Ca₂jme₃quiongꞌ₅₄ Timoteo ca₂jme₃quiainꞌ₅₄ Pa₄ quianꞌ₅₄ Silas
16
Ca₂dsióg₃ Pa₄ quianꞌ₅₄ Silas juɨg₂ Derbe, juɨg₂ Listra në́₃. Ja₁jaun₂ ca₂jeinꞌ₂ jan₂ dsa₂ ꞌén₂ i₂chen₂ Timoteo. Chog₅₄ Timoteo ꞌéi₂ jme₁lɨ́n₄ ꞌio₅₄ judía* i₂ma₂ꞌén₂ jág₁ dse₃. Jmei₂ guëꞌ₂ jme₁lɨ́n₄ jan₂ griego*.
2 Jaun₂ dsa₂ i₂ꞌén₂ i₂jme₁tiánꞌ₄ Listra quianꞌ₅₄ Iconio, dse₃ bá₄ jme₁ꞌag₂₃.
3 Jaun₂ ꞌnio₃ Pa₄ jiog₃ quiongꞌ₅₄, jaun₂ ca₂ti₃ nɨ₁lo₁* ꞌéi₂,a ia₁jaun₂ tsá₃ jénꞌ₄ ꞌlɨgꞌ₅₄ dsa₂ judíos* i₂tiánꞌ₅ ja₁jaun₂. Ia₁ ma₂ŋi₅ bá₄ ca₂le₃jɨ́n₃ dsa₂, a₂lɨ́n₅ griego jmei₂ ꞌéi₂.
4 Ca₂le₃jë́₃ juɨg₂ ja₁ca₂ŋɨ́i₃, qui₂ca₂jme₃jeinꞌ₂ rɨinꞌ₅₄ ca₂cuë₃ ꞌéiꞌ₃ conꞌ₂ lë́₅ jág₁ quióꞌ₅ dsa₂ i₂chen₄ quián₅ Jesús, jág₁ quióꞌ₅ dsa₂ canꞌ₅₄ i₂tiánꞌ₅ Jerusalén në́₃.
5 Jaun₂ në́₃, ca₂le₃jɨ́n₃ dsa₂ i₂lɨ́n₅ guáꞌ₅, ca₂jŋaꞌ₃ tiá₂ jág₁ dse₃ a₂ꞌéin₂, jaun₂ le₂o₃ jmɨg₄ bá₄ ca₂i₃juɨ́in₂.
Ca₂quɨ₃ Pablo a₂ca₂jɨ́in₂ jan₂ dsa₂ chan₂ Macedonia
6 Tsá₃ ca₂cuë₃ Jme₂dsí₂ Jŋió₅ jmɨg₄ a₂ꞌë́₂ dsa₂ jág₁ dse₃ ꞌuë₃ Asia. Jaun₂ lë₃ ca₂i₁lein₅₄ ca₂i₁ŋɨi₁₂ le₂tan₅₄ ꞌuë₃ Frigia quianꞌ₅₄ ꞌuë₃ Galacia.
7 Jaun₂ ca₂dsi₃léin₂ ja₁jén₂ ꞌuë₃ Misia. Ja₁jaun₂ jme₁ꞌnio₃ jme₁dsɨ₃léin₂ ꞌuë₃ Bitinia. La₁ tsá₃ ca₂cuë₃ jmɨg₄ Jme₂dsí₂ quián₅ Jesús dsɨ₃léin₂ ja₁jaun₂.
8 Jaun₂ conꞌ₂ ca₂ŋɨ́i₃ bá₄ ꞌuë₃ Misia, ca₂dsi₃léin₂ ꞌo₄ jmɨ₁ŋíꞌ₄ ja₁chei₂ Troas.
9 Ja₁jaun₂ ca₂quɨ₃ Pa₄ a₂ꞌuë₂ jaun₂ a₂ca₂jɨ́in₂ jan₂ dsa₂ chan₂ ꞌuë₃ Macedonia, a₂chéinꞌ₅ mɨ₂₃, a₂juáꞌ₂: “Ŋɨ₅₄ juɨ₅ ꞌuë₃ Macedonia i₂jme₁ꞌo₁ jniaꞌ₅₄.”
10 Dsɨ₂juɨ₅ jme₁ca₂quɨ₃ Pa₄ le₂në₅, jaun₂ ca₂jmó₁ jniaꞌ₅₄ co₂jŋia₅₄ a₂dsɨ₁náu₄ juɨ₅ Macedonia. Ia₁ dsónꞌ₂ lág₂ jniaꞌ₅₄ a₂të́₂ Diú₄ ja₁jaun₂ a₂dsɨ₁ꞌë́₄ jniaꞌ₅₄ jág₁ dse₃.b
Pa₄ quianꞌ₅₄ Silas tioinꞌ₅₄ juɨg₂ Filipos
11 Ca₂tióꞌ₄ jniaꞌ₅₄ ꞌŋióꞌ₃ nɨ₁barco juɨg₂ Troas. Ca₂i₃náu₅ jniaꞌ₅₄ co₂dsau₅ juɨ₅ ꞌuë₃ Samotracia a₂niog₅ jë₄ jmɨ₁ŋíꞌ₄. Jme₁jnia₃ jaun₂, ca₂dsi₃náu₅ jniaꞌ₅₄ Neápolis.
12 Tioꞌ₅₄ jniaꞌ₅₄ ja₁jaun₂, i₂náu₅ táng₃ ja₁chei₂ Filipos. Ja₁jaun₂ lë́₅ caun₂ colonia romana ja₁lë́₄ juɨg₂ dsen₅₄ guë́₄ quióꞌ₅ dsa₂ chan₂ ꞌuë₃ Macedonia. Ja₁jaun₂ ca₂tióꞌ₄ jniaꞌ₅₄ tɨn₃-ꞌnɨ₅ jmɨg₄.
13 Caun₂ jmɨg₄ sa₅₄ ca₂i₁náu₄ juɨ₅ ꞌnɨꞌ₂ juɨg₂, cau₅ cheiꞌ₅₄ cuá₃, caun₂ ja₁jme₁lë́₄ ja₁dsɨ₂lén₂ dsa₂ a₂chi₂léinꞌ₂ Diú₄. Ja₁jaun₂ ca₂ꞌio₄ jniaꞌ₅₄, ca₂jme₁tɨn₅ jniaꞌ₅₄ ꞌio₅₄ i₂ca₂ŋɨꞌ₂, jág₁ dse₃ quióꞌ₅ Diú₄.
14 Jan₂ ꞌio₅₄ i₂jme₁ꞌen₅₄ jë₄ jaun₂ i₂chen₂ Lidia i₂chan₂ juɨg₂ Tiatira, jme₁lɨ́n₄ dsa₂ i₂ꞌnag₅ ꞌmɨꞌ₂ ꞌuɨꞌ₃ jláꞌ₁. ꞌIo₅₄ ꞌéi₂, jme₁jme₂juɨnꞌ₂ Diú₄. Jaun₂ ca₂jmo₃ Te₁guiꞌ₅₄ ca₂lë₃ dsɨ́₅ ꞌio₅₄ ꞌéi₂ a₂nag₃ a₂tónꞌ₂ juɨ₅ a₂juáꞌ₂ Pa₄.
15 Jaun₂ ca₂jŋói₂ jmɨg₂ co₂dsia₅ quianꞌ₅₄ ca₂le₃jɨ́n₃ dsa₂ dsi₂néi₂ quióꞌ₅. Jme₁co₂lág₂ jaun₂, ca₂mɨ₃ tság₅ jniaꞌ₅₄:
―Chi₂juaꞌ₂ jmoꞌ₂ ꞌniaꞌ₂ ꞌauꞌ₂ a₂lɨ́n₅ jniá₂ të₃dsónꞌ₂ dsa₂ i₂ꞌén₂ jág₁ quióꞌ₅ Te₁guiꞌ₅₄, i₂nóꞌ₅ ꞌniaꞌ₂ ja₁quió₃ i₁jŋiaꞌ₄.
Jaun₂ ca₂juáꞌ₂ tion₅₄ a₂ca₂jŋia₄ jniaꞌ₅₄.
16 Co₂ráun₂ ca₂lë₃, liaꞌ₂ conꞌ₂ jme₁i₃náu₅ jniaꞌ₅₄ ja₁chi₂lénꞌ₂ dsa₂ Diú₄, ca₂jenꞌ₂ jniaꞌ₅₄ jan₂ ꞌio₅₄ chiꞌ₂ i₂jme₁ꞌen₅₄ jme₂dsí₂ ꞌlɨnꞌ₅₄ të₂dsɨ́₅, i₂dsi₂ jág₁.c ꞌIo₅₄ ꞌéi₂ a₂lë₁jmo₂₃ bá₄ ta₁, ia₁ juɨg₅₄ bá₄ jme₁cán₂ cu₄ a₂jme₁lɨ́ꞌ₂ a₂dsi₂ jág₁.
17 ꞌIo₅₄ chiꞌ₂ ꞌéi₂ ca₂ꞌein₃ Pa₄, ca₂ꞌein₃ jniaꞌ₅₄ në́₃, ca₂guióꞌ₃ ca₂tsɨ́ꞌ₃ dsa₂ i₂jme₁tionꞌ₅₄:
―Dsa₂ në₅ i₂jme₂ti₃ ta₁ ne₄ Diú₄ juɨnꞌ₂ guë́₄. Jaun₂ ꞌë́₂ jág₁ tsɨ́ꞌ₅ ꞌniaꞌ₂ ꞌa₂ liaꞌ₂ lé₂ liónꞌ₂ ꞌniaꞌ₂.
18 ꞌLióng₂ jmɨg₄ ca₂jmo₃ le₂jaun₂. Ca₂lë₃ jme₁ca₂lë₃ ca₂i₃méꞌ₂ dsɨ́₅ Pa₄. Jaun₂ ca₂jí₂, ca₂juáꞌ₂ ca₂tsɨ́ꞌ₃ jme₂dsí₂ ꞌlɨnꞌ₅₄ i₂jme₁ꞌen₅₄ quióꞌ₅ ꞌio₅₄ ꞌéi₂:
―Quianꞌ₅₄ bí₂ ꞌéiꞌ₃ quióꞌ₅ Jesucristo, jmo₅₄ jniá₂ ꞌéiꞌ₃, jú₅ quióꞌ₅ ꞌio₅₄ në₅.
Jaun₂ co₂tan₅₄ dsɨ₂juɨ₅ jaun₂, ca₂o₃ꞌɨ́n₃ jme₂dsí₂ ꞌlɨnꞌ₅₄ ca₂téin₂ ꞌio₅₄.
19 Jme₁ca₂rë₃líꞌ₄ dsa₂ juɨg₅₄ ꞌio₅₄ ꞌéi₂, a₂tsá₃ ma₃cuɨn₅ jmɨg₄ a₂líꞌ₂ guë́₄ cu₄ quiainꞌ₅₄ ꞌéi₂, jaun₂ ca₂jŋaiꞌ₃ Pa₄ quianꞌ₅₄ Silas, ca₂tág₃ juɨ₅ ꞌmaꞌ₅₄ ne₄ dsɨ₂tan₅₄.
20 Jaun₂ ca₂i₁jo₅₄ ja₁tiánꞌ₄ juë́₄, jaun₂ ca₂juáꞌ₂:
―Dsa₂ la₂, i₂lɨ́n₅ judíos, i₂nioi₅₄ tsɨ₂jɨin₂₃ dsa₂ juɨg₂ go₄ jniog₄.
21 Qui₂ꞌë́ꞌ₅ jme₂tɨin₂₃ dsa₂ tag₄ a₂tsá₃ dsi₂ten₅₄ guéi₁ jniog₄, on₃ guëꞌ₂ dsi₂ten₅₄ juaꞌ₅₄ a₂jmó₁, ia₁ dsa₂ romanos bá₄ lág₅.
22 Jaun₂ ca₂nau₂ dsa₂ juɨg₂ ꞌnei₂ ca₂jmáiꞌ₂ Pa₄ quianꞌ₅₄ Silas. Jaun₂ ca₂dsi₂ dsɨ₂tan₅₄ a₂dsi₂uɨg₅ nɨ₁tsɨnꞌ₅₄, jaun₂ ca₂jmo₃ ꞌéiꞌ₃ a₂bóg₂ në́₃ quianꞌ₅₄ nɨ₁ꞌma₂.
23 Jme₁ma₂dsan₃ bóg₂ ꞌŋio₅ lɨn₃, jaun₂ guë́₄ ca₂toꞌ₂ néꞌ₃ ꞌmá₃. Ca₂jmo₃ ꞌéiꞌ₃ a₂jmo₃ dsa₂ i₂niog₅ gu₂ ꞌné₅ ꞌmá₃ ꞌí₁ dse₃ lɨn₃.
24 Dsa₂ ꞌéi₂ në́₃, jme₁ca₂ŋɨi₂ ꞌéiꞌ₃ jaun₂, ca₂i₁tioꞌ₂ ca₂të₂ quióng₄ tsɨ₁ꞌné₅ ꞌmá₃, le₁tia₃ mɨ₂tag₅₄ ꞌŋióꞌ₃ tau₂ nɨ₁ꞌma₂.
25 La₁ conꞌ₂ dsi₃nei₅ jme₁ca₂ꞌë₃ Pa₄ alabanzas quiainꞌ₅₄ Silas qui₂ca₂tsɨ́ꞌ₃ Diú₄, qui₂ca₂nág₂ bá₄ dsa₂ siánꞌ₂ i₂tionꞌ₅₄ ꞌné₅ ꞌmá₃.
26 Të₃jë₄ jaun₂, conꞌ₂ tsá₃ ján₅ dsa₂, ca₂i₁bi₅₄ ꞌuë₃ tiá₂ lɨn₃, ca₂liaꞌ₂ qui₂ca₂jë́ꞌ₂ ꞌuɨg₅₄ nɨ₁ꞌiaꞌ₂ tsɨ₁ꞌné₅ ꞌmá₃, qui₂ca₂niá₃ ca₂le₃jë́₃ o₄ꞌné₄, qui₂ca₂gag₂ ŋí₁ cadenas a₂jme₁le₁ꞌŋeꞌ₅₄ ca₂le₃jɨ́n₃ dsa₂ i₂jme₁tionꞌ₅₄ ꞌŋióꞌ₃.
27 Jme₁ca₂ŋé₃ dsa₂ i₂jmo₅ ꞌí₁, ca₂jág₃ ma₂le₁na₁ jë₂ o₄ꞌné₄ ꞌné₅ ꞌmá₃, jaun₂ ca₂dsi₂ ŋi₁tág₂ quióꞌ₅ a₂jme₁jŋɨiꞌ₃ ꞌŋiog₅. Ia₁ lɨ́in₂ ma₂ca₂lón₂ jɨn₂ bá₄ i₂le₁jnɨ́₅ néꞌ₃ ꞌmá₃.
28 La₁ dsɨ₂juɨ₅ ca₂guióꞌ₃ Pa₄ ca₂juáꞌ₂:
―Tsá₃ lë₁jmagꞌ₅₄ uɨg₅ ꞌŋiagꞌ₂, ia₁ la₂ bá₄ tioꞌ₅₄ jniaꞌ₅₄ ca₂le₃jág₃.
29 Jaun₂ ca₂mɨ₃ dsa₂ ꞌéi₂ si₂, jaun₂ ca₂ꞌí₃ co₂chiꞌ₅₄ dsi₂néi₂ të₃ góꞌ₅ jlein₂₃ ŋó₃ ca₂chi₃jné₃ ne₄ Pa₄ quianꞌ₅₄ Silas.
30 Jaun₂ ca₂ꞌuágꞌ₂ të₂ca₁ꞌné₄, jaun₂ ca₂ŋag₃:
―ꞌNiaꞌ₂ dsa₂, ¿ꞌe₂ ꞌnióꞌ₅ jmo₅₄ jniá₂ ia₁jaun₂ lión₂ jniá₂?
31 Jaun₂ ca₂juáꞌ₂ ꞌéi₂:
―ꞌÉn₃ të₂le₃ quióꞌ₅ Te₁guiꞌ₅₄ Jesucristo, jaun₂ bá₄ tɨ́ngꞌ₄, quiangꞌ₅₄ ca₂le₃jɨ́n₃ dsa₂ dsi₂néi₂ quiángꞌ₂.
32 Jaun₂ ca₂cuë₃ Pa₄ quianꞌ₅₄ Silas jág₁ dse₃ quióꞌ₅ Te₁guiꞌ₅₄ ca₂cuë́ꞌ₃ dsa₂ ꞌéi₂ quianꞌ₅₄ ca₂le₃jɨ́n₃ dsa₂ i₂tiánꞌ₅ dsi₂néi₂ quióꞌ₅.
33 Hora jaun₂ a₂ꞌuë₂, dsa₂ i₂niog₅ gu₂ ꞌné₅ ꞌmá₃ ꞌéi₂ qui₂ca₂rɨ́nꞌ₃ ja₁qui₂le₁cuɨ́ꞌ₃ quióꞌ₅ Pa₄ quiainꞌ₅₄ Silas. Jaun₂ ꞌéi₂ quiainꞌ₅₄ ca₂le₃jɨ́n₃ dsa₂ dsi₂néi₂ quióꞌ₅, ca₂jŋói₂ jmɨg₂.
34 Jme₁co₂lág₂ jaun₂, ca₂tág₃ ja₁quióꞌ₄, ca₂i₁cuë₂ a₂guë́ꞌ₃. Jaun₂ ꞌioꞌ₂ jmo₂₃ ca₂le₃jɨ́in₃, ia₁ ca₂rë₃ꞌéin₂ jág₁ quióꞌ₅ Diú₄.
35 Jme₁jnia₃ jaun₂, ca₂chen₃ juë́₄ chiꞌ₂ ꞌɨꞌ₅₄ a₂ca₂i₁chiꞌ₄ dsa₂ i₂niog₅ gu₂ ꞌné₅ ꞌmá₃, a₂lióin₂ dsa₂ ꞌéi₂.
36 Jaun₂ ca₂juáꞌ₂ dsa₂ i₂niog₅ gu₂ ꞌné₅ ꞌmá₃ ca₂tsɨ́ꞌ₃ Pa₄:
―Ma₂ŋɨg₂ ꞌéiꞌ₃ quióꞌ₅ juë́₄ a₂long₅₄ ꞌniaꞌ₂. Jaun₂ ma₂lé₂ o₁noꞌ₄ ꞌniaꞌ₂ tei₄ quiángꞌ₂.
37 Jaun₂ ca₂juáꞌ₂ Pa₄ ca₂tsɨ́ꞌ₃ chiꞌ₂ ꞌɨꞌ₅₄:
―Ca₂chóngꞌ₂ dsa₂ jniaꞌ₅₄, qui₂ca₂bóg₂ të₃jɨn₄ dsa₂ juɨn₅ të₃ tsá₃ ca₂cáun₃ deꞌ₂ jág₁ dsau₅ quián₂ jniaꞌ₅₄ i₂lág₅ dsa₂ tén₅ juɨg₂ Roma. Jaun₂ guë́₄ ca₂toꞌ₂ néꞌ₃ ꞌmá₃. ¿Në₃ në́₃ ꞌnio₃ lió₂ jniaꞌ₅₄ conꞌ₂ të₃coꞌ₅₄? Tsá₃ le₂jaun₂. Juɨ₁ja₂léin₂ guioin₅₄ juɨ₁ja₂ꞌuagꞌ₅₄, juɨ₁liaꞌ₂ ca₂toꞌ₂.
38 Jaun₂ guë́₄ ca₂i₁con₂ chiꞌ₂ ꞌɨꞌ₅₄ jág₁ jaun₂ ne₄ juë́₄, jaun₂ ca₂rë₃góꞌ₅ jme₁ca₂rë₃ŋi₅ a₂lɨ́n₅ Pa₄ quianꞌ₅₄ Silas dsa₂ tén₅ Roma.
39 Jaun₂ ca₂i₁len₅₄ dsɨ₂tan₅₄ ca₂i₁mɨ₂ o₂ꞌén₂ dso₄ ne₄ Pa₄ quianꞌ₅₄ Silas. Ca₂ꞌuágꞌ₂ bá₄ jaun₂ në́₃, jaun₂ ca₂juáꞌ₂ a₂ꞌuɨ́n₃ ꞌéi₂ juɨg₂ jaun₂.
40 Jme₁ma₂ꞌuɨn₂ ꞌéi₂ ꞌné₅ ꞌmá₃, ca₂i₃lein₃ ja₁quióꞌ₄ ꞌio₅₄ Lidia. Jme₁ca₂ŋɨiꞌ₂ quiainꞌ₅₄ rɨinꞌ₅₄, qui₂ca₂cuë₃ bí₂ në́₃, jaun₂ guë́₄ ca₂ꞌuɨin₂ ja₁jaun₂, ca₂i₁lein₅₄ guë́₄ juɨg₂ siáꞌ₂.