Mékeka nenoka Juan el Bautista yukuna marí
14
Piyuke nakaje Jesús laꞌakare yukuna jemaꞌakó rewá iꞌimaká. Riwakajé Herodes iꞌimari Galilea teꞌeré eyájena iꞌimakana. Riká jemaꞌarí kaja riyukuna.
2 Raú rimá rijwaꞌaté jápajeñojlo: “Apala Juan el Bautista penájemi kaꞌajná kele makápoꞌoro piño rapumí chuwá. Raú Tupana Pechu aú rilaꞌá kajrú nakaje Tupánaja kalé weꞌepíkare laꞌakana”, ke rimaká rinaku.
3 Re joꞌó kaja Juan el Bautista iꞌimaká wakajé, Herodes wakáraꞌari rikaꞌakana inaꞌuké wajákelana chojé. Jepoꞌokeja nayurika riꞌimaká richu. Ilé ke Herodes laꞌaká riꞌimaká chapú riyajalo Herodías purákaꞌalo aú. Reꞌewé Felipe yajálomi ruꞌumaká paineko,
4 eꞌiyonaja rikaꞌá riliyá ruꞌumaká. Ilé ke rilaꞌaká pachá Juan akhaꞌarí riꞌimaká, rimá rijló: “Peꞌewé yajalo penájemiru kelerú piꞌimá waꞌaté meꞌetení, unká Tupana wátala iná laꞌaká ilé ke”.
5 Ilé ke rimaká rijló aú, Herodes wátari rinókana, eꞌiyonaja rikeroꞌó inaꞌuké piyá, palá napechu iꞌimakale Juan nakú. “Tupana purákaꞌalo jaꞌapátajeri riká”, ke napechu iꞌimajika rinaku.
6 E kaja Herodes iphátari jarechí, raú rilaꞌá fiesta. Riwakajé kajrú riyukupéraꞌakarena iphaka rinaku, raú riwakáraꞌa riyajalo itu arápaꞌaka najimaje piyuke. Palá wani riꞌimaká rinaku,
7 raú rimá rojló:
—Pikejaꞌa nuliyá nakaje piwátakare meꞌetení, noꞌojé pijló riká. Tupana weꞌepiri kewaka numaká.
8 Raú ruꞌujná roló ejo rojló kemaje naka rukejáꞌajika riliyá.
Raú rumá rútujlo:
—Pimá rijló, raꞌachí pijló pachiya chojé Juan el Bautista wílaꞌarumi.
E rupaꞌó ropumí chuwá rijló kemaje ñaké.
9 Ilé ke rumaká Heródesjlo aú, kamuꞌují wani ripechu laꞌakó, eꞌiyonaja unká meke rilaꞌalajla. Kaja rimá rojló iꞌimaká: “Noꞌojé pijló nakaje piwátajikare kaje. Tupana weꞌepiri kewaka numaká”, ke. Piyukeja inaꞌukena riyukupéraꞌakarena jimaje rimá rojló ñaké, raú riwakáraꞌa naꞌaká rojló riwílaꞌarumi.
10 Riwakáraꞌa pajluwa inaꞌuké iꞌijnaká inaꞌuké wajákelana ejo Juan núrupi mataꞌajé, raú nalaꞌá rimaká najló ke.
11 Rejomi nayáꞌata riwílaꞌarumi pachiya chojé naꞌakáloje rojló riká. Rejomi roꞌó rolojlo riká, raú ruweꞌepí kaja nenóchaka riká. Ilé ke nenoka Juan michú iꞌimaká.
12 Nenoka riká ejomi, raꞌapiyatéjenami iꞌijnaño inaꞌuké wajákelana ejo ritami ñaꞌajé, natoꞌotákaloje ritami támijimina toꞌotákelana chojé. Rejomi neꞌejná riyukuna iꞌimajé Jesusjlo.
Jesús aꞌaká cinco mil inaꞌukénajlo aꞌajnejí yukuna marí
13 Kaja neꞌemá Jesusjlo riyukuna. E riꞌijná reyá raꞌapiyatéjena waꞌaté wapuru chu apoꞌojó reyá, rewá neꞌemakáloje nekoja ajopana inaꞌukena liyá, eꞌiyonaja ajopana weꞌepiño méñoꞌojoka neꞌejnaká. Kajrú pajimila iꞌimaká rewá. Re iꞌimakaño iꞌijnaño peꞌiyoówa ají ke neꞌejnaká ejo, iphaño natukumá.
14 E kaja narúkaꞌo. E Jesús jáchoꞌoro wapuru chiyá, amari kajrú wani inaꞌukena iꞌimaká re. Riweꞌepí namuꞌují, raú ritejmoꞌota natámina nawáꞌakarena rejo.
15 Natejmoꞌótakana nakú najúwaꞌa. E raꞌapiyatéjena iꞌijnaño rawaꞌajé, kemaño rijló:
—Kaja wajúwaꞌaka chuwa, unká na ñakaré iꞌimalá maárowa, ñakele piwakáraꞌa chuwa inaꞌuké paꞌakó pajimila ejo nawarúwaꞌakaloje najluwa aꞌajnejí reyá.
16 Eꞌiyonaja Jesús kemari najló:
—Unká napaꞌalajo, iká aꞌajeño najló aꞌajnejí.
17 Raú nemá rijló:
—Unká aꞌajnejí iꞌimalá maare najñákaloje. Pajluwa théꞌela kaꞌalá ñani pan, iyajmela jíñana ñánija kalé maare wakapi.
18 Rimá najló:
—Ijiꞌichá riká majó.
19 E riwakáraꞌa nayáꞌako jimichi palá nojé rewá iꞌimakare eꞌiyajé. Rejomi rijñaꞌá rikápojo pajluwa théꞌela kaꞌalá pan, iyajmela jíñana waꞌaté. E riyakaꞌo jeꞌechú chojé, rimá Tupánajlo:
—Palá pilaꞌaká weká marí aꞌajnejí aú.
Rejomi ritupaꞌatá pan najló; riyuphaꞌatá kaja jiña najló. Raꞌá raꞌapiyatéjenajlo riká natamákaꞌatakaloje piyuke inaꞌukejlo riká penaje.
20-21 Piyukeja najñaka naꞌajnewá namanoꞌoká ejé. Cinco mil ewá kaꞌajná achiñana iꞌimaká. Nekaja kalé nalapaꞌatá iꞌimaká, unká nalapaꞌatala inaana, yuwaná waꞌaté. Rejomi raꞌapiyatéjena awakátaño rijlupemí yuríkaro. Iyamá iphata jiꞌimaji nakojé kele (12) kuwáꞌala namanoꞌotá rijlupemí aú puꞌutheno waja.
Jesús jaꞌapaka juni jimó yukuna marí
22 Rejomi Jesús wakáraꞌari raꞌapiyatéjena witúkaꞌaka wapuru chojé nakuwáꞌakaloje kaéja paꞌanajo pitá ritukumá. Riwakáraꞌa ajopana inaꞌukena paꞌakó.
23 Rejomi riꞌijrá rikoja yenuri jiꞌiwátaje Tupana waꞌaté puraꞌajó. Kaja kalajerúwaka neꞌemaká.
24 Raꞌapiyatéjena iꞌimaño kaéja peꞌiyó leñakaje nakú. Karená iphari ají ke najimajo kaphí, raú kajrú juni yokoꞌokó. Riyokola ñaꞌarí wapuru nakojé kaphí.
25 Kaja ewaja najmeꞌetá, luwíchiphika ee Jesús iphari nanaku. Mapeja raꞌapaka juni jimó.
26 Namaka riká aú, kajrú nakeroꞌokó, raú nawíyoꞌo:
—¡Apala inaꞌuké ñakami ta kaꞌajná kele waícha!
27 E Jesús kemari najló:
—¡Ilaꞌá ipéchuwa kaphí, Jesús nuká, ikeroꞌoniño!
28 Raú Pedro kemari rijló:
—Piká piꞌimajika ee, piwakáraꞌa kaja noꞌopaka ñaké juni jimó pijimajo.
29 —Majó piꞌijná —ke Jesús kemaká rijló.
Raú Pedro jáchoꞌoro wapuru chiyá juni jimaje. Rikeñoꞌó juni jimó jaꞌapákana ají ke Jesús jimajo.
30 Rejéchami ripechu iꞌimaká: “¡Kaphini wani ta karená!”
Raú rikeroꞌó, waꞌató ke raꞌakó junápeje. Reja rawíyoꞌo:
—¡Piꞌimatá nuká!
31 Rejéchami Jesús pataká riká raꞌanapitá nakiyá. Ráchoꞌota junápiya riká, rimá rijló:
—¡Wejápaja wani pipechu kaphí nochojé! ¿Naje piyuricha kaphí nochojé iꞌimakana?
32 Rejéchami nawitúkaꞌaka wapuru chojé, waꞌató ke karená mataꞌaká.
33 E wapuru chu iꞌimakaño táraꞌaño neꞌerúpachi aú Jesús jimaje, nemá rijló:
—Tupana iꞌirí joꞌó piká.
34 Rejomi nakuwaꞌa paꞌanajo pitá ají ke Genesaret teꞌeré ejo.
35 Namaka Jesús aú, neꞌemá riyukuna apujlo, apujlo ke, nateꞌeré ewá. Raú nawaꞌa kajrú natámina riꞌimaká ejo.
36 Natámina iꞌimakaño kemaño rijló riyuríkaloje najápaka raꞌarumaká jiꞌimá nakú, raú piyukeja rinaku jápajeño tejmoꞌotako.
Jesús camina sobre el agua (Mateo 14.22-36)