Ca₂ŋɨꞌ₂ rɨinꞌ₅₄ Jerusalén
15
Jmɨg₄ jaun₂ i₂lɨn₅₄ dsa₂ chan₂ Judea ca₂dsi₃léin₂ juɨg₂ Antioquía, ca₂jme₃lióg₃ ca₂jme₃tɨin₂₃ rɨinꞌ₅₄ ja₁jaun₂, në₁juaꞌ₂ tsá₃ ti₅ dsa₂ nɨ₁lo₁* dsa₂ ŋeꞌ₂ liaꞌ₂ conꞌ₂ lë́₅ Si₂ ꞌÉiꞌ₃ quióꞌ₅ Moisés, tsá₃ lé₂ tɨ́inꞌ₄.
2 Pablo quianꞌ₅₄ Bernabé ca₂tsɨ́in₂ ꞌŋio₅ lɨn₃ quianꞌ₅₄ dsa₂ ꞌéi₂. Jaun₂ ca₂ꞌɨn₃ dsa₂ Pa₄ quianꞌ₅₄ Bernabé, quiainꞌ₅₄ i₂lɨn₅₄ guë́₄ dsa₂ siánꞌ₂ në́₃, a₂dsɨ₃léin₂ Jerusalén a₂jme₃rë́₃ jág₁ jaun₂ quiainꞌ₅₄ dsa₂ rɨinꞌ₅₄ i₂chen₄*a quián₅ Jesús quianꞌ₅₄ dsa₂ canꞌ₅₄b quián₅ dsa₂ ꞌén₂.
3 Co₂nióꞌ₃ dsa₂ i₂ꞌén₂ juɨg₂ Antioquía ca₂ꞌágꞌ₃ jág₁ rɨinꞌ₅₄ i₂ca₂ꞌɨin₃ ꞌéi₂, jaun₂ ꞌéi₂ në́₃ ca₂i₁nioi₁₂ ꞌuë₃ Fenicia quianꞌ₅₄ ꞌuë₃ Samaria. Ja₁jaun₂ ca₂dsia₃ ꞌa₂ liaꞌ₂ ca₂rë₃ꞌén₂ dsɨ₂nau₂. Jaun₂ lë₃, ꞌŋio₅ lɨn₃ ꞌioꞌ₂ ca₂jmo₃ dsa₂ rɨinꞌ₅₄ jme₁ca₂rë₃ŋi₅.
4 Jme₁ca₂dsióg₃ Pa₄ quiainꞌ₅₄ Bernabé juɨg₂ Jerusalén, ca₂guei₃ ca₂le₃jɨ́n₃ dsa₂ ꞌén₂ ja₁jaun₂, dsa₂ rɨinꞌ₅₄ i₂chen₄* quián₅ Jesús, dsa₂ canꞌ₅₄ quián₅ dsa₂ ꞌén₂ në́₃. Jaun₂ ca₂dsia₃ Pa₄ quianꞌ₅₄ Bernabé ca₂tsɨ́ꞌ₃ rɨinꞌ₅₄ ꞌa₂ liaꞌ₂ ma₂jmo₃ Diú₄ quiongꞌ₅₄.
5 La₁ qui₂ca₂nau₂ i₂lɨn₅₄ dsa₂ fariseos* i₂ma₂ꞌén₂, jaun₂ ca₂juáꞌ₂:
―Ca₂tɨ́n₂ dsɨ₂nau₂ ti₃ dsa₂ nɨ₁lo₁₂, jaun₂ ꞌnióꞌ₅ nag₃ a₂jme₃ti₃ Si₂ ꞌÉiꞌ₃ quióꞌ₅ Moisés.
6 Jaun₂ ca₂ŋɨꞌ₂ dsa₂ i₂chen₄ quián₅ Jesús, quianꞌ₅₄ dsa₂ canꞌ₅₄ në́₃, ia₁jaun₂ ꞌnoꞌ₂ dsɨ́₅ ꞌa₂ liaꞌ₂ jmo₃ juɨ₁liaꞌ₂ jág₁ jaun₂.
7 Jme₁ma₂në₂dsia₃ jág₁ ꞌŋio₅ lɨn₃, ca₂nau₂ Pedro jaun₂ ca₂juáꞌ₂:
―Rɨnꞌ₅₄ jniog₄, ŋiꞌ₅₄ bá₄ ꞌniaꞌ₂ jaun₂, jniá₂ dsa₂ i₂ca₂quiónꞌ₂ Diú₄ jɨnꞌ₄ ꞌniaꞌ₂ ma₂i₁jáun₃, ia₁jaun₂ cuë́₄ jniá₂ jág₁ dse₃ dsɨ₂nau₂, ia₁jaun₂ le₃ꞌéin₂.
8 Jaun₂ Diú₄ në́₃, i₂cuɨ́ꞌ₅ dsɨ́₅ dsa₂, ca₂jmo₃ léi₄ a₂guei₃ bá₄, ca₂cuɨin₃ Jme₂dsí₂ Jŋió₅ quiáin₅, ca₂cuɨin₃ dsa₂ ꞌéi₂ juɨ₁liaꞌ₂ ma₂cuag₃ jniog₄.
9 Tsá₃ jma₃quén₅ ꞌnio₃ Diú₄ jniog₄ quianꞌ₅₄ dsa₂ ꞌéi₂, ia₁ ján₃ bá₄ ca₂rang₃ jme₂dsí₂ quióꞌ₅ dsa₂ ꞌéi₂ ia₁ ca₂rë₃ꞌéin₂.
10 Jaun₂ në́₃, ¿ꞌe₂ lë₃ dsɨ₂jiog₅ ꞌauꞌ₂ ꞌniaꞌ₂ a₂tsá₃ dsau₅ a₂ma₂jmo₃ Diú₄? ¿ꞌE₂ lë₃ lɨ́nꞌ₂ ꞌniaꞌ₂ a₂tion₅₄ ꞌnióꞌ₅ jme₃ti₃ dsa₂ i₂ꞌén₂ ꞌéi₂ Si₂ ꞌÉiꞌ₃, tonꞌ₂ ca₂liaꞌ₂ jŋiaꞌ₅₄ dsa₂ canꞌ₅₄ quián₂ jniog₄ tsá₃ ca₂tióꞌ₃ jme₃ti₃, on₃ guëꞌ₂ jniog₄ tián₂ jme₁ti₁?
11 La₁ ne₄ jniog₄, a₂dse₃ dsɨ́₅ Te₁guiꞌ₅₄ Jesús bá₄ a₂tágꞌ₄, co₂rë₂ quianꞌ₅₄ dsa₂ ꞌéi₂.
12 Jaun₂ ca₂jmo₃ dsa₂ tei₄, jaun₂ ca₂nág₂ të₁liaꞌ₂ ca₂juáꞌ₂ Bernabé quianꞌ₅₄ Pablo ca₂le₃jë́₃ léi₄ juëꞌ₂ a₂ma₂jmo₃ Diú₄ të₂le₃ quiongꞌ₅₄, jɨn₄ dsɨ₂nau₂.
13 Jme₁ca₂dsan₃ juáꞌ₂ ꞌéi₂, jaun₂ ca₂juáꞌ₂ táng₃ Jacobo:
―Rɨnꞌ₅₄ jniog₄, nei₂ ꞌniaꞌ₂ a₂juáꞌ₄ jniá₂:
14 Ma₂në₂dsia₃ Si₂mu₅₄ Pe₄ ꞌa₂ liaꞌ₂ ca₂jmo₃ Diú₄ dse₃ dsɨ́₅ jë₁le₂ꞌuɨg₅₄ të₂le₃ quióꞌ₅ dsɨ₂nau₂, ꞌa₂ liaꞌ₂ ca₂quióinꞌ₂ ján₃ jɨn₄ dsa₂ ꞌéi₂, co₂nióꞌ₃ dsa₂ i₂lén₂ dsa₂ quiáin₅ ꞌŋiog₅.
15 Le₂në₅ bá₄ lë́₅ jág₁ quióꞌ₅ dsa₂ i₂jme₁ꞌë́₂ jág₁ quián₅ Diú₄, juɨ₁liaꞌ₂ ca₂tióng₃ ne₄ Si₂:
16 Guio₅₄ táng₃ cang₂, jaun₂ jmógꞌ₄ táng₃ ne₄ta₁
quióꞌ₅ Rag₅₄ David a₂ma₂quɨꞌ₃;
tsɨꞌ₅₄ táng₃ nɨ₁cang₁ a₂ma₂gon₃ quióꞌ₅,
17 ia₁jaun₂ ca₂le₃jɨ́n₃ dsɨ₂nau₂ ꞌnaiꞌ₂ Te₁guiꞌ₅₄,
ca₂le₃jë́₃ juɨg₂ në́₃,
dsa₂ i₂chen₂ dsa₂ quián₅ Diú₄.
18 Le₂në₅ bá₄ juáꞌ₂ Te₁guiꞌ₅₄
i₂jmo₅ ca₂le₃jë́₃ a₂në₅,
a₂ma₂cuɨ́ꞌ₅ dsa₂ ca₃ma₂lɨ́gꞌ₂.c
19 ꞌJaun₂ në́₃ lɨ́n₂ jniá₂ ―juáꞌ₂ Jacobo―, tsá₃ dse₃ cue₅₄ jniog₄ o₂meꞌ₅₄ dsɨ₅ dsɨ₂nau₂ i₂ma₂jénꞌ₂ të₂le₃ quióꞌ₅ Diú₄.
20 Tióꞌ₅ meꞌ₂ a₂jŋiaꞌ₅₄ jmó₁ jniog₄ caun₂ si₂ a₂chei₅₄ jniog₄ a₂tsá₃ ma₃guë́ꞌ₃ má₃ a₂tsá₃ dsi₂ten₅₄ guë́ꞌ₃ juɨ₁liaꞌ₂ a₂dsia₅ dsa₂ ne₄ ne₄chei₂ quióꞌ₅ diú₄ lag₄. Dse₃ chei₅₄ jniog₄ a₂tsá₃ nióꞌ₃ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂, on₃ guëꞌ₂ guë́ꞌ₃ má₃ a₂tsá₃ dsi₃ten₅₄ guë́ꞌ₃ dsa₂ judíos, juɨ₁liaꞌ₂ jáꞌ₂ i₂güɨ́ꞌ₅ dsa₂ dsɨ₂lag₄, on₃ guëꞌ₂ jmɨ₄ jáꞌ₂ në́₃.
21 Ia₁ ma₂lɨ́gꞌ₂ bá₄ ma₂tu₁ja₂lén₂ dsa₂ qui₂ꞌë́₂ ꞌÉiꞌ₃ Juáꞌ₅ quióꞌ₅ Moisés le₂caun₂ le₂caun₂ juɨg₂, qui₂ꞌɨ₂₃ dsi₂néi₂ guáꞌ₅ sinagogas* ca₂le₃jë́₃ jmɨg₄ sa₅₄.
22 Jaun₂ në₃, ca₂të₁gua₁ jág₁ quióꞌ₅ dsa₂ i₂chen₄ quián₅ Jesús, quianꞌ₅₄ dsa₂ canꞌ₅₄, ca₂le₃jɨ́n₃ guë́₄ dsa₂ i₂lɨ́n₅ guáꞌ₅* a₂ꞌɨin₃ i₂lɨn₅₄ jë₄ quióꞌ₅ rɨinꞌ₅₄, i₂chein₃ quianꞌ₅₄ Pablo, Bernabé në́₃, juɨ₅ Antioquía. Jaun₂ ca₂ꞌɨn₃ dsa₂ Judas i₂chen₂ Barsabás ján₃, quianꞌ₅₄ i₂chen₂ Silas i₂lɨ́n₅ dsa₂ i₂quian₅ ne₄ juɨ₅ jë₄ quióꞌ₅ dsa₂ i₂ꞌén₂.
23 Jaun₂ quianꞌ₅₄ ꞌéi₂ ca₂chein₃ si₂ carta a₂juáꞌ₂ le₂la₂:
Jniaꞌ₅₄ conꞌ₂ lág₅ dsa₂ chen₄ quián₅ Jesús, quianꞌ₅₄ dsa₂ canꞌ₅₄ quián₂ jniaꞌ₅₄, ca₂le₃jɨ́n₃ guë́₄ rɨnꞌ₅₄ jniaꞌ₅₄ i₂ꞌén₂, chen₄ jniaꞌ₅₄ si₂ la₂ neꞌ₅₄ ꞌniaꞌ₂ dsɨ₂nau₂ rɨnꞌ₅₄ jniog₄ i₂tiánꞌ₅ juɨg₂ Antioquía, quianꞌ₅₄ i₂tiánꞌ₅ ꞌuë₃ Siria, quianꞌ₅₄ i₂tiánꞌ₅ ꞌuë₃ Cilicia në́₃. Cuɨ́n₅ jniaꞌ₅₄ Diú₄ ꞌniaꞌ₂.
24 Ma₂ca₂rë₃ne₄ jniaꞌ₅₄ jág₁ a₂i₁len₅₄ i₂lɨn₅₄ dsa₂ chan₂ ja₁lá₃, on₃juaꞌ₅₄ i₂chen₄ quián₂ jniaꞌ₅₄. Ma₂dsi₃léin₂ cuë́ꞌ₅ o₂meꞌ₅₄ dsɨ₅ ꞌniaꞌ₂ quianꞌ₅₄ jág₁ quióꞌ₅ a₂tsɨ́ꞌ₅ ꞌniaꞌ₂ a₂tion₅₄ ꞌnióꞌ₅ ti₃ dsa₂ nɨ₁lo₁ dsa₂ ŋeꞌ₂, a₂jme₁tiꞌ₄ ꞌniaꞌ₂ ꞌÉiꞌ₃ quióꞌ₅ Moisés në́₃.
25 ꞌUɨg₅₄ jaun₂, ca₂jmó₁ jniaꞌ₅₄ caun₂ jág₁, ca₂ꞌɨ́n₄ jniaꞌ₅₄ rɨnꞌ₅₄ jë₄ quián₂ jniaꞌ₅₄ a₂dsɨ₃léin₂ co₂lë₅ quiainꞌ₅₄ Bernabé quianꞌ₅₄ Pa₄ i₂ꞌnio₄ lɨn₃ quián₂ jniaꞌ₅₄, a₂dsɨ₃jɨin₅₄ ꞌniaꞌ₂. Ia₁ le₂jaun₂ bá₄ dse₃, lág₂ jniaꞌ₅₄.
26 Ma₂le₁ꞌág₄ caun₂ dsɨ́₅ gue₃ ꞌmú₃ o₁quióꞌ₄ Te₁guiꞌ₅₄ Jesucristo quián₂ jniog₄.
27 Jaun₂ chen₄ jniaꞌ₅₄ Judas quianꞌ₅₄ Silas në́₃, jaun₂ i₂në₅ bá₄ juáꞌ₂ quianꞌ₅₄ jág₁ tioꞌ₅₄ ꞌo₅₄ ca₂le₃jë́₃ a₂juaꞌ₂ jniaꞌ₅₄ la₂.
28 Jaun₂ në́₃, Jme₂dsí₂ Jŋió₅ bá₄ ca₂jme₃ꞌo₅₄ a₂ꞌniogꞌ₅₄ jniaꞌ₅₄ dsɨ₅, jaun₂ dse₃ bá₄ lág₂ jniaꞌ₅₄ a₂tsá₃ cuë₅₄ jniaꞌ₅₄ ꞌniaꞌ₂ ꞌéiꞌ₃ guei₂, jŋiaꞌ₅₄ liaꞌ₂ jmáꞌ₃ liaꞌ₂ a₂léi₄ ꞌnióꞌ₅ quiánꞌ₂ ꞌniaꞌ₂ la₂:
29 A₂tsá₃ quëꞌ₅₄ ꞌniaꞌ₂ nɨ₁ŋɨ́₅ a₂ma₂dsia₃ dsa₂ ne₄ ne₄chei₂ quióꞌ₅ diú₄ lag₄; ján₃ bá₄ tsá₃ quëꞌ₅₄ ꞌniaꞌ₂ jmɨ₄ jáꞌ₂, on₃ guëꞌ₂ nɨ₁ŋɨ₁ jáꞌ₂ i₂dsan₂ i₂güɨ́ꞌ₅ dsa₂ dsɨ₂lag₄. Tsá₃ nióꞌ₄ ꞌniaꞌ₂ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gogꞌ₂. Në₁juaꞌ₂ ca₂jme₁tiꞌ₄ ꞌniaꞌ₂ jág₁ la₂, dse₃ bá₄ le₃chanꞌ₂ ꞌniaꞌ₂.
Co₂në₅ bá₄ jág₁.
30 Jaun₂ në́₃, le₂në₅ bá₄ ca₂tónꞌ₂ ꞌéi₂ juɨ₅, ca₂i₃léin₂ juɨ₅ Antioquía. Jaun₂ ca₂ŋɨ́iꞌ₂ dsa₂ i₂ꞌén₂ ja₁jaun₂. Jaun₂ ca₂jɨ́inꞌ₃ dsa₂ si₂ carta a₂jme₁quian₅.
31 Jme₁ca₂ꞌɨ́₂ rɨinꞌ₅₄ si₂, qui₂ca₂jmo₃ ꞌioꞌ₂ o₁quióꞌ₄ jág₁ a₂cuë₅ liánꞌ₂ dsɨ́₅ jaun₂.
32 Ia₁ Judas quianꞌ₅₄ Silas, i₂jme₁ꞌë́₂ jág₁ a₂cuë₅ Diú₄ ján₃, ca₂cuë₃ ꞌlióng₂ jág₁ dse₃ a₂ca₂jmo₃ ca₂ꞌág₂ dse₃ dsɨ́₅ rɨinꞌ₅₄, ꞌŋio₅ lɨn₃ ca₂cuë₃ bí₂ në́₃, quianꞌ₅₄ jág₁ quióꞌ₅.
33 Jme₁ma₂të́₂ ꞌlióng₂ jmɨg₄ tioinꞌ₅₄ ja₁jaun₂, ca₂dsiógꞌ₂ táng₃ dsa₂ caun₂ tei₄ ja₁con₂ rɨinꞌ₅₄ i₂ca₂chei₃.d
35 La₁ ca₂jŋia₃ Pa₄ quianꞌ₅₄ Bernabé juɨg₂ Antioquía, qui₂jme₂tɨin₂₃ dsa₂, quiainꞌ₅₄ juɨn₅ guë́₄ i₂siánꞌ₂, qui₂ꞌë́ꞌ₅ dsa₂ jág₁ dse₃ quióꞌ₅ Te₁guiꞌ₅₄.
Ca₂ŋó₃ Pa₄ ca₂i₁ꞌë́₄ jág₁ jë₁ca₂të́₂ tɨn₃ ráun₂
36 Cang₂ jaun₂, ca₂juáꞌ₂ Pa₄ ca₂tsɨ́ꞌ₃ Bernabé:
―Dsau₅₄ táng₃ dsɨ₁jɨn₁ rɨnꞌ₅₄ ca₂le₃jë́₃ juɨg₂ ja₁ma₂ca₂i₁ꞌëꞌ₅₄ dsa₂ jág₁ dse₃ quióꞌ₅ Te₁guiꞌ₅₄, dsɨ₁jag₅₄ në₁juaꞌ₂ ꞌa₂ liaꞌ₂ chain₂.
37 Bernabé në́₃ jme₁ꞌnio₃ jŋiai₃ Juan₅₄, i₂chen₂ Marcos ján₃.
38 La₁ Pa₄ guëꞌ₂ në́₃ tsá₃ ca₂gue₃ jiog₃, ia₁ ca₂téi₂ bá₄ ꞌéi₂ liaꞌ₂ conꞌ₂ jme₁i₁nioi₁₂ ꞌuë₃ Panfilia,e tsá₃ ma₃ca₂jme₃quiongꞌ₅₄ juaꞌ₅₄ a₂jme₃ꞌo₅₄.
39 Jaun₂ ca₂tsɨ́in₂ ꞌŋio₅ lɨn₃, ca₂liaꞌ₂ ca₂i₃léin₂ jma₃quén₅. Jaun₂ Bernabé bá₄ ca₂jŋia₃ Marcos, ca₂tóinꞌ₂ nɨ₁barco, ca₂i₃léin₂ juɨ₅ Chipre.
40 Pa₄ guëꞌ₂ ca₂quióinꞌ₂ Silas. Jme₁ma₂në₂jángꞌ₂ rɨinꞌ₅₄ o₄gú₃ Te₁guiꞌ₅₄ i₂ꞌnio₃, jaun₂ qui₂ca₂ꞌágꞌ₃ jág₁ rɨinꞌ₅₄, ca₂i₃léin₂.
41 Jaun₂ ca₂i₁ŋɨi₁₂ le₂tan₅₄ ꞌuë₃ Siria quianꞌ₅₄ Cilicia, qui₂i₁cuëꞌ₂ bí₂ rɨinꞌ₅₄ i₂tiánꞌ₅ ja₁jaun₂.