Ca₂lë₃ mɨꞌ₅₄ juɨg₂ Tesalónica
17
Juɨ₅ ja₁ca₂ŋe₄ Pa₄ quiainꞌ₅₄ Silas jaun₂, ca₂i₁ŋɨi₁₂ juɨg₂ Anfípolis quianꞌ₅₄ juɨg₂ Apolonia në́₃. Jaun₂ ca₂dsi₃léin₂ juɨg₂ chei₂ Tesalónica. Ja₁jaun₂ jme₁chíꞌ₄ guáꞌ₅ sinagoga* quióꞌ₅ dsa₂ judíos*.
2 Pa₄ në́₃, ia₁ le₂jaun₂ tɨn₂ quióꞌ₅, ca₂ŋei₅₄ guáꞌ₅. Të₁liaꞌ₂ ca₂ꞌí₃ tɨn₃-ꞌnɨ₅ semana ja₁jaun₂, qui₂ca₂dsia₃ jág₁ quianꞌ₅₄ dsa₂ ca₂le₃jë́₃ jmɨg₄ sa₅₄, juɨ₁liaꞌ₂ jág₁ a₂juáꞌ₂ ne₄ Si₂.
3 Qui₂ca₂cuë₃ jág₁ dsau₅ ꞌa₂ liaꞌ₂ dsónꞌ₂ ꞌi₄ ꞌéiꞌ₃ ne₄ Si₂ quióꞌ₅ Diú₄ a₂juáꞌ₂ a₂tion₅₄ ŋág₃ uɨg₅ I₂rë₂ꞌɨ́n₁* quián₅ Diú₄, jaun₂ cang₂ jë₁ma₂join₂₃, a₂tion₅₄ niog₅ jeinꞌ₅₄ táng₃. Jaun₂ caun₂ ca₂juáꞌ₂ bá₄:
―Jesús i₂ꞌɨ́n₅ jniá₂, jág₁ a₂ꞌë́₅ juɨ́g₂ ꞌniaꞌ₂, I₂rë₂ꞌɨ́n₁ quián₅ Diú₄ bá₄ ꞌéi₂.
4 Jaun₂ ca₂rë₃ꞌén₂ i₂lɨn₅₄ dsa₂ judíos, ca₂jme₃quiainꞌ₅₄ Pa₄ quianꞌ₅₄ Silas. Ján₃ bá₄ ca₂rë₃ꞌén₂ juɨn₅ dsa₂ griegos* i₂jme₁jme₂juɨnꞌ₂ Diú₄, ca₂rë₃ꞌén₂ juɨn₅ ꞌio₅₄ dsen₅₄ në́₃.
5 La₁ dsa₂ judíos i₂tsá₃ ꞌén₂ në́₃, ca₂rë₃ꞌnéi₃ a₂dsíꞌ₅. Jaun₂ ca₂jme₃quiainꞌ₅₄ co₂nióꞌ₃ dsa₂ juɨ́ꞌ₅ i₂lë₁jme₁i₂nio₄ tsɨ₁jɨn₁ jë₄ calle. Ca₂quɨinꞌ₃ jág₁ quióꞌ₅, ca₂i₁nioi₁₂ ca₂tóꞌ₂ mɨꞌ₅₄, tsɨ₂jɨin₂₃ dsa₂ juɨg₂. Jaun₂ ca₂i₁toinꞌ₁ tion₅₄-jan₃ ja₁quióꞌ₄ Jasón, a₂jme₁ꞌnio₃ dsein₂₃ Pa₄ quiainꞌ₅₄ Silas, a₂jme₁të₂ ꞌéi₂ jɨn₄ dsa₂ juɨg₂.
6 Ia₁ tsá₃ ca₂dsáinꞌ₂ ꞌéi₂ ja₁jaun₂, Jasón bá₄ qui₂ca₂tsɨ₃cuɨinꞌ₂ quiainꞌ₅₄ guë́₄ rɨinꞌ₅₄ i₂ꞌén₂, jaun₂ ca₂tág₃ juɨ₅ ne₄ta₁, ca₂i₁jangꞌ₂ ne₄ dsɨ₂tan₅₄, jaun₂ ca₂juáꞌ₂ ca₂liaꞌ₂ guióꞌ₅ tioinꞌ₅₄:
―I₂la₂ bá₄ dsa₂ i₂ŋɨ́₄ lë₃ ma₂jmo₃ tsá₃ ma₃caun₂ ꞌei₅ jág₁, qui₂ma₂jéinꞌ₂ dsa₂ ta₁caun₂ mɨ₂güɨ́g₃. Le₂jaun₂ bá₄ ꞌnio₃ jmo₃ ja₁lá₃ ján₃, ta₁ jaun₂ bá₄ ja₂léin₂.
7 Jasón la₂ në₂cuë₃ jmɨg₄ në₂jŋia₃ dsa₂ ꞌéi₂ ja₁quióꞌ₄. Ca₂le₃jɨ́n₃ ꞌéi₂ jmo₂₃ a₂tsá₃ dsi₂ten₅₄ jmo₃ liaꞌ₂ conꞌ₂ lë́₅ ꞌéiꞌ₃ quióꞌ₅ guiꞌ₅₄ emperador*. Ia₁ i₂nioi₅₄ tsɨ́ꞌ₅ dsa₂ a₂chan₂ guë́₄ jan₂ rag₅₄ siánꞌ₂, jan₂ i₂chen₂ Jesús.
8 Jme₁ca₂nág₂ dsa₂ le₂në₅, ca₂tóinꞌ₂ go₂ꞌi₃ quianꞌ₅₄ dsɨ₂tan₅₄.
9 La₁ Jasón quianꞌ₅₄ rɨinꞌ₅₄ ca₂quí₃ cu₄ ne₄ dsɨ₂tan₅₄, jaun₂ guë́₄ ca₂lió₂ dsa₂.
Pablo quianꞌ₅₄ Silas tioinꞌ₅₄ juɨg₂ Berea
10 Dsɨ₂juɨ₅ le₂jaun₂ ca₂jmo₃ rɨinꞌ₅₄ a₂ŋó₃ Pa₄ quiainꞌ₅₄ Silas të₃ a₂ꞌuë₂ juɨ₅ Berea. Jme₁ca₂dsi₃léin₂ ja₁jaun₂, i₁lein₅₄ dsɨ₂juɨ₅ dsi₂néi₂ guáꞌ₅ sinagoga quióꞌ₅ dsa₂ judíos.
11 Dsa₂ judíos i₂jme₁tiánꞌ₄ ja₁jaun₂ jme₁dsein₃ conꞌ₂ guë́₄ dsa₂ juɨg₂ Tesalónica. Liaꞌ₂ ꞌi₄ rë₂ jág₁ bá₄ ca₂gue₃ jág₁ dse₃ quióꞌ₅ Diú₄. Jaun₂ ca₂le₃jë́₃ jmɨg₄ bá₄ jme₁ꞌnoꞌ₂ ne₄ Si₂ quióꞌ₅ Diú₄, ia₁ ꞌnio₃ le₃ŋi₅ chi₂juaꞌ₂ dsónꞌ₂ bá₄ le₂jaun₂ lë́₅ jág₁ a₂cuë₅ Pa₄ quianꞌ₅₄ Silas.
12 Juɨn₅ bá₄ dsa₂ judíos ꞌéi₂ ca₂rë₃ꞌén₂. Ján₃ bá₄ le₂jaun₂ juɨn₅ dsa₂ griegos*, liaꞌ₂ dsa₂ ŋeꞌ₂ liaꞌ₂ ꞌio₅₄ dsen₅₄ në́₃.
13 La₁ jme₁ca₂rë₃ŋi₅ dsa₂ chan₂ Tesalónica a₂ꞌen₅₄ Pa₄ ꞌë́ꞌ₅ dsa₂ jág₁ dse₃ quióꞌ₅ Diú₄ juɨg₂ Berea ján₃, jaun₂ ca₂i₃léin₂ ja₁jaun₂, ca₂chi₂ca₂jain₃ dsa₂.
14 La₁ co₂tan₅₄ ca₂chei₃ rɨinꞌ₅₄ ca₂chein₃ Pa₄ cheiꞌ₅₄ jmɨ₁ŋíꞌ₄. Ca₂jŋia₃ bá₄ Silas quianꞌ₅₄ Timoteo juɨg₂ Berea.
15 Ca₂i₁jiog₃ dsa₂ i₂jme₁quianꞌ₅₄ Pa₄ ca₂i₁jŋiai₃ ꞌéi₂ ca₂të₂ juɨg₂ Atenas. Jaun₂ ca₂i₃lein₃ táng₃ le₁quion₂ jág₁ quióꞌ₅ Pa₄ a₂jiá₃ Silas quiainꞌ₅₄ Timoteo a₂dsɨ₃jme₃quiongꞌ₅₄ dsɨ₂juɨ₅.
ꞌEn₅₄ Pablo juɨg₂ Atenas
16 Të₁liaꞌ₂ ꞌen₅₄ Pa₄ chi₁jŋiai₂₃ Silas quianꞌ₅₄ Timoteo juɨg₂ Atenas, tsá₃ dse₃ ꞌei₅ dsɨ́₅, ia₁ ca₂jɨ́in₂ juɨn₅ lɨn₃ diú₄ lag₄ tión₂ le₂tan₅₄ jë₄ juɨg₂.
17 Jaun₂ ca₂i₁ꞌë́₄ jág₁ dse₃ dsi₂néi₂ guáꞌ₅ sinagoga, ca₂tsɨ́ꞌ₃ dsa₂ judíos, dsa₂ siánꞌ₂ në́₃ i₂jme₂juɨnꞌ₂ Diú₄ të₃dsónꞌ₂. Ca₂le₃jë́₃ jmɨg₄ në́₃, qui₂ca₂ꞌë́₂ Pa₄ jág₁ dse₃ jë₄ ꞌmaꞌ₅₄ ca₂tsɨ́ꞌ₃ ca₂le₃jɨ́n₃ dsa₂ i₂jme₁jeinꞌ₂ ja₁jaun₂.
18 I₂lɨn₅₄ dsa₂ i₂jme₁jme₂tag₅ si₂ quióꞌ₅ dsa₂ i₂të́ꞌ₂ dsa₂ epicúreos*, i₂lɨn₅₄ guëꞌ₂ i₂jme₁jme₂tag₅ si₂ quióꞌ₅ i₂të́ꞌ₂ dsa₂ estoicos*, dsa₂ ꞌéi₂ ca₂jme₃lióg₃ ca₂dsia₃ jág₁ quiainꞌ₅₄ Pa₄. I₂lɨn₅₄ guëꞌ₂ dsia₅ tsɨ́ꞌ₅ rɨinꞌ₅₄:
―Tsá₃ ne₄ ꞌe₂ bá₄ jág₁ quian₅ i₁tenꞌ₅₄ në₅ a₂juáꞌ₂ tság₃ jniog₄.
I₂lɨn₅₄ guëꞌ₂ juáꞌ₂ táng₃:
―Meiꞌ₂ tsá₃ i₂ꞌë́₂ jág₁ quióꞌ₅ diú₄ siánꞌ₂ i₂quián₅ dsɨ₂nau₂ bá₄ në₅.
Jaun₂ bá₄ juáꞌ₂ le₂jaun₂, ia₁ ꞌen₅₄ Pa₄ ꞌë́₂ jág₁ dse₃ quióꞌ₅ Jesús, ꞌa₂ liaꞌ₂ ca₂jeinꞌ₅₄ táng₃.
19 Jaun₂ ca₂jŋiai₃ Pa₄ caun₂ ja₁chei₂ Areópago*. Jme₁ca₂dsi₃léin₂ ja₁jaun₂, ca₂ŋɨ́iꞌ₃ Pa₄ ca₂juáꞌ₂:
―¿Lé₂ le₃ne₄ jniaꞌ₅₄ ꞌe₂ jág₁ ꞌmɨ́₂ dsiaꞌ₂ a₂jme₂tágꞌ₂?
20 ꞌNiog₂ jniaꞌ₅₄ le₃ne₄ ꞌe₂ jein₅ jág₁ a₁juáꞌ₂ ꞌne₂ në₅. Ja₂lɨn₃ guë́₄ siáꞌ₂ néꞌ₂.
21 Ia₁ ca₂le₃jɨ́n₃ bá₄ dsa₂ chan₂ Atenas, quianꞌ₅₄ dsɨ₂nau₂ i₂jme₁tiánꞌ₄ ja₁jaun₂, jmáꞌ₃ a₂jaun₂ bá₄ jme₁tɨin₂ qui₂jmo₂₃: qui₂nag₂₃, qui₂dsia₂₃ në́₃, jmáꞌ₃ ca₂ne₅₄ jág₁ ꞌmɨ́₂ a₂cha₂.
22 Jaun₂ ca₂nau₂ Pa₄ dsi₂jo₂ ja₁le₁ŋɨꞌ₂ dsa₂ jaun₂, jaun₂ ca₂juáꞌ₂:
―ꞌNiaꞌ₂ dsa₂ chan₂ Atenas, jág₅ jniá₂ ꞌŋio₅ ꞌénꞌ₂ ꞌniaꞌ₂ të₂le₃ quióꞌ₅ diú₄ lag₄ quiánꞌ₂ ꞌniaꞌ₂.
23 Ia₁ liaꞌ₂ conꞌ₂ ca₂ŋɨ₅ jniá₂ ca₂jág₃ ja₁chi₁lenꞌ₄ ꞌniaꞌ₂ diú₄ lag₄ quiángꞌ₂, ca₂jág₃ caun₂ ja₁lë́₄ ne₄chei₂ le₁ton₅ letras la₂, a₂juáꞌ₂: “QUIÓꞌ₅ DIÚ₄ I₂TSÁ₃ CUƗN₅ DSA₂.” Ia₁ dse₃ bá₄ guëꞌ₂ jaun₂. Diú₄ ꞌéi₂ i₂chi₁lenꞌ₄ ꞌniaꞌ₂, Diú₄ i₂tsá₃ cuɨnꞌ₂ ꞌniaꞌ₂, i₂ꞌéi₂ bá₄ ꞌɨ́n₄ jniá₂, jág₁ quióꞌ₅ ꞌéi₂ bá₄ ꞌë́₅ jniá₂, juɨ́g₂ ꞌniaꞌ₂.
24 ꞌDiú₄ ꞌéi₂ i₂ca₂jmo₃ mɨ₂güɨ́g₃, ca₂jmo₃ ca₂le₃jë́₃ ꞌe₂ a₂cha₂ ja₁jaun₂, ꞌéi₂ bá₄ quióꞌ₅ gueiꞌ₅₄ mɨ₂güɨ́g₃ quianꞌ₅₄ guaꞌ₅₄ ꞌuë₃ në́₃. La₁ tsá₃ guá₅ dsi₂néi₂ guáꞌ₅ a₂jmo₅ dsa₂ mɨ₂güɨ́g₃,
25 on₃ guëꞌ₂ chi₁quiain₁₂ jmɨg₄ juaꞌ₅₄ a₂ꞌnióꞌ₅ jmo₃ dsa₂ ꞌe₂ jmo₃ quióꞌ₅. Ia₁ ꞌŋiog₅ bá₄ Diú₄ jmo₂₃ cuë₂₃ jme₂dsí₂ quián₂ jniog₄, jmo₂₃ dsí₂ a₂quian₂ jniog₄, ca₂jmo₃ ca₂le₃jë́₃ guë́₄ ꞌe₂ a₂cha₂.
26 ꞌQuianꞌ₅₄ ca₂choꞌ₅₄ dsa₂ bá₄ ca₂jmo₃ ca₂le₃jë́₃ juɨg₂, ia₁jaun₂ tiainꞌ₃ ta₁caun₂ mɨ₂güɨ́g₃. Jaun₂ ca₂jmo₃ Diú₄ ꞌéiꞌ₃ ca₂ꞌë₃ ja₁tianꞌ₃ dsa₂ në́₃, ꞌa₂ conꞌ₂ uë́₂ ꞌio₃ bí₂ le₂caun₂ le₂caun₂ juɨg₂,
27 ia₁jaun₂ ꞌnaiꞌ₂ Diú₄, a₂jŋiaꞌ₅₄ chi₂láꞌ₂ quianꞌ₅₄ gu₂, conꞌ₂ tsá₃ ŋó₅ në₁ca₂dsáuꞌ₂, o₁jŋiaꞌ₅₄ la₂ tsá₃ uɨ́ng₂ guá₅ Diú₄ ja₁con₂ jniog₄ le₂jau₂ le₂jau₂.
28 Ia₁ a₂chan₂ Diú₄ bá₄ a₂chong₂ jniog₄ a₂i₂nio₄ jniog₄ në́₃.a Juɨ₁liaꞌ₂ ma₂ca₂juáꞌ₂ i₂lɨn₅₄ dsa₂ poetas quiánꞌ₂ ꞌniaꞌ₂ ján₃, jme₁ca₂juáꞌ₂: “Chiꞌ₂-guein₂ quián₅ Diú₄ bá₄ lág₅ jniog₄.”
29 Chi₂juaꞌ₂ lág₅ jniog₄ chiꞌ₂-guein₂ quián₅ Diú₄, jaun₂ tsá₃ dse₃ juaꞌ₅₄ a₂jmó₁ jniog₄ dsɨ₅ a₂lɨ́n₅ Diú₄ juɨ₁liaꞌ₂ lë́₅ caun₂ nióꞌ₄ dsa₂ lag₄ cu₄nióg₄, on₃ guëꞌ₂ cu₄tiog₂, on₃ guëꞌ₂ nɨ₁cang₁ a₂tɨn₂ dsa₂ jmo₂₃ conꞌ₂ lë́₅ dsɨ₂jiog₅ dsɨ́₅ guioin₅₄.
30 Tsá₃ lɨn₄ ca₂tónꞌ₃ Diú₄ juɨ₅ ꞌa₂ liaꞌ₂ ca₂jmo₃ dsa₂ ma₂lɨ́gꞌ₂, ia₁ tsá₃ ꞌe₂ ŋi₅ dsa₂. La₁ rë₂në́₃ në́₃, jmo₅ Diú₄ ꞌéiꞌ₃ quióꞌ₅ dsa₂ chan₂ ta₁caun₂ mɨ₂güɨ́g₃ a₂ꞌnióꞌ₅ dsɨ₃quénꞌ₅ dsɨ́₅.
31 Ia₁ ma₂lë́₅ ꞌéiꞌ₃ quióꞌ₅ Diú₄ a₂já₅ caun₂ jmɨg₄ jë₁qui₃dsɨ₂₃ ꞌéiꞌ₃ rë₂ conꞌ₂ dsi₂ten₅₄ quióꞌ₅ dsa₂ mɨ₂güɨ́g₃, të₂le₃ quianꞌ₅₄ jan₂ dsa₂ i₂ca₂quióinꞌ₂ quiáin₅. Jaun₂ ma₂ca₂jmo₃ léi₄ liaꞌ₂ conꞌ₂ jme₁ca₂jme₃jeinꞌ₅₄ ꞌéi₂ jɨn₄ ꞌlag₄.
32 Jme₁ca₂nág₂ dsa₂ ca₂juáꞌ₂ Pa₄ a₂jenꞌ₅₄ ꞌlag₄, i₂lɨn₅₄ dsa₂ jŋiaꞌ₅₄ ca₂ŋág₂ bá₄. I₂lɨn₅₄ guëꞌ₂ ca₂juáꞌ₂:
―Në₅ néi₁ táng₃ jniaꞌ₅₄ caun₂ jmɨg₄ siáꞌ₂ quiángꞌ₂.
33 Jaun₂ ca₂o₂ꞌɨ́n₃ bá₄ Pa₄ jë₄ jaun₂.
34 La₁ i₂lɨn₅₄ dsa₂ ca₂rë₃ꞌéin₂ bá₄, jaun₂ ca₂ꞌein₃ ꞌéi₂. Jë₄ jaun₂ jme₁ꞌen₅₄ i₂chen₂ Dionisio i₂lɨ́n₅ rɨnꞌ₅₄ dsɨ₂tan₅₄ quián₅ Areópago*; jan₂ guëꞌ₂ ꞌio₅₄ në́₃ i₂chen₂ Dámaris; lë́₂ bá₄ guë́₄ dsa₂ i₂quiongꞌ₅₄.