Jan₂ ꞌio₅₄ i₂ca₂tánꞌ₂ dso₄
8
La₁ ca₂ŋó₃ bá₄ Jesús juɨ₅ Máꞌ₂ Olivos*.
2 Jme₁jnia₃ jaun₂ táng₃, ca₂guáinꞌ₃ i₁dsi₅ guáꞌ₅ templo*. Ja₁jaun₂ ca₂jme₃quián₃ ca₂le₃jɨ́n₃ dsa₂. Jaun₂ ca₂guá₂ Jesús, jaun₂ ca₂jme₃lióg₃ jme₂tɨin₂₃ dsa₂.
Jesús perdona a mujer condenada (Juan 8.2-11)
3 Jaun₂ në́₃, ca₂o₃jŋia₃ të₅juáꞌ₅ quianꞌ₅₄ dsa₂ fairseos ca₂o₃jŋiai₃ jan₂ ꞌio₅₄ i₂ca₂join₃ jme₁ꞌein₅₄ quianꞌ₅₄ dsa₂ ŋeꞌ₂. Jaun₂ ca₂cheiꞌ₃ dsi₂jo₂ jë₄ quióꞌ₅ dsa₂ i₂tionꞌ₅₄ ja₁jaun₂.
4 Jaun₂ ca₂juáꞌ₂ ca₂tsɨ́ꞌ₃ Jesús:
―Të₅, ca₂jón₂ ꞌio₅₄ la₂ nióꞌ₅ jág₁ quianꞌ₅₄ dsa₂ ŋeꞌ₂ on₃juaꞌ₅₄ dsɨ₂i₂gu₂.
5 Në₃ në́₃, ne₄ Si₂ ꞌÉiꞌ₃, juáꞌ₂ Moisés a₂jŋɨ́ꞌ₄ jniaꞌ₅₄ jan₂ ꞌio₅₄ le₂la₂, a₂qui₁dsɨin₅ jniaꞌ₅₄ cang₄. ¿ꞌNe₂ guëꞌ₂, ꞌa₂ liaꞌ₂ juáꞌ₂?
6 Ca₂juáꞌ₂ dsa₂ le₂në₅ ia₁ a₂cáin₂ táu₂ Jesús, ia₁jaun₂ cuɨn₃ jmɨg₄ bógꞌ₂ dso₄. La₁ ca₂guá₂ Jesús i₁siógꞌ₅ ꞌuë₃, jaun₂ ca₂jme₃lióg₃ ca₂jmógꞌ₃ letras ne₄ ꞌuë₃ quianꞌ₅₄ neiꞌ₅₄ chi₁gú₃.
7 La₁ caun₂ tioinꞌ₅₄ qui₂ŋag₂₃ qui₂ŋɨ́iꞌ₂ Jesús, jaun₂ ca₂nau₂, ca₂juáꞌ₂ ca₂tsɨ́ꞌ₃ dsa₂:
―Chi₂juaꞌ₂ ꞌein₂ jan₂ ꞌniaꞌ₂ i₂tsá₃ dso₄ rë₂cánꞌ₄, o₁tiong₅₄ le₂ꞌuɨg₅₄ ca₂mɨ́g₂ nɨ₁cang₁ juɨ₁quiꞌ₅₄ quióꞌ₅ ꞌio₅₄.
8 Jaun₂ ca₂guá₂ táng₃ i₁siógꞌ₅ ꞌuë₃, jmógꞌ₅ letras a₂tsáng₂ ꞌuë₃.
9 La₁ jme₁ca₂nág₂ dsa₂ jág₁ a₂ca₂juáꞌ₂ Jesús,a jaun₂ ca₂jme₃lióg₃ qui₂ca₂ꞌuɨin₂ bá₄ le₂jain₂ le₂jain₂, jŋiá₅ deꞌ₂ dsa₂ i₂ma₂guenꞌ₂ ca₂ꞌuɨin₂ ne₄ juɨ₅. Jaun₂ jme₁ma₂ca₂ꞌuɨn₂ ca₂le₃jɨ́n₃ dsa₂, ꞌŋiog₅ bá₄ Jesús të₁tsɨinꞌ₅₄ quiainꞌ₅₄ ꞌio₅₄ ꞌéi₂, i₂chénꞌ₅ dsi₂jo₂ jaun₂.
10 Jaun₂ në́₃ ca₂nau₂ Jesús,b jaun₂ ca₂juáꞌ₂ ca₂tsɨ́ꞌ₃ ꞌio₅₄:
―ꞌIo₅₄, ¿na₅ dsa₂?c ¿Tsa₁ ꞌein₂ në₂ꞌë́₂ uɨg₅?
11 Jaun₂ ca₂juáꞌ₂ ꞌio₅₄:
―Jan₂ꞌón₄. Liaꞌ₂ ꞌi₁jan₂ dsa₂, Te₁guiꞌ₅₄.
Jaun₂ në́₃ ca₂juáꞌ₂ Jesús:
―On₃ guëꞌ₂ jniá₂ ꞌë́₄ uɨg₅ quiángꞌ₂; guanꞌ₂ në́₃, la₁ tsá₃ ma₃lë₁ꞌnau₂ dso₄.
Lɨ́n₅ Jesús si₂ a₂tág₅ quióꞌ₅ dsa₂ mɨ₂güɨ́g₃
12 Ca₂juáꞌ₂ táng₃ Jesús tsɨ́ꞌ₅ dsa₂, a₂juáꞌ₂:
―Jniá₂ lɨ́ng₅ si₂ i₂jmo₅ tág₅ juɨ₅ quióꞌ₅ dsa₂ mɨ₂güɨ́g₃; juɨ₁liaꞌ₂ i₂ꞌein₅ jniá₂, liaꞌ₂ o₁lɨ́gꞌ₂ tsá₃ ma₃ŋɨ₃ jë₄ qui₁néꞌ₃, tonꞌ₂ qui₃ꞌio₃ si₂ a₂jmo₅ a₂chain₂.
Jesús es la luz del mundo (Juan 8.12-30)
13 Jaun₂ në́₃ ca₂juáꞌ₂ dsa₂ fariseos* ca₂tsɨ́ꞌ₃ Jesús:
―ꞌNe₂ jángꞌ₂ jág₁ dsau₅ të₂le₃ quiánꞌ₂ ꞌŋiagꞌ₂; ꞌuɨg₅₄ jaun₂ tsá₃ quen₅ jág₁ quiángꞌ₂ a₂jángꞌ₂.
14 Jaun₂ ca₂ŋag₃ Jesús ca₂tsɨ́ꞌ₃ dsa₂:
―Juɨ₁liaꞌ₂ a₂juáꞌ₅ jniá₂, quen₅ bá₄, o₁jŋiaꞌ₅₄ ꞌŋió₃ jniá₂ jángꞌ₅ jág₁ dsau₅ të₂le₃ quió₃ ꞌŋió₃. Ia₁ guion₄ bá₄ jniá₂ a₂jáꞌ₄ guio₃, a₂jáꞌ₄ négꞌ₄ në́₃; la₁ia₁ ꞌniaꞌ₂ në́₃, tsá₃ ŋiꞌ₅₄ ꞌniaꞌ₂ a₂jáꞌ₄ guio₃, on₃ guëꞌ₂ a₂jáꞌ₄ négꞌ₄.
15 ꞌNiaꞌ₂ guëꞌ₂ cáunꞌ₂ ꞌí₁ liaꞌ₂ conꞌ₂ lë́₅ ꞌéiꞌ₃ quióꞌ₅ dsa₂ mɨ₂güɨ́g₃. Jniá₂ në́₃ tsá₃ ꞌí₁ cáun₅ jniá₂ juaꞌ₅₄ a₂qui₂dsɨ́₂ ꞌéiꞌ₃ ja₁con₂ ꞌi₁jan₂.
16 La₁ia₁ chi₂juaꞌ₂ cáun₅ jniá₂ ꞌí₁, dse₃ dsi₂ten₅₄ bá₄ ꞌéiꞌ₃ a₂qui₂dsɨ́₂ jniá₂, ia₁ on₃juaꞌ₅₄ jniá₂ ꞌŋió₃ cáun₅ ꞌí₁; qui₂dsɨ́₂ jniá₂ ꞌéiꞌ₃ co₂lë₅ quiangꞌ₅₄ i₂ca₂chei₃ bá₄.
17 Ján₃ bá₄ ca₂të₂ ne₄ Si₂ ꞌÉiꞌ₃ quiánꞌ₂ ꞌniaꞌ₂, rë₂ton₅ juáꞌ₂, në₁juaꞌ₂ on₃ dsa₂ lë́₂ i₂jángꞌ₅ jág₁ dsau₅, a₂quen₅ bá₄ jág₁ quióꞌ₅.
18 Jniá₂ lɨ́ng₅ i₂jángꞌ₅ jág₁ dsau₅ të₂le₃ quió₃ ꞌŋió₃; Ŋeꞌ₃ jniá₂ i₂ca₂chei₃ guëꞌ₂, lɨ́n₅ táng₃ jan₂ i₂jángꞌ₅ jág₁ dsau₅.
19 Jaun₂ në́₃ ca₂ŋag₃ dsa₂ fariseos ca₂ŋɨ́iꞌ₃ Jesús:
―¿Na₅ ŋéiꞌ₅ ꞌne₂?
Jaun₂ ca₂ŋag₃ Jesús:
―Tsá₃ cuɨgꞌ₂ ꞌniaꞌ₂ jniá₂, on₃ guëꞌ₂ Ŋeꞌ₃ jniá₂ cuɨnꞌ₂ ꞌniaꞌ₂; juaꞌ₅₄ meiꞌ₂ guë́₃ cuɨgꞌ₂ ꞌniaꞌ₂ jniá₂, ján₃ bá₄ jme₁le₃cuɨnꞌ₂ ꞌniaꞌ₂ Ŋeꞌ₃.
20 Ca₂juáꞌ₂ Jesús le₂në₅ të₁liaꞌ₂ jme₁ꞌein₅₄ jme₂tɨin₂₃ dsa₂ i₁dsi₅ guáꞌ₅ templo*, cau₅ ja₁jme₁tióng₂ tsɨ₁gu₅ quióꞌ₅ cu₄ guáꞌ₅. La₁ia₁, liaꞌ₂ ꞌi₁jan₂ tsá₃ ꞌein₂ ca₂jŋauꞌ₃, ia₁ tsá₃ jme₁ma₂të́₂ bá₄ guë́₄ hora quióꞌ₅.
“Juɨ₁liaꞌ₂ ja₁néꞌ₄ jniá₂, tsá₃ lé₂ o₁nóꞌ₅ ꞌniaꞌ₂”
21 Conꞌ₂ siáꞌ₂ táng₃ ca₂juáꞌ₂ Jesús ca₂tsɨ́ꞌ₃ dsa₂:
―Néꞌ₄ jniá₂; jaun₂ ꞌniaꞌ₂ guëꞌ₂, ꞌnáuꞌ₂ jniá₂ i₁niogꞌ₄, la₁ia₁ dsiánꞌ₃ ꞌniaꞌ₂ të₃ rë₂cánꞌ₄ ꞌniaꞌ₂ dsáuꞌ₂; ja₁néꞌ₄ jniá₂, tsá₃ lé₂ o₁nóꞌ₅ ꞌniaꞌ₂.
22 Jaun₂ në́₃ ca₂juáꞌ₂ dsa₂ judíos:
―¿O₃ bá₄ a₂jŋɨiꞌ₃ ꞌe₂ ꞌŋiog₅, jaun₂ guëꞌ₂ juáꞌ₂ tsá₃ lé₂ dsɨ₁náu₄ jniog₄ ja₁dsáinꞌ₃?
23 Jaun₂ ca₂juáꞌ₂ Jesús:
―Dsa₂ chan₂ guaꞌ₅₄ ꞌuë₃ la₂ bá₄ lɨ́nꞌ₅ ꞌniaꞌ₂; jniá₂ në́₃, lɨ́ng₅ i₂chan₂ gueiꞌ₅₄. Dsa₂ i₂tén₅ mɨ₂güɨ́g₃ la₂ bá₄ lɨ́nꞌ₅ ꞌniaꞌ₂; jniá₂ në́₃ tsá₃ téng₅ mɨ₂güɨ́g₃ la₂.
24 ꞌUɨg₅₄ jaun₂ bá₄ në₂juɨ́g₂ jniá₂ ꞌniaꞌ₂ a₂dsiángꞌ₃ të₃ rë₂cángꞌ₄ jaun₂ dsáuꞌ₂. Ia₁ chi₂juaꞌ₂ tsá₃ ꞌénꞌ₂ ꞌniaꞌ₂, jniá₂ bá₄ lɨ́ng₅ ꞌéi₂,d dsiángꞌ₃ ꞌniaꞌ₂ qui₂rë₂cángꞌ₄ dsáuꞌ₂.
25 Jaun₂ në́₃ ca₂ŋag₃ dsa₂ judíos ca₂ŋɨ́iꞌ₃ Jesús:
―¿ꞌEin₂ bá₄ lɨ́nꞌ₅ ꞌne₂?
Jaun₂ ca₂ŋag₃ Jesús:
―Le₂jaun₂ juɨ₁liaꞌ₂ ma₂qui₂ma₂juɨ́g₂ jniá₂ ꞌniaꞌ₂ ca₃le₂ꞌuɨg₅₄.e
26 ꞌLióng₂ bá₄ ꞌuɨg₅₄ cha₂ a₂le₃juáꞌ₄ jniá₂ a₂qui₁dsɨ₅ jniá₂ ꞌéiꞌ₃ ja₁conꞌ₂ ꞌniaꞌ₂. La₁ tí₅ bá₄ jág₁ quióꞌ₅ i₂ca₂chei₃. Jaun₂ jniá₂ në́₃, jág₁ a₂ma₂nag₃ ja₁coin₂, a₂jaun₂ bá₄ juɨ́g₂ jniá₂ dsa₂ mɨ₂güɨ́g₃.
27 La₁ tsá₃ ca₂rë₃ŋɨ́ꞌ₂ dsa₂, a₂jme₁juáꞌ₂ Jesús tsɨ́ꞌ₅ dsa₂ ꞌéi₂, a₂ꞌɨin₂₃ Jmei₂.
28 ꞌUɨg₅₄ jaun₂ ca₂juáꞌ₂ Jesús:
―Jë₁ma₂të́₂ rë₁chóngꞌ₄ ꞌniaꞌ₂ Jaun₅* dsa₂ mɨ₂güɨ́g₃, jaun₂ guë́₄ le₃ŋiꞌ₅₄ ꞌniaꞌ₂ a₂lɨ́n₅ jniá₂ ꞌéi₂;f le₃ŋiꞌ₅₄ ꞌniaꞌ₂, a₂tsá₃ jmo₅ jniá₂ ꞌi₁caun₂ të₂le₃ o₄quió₃ ꞌŋio₃, jŋiaꞌ₅₄ liaꞌ₂ a₂jaun₂ bá₄ juáꞌ₅ jniá₂ juɨ₁liaꞌ₂ a₂ma₂ca₂jme₃tag₅ Ŋeꞌ₃.
29 Ia₁ i₂ca₂chei₃ ꞌein₅₄ quianꞌ₅₄ jniá₂, tsá₃ juaꞌ₅₄ ma₂téin₂ jniá₂ ꞌŋió₃, ia₁ liaꞌ₂ co₂tan₅₄ bá₄ jmo₅ jniá₂ a₂ꞌŋio₂ dsɨ́₅ ꞌéi₂.
30 Liaꞌ₂ jme₁juáꞌ₂ Jesús jág₁ në₅, juɨn₅ lɨn₃ dsa₂ ca₂rë₃ꞌén₂ le₃quióꞌ₅.
Chiꞌ₂-guein₂ quián₅ Diú₄, quianꞌ₅₄ dsa₂ i₂qui₂le₁ꞌŋeꞌ₅₄ ꞌuɨg₅₄ dsáu₁
31 Jaun₂ në́₃ ca₂juáꞌ₂ Jesús ca₂tsɨ́ꞌ₃ dsa₂ judíos i₂ca₂rë₃ꞌén₂ le₃quióꞌ₅:
―Në₁juaꞌ₂ të₁ꞌŋiáꞌ₄ ꞌniaꞌ₂ le₃quióꞌ₅ jág₁ quió₃, dsónꞌ₂ bá₄ lɨ́nꞌ₅ ꞌniaꞌ₂ dsa₂ i₂quianꞌ₅₄ jniá₂;
Jesús se enfrenta a falsos discípulos (Juan 8.31-59)
33 Jaun₂ ca₂ŋag₃ dsa₂ ꞌéi₂ ca₂tsɨ́ꞌ₃ Jesús:
―Lág₅ jniaꞌ₅₄ dsa₂ tsɨ₁jon₂ Abraham, jaun₂ liaꞌ₂ ꞌi₁cónꞌ₂ tsá₃ ma₂lag₃ jniaꞌ₅₄ dsa₂ i₂le₁ꞌŋeꞌ₅₄ ne₄ ꞌi₁jan₂. ¿ꞌA₂ guëꞌ₂ liaꞌ₂ juáꞌ₂ ꞌne₂ jaun₂ a₂qui₃cheiꞌ₂ jniaꞌ₅₄?
34 Jaun₂ ca₂juáꞌ₂ Jesús:
―A₂dsɨ₂jóꞌ₃ juɨ́g₂ jniá₂ ꞌniaꞌ₂, juɨ₁liaꞌ₂ ca₂le₃jɨ́n₃ dsa₂ i₂ꞌno₅ dso₄, qui₂le₁ꞌŋeiꞌ₅₄ ne₄ dsáu₁.
35 Juɨ₁liaꞌ₂ jan₂ dsa₂ i₂chi₁ꞌŋeꞌ₅₄ në́₃, tsá₃ juaꞌ₅₄ të₃ꞌŋiái₄ co₂tan₅₄ dsi₂néi₂ quióꞌ₅ juɨg₅₄; la₁ia₁ chiꞌ₂ ja₁ŋiꞌ₅₄ në́₃, co₂tan₅₄ bá₄ téin₅ dsi₂néi₂ jaun₂.
36 Jaun₂ në́₃, chi₂juaꞌ₂ ca₂chéiꞌ₂ Ja₁ŋiꞌ₅₄ ca₂chéinꞌ₂ ꞌniaꞌ₂, jaun₂ bá₄ lénꞌ₂ ꞌniaꞌ₂ dsa₂ i₂le₁tsɨnꞌ₁ të₃dsónꞌ₂.
37 Ma₂guion₄ bá₄ jniá₂ jaun₂ a₂lɨ́nꞌ₅ ꞌniaꞌ₂ tsɨ₁jon₂ Abraham; la₁ia₁ ꞌniogꞌ₂ ꞌniaꞌ₂ jŋágꞌ₄ jniá₂, ia₁ a₂tsá₃ gueiꞌ₂ ꞌniaꞌ₂ ꞌe₂ a₂juáꞌ₅ jniá₂.
38 Jniá₂ në́₃ juáꞌ₅ juɨ́g₂ ꞌniaꞌ₂ juɨ₁liaꞌ₂ ꞌe₂ a₂ma₂jág₃ ja₁con₂ Ŋeꞌ₃; ꞌniaꞌ₂ në́₃, jmoꞌ₂ ꞌe₂ a₂ma₂neiꞌ₂ ꞌniaꞌ₂ ja₁con₂ ŋéiꞌ₅.
39 Jaun₂ ca₂ŋag₃ dsa₂ ꞌéi₂ ca₂tsɨ́ꞌ₃ Jesús:
―Abraham bá₄ jme₁lɨ́n₄ jmei₂ jniaꞌ₅₄ ma₂lɨ́gꞌ₂.
La₁ ca₂juáꞌ₂ Jesús ca₂tsɨ́ꞌ₃ dsa₂ ꞌéi₂:
―Juaꞌ₅₄ meiꞌ₂ guë́₃ lɨ́nꞌ₅ ꞌniaꞌ₂ chiꞌ₂-guein₂ quián₅ Abraham, jaun₂ jme₁jmóꞌ₂ ꞌniaꞌ₂ juɨ₁liaꞌ₂ a₂ca₂jmo₃ ꞌéi₂.
40 La₁ia₁ ꞌniaꞌ₂ në́₃ ꞌniogꞌ₂ jŋágꞌ₄ jniá₂, o₁jŋiaꞌ₅₄ ma₂në₂juɨ́g₂ jniá₂ ꞌniaꞌ₂ jág₁ tí₅ të₃dsónꞌ₂ a₂ma₂ca₂jme₃tag₅ Diú₄ jniá₂. Tsá₃ le₂në₅ ca₂jmo₃ Abraham.
41 ꞌNiaꞌ₂ në́₃, le₂jaun₂ bá₄ jmoꞌ₂ juɨ₁liaꞌ₂ jmo₅ ŋéiꞌ₅.
Jaun₂ në́₃ ca₂juáꞌ₂ dsa₂ ꞌéi₂:
―La₁ on₃juaꞌ₅₄ jniaꞌ₅₄ lág₅ guein₂ i₂lë₁chan₂; jan₂ bá₄ jmei₂ jniaꞌ₅₄ chan₂: i₂ꞌéi₂ lɨ́n₅ Diú₄.
42 Jaun₂ në́₃ ca₂juáꞌ₂ Jesús:
―Juaꞌ₅₄ meiꞌ₂ guë́₃ të₃dsónꞌ₂ Diú₄ lɨ́n₅ ŋéiꞌ₅ ꞌniaꞌ₂, jme₁jme₁ꞌnióꞌ₄ bá₄ ꞌniaꞌ₂ jniá₂, ia₁ ja₁con₂ Diú₄ bá₄ ꞌuɨ́n₂ jniá₂; jaun₂ la₂ ma₂guio₃. On₃juaꞌ₅₄ o₄quió₃ ꞌŋió₃ guio₃; o₄quióꞌ₄ i₂ca₂chei₃ bá₄ jniá₂ guio₃.
43 ¿ꞌE₂ lë₃ tsá₃ lé₂ le₃ŋɨ́ꞌ₂ ꞌniaꞌ₂ jág₁ a₂juáꞌ₅ jniá₂? ꞌUɨg₅₄ ia₁ a₂tsá₃ tianꞌ₃ ꞌniaꞌ₂ nágꞌ₁ jág₁ a₂ꞌë́₅ jniá₂.
44 ꞌNiaꞌ₂ bá₄ rëꞌ₂ téngꞌ₅ le₃quióꞌ₅ i₂së₃dsen₃ ŋéiꞌ₅ ꞌniaꞌ₂. Jaun₂ ꞌɨ́n₅ ꞌauꞌ₂ jmóꞌ₂ ꞌe₂ a₂ꞌŋio₂ dsɨ́₅ ꞌéi₂. Liaꞌ₂ conꞌ₂ le₂ꞌuɨg₅₄ bá₄ jaun₂ lɨ́in₅ jan₂ i₂jme₂dsian₅ dsa₂. Tsá₃ le₃quióꞌ₅ jág₁ dsau₅ chéinꞌ₅, ia₁ ꞌi₁ca₂mɨ́g₂ jág₁ dsau₅ tsá₃ cha₂ ja₁coin₂. Jë₁ma₂ca₂juáꞌ₂ jág₁ të₂jág₁, juáꞌ₂ bá₄ juɨ₁liaꞌ₂ tɨin₂ ꞌŋiog₅, ia₁ i₂të₂jɨ́n₁ bá₄ ꞌéi₂, jaun₂ lɨ́in₅ jmei₂ dsa₂ të₂jɨ́n₁.
45 La₁ia₁, ꞌuɨg₅₄ ia₁ a₂juáꞌ₅ jniá₂ jág₁ dsau₅ në́₃, tsá₃ ꞌéngꞌ₂ jág₁ quió₃.
46 ¿I₂ꞌein₂ ꞌniaꞌ₂ quɨꞌ₅₄ jmɨg₄ cáun₂ ꞌí₁ a₂rɨn₂ jniá₂ dso₄? Chi₂juaꞌ₂ juáꞌ₅ jniá₂ jág₁ dsau₅, ¿ꞌE₂ lë₃ tsá₃ ꞌénꞌ₂ ꞌniaꞌ₂ jág₁ quió₃?
47 Juɨ₁liaꞌ₂ i₂tén₅ le₃quióꞌ₅ Diú₄, nag₂₃ jág₁ quióꞌ₅ Diú₄. ꞌUɨg₅₄ jaun₂ bá₄ tsá₃ nagꞌ₂ ꞌniaꞌ₂ jág₁: ia₁ tsá₃ ténꞌ₅ ꞌniaꞌ₂ le₃quióꞌ₅ Diú₄.
Néꞌ₃ guë́₄ a₂le₃chan₂ Abraham, jme₁ma₂chan₂ bá₄ Te₁guiꞌ₅₄
48 Jaun₂ në́₃ ca₂ŋag₃ dsa₂ judíos ca₂ŋɨ́iꞌ₃ Jesús:
―¿Tsa₁ dsau₅ jág₁ a₂juaꞌ₂ jniaꞌ₅₄, dsa₂ chan₂ Samaria bá₄ lɨ́nꞌ₅ ꞌne₂; a₂ꞌen₅₄ jan₂ je₂naꞌ₅₄ të₂ꞌauꞌ₂ në́₃?
49 Jaun₂ ca₂ŋag₃ Jesús:
―Liaꞌ₂ ꞌi₁jan₂ je₂naꞌ₅₄ tsá₃ ꞌen₅₄ të₂dsɨ₃. A₂jaun₂ bá₄ jmo₅ jniá₂ a₂jme₂juɨ́nꞌ₁ jniá₂ Ŋeꞌ₃; ꞌniaꞌ₂ guëꞌ₂, tsá₃ jme₂goꞌ₃ jniá₂.
50 Tsá₃ a₂jaun₂ ꞌnáuꞌ₅ jniá₂ a₂jme₃juagꞌ₂ dsa₂, la₁ chan₂ jan₂ i₂ꞌnoꞌ₂ a₂jme₃juagꞌ₂ dsa₂ jniá₂, tonꞌ₂ ꞌéi₂ bá₄ con₂ jág₁ dsau₅.
51 A₂dsɨ₂jóꞌ₃ juɨ́g₂ jniá₂ ꞌniaꞌ₂, chi₂juaꞌ₂ ꞌein₂ dsa₂ i₂tónꞌ₂ juɨ₅ jág₁ quió₃, liaꞌ₂ o₁lɨ́gꞌ₂ jmɨg₄ tsá₃ dsɨ₃ŋɨi₅₄ ꞌmú₃.
52 Jaun₂ në́₃ ca₂ŋag₃ dsa₂ judíos:
―Në₃ guë́₄ dsónꞌ₂ jag₂ jniaꞌ₅₄ a₂ꞌen₅₄ jan₂ je₂naꞌ₅₄ të₂ꞌauꞌ₂. Ia₁ ma₂ca₂jon₃ Abraham liaꞌ₂ jma₃quianꞌ₅₄ dsa₂ i₂qui₂ca₂ꞌë́₂ jág₁ quián₅ Diú₄; ꞌne₂ guëꞌ₂ juáꞌ₂: “Juɨ₁liaꞌ₂ i₂tónꞌ₂ juɨ₅ jág₁ quió₃, tsá₃ lɨ́gꞌ₂ dsɨ₃ŋɨi₅₄ ꞌmú₃.”
53 ¿O₃ bá₄ ꞌŋio₅ lɨn₃ guë́₄ juɨnꞌ₂ ꞌne₂ liaꞌ₂ conꞌ₂ guë́₄ Abraham ꞌlag₄ jmei₂ jniaꞌ₅₄? Ca₂jon₃ bá₄ ꞌéi₂, ján₃ bá₄ le₂jaun₂ qui₂ca₂dsan₃ dsa₂ i₂jme₁ꞌë́₂ jág₁ quián₅ Diú₄. ¿ꞌEin₂ lɨ́nꞌ₂ ꞌne₂ lɨ́ngꞌ₅?
54 Jaun₂ ca₂ŋag₃ Jesús:
―Chi₂juaꞌ₂ ꞌŋió₃ jniá₂ jme₂juɨ́ngꞌ₂, tsá₃ ꞌe₂ quen₅ a₂jaun₂. La₁ia₁ juɨ₁liaꞌ₂ i₂jme₂juagꞌ₂ jniá₂, Ŋeꞌ₃ bá₄ jniá₂ ꞌéi₂, i₂ꞌɨ́nꞌ₅ ꞌniaꞌ₂ lɨ́n₅ Diú₄ quiángꞌ₂.
55 O₁jŋiaꞌ₅₄ tsá₃ cuɨnꞌ₂ ꞌniaꞌ₂ ꞌéi₂, la₁ cuɨ́n₅ bá₄ jniá₂ ꞌéi₂. Juaꞌ₅₄ meiꞌ₂ guë́₃ juáꞌ₅ jniá₂ a₂tsá₃ cuɨ́in₅, jme₁lén₂ jniá₂ jan₂ i₂të₂jɨ́n₁ juɨ₁liaꞌ₂ lɨ́nꞌ₅ ꞌniaꞌ₂. La₁ia₁ dsónꞌ₂ bá₄ cuɨ́n₅ jniá₂ ꞌéi₂, jaun₂ tónꞌ₅ bá₄ jniá₂ juɨ₅ jág₁ quióꞌ₅.
56 Ca₂jmo₃ ꞌioꞌ₂ Abraham, ꞌlag₄ ŋéiꞌ₅ ꞌniaꞌ₂, ia₁ jme₁ꞌɨ́n₂ dsɨ́₅ jág₃ jmɨg₄ i₁guan₃ jniá₂; jaun₂ ca₂jág₃, jaun₂ ꞌŋio₅ lɨn₃ ꞌioꞌ₂ ca₂jénꞌ₃.
57 Jaun₂ në́₃ ca₂juáꞌ₂ dsa₂ judíos ca₂tsɨ́ꞌ₃ Jesús:
―Tsá₃ ma₂ꞌengꞌ₅₄ bá₄ guë́₄ të₂láu₃-guiá₂ ŋi₂. ¿ꞌA₂ guëꞌ₂ liaꞌ₂ juáꞌ₂ ꞌne₂ a₂ma₂jɨngꞌ₅₄ ꞌlag₄ Abraham?
58 Jaun₂ ca₂ŋag₃ Jesús:
―A₂dsɨ₂jóꞌ₃ juɨg₂ jniá₂ ꞌniaꞌ₂, néꞌ₃ guë́₄ a₂le₃chan₂ Abraham, jniá₂ lɨ́ng₅.g
59 Jaun₂ në́₃ qui₂ca₂jŋaꞌ₃ cang₄ a₂jme₁quiꞌ₃ quióꞌ₅. La₁ ca₂ꞌma₃ bá₄ Jesús, jaun₂ o₂ꞌɨ́in₃ i₁dsi₅ guáꞌ₅ templo.h