Ca₂jángꞌ₃ Pa₄ jág₁ dsau₅ a₂lióin₂ ꞌŋiog₅ ne₄ Dsi₄máꞌ₂ Fé₁
24
A₂ꞌŋiá₂ jmɨg₄ cang₂ jaun₂, ca₂dsióg₃ Ananías i₂lɨ́n₅ jme₂dsa₂ dsen₅₄, quiainꞌ₅₄ i₂lɨn₅₄ guiꞌ₅₄ canꞌ₅₄ në́₃, quiainꞌ₅₄ Tértulo i₂lɨ́n₅ i₂chénꞌ₅ ne₄ jág₁ quiáin₅, ca₂dsi₃léin₂ Cesarea. Jaun₂ ca₂dsi₃léin₂ ne₄ dsi₄máꞌ₂ a₂ꞌnɨi₃ Pa₄.
2 Jme₁ca₂i₁quian₅₄ dsa₂ Pa₄, jaun₂ ca₂jme₃lióg₃ Tértulo ca₂tsɨ́ꞌ₃ dsi₄máꞌ₂ a₂ꞌnɨi₂₃ Pa₄, ca₂juáꞌ₂:
―Ti₁ꞌmagꞌ₄ ꞌne₂, tei₄ bá₄ ꞌei₅ tioꞌ₅₄ jniaꞌ₅₄, jaun₂ dse₃ bá₄ liaꞌ₂ conꞌ₂ lë́₅ ꞌéiꞌ₃ quiángꞌ₂ a₂tɨngꞌ₂.
3 Jaun₂ conꞌ₂ lë́₅ ꞌéiꞌ₃ quíꞌ₂ ꞌne₂ bá₄ qui₂jmo₅ dsa₂, a₂jmo₂ jniaꞌ₅₄ ján₃. Jaun₂ cuë₂ jniaꞌ₅₄ ti₁ꞌmagꞌ₄ ꞌne₂, Fé₁ juɨnꞌ₂.
4 La₁ jaun₂ tsá₃ uë́₂ jme₁ꞌag₁₂ jniaꞌ₅₄ quiángꞌ₂, mɨ₂ jniaꞌ₅₄ jmóꞌ₂ dse₃ ꞌauꞌ₂ a₂nágꞌ₁ jág₁ quián₂ jniaꞌ₅₄ a₂juaꞌ₅₄.
5 Ma₂ne₅₄ jniaꞌ₅₄ ca₂le₃jë́₃ ꞌe₂ ꞌlɨgꞌ₅₄ jmo₅ dsa₂ në₅, ŋɨ₂₃ ca₂le₃jë́₃ juɨg₂ qui₂dsiain₂₃ mɨꞌ₅₄ dsa₂ judíos qui₂jmo₃ le₁dsonꞌ₅₄ dsa₂. Jaun₂ i₂në₅ bá₄ lɨ́n₅ jan₂ dsa₂ i₂quian₅ ne₄ juɨ₅ quióꞌ₅ co₂nióꞌ₃ dsa₂ i₂të́ꞌ₂ dsa₂ nazarenos.
6 Jme₁ꞌnio₃ jme₁jme₂ꞌióg₃ guáꞌ₅ templo* quián₂ jniaꞌ₅₄. Jaun₂ bá₄ lë₃ ca₂chainꞌ₅₄ jniaꞌ₅₄, [jme₁ꞌniog₂ jme₁qui₂dsɨ₂ ꞌéiꞌ₃ conꞌ₂ lë́₅ Si₂ ꞌÉiꞌ₃ quián₂ jniaꞌ₅₄.
7 La₁ jme₁ca₂ꞌí₃ juɨg₅₄ ꞌlióg₂ Lisias, ca₂jŋiáiꞌ₂ Pa₄ jɨn₄ jniaꞌ₅₄ quianꞌ₅₄ bí₂ quióꞌ₅ ꞌlióg₂ quiáin₅, a₂ca₂tág₃.
8 Ca₂juáꞌ₂ Lisias ꞌéi₂ a₂ꞌnióꞌ₅ ja₃lén₂ dsa₂ i₂ꞌnag₅ neꞌ₅₄ ꞌne₂.]a Dse₃ ŋagꞌ₅₄ ꞌne₂ ꞌŋiagꞌ₂ ia₁jaun₂ le₃ŋiꞌ₅₄ liaꞌ₂ tí₅ jág₁ ꞌe₂ lë₃ ꞌnɨ́i₅ jniaꞌ₅₄.
9 Jaun₂ ca₂le₃jɨ́n₃ guë́₄ dsa₂ judíos i₂jme₁tión₂ ja₁jaun₂ ca₂juáꞌ₂ a₂dsónꞌ₂ dsau₅ bá₄ jág₁ në₅.
10 Jaun₂ ca₂jmo₃ léi₄ dsi₄máꞌ₂ ca₂tsɨ́ꞌ₃ Pa₄ a₂juáꞌ₂ ꞌéi₂ jág₁. Jaun₂ ca₂juáꞌ₂ ꞌéi₂ jaun₂ në́₃:
―A₂ꞌŋio₂ dsɨ₃ jángꞌ₄ jág₁ dsau₅ a₂long₅₄ ꞌŋió₃ neꞌ₅₄ ꞌne₂, ia₁ guion₅₄ bá₄ jaun₂ a₂lɨ́ngꞌ₅ dsɨ₂tan₅₄ ma₂ne₁ŋó₄ ŋi₂ a₂qui₂dsɨ́ꞌ₁ ꞌéiꞌ₃ quióꞌ₅ ta₁caun₂ ꞌuë₃ la₂.
11 Lé₂ bá₄ le₃caunꞌ₅₄ jág₁ dsau₅, meiꞌ₂ tsá₃ guia₃-tɨ́n₂ jmɨg₄ bá₄ ma₂të́₂ a₂guang₃ Jerusalén a₂chi₁lengꞌ₄ Diú₄.
12 Tsá₃ juaꞌ₅₄ ca₂jo₃ dsa₂ a₂tsɨ́ng₂ quianꞌ₅₄ dsa₂, on₃ guëꞌ₂ juaꞌ₅₄ a₂qui₂dsia₂₃ mɨꞌ₅₄ i₁dsi₅ guáꞌ₅ templo, on₃ guëꞌ₂ dsi₂néi₂ guáꞌ₅ sinagogas*, on₃ guëꞌ₂ jë₄ juɨg₂.
13 Tsá₃ quɨꞌ₅₄ jmɨg₄ i₂në₅ jme₃jniai₂₃ ca₂le₃jë́₃ a₂ꞌnag₂₃.
14 La₁ a₂juáꞌ₅ jniá₂ neꞌ₅₄, a₂jme₂ti₅₄ ne₄ Diú₄ quián₅ dsa₂ canꞌ₅₄, conꞌ₂ lë́₅ Juɨ₅* a₂juáꞌ₂ i₂në₅ a₂tsá₃ dsau₅. Ia₁ ꞌéng₂ ca₂le₃jë́₃ a₂tioꞌ₅₄ ne₄ Si₂ ꞌÉiꞌ₃ quianꞌ₅₄ Si₂ quióꞌ₅ dsa₂ i₂jme₁ꞌë́₂ jág₁ quián₅ Diú₄ në́₃.
15 Le₂jaun₂ bá₄ ꞌéng₂ le₃quióꞌ₅ Diú₄, juɨ₁liaꞌ₂ ꞌéin₂ guioin₅₄ bá₄ ján₃, ia₁ ꞌéng₂ a₂qui₂jenꞌ₅₄ ꞌlag₄, liaꞌ₂ dsa₂ dsen₃ liaꞌ₂ dsa₂ ꞌlɨnꞌ₅₄ në́₃.
16 ꞌUɨg₅₄ jaun₂, le₃jë́₃ jmɨg₄ bá₄ quɨ́nꞌ₅ jniá₂ bí₂ a₂tsá₃ ꞌe₂ dsɨ₃jŋi₅ dsɨ₃, liaꞌ₂ ne₄ Diú₄ liaꞌ₂ ne₄ dsa₂ mɨ₂güɨ́g₃ në́₃.
17 ꞌJme₁ca₂dsɨn₃ tɨn₃-ꞌnɨ₅ ŋi₂ a₂ŋɨ₂₃ juɨg₂ siáꞌ₂, ca₂guángꞌ₃ táng₃ Jerusalén a₂jme₁ꞌong₁₂ dsa₂ te₂ŋé₂, a₂dsɨ́ngꞌ₄ jáꞌ₂ ne₄ ne₄chei₂ në́₃.
18 A₂jaun₂ bá₄ ꞌeng₅₄ jmo₂₃ i₁dsi₅ guáꞌ₅ templo jme₁ma₂në₂jmo₃ le₁jë́₃ quió₃ liaꞌ₂ conꞌ₂ lë́₅ tag₄ chíꞌ₅ quián₂ jniaꞌ₅₄. La₁ on₃juaꞌ₅₄ a₂jme₁tionꞌ₅₄ dsa₂ juɨn₅, on₃ guëꞌ₂ juaꞌ₅₄ ca₂dsia₃ jniá₂ mɨꞌ₅₄. Jaun₂ ca₂dsi₃lén₂ i₂lɨn₅₄ dsa₂ judíos i₂ja₂lén₂ juɨg₂ siáꞌ₂ ja₁tén₄ ꞌuë₃ Asia. I₂ꞌéi₂ bá₄ ca₂jo₃ ꞌeng₅₄ i₁dsi₅ guáꞌ₅ templo.
19 I₂ꞌéi₂ bá₄ ꞌnióꞌ₅ ja₃lén₂ ja₁lá₃ ia₁jaun₂ ꞌnag₃ chi₂juaꞌ₂ cha₂ a₂ꞌnag₃ jniá₂.
20 Në₁juaꞌ₂ tsá₃ a₂cha₂ ꞌnag₃ ꞌéi₂, jaun₂ juɨ₁ꞌnag₅₄ i₂tión₂ në₅ chi₂juaꞌ₂ cha₂ dso₄ ca₂ꞌno₃ ja₁con₂ dsɨ₂tan₅₄ quián₅ dsa₂ judíos.
21 O₃ ꞌuɨg₅₄ jaun₂ ꞌe₂, ia₁ a₂ꞌén₂ jniá₂ a₂jenꞌ₅₄ ꞌlag₄, juɨ₁liaꞌ₂ ca₂juáꞌ₃ jniá₂ tiá₂ ca₂juɨ́g₂ ꞌéi₂ liaꞌ₂ conꞌ₂ jme₁ꞌeng₅₄ jë₄ quióꞌ₅, ca₂juɨ́g₂: “A₂cáunꞌ₂ ꞌniaꞌ₂ jág₁ dsau₅ quió₃ jniá₂, ia₁ a₂ꞌéng₂ a₂jenꞌ₅₄ ꞌlag₄.”
22 Jme₁ca₂nag₂ guiꞌ₅₄ Dsi₄máꞌ₂ Fé₁ le₂në₅, jaun₂ tsá₃ ma₃ꞌe₂ ca₂jme₃rë́₃. Ia₁ jme₁ma₂ŋi₅ rë₂ bá₄ i₂ꞌe₂ jaun₂ a₂të́ꞌ₂ dsa₂ “Juɨ₅*”. Jaun₂ ca₂juáꞌ₂:
―Në₅ bá₄ jme₁rë₂ jniá₂ jág₁ në₅ quiánꞌ₂ ꞌniaꞌ₂, jë₁ma₂guan₅ juɨg₅₄ ꞌlióg₂ dsen₅₄ Lisias.
23 Jaun₂ ca₂jmo₃ guiꞌ₅₄ dsi₄máꞌ₂ ꞌéiꞌ₃ ca₂tsɨ́ꞌ₃ juɨg₅₄ ꞌlióg₂ quiáin₅ a₂toinꞌ₂ Pa₄ néꞌ₃ ꞌmá₃. La₁ ca₂cuë₃ bá₄ jmɨg₄ lé₂ bá₄ dsɨ₃jag₅₄ a₂mei₅₄ quián₅ Pa₄ a₂jme₃ꞌo₅₄ në₁juaꞌ₂ ꞌe₂ ca₂rë₃ꞌnióꞌ₅ quióꞌ₅.
24 Jme₁ca₂dsɨn₃ tɨn₃-ꞌnɨ₅ jmɨg₄ cang₂ jaun₂, ca₂dsióg₃ táng₃ Fé₁ quiainꞌ₅₄ ꞌio₅₄ quiáin₅ i₂chen₂ Drusila, i₂lɨ́n₅ judía. Jaun₂ ca₂jmo₃ Fé₁ ꞌéiꞌ₃ ca₂i₁quian₅₄ dsa₂ Pa₄, jaun₂ ca₂nág₂ të₁liaꞌ₂ ca₂dsia₃ ꞌéi₂ juɨ₁liaꞌ₂ ꞌa₂ liaꞌ₂ lë́₅ a₂ꞌéin₂ të₂le₃ quióꞌ₅ Cristo Jesús.
25 La₁ jme₁ca₂dsia₃ Pa₄ a₂ꞌnióꞌ₅ cán₂ dsa₂ caun₂ juɨ₅ co₂dsau₅, a₂ꞌnióꞌ₅ jme₃ꞌuán₂ dsa₂ dsɨ́₅ ꞌŋiog₅; jme₁ca₂dsia₃ Pa₄ a₂já₅ caun₂ jmɨg₄ a₂con₂ Diú₄ jág₁ dsau₅ quióꞌ₅ le₂jan₂ le₂jan₂ dsa₂, jaun₂ guë́₄ ca₂rë₃góꞌ₅ guiꞌ₅₄ Fé₁. Jaun₂ ca₂juáꞌ₂:
―Dse₃ bá₄ guangꞌ₂ táng₃ ja₁jme₁ꞌengꞌ₅₄. Në₅ bá₄ të́₄ táng₃ jmɨg₄ siáꞌ₂ jë₁ma₂jɨng₅₄.
26 Jme₁ꞌɨ́n₂ dsɨ́₅ Fé₁ a₂jme₁jénꞌ₃ Pa₄ cu₄ ia₁jaun₂ jme₁lió₂. Jaun₂ ꞌlióng₂ ráun₂ jme₁ca₂të₃ a₂dsia₂₃ jág₁ quiongꞌ₅₄.
27 Tɨn₃ ŋi₂ ca₂ŋɨ́₂ le₂jaun₂ jme₁ca₂o₃ꞌɨ́n₃ guiꞌ₅₄ Fé₁ ta₁ a₂jme₁lɨ́in₄, a₂ca₂ꞌí₃ táng₃ Porcio Festo. Jaun₂ liaꞌ₂ ma₂ꞌen₅₄ jaun₂ bá₄ Pa₄ néꞌ₃ ꞌmá₃ ca₂jmo₃ Fé₁, ia₁jaun₂ të₃tsɨinꞌ₅₄ dse₃ quianꞌ₅₄ dsa₂ judíos.