23
Jme₁ma₂chénꞌ₅ Pa₄ ne₄ dsɨ₂tan₅₄ quián₅ dsa₂ judíos, jaun₂ ca₂jɨ́in₂ ca₂le₃jɨ́n₃ dsa₂ canꞌ₅₄ ꞌéi₂, jaun₂ ca₂juáꞌ₂:
―Rɨnꞌ₅₄ jniog₄, tei₄ bá₄ ꞌei₅ dsɨ₃ ma₂guio₃, chang₂ të₂ jmɨg₄ në₃, ne₄ Diú₄.
2 Jaun₂ Ananías, i₂lɨ́n₅ jme₂dsa₂ dsen₅₄, ca₂tsɨ́ꞌ₃ dsa₂ i₂jme₁tión₂ cau₅ quióꞌ₅ Pa₄, a₂jnáu₃ mɨ₂ꞌo₄ ꞌéi₂.
3 Jaun₂ ca₂ŋag₃ Pa₄ ca₂tsɨ́ꞌ₃ jme₂dsa₂ dsen₅₄ ꞌéi₂:
―¡Diú₄ jnáu₃ quiángꞌ₂ ꞌŋiagꞌ₂, ꞌne₂ i₂lɨ́ngꞌ₅ liaꞌ₂ lë́₅ caun₂ nɨ₁ꞌiaꞌ₂ a₂jŋiaꞌ₅₄ jniá₂ tiog₂ të₂le₃ coꞌ₅₄!a ¿ꞌŊéiꞌ₂ ꞌne₂ ja₁në₅ qui₂dsɨ́ꞌ₁ ꞌéiꞌ₃ ja₁con₂ jniá₂ conꞌ₂ lë́₅ Si₂ ꞌÉiꞌ₃? ¿Jaun₂ ꞌe₂ lë₃ jmoꞌ₂ ꞌéiꞌ₃ a₂cuë₃ dsa₂ jniá₂, tonꞌ₂ tsá₃ le₂jaun₂ ta₁ quíꞌ₅ Si₂ ꞌÉiꞌ₃?
4 Jaun₂ ca₂ŋag₃ dsa₂ i₂tionꞌ₅₄ guë́₄ ja₁jaun₂:
―¿ꞌE₂ lë₃ ŋagꞌ₅₄ le₂në₅ ne₄ jme₂dsa₂ dsen₅₄ quián₅ Diú₄?
5 Ca₂ŋag₃ táng₃ Pa₄:
―Rɨnꞌ₅₄ jniog₄, tsá₃ jaun₂ guion₅₄ a₂lɨ́in₅ jme₂dsa₂ dsen₅₄. Ia₁ juáꞌ₂ ne₄ Si₂ quióꞌ₅ Diú₄: “Tsá₃ chi₁ꞌɨ́ngꞌ₄ ꞌlɨgꞌ₅₄ dsɨ₂tan₅₄ juɨg₂ goꞌ₅₄.”b
6 Jaun₂ ca₂rë₃líꞌ₄ Pa₄, i₂lɨn₅₄ dsa₂ ꞌéi₂ lɨ́n₅ dsa₂ saduceos*, i₂lɨn₅₄ guëꞌ₂ lɨ́n₅ dsa₂ fariseos*. Jaun₂ guë́₄ ca₂juáꞌ₂ Pa₄ tiá₂, ca₂tsɨ́ꞌ₃ dsa₂:
―Rɨnꞌ₅₄ jniog₄, dsa₂ fariseo bá₄ lɨ́n₅ jniá₂. Fariseos bá₄ jme₁lɨ́n₄ dsa₂ canꞌ₅₄ quiáng₃ në́₃. ꞌUɨg₅₄ ia₁ a₂ꞌéng₂ jág₁ a₂jenꞌ₅₄ táng₃ ꞌlag₄ bá₄ a₂ꞌiog₅₄ dsa₂, a₂con₂ dsa₂ jág₁ dsau₅ chéngꞌ₅ la₂.
7 Jme₁ca₂juáꞌ₂ Pa₄ le₂në₅, dsa₂ i₂lɨ́n₅ fariseos, quianꞌ₅₄ dsa₂ i₂lɨ́n₅ saduceos në́₃, ca₂jme₃lióg₃ qui₂ca₂tsɨ́in₂ guioin₅₄, ca₂lë₃ le₁dsoinꞌ₅₄.
8 Ia₁ dsa₂ saduceos, tsá₃ ꞌe₂ ꞌéin₂ a₂jenꞌ₅₄ dsa₂ jë₁ma₂dsain₃, on₃ guëꞌ₂ ꞌéin₂ a₂chan₂ ángeles*, on₃ guëꞌ₂ ꞌéin₂ a₂chan₂ jme₂dsí₂. La₁ dsa₂ fariseos guëꞌ₂ në́₃, ꞌéin₂ bá₄ ca₂le₃jë́₃ a₂jaun₂.
9 Jaun₂ ca₂tóinꞌ₂ ca₂tsɨ́in₂ co₂mɨꞌ₅₄. Jaun₂ i₂lɨn₅₄ dsa₂ i₂lɨ́n₅ të₅juáꞌ₅ i₂tión₂ të₂le₃ quióꞌ₅ dsa₂ fariseos, ca₂nau₂ ca₂juáꞌ₂:
―ꞌI₁caun₂ ꞌlɨgꞌ₅₄ tsá₃ ꞌe₂ ma₂jmo₃ dsa₂ në₅. ¿ꞌE₂ lé₂ chi₂juaꞌ₂ dsónꞌ₂ bá₄ ca₂juáꞌ₂ jan₂ ángel, o₃ jan₂ jme₂dsí₂ ꞌe₂, ca₂tsɨ́ꞌ₃ i₂në₅?
10 Jaun₂ ꞌŋio₅ ca₂tónꞌ₂ dsa₂ ca₂tsɨ́in₂, ca₂liaꞌ₂ ca₂rë₃góꞌ₅ juɨg₅₄ ꞌlióg₂ dsen₅₄ jme₁ca₂jág₃. Ia₁ në₅ tsá₃ ma₂jmo₃ dsa₂ jma₃quén₅ quióꞌ₅ Pa₄, lɨ́in₂. Jaun₂ ca₂jmo₃ ꞌéiꞌ₃ ca₂o₃lén₂ ꞌlióg₂ ca₂dsein₂₃ Pa₄ jë₄ quióꞌ₅ dsa₂, ca₂tág₃ juɨ₅ ne₄ta₁ ja₁tionꞌ₅₄ ꞌlióg₂.
11 Jme₁ca₂të́₂ tɨn₃ nei₅ ꞌen₅₄ Pa₄ ja₁jaun₂,c ca₂jme₃jnia₅ Te₁guiꞌ₅₄ ne₅₄, jaun₂ ca₂juáꞌ₂:
―Quenꞌ₂ bí₂, Pa₄, ia₁ juɨ₁liaꞌ₂ ma₂në₂jangꞌ₅₄ jág₁ dsau₅ në₂ꞌagꞌ₅₄ jniá₂ jë₄ juɨg₂ Jerusalén la₂, le₂në₅ bá₄ o₁jangꞌ₁ jág₁ dsau₅ o₁ꞌágꞌ₃ jniá₂ jë₄ juɨg₂ Roma ján₃.
Ca₂jmo₃ dsa₂ judíos jág₁ a₂jme₁jŋɨiꞌ₃ Pa₄
12 Jme₁jnia₃ jaun₂, ca₂jmo₃ jág₁ i₂lɨn₅₄ dsa₂ judíos a₂jŋɨiꞌ₃ Pa₄. Ca₂ꞌɨin₃ Diú₄ a₂ca₂juáꞌ₂ a₂tsá₃ ꞌe₂ guë́ꞌ₃, a₂tsá₃ ꞌe₂ ꞌɨ́nꞌ₂ në́₃, ca₂liaꞌ₂ ca₂lë₃ a₂niog₅ dsɨ́₅ jmo₃.
13 Jme₁lë́₂ lë́₅ guë́₄ conꞌ₂ të₂lón₃ dsa₂ i₂jme₁ma₂lɨ́ꞌ₅ jág₁ jmo₃ le₂jaun₂.
14 Jaun₂ ca₂i₁lein₅₄ i₁jɨin₅₄ juɨg₅₄ jme₂dsa₂, ca₂le₃jɨ́n₃ guë́₄ guiꞌ₅₄ canꞌ₅₄ quián₅ dsa₂ judíos në́₃, a₂ca₂i₁juaꞌ₁:
―Jniaꞌ₅₄ ma₂ꞌɨ́n₃ Diú₄ a₂tsá₃ ꞌe₂ tí₄ ꞌo₄, ca₂liaꞌ₂ ma₂në₂jŋɨ́ꞌ₄ jniaꞌ₅₄ Pa₄.
15 Jaun₂ ꞌniaꞌ₂ në́₃, quianꞌ₅₄ dsɨ₂tan₅₄ quián₅ guáꞌ₅, o₂cheiꞌ₅₄ ꞌniaꞌ₂ juɨg₅₄ ꞌlióg₂ a₂ja₂jŋiai₃ Pa₄ neꞌ₅₄ ꞌniaꞌ₂ ꞌióg₃. A₂lë₁juɨgꞌ₅₄ bá₄ ꞌniaꞌ₂ a₂caunꞌ₅₄ jág₁ dsau₅ co₂rë₂ quióꞌ₅, ia₁jaun₂ bá₄ ja₃jiog₃. Jaun₂ jniaꞌ₅₄ guëꞌ₂ në́₃, ma₂lág₅ co₂jŋia₅₄ a₂jŋɨ́iꞌ₄ néꞌ₃ a₂guáin₂ të₂la₂.
16 La₁ ja₁ŋiꞌ₅₄ ꞌio₅₄ rɨnꞌ₅₄ Pa₄ ca₂rë₃ŋi₅ jág₁ jaun₂. Jaun₂ ca₂ŋei₅₄ ne₄ta₁ quióꞌ₅ ꞌlióg₂ ca₂i₁ꞌë́₄ jág₁ ne₄ Pa₄.
17 Jaun₂ Pa₄ në́₃ ca₂të́ꞌ₃ jan₂ juɨg₅₄ ꞌlióg₂, jaun₂ ca₂juáꞌ₂:
―Jŋia₅ chiꞌ₂ la₂ ne₄ juɨgꞌ₂ ꞌniaꞌ₂, ia₁ cha₂ jág₁ quian₅ dsɨ₃ꞌë́₃.
18 Jaun₂ ca₂ŋe₄ ꞌéi₂ ca₂i₁jŋiai₃ chiꞌ₂, jaun₂ ca₂juáꞌ₂:
―Pa₄ i₂lë́₅ ꞌí₁ quián₅ ꞌlióg₂ në₂té₂ jniá₂ a₂në₂mɨ₃ a₂i₁jŋiag₂ chiꞌ₂ la₂, ia₁ cha₂ jág₁ quian₅ a₂ꞌë́₂ neꞌ₅₄.
19 Jaun₂ ca₂jŋaꞌ₃ juɨg₅₄ ꞌlióg₂ dsen₅₄ ꞌéi₂ mɨ₂gu₂ chiꞌ₂ ꞌéi₂, conꞌ₂ ca₂jiog₃ cau₅, jaun₂ ca₂ŋag₃:
―¿ꞌE₂ jág₁ quianꞌ₅₄ juɨgꞌ₅₄ jniá₂?
20 Jaun₂ ca₂ŋag₃ chiꞌ₂ ꞌéi₂:
―Ma₂në₂jmo₃ dsa₂ judíos caun₂ jág₁ a₂mɨ₃ neꞌ₅₄ a₂o₁jŋiagꞌ₂ Pa₄ ꞌióg₃ ne₄ dsɨ₂tan₅₄ quián₅ dsa₂ judíos. A₂ꞌnio₃ jme₃gain₂₃ ꞌne₂ jmo₃ në₂jag₄ bá₄ a₂con₂ dsɨ₂tan₅₄ jág₁ dsau₅ quióꞌ₅ ꞌéi₂.
21 La₁ tsá₃ o₁ꞌengꞌ₅₄, ia₁ lë́₅ guë́₄ të₂lón₃ dsa₂ quiáin₅ ma₂le₁ꞌmai₅₄ cau₅ juɨ₅ le₁jŋiog₂₃. Ma₂ꞌɨin₃ Diú₄ a₂tsá₃ ꞌe₂ guë́ꞌ₃, ꞌɨ́nꞌ₂, ca₂liaꞌ₂ ca₂jŋɨiꞌ₃ Pa₄. Jŋiaꞌ₅₄ liaꞌ₂ a₂jaun₂ bá₄ le₁jŋia₂₃ chi₂juaꞌ₂ ꞌe₂ jág₁ juɨgꞌ₅₄ ꞌne₂.
22 Jaun₂ ca₂ꞌágꞌ₃ jág₁ juɨg₅₄ dsen₅₄ ꞌéi₂, ca₂juáꞌ₂ a₂tsá₃ ꞌein₂ tsɨ́ꞌ₃ jág₁ a₂ca₂dsia₃ jaun₂.
Ca₂dsiánꞌ₂ dsa₂ Pa₄ ne₄ Dsi₄máꞌ₂ Félix
23 Jaun₂ ca₂të́ꞌ₃ juɨg₅₄ ꞌlióg₂ dsen₅₄ on₃ juɨg₅₄ ꞌlióg₂ quiáin₅, ca₂jmo₃ ꞌéiꞌ₃ a₂jmo₃ ꞌéi₂ co₂jŋia₅₄ tɨn₃ ꞌŋiá₂-lón₂ ꞌlióg₂ a₂dsɨ₃léin₂ juɨ₅ tag₅₄; ꞌnagꞌ₂ ne₂guión₂ rë₂dsɨ́₂ guian₃ guëꞌ₂ (70) dsɨ₃lén₂ co₁dsɨn₅₄ cua₁, tɨn₃ ꞌŋia₂-lón₂ guëꞌ₂ i₂cán₂ ŋí₁ chenꞌ₂, a₂dsɨ₃léin₂ juɨ₅ Cesarea conꞌ₂ hora ŋí₁ ŋi₃ le₃ca₂nei₂.d
24 Jaun₂ ca₂chein₃ jág₁ a₂jmo₃ dsa₂ co₂jŋia₅₄ cua₁ i₂co₃dsɨn₅₄ Pa₄. Ca₂jmo₃ ꞌéiꞌ₃ a₂jmo₃ dsa₂ ꞌí₁, dsɨ₃jóin₂ ꞌéi₂ o₄gú₃ Dsi₄máꞌ₂ Félix të₂dsein₃ jéinꞌ₃ le₂jaun₂.
25 Jaun₂ quianꞌ₅₄ dsa₂ i₂i₁jon₅₄ Pa₄, ca₂chen₃ juɨg₅₄ dsen₅₄ si₂ la₂ a₂juáꞌ₂:
26 Jniá₂, Claudio Lisias, tsɨ́ng₂ si₂ la₂ neꞌ₅₄ ꞌne₂, guiꞌ₅₄ Dsi₄máꞌ₂ juɨnꞌ₂ Fé₁. Cuɨ́ng₅ Diú₄ ꞌne₂.
27 Ca₂jŋauꞌ₃ dsa₂ judíos ca₂jŋaiꞌ₃ dsa₂ në₅, a₂jme₁jŋagꞌ₃. La₁ jme₁ca₂rë₃guion₅₄ a₂lɨ́in₅ dsa₂ tén₅ Roma, jaun₂ ca₂ŋeg₅₄ i₁lioin₁₂ quianꞌ₅₄ ꞌlióg₂ quiáng₃.
28 Ia₁ jme₁ꞌnio₃ le₃guion₅₄ ꞌe₂ ꞌuɨg₅₄ ꞌnag₅ dsa₂, jaun₂ ca₂i₁jŋiái₂ ne₄ dsɨ₂tan₅₄ quiáin₅.
29 Jaun₂ ca₂rë₃léi₄ jniá₂, ꞌuɨg₅₄ quióꞌ₅ Si₂ ꞌÉiꞌ₃ quióꞌ₅ guion₅₄ bá₄ dsa₂, cuë́ꞌ₅ i₂në₅ dso₄. Jaun₂ tsá₃ cha₂ ꞌe₂ lë₃ juaꞌ₅₄ a₂ꞌi₄ ꞌéiꞌ₃ a₂jŋagꞌ₃ dsa₂, on₃ guëꞌ₂ dsi₂ten₅₄ juaꞌ₅₄ a₂ꞌí₂ ꞌné₅ ꞌmá₃ në́₃.
30 Jaun₂ jme₁ca₂rë₃guion₅₄ a₂ma₂jmo₃ dsa₂ judíos caun₂ jág₁ a₂jŋagꞌ₃, jaun₂ bá₄ lë₃ dsiainꞌ₄ jniá₂ o₄gogꞌ₂ ꞌne₂. Jaun₂ ma₂juɨ́g₂ bá₄ jniá₂ ján₃, dsa₂ i₂ꞌnag₅ ꞌnɨ₅ i₂në₅, a₂dsɨ₃léin₂ neꞌ₅₄ ꞌne₂, a₂dsɨ₃can₅ dso₄ a₂bóinꞌ₂ i₂në₅. Co₂në₅ bá₄.
31 Jaun₂ ꞌlióg₂ në́₃, conꞌ₂ lë́₅ ꞌéiꞌ₃ ma₂ŋɨi₂, ca₂dsein₂₃ Pa₄ ca₂tág₃ të₃ ꞌuë₂ ca₂dsi₃léin₂ të₂ juɨg₂ Antípatris.
32 Jme₁jnia₃ jaun₂, ꞌlióg₂ i₂i₃lén₂ juɨ₅ tag₄ ca₂jéinꞌ₃ táng₃ juɨ₅, ja₂lein₃ táng₃. Jmáꞌ₃ ꞌlióg₂ i₂co₁dsɨn₅₄ cua₁ bá₄ ca₂i₃lén₂ i₃jón₂ guë́₄ Pa₄.
33 Jme₁ca₂dsi₃léin₂ të₂ juɨg₂ Cesarea, jaun₂ ca₂jɨ́inꞌ₃ dsi₄máꞌ₂ si₂ carta a₂quian₅. Ca₂jɨ́inꞌ₂ Pa₄ në́₃.
34 Jme₁ma₂në₂ꞌí₂ dsi₄máꞌ₂ si₂, jaun₂ ca₂ŋɨ́iꞌ₃ Pa₄ a₂jáꞌ₄ chain₂. Jme₁ca₂rë₃ŋi₅ a₂chan₂ ꞌéi₂ ꞌuë₃ Cilicia,
35 jaun₂ ca₂juáꞌ₂:
―Në₅ nag₅₄ jág₁ quiángꞌ₂ jë₁ma₂o₂lén₂ dsa₂ i₂ꞌnag₅ quiángꞌ₂.
Jaun₂ ca₂jmo₃ dsi₄máꞌ₂ ꞌéiꞌ₃ a₂jmo₃ ꞌlióg₂ ꞌí₁ Pa₄ dsi₂néi₂ ne₄ta₁ palacio quióꞌ₅ Rag₅₄ Herodes.