ꞌEn₅₄ Pablo juɨg₂ Efeso
19
Të₁liaꞌ₂ ꞌen₅₄ Apolos juɨg₂ Corinto, Pa₄ guëꞌ₂ ca₂ŋɨ́i₃ le₂tan₅₄ juɨ₅ máꞌ₂ a₂ca₂dsióg₃ Efeso. Ja₁jaun₂ ca₂jeinꞌ₂ i₂lɨn₅₄ dsa₂ ꞌén₂.
2 Jaun₂ ca₂ŋag₃ ꞌéi₂ ca₂ŋɨ́iꞌ₃ dsa₂ ca₂juáꞌ₂:
―¿Ca₂guenꞌ₅₄ ꞌniaꞌ₂ Jme₂dsí₂ Jŋió₅ liaꞌ₂ conꞌ₂ jme₁ca₂rë₃ꞌénꞌ₂ ꞌniaꞌ₂ jág₁ dse₃?
Jaun₂ ca₂ŋag₃ dsa₂:
―Ca₂liaꞌ₂ jŋiaꞌ₅₄ tsá₃ ma₂ne₄ jniaꞌ₅₄ juaꞌ₅₄ chan₂ jan₂ Jme₂dsí₂ Jŋió₅.
3 Jaun₂ ca₂ŋag₃ táng₃ Pa₄:
―¿ꞌA₂ guëꞌ₂ liaꞌ₂ ca₂jŋóꞌ₂ ꞌniaꞌ₂ jmɨg₂?
Ca₂ŋag₃ táng₃ dsa₂:
―Juɨ₁liaꞌ₂ ca₂jme₃tag₅ Juan₅₄ bá₄.
4 Ca₂juáꞌ₂ Pa₄:
―Jme₁chon₅ Juan₅₄ jmɨg₂ dsa₂ co₂ꞌnióꞌ₄ léi₄ a₂jme₃tsɨ́n₃ dsa₂ dsɨ́₅. La₁ jme₁juáꞌ₂ ján₃, a₂ꞌnióꞌ₅ le₃ꞌén₂ dsa₂ le₃quióꞌ₅ i₂jiá₃ chi₁quɨ́n₃, a₂ꞌɨin₂₃ Jesucristo.
5 Jme₁ma₂në₂néi₂ dsa₂ le₂në₅, qui₂ca₂choin₃ jmɨg₂ liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄ Jesús.
6 Jaun₂ jme₁ca₂quiog₂ Pa₄ gu₂ ne₄ quióꞌ₅ dsa₂ ꞌéi₂, dsɨ₂juɨ₅ le₂jaun₂ ca₂guan₃ Jme₂dsí₂ Jŋió₅ ca₂ꞌí₃ të₂dsɨ́₅ dsa₂. Jaun₂ qui₂ca₂dsia₃ dsa₂ jág₁ jmei₅ siáꞌ₂, qui₂ca₂juáꞌ₂ jág₁ a₂ca₂cuë₃ Diú₄ në́₃.
7 Conꞌ₂ guia₃-tɨ́n₂ dsa₂ jme₁lë́₂ le₃jɨ́in₃.
8 Conꞌ₂ ꞌnɨ₅ tsɨꞌ₂ ca₂dsɨn₃ a₂jme₁dsó₅ Pa₄ guáꞌ₅ sinagoga* ca₂dsia₃ tiá₂ dsɨ́₅ ca₂jme₃tɨin₂₃ dsa₂ qui₂co₂jéinꞌ₂ dsa₂ të₂le₃ ja₁gon₂ Diú₄.
9 La₁ i₂lɨn₅₄ dsa₂ ca₂jmo₃ ꞌuaꞌ₂ dsɨ́₅, tsá₃ ca₂rë₃ꞌéin₂. Jŋiaꞌ₅₄ qui₂ca₂ton₃ ꞌlɨgꞌ₅₄ bá₄ Juɨ₅* quióꞌ₅ Te₁guiꞌ₅₄ jɨn₄ dsa₂. Jaun₂ ca₂të́ꞌ₃ Pa₄ co₂nióꞌ₃ jmáꞌ₃ dsa₂ i₂ꞌén₂ ca₂ꞌuɨin₂ ja₁jaun₂ ca₂i₃léin₂ caun₂ escuela ja₁të́ꞌ₂ quióꞌ₅ Tirano ja₁táun₂ dsa₂ jág₁. Ja₁jaun₂ ca₂i₁jme₁tɨin₂₃ dsa₂ ca₂le₃o₃ jmɨg₄.
10 Ca₂dsɨn₃ tɨn₃ ŋi₂ ca₂ꞌí₃ ja₁jaun₂, jaun₂ le₃jɨ́n₃ dsa₂ i₂jme₁tiánꞌ₄ ꞌlióng₂ juɨg₂ ja₁tén₄ Asia ca₂nág₂ jág₁ quióꞌ₅ Te₁guiꞌ₅₄ Jesús liaꞌ₂ dsa₂ judíos* liaꞌ₂ dsa₂ griegos në́₃.
11 Jaun₂ ꞌlióng₂ léi₄ juëꞌ₂ ca₂jmo₃ Diú₄ të₂le₃ quianꞌ₅₄ Pa₄,
12 le₂jiog₅ nɨ₁tsɨnꞌ₅₄ dsa₂, o₃ pe₁guí₄ ꞌe₂ a₂qui₂ca₂nɨ́ꞌ₃ quióꞌ₅, jme₁qui₂dsɨ₂con₃ dsa₂ ja₁con₂ dsa₂ dsoꞌ₅₄, qui₂ca₂ꞌlón₂ dsa₂ ꞌe₂ caun₂ dso₄ niog₅ lɨ́in₅, qui₂ca₂ꞌuɨn₂ jme₂dsí₂ ꞌlɨnꞌ₅₄ quióꞌ₅ dsa₂ në́₃.
13 La₁ i₂lɨn₅₄ dsa₂ judíos i₂jme₁i₂nio₄ jmo₂₃ ꞌuɨ́inꞌ₂ jme₂dsí₂ ꞌlɨnꞌ₅₄ quióꞌ₅ dsa₂,a dsa₂ ꞌéi₂ jme₁ꞌnio₃ jme₁ꞌɨin₃ Te₁guiꞌ₅₄ Jesús juɨ₁liaꞌ₂ jë₁ꞌuɨ́inꞌ₂ jme₂dsí₂ ꞌlɨnꞌ₅₄, ca₂juáꞌ₂ tsɨ́ꞌ₅ jme₂dsí₂ ꞌlɨnꞌ₅₄:
―ꞌÉiꞌ₃ jmo₅ jniá₂ quianꞌ₅₄ bí₂ ꞌéiꞌ₃ quióꞌ₅ Jesús i₂ꞌɨn₅ Pa₄ në₅, ꞌuɨnꞌ₂ ꞌniaꞌ₂.
14 Le₂jaun₂ jme₁jmo₅ ta₁guion₃ chiꞌ₂ ja₁ŋiꞌ₅₄ jan₂ dsa₂ judío i₂chen₂ Esceva, i₂jme₁lɨ́n₄ jan₂ juɨg₅₄ jme₂dsa₂.
15 La₁ jme₁ca₂jmo₃ le₂jaun₂, jaun₂ ca₂ŋag₃ jme₂dsí₂ ꞌlɨnꞌ₅₄:
―Cuɨ́n₅ bá₄ jniá₂ Jesús, ján₃ bá₄ guion₄ bá₄ jniá₂ ꞌein₂ ꞌéi₂ Pa₄. La₁ ꞌniaꞌ₂ në́₃, ¿ꞌein₂ bá₄ ꞌniaꞌ₂ jmoꞌ₂ ꞌéiꞌ₃ a₂jú₄ jniá₂?
16 Jaun₂ dsa₂ i₂jme₁ꞌen₅₄ jme₂dsí₂ ꞌlɨnꞌ₅₄ quióꞌ₅, ca₂cuë₃ ꞌŋio₅ lɨn₃ ca₂cuë́ꞌ₃ ca₂le₃jɨ́n₃ dsa₂ ꞌéi₂, ca₂liaꞌ₂ ca₂i₃lein₃ cuɨng₂₃ le₁cuáinꞌ₃ qui₂le₁cuɨ́inꞌ₂ në́₃.
17 Jaun₂ ca₂le₃jɨ́n₃ dsa₂ judíos, quianꞌ₅₄ dsa₂ griegos në́₃, i₂jme₁tiánꞌ₄ juɨg₂ Efeso, ca₂rë₃góꞌ₅ ꞌŋio₅ lɨn₃ jme₁ca₂rë₃ŋi₅. Jaun₂ ca₂rë₃juɨnꞌ₂ Te₁guiꞌ₅₄ Jesús ꞌŋio₅ lɨn₃.
18 Jaun₂ juɨn₅ dsa₂ i₂ca₂rë₃ꞌén₂, ca₂dsi₃léin₂ ca₂jmo₃ qui₂ŋí₃ quióꞌ₅ ca₂le₃jë́₃ a₂ꞌlɨgꞌ₅₄ a₂qui₂ma₂jmo₃.
19 Jaun₂ juɨn₅ dsa₂ i₂jme₁jmo₅ ta₁ a₂chan₂ dsɨ́₅ në́₃, ca₂i₁quian₅₄ si₂ liaꞌ₂ quióꞌ₅, jaun₂ ca₂dsɨ́ꞌ₂ të₃ jág₅ dsa₂. Jme₁ca₂chenꞌ₃ dsa₂ cuenta je₂liáꞌ₂ dsɨn₅ ꞌi₄ ꞌmaꞌ₅₄ le₃jë́₃ si₂ jaun₂, ca₂dsióg₃ conꞌ₂ të₂láu₃-guiá₂ mei₅ ꞌéiꞌ₃ cu₄ tiog₂.
20 Jaun₂ në́₃, quianꞌ₅₄ bí₂ quióꞌ₅ Te₁guiꞌ₅₄ caun₂ ca₂i₃ꞌág₃ jág₁ quióꞌ₅, caun₂ ca₂lɨ́ꞌ₃ bá₄.
21 Cang₂ jaun₂ ca₂ꞌág₂ Pa₄ caun₂ dsɨ́₅ a₂dsɨ₃jág₂ le₂tan₅₄ juɨg₂ ja₁tén₄ ꞌuë₃ Macedonia quianꞌ₅₄ Acaya, liaꞌ₂ ma₂ŋó₅ jaun₂ të₂ Jerusalén. Ján₃ bá₄ ca₂juáꞌ₂ táng₃, jë₁ma₂ca₂dsióg₃ Jerusalén, a₂tion₅₄ dsó₃ ca₂të₂ Roma ján₃.
22 Jaun₂ ca₂chein₃ on₃ dsa₂ i₂jme₂ꞌo₅₄b quiáin₅: Timoteo, quiainꞌ₅₄ Erasto, a₂dsɨ₃léin₂ juɨ₅ Macedonia. Ca₂rë₃ꞌɨin₅₄ bá₄ guë́₄ ꞌŋiog₅, ꞌuë₃ Asia.
Ca₂nio₃ mɨꞌ₅₄ juɨg₂ Efeso
23 Jmɨg₄ jaun₂, ꞌŋio₅ lɨn₃ ca₂nio₃ mɨꞌ₅₄ o₄quióꞌ₄ Juɨ₅* quióꞌ₅ Te₁guiꞌ₅₄.
24 Ia₁ jan₂ dsa₂ i₂chen₂ Demetrio i₂jme₁lɨ́n₄ të₅ŋí₁ cu₄tiog₂, jme₁jmo₂₃ chéi₂ a₂rë₂lag₄ liaꞌ₂ lë́₅ guáꞌ₅ ja₁chénꞌ₄ ꞌio₅₄ diú₄ Diana.c ꞌŊio₅ jme₁tɨin₂₃ cu₄ quianꞌ₅₄ ta₁ jaun₂ quióꞌ₅, quianꞌ₅₄ të₅ŋí₁ rɨinꞌ₅₄ i₂jmo₅ ta₁ le₂jaun₂.
25 Jaun₂ Demetrio në́₃, ca₂ŋɨ́iꞌ₂ ꞌéi₂ quianꞌ₅₄ guë́₄ dsa₂ siánꞌ₂ i₂jmo₅ ta₁ le₂jaun₂ ján₃. Jaun₂ ca₂juáꞌ₂:
―ꞌNiaꞌ₂ dsa₂ rɨnꞌ₅₄ jniog₄, ŋiꞌ₅₄ bá₄ ꞌniaꞌ₂ rë₂, a₂chong₂ jniog₄ dse₃ quianꞌ₅₄ ta₁ quián₂.
26 Jaun₂ jágꞌ₂ bá₄ ꞌniaꞌ₂ a₂jmo₅ Pa₄ ŋɨ₂₃ juáꞌ₂ tsɨ́ꞌ₅ dsa₂, a₂tsá₃ ꞌe₂ quen₅ diú₄ i₂jmóꞌ₂ dsa₂ mɨ₂güɨ́g₃, ia₁ tsá₃ lɨ́in₅ diú₄, juáꞌ₂. Jaun₂ juɨn₅ dsa₂ i₂ma₂ca₂rë₃ꞌén₂ në́₃, on₃juaꞌ₅₄ jmáꞌ₃ juɨg₂ Efeso la₂, meiꞌ₂ tsá₃ le₂tan₅₄ ꞌuë₃ Asia bá₄.
27 Jaun₂ goꞌ₂ të₂le₃ quián₂ jniog₄, ia₁ dsɨ₃ꞌén₂ ta₁ quián₂ lé₂. Ján₃ guëꞌ₂ le₂jaun₂, të₂le₃ quióꞌ₅ guáꞌ₅ quióꞌ₅ diú₄ Diana juɨnꞌ₂, goꞌ₂ a₂dsɨ₃ꞌén₂ ján₃. Ia₁ në₁juaꞌ₂ tsá₃ ma₂ꞌnio₃ dsa₂, jaun₂ dsɨ₃ꞌén₂ bá₄ bí₂ quióꞌ₅ a₂lɨ́in₅ dsa₂ juɨnꞌ₂. Ia₁ rë₂në́₃ ta₁caun₂ ꞌuë₃ Asia, ta₁caun₂ mɨ₂güɨ́g₃ në́₃ jme₂go₃ dsa₂ a₂jme₂juagꞌ₂.
28 Jme₁ca₂dsan₃ nag₅ dsa₂ le₂në₅, ca₂rë₃ꞌnéi₃ ꞌŋio₅ lɨn₃, ca₂tóinꞌ₂ ca₂guióꞌ₃ ca₂juáꞌ₂:
―¡ꞌŊio₅ juɨnꞌ₂ diú₄ Diana quián₅ dsa₂ juɨg₂ Efeso!
29 Jaun₂ ca₂lë₃ mɨꞌ₅₄ quióꞌ₅ ca₂le₃jɨ́n₃ dsa₂ juɨg₂ jaun₂. Jaun₂ le₃on₃ dsa₂ chan₂ Macedonia i₂chen₂ Gayo quiainꞌ₅₄ Aristarco i₂jme₁quianꞌ₅₄ Pa₄, ca₂jŋauꞌ₃ ca₂i₃toinꞌ₅₄ co₂dsia₅ ca₂të₂ ja₁ŋɨꞌ₂ d dsa₂ juɨg₂.
30 Jaun₂ jme₁ꞌnio₃ Pa₄ jme₁dsó₃ jɨn₄ dsa₂ juɨg₂ a₂jme₁dsɨ₃chiꞌ₅₄ dsa₂. La₁ tsá₃ ca₂cuë₃ jmɨg₄ rɨinꞌ₅₄ i₂ꞌén₂.
31 I₂lɨn₅₄ dsa₂ dsen₅₄ quián₅ ꞌuë₃ Asia, i₂lɨ́n₅ dsa₂ a₂mei₅₄ quián₅ Pa₄, ján₃ bá₄ ca₂chein₃ jág₁ a₂tsá₃ dsi₂ten₅₄ juaꞌ₅₄ a₂dsɨ₃ꞌí₂ Pa₄ ja₁jaun₂.
32 Të₁liaꞌ₂ jaun₂ në́₃ ja₁tionꞌ₅₄ dsa₂ juɨg₂ le₁ŋɨiꞌ₂ tioinꞌ₅₄ co₂mɨꞌ₅₄, lë́₅ bá₄ qui₂juáꞌ₂ jan₂-jan₂, tsá₃ caun₂ jág₁ ꞌei₅, lë́₅ guë́₄ ca₂dsion₄ dsa₂ jŋiaꞌ₅₄ tsá₃ ŋi₅ ꞌe₂ lë₃ le₁ŋɨiꞌ₂.
33 La₁ jë₄ jaun₂ jme₁tionꞌ₅₄ bá₄ i₂lɨn₅₄ dsa₂ i₂ŋi₅. Jaun₂ ca₂juáꞌ₂ ꞌa₂ liaꞌ₂ lë́₅ ca₂tsɨ́ꞌ₃ jan₂ i₂chen₂ Alejandro i₂jme₁ca₂ꞌlianꞌ₃ dsa₂ judíos a₂ca₂dsióg₃ të₂ne₄ dsa₂ juɨg₂. Jaun₂ ca₂jmo₃ Alejandro léi₄ quianꞌ₅₄ gu₂ a₂jme₁mɨ₂₃ a₂jmo₃ dsa₂ tei₄, ia₁ a₂jme₁ꞌnio₃ juáꞌ₂ jág₁ a₂jme₁tsɨ́ꞌ₃ dsa₂ a₂jme₁lióin₂ dsa₂ on₃ i₂ca₂jŋaꞌ₃ dsa₂ ꞌéi₂.
34 La₁ jme₁ca₂rë₃líꞌ₄ dsa₂ a₂lɨ́n₅ Alejandro ꞌéi₂ jan₂ dsa₂ judío, jaun₂ ca₂tóinꞌ₂ co₂mɨꞌ₅₄, conꞌ₂ tɨn₃ hora qui₂guióꞌ₅ ca₂juáꞌ₂:
―¡ꞌŊio₅ juɨnꞌ₂ diú₄ Diana quián₅ dsa₂ juɨg₂ Efeso!
35 Jaun₂ dsa₂ i₂lɨ́n₅ të₅sí₃ quián₅ dsa₂ juɨg₂ jaun₂, ca₂tióꞌ₃ jme₁ca₂tióꞌ₃, ca₂jmo₃ ca₂i₃lén₂ dsa₂ tei₄. Jaun₂ guë́₄ ca₂juáꞌ₂:
―ꞌNiaꞌ₂ dsa₂ chan₂ Efeso, ta₁caun₂ mɨ₂güɨ́g₃ bá₄ le₁ŋi₅ dsa₂ a₂ca₂tɨ́n₂ dsa₂ juɨg₂ Efeso jmo₃ ꞌí₁ guáꞌ₅ quióꞌ₅ diú₄ juɨnꞌ₂ Diana, tonꞌ₂ jmo₃ ꞌí₁ nióꞌ₄ quióꞌ₅ a₂ca₂sió₃ gueiꞌ₅₄ i₂juɨ́g₃.e
36 ꞌI₁jan₂ juaꞌ₅₄ le₃juáꞌ₂ a₂tsá₃ ŋi₅. Jaun₂ tei₄ jmo₄ ꞌniaꞌ₂, ꞌnioꞌ₂ ꞌniaꞌ₂ ꞌauꞌ₂ dse₃ néꞌ₃ guë́₄ a₂jmóꞌ₂ ꞌe₂ jmóꞌ₂.
37 Ia₁ dsa₂ i₂në₂chanꞌ₂ ꞌniaꞌ₂, tsá₃ ꞌang₂₃ a₂ca₂tɨ́n₂ guáꞌ₅, on₃ guë́₄ ꞌɨin₂₃ ꞌlɨgꞌ₅₄ diú₄ quián₂ jniog₄.
38 Chi₂juaꞌ₂ ꞌnio₃ Demetrio mɨ₃ dso₄, quiainꞌ₅₄ ca₂le₃jɨ́n₃ i₂jmo₅ ta₁ quiainꞌ₅₄, jaun₂ guëꞌ₂ chan₂ dsɨ₂tan₅₄ ne₄ta₁ ja₁lé₂ dsɨ₃mɨ₃ dso₄.
39 La₁ në₁juaꞌ₂ a₂mɨꞌ₂ ꞌniaꞌ₂ lë́₅ caun₂ dso₄ juëꞌ₂ guë́₄ conꞌ₂ guë́₄ a₂jaun₂, ꞌnióꞌ₅ le₃rë₂ ne₄ dsɨ₂tan₅₄ jë₁ma₂le₁ŋɨꞌ₂ dsa₂ juɨg₂.
40 Ia₁ goꞌ₂ quián₂ jniog₄ a₂jmoꞌ₂ ꞌniaꞌ₂ le₂në₅, në₁juaꞌ₂ ca₂ꞌnag₃ dsa₂ a₂ŋɨ́₄ lë₃ ꞌniog₂ mɨꞌ₅₄, juɨ₁liaꞌ₂ mɨꞌ₅₄ a₂ca₂lë₃ në₃. Ia₁ në₁juaꞌ₂ ca₂ŋag₃ dsa₂ ꞌe₂ ꞌuɨg₅₄ ca₂lë₃ mɨꞌ₅₄ la₂, tsá₃ ꞌe₂ cha₂ le₃ŋag₄.
41 Jme₁ma₂ca₂dsan₃ juáꞌ₂ le₂në₅, ca₂jme₃dsiain₂₃ bá₄ jág₁ a₂le₁ŋɨꞌ₂ dsa₂. Jaun₂ ca₂dsiáinꞌ₂ bá₄ dsa₂, qui₂ca₂i₃lein₃ quióꞌ₅.