Tsá₃ ꞌén₂ rɨnꞌ₅₄ Jesús jág₁ quióꞌ₅
7
Cang₂ jaun₂, ca₂ŋɨ₃ Jesús ꞌuë₃ Galilea; a₂tsá₃ ꞌnio₃ dsɨ₃ŋɨ́₃ jë₄ ꞌuë₃ Judea, ia₁ ja₁jaun₂ jme₁ꞌnio₃ dsa₂ judíos* jŋagꞌ₃.
2 La₁ia₁ jme₁ma₂ja₂quián₃ Jmɨg₄ quióꞌ₅ Tsɨ₁ꞌio₅ Láu₃*, jmɨg₄ quióꞌ₅ dsa₂ judíos,
Los líderes judíos quieren matar a Jesús (Juan 7.1-24)
―Tsá₃ lë₁jan₁ ja₁lá₃; gua₂ juɨ₅ Judea, ia₁jaun₂ jág₃ dsa₂ i₂quiangꞌ₅₄ léi₄ a₂jmoꞌ₂.
4 Ia₁ juɨ₁liaꞌ₂ i₂ꞌnio₃ a₂le₃cuɨg₅ dsa₂ quióꞌ₅, tsá₃ jmo₂₃ juɨ₁liaꞌ₂ a₂tɨin₂₃ jë₄ chi₁ꞌma₁. Chi₂juaꞌ₂ dsónꞌ₂ jmoꞌ₂ léi₄ le₂në₅, jmo₄ të₃ jág₅ dsa₂ juɨn₅.
5 Ia₁ ca₂liaꞌ₂ jŋiaꞌ₅₄ rɨnꞌ₅₄ bá₄ Jesús tsá₃ jme₁ꞌéin₂ le₃quióꞌ₅.
6 Jaun₂ në́₃, ca₂juáꞌ₂ Jesús ca₂tsɨ́ꞌ₃ rɨinꞌ₅₄:
―Tsá₃ ma₂të́₂ bá₄ guë́₄ hora quió₃ jniá₂, la₁ia₁ të₂le₃ quiánꞌ₂ ꞌniaꞌ₂, juaꞌ₅₄ ꞌe₂ guë́₃ hora bá₄ dse₃.
7 Tsá₃ lé₂ le₃jme₃ꞌiog₅₄ dsa₂ mɨ₂güɨ́g₃ jme₃ꞌŋiai₅₄ ꞌniaꞌ₂; la₁ia₁ ꞌiog₅₄ bá₄ jniá₂, ꞌuɨg₅₄ ia₁ a₂jángꞌ₅ jniá₂ jág₁ dsau₅ ja₁con₂ ꞌéi₂, a₂ꞌlɨgꞌ₅₄ bá₄ a₂jmo₂₃-dsáu₅.
8 O₂nóꞌ₅ ꞌniaꞌ₂ guiongꞌ₅₄ jmɨg₄; tsá₃ nei₅₄ jniá₂, ia₁ tsá₃ ma₂dsɨn₃ guë́₄ hora quió₃.
9 Jme₁ma₂në₂chíꞌ₃ rɨinꞌ₅₄ le₂në₅, ca₂jŋia₃ jë₄ ꞌuë₃ Galilea.
Ŋó₃ Jesús Jmɨg₄ quióꞌ₅ Tsɨ₁ꞌio₅ Láu₃*
10 La₁ cang₂ guë́₄ jaun₂, jme₁ma₂i₂lén₂ rɨnꞌ₅₄ Jesús, ján₃ bá₄ ca₂ŋó₃ ꞌéi₂ jmɨg₄ jaun₂, o₁jŋiaꞌ₅₄ ca₂ŋó₃ të₃ tsá₃ jme₂li₅₄ jɨn₄ dsa₂ juɨn₅. Meiꞌ₂ tsá₃ conꞌ₂ të₃coꞌ₅₄ bá₄ ŋó₃.
11 Jaun₂ lë₃, ca₂i₁nio₁ dsa₂ judíos ꞌnaiꞌ₂ Jesús ja₁niog₅ jmɨg₄, jaun₂ juáꞌ₂:
―¿A₂jáꞌ₄ ꞌen₅₄ dsa₂ ꞌéi₂?
12 Jɨn₄ dsa₂ guëꞌ₂, juɨn₅ i₂dsia₅ të₂ꞌua₁ jɨn₄ rɨinꞌ₅₄ a₂ꞌɨin₂₃ ꞌéi₂. I₂lɨn₅₄ juáꞌ₂: “Dsa₂ dsen₃ bá₄ ꞌéi₂”, la₁ i₂siánꞌ₂ guëꞌ₂ juáꞌ₂: “On₃juaꞌ₅₄ dsa₂ dsen₃ ꞌéi₂, ia₁ jme₂gain₂₃ dsa₂.”
13 La₁ia₁ liaꞌ₂ ꞌi₁jan₂ tsá₃ ca₂dsia₃ liaꞌ₂ rë₂jiá₃ jág₁ a₂ꞌɨin₂₃ ꞌéi₂, ia₁ a₂gain₃ dsa₂ judíos.
14 Conꞌ₂ tɨn₃ dsoꞌ₅₄ jmɨg₄ jme₁ma₂të́₂, jaun₂ ca₂ꞌí₃ Jesús i₁dsi₅ guáꞌ₅ templo*, jaun₂ ca₂jme₃lióg₃ ca₂jme₃tɨin₂₃ dsa₂.
15 Jaun₂ ca₂i₃góꞌ₃ dsɨ́₅ dsa₂ judíos jaun₂ ca₂juáꞌ₂:
―¿ꞌA₂ liaꞌ₂ ŋɨ́₄ lë₃ ma₂tɨn₂ si₂ i₂në₅ të₃ tsá₃ si₂ ca₂ꞌɨ́₂?
16 Jaun₂ ca₂ŋag₃ Jesús:
―Juɨ₁liaꞌ₂ a₂jme₂tág₂ jniá₂ la₂, on₃juaꞌ₅₄ jág₁ quió₃ ꞌŋió₃ juáꞌ₅; jág₁ quióꞌ₅ i₂ca₂chei₃ bá₄ la₂.
17 Chi₂juaꞌ₂ ꞌein₂ jan₂ ma₂ꞌei₅ dsɨ́₅ jmo₃ a₂ꞌŋio₂ dsɨ́₅ Diú₄, le₃ŋi₅ bá₄ ꞌéi₂ ꞌa₂ liaꞌ₂ lë́₅ jág₁ a₂jme₂tág₂ jniá₂, chi₂juaꞌ₂ já₅ ja₁con₂ Diú₄, o₃ chi₂juaꞌ₂ dsia₂₃ ꞌa₂ conꞌ₂ tɨng₂ ꞌŋió₃.
18 Juɨ₁liaꞌ₂ i₂dsia₅ o₄quióꞌ₄ ꞌŋiog₅, jmo₂₃ le₂jaun₂ ia₁jaun₂ jme₃juagꞌ₂ dsa₂. La₁ juɨ₁liaꞌ₂ i₂ꞌnoꞌ₂ a₂le₃juɨnꞌ₂ i₂ca₂chei₃, i₂të₃dsónꞌ₂ bá₄ ꞌéi₂; ꞌi₁caun₂ a₂ꞌlɨgꞌ₅₄ tsá₃ cha₂ ja₁coin₂.
19 ꞌ¿On₁juaꞌ₅₄ Moisés ca₂cuë₃ ꞌÉiꞌ₃ ca₂cuë́ꞌ₃ ꞌniaꞌ₂? La₁ia₁, ca₂liaꞌ₂ ꞌi₁janꞌ₂ ꞌniaꞌ₂ tsá₃ jme₂tíꞌ₁ Si₂ ꞌÉiꞌ₃. ¿ꞌE₂ lë₃ ꞌniogꞌ₂ ꞌniaꞌ₂ jŋágꞌ₄ jniá₂?
20 Jaun₂ ca₂ŋag₃ dsa₂:
―ꞌEn₅₄ je₂naꞌ₅₄ të₂ꞌauꞌ₂; ¿ꞌein₂ ꞌnio₃ jŋɨꞌ₃ ꞌne₂?
21 Jaun₂ ca₂juáꞌ₂ Jesús:
―Caun₂ léi₄ ca₂jmo₃ jniá₂ jmɨg₄ sa₅₄, jaun₂ ca₂i₃góꞌ₃ ꞌauꞌ₂ ꞌniaꞌ₂ ca₂le₃jɨ́ngꞌ₃.
22 Jaun₂ në́₃, ca₂jmo₃ Moisés ꞌéiꞌ₃ a₂ti₃ dsa₂ nɨ₁lo₁*, (la₁ia₁ on₃juaꞌ₅₄ Moisés i₂ca₂jme₃lióg₃; dsa₂ canꞌ₅₄ bá₄ ca₂jme₃lióg₃ ma₂lɨ́gꞌ₂). ꞌUɨg₅₄ jaun₂ tiꞌ₂ ꞌniaꞌ₂ nɨ₁lo₄ guein₂, o₁jŋiaꞌ₅₄ të₃ lë́₅ jmɨg₄ sa₅₄.
23 Dse₃ bá₄ jaun₂, chi₂juaꞌ₂ jaun₂ tiꞌ₂ ꞌniaꞌ₂ nɨ₁lo₄ guein₂ jmɨg₄ sa₅₄ ia₁jaun₂ tsá₃ dsó₃ ꞌuë₃ ꞌÉiꞌ₃ quióꞌ₅ Moisés, ¿ꞌe₂ lë₃ ꞌneꞌ₂ ꞌniaꞌ₂ quianꞌ₅₄ jniá₂, ia₁ ca₂jme₁ꞌliong₁₂ jan₂ dsa₂ ta₁jain₂, të₃ jmɨg₄ sa₅₄?
24 Tsá₃ lë₁cáun₂ ꞌniaꞌ₂ ꞌí₁ a₂jŋiaꞌ₅₄ conꞌ₂ jniá₂ le₃coꞌ₅₄. Quion₂ bá₄ ꞌniaꞌ₂ ꞌí₁ conꞌ₂ dsi₂ten₅₄.
Dsia₅ Jesús a₂juáꞌ₂ a₂jáꞌ₄ já₅
25 Jaun₂ në́₃ ca₂jme₃lióg₃ qui₂ca₂ŋag₃ i₂lɨn₅₄ dsa₂ chan₂ Jerusalén qui₂ca₂ŋɨ́iꞌ₃ rɨinꞌ₅₄:
―¿On₁juaꞌ₅₄ i₂në₅ ꞌnaꞌ₂ dsa₂ a₂jŋagꞌ₃ i₂nioi₅₄?
Los líderes tratan de arrestar a Jesús (Juan 7.25-53)
26 Ó₃ bá₄ guëꞌ₂ ꞌein₅₄ dsia₂₃ liaꞌ₂ rë₂jiá₃ jág₁ jɨn₄ dsa₂ juɨn₅, tsá₃ ꞌein₂ juáꞌ₂ ꞌi₁caun₂ quióꞌ₅. ¿O₃ bá₄ dsónꞌ₂ ma₂ca₂rë₃ŋi₅ dsɨ₂tan₅₄, a₂lɨ́n₅ dsa₂ në₅ I₂rë₂ꞌɨ́n₁* quián₅ Diú₄?
27 La₁ ne₄ bá₄ jniog₄ a₂jáꞌ₄ já₅ i₂në₅; a₂dsau₅, jë₁ma₂të́₂ rë₁jiá₃ I₂rë₂ꞌɨ́n₁ quián₅ Diú₄, liaꞌ₂ ꞌi₁jan₂ tsá₃ le₃ŋi₅ a₂jáꞌ₄ já₅.
28 Jaun₂ lë₃, të₁liaꞌ₂ ꞌen₅₄ Jesús jme₂tɨin₂₃ dsa₂ i₁dsi₅ guáꞌ₅ templo, jaun₂ ca₂juáꞌ₂ tiá₂:
―¡Cuɨgꞌ₂ bá₄ ꞌniaꞌ₂ jniá₂, jaun₂ ŋiꞌ₅₄ bá₄ ꞌniaꞌ₂ ꞌa₂ guëꞌ₂ guio₃ jniá₂! La₁ on₃juaꞌ₅₄ o₄quió₃ ꞌŋió₃ guio₃; të₂le₃ o₄quióꞌ₄ i₂ca₂chei₃ i₂të₃dsónꞌ₂ bá₄ guang₃. I₂ꞌéi₂ guëꞌ₂, tsá₃ cuɨnꞌ₂ ꞌniaꞌ₂.
29 La₁ia₁ jniá₂ cuɨ́in₅, ia₁ ja₁con₂ ꞌéi₂ bá₄ guio₃, jaun₂ ꞌéi₂ bá₄ ca₂chei₃.
30 Jaun₂ në́₃, jme₁ꞌnio₃ dsa₂ jme₁tsáunꞌ₂; la₁ liaꞌ₂ ꞌi₁jan₂ tsá₃ ca₂téi₂ gu₂, ia₁ tsá₃ jme₁ma₂të́₂ bá₄ guë́₄ hora quióꞌ₅.
31 La₁ia₁ juɨn₅ dsa₂ ꞌéi₂ ca₂rë₃ꞌén₂ jág₁ quióꞌ₅, jaun₂ juáꞌ₂:
―Jë₁ma₂të́₂ rë₁jiá₃ I₂rë₂ꞌɨ́n₁ quián₅ Diú₄, ¿O₃ bá₄ le₃quɨꞌ₅₄ jmɨg₄ jmo₃ léi₄ a₂juëꞌ₂ guë́₄ liaꞌ₂ conꞌ₂ guë́₄ a₂jmo₅ i₂në₅?a
Ca₂chen₃ dsa₂ fariseos chiꞌ₂ ꞌɨꞌ₅₄ quián₅ guáꞌ₅ a₂tsáinꞌ₂ Jesús
32 Ca₂nág₂ bá₄ dsa₂ fariseos jág₁ a₂ca₂juáꞌ₂ dsa₂ a₂ꞌɨin₂₃ Jesús; jaun₂ dsa₂ fariseos ꞌéi₂ quiainꞌ₅₄ juɨg₅₄ jme₂dsa₂, ca₂chein₃ chiꞌ₂ ꞌɨꞌ₅₄ quián₅ guáꞌ₅ a₂tsáinꞌ₂ Jesús jaun₂ të₂.
33 Jaun₂ në́₃ ca₂juáꞌ₂ Jesús:
―Meꞌ₂ bá₄ jmɨg₄ ꞌú₄ jniá₂ jɨnꞌ₂ ꞌniaꞌ₂, jaun₂ guë́₄ négꞌ₄ táng₃ ja₁con₂ i₂ca₂chei₃.
34 ꞌNauꞌ₅₄ ꞌniaꞌ₂ jniá₂ i₁niogꞌ₄, la₁ia₁ tsá₃ dsiogꞌ₂ ꞌniaꞌ₂; ia₁ tsá₃ lé₂ o₁nóꞌ₅ ꞌniaꞌ₂ ja₁négꞌ₄.
35 Jaun₂ në́₃, ca₂jme₃lióg₃ dsa₂ judíos qui₂ca₂ŋɨ́iꞌ₃ rɨinꞌ₅₄:
―¿A₂jáꞌ₄ dsɨ₂jiog₅ dsɨ́₅ i₂në₅ dsó₃, a₂tsá₃ dsiainꞌ₂ jniog₄? ¿On₃ bá₄ dsó₃ jɨn₄ dsa₂ go₄ jniog₄ i₂tiánꞌ₅ tsɨ₁rë₂jan₅₄ jɨn₄ dsa₂ griegos*, ia₁jaun₂ jme₃tɨin₂₃ dsa₂ griegos?
36 ¿ꞌE₂ jein₅ jág₁ a₂në₂juáꞌ₂ në₅: “ꞌNauꞌ₅₄ ꞌniaꞌ₂ jniá₂ i₁niogꞌ₄, la₁ia₁ tsá₃ dsiogꞌ₂ ꞌniaꞌ₂, ia₁ tsá₃ lé₂ o₁nóꞌ₅ ꞌniaꞌ₂ ja₁négꞌ₄”?
Juɨ₁liaꞌ₂ caun₂ jmɨg₂ cuá₃ jénꞌ₃
37 Jmɨg₄ juëꞌ₂ dé₄ dsónꞌ₂ jë₁ca₂tóꞌ₂ quióꞌ₅ jmɨg₄, ca₂nau₂ Jesús, jaun₂ ca₂juáꞌ₂ tiá₂:
―Në₁juaꞌ₂ ꞌein₂ rë₂quein₂ dsɨ́₅, juɨ₁jia₂ ja₁con₂ jniá₂, juɨ₁ꞌenꞌ₅₄ jmɨg₂.
38 Juɨ₁liaꞌ₂ juáꞌ₂ Si₂, juɨ₁liaꞌ₂ dsa₂ i₂ꞌén₂ të₂le₃ quió₃ jniá₂, ꞌiá₃ të₂tsɨ́₅ në₂jag₄ bá₄ jmɨg₂ cuá₃ a₂jénꞌ₃.b
39 La₁ a₂juáꞌ₂ le₂në₅ a₂ꞌɨin₂₃ Jme₂dsí₂ Jŋió₅ i₂jme₁ma₂ꞌi₄ ꞌéiꞌ₃ guen₃ dsa₂ i₂ꞌén₂ të₂le₃ quióꞌ₅; ia₁ tsá₃ jme₁ma₂guan₅ bá₄ guë́₄ Jme₂dsí₂, ia₁ tsá₃ guë́₄ jme₁ma₂ca₂rë₃juɨnꞌ₂ Jesús.
Ca₂lë₃ le₁dsonꞌ₅₄ dsa₂
40 I₂lɨn₅₄ dsa₂ i₂jme₁tionꞌ₅₄ ja₁jaun₂, jme₁ca₂nág₂ a₂juáꞌ₂ Jesús, ca₂juáꞌ₂:
―Dsónꞌ₂ bá₄ i₂në₅ dsa₂ i₂ꞌë́₂ jág₁ quián₅ Diú₄ i₂lë́₅ jág₁ jiá₃ ꞌéi₂.
41 I₂lɨn₅₄ guëꞌ₂ juáꞌ₂:
―I₂rë₂ꞌɨ́n₁ quián₅ Diú₄ bá₄ në₅.
La₁ia₁ i₂siánꞌ₂ guëꞌ₂ ca₂juáꞌ₂:
―¿ꞌA₂ bá₄ liaꞌ₂ lé₂ le₃chan₂ Galilea I₂rë₂ꞌɨ́n₁ quián₅ Diú₄?
42 ¿Tsa₁ juáꞌ₂ Si₂, tsɨ₁jon₂ Rag₅₄ David bá₄ tion₅₄ lén₂ I₂rë₂ꞌɨ́n₁ quián₅ Diú₄, jaun₂ jë₄ juɨg₂ Belén bá₄ le₃chain₂, juɨg₂ go₄ David ꞌŋiog₅?
43 Jaun₂ në́₃, le₁dsonꞌ₅₄ bá₄ dsa₂ ca₂lë₃ o₄quióꞌ₄ Jesús.
44 Jme₁ꞌnio₃ i₂lɨn₅₄ tsáunꞌ₂, la₁ ca₂liaꞌ₂ ꞌi₁jan₂ tsá₃ ꞌein₂ ca₂téi₂ gu₂.
Tsá₃ ꞌén₂ dsa₂ canꞌ₅₄ të₂le₃ quióꞌ₅ Jesús
45 Jaun₂ ca₂dsi₃len₃ táng₃ chiꞌ₂ ꞌɨꞌ₅₄ quián₅ guáꞌ₅ ja₁jme₁tionꞌ₅₄ juɨg₅₄ jme₂dsa₂ quianꞌ₅₄ dsa₂ fariseos, jaun₂ ca₂ŋag₃ ꞌéi₂ ca₂ŋɨ́iꞌ₃ chiꞌ₂ ꞌɨꞌ₅₄:
―¿ꞌE₂ ꞌuɨg₅₄ tsá₃ në₂teꞌ₅₄ ꞌniaꞌ₂ ꞌéi₂?
46 Jaun₂ ca₂ŋag₃ chiꞌ₂ ꞌɨꞌ₅₄:
―¡Liaꞌ₂ ꞌi₁cónꞌ₂ tsá₃ ꞌein₂ dsa₂ ma₂juáꞌ₂ jág₁ juɨ₁liaꞌ₂ juáꞌ₂ dsa₂ ꞌéi₂!
47 Jaun₂ në́₃ ca₂juáꞌ₂ dsa₂ fariseos:
―¿O₃ bá₄ ma₂jme₃gau₅ dsa₂ ꞌéi₂ quiánꞌ₂ ꞌniaꞌ₂ ján₃?
48 ꞌI₁jan₂ dsa₂ canꞌ₅₄ juɨg₅₄ jniog₄, on₃ guëꞌ₂ dsa₂ fariseos, tsá₃ ma₂ca₂rë₃ꞌén₂ le₃quióꞌ₅ ꞌéi₂, jme₁né₄.
49 La₁ dsa₂ lë₁dsa₂ i₂tionꞌ₅₄ në₅, tsá₃ cuɨ́ꞌ₅ Si₂ ꞌÉiꞌ₃. Ma₂tioinꞌ₅₄ ne₄ jmɨ₁uɨg₅ a₂ma₂rë₂ꞌë́₂ ja₁coin₂.c
50 Jɨn₄ dsa₂ fariseos ꞌéi₂ jme₁ꞌen₅₄ Nicodemo, i₂jme₁ma₂ŋe₄ i₁jɨin₅₄ Jesús le₂jŋiá₅.d ꞌÉi₂ në́₃ ca₂ŋag₃:
51 ―Juɨ₁liaꞌ₂ conꞌ₂ lë́₅ juáꞌ₂ Si₂ ꞌÉiꞌ₃ quián₂, ¿lé₂ le₃qui₁dsɨ₅ ꞌéiꞌ₃ ja₁con₂ jan₂ dsa₂, të₃ tsá₃ ma₂në₂néi₂ jág₁ quióꞌ₅, a₂juáꞌ₂ ꞌe₂ a₂ma₂jmo₃?
52 Jaun₂ në́₃ ca₂ŋag₃ rɨinꞌ₅₄:
―¿Ján₃ bá₄ lɨ́nꞌ₅ ꞌne₂ jan₂ dsa₂ i₂chan₂ Galilea? ꞌÍ₂ dse₃ ne₄ Si₂, jaun₂ jagꞌ₅₄, liaꞌ₂ ꞌi₁jan₂ dsa₂ i₂ꞌë́₂ jág₁ quián₅ Diú₄ tsá₃ já₅ ꞌuë₃ Galilea.e
53 Jaun₂ guë́₄ i₃len₃ le₂jan₂ le₂jan₂ dsa₂ ja₁quióꞌ₄.