Pablo quianꞌ₅₄ Bernabé tioinꞌ₅₄ juɨg₂ Iconio
14
Ca₂ꞌí₃ Pablo co₂lë₅ quianꞌ₅₄ Bernabé dsi₂néi₂ guáꞌ₅ sinagoga* quióꞌ₅ dsa₂ judíos* juɨg₂ Iconio. Ja₁jaun₂ ca₂jme₃tɨin₂₃ táng₃ dsa₂ jág₁ dse₃ quióꞌ₅ Diú₄. Juɨn₅ bá₄ dsa₂ ca₂rë₃ꞌén₂, liaꞌ₂ dsa₂ judíos liaꞌ₂ dsɨ₂nau₂ në́₃.
2 La₁ dsa₂ judíos i₂tsá₃ ꞌén₂ në́₃, ca₂tsɨ́ꞌ₃ dsɨ₂nau₂ a₂chi₃ꞌɨin₃ ꞌlɨgꞌ₅₄ dsa₂ i₂ꞌén₂.
3 Jaun₂ lë₃, uë́₂ bá₄ ca₂ꞌí₃ Pa₄ quiainꞌ₅₄ Bernabé. Ca₂dsia₃ tiá₂ dsɨ́₅ quianꞌ₅₄ bí₂ quióꞌ₅ Te₁guiꞌ₅₄, qui₂ca₂ꞌë́₂ jág₁; jaun₂ Diú₄ në́₃ ca₂cuë₃ bí₂ ca₂jmo₃ ꞌéi₂ léi₄ juëꞌ₂ a₂dsɨ₃góꞌ₃ dsɨ₅, ia₁jaun₂ le₃líꞌ₄ dsa₂, jág₁ dsau₅ a₂dse₃ dsɨ́₅ Diú₄ bá₄ ꞌë́₂ ꞌéi₂.
4 La₁ dsa₂ juɨg₂ ꞌéi₂ jme₁lë́₄ le₁dsonꞌ₅₄ i₂jme₁tión₂ le₃quióꞌ₅ dsa₂ judíos, i₂jme₁tión₂ le₃quióꞌ₅ dsa₂ i₂chen₄ quián₅ Jesús ꞌéi₂ në́₃.
5 Jaun₂ ca₂jmo₃ caun₂ jág₁ dsa₂ judíos quiainꞌ₅₄ dsɨ₂nau₂, quianꞌ₅₄ dsɨ₂tan₅₄, a₂tsɨ́ꞌ₃ jág₁ uɨg₅ dsa₂ ꞌéi₂, a₂qui₃jnáuꞌ₂ cang₄ në́₃.
6 La₁ jme₁ca₂rë₃ŋi₅ Pa₄ quianꞌ₅₄ Bernabé, ca₂cuɨng₃ juɨ₅ Listra, juɨ₅ Derbe në́₃, tɨn₃ juɨg₂ ja₁tén₄ Licaonia, ca₂i₁nioi₁₂ le₂tan₅₄ ꞌuë₃ jaun₂,
7 qui₂jme₂tɨin₂₃ dsa₂ jág₁ dse₃ a₂lión₂ dsa₂.
Ca₂cuë₃ dsa₂ cang₄ ca₂cuë́ꞌ₃ Pablo juɨg₂ Listra
8 Juɨg₂ Listra jme₁chan₂ jan₂ dsa₂ i₂tsá₃ lé₂ ŋɨ₃. Liaꞌ₂ jaun₂ lɨ́in₅, liaꞌ₂ conꞌ₂ jme₁ca₂rë₃cháin₃, guá₅ ja₁jaun₂, ꞌi₁cónꞌ₂ tsá₃ ma₂ca₂ŋɨ₃ ca₂le₃jë́₃ jmɨg₄ a₂chain₂.
9 Ca₂nág₂ dsa₂ ꞌéi₂ jág₁ a₂ca₂dsia₃ Pa₄. Jaun₂ Pa₄ në́₃ ca₂jág₃ tiá₂ ca₂jɨ́in₂ dsa₂ ꞌéi₂, jaun₂ ca₂rë₃líꞌ₄ Pa₄ a₂ꞌén₂ dsa₂ ꞌéi₂ a₂lé₂ ꞌlióin₂.
10 Jaun₂ ca₂juáꞌ₂ tiá₂ ca₂tsɨ́ꞌ₃ dsa₂ ꞌéi₂:
―Rë₂ nau₂. Co₂dsau₅ chíꞌ₂ mɨ₂tagꞌ₅₄.
Jaun₂ dsɨ₂juɨ₅ ca₂ráun₂ ca₂nau₂ dsa₂ ꞌéi₂, ca₂jme₃lióg₃ ca₂ŋɨ₃.
11 Jme₁ca₂jág₃ dsa₂ a₂ca₂jmo₃ Pa₄ jaun₂, ca₂tóinꞌ₂ co₂mɨꞌ₅₄, ca₂guióꞌ₃ quianꞌ₅₄ jág₁ jmei₅ quióꞌ₅ dsa₂ chan₂ Licaonia, ca₂juáꞌ₂:
―¡Diú₄ i₂lɨ́n₅ dsa₂ ca₂sión₃ jë₄ quián₂ jniog₄!
12 Juáꞌ₂ dsa₂ a₂lɨ́n₅ Bernabé diú₄ Júpiter*, Pa₄ guëꞌ₂ lɨ́n₅ diú₄ Mercurio*a ia₁ ꞌéi₂ bá₄ i₂juáꞌ₂ guë́₄ jág₁.
13 Jaun₂ jme₁chíꞌ₄ guáꞌ₅ quióꞌ₅ diú₄ Júpiter ja₁dsi₁lén₂ dsa₂ juɨg₂ jaun₂. Dsa₂ i₂lɨ́n₅ jme₂dsa₂ quián₅ Júpiter ca₂dsióg₃ quiainꞌ₅₄ juɨn₅ dsa₂ le₁jŋiai₂₃ ca₁juɨ₅ le₁quian₅ lí₁ në́₃, a₂jme₁ꞌnio₃ jme₃dsiain₂₃ ca₁juɨ₅ a₂jme₁jéinꞌ₂ ne₄ Pa₄ quianꞌ₅₄ Bernabé.
14 La₁ jme₁ca₂rë₃líꞌ₄ Pa₄ quianꞌ₅₄ Bernabé i₂chen₄* quián₅ Jesús, a₂ma₂tionꞌ₅₄ dsa₂ jmo₂₃ le₂jaun₂, jaun₂ ca₂jme₃lióg₃ ca₂gág₃ tsɨnꞌ₅₄.b Jaun₂ ca₂tóinꞌ₂ jɨn₄ dsa₂ ca₂guióꞌ₃ ca₂juáꞌ₂:
15 ―¡Nei₂ ꞌniaꞌ₂! ¿ꞌE₂ lë₃ jmoꞌ₂ ꞌniaꞌ₂ le₂në₅? Dsa₂ mɨ₂güɨ́g₃ bá₄ jniaꞌ₅₄, juɨ₁liaꞌ₂ ꞌniaꞌ₂. A₂le₁quian₁ jág₁ dse₃ bá₄ jniaꞌ₅₄ ja₂náu₅, a₂chei₅₄ ꞌniaꞌ₂ a₂jŋiáꞌ₄ ꞌniaꞌ₂ ca₂le₃jë́₃ a₂në₅ a₂tsá₃ ꞌe₂ ta₁ tí₄, a₂jenꞌ₅₄ ꞌniaꞌ₂ të₂le₃ quióꞌ₅ Diú₄ jénꞌ₃ i₂ca₂jmo₃ gueiꞌ₅₄ i₂juɨ́g₃, guaꞌ₅₄ ꞌuë₃, jmɨ₁ŋiꞌ₄ në́₃, ca₂le₃jë́₃ guë́₄ ꞌe₂ a₂cha₂ ja₁jaun₂.
16 ꞌŊiog₅ Diú₄ ca₂cuë₃ jmɨg₄ ma₂lɨ́gꞌ₂ ca₂cuë́ꞌ₃ ca₂le₃jɨ́n₃ dsa₂ chan₂ guaꞌ₅₄ ꞌuë₃ a₂jmo₃ conꞌ₂ lë́₂ dsɨ́₅ guioin₅₄.
17 La₁ Diú₄ ca₂ꞌë́ꞌ₃ dsa₂ ꞌein₂ lɨ́in₅, ca₂jmo₃ bá₄ léi₄ të₂le₃ quianꞌ₅₄ ca₂le₃jë́₃ a₂dse₃ a₂qui₂ca₂jmo₃. ꞌÉi₂ bá₄ jmo₅ a₂tang₂ jmɨ́₅ ia₁jaun₂ qui₃ráu₃ ca₂le₃jë́₃ a₂qui₂guë́ꞌ₃ dsa₂. ꞌÉi₂ bá₄ jmo₅ a₂le₁ꞌág₄ dse₃ dsɨ́₅ dsa₂.
18 Ja₂lag₃ le₂jaun₂ bá₄ ca₂tióꞌ₃ ca₂jme₃ꞌuáin₂ dsɨ́₅ dsa₂, a₂tsá₃ ma₃qui₃jéinꞌ₂ jáꞌ₂ ne₅₄.
19 Jaun₂ ca₂dsi₃lén₂ i₂lɨn₅₄ dsa₂ judíos i₂chan₂ Antioquía, quianꞌ₅₄ i₂chan₂ Iconio, qui₂ca₂toinꞌ₂ jág₁ dsa₂, ca₂jmo₃ jág₁. Jaun₂ ca₂cuë́ꞌ₃ cang₄ Pa₄, ca₂tsɨ₂cuangꞌ₂ të₂ꞌnɨꞌ₂ juɨg₂, a₂ma₂në₂jŋagꞌ₃ bá₄ lɨ́in₂.
20 La₁ jme₁ca₂ŋɨꞌ₂ dsa₂ i₂ꞌén₂ rɨinꞌ₅₄ ja₁rë₂quiain₂₃, ca₂nau₂ Pa₄, ca₂ŋó₃ táng₃ juɨ₅ jë₄ juɨg₂. Jme₁jnia₃ jaun₂ guë́₄, ca₂o₃ꞌɨ́in₃ juɨg₂ jaun₂ quiainꞌ₅₄ Bernabé, ca₂i₃léin₂ juɨ₅ Derbe.
21 Juɨn₅ dsa₂ chan₂ juɨg₂ Derbe ca₂rë₃ꞌéin₂ jme₁ca₂nág₂ ca₂ꞌë́₂ dsa₂ ꞌéi₂ jág₁ dse₃ a₂tɨ́nꞌ₄ dsa₂. Jaun₂ ca₂ꞌuɨin₂ ja₁jaun₂, ca₂i₃léin₂ táng₃ juɨ₅ Listra, juɨ₅ Iconio në́₃, a₂ca₂dsi₃léin₂ táng₃ Antioquía.
22 Le₂tan₅₄ juɨg₂ ja₁jaun₂ qui₂ca₂cuë́ꞌ₃ bí₂ dsa₂ i₂ꞌén₂. Qui₂ca₂toinꞌ₂ jág₁ dsa₂ a₂ꞌnióꞌ₅ tsánꞌ₂ dsa₂ tiá₂ jág₁ dse₃. Ca₂juáꞌ₂:
―Tion₅₄ ꞌnióꞌ₅ ŋagꞌ₅₄ deꞌ₂ ꞌniaꞌ₂ jmɨ₁uɨg₅ mɨ₂güɨ́g₃ la₂, néꞌ₃ guë́₄ a₂dsi₁noꞌ₃ ꞌniaꞌ₂ ja₁gon₂ Diú₄.
23 Ján₃ bá₄ ca₂ꞌɨn₃ dsa₂ dsa₂ canꞌ₅₄c liaꞌ₂ caun₂ guáꞌ₅. Jaun₂ cang₂ jme₁ca₂lë₃ chi₂lénꞌ₂ dsa₂ Diú₄, a₂jme₂ꞌɨin₅₄ në́₃, ca₂dsiain₃ rɨinꞌ₅₄ i₂ꞌén₂ ꞌéi₂ o₄gú₃ Te₁guiꞌ₅₄, ia₁ të₂le₃ quióꞌ₅ Te₁guiꞌ₅₄ bá₄ ma₂ꞌén₂ dsa₂.
Pa₄ quianꞌ₅₄ Bernabé ca₂i₃lein₃ táng₃ Antioquía ja₁tén₄ Siria
24 Cang₂ jaun₂ ca₂ŋɨ́i₃ juɨ₅ ꞌuë₃ Pisidia, jaun₂ ca₂dsi₃léin₂ ꞌuë₃ Panfilia.
25 Qui₂ca₂ꞌë́₂ jág₁ juɨg₂ Perge, jaun₂ ca₂i₃léin₂ juɨg₂ Atalia.
26 Ja₁jaun₂ ca₂tóinꞌ₂ nɨ₁barco a₂ca₂i₃lein₃ táng₃ Antioquía, juɨg₂ ja₁ca₂jángꞌ₂ dsa₂ rɨinꞌ₅₄ o₄gú₃ Diú₄ le₂jŋiá₅, a₂jmo₃ ta₁, co₂ꞌnióꞌ₄ ta₁ a₂ma₂ca₂lë₃ jmo₂₃.
27 Jme₁ca₂dsi₃lein₃ Antioquía, ca₂ŋɨ́iꞌ₂ ca₂le₃jɨ́n₃ rɨinꞌ₅₄. Jaun₂ ca₂dsia₃ ca₂le₃jë́₃ ꞌe₂ ca₂jmo₃ Diú₄ quiongꞌ₅₄, ꞌa₂ liaꞌ₂ ca₂niá₃ Diú₄ juɨ₅ quióꞌ₅ dsɨ₂nau₂, ia₁jaun₂ le₃ꞌén₂ ꞌéi₂ ján₃.
28 Jaun₂ uë́₂ bá₄ ca₂ꞌí₃ Pa₄ ja₁jaun₂, Bernabé në́₃ quiainꞌ₅₄ dsa₂ i₂ꞌén₂.