Jesús wakáraꞌaka raꞌapiyatéjena iꞌimaká Tupana yukuna ajopánajlo, ajopánajlo ke, yukuna marí
9
E rawakata iyamá iphata jiꞌimaji nakojé kele (12) raꞌapiyatéjena iꞌimakaño. Najló raꞌá péchuji, raú nawakáraꞌakaloje jiñana pechu jáchoꞌoko inaꞌuké eꞌiyayá. Raú kaja natejmoꞌótakaloje natámina iꞌimakaño keꞌiyapejé nayaripune liyá.
San Lucas 9.1-27
2 Riwakáraꞌa neꞌemaká Tupana yukuna ajopánajlo, raú nayuríkaloje nachó rijló riꞌimakáloje nawakáraꞌajeri penaje, natejmoꞌótakaloje kaja natámina keꞌiyapejé nayaripune liyá.
3 Rimá najló:
—Mapeja iꞌijnajika, unká na ijñaꞌalaje ijwaꞌató. Unká kaja ijñaꞌalaje ikutiware, itulané, aꞌajnejí, liñeru, kaje ijwaꞌató. Pajluwaja aꞌarumaká chuja iꞌijnajé.
4 Iphájika pajimila ejo wakajé, iyurejo ajopana waꞌaté nañakaré chu. Najwaꞌateja iyurejo, aꞌajná iꞌimajika re ketana.
5 Unkájika ee pajimila iphájikare ejo eyájena wátalaje iká, jáchoꞌojiko reyá yámona, itakaꞌajé jiꞌimaꞌulá nakiyá muꞌupé najimaje, raú naweꞌepíkaloje puꞌuwaré laꞌajeñó neká, unkale nawátala ipurákaꞌalo jemaꞌakana, —ke rimaká najló.
6 E náchoꞌo reyá, iꞌijnaño apú ewá, apú ewá ke. Rewá neꞌemá Tupana iꞌimataka inaꞌuké kapichákajo liyá yukuna najló. Natejmoꞌóta kaja natámina.
Mékeka Herodes pechu iꞌimaká Jesús nakú yukuna marí
7 Rejéchami kajrú wani nakaje Jesús laꞌakare yukuna jemaꞌakó rewá. Neꞌemakana Herodes jemaꞌarí kaja riyukuna. Neꞌiyajena kemakeño Jesús nakú: “Apala Juan el Bautista penájemi kaꞌajná kele makápoꞌoro piño rapumí chuwá”.
Ilé kaje aú unká Herodes weꞌepike palá na wánika Jesús iꞌimaká.
8 Eyá ajopana kemakeño rinaku: “Apala pajluwa Tupana purákaꞌalo jaꞌapátajeri, Elías michú iꞌimaká penájemi, kaꞌajná kele makápoꞌoro piño iphari majó”, ke.
Eyá ajopana kemakeño rinaku: “Apala Tupana purákaꞌalo jaꞌapátajeño michuna nakiyana kaꞌajná riká, makápoꞌoro piño”.
9 Eyá Herodes kemari rinaku: “Nuká wakáraꞌari Juan michú núrupi mataꞌakana iꞌimaká. Eta, ¿mékaje ta chi kele nemá nakú: ‘Piyuke wani laꞌaká riká’?”, ke rimaká.
Ñaké iꞌimakale, riwata wani Jesús amákana.
Jesús aꞌaká cinco mil inaꞌukénajlo aꞌajnejí yukuna marí
10 E kaja Jesús jaꞌapiyatéjena, riwakáraꞌakarena iꞌimaká penájemina, paꞌañó piño napumí chuwá. Piyukeja nakaje nalaꞌakare rewá iꞌimaká yukuna neꞌemá rijló. E riwaꞌa neká ají ke pajimila Betsaida ejo, rewá neꞌemakáloje nekámika.
11 Eꞌiyonaja ajopana weꞌepiño méñoꞌojoka neꞌejnaká, raú neꞌejná kaja nápumichu peꞌiyowa, iphaño nanaku. Re rewíñaꞌata neká Tupana nakú nawátakaloje riká nawakáraꞌajeri penaje. Ritejmoꞌota kaja natámina iꞌimakaño.
12 E kaja najúwaꞌa. E raꞌapiyatéjena, iyamá iphata jiꞌimaji nakojé kele (12), iꞌijnaño Jesús awaꞌajé, nemá rijló:
—Piwakáraꞌa napaꞌakó pajimila ejo nawarúwaꞌakaloje aꞌajnejí najluwa reyá, ñaké kaja nakulákaloje napukuno nakamátakoloje rejo. Unká na iꞌimalá najló maare.
13 Eꞌiyonaja rimá najló:
—Unká napaꞌalajo, iká aꞌajeño najló aꞌajnejí.
Raú nemá rijló:
—Pajluwa théꞌela kaꞌalá ñani pan, eyá iyajmela ñani jíñanaja kalé maare. ¿E piwátaka weꞌejnaká aꞌajnejí warúwaꞌaje najló? ¡Íkiꞌiruna wani ta neká maare!
14 Cinco mil kaꞌajná achiñana waja lapaꞌatako. Re kaja inaana, yuwaná waꞌaté, iꞌimaño najwaꞌaté re. E Jesús kemari raꞌapiyatéjenajlo:
—Iwakáraꞌa nayáꞌako pajwaꞌatéchaka cincuéntano ke waja.
15 Raú nawakáraꞌa nayáꞌako ñaké.
16 Rejomi Jesús ñaꞌarí rikápojo pajluwa théꞌela kaꞌalá pan, iyajmela jíñana waꞌaté. E riyakaꞌo jeꞌechú chojé, rimá Tupánajlo:
—Palá pilaꞌaká weká marí aꞌajnejí aú.
Rejomi ritupaꞌatá najló pan; riyuphaꞌatá kaja jiña jepoꞌoná najló. Raꞌá raꞌapiyatéjenajlo riká natamákaꞌatakaloje piyuke inaꞌukejlo riká penaje.
17 Piyukeja neká ajñaño naꞌajnewá namanoꞌoká ejé. Rejomi raꞌapiyatéjena awakátaño rijlupemí yuríkaro. Iyamá iphata jiꞌimaji nakojé kele (12) kuwáꞌala namanoꞌotá rijlupemí aú puꞌutheno waja.
Pedro weꞌepika na inaꞌukeka Jesús iꞌimaká yukuna marí
18 E apú wakajé piño Jesús iꞌimari raꞌapiyatéjena waꞌaté nekámika ke. Re ripuraꞌó Tupana waꞌaté, rejomi rimá najló:
—¿Meke jemaꞌaká ajopana inaꞌukena kemaká nunaku, na inaꞌukeka nuká nemaká?
Raú nemá rijló:
19 —Neꞌiyajena kemaño pinaku: “Juan el Bautista riká”, ke. Eyá ajopana kemaño pinaku: “Elías riká”, ke. Ajopana kemaño kaja pinaku: “Tupana purákaꞌalo jaꞌapátajeño nakiyánami makápoꞌokaro riká”, ke.
20 E Jesús kemari najló:
—Eta iká, ¿meke imaká nunaku?
Pedro kemari rijló:
—Tupana wakáraꞌakare majó weꞌematájeri penaje piká.
21 Raú Jesús kemari najló:
—¡Pa!, imaniña ajopánajlo nuyukuna, naka nuká.
Jesús kemaká najló mékeka ritakaꞌajika yukuna marí
22 Rejomi rimá najló:
—Inaꞌuké iꞌimakáloje nupalamane penaje iꞌimaká nuká. Kajrú nujñaꞌajika chapú kaje yajwé panaku. Pheñawilana, eyá sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, unká wani wátalaño nuká. Neká laꞌajeño chapú wani nuká. Nawakáraꞌaje nonókana, eꞌiyonaja weji ke kala iꞌimajemi numakápoꞌojo piño nopumí chuwá.
23 E rimá piño najló:
—Iwátajika ee nujwaꞌatéjena iꞌimakana, iyureje iliyó piyuke nakaje laꞌakana ipechu nakú riꞌimaká ke. Unká kaja iweꞌepílaje khaí inakuwá, nenójika iká nupurákaꞌalo yukuna iꞌimakana jimaje.
24 Eyá unká yurílaje riliyó nakaje laꞌakana ripechu keja, kapichájero. Eyá nenójikare nuwátaka ke laꞌakana jimaje, nujwaꞌateje riꞌimakale, iꞌimajero.
25 Unká na penaje inajlo kajrú nakaje ñaꞌakana inajluwa, piyuke nakaje marí ejaꞌawá chu iꞌimakare, iná kapichájikole Tupana liyá rilanakiya.
26 Apáñaꞌaro noꞌopí ajopana eꞌiyá, ñaké kaja apáñaꞌaro nupurákaꞌalo jaꞌapí neꞌiyá, nupaꞌajiko jeꞌechú chiyá majó wakajé, ñaké kaja nopáñaꞌajiko raꞌapí. Inaꞌuké iꞌimakáloje nupalamane penaje iꞌimaká nuká. Piyukeja inaꞌukena wakáraꞌajeri penaje nuphaje piño jeꞌechú chiyá majó. Noraꞌapá waꞌatéjena, jeꞌechú chiyájena, waꞌaté nuphaje. Kajrú mejámaꞌatani kaje eꞌiyowá wephaje majó.
27 Tupana iꞌimajeri inaꞌuké nakiyana wakáraꞌajeri. Nuweꞌepí re neꞌiyajena maare amájeño marí numakare nakú, unká chiyó natakaꞌá. Neká amájeño nujwaꞌatéjena laꞌaká kajrú nakaje Tupana wakáraꞌaka ke —ke rimaká.
Jesús napona apiyákako najimaje yukuna marí
28 Weji ke kuwáꞌata ke (8) kala kaꞌajná jaꞌapaka ejomi, Jesús jáchoꞌoro ipuré jiꞌiwátaje Tupana waꞌaté puraꞌajó. Riwaꞌa rijwaꞌató Pedro, Santiago, Juan, keleja.
San Lucas 9.28-56
29 E kaja nephá rejo. Jesús puraꞌakó Tupana waꞌaté ketana rijimá apiyákako. Jareni wani, sereni ke raꞌarumaká amako rejéchami.
30-31 E manaꞌí chiyó iyamá achiñana iphaño rinaku rejé kajrú mejámaꞌatani kaje waꞌaté. Moisés, Elías waꞌaté neꞌemaká. Neká puraꞌañó Jesús waꞌaté chapú kaje yajwé rijñaꞌajíkare nakú panaku Jerusalén e, Tupana pechu nakú riꞌimaká ke.
32 Aꞌapona ke tapú cháꞌataka Pedro, rijwaꞌaté iꞌimakaño waꞌaté, eꞌiyonaja unká nakamátalo. Raú namá kajrú mejámaꞌatani ke iꞌimaká Jesús nakú, ñaké kaja rijwaꞌaté iꞌimakaño nakú.
33 Rejéchami iyamá iphaño rawaꞌajé kapichako Jesús awaꞌayá sujwí ke. Rejomi Pedro kemari Jesusjlo:
—Wewíñaꞌatajeri, ¡meke palá weká maare! Iꞌijná walaꞌachí weji kele kaꞌapejé maare wajluwa: pajlúwaꞌala walaꞌajé pijló, apaꞌalá Moisesjlo, eyá apaꞌalá Elíasjlo.
Rimakáchojonaja mapeja ñaké, kaja unká riweꞌepila nájeka rimaká ñaké.
34 Ilé ke Pedro kemaká ejéchami, juni juwákaꞌala itaká nachá, raú nakeroꞌó.
35 Reꞌiyayá Tupana kemari najló:
—Marí Nuꞌurí, íkiꞌija nuwátakare. Jemaꞌá palá raꞌapiyá.
36 Ilé ke rimaká najló ejomi, Jesús ja kalé namá. E napaꞌó. Unká neꞌemalá ajopánajlo riyukuna, napechu nakuja riꞌimá.
Jesús wakáraꞌaka jiñá pechu jáchoꞌoko pajluwaja yuwají eꞌiyayá yukuna marí
37 Rejomi nawitúkaꞌa ipuré nakiyá, e muní ke kajrú inaꞌukena iphaka piño Jesús nakú.
38 E pajluwaja nanakiyana kemari kaphí Jesusjlo:
—Wewíñaꞌatajeri, pilaꞌá nojló nakaje, pamá kaji nuꞌurí. Pajluwaja ñani riká.
39 Re jiñá pechu reꞌiyá. Richáꞌatakachu riká, kajrú rawíyoꞌoka, waꞌató ke ritakaꞌatako. Rejéchami kemuꞌureni jeñoꞌoká rinuma chiyá. Chapú wani jiñá pechu laꞌaká riká, unká riwatánaꞌatala riká.
40 Kaja numíchajla paꞌapiyatéjenajlo nakaꞌakáloje riká reꞌiyayá, eꞌiyonaja unká meke nalaꞌalacha riká.
41 E Jesús kemari raꞌapiyatéjenajlo:
—¡Meke unká wani ipechu iꞌimalá Tupana chojé kaphí! ¿Unká joꞌó chi iweꞌepila palá naka laꞌakana palani, eyá naka laꞌakana unká paala? ¿Meketana júpika nujñaꞌajika panaku iká? ¿Meketana júpika nuꞌumajika re joꞌó kaja ijwaꞌaté iweꞌepíkaloje rinakojé nuliyá?
E rimá kele yuwají jaraꞌapajlo:
—Piwáꞌicha piꞌirí.
42 Raú riwaꞌa riꞌirí rejo. Eja jiñá pechu kojnoꞌótari pajimó kele yuwají teꞌerí eꞌiyajé, waꞌató ke ritakaꞌatako. E Jesús akhaꞌarí jiñá pechu reꞌiyá iꞌimakare, raú ráchoꞌo reꞌiyayá, rejomi peyajweni riꞌimaká reyá aꞌajná ñoꞌojó. E rimá raraꞌapajlo:
—Marí piꞌirí.
43 Raú ramájeño pechu iꞌimá Jesús nakú: “¡Meke piyuke wani rilaꞌalaka Tupana Pechu aú!”
Jesús iꞌimaká najló mékeka ritakaꞌajika yukuna marí
Kajrú inaꞌukena iꞌijnatájika napéchuwa nakaje Jesús laꞌajíkare nakú. E Jesús kemari raꞌapiyatéjenajlo:
44 —Jemaꞌá marí palá. Ipechu kapicháñaaniña marí: Inaꞌuké iꞌimakáloje nupalamane penaje iꞌimaká nuká. Naꞌajé nupinánajlo nuká nalaꞌakáloje chapú nuká nawátaka ke penaje.
45 Eꞌiyonaja unká raꞌapiyatéjena weꞌepila meke kemakánaka nakaje rimakare rinakuwá najló nakojé, meꞌechuje joꞌó riꞌimakale najló. Unká kaja nakejáꞌala riliyá riyukuna, nawó laꞌakole raꞌapejé.
Nacháꞌatajeri yukuna marí
46 E kaja raꞌapiyatéjena akhaꞌákaño pajwaꞌatéchaka naka cháꞌatari nakaje laꞌakana aú neꞌiyá. Jimaje nakhaꞌako pajwaꞌatéchaka.
47 Jesús weꞌepiri mékeka napechu iꞌimaká, raú riwaꞌa pajluwaja yuwají rejo, rejomi ritáraꞌata riká rawaꞌajó.
48 E rimá najló:
—Wátajeri marí yuwají, nujwaꞌateje riꞌimakale, wátajeri kaja nuká. Eyá wátajeri nuká, wátajeri kaja Tupana, wakáraꞌari nuꞌumaká majó. Unká laꞌalá rikó kajrú laꞌaká ke, iꞌimari ajopana nujwaꞌatéjena chaje.
49 E Juan kemari rijló:
—Wewíñaꞌatajeri, aꞌajná ñoꞌojó wamá pajluwa wakáraꞌaka jiñana pechu jáchoꞌoko inaꞌuké eꞌiyayá. Pipurákaꞌalo aú riwakáraꞌa náchoꞌoko reꞌiyayá. Unká wanakiyana kalé riꞌimaká, raú wawíyoꞌo rijló ñaké laꞌakana cha.
50 Jesús kemari rijló:
—Unká paala imaká rijló ñaké. Unkachu rilaꞌalá weká chapú, rilaꞌá weká palá. Wanakiyana riká.
Jesús akhaꞌaká Santiago, Juan waꞌaté, yukuna marí
51 Yewíchaja riphaka Jesusjlo rená ráchoꞌokoloje jeꞌechú chojé. Ñakele rilaꞌá kaphí ripéchuwa riꞌijnakáloje Jerusalén ejo penaje.
52 Riwakáraꞌa ajopana iyamá ritukumó pajimila ejo, Samaria teꞌeré eyá, neꞌejnakáloje pají kulaje nakamátakoloje richu, napunana chu.
53 Raú neꞌejná rejo pají kulaje. Eꞌiyonaja re iꞌimakaño, Samaria eyájena, unká wátalaño Jesús iꞌimaká re neꞌiyá, Jerusalén ejo riꞌijnakale.
54 Raú napaꞌó riyukuna iꞌimajé najló. Santiago, Juan waꞌaté kemaño Jesusjlo:
—Wawakáraꞌajeri, ¿e piwátaka wakapichátaka neká keraꞌathani jeꞌechú chiyaje aú ripachá? Elías michú wakáraꞌaka júpimi keraꞌathani jaꞌakó jeꞌechú chiyá ajopana chaje ke kaja. ¿E piwátaka wakapichátaka neká ñaké kaja?
55 Raú riyakaꞌo nachaje, rakhaꞌakó rimaká najló:
—Unká nuweꞌepila nájeka ipechu apoꞌojó wani. Inaꞌuké iꞌimakáloje nupalamane penaje iꞌimaká nuká.
56 Unká nukapichátakaloje inaꞌuké penaje kalé nuphá majó. Nuꞌumatákaloje neká kapichákajo liyá penaje nuphá —ke rimaká najló.
Reyá neꞌejná apú pajimila ejo.
Nawátaka Jesús waꞌaté iꞌijnakana yukuna marí
57 Reyá naꞌapá ají ke iñeꞌepú chuwá ajopana waꞌaté. E pajluwaja kemari Jesusjlo:
—Wawakáraꞌajeri, nuwata pijwaꞌaté iꞌijnakana méñoꞌojoka piꞌijnajika ewá.
Jesús kemari rijló:
San Lucas 9.57-62
58 —Re kamejérinajlo pukunaji nakamátakoloje richu penaje. Kupiraꞌaphánajlo re kaja nañakaré. Eyá nojló, unká pukunaji iꞌimalá nuwatánaꞌakaloje richu penaje. Inaꞌuké iꞌimakáloje nupalamane penaje iꞌimaká nuká —ke rimaká rijló.
59 E rimá apujlo:
—Piꞌijná nujwaꞌaté.
Raú rimá Jesusjlo:
—Paineko nuwata nuñakaré ejo paꞌakano nujáꞌakaloje noraꞌapá tami ritakaꞌajika wakajé.
60 Jesús kemari rijló:
—Unká weꞌepílaño Tupana nakojé, kaja takaꞌakaño ke neká nojló. Neká jáꞌareja kaja takaꞌakaño tami. Pijló numá piꞌijnakáloje Tupana yukuna iꞌimajé ajopánajlo, neꞌemakáloje rijwaꞌatéjena penaje.
61 E apú kemari piño Jesusjlo:
—Nuwata pijwaꞌaté iꞌijnakana, eꞌiyonaja kalé piyurí nupaꞌakó nuñakaré ejo nuyukuno iꞌimajé nojénajlo.
62 Jesús kemari rijló:
—Pajluwa kaꞌajná keñoꞌorí nuwátaka ke laꞌakana weꞌepíkana ritukumó, eꞌiyonaja kalé ñaké kaja riwátaka nakaje laꞌakana rijluwa. Ilé ke iꞌimakaño unká meke laꞌajé iꞌimalájeño Tupana waꞌatéjena nakiyana.