ꞌEn₅₄ Pablo juɨg₂ Corinto
18
Cang₂ jaun₂ ca₂o₃ꞌɨ́n₃ Pa₄ juɨg₂ Atenas, ca₂ŋó₃ juɨ₅ Corinto.
2 Ja₁jaun₂ ca₂jeinꞌ₂ jan₂ dsa₂ judío* i₂chen₂ Aquila i₂chan₂ ꞌuë₃ Ponto. Jme₁guá₄ ꞌuë₃ Italia le₃jŋiá₅, la₁ ca₂jmo₃ ꞌéiꞌ₃ guiꞌ₅₄ emperador* Claudio a₂ca₂ꞌuɨ́inꞌ₂ ca₂le₃jɨ́n₃ dsa₂ judíos i₂jme₁tiánꞌ₄ juɨg₂ Roma. ꞌUɨg₅₄ jaun₂ ca₂o₃ꞌɨ́in₃ quiainꞌ₅₄ Priscila ꞌio₅₄ quiáin₅, a₂ma₂tiáinꞌ₅ juɨg₂ Corinto. Jme₁ca₂dsióg₃ Pa₄ ca₂i₁jɨin₁₂ dsa₂ ꞌéi₂,
3 jaun₂ ca₂ꞌí₃ ja₁quióꞌ₄, ca₂jmo₃ ta₁ co₂lë₅ quiongꞌ₅₄, ia₁ ján₃ bá₄ tɨin₂ ꞌme₃ tsɨ₁ꞌmɨꞌ₂ a₂jmo₅ dsa₂ tsɨ₁ꞌné₅.
4 Jaun₂ ca₂le₃jë́₃ jmɨg₄ sa₅₄, jme₁dsó₅ Pa₄ guáꞌ₅ sinagoga* a₂jme₂tɨin₂₃ dsa₂ jág₁ dse₃, a₂jme₁jme₂ꞌuáin₂ dsɨ́₅ dsa₂, liaꞌ₂ dsa₂ judíos liaꞌ₂ dsɨ₂nau₂ në́₃.
5 Jme₁dsióg₃ Timoteo quiainꞌ₅₄ Silas a₂ca₂ꞌuɨin₂ Macedonia, a₂dsi₃léin₂ të₂ ja₁ꞌen₅₄ Pa₄, jaun₂ guë́₄ ca₂ꞌë́₂ Pa₄ dsen₅₄ dsɨ́₅ jág₁ quióꞌ₅ Diú₄. Jaun₂ guë́₄ ca₂tsɨ́ꞌ₃ dsa₂ judíos a₂lɨ́n₅ Jesús dsa₂ I₂rë₂ꞌɨ́n₁* quián₅ Diú₄.
6 La₁ dsa₂ në́₃, ꞌioꞌ₅₄ ca₂tɨ́in₂ jág₁ jaun₂, jaun₂ ca₂jme₃lióg₃ qui₂ca₂jnáiꞌ₂ jág₁ uɨg₅ Pa₄. ꞌÉi₂ në́₃ qui₂ca₂séiꞌ₂ ꞌliog₂ nɨ₁tsɨnꞌ₅₄, jaun₂ ca₂tsɨ́ꞌ₃ dsa₂:
―Guionꞌ₅₄ bá₄ ꞌniaꞌ₂ le₁cángꞌ₄ a₂dsiánꞌ₃ ꞌniaꞌ₂ liaꞌ₂ jma₃quianꞌ₅₄ dsáuꞌ₂. Tsá₃ ma₃ꞌe₂ le₁cánꞌ₄ jniá₂. Le₃ne₄ juɨ₅ në́₃ nei₅₄ ja₁con₂ dsɨ₂nau₂.
7 Ca₂o₃ꞌɨ́n₃ bá₄ Pa₄ dsi₂néi₂ guáꞌ₅ sinagoga jaun₂ në́₃. Ca₂ŋó₃ ja₁quióꞌ₄ jan₂ dsa₂ i₂chen₂ Justo i₂jme₁jme₂juɨnꞌ₂ Diú₄. Justo ꞌéi₂ në́₃, jme₁guá₄ cau₅ guáꞌ₅.
8 Dsa₂ i₂jme₁lɨ́n₄ dsa₂ dsen₅₄ quián₅ guáꞌ₅, dsa₂ i₂chen₂ Crispo, ca₂rë₃ꞌéin₂ të₂le₃ quióꞌ₅ Te₁guiꞌ₅₄, co₂dsia₅ quianꞌ₅₄ dsa₂ dsi₂néi₂ quióꞌ₅. Juɨn₅ bá₄ dsa₂ chan₂ Corinto ca₂rë₃ꞌén₂ jág₁ dse₃ jme₁ca₂nág₂, jaun₂ qui₂ca₂choin₃ jmɨg₂.
9 Caun₂ a₂ꞌuë₂, a₂lë₁ca₂jénꞌ₃ Pa₄ ca₂jɨ́in₂ Te₁guiꞌ₅₄, a₂juáꞌ₂:
―Tsá₃ lë₁jmo₂ gangꞌ₃ a₂ꞌë́ꞌ₄ jág₁. Caun₂ dsia₄ bá₄, tsá₃ lë₁jmo₂ tei₄.
10 Ia₁ quianꞌ₅₄ bá₄ jniá₂ ꞌne₂; ꞌi₁jan₂ tsá₃ téi₂ gu₂ juaꞌ₅₄ a₂jmógꞌ₂ uɨg₅. Ia₁ juɨn₅ dsa₂ chan₂ juɨg₂ la₂ i₂le₃ꞌén₂ quiáng₃.
11 Caun₂ ŋi₂ të₂ ca₂ꞌnau₅₄ ca₂ꞌí₃ Pa₄ juɨg₂ Corinto, qui₂ca₂jme₃tɨin₂₃ dsa₂ jág₁ quióꞌ₅ Diú₄.
12 La₁ jmɨg₄ jaun₂ ca₂lɨn₃ dsi₄máꞌ₂ ꞌuë₃ Acaya jan₂ dsa₂ i₂chen₂ Galión. Jaun₂ ca₂ŋɨꞌ₂ dsa₂ judíos i₂ꞌŋia₅₄ Pa₄, ca₂tág₃ juɨ₅ ne₄ta₁.
13 Jaun₂ ca₂juáꞌ₂ ca₂tsɨ́ꞌ₃ dsi₄máꞌ₂ ꞌéi₂:
―Le₂siáꞌ₂ bá₄ jme₂tag₅ i₂në₅, toinꞌ₂ jág₁ dsa₂, a₂jme₃juɨinꞌ₂ Diú₄ on₃juaꞌ₅₄ liaꞌ₂ conꞌ₂ lë́₅ ꞌÉiꞌ₃.
14 Jë₁jme₁ma₂ŋag₃ Pa₄, jme₁ca₂juáꞌ₂ Dsi₄máꞌ₂ Galión ca₂tsɨ́ꞌ₃ dsa₂ judíos:
―Juaꞌ₅₄ meiꞌ₂ guë́₃ dso₄ juëꞌ₂ ca₂rë₃cánꞌ₂ dsa₂ në₅, jme₁jmo₅₄ bá₄ jniá₂ juɨnꞌ₂ dsɨ₃ a₂jme₁nag₅₄ jág₁ quiánꞌ₂ ꞌniaꞌ₂.
15 La₁ tsá₃ le₂jaun₂. Chi₂juaꞌ₂ ꞌuɨg₅₄ jág₁ ꞌéiꞌ₃ juáꞌ₅ siáꞌ₂ quiánꞌ₂ ꞌniaꞌ₂ guiongꞌ₅₄, tsá₃ ꞌéiꞌ₃ qui₁dsɨ₅ jniá₂. Jme₁rë₂ bá₄ ꞌniaꞌ₂ guiongꞌ₅₄ quiángꞌ₂.
16 Jaun₂ ca₂ꞌuágꞌ₂ ca₂ꞌuɨ́inꞌ₂ ꞌéi₂ ne₄ta₁ jaun₂.
17 Jaun₂ ca₂jŋauꞌ₃ ca₂le₃jɨ́n₃ dsa₂ griegos* ca₂jŋaiꞌ₃ Sóstenes i₂lɨ́n₅ juɨg₅₄ quián₅ guáꞌ₅ sinagoga, qui₂ca₂bóg₂ të₃ jág₅ dsi₄máꞌ₂. La₁ tsá₃ ma₃a₂jaun₂ dsan₂ dsɨ́₅ guiꞌ₅₄ Galión, ꞌi₁caun₂.
Ca₂jónꞌ₃ táng₃ Pablo juɨg₂ Antioquía, jaun₂ ca₂ŋó₃ táng₃ ca₂i₁ꞌë́₄ jág₁ dse₃ jë₁ca₂të́₂ ꞌnagꞌ₂ ráun₂
18 Uë́₂ bá₄ guë́₄ ca₂jŋia₃ Pa₄ jë₄ juɨg₂ Corinto. Cang₂ guë́₄ jaun₂ ca₂ꞌágꞌ₃ jág₁ rɨinꞌ₅₄. Jme₁ma₂tioinꞌ₅₄ juɨg₂ Cencrea në́₃, ca₂chéi₃ Pa₄ dsi₅₄ ca₂jmo₃ léi₄ a₂ca₂jme₃ti₃ jág₁ a₂ma₂cuë́ꞌ₃ Diú₄ le₂jŋiá₅. Jaun₂ ca₂ꞌí₃ nɨ₁barco ca₂ŋó₃ juɨ₅ ja₁tén₄ Siria quiainꞌ₅₄ Priscila, Aquila në́₃.
19 Jme₁ca₂dsi₃léin₂ juɨg₂ Efeso, ca₂tén₂ Pa₄ Priscila quianꞌ₅₄ Aquila, ca₂ŋó₃ juɨ₅ guáꞌ₅ sinagoga ca₂i₁dsia₂ jág₁ quianꞌ₅₄ dsa₂ judíos i₂jme₁tionꞌ₅₄ le₁ŋɨꞌ₂.
20 Jme₁ca₂juáꞌ₂ guë́₄ dsa₂ ja₁jaun₂ a₂jme₁jŋia₃ guë́₄ uë́₂ Pa₄, la₁ tsá₃ ma₃ca₂gue₃ ꞌéi₂.
21 Jaun₂ ca₂ꞌágꞌ₃ jág₁ jɨn₄ rɨinꞌ₅₄, ca₂juáꞌ₂:
―Tion₅₄ niog₅ négꞌ₄ Jerusalén i₁jmo₃ jmɨg₄ a₂já₅. La₁ guáng₂ bá₄ táng₃ i₁jɨng₁₂ ꞌniaꞌ₂ në₁juaꞌ₂ ꞌnio₃ Diú₄.
Jaun₂ ca₂ꞌí₃ nɨ₁barco ca₂o₃ꞌɨ́in₃ juɨg₂ Efeso.
22 Jme₁ca₂dsióg₃ Cesarea, ca₂ŋe₄ Pa₄ i₁cuɨin₃ Diú₄ rɨinꞌ₅₄ i₂tiánꞌ₅ Jerusalén. Jaun₂ ca₂ŋáiꞌ₃ táng₃ juɨ₅ Antioquía.
23 Jme₁ma₂ne₁ŋó₄ jmɨg₄ ꞌein₅₄ ja₁jaun₂, ca₂ŋei₅₄ táng₃ ca₂i₁ŋɨ₂ le₂caun₂ le₂caun₂ juɨg₂ ja₁tén₄ ꞌuë₃ Galacia quianꞌ₅₄ Frigia, qui₂ca₂cuë́ꞌ₃ bí₂ ca₂le₃jɨ́n₃ dsa₂ i₂ꞌén₂ rɨinꞌ₅₄.
Ca₂ꞌë́₂ Apolos jág₁ dse₃ juɨg₂ Efeso
24 Jmɨg₄ jaun₂ ca₂dsióg₃ Efeso jan₂ dsa₂ judío i₂chen₂ Apolos, dsa₂ chan₂ juɨg₂ Alejandría. ꞌŊio₅ lɨn₃ jme₁tɨn₂ dsa₂ ꞌéi₂ ꞌë́₂ jág₁ quióꞌ₅ Diú₄, dse₃ jme₁cuɨ́ꞌ₅ Si₂ quióꞌ₅ Diú₄.
25 Jme₁ma₂ŋi₅ Apolos ꞌéi₂ ꞌa₂ liaꞌ₂ lë́₅ juɨ₅ quióꞌ₅ Te₁guiꞌ₅₄. Jaun₂ ꞌŋio₂ dsɨ́₅ qui₂ca₂dsia₃ jág₁ qui₂ca₂jme₂tɨin₂₃ dsa₂ co₂rë₂ jág₁ quióꞌ₅ Jesús, tonꞌ₂ jmáꞌ₃ jŋiaꞌ₅₄ a₂jaun₂ bá₄ jme₁ŋi₅ Apolos ꞌa₂ liaꞌ₂ jme₁jme₂tag₅ Juan₅₄ juɨ₁liaꞌ₂ a₂choin₂₃ dsa₂ jmɨg₂.
26 Ca₂jme₃lióg₃ Apolos ca₂juáꞌ₂ dsi₂néi₂ guáꞌ₅ sinagoga ca₂tsɨ́ꞌ₃ dsa₂, ca₂dsia₃ tiá₂ dsɨ́₅; la₁ jme₁ca₂nág₂ Priscila quianꞌ₅₄ Aquila, ca₂të́ꞌ₃ Apolos cau₅, ca₂jme₃tag₂₃ guë́₄ rë₂ ꞌa₂ liaꞌ₂ lë́₅ juɨ₅ quióꞌ₅ Diú₄.
27 Jaun₂ në́₃, liaꞌ₂ conꞌ₂ jme₁ꞌnio₃ Apolos jme₁ŋɨ́i₃ juɨ₅ Acaya, ca₂cuë₃ rɨinꞌ₅₄ bí₂, ca₂chein₃ si₂ carta ne₄ dsa₂ ꞌén₂ i₂tiánꞌ₅ ja₁jaun₂, a₂guein₃ ꞌéi₂. Jme₁ca₂dsióg₃ Apolos ꞌuë₃ Acaya, ca₂jme₃ꞌoin₅₄ ꞌŋio₅ dsa₂ ꞌén₂ i₂tiánꞌ₅ ja₁jaun₂. Ia₁ a₂dse₃ dsɨ́₅ Diú₄ ca₂jmo₃ a₂ca₂rë₃ꞌén₂ dsa₂ ꞌéi₂.
28 Jaun₂ qui₂ca₂tsɨ́in₂ quianꞌ₅₄ dsa₂ judíos, jaun₂ ca₂lɨ́ꞌ₃ bá₄ Apolos ne₄ ja₁tsɨin₂₃ jaun₂, të₃ jág₅ ca₂le₃jɨ́n₃ dsa₂. Ia₁ liaꞌ₂ conꞌ₂ lë́₅ Si₂ quióꞌ₅ Diú₄ bá₄ ca₂ꞌë́ꞌ₃ dsa₂ ꞌéi₂, a₂dsónꞌ₂ bá₄ lɨ́n₅ Jesús I₂rë₂ꞌɨ́n₁ quián₅ Diú₄.