Ca₂ŋáꞌ₃ Pa₄ juɨ₅ Jerusalén
21
Jme₁ca₂ténꞌ₂ dsɨ₅ jniaꞌ₅₄ dsa₂ rɨnꞌ₅₄, jaun₂ ca₂i₃náu₅ juɨ₅ ne₄ jmɨ₁ŋíꞌ₄ co₂dsau₅ të₂ Cos (a₂niog₅ jë₄ jmɨ₁ŋíꞌ₄). Jme₁jnia₃ jaun₂ táng₃, ca₂ŋag₅₄ ja₁chei₂ Rodas, jaun₂ guë́₄ dsi₃náu₅ jniaꞌ₅₄ juɨg₂ Pátara.
2 Juɨg₂ Pátara jaun₂, cane₅₄ táng₃ jniaꞌ₅₄ caun₂ nɨ₁barco a₂ŋó₃ juɨ₅ ꞌuë₃ Fenicia, jaun₂ ca₂tióꞌ₄ jniaꞌ₅₄, ca₂i₃náu₅ táng₃.
3 Jaun₂ ca₂ŋag₅₄ jniaꞌ₅₄ ja₁jniá₂ Chipre të₂le₃ gu₂ jen₅, jaun₂ ca₂i₃náu₅ jniaꞌ₅₄ të₂ Siria. Jaun₂ ca₂dsióg₃ nɨ₁barco juɨg₂ Tiro, ia₁ i₁con₂ lio₅₄ ja₁jaun₂. Jaun₂ ca₂sió₄ jniaꞌ₅₄ ja₁jaun₂.
4 Jaun₂ ca₂jenꞌ₂ jniaꞌ₅₄ dsa₂ ꞌén₂ rɨnꞌ₅₄ tiánꞌ₅ ja₁jaun₂. Jaun₂ ca₂tióꞌ₄ jniaꞌ₅₄ guio₃ jmɨg₄ quiainꞌ₅₄. Dsa₂ ꞌéi₂ në́₃, ca₂ꞌë́₂ jág₁ a₂ca₂cuë₃ Jme₂dsí₂ Jŋió₅, ca₂tsɨ́ꞌ₃ Pa₄ a₂tsá₃ dsi₂ten₅₄ dsó₃ juɨ₅ Jerusalén.
5 Jme₁ca₂dsɨn₃ guio₃ jmɨg₄ tioꞌ₅₄ jniaꞌ₅₄ jaun₂, jaun₂ ca₂ꞌuag₂ táng₃. Jaun₂ ca₂le₃jɨ́n₃ dsa₂ i₂ꞌén₂, quiainꞌ₅₄ ꞌio₅₄ quiáin₅, chiꞌ₂ quiáin₅ në́₃, ca₂jme₃quiongꞌ₅₄ të₂ ꞌnɨꞌ₂ juɨg₂, ca₂i₁jo₅₄ të₂ cheiꞌ₅₄ jmɨ₁ŋíꞌ₄. Ja₁jaun₂ ca₂chi₁jne₁ jniaꞌ₅₄ ca₂le₃jág₃, ca₂chi₁lenꞌ₄ jniaꞌ₅₄ Diú₄.
6 Jaun₂ qui₂ca₂chanꞌ₅₄ jniaꞌ₅₄ rɨnꞌ₅₄ ca₂ꞌeiꞌ₅₄ jág₁. Jaun₂ guë́₄ ca₂uɨg₅₄ jniaꞌ₅₄ ꞌŋióꞌ₃ nɨ₁barco. ꞌÉi₂ në́₃ ca₂i₃lein₃ bá₄ quióꞌ₅.
7 Jme₁ca₂ꞌuag₂ jniaꞌ₅₄ juɨg₂ Tiro, ca₂i₃náu₅ juɨ₅ ne₄ jmɨ₁ŋíꞌ₄ a₂ca₂i₃náu₅ juɨ₅ Tolemaida. Ca₂cuɨn₅₄ jniaꞌ₅₄ Diú₄ rɨnꞌ₅₄ i₂tiánꞌ₅ ja₁jaun₂, ca₂jŋia₄ jniaꞌ₅₄ co₂jmɨg₄ quiainꞌ₅₄.
8 Jme₁jnia₃ jaun₂, ca₂le₃jág₃ conꞌ₂ i₂quianꞌ₅₄ Pa₄ ca₂ꞌuag₂ ja₁jaun₂, ca₂dsi₃náu₅ juɨg₂ Cesarea. Ja₁jaun₂ ca₂i₁náu₄ jniaꞌ₅₄ ja₁quióꞌ₄ Felipe i₂ꞌë́₂ jág₁ dse₃, i₂lɨ́n₅ jan₂ rɨnꞌ₅₄ dsa₂ guion₃ i₂jme₂ꞌo₅₄a i₂ca₂quiónꞌ₂ dsa₂ le₂jŋiá₅.
9 Felipe ꞌéi₂ jme₁chan₂ quén₂ ja₁mɨ́g₄ on₃juaꞌ₅₄ i₂ma₂jenꞌ₂ gu₂. ꞌIo₅₄ quén₂ ꞌéi₂ jme₁ꞌë₂₃ ꞌë́ꞌ₅ dsa₂ jág₁ a₂cuë₅ Diú₄.
10 Ma₂ne₁ŋó₄ ca₂la₂ jmɨg₄ tioꞌ₅₄ jniaꞌ₅₄ jme₁ca₂dsióg₃ jan₂ dsa₂ i₂të́ꞌ₂ dsa₂ Agabo, i₂ꞌë́₂ jág₁ a₂cuë₅ Diú₄, a₂ca₂o₃jag₅₄ jniaꞌ₅₄.
11 Jaun₂ jme₁ca₂guan₃ ꞌéi₂ në́₃, ca₂can₃ lau₂ jénꞌ₅ túꞌ₅ Pa₄, jaun₂ qui₂ca₂ꞌnéi₂ mɨ₂tag₅₄ ꞌŋiog₅ quianꞌ₅₄ mɨ₂gu₂ në́₃. Jaun₂ ca₂juáꞌ₂:
―Le₂la₂ juáꞌ₂ Jme₂dsí₂ Jŋió₅: “Le₂la₂ jmo₃ dsa₂ judíos* jë₄ juɨg₂ Jerusalén jmáiꞌ₂ dsa₂ i₂quióꞌ₅ nɨ₁lau₂ la₂, jaun₂ jángꞌ₂ o₄gú₃ dsɨ₂nau₂.”
12 Jme₁ca₂néi₁ jniaꞌ₅₄ le₂në₅, jaun₂ ca₂mɨ́₁ jniaꞌ₅₄ quianꞌ₅₄ dsa₂ chan₂ Cesarea ca₂chei₅₄ Pa₄ a₂tsá₃ ma₃dsó₃ Jerusalén.
13 La₁ jaun₂ ca₂ŋag₃ Pa₄:
―¿ꞌE₂ lë₃ quɨꞌ₂-ꞌauꞌ₂ ꞌniaꞌ₂, jmoꞌ₂ ꞌniaꞌ₂ ꞌag₅ ꞌliaꞌ₂ dsɨ₃? Ia₁ ma₂rë₂ján₁ bá₄ jniá₂, on₃juaꞌ₅₄ jmáꞌ₃ ca₂ne₅₄ a₂ꞌnei₃ dsa₂. Ján₃ bá₄ ma₂ꞌei₅ caun₂ dsɨ₃ a₂jóng₂, jŋagꞌ₃ dsa₂ juɨg₂ Jerusalén, o₄quióꞌ₄ Te₁guiꞌ₅₄ Jesús.
14 Ia₁ tsá₃ jág₁ ca₂can₃ Pa₄ a₂ca₂chei₅₄ jniaꞌ₅₄ a₂tsá₃ dsó₃, jaun₂ ca₂jmó₁ jniaꞌ₅₄ tei₄ jme₁ma₂në₂juaꞌ₅₄:
―Juɨ₁le₅₄ bá₄ a₂ꞌŋio₂ dsɨ́₅ Te₁guiꞌ₅₄ jaun₂.
15 Cang₂ jaun₂ ca₂jmó₁ jniaꞌ₅₄ co₂jŋia₅₄ quián₂, ca₂tióꞌ₄ juɨ₅ i₃náu₅ juɨ₅ Jerusalén.
16 I₂lɨn₅₄ dsa₂ ꞌén₂ i₂chan₂ Cesarea ca₂jme₃quiongꞌ₅₄. Jë₄ jaun₂ ŋó₃ jan₂ dsa₂ i₂chen₂ Mnasón i₂chan₂ Chipre. Ma₂lɨ́gꞌ₂ bá₄ ma₂já₅ dsa₂ ꞌéi₂ a₂lɨ́in₅ dsa₂ i₂ꞌén₂. Ja₁quióꞌ₄ ꞌéi₂ ca₂i₁jŋia₄ jniaꞌ₅₄ Jerusalén.
Ca₂i₁jɨn₁ Pa₄ Jacobo
17 Jme₁ca₂dsi₃náu₅ jniaꞌ₅₄ juɨg₂ Jerusalén, jaun₂ rɨnꞌ₅₄ i₂tiánꞌ₅ ja₁jaun₂ ca₂guei₃ ca₂liaꞌ₂ ꞌioꞌ₂ jénꞌ₅.
18 Jme₁jnia₃ jaun₂, ŋó₃ Pa₄ quiainꞌ₅₄ jniaꞌ₅₄ a₂ca₂i₁jɨn₁ jniaꞌ₅₄ Jacobo. Ja₁quióꞌ₄ ꞌéi₂ jme₁tionꞌ₅₄ jɨn₂ guiꞌ₅₄ canꞌ₅₄.b
19 Jaun₂ qui₂ca₂cuag₃ Pa₄ Diú₄. Jaun₂ ca₂dsia₃ Pa₄ ca₂le₃jë́₃ ꞌe₂ a₂ma₂jmo₃ Diú₄ jɨn₄ dsɨ₂nau₂ të₂le₃ quianꞌ₅₄ ꞌéi₂.
20 Jme₁ca₂nág₂ dsa₂ jág₁, jaun₂ ca₂jme₃juɨinꞌ₂ Diú₄. Jaun₂ ca₂juáꞌ₂ ca₂tsɨ́ꞌ₃ Pa₄:
―Dse₃ jaun₂ rɨnꞌ₅₄ jniog₄, la₁ ŋiꞌ₅₄ bá₄ ꞌne₂, të₂le₃ mei₅ bá₄ dsa₂ judíos i₂ma₂ꞌén₂. Ca₂le₃jɨ́n₃ ꞌéi₂ në́₃, dsen₅₄ dsɨ́₅ le₃quióꞌ₅ ꞌÉiꞌ₃ Juáꞌ₅.
21 Jaun₂ ma₂juáꞌ₂ dsa₂ a₂ŋɨꞌ₂ ꞌne₂ jme₂tɨ́ngꞌ₁ dsa₂ judíos i₂tiánꞌ₅ go₄ dsɨ₂nau₂, a₂tsá₃ ma₃tónꞌ₂ juɨ₅, tsá₃ ma₃jme₃ti₃ ꞌéiꞌ₃ ca₂jmo₃ Moisés, a₂tsá₃ ma₃ti₃ dsa₂ nɨ₁lo₁* chiꞌ₂ dsa₂ ŋeꞌ₂ quiáin₅, on₃ guëꞌ₂ jmo₃ juɨ₁liaꞌ₂ tag₄ chíꞌ₅ quián₂ jniog₄.
22 ¿ꞌE₂ lé₂ në́₃? Ia₁ tion₅₄ ja₃lén₂ dsa₂ a₂ŋɨiꞌ₂ jë₁ma₂ca₂rë₃ŋi₅ a₂ꞌengꞌ₅₄ ja₁lá₃.c
23 Co₂ŋeiꞌ₅₄ guë́₄ dse₃ jmóꞌ₂ a₂juaꞌ₅₄ jniaꞌ₅₄ la₂: Chan₂ jë₄ la₂ quián₂ jniaꞌ₅₄ quén₂ dsa₂ i₂tion₅₄ niog₅ jme₃ti₃ caun₂ jág₁ quióꞌ₅ a₂ma₂cuë́ꞌ₃ Diú₄.
24 Jŋiai₅ juɨ₁dsi₂léin₂ quianꞌ₅₄ ꞌne₂, jmo₄ le₁jë́₃ quiángꞌ₂ quiainꞌ₅₄. Jaun₂ ꞌne₂ bá₄ quɨꞌ₅₄ ꞌliaꞌ₅₄ ia₁jaun₂ ma₂lé₂ jme₃ti₃ a₂chéi₃ jŋi₂ dsi₅₄, ia₁jaun₂ ca₂le₃jɨ́n₃ bá₄ dsa₂ le₃líꞌ₄ a₂tsá₃ dsau₅ jág₁ a₂dsia₅ dsa₂ a₂ꞌɨin₂₃ ꞌne₂. Jaun₂ le₃ŋi₅ dsa₂ a₂jme₂tiꞌ₅₄ bá₄ ꞌne₂ ján₃ conꞌ₂ lë́₅ ꞌÉiꞌ₃ Juáꞌ₅ quióꞌ₅ Moisés.d
25 La₁ ma₂ca₂chen₅₄ bá₄ jniaꞌ₅₄ si₂ ne₄ dsɨ₂nau₂, a₂ca₂chei₅₄ jniaꞌ₅₄ a₂tsá₃ lɨn₄ jmo₃ o₂i₁ dsɨ₅ quianꞌ₅₄ ꞌÉiꞌ₃ Juáꞌ₅,e a₂jŋiaꞌ₅₄ liaꞌ₂ tsá₃ quɨ́gꞌ₃ ŋɨ₄ jáꞌ₂ i₂ma₂cuɨn₃ dsa₂ diú₄ lag₄, on₃ guëꞌ₂ guë́ꞌ₃ jmɨ₂, on₃ guëꞌ₂ ŋɨ₄ jáꞌ₂ i₂güɨ́ꞌ₃ dsa₂ dsɨ₂lag₄, tsá₃ nióꞌ₃ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gu₂ në́₃.
Ca₂jŋaꞌ₃ dsa₂ Pa₄ i₁dsi₅ guáꞌ₅ templo
26 Jaun₂ ca₂jŋia₃ bá₄ Pa₄ dsa₂ quén₂ ꞌéi₂. Jme₁jnia₃ jaun₂ në́₃, Pa₄ quiainꞌ₅₄ dsa₂ quén₂ ꞌéi₂ ca₂jmo₃ le₁jë́₃ quióꞌ₅. Jaun₂ ca₂ꞌí₃ i₁dsi₅ guáꞌ₅ templo* ca₂i₁ꞌë́₄ jág₁ i₂lɨ́gꞌ₂ dsian₅ ta₁guio₃ jmɨg₄ a₂jmo₂₃ le₁jë́₃ quióꞌ₅, jë₁ma₂të́₂ rë₁dsɨ́nꞌ₂ dsa₂ jáꞌ₂ ne₄ ne₄chei₂ o₄quióꞌ₄ le₂jain₂ le₂jain₂.f
27 La₁ jme₁ja₂quián₃ dsɨnꞌ₅₄ ta₁guio₃ jmɨg₄ jaun₂, jan₂-on₃ dsa₂ judíos i₂chan₂ ꞌuë₃ Asia ca₂o₃léin₂, jaun₂ ca₂jɨ́in₂ Pa₄ i₁dsi₅ guáꞌ₅. I₂ꞌéi₂ ca₂jmo₃ ca₂tónꞌ₂ dsa₂ co₂mɨꞌ₅₄, jaun₂ ca₂jŋaꞌ₃ dsa₂ Pa₄.
28 Jaun₂ qui₂ca₂tóinꞌ₂ ca₂guióꞌ₃ ca₂juáꞌ₂:
―¡ꞌNiaꞌ₂ dsa₂ juɨg₂ Israel*, jme₁ꞌo₁ jniaꞌ₅₄! I₂la₂ bá₄ dsa₂ i₂ŋɨ́₄ lë₃ ŋɨ₅ ca₂le₃jë́₃ juɨg₂ jme₂tɨin₂₃ dsa₂ jág₁ ꞌlɨgꞌ₅₄ ja₁con₂ juɨg₂ go₄ jniog₄, a₂jme₂tɨin₂₃ dsa₂ a₂tsá₃ jme₃ti₃ dsa₂ ꞌÉiꞌ₃ Juáꞌ₅ quióꞌ₅ Moisés, a₂tsá₃ ꞌe₂ quen₅ guáꞌ₅ templo la₂ quián₂ jniog₄. Në₃ në́₃, ma₂në₂tióinꞌ₂ i₂lɨn₅₄ dsa₂ griegos* i₁dsi₅ guáꞌ₅ templo, a₂ma₂në₂jme₂ꞌióg₃ ja₁jŋió₅ la₂.
29 Juáꞌ₂ le₂në₅, ia₁ ma₂jág₂ dsa₂ le₂jŋiá₅ ma₂jɨ́in₂ Trófimo i₂chan₂ Efeso a₂i₂ŋɨ₅₄ quiainꞌ₅₄ Pa₄ jë₄ juɨg₂ Jerusalén, jaun₂ lɨ́in₂ a₂ma₂jŋia₃ Pa₄ ꞌéi₂ i₁dsi₅ guáꞌ₅.
30 Ta₁caun₂ juɨg₂ ca₂tónꞌ₂ dsa₂ co₂mɨꞌ₅₄, jaun₂ ca₂o₃lén₂ dsa₂ co₂chiꞌ₅₄. Jaun₂ ca₂jŋaꞌ₃ dsa₂ Pa₄ qui₂ca₂tsagꞌ₂ të₂le₃ ca₁ꞌné₄ i₁dsi₅ guáꞌ₅, jaun₂ ca₂jnéi₃ dsa₂ dsɨ₂juɨ₅ o₄ꞌné₄.
31 Jme₁ma₂ꞌnio₃ jme₁jŋɨiꞌ₃ bá₄ Pa₄ jme₁ca₂dsióg₃ jág₁ ca₂rë₃ŋi₅ juɨg₅₄ ꞌlióg₂ dsen₅₄, ca₂le₃jɨ́n₃ bá₄ dsa₂ juɨg₂ Jerusalén tioinꞌ₅₄ co₂mɨꞌ₅₄.
32 Dsɨ₂juɨ₅ jaun₂ ca₂ŋɨ́iꞌ₂ juɨg₅₄ ꞌlióg₂ quianꞌ₅₄ ca₂le₃jɨ́n₃ ꞌlióg₂ quiáin₅, ca₂i₃léin₂ co₂ꞌei₅ ja₁tionꞌ₅₄ dsa₂ co₂mɨꞌ₅₄. Jaun₂ dsɨ₂juɨ₅ jme₁ca₂jág₃ dsa₂ dsi₃lén₂ ꞌlióg₂ quiainꞌ₅₄ juɨg₅₄ ꞌlióg₂ dsen₅₄, jaun₂ ca₂téin₂ bá₄ Pa₄, ia₁ jme₁tioinꞌ₅₄ cuë₂₃.
33 Jaun₂ jme₁ca₂dsióg₃ juɨg₅₄ ꞌlióg₂ dsen₅₄, ca₂jŋaiꞌ₃ Pa₄ ca₂jmo₃ ꞌéiꞌ₃ ca₂ꞌnéi₂ ꞌlióg₂ quianꞌ₅₄ tɨn₃ ŋí₁ cadenas. Jaun₂ guë́₄ ca₂ŋɨ́iꞌ₃ dsa₂ ꞌein₂ ꞌéi₂ Pa₄, ꞌe₂ ca₂jmo₃.
34 Jaun₂ jma₃quén₅ qui₂ca₂guióꞌ₃ dsa₂ juɨg₂ le₂jain₂ le₂jain₂. Ca₂liaꞌ₂ jŋiaꞌ₅₄ tsá₃ ca₂ŋɨ́ꞌ₂ juɨg₅₄ ꞌlióg₂, ia₁ a₂ŋɨ́₄ chíꞌ₅ co₂mɨꞌ₅₄. Jaun₂ ca₂jmo₃ ꞌéiꞌ₃ ca₂tág₃ dsa₂ Pa₄ juɨ₅ ꞌné₅ ja₁tionꞌ₅₄ ꞌlióg₂.
35 Jme₁ja₂quián₃ dsi₁len₃ dsa₂ ja₁lë́₄ nɨ₁ta₅ ꞌné₅ ja₁tionꞌ₅₄ ꞌlióg₂, jaun₂ ca₂jiog₃ ꞌlióg₂ ca₂jŋiai₃ Pa₄ juɨ₅ gueiꞌ₅₄ ia₁ a₂ŋɨ́₄ ꞌŋio₅ lɨn₃ ꞌne₂ dsa₂ juɨg₂.
36 Ia₁ ca₂le₃jɨ́n₃ bá₄ dsa₂ juɨg₂ jme₁ja₂léin₂ chi₁coꞌ₅₄ qui₂guióꞌ₅ qui₂juáꞌ₂:
―¡Juɨ₁jon₅₄ i₂në₅!
Ca₂ton₃ Pa₄ jág₁ a₂lióin₂ ꞌŋiog₅ ne₄ dsa₂ juɨg₂
37 Jë₁jme₁ma₂toꞌ₂ ꞌlióg₂ toinꞌ₂ Pa₄ dsi₂néi₂ ne₄ta₁ quióꞌ₅, jaun₂ ca₂juáꞌ₂ Pa₄ ca₂tsɨ́ꞌ₃ juɨg₅₄ ꞌlióg₂ dsen₅₄:
―¿Lé₂ le₃juáꞌ₄ jniá₂ ca₂jon₄ jág₁?
Jaun₂ ca₂ŋag₃ juɨg₅₄ ꞌlióg₂:
―¿Tɨnꞌ₂ ꞌne₂ dsiáꞌ₁ jág₁ jmei₅ griego?
38 Jaun₂, ¿on₃juaꞌ₅₄ ꞌne₂ lɨ́ngꞌ₅ dsa₂ egipcio i₂ca₂jmo₃ mɨꞌ₅₄ qui₂ca₂tsɨ₂jain₃ dsa₂ ma₂i₁jáun₃, ca₂ꞌuɨ́inꞌ₂ quén₂ mei₅ dsa₂ i₂ma₂ca₂jme₃dsian₅ dsa₂ juɨ₅ ꞌuë₃ quein₂?
39 Jaun₂ ca₂juáꞌ₂ táng₃ Pa₄:
―Dsa₂ judío bá₄ lɨ́n₅ jniá₂, i₂chan₂ juɨg₂ Tarso, caun₂ juɨg₂ dsen₅₄ tén₅ ꞌuë₃ Cilicia. La₁ jmo₄ dse₃ ꞌauꞌ₂ cuë́ꞌ₁ jmɨg₄ a₂juɨg₅₄ jniá₂ dsa₂ juɨg₂ jág₁.
40 Ca₂cuë₃ bá₄ jmɨg₄ jaun₂ në́₃. Jaun₂ ca₂nau₂ Pa₄ ne₄ nɨ₁ta₅ jaun₂. Jaun₂ ca₂jmo₃ léi₄ quianꞌ₅₄ gu₂ ca₂tsɨ́ꞌ₃ dsa₂ a₂jmo₃ tei₄. Jme₁ma₂chíꞌ₅ tei₄, jaun₂ ca₂jme₃lióg₃ ca₂juáꞌ₂ jág₁ quianꞌ₅₄ jág₁ jmei₅ hebreo*,a ca₂tsɨ́ꞌ₃ dsa₂: