Ca₂ŋó₃ Pablo ꞌuë₃ Macedonia quianꞌ₅₄ Grecia
20
Jme₁ca₂dsan₃ mɨꞌ₅₄ jaun₂, qui₂ca₂të́ꞌ₃ Pa₄ le₃jɨ́n₃ dsa₂ ꞌén₂, qui₂ca₂cuë́ꞌ₃ bí₂. Jme₁ca₂lë₃ jaun₂, qui₂ca₂ꞌágꞌ₃ jág₁ rɨinꞌ₅₄. Jaun₂ guë́₄ ca₂ŋó₃ juɨ₅ Macedonia.
2 Jaun₂ qui₂i₁jag₅₄ le₂tan₅₄ juɨg₂ te₁ꞌi₁ ja₁jaun₂. Quianꞌ₅₄ jág₁ quióꞌ₅ qui₂i₁cuëꞌ₂ bí₂ rɨinꞌ₅₄. Cang₂ guë́₄ jaun₂ ca₂ŋó₃ táng₃ juɨ₅ Grecia.
3 Ja₁jaun₂ ca₂ꞌí₃ ꞌnɨ₅ tsɨꞌ₂. Jme₁ma₂ꞌein₅₄ juɨ₅ ꞌí₂ nɨ₁barco a₂dsó₃ juɨ₅ Siria, jme₁ca₂rë₃ŋi₅ a₂ma₂jmo₅ dsa₂ judíos caun₂ jág₁ a₂tsáunꞌ₂. Jaun₂ co₂ŋeiꞌ₅₄ tsá₃ ma₃ca₂ŋáiꞌ₃ juɨ₅ jaun₂. Ca₂ŋáiꞌ₃ bá₄ táng₃ juɨ₅ ꞌuë₃ ca₂ŋɨ́i₃ Macedonia.
4 Jaun₂ ca₂jme₃quiongꞌ₅₄ dsa₂ le₂ꞌi₄ juɨ₅ i₂chen₂ Sópater ja₁ŋiꞌ₅₄ Pirro,a i₂chan₂ Berea, Aristarco quianꞌ₅₄ Segundo i₂chan₂ Tesalónica, Gayo i₂chan₂ Derbe; Timoteo, Tíquico quianꞌ₅₄ Trófimo në́₃ i₂chan₂ juɨg₂ guꞌ₂ ja₁tén₄ ꞌuë₃ Asia.
5 Jaun₂ në́₃, rɨnꞌ₅₄ jniog₄ ꞌéi₂ ca₂i₃jŋiái₄ ca₂i₁jŋiog₁₂ juɨg₂ Troas.
6 Cang₂ jme₁ca₂gúꞌ₃ jmɨg₄ a₂guë́ꞌ₅ dsa₂ i₁ŋíꞌ₄ a₂tsá₃ levadura* quianꞌ₅₄, jaun₂ ca₂tióꞌ₄ jniaꞌ₅₄ nɨ₁barco ca₂ꞌuag₂ Filipos. A₂ꞌŋiá₂ jmɨg₄ jaun₂, ca₂join₃ jniaꞌ₅₄ juɨg₂ Troas. Ja₁jaun₂ ca₂jŋia₄ jniaꞌ₅₄ guio₃ jmɨg₄.
ꞌEn₅₄ Pablo juɨg₂ Troas
7 Jmɨg₄ jë₁le₂ꞌuɨg₅₄ semana, ca₂ŋagꞌ₂ jniaꞌ₅₄ a₂ca₂dsióꞌ₄ i₁ŋíꞌ₄. Jaun₂ të₃jë₄ jaun₂ ca₂jme₃tag₅ Pa₄ ca₂jme₃tɨin₂₃ dsa₂. Caun₂ ca₂ton₃ jág₁ ca₂liaꞌ₂ ca₂të́₂ dsi₃nei₅, ia₁ a₂ma₂ꞌein₅₄ juɨ₅ dsáinꞌ₃ jë₁ma₂jnia₃ jaun₂.
8 Jme₁tioꞌ₅₄ jniaꞌ₅₄ le₁ŋagꞌ₂ caun₂ dsi₂néi₂ ja₁lë́₄ gueiꞌ₅₄. ꞌLióng₂ tsɨ́₅ jme₁le₁ꞌág₄ le₁guíꞌ₂ si₂.
9 Jan₂ guëꞌ₂ dsó₂ jme₁guá₄ caun₂ o₄ꞌné₄ tau₂ quei₂ i₂jme₁chen₂ Eutico. Ia₁ a₂ŋɨ́₄ lë₃ uë́₂ qui₂ca₂dsia₃ Pa₄ jág₁, jaun₂ tsá₃ ma₃ca₂tióꞌ₃ ꞌéi₂ a₂i₁güɨ́in₃. Jme₁ma₂rë₂güɨ́in₃ tsá₃ ma₃líꞌ₄ jme₁ca₂táinꞌ₂ ca₂të₂ ja₁lë́₄ ꞌnɨ₅ juɨ́n₃ gueiꞌ₅₄. Ma₂join₂₃ jme₁ca₂i₁choꞌ₄ dsa₂.
10 Jaun₂ ca₂sión₃ Pa₄ ján₃, ca₂jŋaiꞌ₃ ꞌlag₄ ca₂quiog₂ ne₄ quióꞌ₅, jaun₂ ca₂juáꞌ₂ ca₂tsɨ́ꞌ₃ rɨinꞌ₅₄:
―Tsá₃ lë₁jmo₂ ꞌniaꞌ₂ gangꞌ₃, ia₁ ꞌi₄ bá₄ jme₂dsí₂ quióꞌ₅ chiꞌ₂.
11 Jaun₂ në́₃ ca₂uɨ́g₂ táng₃ Pa₄ gueiꞌ₅₄. Jaun₂ ca₂dsióꞌ₃ i₁ŋíꞌ₄, ca₂guë́ꞌ₃ bá₄ jaun₂ në́₃. Caun₂ ca₂dsia₃ bá₄ guë́₄ Pa₄ jág₁ ca₂liaꞌ₂ ca₂jnia₃. Ca₂ŋáiꞌ₃ bá₄ jaun₂ në́₃.
12 La₁ dsó₂ ꞌéi₂ në́₃, jéinꞌ₃ bá₄ ca₂tág₃ dsa₂, jmo₅ dsa₂ ꞌioꞌ₂ ca₂le₃jɨ́in₃.
Ca₂ꞌuɨn₂ dsa₂ Troas, ca₂i₃léin₂ táng₃ juɨ₅ Mileto
13 Ca₂i₃jŋióg₄ bá₄ jniaꞌ₅₄ i₂náu₅ quianꞌ₅₄ nɨ₁barco ca₂të₂ Asón ca₂i₁te₁ Pa₄, ia₁ jme₁ma₂lë́₅ jág₁ a₂ꞌnio₃ dsó₃ ꞌŋiog₅ juɨ₅ tag₅₄.
14 Jme₁ca₂rë₃quiainꞌ₅₄ jniaꞌ₅₄ juɨg₂ Asón, ca₂ꞌí₃ nɨ₁barco quianꞌ₅₄ jniaꞌ₅₄ a₂ca₂i₃náu₅ juɨ₅ Mitilene.
15 Ca₂ꞌuag₂ jniaꞌ₅₄ ja₁jaun₂. Jme₁jnia₃ jaun₂, ca₂ŋag₅₄ cau₅ ja₁të́ꞌ₂ dsa₂ Quío, (a₂niog₅ jë₄ jmɨ₁ŋíꞌ₄). Caun₂ jmɨg₄ cang₂ jaun₂, ca₂dsi₃náu₅ jniaꞌ₅₄ ꞌo₄ jmɨ₁ŋíꞌ₄ ja₁chei₂ Samos. [Jaun₂ ca₂jŋia₁ jniaꞌ₅₄ juɨg₂ Trogilio].b Jme₁jnia₃ jaun₂ guë́₄ ca₂dsi₃náu₅ jniaꞌ₅₄ të₂ juɨg₂ Mileto.
16 Jaun₂ le₂në₅ ca₂lë₃, ia₁ tsá₃ ꞌnio₃ Pa₄ ꞌí₂ uë́₂ ꞌuë₃ Asia, tsá₃ ma₃ca₂ŋei₅₄ juɨ₅ Efeso. Ia₁ ꞌnio₃ dsáinꞌ₄ ŋiꞌ₅₄ ta₁ juɨ₅ Jerusalén, a₂ꞌnio₃ ŋɨi₅ ja₁jaun₂ Jmɨg₄ Të₂láu₃-guiá₂* në₁juaꞌ₂ ca₂lë₃.
Ca₂ton₃ Pablo jág₁ jɨn₄ dsa₂ canꞌ₅₄ quián₅ rɨinꞌ₅₄ chan₂ Efeso
17 ꞌEn₅₄ Pa₄ juɨg₂ Mileto, jaun₂ ca₂ŋɨ́iꞌ₂ ca₂le₃jɨ́n₃ dsɨ₂guiꞌ₅₄ canꞌ₅₄ quián₅ rɨinꞌ₅₄ i₂chan₂ Efeso.
18 Jme₁ca₂dsi₃lén₂ dsa₂, jaun₂ ca₂juáꞌ₂ Pa₄:
―Ŋiꞌ₅₄ bá₄ ꞌniaꞌ₂ ꞌa₂ liaꞌ₂ ma₂jmo₃ jniá₂ ca₂le₃ guang₃ le₂ꞌuɨg₅₄ ꞌuë₃ Asia.
19 Ca₂le₃jë́₃ jmɨg₄ bá₄ liaꞌ₂ conꞌ₂ ca₂ꞌú₃ jɨnꞌ₄ ꞌniaꞌ₂, ca₂jme₁ti₁₂ ta₁ ne₄ Te₁guiꞌ₅₄. Tsá₃ ca₂jme₁juɨngꞌ₂ ꞌŋió₃. Tsá₃ caun₂ ca₂i₃ŋɨ́g₂ ꞌuɨg₅₄ ca₂le₃jë́₃ a₂jme₁ꞌnio₃ dsa₂ judíos jme₁jmógꞌ₂.
20 La₁ on₃juaꞌ₅₄ jaun₂ tsá₃ ma₃ca₂jme₁tɨn₅ jniá₂ ꞌniaꞌ₂ a₂dse₃ quiánꞌ₂ ꞌniaꞌ₂, ca₂i₁ꞌë́₄ jɨn₄ dsa₂, ca₂ŋeg₅₄ të₂ dsi₂néi₂ quiánꞌ₂ ꞌniaꞌ₂ në́₃.
21 Liaꞌ₂ dsa₂ lɨ́n₅ judíos liaꞌ₂ dsa₂ griegos në́₃, qui₂ma₂juɨ́g₂ jniá₂ a₂ꞌnióꞌ₅ jme₃tsɨ́n₃ dsa₂ dsɨ́₅ ne₄ Diú₄, a₂le₃ꞌéin₂ të₂le₃ quióꞌ₅ Te₁guiꞌ₅₄ Jesucristo quián₂ jniog₄.
22 Jaun₂ në́₃, ma₂ꞌeng₅₄ juɨ₅ nei₅₄ juɨ₅ Jerusalén, ia₁ chi₂quióng₂ jmɨg₄ Jme₂dsí₂ quián₅ Diú₄. Tsá₃ a₂jaun₂ guion₅₄ ꞌe₂ dsɨ₃ŋɨ́g₂ ja₁jaun₂.
23 Jŋiaꞌ₅₄ liaꞌ₂ jaun₂ bá₄ guion₅₄, ia₁ le₂caun₂ le₂caun₂ juɨg₂ ja₁ma₂ŋeg₅₄, ma₂ꞌë́₂ jág₁ Jme₂dsí₂ Jŋió₅ a₂i₁ŋag₁₂ uɨg₅, a₂toꞌ₂ dsa₂ ꞌné₅ ꞌmá₃ në́₃.
24 La₁ tsá₃ a₂jaun₂ ꞌɨ₅ dsɨ₃ jniá₂, o₁jŋiaꞌ₅₄ ca₂quɨ́n₂ ꞌmú₃ quió₃, ia₁jaun₂ bá₄ le₃tei₅₄ jniá₂ ta₁ a₂ma₂cheiꞌ₃ Te₁guiꞌ₅₄ Jesús a₂jmo₅₄, a₂jme₁tɨng₅ dsa₂ jág₁ dse₃ a₂ꞌua₁ dsɨ́₅ Diú₄.
25 ꞌJaun₂ në́₃ dsónꞌ₂ lɨ́n₂ jniá₂, ꞌniaꞌ₂ rɨnꞌ₅₄ jniog₄ i₂ma₂neiꞌ₂ jág₁ a₂ma₂qui₂ma₂ꞌë́₃ jniá₂ ŋɨ₂₃, o₁lɨ́gꞌ₂ jmɨg₄ tsá₃ ma₃jagꞌ₅₄ ꞌniaꞌ₂ jniá₂ táng₃.
26 Jaun₂ lë₃ juɨ́g₂ jniá₂ ꞌniaꞌ₂ tsá₃ ma₃ꞌe₂ rë₂cánꞌ₄ jniá₂ ja₁con₂ ca₂le₃jɨ́n₃ dsa₂,
27 ia₁ ma₂ca₂juɨ́g₂ bá₄ jniá₂ ꞌniaꞌ₂ liaꞌ₂ conꞌ₂ lë́₅ dsɨ₂jiog₅ dsɨ́₅ Diú₄ jmo₃, tsá₃ ꞌe₂ ca₂ꞌma₃ jniá₂ ja₁conꞌ₂ ꞌniaꞌ₂.
28 Jaun₂ në́₃, jmo₄ ꞌniaꞌ₂ ꞌí₁ guiongꞌ₅₄, jmo₄ ꞌí₁ ca₂le₃jɨ́n₃ dsa₂ rɨ́ngꞌ₂ i₂ꞌén₂ në́₃. Ia₁ o₄gogꞌ₂ ꞌniaꞌ₂ bá₄ ma₂dsiog₃ Jme₂dsí₂ Jŋió₅ c a₂jmóꞌ₂ ꞌí₁ dsa₂ i₂lɨ́n₅ guáꞌ₅ quián₅ Diú₄ i₂ꞌlianꞌ₅₄ të₂le₃ quianꞌ₅₄ jmɨ₂ ꞌan₅₄ ꞌŋiog₅ ja₁ŋiꞌ₅₄.
29 Guion₄ bá₄ jniá₂ a₂ja₃lén₂ dsa₂ siánꞌ₂ jë₁ma₂ŋágꞌ₅, a₂ꞌnio₃ ꞌéin₂ ꞌniaꞌ₂ ca₂le₃jɨ́ngꞌ₃, a₂jmo₃ juɨ₁liaꞌ₂ jmo₅ dsɨ₂jɨꞌ₅₄ náu₂ tsau₂ dsɨ́₅, jme₂dsiain₂₃ juɨ₁liaꞌ₂ jáꞌ₂ chaꞌ₂.
30 Náu₃ jë₄ quiánꞌ₂ ꞌniaꞌ₂ guiongꞌ₅₄ dsa₂ i₂jme₃tag₅ le₃jen₅ ia₁jaun₂ ꞌein₃ juɨ₅ quióꞌ₅ ꞌéi₂ juɨ₁liaꞌ₂ dsa₂ i₂ma₂ꞌén₂ jág₁ dse₃.
31 Jaun₂ rë₂jánꞌ₁ ꞌniaꞌ₂, dsá₂ ꞌauꞌ₂ ꞌniaꞌ₂ jmo₄, ia₁ ꞌnɨ₅ ŋi₂ ca₂dsɨn₃ ca₂cuë́₃ ꞌniaꞌ₂ jág₁ liaꞌ₂ ꞌuë₂-jmɨ₂, ca₂le₃jë́₃ ca₂ꞌo₃.
32 ꞌJaun₂ në́₃ rɨnꞌ₅₄ jniog₄, dsián₄ jniá₂ ꞌniaꞌ₂ o₄gú₃ Diú₄, ne₄ jág₁ dse₃ quióꞌ₅ a₂ꞌua₁ dsɨ́₅, a₂lé₂ jmo₃ a₂ꞌuanꞌ₂ ꞌniaꞌ₂, a₂lé₂ jmo₃ a₂tɨnꞌ₅₄ ꞌniaꞌ₂ a₂dse₃ a₂cha₂ quióꞌ₅, juɨ₁liaꞌ₂ a₂tɨn₅₄ ca₂le₃jɨ́n₃ dsa₂ i₂lë́₅ ꞌí₁ quiáin₅.
33 Tsá₃ ꞌe₂ ma₂ca₂rë₃ꞌɨ́n₂ dsɨ₃ a₂jmo₅₄ quió₃, juɨ₁liaꞌ₂ a₂cha₂ quióꞌ₅ i₂siánꞌ₂, on₃ guëꞌ₂ cu₄nióg₄, on₃ guëꞌ₂ cu₄tiog₂, on₃ guëꞌ₂ tsɨnꞌ₅₄ në́₃.
34 Ŋiꞌ₅₄ bá₄ ꞌniaꞌ₂ rë₂, të₂le₃ ma₂jmo₃ bá₄ ta₁ ꞌŋió₃ quianꞌ₅₄ gu₂-tag₃ ma₂ꞌno₃ a₂ꞌnióꞌ₅ dsɨ₃ŋɨ́g₂ quianꞌ₅₄ i₂quiangꞌ₅₄.
35 Ca₂le₃o₃ jmɨg₄ bá₄ ma₂ꞌë́₃ ꞌniaꞌ₂ ꞌa₂ liaꞌ₂ ꞌnióꞌ₅ jmo₃ dsa₂ ta₁, a₂ꞌnióꞌ₅ jme₃ꞌon₅₄ dsa₂ dsa₂ i₂ꞌnióꞌ₅ quióꞌ₅. Dsá₂ ꞌauꞌ₂ ꞌniaꞌ₂ jmo₄ jág₁ quióꞌ₅ Te₁guiꞌ₅₄ Jesús, jme₁ca₂juáꞌ₂: “Ja₂lɨn₃ guë́₄ dse₃ ꞌei₅ dsɨ́₅ dsa₂ i₂cuë₅, conꞌ₂ guë́₄ dsa₂ i₂gue₅.”
36 Jme₁ca₂dsan₃ juáꞌ₂ Pa₄ le₂në₅, ca₂chi₃jné₃ quiainꞌ₅₄ ca₂le₃jɨ́n₃ dsa₂, ca₂chi₃léinꞌ₂ Diú₄.
37 Ca₂le₃jɨ́in₃ qui₂ca₂ꞌo₃, qui₂ca₂jŋaiꞌ₃ Pa₄, ca₂chenꞌ₃ quióꞌ₅.
38 La₁ ja₂lɨn₃ guë́₄ ꞌliaꞌ₂ dsɨ́₅ dsa₂ ca₂tóinꞌ₂ jme₁ca₂juáꞌ₂ Pa₄, ca₂liaꞌ₂ o₁lɨ́gꞌ₂ jmɨg₄ tsá₃ ma₃jɨ́in₂ guë́₄ rɨinꞌ₅₄. Jaun₂ ca₂jme₃quiongꞌ₅₄ dsa₂, ca₂i₁join₅₄ Pa₄ të₂ ja₁ꞌei₅ nɨ₁barco.