Ca₂ŋe₄ Pa₄ ne₄ Dsi₄máꞌ₂ Festo
25
Ma₂ꞌnɨ₅ jmɨg₄ a₂ca₂gue₃ Festo ta₁ dsi₄máꞌ₂, ca₂ꞌuɨin₂ juɨg₂ Cesarea ca₂uɨ́g₂ juɨg₂ Jerusalén.
2 Ja₁jaun₂ ca₂jmo₃ jme₂dsa₂ dsen₅₄ quiainꞌ₅₄ ca₂le₃jɨ́n₃ juɨg₅₄ jme₂dsa₂ quián₅ dsa₂ judíos*, ca₂mɨ₃ dso₄ ne₄ Festo a₂ꞌnɨi₂₃ Pa₄.
3 Ján₃ bá₄ ca₂mɨ₃ a₂jmo₃ ꞌéi₂ dse₃ dsɨ́₅, a₂jmo₃ ꞌéiꞌ₃ a₂dsɨ₃quián₂ dsa₂ Pa₄ a₂dsɨ₃jó₂ juɨg₂ Jerusalén. Ia₁ a₂jme₁ma₂lɨꞌ₅₄ jág₁ a₂jme₁jŋɨiꞌ₃ Pa₄ le₂ꞌi₄ juɨ₅.
4 La₁ jaun₂ ca₂ŋag₃ Festo a₂ꞌein₅₄ juɨ₅ dsáinꞌ₃ ŋiꞌ₅₄ ta₁ të₂ juɨg₂ Cesarea ja₁ꞌen₅₄ Pa₄ néꞌ₃ ꞌmá₃.
5 Jaun₂ ca₂juáꞌ₂:
―Juɨ₁ja₂lén₂ dsa₂ i₂lɨ́n₅ ta₁ quiánꞌ₂ ꞌniaꞌ₂ quianꞌ₅₄ jniá₂ juɨ₅ Cesarea, juɨ₁ꞌnag₁₂ ja₁jaun₂ chi₂juaꞌ₂ cha₂ a₂rɨin₂.
6 Jŋiaꞌ₅₄ conꞌ₂ jŋia₃ o₃ guia₃ jmɨg₄ bá₄ ca₂ꞌí₃ Festo Jerusalén, jaun₂ ca₂ŋáiꞌ₃ Cesarea. Jme₁jnia₃ táng₃ jaun₂, ca₂i₁gua₂ ne₄ta₁ ja₁qui₂dsɨ₂₃ ꞌéiꞌ₃, jaun₂ ca₂jmo₃ ꞌéiꞌ₃ a₂ca₂i₁quian₅₄ dsa₂ Pa₄.
7 Jme₁ca₂ꞌí₃ Pa₄ dsi₂néi₂ ne₄ta₁, jaun₂ ca₂jme₃quián₃ dsa₂ judíos i₂ja₂lén₂ juɨg₂ Jerusalén. Jaun₂ ꞌlióng₂ ne₅₄ dso₄ juëꞌ₂ qui₂ca₂bóinꞌ₂ Pa₄. La₁ tsá₃ ca₂tióꞌ₃ jme₃jniai₂₃ a₂dsónꞌ₂ dsau₅ ca₂le₃jë́₃ dso₄ a₂bógꞌ₂ jaun₂.
8 Jaun₂ ca₂jángꞌ₃ Pa₄ jág₁ dsau₅ a₂lióin₂ ꞌŋiog₅, ca₂juáꞌ₂:
―ꞌI₁caun₂ dso₄ në₅ tsá₃ ma₂ꞌno₃ jniá₂, on₃ guëꞌ₂ juaꞌ₅₄ a₂tsá₃ ma₂ca₂rë₃tei₅₄ conꞌ₂ lë́₅ Si₂ ꞌÉiꞌ₃ quióꞌ₅ dsa₂ judíos, on₃ guëꞌ₂ le₃quióꞌ₅ guáꞌ₅ templo* juaꞌ₅₄ a₂ma₂ꞌno₃ dso₄, on₃ guëꞌ₂ juaꞌ₅₄ a₂cha₂ dso₄ ma₂ca₂tángꞌ₂ ja₁con₂ guiꞌ₅₄ emperador* romano.
9 La₁ia₁ jme₁ꞌnio₃ Festo të₃tsɨinꞌ₅₄ rë₂ quianꞌ₅₄ dsa₂ judíos, jaun₂ ca₂ŋɨ́iꞌ₃ Pa₄:
―¿ꞌNiogꞌ₂ guangꞌ₅₄ të₂ juɨg₂ Jerusalén ia₁jaun₂ ja₁jaun₂ jme₁rë₂ jniá₂ quiángꞌ₂?
10 Jaun₂ ca₂ŋag₃ Pa₄:
―Jaun₂ guëꞌ₂ ma₂chénꞌ₅ jniá₂ ja₁lá₃ caun₂ ne₄ta₁ ja₁tén₄ guiꞌ₅₄ emperador romano ja₁dsi₂ten₅₄ qui₃dsɨ₅ dsa₂ ꞌéiꞌ₃ quió₃. Ia₁ rë₂ bá₄ ŋiꞌ₅₄ ꞌne₂, tsá₃ ꞌe₂ dso₄ rɨn₂ jniá₂ ja₁con₂ dsa₂ judíos.
11 Chi₂juaꞌ₂ cha₂ guëꞌ₂ dso₄ a₂ma₂ꞌno₃, a₂ca₂tɨ́ng₂ jóng₂, jaun₂ guén₄ bá₄ jniá₂ ꞌmú₃ quió₃. La₁ chi₂juaꞌ₂ tsá₃ dsau₅ dso₄ a₂bógꞌ₂ dsa₂ në₅, jaun₂ ꞌi₁jan₂ tsá₃ ꞌein₂ ca₂tɨ́n₂ juaꞌ₅₄ a₂jángꞌ₂ jniá₂ o₄gú₃ dsa₂ ꞌéi₂. Jaun₂ mɨ₅ jniá₂ négꞌ₄ ne₄ guiꞌ₅₄ emperador, ia₁jaun₂ ꞌéi₂ qui₃dsɨ₅ ꞌéiꞌ₃ ja₁cong₂.
12 Jme₁ca₂lë₃ dsia₅ Festo jág₁ quianꞌ₅₄ dsa₂ i₂toꞌ₂ jág₁ dse₃ quiáin₅, jaun₂ ca₂juáꞌ₂ ca₂tsɨ́ꞌ₃ Pa₄:
―Ia₁ ma₂në₂mɨꞌ₅₄ guangꞌ₅₄ ne₄ guiꞌ₅₄ emperador, ne₄ ꞌéi₂ guangꞌ₅₄ guëꞌ₂ jaun₂.
Ma₂chénꞌ₅ Pa₄ ne₄ Rag₅₄ Agripa
13 Tɨn₃-ꞌnɨ₅ jmɨg₄ cang₂ jaun₂, ca₂dsióg₃ Rag₅₄ Agripa quiainꞌ₅₄ Berenice ca₂i₁lein₅₄ juɨg₂ Cesarea i₁cuɨin₃ Diú₄ Festo.
14 Ca₂tóinꞌ₂ bá₄ tɨn₃-ꞌnɨ₅ jmɨg₄ ja₁jaun₂, jaun₂ ca₂dsia₃ Festo ca₂tsɨ́ꞌ₃ Rag₅₄ Agripa jág₁ jaun₂ quióꞌ₅ Pa₄. Jaun₂ ca₂juáꞌ₂:
―ꞌEn₅₄ jan₂ dsa₂ ꞌné₅ ꞌmá₃ ja₁lá₃, i₂ca₂tonꞌ₂ Fé₁.
15 Liaꞌ₂ conꞌ₂ jme₁ꞌen₅₄ jniá₂ juɨg₂ Jerusalén, ca₂mɨ₃ dso₄ ne₃ jniá₂ juɨg₅₄ jme₂dsa₂ quián₅ dsa₂ judíos, dsa₂ canꞌ₅₄ quiáin₅ në́₃, a₂ꞌnɨi₂₃ dsa₂ ꞌéi₂, a₂jme₁mɨ₂₃ jme₁qui₁dsɨ₅ jniá₂ ꞌéiꞌ₃ quióꞌ₅, a₂ꞌë́₄ uɨg₅ në́₃.
16 Jaun₂ bá₄ lë₃ ca₂ŋag₄ jniá₂ ca₂juɨ́g₂: “Tsá₃ le₂jaun₂ tɨn₂ quióꞌ₅ dsɨ₂tan₅₄ romano juaꞌ₅₄ qui₃dsɨ₅ ꞌéiꞌ₃ quióꞌ₅ jan₂ dsa₂, të₃ tsá₃ ma₂në₂jɨ́in₂ dsa₂ i₂qui₂ꞌnag₅ quióꞌ₅, të₃ tsá₃ ma₂cuɨn₅ jmɨg₄ lióin₃ ꞌe₂ dso₄ bógꞌ₂ dsa₂.”
17 Jaun₂ lë₃, jme₁ca₂o₃léin₂ ja₁lá₃, dsɨ₂juɨ₅ bá₄ ca₂i₁gua₂ ne₄ta₁ quió₃ jme₁jnia₃ jaun₂, jaun₂ ca₂jmo₃ ꞌéiꞌ₃ ca₂i₁quian₅₄ dsa₂ dsa₂ ꞌéi₂.
18 La₁ jme₁ca₂o₃lén₂ dsa₂ i₂ꞌnag₅, tsá₃ ꞌe₂ dso₄ ca₂bógꞌ₂ dsa₂ juɨ₁liaꞌ₂ dso₄ jme₁lɨ́n₂ jniá₂ a₂jme₁bógꞌ₂.
19 Jŋiaꞌ₅₄ liaꞌ₂ a₂jaun₂ bá₄ ꞌnɨi₂₃ ꞌéi₂ liaꞌ₂ conꞌ₂ lë́₅ ꞌÉiꞌ₃ Juáꞌ₅ quióꞌ₅, ia₁ a₂juáꞌ₂ ꞌɨin₂₃ jan₂ i₂chen₂ Jesús i₂ca₂jon₃, jaun₂ juáꞌ₂ Pa₄ i₂chan₂ bá₄ ꞌéi₂.
20 Ia₁ tsá₃ guion₅₄ ꞌa₂ liaꞌ₂ jme₁rë₂ jág₁ jaun₂, jaun₂ bá₄ lë₃ ca₂juɨ́g₂ Pa₄ chi₂juaꞌ₂ ꞌnio₃ dsó₃ juɨ₅ Jerusalén, ia₁jaun₂ qui₃dsɨ₅ dsa₂ ꞌéiꞌ₃ ja₁jaun₂.
21 La₁ ꞌŋiog₅ në́₃ ca₂mɨ₃ a₂qui₃dsɨ₅ ꞌéiꞌ₃ guiꞌ₅₄ emperador Augusto, jaun₂ bá₄ lë₃ ca₂jmo₃ jniá₂ ꞌéiꞌ₃ liaꞌ₂ ma₂ꞌein₅₄ në₅ ꞌné₅ ꞌmá₃, ca₂liaꞌ₂ ca₂cuɨn₃ jmɨg₄ a₂tsɨin₅₄ ne₄ guiꞌ₅₄ emperador.
22 Jaun₂ ca₂juáꞌ₂ guiꞌ₅₄ Agripa ca₂tsɨ́ꞌ₃ Festo:
―Ján₃ bá₄ ꞌnio₃ jniá₂ nag₅₄ jág₁ quióꞌ₅ dsa₂ ꞌéi₂.
Jaun₂ ca₂ŋag₃ táng₃ Festo:
―ꞌIóg₃ nágꞌ₁ jág₁ quióꞌ₅.
23 Jaun₂ jme₁jnia₃ jaun₂, ca₂dsióg₃ guiꞌ₅₄ Agripa quianꞌ₅₄ Berenice. ꞌŊio₅ lɨn₃ jláꞌ₁ ca₂i₃toinꞌ₅₄ dsi₂néi₂. Ca₂dsi₃lén₂ juɨg₅₄ ꞌlióg₂ dsen₅₄, ca₂le₃jɨ́n₃ dsa₂ dsen₅₄ quián₅ juɨg₂ ca₂dsi₃lén₂. Jaun₂ ca₂jmo₃ Festo ꞌéiꞌ₃ a₂ca₂i₁quian₅₄ dsa₂ Pa₄.
24 Jaun₂ ca₂juáꞌ₂:
―ꞌNe₂ Rag₅₄ Agripa, ca₂le₃jɨ́nꞌ₃ ꞌniaꞌ₂ dsa₂ i₂le₁ŋɨꞌ₂ ja₁lá₃ quianꞌ₅₄ jniaꞌ₅₄, la₂ chénꞌ₅ dsa₂ la₂. Juɨn₅ dsa₂ judíos i₂chan₂ juɨg₂ Jerusalén, dsa₂ chan₂ juɨg₂ Cesarea ja₁lá₃ në́₃, ꞌnɨi₂₃ dsa₂ la₂. Jaun₂ ca₂le₃jë́₃ jmɨg₄ tsá₃ cán₂ jág₁, a₂mɨ₂₃ jón₂ i₂në₅.
25 La₁ conꞌ₂ lɨ́n₂ jniá₂, tsá₃ ꞌe₂ dso₄ rɨin₂ juaꞌ₅₄ a₂dsi₂ten₅₄ jóin₂. Tonꞌ₂ mɨ₂₃ táng₃ ꞌŋiog₅ a₂dsáinꞌ₃ ne₄ guiꞌ₅₄ emperador Augusto, jaun₂ lë₃ ma₂i₂jiog₅ dsɨ₃ dsiainꞌ₅₄ co₂ŋeiꞌ₅₄ ne₄ ꞌéi₂.
26 Ia₁ tsá₃ guion₅₄ ꞌe₂ jág₁ dsónꞌ₂ tóꞌ₄ ne₄ si₂ a₂juɨg₅₄ guiꞌ₅₄ emperador a₂ꞌnɨ́g₄ i₂në₅. Jaun₂ bá₄ lë₃ i₂jŋiái₂ neꞌ₅₄ ꞌniaꞌ₂, la₁ ꞌŋio₅ dsen₅₄ guë́₄ le₂ꞌuɨg₅₄ neꞌ₅₄ ꞌne₂ guiꞌ₅₄ Rag₅₄ Agripa, ia₁jaun₂ caunꞌ₅₄ jág₁ dsau₅ quióꞌ₅, ia₁jaun₂ cha₂ a₂tóꞌ₄ ne₄ si₂ ꞌe₂ a₂rë₂cáinꞌ₂.
27 Ia₁ tsá₃ dse₃ jniá₂, lɨ́n₂ jniá₂, juaꞌ₅₄ a₂dsiangꞌ₅₄ jan₂ dsa₂ chi₁ꞌŋeiꞌ₅₄ juaꞌ₅₄ a₂tsá₃ juɨg₅₄ ꞌe₂ lë₃ ꞌnag₅ dsa₂.