22
―ꞌNiaꞌ₂ dsa₂ go₂ rɨnꞌ₅₄ jniog₄, guiꞌ₅₄ canꞌ₅₄ në́₃, nei₂ deꞌ₂ ꞌniaꞌ₂ a₂juáꞌ₄ jniá₂ juɨg₅₄ ꞌniaꞌ₂ a₂jángꞌ₄ jág₁ dsau₅ quió₃.
2 Të₂le₃ tei₄ guë́₄ ca₂i₃lén₂ dsa₂ jme₁ca₂nág₂ a₂juáꞌ₂ Pa₄ quianꞌ₅₄ jág₁ jmei₅ hebreo.a Jaun₂ caun₂ ca₂juáꞌ₂ bá₄ ꞌéi₂:
3 ―Dsa₂ judío bá₄ lɨ́n₅ jniá₂. Juɨg₂ Tarso bá₄ chang₂, ja₁tén₄ ꞌuë₃ Cilicia. La₁ Jerusalén la₂ bá₄ ca₂i₃juɨngꞌ₂. Ca₂ꞌɨ₃ jniá₂ si₂ a₂ca₂jme₃tag₅ të₅ Gamaliel. Co₂rë₂ bá₄ ca₂jme₃tag₂₃ conꞌ₂ lë́₅ Si₂ ꞌÉiꞌ₃ quióꞌ₅ dsa₂ quián₂ jniog₄ ma₂lɨ́gꞌ₂. A₂dsen₅₄ dsɨ₃ jme₁lɨ́ng₄ le₃quióꞌ₅ Diú₄, juɨ₁liaꞌ₂ jmoꞌ₂ ꞌniaꞌ₂ ca₂le₃jɨ́ngꞌ₃ rë₂në́₃.
4 Qui₂ca₂co₃ꞌén₃ jniá₂ dsa₂ i₂tionꞌ₅₄ Juɨ₅* quióꞌ₅ Te₁guiꞌ₅₄ le₂jŋiá₅, ca₂liaꞌ₂ ca₂quɨ́n₂ ꞌmú₃ quióꞌ₅. Qui₂ca₂toinꞌ₂ ꞌné₅ ꞌmá₃ liaꞌ₂ dsa₂ ŋeꞌ₂ liaꞌ₂ dsa₂ mɨ́₂.
5 Lé₂ bá₄ jángꞌ₃ jág₁ dsau₅ jme₂dsa₂ dsen₅₄, ca₂le₃jɨ́n₃ guë́₄ dsɨ₂guiꞌ₅₄ canꞌ₅₄ në́₃, ia₁ guioin₅₄ bá₄ ca₂jángꞌ₃ si₂ jniá₂ a₂ca₂chein₃ ne₄ rɨinꞌ₅₄ i₂tiánꞌ₅ Damasco, ca₂jmo₃ ꞌéiꞌ₃ a₂jme₁i₁chánꞌ₃ jniá₂ rɨ́ngꞌ₃ i₂tiánꞌ₅ ja₁jaun₂, a₂jme₁të₁₂ le₁ꞌŋeiꞌ₅₄ ia₁jaun₂ gue₃ uɨg₅ jë₄ juɨg₂ Jerusalén la₂.
Ca₂dsia₃ Pa₄ ꞌa₂ liaꞌ₂ jme₁ca₂jéinꞌ₃ ca₂rë₃ꞌéin₂ jág₁ dse₃
6 ꞌLa₁ia₁ liaꞌ₂ conꞌ₂ jme₁ŋó₃ jniá₂ le₂ꞌi₄ juɨ₅ néꞌ₃ a₂dsióg₄ juɨg₂ Damasco, conꞌ₂ dsi₂ŋíꞌ₃, conꞌ₂ tsá₃ jáng₅ jme₁ca₂téng₃ caun₂ si₂ tág₅ jmáꞌ₅ a₂já₃ juɨ₅ gueiꞌ₅₄ i₂juɨ́g₃.
7 Jaun₂ i₃ꞌɨ́ng₃ ꞌuë₃. Dsɨ₂juɨ₅ le₂jaun₂ ca₂nag₃ jág₁ a₂juáꞌ₂: “Saulo, Saulo, ¿ꞌe₂ lë₃ co₂ꞌéinꞌ₅ jniá₂?”
8 Jaun₂ ca₂ŋag₄ jniá₂: “¿ꞌEin₂ ꞌne₂ guiꞌ₅₄?” Jaun₂ ca₂juáꞌ₂ tság₅ jniá₂: “Jesús chan₂ Nazaret bá₄ jniá₂ i₂co₂ꞌénꞌ₅ ꞌne₂.”
9 Ján₃ bá₄ ca₂jág₃ dsa₂ i₂jme₁quianꞌ₅₄ jniá₂ si₂ jaun₂, jaun₂ ca₂rë₃góꞌ₅. La₁ tsá₃ ca₂nág₂ jág₁ quióꞌ₅ i₂ca₂juáꞌ₂ ca₂tság₃ jniá₂.
10 Jaun₂ ca₂ŋag₄ jniá₂ jaun₂ në́₃: “Te₁guiꞌ₅₄, ¿ꞌe₂ ꞌnióꞌ₅ jmo₅₄ jniá₂?” Jaun₂ ca₂juáꞌ₂ Te₁guiꞌ₅₄: “Nau₂, gua₂ juɨ₅ juɨg₂ Damasco. Ja₁jaun₂ juáꞌ₂ dsa₂ ca₂le₃jë́₃ ꞌe₂ ꞌnióꞌ₅ jmóꞌ₂.”
11 Ia₁ co₂dsia₅ ca₂téng₂ bá₄ quianꞌ₅₄ si₂, jaun₂ dsa₂ i₂quiangꞌ₅₄ bá₄ ca₂jiog₃ le₁chanꞌ₂ gu₃ a₂ca₂dsióg₃ të₂ Damasco.
12 Ja₁jaun₂ jme₁guá₄ jan₂ dsa₂ chen₂ Ananías, i₂jme₁jme₂ti₃ conꞌ₂ lë́₅ Si₂ ꞌÉiꞌ₃ Juáꞌ₅ quióꞌ₅ Moisés, jaun₂ ca₂le₃jɨ́n₃ dsa₂ judíos* i₂tiánꞌ₅ Damasco ca₂juáꞌ₂ dse₃ ꞌɨin₂₃ ꞌéi₂.
13 Jaun₂ ca₂dsióg₃ Ananías i₁jag₅₄ ja₁jme₁ꞌeng₅₄. Jme₁ca₂dsióg₃, ca₂juáꞌ₂: “Saulo rɨnꞌ₅₄ jniog₄, gueiꞌ₅₄ táng₃ jme₁neꞌ₄.” Dsɨ₂juɨ₅ jaun₂ bá₄ ca₂lág₃ táng₃ mɨ́g₂ ne₃, jaun₂ ca₂jɨin₅₄ jaun₂ në́₃.
14 Jaun₂ ca₂tság₃ táng₃ jniá₂: “Diú₄ quián₅ dsa₂ canꞌ₅₄ quián₂ jniog₄ ma₂ca₂quióinꞌ₂ ꞌne₂ le₂jŋiá₅, ia₁jaun₂ le₃cuɨngꞌ₂ ꞌe₂ jaun₂ a₂ꞌŋio₂ dsɨ́₅, ia₁jaun₂ jɨngꞌ₅₄ i₂qui₂dsɨ₅ ꞌéiꞌ₃ rë₂ quiáin₅, ia₁jaun₂ nágꞌ₁ jág₁ quióꞌ₅ ꞌŋiog₅ a₂tioꞌ₅₄ mɨ₂ꞌo₅₄.
15 Jaun₂ ꞌne₂ gogꞌ₅₄ a₂chi₂o₁ꞌɨ́inꞌ₃ o₁dsiaꞌ₄ o₁cheiꞌ₄ ca₂le₃jɨ́n₃ dsa₂ ca₂le₃jë́₃ ꞌe₂ ma₂jagꞌ₅₄ ꞌe₂ qui₂ma₂neiꞌ₂ në́₃.
16 Jaun₂ në́₃, tsá₃ ma₃jme₁ꞌag₁₂. Nau₂, o₂chon₅₄ jmɨg₂, mɨ₄ ne₄ ꞌéi₂, ia₁jaun₂ jŋí₃ dsáuꞌ₂.”
Ca₂dsia₃ Pa₄ ꞌa₂ liaꞌ₂ ca₂lë₃ a₂chein₅₄ ŋei₅₄ ja₁con₂ dsɨ₂nau₂
17 ꞌJme₁ca₂guángꞌ₃ Jerusalén, ŋeg₅₄ guáꞌ₅ templo* i₂chi₁lengꞌ₄ Diú₄. Jaun₂ a₂lë₁ca₂jéin₃ ca₂jág₃,
18 ca₂jɨng₅₄ Te₁guiꞌ₅₄, jaun₂ ca₂juáꞌ₂: “I₂ŋáuꞌ₂ jú₅ të₂le₃ dséi₂ juɨg₂ Jerusalén, ia₁ tsá₃ tónꞌ₂ dsa₂ juɨ₅ jág₁ a₂juɨgꞌ₅₄ a₂ꞌágꞌ₄ jniá₂.”
19 Jaun₂ ca₂ŋag₄ jniá₂ ca₂juɨ́g₂: “Te₁guiꞌ₅₄, ca₂le₃jɨ́n₃ bá₄ dsa₂ ꞌéi₂ le₁ŋi₅ a₂jme₁ŋɨ₅ jniá₂ a₂jme₁nei₂₃ ca₂le₃jë́₃ guáꞌ₅ sinagogas* a₂co₂ꞌéng₅ qui₂cuë́₅ ca₂le₃jɨ́n₃ dsa₂ i₂ꞌén₂ jág₁ dse₃ quiángꞌ₂, a₂jme₁i₂tioinꞌ₂ ꞌné₅ ꞌmá₃.
20 Jme₁ca₂jŋɨꞌ₃ dsa₂ Esteban, dsa₂ i₂jme₁jángꞌ₅ jág₁ dsau₅ quiángꞌ₂, jaun₂ bá₄ jme₁chénꞌ₄ jniá₂ ján₃, ia₁ jme₁lë́₄ caun₂ jág₁ quió₃ quianꞌ₅₄ dsa₂ i₂ca₂jŋɨꞌ₃ ꞌéi₂. Jaun₂ ca₂jmo₃ jniá₂ ꞌí₁ nɨ₁tsɨnꞌ₅₄ dsa₂ i₂ca₂jŋagꞌ₃.”
21 La₁ jaun₂ ca₂juáꞌ₂ Te₁guiꞌ₅₄ ca₂tság₃ jniá₂: “La₁ gua₂, ia₁ tsag₅₄ jniá₂ uɨ́ng₂ quiángꞌ₂, a₂o₁ꞌë́ꞌ₃ jág₁ ja₁con₂ dsɨ₂nau₂.”
Ma₂niog₅ ne₄ juɨg₅₄ ꞌlióg₂ bá₄ Pablo
22 Co₂jaun₂ bá₄ ca₂nág₂ dsa₂ juɨg₂. Jaun₂ ca₂jme₃lióg₃ ca₂tóinꞌ₂ co₂mɨꞌ₅₄ ca₂guióꞌ₃ ca₂juáꞌ₂:
―¡Juɨ₁jon₅₄ i₂në₅! ¡Tsá₃ ma₃ꞌnióꞌ₅ le₃chain₂ guë́₄!
23 Jaun₂ dsa₂ juɨg₂ në́₃, caun₂ qui₂ca₂të₂ca₂ꞌoinꞌ₂ bá₄ Pa₄, qui₂ca₂gág₃ tsɨnꞌ₅₄ tioinꞌ₅₄,b qui₂ca₂cho₃ dsa₂ ꞌliog₂ juɨ₅ gueiꞌ₅₄.
24 Jaun₂ ca₂jmo₃ juɨg₅₄ ꞌlióg₂ dsen₅₄ ꞌéiꞌ₃ ca₂toinꞌ₂ Pa₄ dsi₂néi₂ ja₁tionꞌ₅₄ dsɨ₂ꞌlióg₂. Jaun₂ ca₂jmo₃ ꞌéiꞌ₃ a₂báin₂ Pa₄ ia₁jaun₂ jmo₃ jág₁ ꞌe₂ dso₄ rɨin₂, ꞌe₂ ꞌuɨg₅₄ ca₂rë₃ꞌné₃ dsa₂ juɨg₂ quiongꞌ₅₄.
25 La₁ jme₁ma₂rë₂ꞌŋeiꞌ₅₄ a₂jme₁ma₂bóg₂ dsa₂, ca₂juáꞌ₂ Pa₄ ca₂tsɨ́ꞌ₃ jan₂ juɨg₅₄ ꞌlióg₂ i₂chénꞌ₅ cau₅:
―¿Ca₂tɨ́nꞌ₂ ꞌniaꞌ₂ bángꞌ₄ jan₂ dsa₂ i₂tén₅ Roma* të₃ tsá₃ ma₂në₂quionꞌ₂ ꞌniaꞌ₂ jág₁ dsau₅ quióꞌ₅?
26 Jme₁ca₂nág₂ juɨg₅₄ ꞌlióg₂ a₂në₅, jaun₂ ca₂ŋei₅₄ i₁chiꞌ₂ juɨg₅₄ dsen₅₄ quiáin₅ ca₂juáꞌ₂:
―Të₃ŋiꞌ₅₄ quiángꞌ₂ në₁juaꞌ₂ ꞌe₂ ca₂jmagꞌ₅₄ dsa₂ në₅, ia₁ dsa₂ tén₅ Roma bá₄ në₅.
27 Jaun₂ ca₂jme₃quián₃ juɨg₅₄ ꞌlióg₂ dsen₅₄ ja₁ꞌen₅₄ Pa₄, jaun₂ ca₂ŋag₃:
―¿Dsónꞌ₂ lɨ́nꞌ₅ ꞌne₂ dsa₂ tén₅ Roma?
Jaun₂ ca₂ŋag₃ táng₃ Pa₄:
―Ján₅.
28 Jaun₂ ca₂juáꞌ₂ juɨg₅₄ ꞌlióg₂ jaun₂ në́₃:
―ꞌLióng₂ cu₄ ca₂quɨ́n₂ quió₃ a₂ca₂lɨng₃ dsa₂ tén₅ Roma.
Jaun₂ ca₂juáꞌ₂ táng₃ Pa₄:
―La₁ jniá₂ në́₃, a₂ma₂lɨ́n₅ bá₄ jniá₂ liaꞌ₂ conꞌ₂ ca₂rë₃cháng₃.
29 Dsɨ₂juɨ₅ jme₁ca₂nág₂ dsa₂ i₂jme₁bán₂ Pa₄, jaun₂ ca₂i₃léin₂ cau₅, ján₃ bá₄ le₂jaun₂ juɨg₅₄ ꞌlióg₂ dsen₅₄ në́₃. Ia₁ jme₁ca₂rë₃ŋi₅ a₂lɨ́n₅ Pa₄ dsa₂ tén₅ Roma, ca₂rë₃góꞌ₅ bá₄ jaun₂ në́₃ ia₁ a₂ca₂ꞌneiꞌ₂ Pa₄.
Ma₂chénꞌ₅ Pa₄ ne₄ dsɨ₂tan₅₄ quián₅ dsa₂ judíos
30 Jme₁jnia₃ jaun₂, jme₁ꞌnio₃ le₃ŋi₅ juɨg₅₄ ꞌlióg₂ dsen₅₄ ꞌe₂ ꞌuɨg₅₄ jme₁cuë́ꞌ₅ dsa₂ judíos* dso₄ Pa₄. Jaun₂ ca₂chéinꞌ₂ ꞌéi₂ ia₁ a₂jme₁chi₁ꞌŋeiꞌ₅₄ quianꞌ₅₄ nɨ₁ŋí₁ cadenas. Jaun₂ ca₂jmo₃ ꞌéiꞌ₃ a₂ŋɨꞌ₂ juɨg₅₄ jme₂dsa₂ quianꞌ₅₄ ca₂le₃jɨ́n₃ dsɨ₂tan₅₄ quián₅ dsa₂ judíos. Jaun₂ guë́₄ ca₂dsein₂₃ Pa₄ ca₂cheiꞌ₃ ne₄ dsa₂ ꞌéi₂.