃ Jme₂dsí₂ Jŋió₅ ca₂chein₃ Bernabé quianꞌ₅₄ Saulo a₂ca₂i₃léin₂ juɨ₅ Seleucia. Ja₁jaun₂ ca₂tóinꞌ₂ nɨ₁barco a₂ca₂i₃léin₂ caun₂ ꞌuë₃ a₂niog₅ jë₄ jmɨ₁ŋíꞌ₄, ja₁chei₂ Chipre.
5 Jme₁ca₂dsi₃léin₂ ja₁jaun₂, caun₂ juɨg₂ a₂niog₅ cheiꞌ₅₄ jmɨ₁ŋíꞌ₄ ja₁të́ꞌ₂ dsa₂ Salamina, ja₁jaun₂ ca₂jme₃lióg₃ qui₂ca₂ꞌë́ꞌ₃ dsa₂ jág₁ dse₃ quióꞌ₅ Te₁guiꞌ₅₄ dsi₂néi₂ guáꞌ₅ sinagogas* quióꞌ₅ dsa₂ judíos*. Jme₁quiainꞌ₅₄ bá₄ Juan₅₄ ján₃ i₂lɨ́n₅ dsa₂ i₂jme₂ꞌo₅₄ quióꞌ₅.
6 Ca₂i₁nioi₂ ta₁caun₂ ꞌuë₃ jaun₂, ca₂dsi₃léin₂ caun₂ juɨg₂ ja₁të́ꞌ₂ dsa₂ Pafos. Ja₁jaun₂ ca₂jeinꞌ₂ jan₂ dsa₂ judío, jan₂ dsa₂ i₂chan₂ dsɨ́₅, i₂tɨn₂ jág₁ të₂jág₁, a₂jme₁jme₂gain₂₃ dsa₂ a₂juáꞌ₂ a₂lɨ́in₅ jan₂ i₂ꞌë́₂ jág₁ quián₅ Diú₄. Dsa₂ ꞌéi₂ jme₁të́ꞌ₂ dsa₂ Barjesús.b
7 Jme₁ quiainꞌ₅₄ dsi₄máꞌ₂ i₂chen₂ Sergio Paulo. Dsi₄máꞌ₂ ꞌéi₂ jme₁lɨ́n₄ jan₂ dsa₂ i₂niog₅ dsi₄ ꞌŋio₅ lɨn₃. Co₂ráun₂ ca₂të́ꞌ₃ Bernabé quianꞌ₅₄ Saulo, ia₁ a₂ꞌnio₃ nag₃ jág₁ dse₃ quióꞌ₅ Diú₄.
8 La₁ Barjesús ꞌéi₂ në́₃, i₂të́ꞌ₂ dsa₂ Elimas ján₃, tsá₃ jme₁ꞌnio₃ a₂le₃ꞌén₂ dsi₄máꞌ₂. Jaun₂ jme₁jné₅ juɨ₅.
9 Jaun₂ Saulo, i₂të́ꞌ₂ dsa₂ Pablo ján₃, rë₂rɨn₅ Jme₂dsí₂ Jŋió₅ të₂dsɨ́₅, ca₂jɨ́in₂ tiá₂ dsa₂ ꞌéi₂,
10 jaun₂ ca₂juáꞌ₂:
―¡ꞌNe₂ dsa₂ të₂jág₁, dsa₂ quián₅ i₂së₃dsen₃, i₂ꞌioꞌ₅₄ ca₂le₃jë́₃ cosa dse₃! ¿ꞌE₂ lë₃ qui₁jnɨgꞌ₄ juɨ₅ co₂dsau₅ quióꞌ₅ Te₁guiꞌ₅₄?
11 Të₂në₃ cónꞌ₅ ꞌë́₂ Te₁guiꞌ₅₄ jmɨ₁uɨg₅ quiángꞌ₂, co₂dsia₅ téngꞌ₂, co₂ꞌna₂ tsá₃ ma₃lé₂ jagꞌ₅₄ si₂ quióꞌ₅ ꞌiog₂.
Dsɨ₂juɨ₅ jaun₂ ca₂téin₂ co₂dsia₅, qui₁néꞌ₃ ca₂jénꞌ₃. Jaun₂ jme₁ꞌnaiꞌ₂ jan₂ i₂të₂ tsánꞌ₂ gu₂.
12 Jme₁ca₂jág₃ guiꞌ₅₄ dsi₄máꞌ₂ a₂ca₂lë₃ jaun₂, ca₂rë₃ꞌéin₂ ca₂nág₂ dsɨ₂góꞌ₃ dsɨ́₅ jág₁ dse₃ quióꞌ₅ Te₁guiꞌ₅₄.
Pablo quianꞌ₅₄ Bernabé tioinꞌ₅₄ Antioquía ja₁tén₄ Pisidia
13 Ca₂ꞌí₃ Pablo quianꞌ₅₄ rɨinꞌ₅₄ ꞌŋióꞌ₃ nɨ₁barco juɨg₂ Pafos, ca₂i₃léin₂ juɨ₅ Perge, juɨg₂ tén₅ ꞌuë₃ Panfilia. Ca₂tén₂ Juan₅₄ rɨinꞌ₅₄ ja₁jaun₂, jaun₂ ca₂ŋáiꞌ₃ juɨ₅ Jerusalén.
14 Ca₂ꞌuɨn₂ rɨinꞌ₅₄ Perge ca₂dsi₃léin₂ táng₃ Antioquía, juɨg₂ tén₅ ꞌuë₃ Pisidia. Jaun₂ ca₂i₃toinꞌ₅₄ guáꞌ₅ sinagoga caun₂ jmɨg₄ sa₅₄, jaun₂ ca₂tiáinꞌ₂ dsi₂néi₂.
15 Jme₁ma₂ca₂lë₃ ꞌɨ₅ dsa₂ Si₂ ꞌÉiꞌ₃ quióꞌ₅ Diú₄ quianꞌ₅₄ Si₂ a₂ca₂jmo₃ dsa₂ i₂jme₁ꞌë́₂ jág₁ ma₂lɨ́gꞌ₂ në́₃, jaun₂ ca₂chen₃ jág₁ dsa₂ canꞌ₅₄ quián₅ guáꞌ₅ sinagoga, ca₂juáꞌ₂:
―Rɨnꞌ₅₄ jniog₄, chi₂juaꞌ₂ cha₂ jág₁ dse₃ quiánꞌ₂ ꞌniaꞌ₂ a₂cuëꞌ₅₄ dsa₂, lé₂ bá₄ juaꞌ₅₄ ꞌniaꞌ₂.
16 Jaun₂ ca₂nau₂ Pa₄ ca₂jmo₃ léi₄ quianꞌ₅₄ gu₂ a₂mɨ₂₃ a₂jmo₃ dsa₂ tei₄, jaun₂ ca₂juáꞌ₂:
―Nei₂ ꞌniaꞌ₂ dsa₂ israelitas*, ꞌniaꞌ₂ guë́₄ dsa₂ siánꞌ₂ i₂gan₃ Diú₄:
17 Diú₄ quián₂ jniog₄ dsa₂ lág₅ juɨg₂ Israel ca₂quióinꞌ₂ dsa₂ canꞌ₅₄ quián₂ jniog₄ ma₂lɨ́gꞌ₂. Ca₂jmo₃ Diú₄ ca₂i₃juɨ́n₂ dsa₂ ꞌéi₂ liaꞌ₂ conꞌ₂ jme₁tiáinꞌ₄ ꞌuë₃ Egipto a₂lɨ́in₅ dsɨ₂nau₂. Cang₂ jaun₂ ca₂lë₃ caun₂ juɨg₂ pa₁. Diú₄ në́₃ ca₂lió₂ quianꞌ₅₄ bí₂ quióꞌ₅, ca₂ꞌuágꞌ₂ ꞌuë₃ jaun₂.
18 Ca₂jme₃juɨnꞌ₂ Diú₄ dsɨ́₅ quiongꞌ₅₄c të₂láu₃ ŋi₂ të₁liaꞌ₂ jme₁i₂nioi₅₄ guaꞌ₅₄ quein₂,
19 ca₂ꞌéin₂ guio₃ juɨg₂ go₄ dsa₂ i₂jme₁tiánꞌ₄ ꞌuë₃ Canaꞌán, ꞌuë₃ jaun₂ në́₃ ca₂cuë́ꞌ₃ dsa₂ canꞌ₅₄ quián₂ jniog₄ i₂jme₁chan₂ ma₂lɨ́gꞌ₂.
20 ꞌCang₂ jaun₂ ca₂dsɨn₃ conꞌ₂ quén₂ ꞌŋiá₂-láu₂ rë₂dsɨ́₂ të₂láu₃-guiá₂ (450) ŋi₂, ca₂qui₃dsɨ₅ Diú₄ ꞌéiꞌ₃ jɨn₄ dsa₂ ꞌéi₂ të₂le₃ quianꞌ₅₄ juë́₄ ca₂liaꞌ₂ ca₂të́₂ jmɨg₄ a₂ca₂rë₃chán₃ Samuel i₂qui₂ca₂ꞌë́₂ jág₁ quióꞌ₅ Diú₄ cang₂ jaun₂.
21 Jaun₂ ca₂mɨi₃ jan₂ rag₅₄. Jaun₂ Diú₄ në́₃ ca₂cuɨin₃ Saúl ja₁ŋiꞌ₅₄ Cis, tsɨ₁jon₂ Benjamín; ca₂jmo₃ ꞌéiꞌ₃ conꞌ₂ të₂láu₃ ŋi₂.
22 Cang₂ jaun₂ ca₂jŋiáꞌ₂ Diú₄ ta₁ quióꞌ₅ Saúl a₂jme₁lɨ́in₄. Jaun₂ David bá₄ ca₂cheinꞌ₃ ca₂lɨin₃ rag₅₄. Jaun₂ ca₂juáꞌ₂ Diú₄ ꞌɨin₂₃ Rag₅₄ David: “Ca₂dsóꞌ₂ jniá₂ ja₁con₂ David ja₁ŋiꞌ₅₄ Isaí, a₂lɨ́in₅ jan₂ dsa₂ i₂lë́₅ dsɨ́₅ liaꞌ₂ lë́₅ dsɨ₃ jniá₂, jan₂ dsa₂ i₂jmo₃ a₂ꞌŋio₂ dsɨ₃.”
23 ꞌJaun₂ në́₃ rɨnꞌ₅₄ jniog₄, jan₂ chiꞌ₂ dsio₄ David ꞌéi₂ bá₄ lɨ́n₅ Jesús i₂ca₂chen₃ Diú₄ a₂lióin₂ dsa₂ juɨg₂ Israel liaꞌ₂ conꞌ₂ lë́₅ jág₁ quióꞌ₅ ma₂cuë₃ le₂jŋiá₅.
24 Néꞌ₃ a₂guán₂ Jesús, ca₂ꞌë́₂ Juan₅₄ jág₁ ca₂tsɨ́ꞌ₃ ca₂le₃jɨ́n₃ dsa₂ Israel a₂ꞌnióꞌ₅ qui₃choin₃ jmɨg₂, dsɨ₃quénꞌ₅ dsɨ́₅ në́₃.
25 Jaun₂ ca₂juáꞌ₂ Juan₅₄ jme₁ja₂quián₃ jóin₂: “On₃juaꞌ₅₄ ꞌéi₂ jniá₂ juɨ₁liaꞌ₂ dsɨ₂jiog₅ ꞌauꞌ₂ ꞌniaꞌ₂ lɨ́n₅ jniá₂. La₁ i₂já₅ chi₁coꞌ₅₄ quió₃ në́₃, ꞌéi₂ bá₄ i₂ꞌuanꞌ₂ guë́₄ liaꞌ₂ conꞌ₂ guë́₄ jniá₂, ca₂liaꞌ₂ jŋiaꞌ₅₄ lau₂ ton₅ tag₅₄ bá₄ tsá₃ ca₂tɨ́ng₂ tsɨꞌ₅₄ quióꞌ₅.”d
26 ꞌRɨnꞌ₅₄ jniog₄, ca₂le₃jɨ́nꞌ₃ guë́₄ ꞌniaꞌ₂ i₂lɨ́n₅ chiꞌ₂ dsio₄ Abraham, quianꞌ₅₄ ca₂le₃jɨ́n₃ guë́₄ ꞌein₂ chan₂ quiánꞌ₂ ꞌniaꞌ₂ i₂jme₂gan₃ Diú₄: a₂quiánꞌ₂ ꞌniaꞌ₂ bá₄ jág₁ dse₃ la₂ a₂ca₂ꞌë́₂ Diú₄ a₂lión₂ dsa₂.
27 Dsa₂ i₂jme₁tiánꞌ₄ Jerusalén quianꞌ₅₄ dsa₂ canꞌ₅₄ quiáin₅, tsá₃ ca₂rë₃ŋi₅ ꞌein₂ ꞌéi₂ jme₁chen₂ Jesús, on₃ guë́₄ ca₂rë₃ŋɨ́iꞌ₂ jág₁ a₂qui₂ca₂ꞌë́₂ dsa₂ i₂chen₄ quián₅ Diú₄ le₂jŋiá₅. Jaun₂ lë₃, jág₁ jaun₂ a₂ꞌɨ₂₃ ne₄ Si₂ ca₂le₃jë́₃ jmɨg₄ sa₅₄ ca₂jme₃ti₃ guioin₅₄ jme₁ca₂jmo₃ ꞌéiꞌ₃ a₂jŋɨiꞌ₃ Jesús.
28 ꞌI₁caun₂ dsáu₁ Jesús tsá₃ ꞌe₂ ca₂dsóꞌ₂ dsa₂ juaꞌ₅₄ a₂ꞌi₄ ꞌéiꞌ₃ a₂jŋagꞌ₃, la₁ tion₅₄ bá₄ ca₂mɨ₃ dsa₂ jág₁ ne₄ Pilato a₂jmo₃ ꞌéi₂ ꞌéiꞌ₃ a₂jŋagꞌ₃.
29 Jaun₂ në́₃ jme₁ma₂lë₅ ꞌa₂ conꞌ₂ lë́₅ juáꞌ₂ ne₄ Si₂ quióꞌ₅ Diú₄ a₂ꞌɨin₂₃ Jesús, jaun₂ ca₂sió₂ dsa₂ ne₄ cróg₄, jaun₂ ca₂i₁ꞌó₄.
30 La₁ Diú₄ në́₃, ca₂jme₃jeinꞌ₅₄ táng₃ jɨn₄ ꞌlag₄.
31 ꞌLióng₂ jmɨg₄ bá₄ qui₂ca₂jme₃jnia₅ Jesús ne₄ dsa₂ i₂jme₁quiainꞌ₅₄ liaꞌ₂ conꞌ₂ jme₁ca₂ŋó₃ të₂ Galilea ca₂dsióg₃ të₂ Jerusalén. Jaun₂ në́₃ dsa₂ ꞌéi₂ bá₄ i₂jángꞌ₅ jág₁ dsau₅ tsɨ́ꞌ₅ dsa₂ rë₂në́₃.
32 ꞌJaun₂ le₂në₅ bá₄ a₂cuë₂ jniaꞌ₅₄ jág₁ dse₃ ꞌniaꞌ₂, jág₁ a₂ca₂cuë₃ Diú₄ ca₂cuë́ꞌ₃ dsa₂ quián₂ jniog₄ ma₂lɨ́gꞌ₂ jaun₂,
33 ma₂ca₂rë₃tiꞌ₅₄ Diú₄ ja₁con₂ jniog₄ i₂lág₅ chiꞌ₂-guein₂ quián₅ dsa₂ ꞌéi₂, jme₁ca₂jme₃jeinꞌ₅₄ Jesús conꞌ₂ lë́₅ jág₁ tioꞌ₅₄ jë₁ca₂të́₂ tɨn₃ Salmo, a₂juáꞌ₂:
ꞌNe₂ lɨ́ngꞌ₅ jón₃ quiáng₃;
jmɨg₄ në₃, ca₂lɨn₃ jniá₂ ŋéiꞌ₅ ꞌne₂.e
34 ꞌCa₂juáꞌ₂ Diú₄ le₂jŋiá₅ a₂jme₃jeinꞌ₅₄ jɨn₄ ꞌlag₄ ia₁jaun₂ tsá₃ dsɨ₃ꞌén₂ quióꞌ₅. Juɨ₁liaꞌ₂ juáꞌ₂ ne₄ Si₂ quióꞌ₅ Diú₄:
Ján₃ bá₄ cuë́₄ jniá₂ ꞌniaꞌ₂
ca₂le₃jë́₃ ꞌe₂ cosa dse₃
a₂jme₁ti₁ jág₁ quió₃ a₂ca₂cuë́₃ David.f
35 ꞌJaun₂ lë₃, ján₃ guëꞌ₂ juáꞌ₂ ne₄ Si₂ Salmos ja₁siáꞌ₂ táng₃:
Tsá₃ cuë́ꞌ₁ jmɨg₄
a₂dsɨ₃guɨ́ꞌ₂ quióꞌ₅ dsa₂ jŋió₅ ꞌéi₂ quiángꞌ₂
i₂jme₂ti₃ ta₁ neꞌ₅₄.g
36 ꞌDavid në́₃ ca₂jme₃ti₃ bá₄ jág₁ ne₄ dsa₂ quiáin₅ të₁liaꞌ₂ ca₂rë₃cháin₃ jmɨg₄ jaun₂, juɨ₁liaꞌ₂ ꞌéiꞌ₃ ca₂juáꞌ₂ Diú₄. La₁ ca₂jon₃ bá₄ David në́₃, jaun₂ ca₂i₁ꞌó₄ dsa₂ ja₁le₁ꞌon₅ dsa₂ canꞌ₅₄ quiáin₅, ca₂siáꞌ₃ bá₄ nɨ₁ŋɨ₁ ꞌéi₂ në́₃.
37 La₁ nɨ₁ŋɨ₁ Jesús në́₃, i₂ca₂jme₃jenꞌ₅₄ Diú₄, tsá₃ ꞌe₂ ca₂ꞌen₃.
38 ꞌJaun₂ në́₃ rɨnꞌ₅₄ jniog₄, tion₅₄ ꞌnióꞌ₅ le₃ŋiꞌ₅₄ ꞌniaꞌ₂ jág₁ a₂ꞌë́₅ jniá₂: të₂le₃ quianꞌ₅₄ Jesús bá₄ dsónꞌ₂ ꞌén₂ dsáuꞌ₂ ꞌniaꞌ₂.
39 Të₂le₃ quianꞌ₅₄ ꞌéi₂, ca₂le₃jɨ́n₃ i₂ꞌén₂ të₂le₃ quióꞌ₅, rë₂ꞌén₄ ca₂le₃jë́₃ dsáu₁ a₂tsá₃ o₂ꞌén₂ dso₄ cha₂ quiánꞌ₂ ꞌniaꞌ₂ të₂le₃ quianꞌ₅₄ ꞌÉiꞌ₃ quióꞌ₅ Moisés.
40 ꞌÍ₁ jmo₄ ꞌniaꞌ₂, ia₁jaun₂ tsá₃ dsɨ₃ŋɨ́ꞌ₂ ꞌniaꞌ₂ juɨ₁liaꞌ₂ juáꞌ₂ dsa₂ i₂jme₁ꞌë́₂ jág₁ quián₅ Diú₄, jme₁ca₂juáꞌ₂ ne₄ Si₂:
41 Jag₄ ꞌniaꞌ₂ dsa₂ i₂táun₂ ꞌlɨgꞌ₅₄,
juɨ₁dsi₂góꞌ₃ ꞌauꞌ₂, juɨ₁dsianꞌ₂ ꞌniaꞌ₂.
Ia₁ jniá₂ i₂lɨ́ng₅ Diú₄ jmo₅₄ léi₄ juëꞌ₂
jmɨg₄ të₁liaꞌ₂ chanꞌ₂ ꞌniaꞌ₂.
La₁ léi₄ jaun₂, ꞌi₁janꞌ₂ ꞌniaꞌ₂ tsá₃ le₃ꞌén₂,
o₁jŋiaꞌ₅₄ ꞌa₂ guëꞌ₂ liaꞌ₂ chan₂ i₂dsia₃.h
42 Jme₁ca₂o₃ꞌɨ́n₃ Pa₄ quiainꞌ₅₄ rɨinꞌ₅₄ guáꞌ₅ sinagoga quióꞌ₅ dsa₂ judíos, jaun₂ ca₂mɨ₃ dsa₂i a₂ja₃lén₂ táng₃ ꞌéi₂ jmɨg₄ sa₅₄ caun₂ a₂ja₃ꞌë́₂ jág₁ jaun₂.
43 Jme₁ca₂dsan₃ le₁ŋɨꞌ₂ dsa₂ dsi₂néi₂ guáꞌ₅, jaun₂ juɨn₅ lɨn₃ dsa₂ judíos quianꞌ₅₄ dsa₂ i₂ma₂gue₃ i₂ma₂tión₂ tiá₂ juáꞌ₅ quióꞌ₅ dsa₂ judíos, ca₂ꞌein₃ Pa₄ quiainꞌ₅₄ Bernabé, ca₂jme₃quiongꞌ₅₄. Jaun₂ ca₂juáꞌ₂ dsa₂ i₂chen₄* quián₅ Jesús ꞌéi₂ ca₂tsɨ́ꞌ₃ dsa₂ ca₂cuë́ꞌ₃ bí₂ a₂tion₅₄ ꞌnióꞌ₅ tsánꞌ₂ tiá₂ jág₁ dse₃ quióꞌ₅ Diú₄ i₂ꞌua₁ dsɨ́₅.
44 Caun₂ semana cang₂ jaun₂, jme₁ca₂të́₂ táng₃ jmɨg₄ sa₅₄, jaun₂ qui₂ca₂ŋɨꞌ₂ meiꞌ₂ tsá₃ ca₂le₃jɨ́n₃ dsa₂ juɨg₂ a₂ca₂o₃néi₃ jág₁ quióꞌ₅ Diú₄.
45 La₁ jme₁ca₂jág₃ dsa₂ judíos juɨn₅ lɨn₃ dsa₂ tionꞌ₅₄, jaun₂ ca₂rë₃ꞌnéi₃ a₂dsíꞌ₅ ꞌŋio₅ lɨn₃, të₂le₃ jen₅ bá₄ qui₂ca₂ŋag₃ jág₁ a₂juáꞌ₂ Pa₄, qui₂ca₂jnáuꞌ₂ jág₁ uɨg₅ në́₃.
46 Jaun₂ ca₂juáꞌ₂ Pa₄ quianꞌ₅₄ Bernabé, ca₂dsia₃ tiá₂ dsɨ́₅ ca₂tsɨ́ꞌ₃ dsa₂:
―Tion₅₄ ꞌnióꞌ₅ jŋiá₅ deꞌ₂ jɨnꞌ₄ ꞌniaꞌ₂ conꞌ₂ dsa₂ i₂lɨ́n₅ judíos, ca₂tág₂ jniaꞌ₅₄ ꞌë́₄ jág₁ dse₃ quióꞌ₅ Diú₄. La₁ tsá₃ guëꞌ₂ ꞌniogꞌ₂ ꞌniaꞌ₂ guéiꞌ₁, jaun₂ ma₂léi₄ bá₄ a₂tsá₃ lé₂ tɨ́nꞌ₄ ꞌniaꞌ₂ gueiꞌ₅₄ i₂juɨ́g₃. Jaun₂ lë₃, dsɨ₁náu₄ jniaꞌ₅₄ ja₁con₂ dsɨ₂nau₂.
47 Ia₁ le₂në₅ bá₄ ꞌéiꞌ₃ ca₂cuë₃ Te₁guiꞌ₅₄ jme₁ca₂juáꞌ₂:
Juɨ₁liaꞌ₂ si₂ bá₄ lɨ́nꞌ₅ ꞌne₂
i₂ca₂dsiáng₃ quióꞌ₅ dsɨ₂nau₂,
ia₁jaun₂ ꞌëꞌ₅₄ dsa₂ chan₂ ta₁caun₂ mɨ₂güɨ́g₃
juɨ₅ ja₁tɨ́nꞌ₄ dsa₂.j
48 Jme₁ca₂nág₂ dsɨ₂nau₂ jág₁ në₅, qui₂ca₂jmo₃ ꞌioꞌ₂, qui₂ca₂dsia₃, dsónꞌ₂ bá₄ dse₃ jág₁ quióꞌ₅ Te₁guiꞌ₅₄. Jaun₂ ca₂rë₃ꞌén₂ ca₂le₃jɨ́n₃ i₂conꞌ₂ ꞌi₄ ꞌéiꞌ₃ tɨ́nꞌ₄ ja₁le₃chain₂ co₂tan₅₄.
49 Jaun₂ le₂në₅ ca₂i₃ꞌág₃ jág₁ dse₃ quióꞌ₅ Te₁guiꞌ₅₄ ta₁caun₂ ꞌuë₃ jaun₂.
50 La₁ dsa₂ judíos në́₃ ca₂jmo₃ jág₁ quianꞌ₅₄ i₂lɨn₅₄ ꞌio₅₄ dsen₃ i₂jme₂go₃ dsa₂ juɨg₂, quianꞌ₅₄ i₂lɨn₅₄ dsa₂ canꞌ₅₄ në́₃, ia₁jaun₂ jme₃ꞌiog₅₄ jme₃ꞌŋiai₅₄ Pa₄ quiainꞌ₅₄ Bernabé. Jaun₂ le₂në₅ bá₄ ca₂jme₃lióg₃ ca₂jmo₃ jág₁ a₂qui₂ca₂co₃ꞌein₃ Pa₄ quiainꞌ₅₄ Bernabé ca₂liaꞌ₂ ca₂ꞌuɨn₂ ꞌéi₂ juɨg₂ jaun₂.
51 Jaun₂ ꞌéi₂ në́₃ qui₂ca₂séiꞌ₂ ꞌliog₂ mɨ₂tag₅₄.k Ca₂ꞌuɨin₂ bá₄ jaun₂, ca₂i₃léin₂ juɨ₅ Iconio.
52 La₁ ca₂le₃jɨ́n₃ dsa₂ i₂ca₂rë₃ꞌén₂ në́₃, ꞌioꞌ₂ jmo₂₃, rë₂rɨn₅ Jme₂dsí₂ Jŋió₅ të₂dsɨ́₅.